Author: admin

Fiverenana avy any an-tsesitany

1 Fa i Jakôba kosa hiantran’i Iaveh,

ary i Israely mbola hofidiny;

hamponeniny amin’ny taniny indray izy;

ny hafa firenena hikambana aminy,

sy hiraikitra amin’ny taranak’i Jakôba.

2 Ny firenena no haka azy,

ka hanatitra azy hody,

ary ny taranak’i Israely handray azy ireo ho an’ny tenany,

ao amin’ny tanin’i Iaveh,

ho mpanompo lahy ama-mpanompo vavy;

dia ho tonga mpamabo izay namabo azy izy,

sy hanapaka an’ireo nampahory azy.

Fanarabiana mpanjaka maty nasiaka

3 Ary amin’ny andro hampitsaharan’i Iaveh anao

amin’ny fisasarana aman-tebitebinao,

sy amin’ny fanompoana mafy nampanaovina anao,

4 dia hoventesinao izao hira faniniana izao,

ny amin’ny mpanjakan’i Babilôna, ka hataonao hoe:

«Akory ity niafaran’ilay mpanjaka manao jadona,

ary nitsaharan’ny fampahoriana?

5 Notapahin’i Iaveh ny tehin’ny ratsy fanahy,

ny tehim-panjakan’ny mpanapaka!

6 Nikapoka ny vahoaka tamin-katezerana mafy Izy,

tamin’ny kapoka tsy an-kijanona;

nentin’ny fisafoahany dia nataony ambany jioga ny firenena,

tamin’ny fanenjehana tsy misy hiainana.

7 Indro miadana ny tany rehetra, mandry feizay izy,

velona ny hobin-kafaliana.

8 Ny sipresy aza mifaly amin’ny fahalavoanao

mbamin’ny sedera any Libàna:

Hatrizay nahalavoanao teo izay, tsy misy olona miakatra

hikapa anay intsony.

9 Taitra ny aminao ny Seoly any ambany lalina any,

handeha hitsena anao.

Fohaziny noho ny aminao ny avelo,

ny mpanjakan’ny tany rehetra;

asainy hitsangana avy eo amin’ny seza fiandrianana avokoa,

ny mpanjakan’ny firenena rehetra.

10 Samy miteny izy rehetra, hilaza aminao hoe:

‹Ianao koa miongàna toa anay,

ka indro ianao tsy misy hafa aminay!›

11 Nivarina amin’ny Seoly ny reharehanao,

mbamin’ny feom-balihanao.

Voalafika kankana ianao,

ary olitra no irakofanao!

12 Akory ity ianao no potraka avy any an-danitra,

ry kintana mamirapiratra, zanaky ny maraina?

Akory ity ianao no mitsingidina amin’ny tany,

ianao ilay mpandrava firenena?

13 Ianao ilay nanao anakampo hoe:

‹Hiakatra any an-danitra aho;

ary ambony mihoatra ny kintan’Andriamanitra

no hanandratako ny seza fiandrianako;

hipetraka eo ambonin’ny tendrombohitry ny fivoriana,

eny amin’ny avaratra avotsy hita noanoa;

14 hisondrotra any an-tampon’ny rahona,

ary hitovy amin’ny Avo-Indrindra!›

15 Kanjo indro ianao latsaka atỳ amin’ny Seoly,

atỳ amin’ny hantsana lalina tsy hita noanoa!

16 Izay mahita anao, mibanjina anao,

sady manao tsara jery anao, manao hoe:

‹Io va izany olona nampitabataba ny tany,

nampihozongozona ny fanjakana,

17 nampanjary efitra an’izao tontolo izao,

nandrava ny tanàna,

tsy nandefa ny babo hody any aminy?› »

18 Ny mpanjaka rehetran’ny firenena,

samy mandry amim-boninahitra avokoa,

eo an-tranony avy;

19 fa ianao kosa nariana lavitry ny fasanao,

toy ny sampana atao tsinontsinona,

tototry ny maty novonoina tamin’ny sabatra,

sy voavarina any amin’ny sola-baton’ny hantsana manjombona,

tahaka ny faty voahosihosy.

20 Tsy mba hiaraka amin’izy ireo eny am-pasana ianao,

satria nandevona ny taninao,

ary nandringana ny vahoakanao!

Tsy hotononina mandrakizay

ny taranaky ny ratsy fanahy.

21 Manomàna famonoana hamelezana ny taranany,

noho ny helok’ireo razany.

Aza tafarina intsony hampanaiky ny tany izy ireo,

aoka anie ka tsy handrakotra tanàna

ny vohon’ny tany izy ireo.

