Author: admin

1 Ary ianao, ry zanak’olona, makà lelan-java-maranitra, raiso izy ho harezan’ny mpanala volombava, dia ento mitety ny lohanao sy saokanaoizy; raha efa izany, makà mizana fandanjàna, ka zarao izay voatapakao.

2 Ny ampahatelony doryamin’ny afo, eo afovoan’ny tanàna, rehefa tapitra ny andron’ny fahirano; ny ampahatelony, alao ka asio ny sabatra manodidina ny tanàna; ny ampahatelony aelezo ho amin’ny rivotra, fa hanatsoaka sabatra avy ao aoriana Aho.

3 Ary akao vitsivitsy izy, fonosy amin’ny sisin-dambanao;

4 ka io sisa ioindray, analao, ka hatsipinao ao anaty afo, ka hodoranao amin’ny afo. Avy eo no ivoahan’ny afo ho amin’ny taranak’i Israely rehetra.

5 Izao no lazain’i Iaveh, Tompo: Iny ilay Jerosalema nataoko eo afovoan’ny firenena, ary faritany malalaka no manodidina azy.

6 Noho ny haratsiany anefa, nanohitra ny didiko mihoatra noho ny firenena izy, sy ny lalàko mihoatra noho ny tany manodidina azy, satria nanary ny didiko izy, ary tsy nandeha araka ny l?lako.

7 Koa izao no lazain’i Iaveh Tompo: Satria ianareo niodina mihoatra noho ny firenena manodidina anareo, tsy nandeha araka ny lalàko, tsy nanaraka ny didiko, ary tsy nanao araka ny fomba fanaon’ireo firenena manodidina anareo;

8 noho izany, izao no lazain’i Iaveh Tompo: Indro kosa Aho izao tamy hamely anao, Izaho no hanatanteraka eo afovoanao ny teny voatapaka eo imason’ireo firenena;

9 ary noho ny fahavetavetanao rehetra, dia zavatra tsy mbola nataoko, sady tsy hataoko intsony koa, no hataoko aminao;

10 noho izany, dia hisy ray hihinana ny zanany eo aminao; ary hisy zanaka hihinana ny rainy. Hampihatra fitsarana aminao Aho, ary haeliko any amin’ny vazantany rehetra, izay sisa eo aminao.

11 Koa amin’izany, velona Aho- teny marin’i Iaveh Tompo; – noho ianao nandoto ny fitoerako masina tamin’ny zava-mahamenatraamam-pahavetavetana rehetra nataonao; Izaho koa hanorotoro, ka tsy hanana antra ny masoko, ary tsy hamindra fo Aho.

12 Ny ampahatelon’ny zanakao, ho fatin’ny pesta na ho levon’ny mosary eo aminao; ny ampahatelony, ho lavon’ny sabatra eny manodidina anao rehetra eny; ary ny ampahatelony haeliko any amin’ny vazantany rehetra; sady hanatsoahako sabatra avy ato aoriana.

13 Dia hiala fo ny fahatezerako, ary haraniko mamely azy ireo ny fahavinirako, dia ho afa-po Aho, ary izy kosa hahalala, rehefa nampanaraniko namely azy ny fahatezerako, fa tamin’ny fahasaro-piaroko no efa nitenenako Izaho Iaveh.

14 Hatolotro halàm-baraka sy hampahorina any amin’ny firenena manodidina anao ianao, eo imason’ny mpandalo rehetra.

15 Rehefa avy izay hanatanterahako fitsarana aminao amim-pahatezerana amam-pahavinirana, sy amim-pamaizan’ny fahavinirako, ianao dia ho latsa sy henatra ary ho fananarana amam-pampitahorana ho an’ny firenena manodidina anao;

16 – Izaho Iaveh no milaza – rehefa alefako amin’izy ireo ny zana-tsipìka mandozan’ny mosary, izay enti-mandringana, ka halefako aminareo handringana anareo; fa hampitomboiko koa ny mosary eo aminareo, ary hotapahiko ny tehina mofo ho anareo.

17 Ary handefa mosary sy biby mandozaeo aminareo Aho, izay hanesotra aminao ny zanakao; hihatra aminao ny pesta amam-pandatsahan-dra, ary hataoko mifantaka aminao ny sabatra; Izaho no miteny.

Teny mamely ireo tendrombohitr’i Israely

1 Tonga tamiko ny tenin’i Iaveh, nanao hoe:

2 Ry zanak’olona, atodiho mankany amin’ny tendrombohitr’i Israelyny tavanao, ka maminania ny hamelezana azy. Lazao hoe:

3 Ry tendrombohitr’i Israely,

Mihainoa ny tenin’i Iaveh Tompo.

Izao no lazain’i Iaveh Tompo

amin’ny tendrombohitra aman-kavoana,

sy amin’ny hadin-driaka aman-dohasaha;

Indro Aho hahatonga sabatra hamely anareo;

ary ny fitoerana avonareo horavako,

4 ny ôtelinareo ho voarava,

ny andrinareoho an’ny masoandro, hotapahina;

ny lehilahinareo hataoko mitsingidina,

voan’ny fahafatesana, eo anoloan’ny sampinareo;

5 ny fatin’ny zanak’i Israely

hataoko eo anoloan’ny sampiny.

Ary ny taolanareo haeliko,

manodidina ny ôtelinareo.

6 Na aiza na aiza onenanareo,

ny tanàna ho lao,

ny fitoerana avo horavàna;

mba ho rava sy lao koa ny ôtelinareo,

ho montsana sy levona ny sampinareo,

hazera ny andrinareo ho an’ny masoandro

ary ho fongotra ny asanareo.

7 Hiampatrampatra eo aminareo, ny maratra ho faty;

dia ho fantatrareo fa Iaveh Aho.

8 Havelako hisy sisa ihany anefa aminareo;

dia izay afaka amin’ny sabatra, any amin’ny firenena,

rehefa haely any amin’ny tany samihafa.

9 Ka ireo afaka ireo dia hahatsiaro Ahy eny amin’ny firenena,

izay hitondrako azy ho babo;

nony efa notorotoroiko ny fony mpisintaka

izay nivily tamiko,

sy ny masony mpisintaka

izay nitodika nankany amin’ny sampiny;

ka haharikoriko azy ny tenany,

noho ny ratsy nataony,

tamin’ny fahavetavetana rehetra vitany.

