I Iaveh Mpanjaka sady Mpitsara
1 Mihirà fihiram-baovao ho an’i Iaveh!
Mihirà ho an’i Iaveh ianareo monina amin’ny tany rehetra.
2 Mihirà ho an’i Iaveh, misaora ny Anarany.
Lazao isan’andro ny famonjeny,
3 ambarao amin’ny firenena ny voninahiny,
ary amin’ny firenena rehetra ny fahagagany.
4 Fa lehibe sy mendrika ny fiderana rehetra,
mahatahotra mihoatra noho izay andriamanitra rehetra Izy,
5 fa tsinontsinonaavokoa ny andriamanitry ny firenena.
Fa i Iaveh no nanao ny lanitra.
6 Manoloana Azy ny famirapiratana amam-pahalehibeazana;
ao amin’ny fitoerany masinany hery amam-piandrianana.
7 Manomeza an’i Iaveh, ry fokom-pirenena rehetra,
manomeza voninahitra amam-pahefana an’i Iaveh.
8 Omeo an’i Iaveh ny voninahitra mendrika ny Anarany.
Mitondrà ny fanatitra, ka mankanesa eo an-kianjany.
9 Miankohofa eo anatrehan’i Iaveh amin’ny fanamiana masina,
mangovita eo anatrehany ianareo monina amin’ny tany rehetra!
10 Lazao eo amin’ny firenena hoe: «I Iaveh no mpanjaka»;
ka hitoetra sy tsy hihetsiketsika izao tontolo izao;
hitsara ny vahoaka araka ny rariny Izy,
11 Aoka hifaly ny lanitra,
sy hiravoravo ny tany.
Aoka hisebiseby ny ranomasina mbamin’izay rehetra ao aminy;
12 aoka ho miramirana ny saha mbamin’izay rehetra ao aminy
aoka hihoby ny hazo rehetra any an’ala,
13 eo anatrehan’i Iaveh fa avy Izy.
Avy hitsara ny tany Izy;
hitsara izao tontolo izao araka ny rariny Izy,
ary ny firenena, araka ny fahamarinany.