Tenin’Andriamanitra mamely an’i Babilôna

22 Hitsangan-kamely ireny aho,

– teny ton’i Iavehn’ny tafika –

ary hofoanako amin’i Babilôna avokoa ny anarana

sy izay sisa eo,

ny taranaka aman-tsolofo,

– teny ton’i Iavehn’ny tafika. –

23 Hataoko fonenan-tsokina,

amam-pihandronan-dranoizy,

ary hofafako amin’ny kofafa fandringanana,

– teny ton’i Iavehn’ny tafika. –

Ho potika i Asora

24 I Iavehn’ny tafika nianiana hoe:

«Eny, ho tò izay hevitra efa nokasaina;

ary ho tanteraka izay efa notapahiko.

25 Hanorotoro an’i Asora amin’ny taniko aho,

ary hanosihosy azy eo an-tendrombohitro.

Dia hoesorina amin’izy ireo ny jiogany,

ary halana eo an-tsorok’izy ireo ny entany.

26 Izany no hevitra raikitra hamelezana ny tany rehetra,

ary tanana ahinjitra hamelezana ny firenena rehetra!

27 Fa i Iavehn’ny tafika no efa nanapaka izany,

ka zovy no hahasakana izany,

ary ny tanany efa nahinjiny,

ka iza no hahasakana izany?»

Fampitandremana ny Filistinina

28 Tamin’ny taona nahafatesan’i Akaza mpanjaka no nivoahan’izao faminaniana izao.

29 Aza manaram-po amin’ny fifaliana, ry Filistinina manontolo,

noho ny nahatapahan’ny tsora-kazo namely anao;

fa hisy menarana hateraky ny tarana-bibilava

ary dragona manidina no haterany.

30 Ka amin’izay ny faraidiny hahita hanina;

ary ny mahantra handry feizay.

Fa ny taranakao kosa, hataoko maty mosary;

ary izay sisa avy aminao, haringana. –

31 Midradradradrà, ry vavahady; miantsoantsoa, ry tanàna;

Matahora mafy, ry Filistinina manontolo!

Fa indro misy setroka tamy avy any avaratra,

ary tsy misy miala amin’ny laharana,

ny antoko-miaramilany.

32 Inona no havaly ireo iraky ny firenena?

Izao: «I Iaveh no nanorina an’i Siôna,

ka mahita fialofana ao izay ory amin’ny vahoakany».

Fitomaniana an’i Môizy

1 Faminaniana ny amin’i Moaba.

Marina tokoa fa ny alina nandrobana azy,

dia fongotra i Ara-Moâba.

Ny alina nandrobana azy,

i Kira-Moabadia fongotra.

2 Miakatra ho any an-tempolin’i Kamaosy sy any Dibôna ny olona,

eny amin’ny fitoerana avo mba higogogogo;

migogogogo ny amin’i Nebô sy i Medebà, i Moaba.

Ny loha mibory avokoa;

ny somotra voaharatra daholo.

3 Eny an-dalam-be izy ireo mitafy lasàka;

eny ambony tafon-trano sy eny an-kianja izy,

minaonaona avokoa, mijoy ranomaso daholo.

4 Mibadabada i Hesebona sy i Eleale;

re hatrany Jahasy ny feony.

Noho izany midradradradra ny mpiadin’i Moaba,

mangovitra ny fanahin’izy io.

5 Ory an’i Moaba ny foko;

efa mby ao Segôra sahady ny mpiaro azy,

efa ao Eglata-Selisiah.

eny, mitomany izy no miakatra ny fiakarana Lohita;

eny amin’ny lalan’i Hôrônaima,

manao antsom-pahoriana ny olona.

6 Satria ritra ny ranon’i Nimrima,

maina ny ahitra,

fongana ny ahi-maitso,

tsy misy intsony izay zava-maitso.

7 Izay zavatra mba azony noraisina sy izay fitaovany,

dia entiny any an-dafin’ny lohasahan-driakan’ny Hazomalahelo.

8 Fa efa re eran’ny faritanin’i Moaba ny fitarainana.

manako hatrany Eglaima ny finanananany,

tonga hatrany Beera-Elima ny finanananany.

9 Satria feno ra ny ranon’i Dimôna.

Fa hampiavy tombon-doza amin’i Dimôna aho,

hampiavy lionaho amin’izay sisan’i Moaba,

dia amin’izay tavela ao amin’ny tany.

Mialokaloka ao Jodà ny Moabita

1 Alefaso ny zanak’ondry mpanapakany tany,

avy any Petrà, hamaky ny efitra,

ho any an-tendrombohitry ny zanakavavin’i Siôna.

2 Tahaka ny vorona mandositra

tahaka ny vorona iray akàny aely,

ny zanaka vavin’i Moaba,

eo amin’ny fitàna an’i Arnôna.

3 Aoka ianao hanoro hevitra anay, hanelanelana anay;

hanome aloka anay, toy ny amin’ny alina,

amin’ny mitatao vovonana;

hanafina ny enjehina, tsy hanondro ny mandositra!