10 Dia ho fantany fa Iaveh Aho,

ka tsy mba foana ny nilazako

fa hahatonga izany loza izany aminy Aho.

Ireo fahotan’i Israely

11 Izao no lazain’i Iaveh Tompo:

Mitehafa tanana ianao

ary mitotoa tongotra, ka manaova hoe: «Indrisy!»

amin’ny fahavetavetana ratsy rehetra,

nataon’ny taranak’i Israely,

izay efa ho levon’ny sabatra,

sy ny mosary ary ny pesta.

12 Ny lavitra ho fatin’ny pesta;

ny akaiky ho lavon’ny sabatra;

izay sisa tavela voatahiry, ho fatin’ny hanoanana;

ka hampariko amin’izy ireo ny fahatezerako.

13 Dia ho fantatrareo fa Iaveh Aho;

rehefa hiampatrampatra eny afovoan’ny sampiny

ny maty amin’izy ireo

manodidina ny ôteliny,

eny amin’ny havoana avo rehetra,

eny antampon-tendrombohitra rehetra;

eny ambanin’ny hazo maitso rehetra,

eny ambanin’ny oaka be ravina rehetra,

amin’ny fitoerana nanaterany emboka manitra mahafinaritra

tamin’ny sampiny rehetra.

14 Haninji-tanana hamely azy ireo Aho,

ka hataoko lao sy simba ny taniny,

hatramin’ny efitra ka hatrany Diblah,

dia ho fantany fa Iaveh Aho.

Akaiky ny farany

1 Tonga tamiko ny tenin’i Iaveh, nanao hoe:

2 Ary ianao, ry zanak’olona, izao no lazain’i Iaveh Tompo, amin’ny tanin’i Israely:

Ny fiafarana! Tamy ny farany

amin’ny vazantany efatra!

3 Ankehitriny tamy aminao ny farany;

efa hampanarana ny hatezerako hamely anao Aho;

hitsara anao araka ny asanao;

hampitambesatra ny fahavetavetanao rehetra aminao.

4 Ny masoko tsy hiantra anao, ary tsy hamindra fo Aho,

fa hatambesatro aminao ny asanao;

ary ho eo afovoanao ny fahavetavetanao;

dia ho fantatrao fa Iaveh, Aho.

5 Izao no lazain’i Iaveh Tompo:

Loza safatsiroa! Loza! Injay izy tamy!

6 Injay tamy ny farany! Tonga ny farany!

Mifoha hamely anao izy; injay izy tamy!

7 Tamy ny anjaranao, ry mponina amin’ny tany;

tonga ny fotoana, akaiky ny andro!

Fitabatabana!… fa tsy hobim-pifaliana eny an-tendrombohitra.

8 Ankehitriny Aho tsy ho ela intsony, dia hanampatra

ny hatezerako aminareo;

hanala fo ny fahavinirako aminao;

hitsara anao araka ny asanao aho,

ary hampitambesatra aminao,

ny fahavetavetanao rehetra.

9 Ny masoko tsy hiantra anao,

ary tsy hamindra fo Aho,

hitambesatra aminao ny asanao;

ho eo afovoanao ny fahavetavetanao.

Dia ho fantatrareo fa Izaho Iaveh no mamely!

10 Indro ny andro, tamy izy; tonga ny anjaranao;

mamòny ny tsora-kazo; mivelatra ny avonavona;

11 mitsangana ny fanaovana an-keriny,

mba ho tsora-kazo hamelezana ny fanoherana ny fivavahana.

Tsy hisy aminy ho voavela, na amin’ny hamaroany,

na amin’ny fihahohahoany,

tsy ho maresaka intsony.

12 Tonga ny fotoana, antomotra ny andro!

Ny mpividy, aoka tsy hifaly;

ary ny mpivarotra, aoka tsy halahelo,

fa efa hipoahan’ny fahatezerana avokoa ny ankamaroany.

13 Ny mpivarotra tsy ho tongatompon’

izay efa lafony indray,

na mbola ho isan’ny velona aza izy;

fa ny fahitana an’izay hanjò ny ankamaroany rehetra,

tsy mba ho foanana,

ary tsy misy maharo ny ainy, na iray aza, amin’ny helony.

14 Velona ny trômpetra,

ary vonona ny zavatra rehetra;

nefa tsy misy mandroso hiady ny olona,

satria iharan’ny hatezerako avokoa ny ankamaroany.

Ireo fahotan’i Israely indray

15 Ny sabatra, eny ivelany;

ny pesta sy mosary, ao anatiny;

ary ny eo an-tanàna, ho levon’ny mosary sy ny pesta.

16 Na misy ho afa-mandositra aza amin’izy ireo,

dia hirenireny eny an-tendrombohitra,

toa voromahailala an-dohasaha,

samy hitoloko noho ny helony avokoa.

17 Samy miraviravy tanana daholo,

ary samy mitsonika ny lohalika rehetra ho rano.

18 Lasàka no hitafiany; horohoro no manarona azy;

henatra no ho amin’ny tava rehetra,

ary mibory ny loha rehetra.

19 Hariana eny an-dalambe ny volafotsiny,

hataony hoatra ny zezika ny volamenany;

tsy misy hahavonjy azy ny volafotsiny amam-bolamenany,

amin’ny andron’ny fahatezeran’i Iaveh;

tsy hamoky ny fanahiny amin’izany, izy,

na hameno ny kibony amin’izany akory,

fa izany indrindra no nahalavo azy tamin’ny faharatsiana.

20 Ireo firavany izay nihaingoany, dia nataony reharehany;

namoronany ny fahavetavetany, dia ny sampiny.

Koa dia hovako ho zezika daholo izany rehetra izany;

21 ary hatolotro ho babo eny an-tanan’ny hafa firenena,

ho rembin’ny tsy tia fivavahana amin’ny tany; – ka holotoiny.

22 Haviliko tsy hijery azy ny tavako

ka holotoin’olona ny rakitro,

fa hidiran’ny olona mpanao an-keriny, ka holotoiny.