4 Aoka ireo mpandositra avy any Moaba

hahazo mitoetra eo aminao;

aoka ianao ho fiereny,

tsy ho azon’ireo mpandringana izy;

fa mitsahatra ny fanafihana, tapitra ny fandravana,

lasa niala tamin’ny tany ny mpampahory.

5 Tafaorina amin’ny famindram-po ny seza fiandrianana,

ary ny hipetraka amin’izany seza fiandrianana izany,

araka ny fahamarinana,

eo an-dain’i Davida,

dia ny mpitsara anankiray mikendry ny rariny,

ary mazoto hampijoro ny fahamarinana.

Fitomaniana an’i Moaba

6 Fantatray ny avonavon’i Moaba,

ilay fatra-piavonavona,

ny rehareha aman’avonavony, ny anjonanjony

aman-teny mamitaka.

7 Koa aoka i Moaba hitomany an’i Moaba;

aoka hidradradradra izy rehetra!

Ny ampempam-boalobok’i Kira Hereseta,

no aoka hitomanianareo, amim-pahareraham-po mafy.

8 Fa zoin-doza avokoa ny sahan’i Hesebona;

ny amin’ny voalobok’i Sabamà,

dia efa noravan’ny tompon’ny firenena

ny sakeliny mandadina,

izay efa nisandrahaka hatrany Jazera,

nandroso tsy hita lany tany an’efitra,

nandefa lavitra ny solofony,

nampita ny ranomasina.

9 Koa mitomany toy ny itomanian’i Jasera aho,

momba ny voalobok’i Sabamà;

mandrotsaka ranomaso aminareo aho

ry Hesebona, ry Eleale,

fa ny vokatrareo amam-pararanonareo,

no nahatongavan’ny fanakoran’ny mpamia.

10 Foana ny fifaliana amam-piravoravoana

eo amin’ny sahan-kazo mamoa,

tsy misy hira na hobin-kafaliana intsony

eo amin’ny tanimboaloboka;

ny mpioty voaloboka, tsy mamia divay

eo amin’ny famiazana intsony;

efa natsahatra ny hobin’ny mpamia.

11 Koa mipararetra hoatra ny harpa

ny tsinaiko, noho ny amin’i Moaba;

sy ny foko noho ny amin’i Kira-Haresa.

12 Dia no hitan’ny olona i Moaba hisasatra

eo amin’ny fitoerana avony,

hiditra ao amin’ny fitoera-masiny izy hivavaka,

nefa tsy hahazo na inona na inona.

Tenin’Andriamanitra momba an’i Moaba

13 Izany no teny faminaniana nataon’i Iaveh fahiny elany amin’i Moaba.

14 Ary ankehitriny kosa miteny i Iaveh, ka manao hoe: «Ao anatin’ny telo taona, araka ny fanisana ny taona iasan’ny mpikarama, dia ho lefy ny voninahitr’i Moaba mbamin’ny vahoaka be ao aminy, fa zavatra kely foana no ho sisa, sady ho vitsy sy osa.»

Momba an’i Damasa

1 Faminaniana ny amin’i Damasa.

Indro fa i Damasa voaesotra tsy ho isan-tanàna intsony;

dia ho korontan-javatra foana izy!

2 Ny tanànan’i Aroerailaozana,

nafoy ho an’ny biby fiompy izy,

ka mijanona ao tsy misy mampiala azy.

3 Halana amin’i Efraima ny manda,

ary ny fanjakana amin’i Damasa;

ny sisa amin’i Siria,

ho toy ny voninahitry ny zanak’i Israely,

– teny ton’i Iavehn’ny tafika.

4 Izao no hiseho amin’izany andro izany:

ny voninahitr’i Jakôba halazo,

ny tavin’ny tavany hihamahia.

5 Amin’izany dia ho toy ny raha manangona ny amboarany ny mpijinja,

sy raha mitango ny salohim-bary ny tanany;

ho tahaka ny raha manangona salohim-bary ny olona,

eny amin’ny lohasahan-dRefaima.

6 Mbola hisy hotsimponina ihany izy,

toy ny raha manozongozona ny hazo ôliva

misy ôliva roa na telo eny an-tendrony indrindra,

misy efatra na dimy eny amin’ny rantsan’ny hazo,

– teny ton’i Iaveh, Andriamanitr’i Israely.

Ho foana ny fanompoan-tsampy

7 Amin’izany andro izany

ny olona hijery any amin’Ilay nahary azy,

ary hibanjina ny Masin’i Israely ny masony.

8 Fa tsy hijery intsony any amin’ny ôtely asan-tanany izy;

tsy hibanjina intsony izay novolavolain’ny tanany;

dia ny aserah sy ny andrin’ny Masoandro.