23 Omany ny gadra; fa feno heloka ny tany;

ary feno fanaovana an-keriny, ny tanàna.

24 Hasaiko avy ny ratsy fanahy indrindra amin’ny firenena,

haka ny tranon’izy ireo,

hampitsahatra ny avonavon’ny mahery;

ary ny fitoerany masina dia ho voaloto.

25 Mby akaiky ny fandravana;

hitady fiadanana izy ireo, fa tsy hisy izany.

26 Ho avy ny loza tsindrian-doza,

sy filazana vaovao tsindriam-pilazana;

ka hitady fahitana amin’ny mpaminany izy ireo;

ary tsy ho eo amin’ny mpisorona ny lalàna,

na ny torohevitra eo amin’ny loholona.

27 Ny mpanjaka, ho rafitra misaona;

ny mpifehy, hitafy falahelovana;

ary ny tanànan’ny vahoakan’ny tany hangovitra;

fa hasiako araka ny asany izy;

ary hotsaraiko araka ny tandrify azy,

dia ho fantany fa Iaveh Aho.

Fahitana ny fahotan’i Israely indray

1 Tamin’ny taona fahenina, andro fahadimin’ny volana, volana fahenina, raha ilay nipetraka tao an-tranoko iny aho, ary nipetraka teo anatrehako ny loholon’i Jodà, dia nilatsaka tamiko ny tanan’i Iaveh Tompo.

2 Ary nahita aho, ka indro, nisy endrika nitarehin’afo; ka ny hatramin’izay niseho ho valahany no ho midina, dia afo; ary ny hatramin’ny valahany no ho miakatra, dia mitarehin-java-mazava hoatra ny metaly, no fijery azy.

3 Nisy tarehin-tanana natsotrany, dia noraisiny tamin’ny volondohako miolikolika aho, ka naingain’ny Fanahy ho eny anelanelan’ny tany aman-danitra, sy nentiny, tamin’ny fahitana avy amin’Andriamanitra, ho any Jerosalema, teo anoloan’ny vavahady anatiny, ilay nitodika mianavaratra, misy ny sampin’ny fialonana, mamelona fialonana.

4 Ary indro teo ny voninahitr’Andriamanitr’i Israely; ary ny fijery azy dia tahaka ilay nahitako azy, tany amin’ny lohasaha.

5 Hoy izy tamiko: «Ry zanak’olona, atopazo mianavaratra ny masonao.» Dia natopiko mianavaratra ny masoko, ka indro, teo avaratry ny vavahadin’ny ôtely, eo amin’ny fidirana, nisy ilay sampin’ny fialonanaio.

6 Ary hoy izy tamiko: «Ry zanak’olona, hitanao va ny ataon’izy ireo, dia izato fahavetavetana lehibe ataon’ny taranak’i Israely eto, mba hanalavirako ny fitoerako masina? Mbola hahita fahavetavetana lehibe hafa koa ianao.»

7 Dia nentiny ho eo am-bavahadin’ny kianja aho, ka nahatazana aho: ary indro nisy loaka anankiray teo amin’ny rindrina.

8 Ary hoy Izy tamiko: «Ry zanak’olona, gorobahy ny rindrina.» Dia nogorobahako ny rindrina, ka indro nisy varavarana teo.

9 Ary hoy izy tamiko: «Avia, jereo ireto fahavetavetana mahatsiravina ataony eto.»

10 Dia niditra aho, ka nahita, ary indro, voasoratra teo amin’ny rindrina manodidina avokoa, ny sarin’ny biby mandadyamam-biby maloto isan-karazany, mbamin’ny fahavetavetan’ny taranak’i Israely rehetra.

11 Ary nisy 70 lahy, amin’ny loholon’ny taranak’i Israely, ka anisan’ireo i Jezoniasazanak’i Safàna, ary nitsangana teo anoloan’izany sary izany ireo; samy nanana ny fanembohany teny an-tanany avy, ka nisondrotra avy eo ny hanitry ny emboka nijofo.

12 Dia hoy Izy tamiko: «Hitanao va, ry zanak’olona, ity ataon’ny loholon’ny taranak’i Israely ao amin’ny maizina, samy anatin’ny efitranony feno sary avy? Fa hoy izy ireo: Tsy mahita antsika i Iaveh; efa nandao ny tany i Iaveh.»

13 Ary hoy koa izy tamiko: «Mbola ho hitanao ny fahavetavetana lehibe hafa, ataon’izy ireo.»

14 Dia nentiny aho, ho eo anoloan’ny vavahady, mitodika mianavaratra, amin’ny tranon’i Iaveh, ka indreo, ny vehivavy nipetraka teo, mitomany an’i Tamoza.

15 Ary hoy Izy tamiko: «Efa hitanao va, ry zanak’olona? Mbola hahita fahavetavetana hafa lehibe noho izany, ianao.»

16 Tamin’izay, nentiny aho, ho ao amin’ny kianja anatiny amin’ny tranon’i Iaveh, ary indro fa teo amin’ny fidirana ho ao amin’ny tranon’i Iaveh ao anelanelan’ny alo-baravarana sy ny ôtely, nisy lehilahy sahabo ho 25, niamboho ny tempolin’i Iaveh, nitodika niantsinanana, ary niankohoka niantsinanana teo anoloan’ny masoandro.

17 Ka hoy izy tamiko: «Efa hitanao va, ry zanak’olona? Mbola tsy ampy ihany va ho an’ny taranak’i Jodà ny manao izao fahavetavetana ataony eto izao, no mbola fenoiny fampahoriana koa ny tany; ka niverenany hatao lalandava izay hampahatezitra Ahy? Indro izy ireo manainga ny rantsan-kazo ho eo amin’ny orony.

18 Ary Izaho koa hamely an-katezerana; tsy hiantra ny masoko; tsy hamindra fo Aho; hitaraina mafy eo an-tsofiko izy ireo, kanefa tsy hohenoiko akory.»

Ny sazy

1 Dia niantso mafy teo an-tsofiko Izy nanao hoe: «Manatòna ianareo, mpiambina ny tanàna; samia mitondra ny enti-mandrava eny an-tanany avy.»

2 Ka indreo, avy tamin’ny lalan’ny vavahady ambonymitodika mianavaratra, nisy lehilahy enina, samy nitondra teo an-tanany ny zavatra enti-mamely; ary nisy lehilahy anankirayteo afovoan’izy ireo, nitafy rongony fotsy madinika, sy nitondra fombam-panoratan’ny mpanoratra, teo amin’ny fehinkibony. Niditra izy ireo, dia nitsangana teo anilan’ny ôtely varahina.

3 Ary ny voninahitry ny Andriamanitr’i Israely, niakatra avy teo ambonin’ny Kerobima izay nitoerany, nankeo an-tokonam-baravaran’ny trano. Ary i Iaveh niantso an’ilay lehilahy mitafy rongony fotsy madinika sy nitondra fombam-panoratana teo amin’ny fehinkibony,

4 ka hoy i Iaveh taminy hoe: «Mandehana mamaky ny tanàna, mamaky an’i Jerosalema, ka asio marika Taony handrin’ny olona misento sy mitaraina, noho ny fahavetavetana rehetra atao ao.»

5 Dia hoy koa Izy tamin’iretsy sasany, teo an-tsofiko: «Mandehana manaraka azy, mamaky ny tanàna, ianareo, ka mameleza, aza miantra ny masonareo, aza mamindra fo ianareo.

6 Na anti-dahy na zazalahy, na zazavavy, na zaza, na vehivavy: vonoy mandra-paharingany avokoa; fa izay misy ny Tao ao aminy kosa, aza hatoninareo. Ary eo amin’ny fitoerako masina, manomboka.» Dia nanomboka tamin’ny anti-dahy teo anoloan’ny trano izy ireo.

7 Ary hoy Izy taminy: «Lotoy ny trano; fenoy faty ny kianja. Mivoaha ianareo!» Dia nivoaka namely tao an-tanàna izy ireo.

8 Nony namely izy ireo, ka izaho irery no sisa teo, dia niankohoka aho, sady nitaraina hoe: «Indrisy! Iaveh Tompo ô! dia haringanao avokoa va ny sisa amin’i Israely, amin’izao ampidinanao ny hatezeranao amin’i Jerosalema izao?»

9 Ary hoy Izy tamiko: «Lehibe dia lehibe indrindra ny heloky ny taranak’i Israely sy i Jodà. Feno ran’olona ny tany, feno tsy fahamarinana ny tanàna, fa hoy izy ireo: Afoin’i Iaveh ny tany; tsy mahita na inona na inona i Iaveh.

10 Izaho koa, dia tsy hiantra ny masoko; ary tsy hamindra fo Aho; hatsingeriko amin’ny lohany, izay nataony.»

11 Dia indro tamy ilay lehilahy mitafy rongony fotsy madinika nitondra fombam-panoratana teo amin’ny fehinkibony, nilaza ny nataony, nanao hoe: «Vitako izay nandidianao ahy.»

1 Ary nahita aho, ka indro teo ambonin’ny andohalambo, tambonin’ireo lohan’ny Kerobima, dia nisy hoatra ny vato safira; nisy zavatra mitarehin-tseza fiandrianana no fijery azy, teo ambonin’ireo.

2 Dia hoy Izy tamin’ilay lehilahy mitafy rongony fotsy madinika: «Mandehana ho ao anelanelan’ny kodiarana, ambanin’ny Kerobima; fenoy vain’afo avy eo anelanelan’ny Kerobima ny tanan-droanao, ka afafazo amin’ny tanàna izany.» Dia nankao izy teo imasoko.

3 Nijanona teo ankavananan’ny trano ny Kerobima, raha nankao ilay lehilahy, ka nahafeno ny kianja anatiny ny rahona.

4 Ary ny voninahitr’i Iaveh nisondrotra niala teo amin’ny Kerobima nankeo amin’ny tokonam-baravaran-trano; ka feno ilay rahona ny trano; ary feno ny famirapiratan’ny voninahitr’i Iaveh ny kianja.

5 Re hatrany amin’ny kianja ivelany, ny fikopakopaky ny elatry ny Kerobima hoatra ny feon’Andriamanitra Tsitoha, raha miteny izy.

6 Nony nandidy an-dralehilahy mitafy rongony fotsy madinika Izy, nanao hoe: «Makà afo ao anelanelan’ny kodiarana, anelanelan’ny Kerobima,» dia nandroso ho eo anilan’ny kodiarana izy.

7 Ary ny Kerobima naninjitra ny tanany eo anelanelan’ny Kerobimaho ao amin’ny afo izay eo anelanelan’ny Kerobima, dia nalainy ka nataony teo an-tanan-dralehilahy mitafy rongony fotsy madinika, izay nandray izany, dia nivoaka.

8 Fa nisy endri-tanan’olona, hita teo ambany elatr’ireo Kerobima.

9 Ary nahita aho, ka indreo, nisy kodiarana efatra, teo anilan’ireo Kerobima, kodiarana iray avy no teo anilan’ny isan-Kerobima; ary ny endriky ny kodiarana dia toy ny an’ny vaton’i Tarsisa.

10 Ary araka ny fijery azy ireo, dia sahala izy efatra; dia hoatra ny kodiarana itsofohan’ny kodiarana eo afovoany.

11 Raha mandeha izy, dia mizotra tandrifin’ny lafiny efatra, tsy miherika eny am-pandehanany, fa izay fitoerana itodihan’ny lohany no alehany, tsy miherika eny am-pandehanany.

12 Ary feno maso avokoa ny manodidina ny tenan’ny Kerobima, ny lamosiny, ny tanany, ny elany, mbamin’ny kodiarana; samy nanana ny kodiarany avy izy efatra.

13 Ny kodiarana dia mailaka no anarana fiantsoana azy.

14 Isan-Kerobima samy nanan-tarehy efatra avy: ny tarehin’ny voalohany, tarehin-Kerobima, ny tarehin’ny faharoa, tarehin’olona; ny an’ny fahatelo, tarehin’ombalahy; ary ny an’ny fahefatra, tarehim-boromahery.

15 Dia niakatra ny Kerobima, dia izany no ilay zava-manana aina hitako tany amin’ny ony Kobara.

16 Raha nandeha ny Kerobima, nandeha teo anilany koa ny kodiarana, ary raha nanainga elatra hisondrotra avy amin’ny tany ny Kerobima dia tsy nivily koa ireo kodiarana; tsy niala teo anilan’ireo.