Teny famelezana ny sahan’i Adônisy

9 Amin’izany andro izany ny tanànany mafy,

dia ho toy ny tanàna nilaozana eny an’ala aman-tendrombohitra

izay nilaozana teo anoloan’ny zanak’i Israely:

dia ho tany efitra.

10 Satria ianao nanadino ny Andriamanitry ny famonjena anao,

tsy nahatsiaro ny Vatolampin’ny herinao.

Koa dia mamboly voly mahafinaritra ianao,

ary foto-boaloboky ny olon-kafa firenena no ataonao ao.

11 Amin’ny andro ambolenao azy

dia fefenao manodidina izy,

ary ny ampitso maraina,

dia mampamony ny voa nafafinao ianao;

kanjo tsy azonao ny vokatra

amin’ny andron’ny faharariana amam-pangirifiriana mahafaty!

Fisamboaravoaran’ny firenen-kafa

12 Endrey izany fihahohahom-bahoaka be!

Mirohondrohona toy ny firohondrohon’ny ranomasina izy ireo.

firohondrohom-pirenena re izany!

13 Mirohondrohona hoatra ny rano mahery izy.

Mirohondrohona ny firenena toy ny firohondrohon’ny ranobe.

Kanjo rahonanyireny, dia mandositra lavitra,

dia tafaely toy ny mololo tsofin’ny rivotra eny an-kavoana,

toy ny vovoka mitambolimbolina eo anoloan’ny tafio-drivotra.

14 Amin’ny andro hariva dia indro ny fahareraham-po;

alohan’ny maraina dia tsy ao intsony ireny!

Izany no anjaran’ireo mandroba antsika,

izany no hanjò an’ireo mamabo antsika.

Tenin’Andriamanitra mamely an’i Kosa

1 Eh, ry tanyizay andrenesana ny fisasasasan’ny elatra,

any an-dafin’ny onin’i Kosa,

2 izay mandefa irakaeny ambony ranomasina,

amin’ny lakan-jozoro ambonin’ny vohon-drano!

Mandehana ianareoiraka faingam-pandeha,

mankany amin’ny firenena lava ranjanana

sady malambolambo ny hodiny,

any amin’ny vahoaka atahorana any lavitra any;

firenena manao jadon’ny mpanjaka sy manorotoro,

izay vakivakin’ny ony ny taniny.

3 Ry mponina rehetra amin’izao tontolo izao,

ry mponina ambonin’ny tany!

mijereianareo,

rehefa voatsangana eny an-tendrombohitra ny faneva,

mihainoa ianareo rehefa maneno ny trômpetra.

4 Fa izao no nolazain’i Iaveh tamiko:

Hisonanina ato amin’ny fonenako Aho, dia hijery,

toy ny hafanana malefaka raha mamirapiratra ny masoandro,

toy ny ranonando amin’ny hafanam-pararano.

5 Fa alohan’ny fijinjana, rehefa tapitra ny famoniana,

ka efa tonga sampaho efa ho masaka ny voniny,

dia hotapahiny amin’ny antsy ny rantsany,

hoesoriny ny sampany dia hotangosany.

6 Izy rehetra indray hatolotra ho an’ny vorona mpihaza eny an-tendrombohitra

sy ho an’ny biby ambonin’ny tany;

ny vorona mpihaza hihinana azy amin’ny fahavaratra;

ary ny biby ambonin’ny tany koa amin’ny ririnina.

7 Amin’izany andro izany, hisy fanatitra haterina amin’i Iavehn’ny tafika,

avy amin’ny vahoaka lava ranjanana sady malambolambo ny hodiny,

amin’ny vahoaka atahorana any lavitra any,

firenena manao jadona sady manorotoro

ary vakivakin’ny ony ny taniny,

ho ao amin’ny fonenan’ny Anaran’i Iavehn’ny tafika,

any an-tendrombohitra Siôna.

Teny famelezana an’i Ejipta

1 Faminaniana ny amin’i Ejipta.

Indro i Iaveh, mitaingin-drahona maivana

miditra any Ejipta.

Ka ny sampin’i Ejipta, mangovitra eo anatrehany,

ary ny fon’i Ejipta mihonaka ao anatiny.

2 Hamporisika an’i Ejipta hamely an’i EjiptaAho,

ka hiady izy ireo, ny rahalahy amin’ny rahalahy,

ary ny sakaiza amin’ny sakaiza,

ny tanàna amin’ny tanàna, ary ny fanjakana amin’ny fanjakana.

3 Ny fanahin’i Ejipta ho foanaao anatiny;

ary ny fisainany hataoko very;

hanontaniany ny mpimasy ama-mpanao fankatoavana,

mbamin’ny mpamoha angatra ama-mpisikidy.

4 Hatolotro ho an-tanan’ny tompo lozabei Ejipta

ary mpanjaka mahatahotra no hizaka azy,

– teny ton’i Iavehn’ny tafika.

5 Ny rano amin’ny ranomasina ho ritra;

ny ony ho tankina sy ho maina;

6 Ny renirano hanjary maimbo,

ny lahin-dranon’i Ejipta hihena dia ho maina;

ny zozoro amam-bolotara halazo.

7 Ny tanim-bilona manaraka an’i Nila ao amoron’i Nila,

ny saha voafafy rehetra manaraka an’i Nila:

ho maina hanjary foana, ary tsy hisy intsony.

8 Ny mpaka hazandrano hisentosento sy higogogogo,

dia ny mpamintana rehetra, eo an’ony;

ny mpandatsaka harato eo ambonin’ny rano hivaranhotsaka.

9 Ry zareo miasa ny rongony madinika voaraotra,

sy ry zareo manenona ny landihazo, hiraviravy tanana.

10 Ireo andrin’i Ejipta ho torotoro,

ary ny manao taozavatra ho rera-po avokoa.

11 Ny mpanapaka an’i Tanisy adala foana;

ny an’ireo hendry amin’ny mpanolo-tsain’i Faraôna

dia hadalana ny toroheviny.

Ahoana no ahasahianareo milaza amin’i Faraôna hoe:

Zanak’olon-kendry aho,

taranak’andriana fahagola aho?

12 Aiza moa izay olon-kendrinao?

ka aoka hambarany aminao ary aoka hovinanîny

izay nodidian’i Iavehn’ny tafika hanjò an’i Ejipta!

13 Ny mpanapaka an’i Tanisy efa very saina;

ny mpanapaka an’i Memfisy efa voafitaka,

ny tenan’izy ireo, vato fehizoron’ny karazam-pokon’i Ejipta no nandrebireby azy.

14 Norotsahan’i Iaveh fanahy mampandraingiraingy izy,

ka ataony mandraingiraingy i Ejipta amin’ny ataony rehetra,

mova tsy ny olona mamo mandraingiraingy eo am-pandoavany!

15 Ary tsy misy hahasoa an’i Ejipta,

amin’izay rehetra mety ho vitan’ny loha na ny rambo,

ny antrendry na ny zozoro.

Fibebahan’i Ejipta sy i Asiria

16 Amin’izany andro izany i Ejipta, hanahaka ny vehivavy;

ho toran-kovitra sy ho raiki-tahotra,

mahita an’i Iavehn’ny tafika manainga tanana,

izay aingainy hamelezana azy.

17 Ary ny tanin’i Jodà,

hahatahotra mafy an’i Ejipta:

hangovitra izy, isaky ny misy olona hampahatsiaro azy izany anarana izany

noho ny didin’i Iavehn’ny tafika,

izay navoakany hamelezany azy.

18 Amin’izany andro izany hisy tanàna dimy,

any amin’ny tany Ejipta,

izay hiteny amin’ny fiteny Kanaàna

sy hianiana hanompo an’i Iavehn’ny tafika;

ny iray amin’ireo atao hoe Tanàna-Masoandro.

19 Amin’izany andro izany hisy ôtely ho an’i Iaveh,

eo afovoan’ny tany Ejipta.

Ary eo amin’ny sisin-taniny, hisy tsangam-bato ho an’i Iaveh.

20 Ary ho famantarana ho an’i Iavehn’ny tafika izany,

sy ho vavolombelona eo amin’ny tany Ejipta;

ka rehefa hitaraina amin’i Iaveh izy ireo,

noho ny mpampahory azy,

dia haniraka mpamonjy izy,

sy mpiaro mahery hanafaka azy.

21 Hanao izay hahafantaran’i Ejipta azy i Iaveh,

ka hahalala an’i Iaveh i Ejipta

amin’izany andro izany,

hanao sorona amam-panatitra izy ireo,

hivoady amin’i Iaveh sy hanefa izany.

22 Hikapoka an’i Ejipta i Iaveh,

sady hikapoka no hanasitrana!

Hibebaka amin’i Iaveh izy ireo,

ka hety hionona amin’ny fifonany izy, dia hanasitrana azy.

23 Amin’izany andro izany hisy lalana

avy any Ejipta mankany Asiria;

ka ny Asirianina ho tonga ao Ejipta,

ny Ejiptianina ho any Asiria,

dia hanompo an’i Iaveh i Ejipta miaraka amin’i Asora. –

24 Amin’izany andro izany i Israely hikambana

amin’i Ejipta sy i Asiria, izy no fahatelony,

mba ho fitahiana eo amin’ny tany.

25 Hitahy azy ireo i Iavehn’ny tafika hanao hoe:

«Hotahina anie i Ejipta, vahoakako,

sy i Asora, asan’ny tanako,

ary i Israely lovako.»