17 Raha nijanona izy, nijanona koa ireo; raha nisondrotra izy, niara nisondrotra taminy koa ireo; satria tao amin’izy ireo ny Fanahin’ny zava-manana aina.

Ilaozan’ny voninahitr’i Iaveh ny Tempoly

18 Niala teo ambonin’ny tokonam-baravaran’ny trano, ny voninahitr’i Iaveh, dia nijanona teo ambonin’ny Kerobima.

19 Nanainga elatra ny Kerobima sy nisondrotra avy amin’ny tany teo imasoko, ary nony niainga izy, niaraka taminy ny kodiarana. Nijanona teo anoloan’ny vavahady atsinananaamin’ny tranon’i Iaveh izy ireo; ary ny voninahitry ny Andriamanitr’i Israely dia teo aminy, teo amboniny.

20 Izany no ilay zava-manana aina hitako teo ambanin’ny Andriamanitr’i Israely, teo amin’ny ony Kobara; ary nahalala aho fa Kerobima izany.

21 Samy nanan-tarehy efatra, ary samy nanana elatra efatra avy izy; ary nisy endri-tanan’olona, teo ambany elany.

22 Ary ny amin’ny fijery ny tavany dia ireo tava hitako teo amoron’ny ony Kobara ihany; sahala ny fijery azy; tena ilay tany ihany izany. Samy nandeha tamin’izay hitsiny avy izy.

Tohin’ny fahotan’i Jerosalema

1 Naingain’ny fanahy aho dia nentiny nankeo am-bavahady atsinanana, ilay mitodika miantsinanana amin’ny tranon’i Iaveh; ka indro, teo anoloan’ny vavahady nisy olona 25 lahy; ary hitako teo amin’izy ireo, i Jezoniasa zanak’i Azora sy i Feltiasa zanak’i Banaiasa. lehiben’ny vahoaka.

2 Dia hoy i Iaveh tamiko: «Ry zanak’olona, ireo no olona mamoron-tsain-dratsy, sy manome hevi-dratsy, eto amin’ity tanàna ity, manao hoe:

3 ‹Tsy antomotra loatra ny loza! Andeha isika hanao trano! Ity tanàna ity no vilany, ary isika no hena.›

4 Koa maminania hamely azy; maminania, ry zanak’olona.»

5 Dia nilatsaka tato amiko ny Fanahin’i Iaveh; ka hoy Izy tamiko: «Mitenena hoe: Izao no lazain’i Iaveh: Izany no teneninareo, ry taranak’i Israely! Fantaro ny mby ao an-tsainareo.

6 Nohamaroinareo ny vonoana olonatamin’ity tanàna ity, sy nofenoinareo faty ny lalam-be.

7 Koa izao no lazain’i Iaveh Tompo: Ireo maty natsingidinareo teto afovoan’ny tanàna no hena, ary ny tanàna no vilany; fa ianareo kosa havoaka hiala eto.

8 Mataho-tsabatra ianareo, ka hataoko tratry ny sabatra, – teny marin’i Iaveh Tompo. –

9 Havoakako hiala eto an-tanàna ianareo, ka hatolotro eo an-tanan’ny hafa firenena; ary hampihatra aminareo ny fitsaràko Aho.

10 Ho lavon-tsabatra ianareo, ary hotsaraiko any amin’ny sisin-tanin’i Israely; dia ho fantatrareo fa i Iaveh Aho.

11 Ity tanàna ity, tsy ho vilany ho anareo; ianareo, tsy ho hena ao anatiny; fa any an-tsisin-tanin’i Israely no hitsarako anareo.

12 Ka ho fantatrareo fa Izaho no Iaveh izay tsy narahinareo fitsipika, na notandremanareo lalàna, fa nanaraka ny lalàm-pirenena manodidina anareo no nataonareo.»

13 Mbola naminany teo aho, dia maty i Feltiasa zanak’i Banaiasa; ka niankohoka aho, nitaraina tamin’ny feo avo nanao hoe: «Indrisy, Iaveh Tompo ô! dia haringanao ve, ny sisa amin’i Israely.»

Fanekem-pihavanana vaovao ampanantenaina an’ireo voasesitany

14 Dia tonga tamiko ny tenin’i Iaveh, nanao hoe:

15 «Ry zanak’olona, ireo rahalahinao, olona anisan’ny fianakavianao, sy ny taranak’i Israely rehetra, dia izy rehetra no ilazan’ny mponina ao Jerosalema hoe: ‹Mijanòna any lavitra an’i Iaveh ianareo; fa izahay no nomena ity tany ity ho fananana.›

16 Koa lazao amin’ireto hoe: Izao no lazain’i Iaveh Tompo: Eny, nalefako lavitra any amin’ny firenena ireny, naeliko any amin’ny tany hafa izy; nefa Izaho no ho fitoerana masina ho azy ireo, any amin’ny tany nalehany, mandritra ny fotoana vitsivitsy.

17 Noho izany, ilazao ireny ataovy hoe: Izao no lazain’i Iaveh Tompo: Hangoniko avy any amin’ny firenena ianao; hovoriko avy any amin’ny tany nampielezana anareo ianareo; ary homeko anareo ny tanin’i Israely.

18 Dia hiditra ao izy ireo, ka hesoriny hiala ao avokoa ny zava-mahamenatra amam-pahavetavetana rehetra.

19 Ary izy rehetra homeko fo iray, hasiako fanahy vaovao ao anatiny, hoesoriko amin’ny nofony ny fo vato, ka homeko fo nofo izy;

20 mba hizorany amin’ny fitsipiko sy hitandremany ny didiko, ary hanarahany azy; ka izy dia ho oloko, ary Izaho ho Andriamaniny.

21 Fa ry zareo manana fo manaraka ny fon-tsampinyvetaveta kosa, dia hatsingeriko amin’ny lohany, izay nataony», – teny marin’i Iaveh Tompo.