Ambara fa ho azo i Azota

1 Tamin’ny taona nahatongavan’i Tartananirahin’i Sargona mpanjakan’i Asiria tany Azota, sy nanaovany fahirano azy, sy nahafahany azy,

2 tamin’izany andro izany niteny i Iaveh tamin’ny alalan’i Izaia, zanak’i Amôsa nanao hoe: «Mandehana, borahy ny lasàka manarona ny valahanao, ary esory ny kapa hiala amin’ny tongotrao.» Dia nataony izany, ka nandeha tsy nitafysy tsy nikiraro izy.

3 Ary hoy i Iaveh:

«Toy ny nandehanan’i Izaia, mpanompoko, tsy nitafy, tsy nikiraro,

fa famantarana amam-pambara mandritra ny telo taona,

ho an’i Ejipta sy i Etiôpia izy,

4 no hitondran’ny mpanjakan’i Asiria ny babo avy any Ejipta;

sy ny voasesitany avy any Etiôpia,

na tovolahy, na lahiantitra,

tsy mitafy, tsy mikiraro, miseho valahana,

ho henatr’i Ejipta.

5 Ka ho rera-po sy hangaihay izy ireo amin’izay,

noho ny amin’i Etiôpia, nataony hiankinana,

sy noho ny amin’i Ejipta, nataony rehareha.

6 Amin’izany andro izany ny mponina eo amoron’ity ranomasina ity hanao hoe:

‹Izao lahy no nanjò an’ilay niankinantsika,

ilay noheverintsika mandositra hohatonina

hitady famonjena ary mba ho afaka

eo an-tanan’ny mpanjakan’i Asiria?

Ary isika indray kosa hataontsika ahoana no hahafa-mandositra?› »

Hirodana i Babilôna

1 Faminaniana ny amin’ny efitry ny ranomasina.

Tahaka ny firimorimon’ny tadio mihazo any amin’ny atsimo,

avy any an’efitra izany,

amin’ny tany mahatahotra.

2 Misy fahitanamahatsiravina naseho tamiko:

ny mpandroba, mandroba;

ny mpandrava, mandrava.

«Iakaro, ry Elama! Hodidino, ry Meda!

Hatsahatro ny fisentoanarehetra.»

3 Izany no nahafeno tebiteby ny valahako;

voan’ny fanaintainana aho,

toy ny vehivavy miteraka.

Miolanolana aho, mahare izany; tsiravina aho mahita izany;

4 mivadika ny foko,

raiki-tahotra aho;

ny alina niriko,

natao fotoan’ny horohoro ho ahy.

5 Ny latabatra atsangana, ny tily miambina,

ny olona mihinana sy misotro. –

Mitsangàna, ianareo kapiteny!

Hosory ny ampinga!

6 Fa izao no nolazain’ny Tompo tamiko:

«Mandehana mametraka tily,

ka aoka holazainy izay hitany.

7 Ary ny ho hitany dia mpitaingin-tsoavaly

mpitaingin-tsoavaly mitaingina ampondra,

mpitaingin-tsoavaly mitaingin-drameva.

Dia hijery amim-pitandremana izy, amim-pitandremana fatratra.»

8 Dia niantso toy ny liona izy hoe:

«Eto amin’ny tilikambo fitiliana no ipetrahako, ry Tompo,

tsy an-kijanona tontolo andro

mitsangana eto amin’ny fiambenana aho, isan’alina.

9 Indreo tamy ny olona mitaingin-tsoavaly,

ny mpitaingin-tsoavaly, milahatra tsiroaroa.»

Dia niteny indray izy ka nanao hoe:

«Potraka re! Potraka re i Babilôna!

ary ny sarin’ireo andriamaniny rehetra

nazerany novakiny tamin’ny tany.»

10 Ry variko velezina ô, voam-barin’ny famoloako,

izay reko tamin’i Iavehn’ny tafika,

Andriamanitr’i Israely,

no ambarako aminareo.

Valy omena ny Edômita

11 Faminaniana ny amin’i Domà.

Misy miantso ahy avy any Seira manao hoe:

«Ry tily ô, toy inona alina moa izao?

Ry tily ô, toy inona alina moa izao?»

12 Dia namaly ny tily nanao hoe:

«Tonga ny maraina, ary ny alina koa.

Raha te-hanontany ahy ianareo, manontania;

tongava indray amin’ny fotoana hafa.»

Tenin’Andriamanitra momba ny Arabo

13 Faminaniana any Arabia.

Any an-tanilemaka foana any Arabia ianareo no handry,

ry andian’i Dedana.

14 Mitondrà rano hitsenàna an’izay mangetaheta!

Ny mponina amin’ny tanin’i Temà,

manatitra mofo ho an’ny mpandositra.

15 Fa izy nandositra teo anatrehan’ny sabatra,

teo anatrehan’ny sabatra voatsoaka,

teo anatrehan’ny tsipìka voahenjana,

teo anatrehan’ny ady mahatsiravina.

Teny famelezana an’i Sedara

16 Satria izao no nolazain’ny Tompo tamiko:

«Herintaona, araka ny fanisana ny taonan’ny mpikarama, sisa

dia ho levona avokoa ny voninahitr’i Sedara;

ary amin’ireo tsipìka maro an’ny lehilahy mahery, zanak’i Sedara,

dia kely foana no sisa tavela,

fa i Iaveh Andriamanitr’i Israely no efa niteny.»

Teny famelezana ny hafanam-pon’i Jerosalema be loatra

1 Faminaniana ny amin’i Lohasahan’ny fahitana.

Maninona ity ianao, no miakatra

ambony tafon-trano avokoa,

2 ry tanàna be horakoraka sy feno tabataba,

ry vohitra miravoravo?

Ny maty eo aminao tsy mba matin-tsabatra,

na lavo an’ady.

3 Ny lehibenao indray nandositra avokoa,

voasambotra tsy amin-tsipìka;

ny vahoakanao indray azo avokoa,

teny am-pandosirana any lavitra any.

4 Koa niteny aho nanao hoe: «Mihodìna tsy hijery ahy,

aoka hitomany mafy aho!

Aza maimay hampionona ahy,

noho ny fandringanana ny zanaka vavin’ny vahoakako.»

5 Fa andron’ny tabataba,

fanosihosena, fahaverezan-kevitra ity,

ka nalefan’ny Tompo Iavehn’ny tafika,

ho any amin’ny Lohasahan’ny fahitana;

ravana ny manda,

misy dradradradra re eny an-tendrombohitra eny.

6 I Elama mandray ny tranon-jana-tsipìka,

tamy izy mitondra kalesy ama-mpitaingin-tsoavaly;

ary Kira nanala fono ny ampingany.

7 Feno kalesy ny lohasahanao tsara indrindra;

ary mitana fitoerana eo am-bavahadinao,

ny mpitaingin-tsoavaly.

8 Nalana tamin’i Jodà ny fisalobonany.

Teny famelezana ny fiomanan’ny tafika

Amin’izany andro izany dia manopy maso ianao,

mankany amin’ny fitahirizam-piadiana ao an-dapan’ny ala,

9 ary ny banga amin’ny tanànan’i Davida,

hitanareo fa betsaka.

Novorinareo ny rano amin’ny kamory ambany,

10 nisainareo ny trano ao Jerosalema

ary noravanareo ny trano hamboarana ny manda.

11 Nanao fitahirizan-drano eo anelanelan’ny manda roa ianareo,

halehan’ny rano avy amin’ny kamory tranainy.

Kanefa Ilay nanao izany tsy nojerenao akory,

Ilay nanomana izany hatry ny ela tsy hitanareo akory.

12 Ny Tompo Iavehn’ny tafika, niantso anareo,

tamin’izany andro izany,

hitomany sy higogogogo,

hibory loha sy hisikina lasàka.

13 Kanjo fety amam-piravoravoana no hita;

manominda omby ny olona, mamono ondry,

mivoky hena sy misotro divay, manao hoe:

«Aoka hihinana sy hisotro isika,

fa ho faty ihany rahampitso.»

14 Izao no nambaran’i Iavehn’ny tafika tamiko:

«Tsy havela izany helokareo izany,

mandra-pahafatinareo»,

hoy ny Tompo Iavehn’ny tafika.

Teny famelezana an’i Sobnà

15 Izao no nolazain’ny Tompo Iavehn’ny tafika:

«Mandehana manatona an’io mpitandrina io,

dia i Sobnà, lehiben’ny ao an-dapa, ka lazao aminy hoe:

16 Fa inon’ny atỳ ianao, ary inonao no atỳ,

no mihady fasana eto ianao;

mihady fasana ho anao eny amin’ny toerana avo ianao;

mandoaka fonenana ho anao amin’ny vatolampy ianao?

17 Indro i Iaveh hanipy anao amin’ny sandry mahery;

18 hanasangodina anao,

hanakodiadia anao mafy, hikodiavanao hoatry ny baolina,

eny amin’ny tany lemaka midadasika be.

Dia ho faty any ianao, ho any koa ny kalesy kantonao,

ry ilay henatry ny ankohonan’ny tompony ity.

Teny hafa famelezana an’i Sobnà

19 Horoahiko hiala eo amin’ny fitoeranao ianao,

haongan’i Iaveh amin’ny raharahanao ianao.»

20 Ary izao no hitranga amin’izany andro izany:

Hiantso ny mpanompoko aho, dia i Eliasima zanak’i Helkiasa,

21 ka hampiakanjoako azy ny akanjo vitinao,

hampanaoviko azy ny samboadinao;

hapetrako eo am-pelatanany ny fahefanao;

dia ho tonga ray izy amin’ny mponina ao Jerosalema,

sy amin’ny taranak’i Jodà.