Ilaozan’ny voninahitr’i Iaveh i Jerosalema

22 Tamin’izay ny Kerobima nanainga ny elany; ny kodiarana koa niara-nihetsika taminy; ary ny voninahitry ny Andriamanitr’i Israely dia teo ambonin’izy ireo.

23 Ary nisondrotra avy teo ambonin’ny afovoan-tanàna, ny voninahitr’i Iaveh, ka nijanona teo an-tampon’ilay tendrombohitra eo atsinanan’ny tanàna.

24 Ary naingain’ny Fanahy aho, ka nentiny ho any amin’ireo babo any Kaldea, tamin’ny fahitana, tamin’ny Fanahin’Andriamanitra. Dia lasa niala teo anatrehako ny fahitana efa hitako;

25 ary notantaraiko tamin’ireo babo avokoa ny zavatra nampahitan’i Iaveh ahy.

Fihetsika asaina ataon’i Ezekiela manambara ny handosirana

1 Tonga tamiko ny tenin’i Iaveh, manao hoe:

2 «Ry zanak’olona, ianao monina eto amin’ny taranaka miodina, izaymana-maso hahitana, fa tsy mahita; manan-tsofina handrenesana, fa tsy mandre; satria taranaka miodina izy ireo.

3 Koa mifeheza entanaianao, ry zanak’olona, hoatra ny hifindra tany fonenana; dia miaingà hifindra antoandro eo imason’izy ireo; mifindrà eo imasony avy eo amin’izay itoeranao, ho any amin’ny fitoeran-kafa; angamba ho hitany amin’izany, fa taranaka miodina izy.

4 Avoahy antoandro eo imasony ny entanao, hoatra ny entan’ny mifindra tany honenana; ary miaingà hariva eo imasony ianao, hoatra ny fiaingan’ny olona mifindra tany honenana.

5 Gorobahy eo imasony ny manda, dia avoahy eo ny entanao;

6 ataovy an-tsoroka eo imasony izany, dia ento rehefa ilay maizimaizina iny; saròny ny tavanao, ataovy amin’izay tsy hahitanao ny tany; satria efa nataoko famantarana ho an’ny taranak’i Israely ianao.»

7 Dia nataoko izany, araka izay nandidiana ahy: navoakako antoandro ny entako, hoatra ny entan’ny mifindra tany honenana; nogorobahako tamin’ny tanako ny manda nony hariva; navoakako ny entana rehefa ilay maizimaizina iny, dia nolanjaiko teo imason’izy ireo.

8 Nony maraina, tonga tamiko ny tenin’i Iaveh, nanao hoe:

9 Ry zanak’olona, moa ny taranak’i Israely, izay taranaka miodina, tsy nilaza taminao va, nanao hoe: «Inona ity ataonao?» Lazao aminy hoe:

10 Izao no lazain’i Iaveh Tompo:

Ity teny faminaniana ity, dia ho an’ny andrianaao Jerosalema,

mbamin’ny taranak’i Israely rehetra, ao amin’izany tanàna izany.

11 Lazao hoe: Famantarana ho anareo, aho;

tahaka izay nataoko, no hatao amin’izy ireo;

hasesitany izy, ho any amin’ny fahababoana.

12 Ny andriana eo aminy,

hanao an-tsoroka ny entany, rehefa ilay maizimaizina iny, dia hiainga;

hogorobahan’ny olona ny manda, hamoahana azy;

hosaronany ny tavany, ka tsy hahita

maso ny tany izy.

13 Hamela-pandrika harato aminy Aho,

ka ho voan’ny fandrika izy;

hoentiko any Babilôna izy,

any amin’ny tanin’ny Kaldeanina;

nefa tsy hahita izany izy,

ary ho faty any.

14 Izay rehetra manotrona azy,

ny mpanampy azy, ny miaramilany rehetra,

dia haeliko any amin’ny vazantany rehetra,

sady henjehiko amin’ny sabatra voatsoaka.

15 Dia ho fantany fa Iaveh Aho,

rehefa naeliko any amin’ny firenena izy,

sy nahahako any amin’ny tany hafa.

16 Hisy olona vitsivitsy amin’izy ireo anefa, havelako

ho afaka amin’ny sabatra sy ny mosary ary ny pesta,

mba hitantarany fahavetavetana nataony,

any amin’ny firenena halehany any,

dia ho fantany fa Iaveh Aho.

17 Tonga tamiko ny tenin’i Iaveh, nanao hoe:

18 Ry zanak’olona, hihinana amin-korohoro ny haninao ianao,

ary hisotro amin-tebiteby sy amin’ahiahy ny ranonao.

19 Ary hilaza amin’ny vahoakan’ny tany ianao hanao hoe:

Izao no lazain’ny Tompo Iaveh

ny amin’ny mponina ao Jerosalema,

ny amin’ny tanin’i Israely:

Amin’ahiahy no hihinanan’izy ireo ny haniny,

ary amim-pahoriana no hisotroany ny ranony,

fa hofoanana tsy hisy izay rehetra ao amin’ny tany,

noho ny fampahoriana afitsoka izay rehetra monina eo aminy.

20 Ny tanàna nonenana ho lao;

ny tany, ho foana;

dia ny fantatrareo fa Iaveh Aho.

Ohabolana fanaon’ny vahoaka

21 Tonga tamiko ny tenin’i Iaveh, nanao hoe:

22 Ry zanak’olona, inona ity fitenenana

ataonareo fiteny eo amin’ny tanin’i Israely hoe:

Mihalava ny andro;

tsy misy tanteraka ny fahitana rehetra?

23 Koa lazao amin’izy ireo hoe:

Izao no lazain’ny Tompo Iaveh:

Hatsahatro izany fitenenana izany,

ka tsy hotononina eo amin’i Israely intsony izany.

Fa izao kosa no lazao amin’izy ireo:

Antomotra ny fotoana;

mbamin’ny fahatanterahan’ny tenin’ny fahitana rehetra.

24 Fa tsy hisy intsony ny fahitana fitaka,

na ny faminaniana sandoka,

eo amin’ny taranak’i Israely.

25 Fa Izaho Iaveh, hiteny,

ary ny teny holazaiko, ho tanteraka;

tsy hanaovana ampitso lava.

Eny, amin’izao andronareo izao, ry taranaka miodina,

no hilazako ny teny, sy hanatanterahako azy.