22 Hapetrako eo an-tsorony ny fanalahidin’ny tranon’i Davida,

ka hamoha izy, tsy hisy handrindrina;

handrindrina izy, tsy hisy hamoha.

23 Hatsatoko toy ny fantsika amin’ny fitoerana mafy izy,

ka hanjary sezam-boninahitra ho an’ny ankohonan-drainy.

Antambo hanjò ny fianakavian’i Eliakima

24 Hahantona aminy avokoa ny voninahitra rehetra

amin’ny fianakavian-drainy,

dia ny zanaka aman-jafy,

ny fanaka madinika rehetra,

hatramin’ny kopy ka hatramin’ny sinibe.

25 Amin’izany andro izany –

teny ton’i Iavehn’ny tafika,-

hotsoahana ilay fantsika natsatoka amin’ny fitoerana mafy;

hombotana izy ka hianjera,

dia ho levona ny entana nahantona taminy;

fa efa niteny i Iaveh.

Ny hanjò an’i Tira sy i Sidona

1 Faminaniana ny amin’i Tira.

Migogogogoa, ry sambon’i Tarsisa,

fa rava izy!

Tsy misy rano intsony, tsy misy hidirana intsony!

Avy any amin’ny tany Setima,

no nandrenesany an’izany.

2 Aoka hitanàka, ianareo mponina amorontsiraka,

rakotry ny mpandranto avy any Sidona,

izay mitety ranomasina.

3 Mamakivaky ny ranobe ny vary avy any Nila,

ny vokatry ny ony, niditra ho hareny,

tsenan’ny firenena izy.

4 Aoka ho safotry ny henatra ianao, ry Sidona,

fa efa niteny ny ranomasina,

ny trano mimanda eo amin’ny ranomasina, nanao hoe:

«Tsy mba nihetsi-jaza aho na niteraka,

tsy mba namelona zatovo aho, na nitaiza virjiny.»

5 Rehefa handre izany vaovao izany i Ejipta

dia ho raiki-tahotra mandre ny naharavan’i Tira.

6 Mità ho any Tarsisaianareo, ka migogogogoa,

ry mponina amorontsiraka!

7 Ity va no renivohitrareo falifaly,

izay efa hatramin’ny andro fahagola ny fiandohany,

sy izay nentin’ny tongony

lasa lavitra hitoetra any.

8 Iza no nandidy izany,

hamelezana an’i Tira izay nanome satroboninahitra;

ary ny mpandrantony dia andriandahy,

ary ny mpivarotra avy aminy olo-malaza amin’ny tany?

9 I Iavehn’ny tafika no nandidy izany

mba hanamatroka ny voninahitr’izay rehetra mamirapiratra,

mba hanetry ny olo-malaza rehetra amin’ny tany.

10 Mieleza amin’ny taninao, tahaka an’i Nila,

ry zanaka vavin’i Tarsisa,

fa tsy manam-pehikibo intsony ianao.

11 I Iaveh efa naninjitra ny tanany amin’ny ranomasina,

nampihorohoro ny fanjakana;

nanao didy hamelezana ny tanànany mimanda.

12 Ary hoy izy: «Tsy hanao fifaliana intsony ianao,

ry virjiny afa-baraka, zanaka vavin’i Sidona!

Mitsangàna, mità ho any Setima;

na any aza anefa, tsy hisy fitsaharana ho anao.

13 Jereo ny tanin’ny Kaldeanina,

firenena mbola tsy nisy,

izay nanolotra an’i Asora ho an’ny bibidia

any an’efitra;

nanangana ny tilikambony izy, nandrava ny lapany,

nataony korontan-javatra miavovona sisa teo!

14 Migogogogoa, ry Tarsisa, fa rava ny tanàna mimanda.»

Hofehezina i Tira

15 Amin’izany i Tira dia hohadinoina fitopolo taona, araka ny halavan’ny andron’ny mpanjaka iray. Ary rehefa afaka fitopolo taona no hanjò an’i Tira dia araka ilay tononkiran’ny vehivavy janga hoe:

16 Raiso ny lokanganao, mandehana manodidina ny tanàna,

ry kala janga hadino;

mitendre amim-pahaizana, hamaroy ny hiranao,

mba hahatsiarovan’ny olona anao.

17 Ary rehefa afaka fitopolo taona, dia izao no zavatra hitranga:

hamangy an’i Tira i Iaveh,

ka handray ny tambiny indray izy,

dia hitolo-tena amin’ny fanjakana rehetraeto an-tany,

manerana an’izao tontolo izao.

18 Ary hatokana ho an’i Iaveh ny tombom-barony sy ny tanginy,

fa tsy hangonina hiavosa na hotahirizina;

satria ny azony dia ho an’ireo monina eo anatrehan’i Iaveh,

hohaniny sy hivokisany ary hihaingoany fatratra.