– Teny marin’ny Tompo Iaveh. –

26 Tonga tamiko ny tenin’i Iaveh nanao hoe:

27 Ry zanak’olona, indro ny taranak’i Israely manao hoe:

Ny fahitana izay hitan’ilay io

mbola ho amin’ny andro lavitra,

ary ho amin’ny fotoana mbola ho ela no aminaniany.

28 Koa lazao amin’izy ireo hoe:

Izao no lazain’ny Tompo Iaveh:

Tsy hisy hahemotra intsony ny teniko;

fa efa ho tanteraka ny teny ataoko.

– Teny marin’ny Tompo Iaveh. –

Teny mamely ny mpaminany sandoka

1 Tonga ny tenin’i Iaveh nanao hoe:

2 Ry zanak’olona, maminania mamely an’ireo mpaminanin’i Israely izay maminany;

ka lazao amin’ireo izay maminany avy amin’ny safidim-ponyihany hoe:

Mihainoa ny tenin’i Iaveh ianareo:

3 Izao no tenin’i Iaveh Tompo:

Loza ho an’ny mpaminany adala,

izay manaraka ny sainy fotsiny,

fa tsy mahita na inona na inona!

4 Toy ny fosa an-tanàna haolo

dia toy izany ny mpaminaninao, ry Israely ô!

5 Tsy niakatra ho eo amin’ny bangaianareo,

na nanangana manda manodidina ny taranak’i Israely,

mba hifaharany amin’ny ady, amin’ny andron’i Iaveh.

6 Fahitana tsy misy fotony ny azy,

ary faminaniana mamitaka

no an’ireo manao hoe: «Teny marin’i Iaveh»;

nefa izy ireo tsy nirahin’i Iaveh,

ary tsy mahazo manantena ny hahatanteraka ny teniny.

7 Tsy fahitana foana va no hitanareo,

tsy faminaniana lainga va no lazainareo,

raha hoy ianareo: «Teny marin’i Iaveh!»

nefa Aho tsy nilaza tsinona?

8 Koa izao no lazain’ny Tompo Iaveh:

Noho ianareo milaza zava-poana,

sady fahitana lainga, ny anareo,

dia indro Aho ho tonga atỳ aminareo

– Teny marin’i Iaveh. –

9 Ny tanako hamely an’ireo mpaminany

mahazo fahitana tsy misy fotony,

sy faminaniana lainga:

tsy ho eo amin’ny mpanolo-tsaina ny vahoakako izy;

na ho voasoratraamin’ny bokin’ny taranak’i Israely;

ary tsy hiditra ao amin’ny tanin’i Israely;

– dia ho fantatrareo fa Iaveh Tompo Aho, –

10 noho izy ireo nandrebireby ny vahoakako,

nanao hoe: «Fiadanana!» nefa tsy nisy fiadanana tsinona.

Manao manda ny vahoakako,

dia indreny izy mandalotra sokay an’izany!

11 Dia lazao amin’izay mandalotra sokay fa hirodana ny manda.

Ho avy ny ora-mahery!

Milatsaha, ry havandra vato!

Mifofofofoa, ry tafio-drivotra!

12 Indro, nirodana ny manda!

Tsy hilazan’ny olona va ianareo, hataony hoe:

«Aiza ity sokay nandaloranareo azy?»

13 Koa izao no lazain’ny Tompo Iaveh:

Izaho hampifofofofo tafio-drivotra noho ny fahavinirako;

hahatonga ora-mahery, noho ny hatezerako;

sy havandra vato handringana, noho ny fahavinirako.

14 Harodako ny manda nolalorinareo sokay;

hazerako amin’ny tany izy;

ka hihanjahanja eo ny fanambaniny;

hirodana izy, ary ianareo ho faty eo amin’ny antontany;

dia ho fantatrareo fa Iaveh Aho.

15 Hanala fo ny hatezerako amin’ny manda Aho,

sy amin’izay nandalotra sokay azy,

ary hilaza aminareo hoe: Tsy misy intsony ny manda!

Tsy misy intsony ireo olona nandalotra sokay azy,

16 dia ireo mpaminanin’i Israely, izay naminany ny amin’i Jerosalema,

sy nahita fahitana hoe ho fiadanana ho azy;

nefa tsy nisy fiadanana tsinona;

– Teny marin’i Iaveh Tompo. –

Ireo mpaminany vavy sandoka

17 Ary ianao, ry zanak’olona, atodiho ny tavanao,

hanandrina ireo zanaka vavin’ny firenenao,

izay maminany araka ny sitrapony;

ka maminania famelezana azy hoe:

18 Izao no lazain’ny Tompo Iaveh:

Loza ho an’ireo vehivavy manjaitra ondana,

ho an’ny famavanin-tanana rehetra;

sy manao ondana ho an’ny loha samy hafa habe rehetra;

mba hihaza fanahy amin’ny fandrika.

Ny fanahin’ny oloko ve, hosamborinareo amin’ny fandrika,

ary ny fanahinareo kosa ho velona!

19 Efa nanala voninahitra Ahy teo amin’ny oloko ianareo,

hahazoanareo ny eran-tanan’ila, ary hahazoanareo sombi-mofo,

ka dia mamono ny fanahy tsy tokony ho faty;

sy mamelona ny fanahy tsy tokony ho velomina;

dia mamitaka amin’izany ny oloko izay mihaino ny lainga.

20 Koa izao no lazain’ny Tompo Iaveh:

Indro halàko ny ondanareo,

izay nataonareo fandrika hihazàna fanahy,

ka hataoko lasa manidina ireny;

hotriariko ireo ondana ireo,

hiala eo amin’ny sandrinareo,

ary hanafaka ny fanahy nohazainareo tamin’ny fandrika Aho,

mba ho afa-manidina ireny.

21 Hotriariko ny ondanareo;

ary hotsoahiko eo amin’ny tananareo ny vahoakako;

ka tsy ho haza eny an-tananareo intsony izy;

dia ho fantatrareo fa Iaveh Aho.

22 Noho ianareo mampahory ny fon’ny marina amin’ny lainga,

nefa Izaho kosa tsy nampahory azy;

sy noho ianareo nankahery ny ratsy fanahy,

mba tsy hiverenany avy amin’ny lalan-dratsiny hahavelona azy;

23 noho izany, tsy hahazo fahitana foana intsony ianareo,

na hahazo hitsak’andro intsony;

hotsoahiko eo amin’ny tananareo ny vahoakako,

dia ho fantatrareo fa Iaveh Aho.

Teny mamely ny fanompoan-tsampy

1 Tonga tao amiko ny loholonasasany amin’i Israely, ka nipetraka teo anoloako.

2 Dia tonga tamiko ny tenin’i Iaveh, nanao hoe:

3 Ry zanak’olona, ireo olona ireo dia efa nanangana ny sampin-dozany, ao am-pony, ary ny fanafintohinana mampanota azy, ataony eo anoloan’ny tavany: ka hety hanontanian’ireo va Aho?

4 Noho izany, mitenena aminy ianao, ka lazao aminy hoe: Izao no lazain’ny Tompo Iaveh: Na zovy na zovy, amin’ny taranak’i Israely manangana ny sampin-doza ao am-pony, sy manao eo anoloan’ny tavany ny fanafintohinana mampanota azy, raha sendra manatona ny mpaminany izy io, dia Tenako Izaho Iaveh no hamaly azy, araka ny tandrifin’ny sampiny maro,

5 mba hahavoazako ny taranak’i Israely amin’ny fony satria efa nivily niala tamiko izy mbamin’ny sampin-dozany rehetra.

6 Ka lazao amin’ny taranak’i Israely hoe: Izao no lazain’ny Tompo Iaveh: Miverena ianareo; mialà amin’ny sampin-dozanareo; ary miambohoa tsy hanatri-tava ny fahavetavetanareo rehetra.

7 Fa na zovy na zovy amin’ny taranak’i Israely, na amin’ny vahinymitoetra eo amin’i Israely misaraka amiko manangana ny sampin-dozany ao am-pony, ary manao eo anatrehan’ny tavany ny fanafintohinana mampanota azy, raha tonga manatona ny mpaminany izy io mba hanontaniany amiko ho azy, dia ny Tenako Izaho Iaveh, no hamaly azy.

8 Ka ny Tavako, hanandrina izany olona izany; izy holevoniko hataoko famantarana aman’ohabolana, hofongarako eo amin’ny vahoakako; dia ho fantatrareo fa Iaveh Aho.

9 Ary raha mety ho voasodoka ny mpaminany, ka manonona teny sasantsasany, dia Izaho Iaveh no ho nanodòka an’izany mpaminany izany; ary haninjitra ny tanako aminy Aho, ary hofongorako eo amin’ny vahoakako Israely izy.

10 Dia hitondra ny valin’ny haratsiany izy, – arakaraka ny haratsian’izay manontany ny haratsian’ny mpaminany koa,

11 – mba tsy hivilian’ny taranak’i Israely hanalavitra Ahy intsony, sy tsy handotoany tena amin’ny fahadiasoany rehetra. Amin’izay, izy ireo dia ho vahoakako, ary Izaho dia ho Andriamaniny, – teny marin’ny Tompo Iaveh. –

Samy milanja ny fahadiasoany

12 Tonga tamiko ny tenin’i Iaveh nanao hoe:

13 Ry zanak’olona,

Raha misy firenena manota miodina amiko

ka ahinjitro aminy ny tanako,

dia tapahiko ny tehina mofo ho azy,

sy alefako hamely azy ny mosary,

dia haringako ny olona sy ny biby,

14 ary eo amin’izany tany izany dia misy ireto olona telo ireto:

i Nôe, i Daniela sy i Jôba…

dia hahavonjy ny fanahiny, amin’ny fahamarinana izy ireo;

– teny marin’ny Tompo Iaveh. –

15 Raha mandefa biby masiaka amin’ny tany Aho,

ka ilaozan’ny mponina sy zary efitra

tsy halehan’ny olona na iza na iza azon’izany biby izany,

16 ary raha ao amin’izany tany izany izy telo lahy ireo,

velona Aho – teny marin’ny Tompo Iaveh, –

tsy hahavonjy ny zanany lahy na ny zanany vavy izy;

ny tenan’izy ireo ihany no ho voavonjy,

fa ny tany ho lao.

17 Na raha mandefa sabatra hamely izany tany izany Aho,

ary manao hoe: «Aoka hijinja ny tany ny sabatra…»

sady mandringana ny olona sy ny biby;

18 ka eo afovoan’io tany io koa izy telo lahy ireo;

velona Aho – teny marin’ny Tompo Iaveh; –

dia tsy hahavonjy ny zanany lahy na ny zanany vavy izy ireo;

ny tenany ihany no ho voavonjy.

19 Na raha mandefa pesta ho amin’izany tany izany Aho,

ary manidina ny hatezerako aminy, amin’ny fandatsahan-dra,

sady mandringana ny olona sy ny biby,

20 ka eo afovoan’io tany io koa i Nôe sy i Daniela ary i Jôba,

velona Aho – teny marin’ny Tompo Iaveh; –

tsy hahavonjy ny zanany lahy na ny zanany vavy izy ireo,

fa ny tenany ihany no hahavonjy ny fanahiny,

noho ny fahamarinany.

21 Satria izao no lazain’ny Tompo Iaveh:

Na dia rehefa nalefako hamely an’i Jerosalema aza

ny fikapohana efatra mandoza:

ny sabatra, ny mosary, ny biby masiaka, ary ny pesta,

ka nandringana ny olona sy ny biby,

22 dia hisy sisa ihany, ho afa-mandositra,

ka hivoaka ny tanàna, dia zanaka lahy, sy zanaka vavy.

Ho avy eo aminareo izy,

dia hahita ny fitondran-tenany aman’asany ianareo,

ka dia hionona ianareo ny amin’ny loza

nalefako hamely an’i Jerosalema,

dia ny amin’izay rehetra nataoko nihatra taminy.

23 Hampionona anareo izy ireo,

rehefa mahita ny fitondran-tenany aman’asany ianareo,

ka ho fantatrareo fa tsy hoe tsy misy antony

ny nanaovako izay rehetra nataoko taminy,

– teny marin’ny Tompo Iaveh. –