Author: admin

Teny mamely ireo tendrombohitr’i Edôma

1 Tonga tamiko ny tenin’i Iaveh nanao hoe:

2 Ry zanak’olona atodiho mankany amin’ny tendrombohitr’i Seira ny tavanao, ka maminania ny hanjò azy, manaova hoe:

3 Izao no lazain’ny Tompo Iaveh: Indro Aho, ry tendrombohitra Seira, ho avy ao aminao, haninjitra ny tanako hamely anao, ary hampanjary anao ho lao sy efitra.

4 Hataoko rava ny tanànanao; ho tonga lao ianao; dia ho fantatrao fa Iaveh Aho.

5 Noho ianao manao lolom-po tsy misy farany, sy nanolotra ny zanak’i Israely ho an’ny sabatra, tamin’ny andro nahitany loza, tamin’ny andron’ny faharatsiana farany,

6 noho izany dia velona Aho; – teny marin’ny Tompo Iaveh: – Hataoko feno ra mandriaka ianao, ary ny ra hanenjika anao. Noho ianao tsy nankahala ny ra, dia hoenjehin’ny ra ianao.

7 Ny tendrombohitra Seira hataoko lao sy zary efitra, ary ny mandroso sy miverina eo, hataoko, tsy misy intsony.

8 Hofenoiko ny maratra ho faty aminy ny tendrombohiny; eny amin’ny havoananao, sy eny amin’ny lohasaha aman-dohasahan-driakanao, dia ho lavo ny olona voavonon’ny sabatra.

9 Hataoko lao mandrakizay ianao, ary tsy honenana intsony ny tanànanao; dia ho fantatrao fa Iaveh Aho.

10 Noho ianao nanao hoe: «Ho ahy avokoa ny firenena roa sy ny tany roa, ka hahazo azy ho fanananay izahay!» – ary teo kosa i Iaveh – noho izany, velona Aho,

11 – teny marin’ny Tompo Iaveh: – dia hanao Aho araka ny hatezeranao sy ny fialonanao, izay nasehonao noho ny fankahalanao azy ireo, ary hampahafantariko eo aminy ny Tenako, rehefa hitsara anao Aho.

12 Ary ho fantatrao fa Izaho Iaveh dia nandre ny fanaratsianao rehetra, izay notononinao tamin’ny tendrombohitr’i Israely, nanao hoe: «Efa rava ireny, ka natolotra anay, ho remby hohaninay!»

13 Nihaika Ahy ianareo tamin’ny lahateninareo; sady nanamaro ny teninareo, namely Ahy. Izaho kosa efa nandre izany!

14 Izao no lazain’ny Tompo Iaveh: Amin’ny hifalian’ny tany rehetra, ianao kosa hataoko lao.

15 Toy ny nifalianao, ny amin’ny lovan’ny taranak’i Israely tamin’ny faharavàny, toy izany no hataoko aminao: ho rava ianao, ry tendrombohitra Seira, mbamin’i Idomea manontolo; dia ho fantatry ny olona fa Iaveh Aho.

Tenin’Andriamanitra momba ireo tendrombohitr’i Israely

1 Ary ianao, ry zanak’olona, maminania amin’ny tendrombohitr’i Israely ka ataovy hoe: Ry tendrombohitr’i Israely, mihainoa ny tenin’i Iaveh:

2 Izao no lazain’ny Tompo Iaveh: Noho ny fahavalo nilaza ny aminareo hoe: «Hia! Hia! lasanay ny fanananay ny havoana fahagola!»

3 Noho izany dia maminania, ka ataovy hoe: Izao no lazain’ny Tompo Iaveh: Noho ny andravan’ny olona sy nanitsakitsahan’ny tongony anareo, hatraiza hatraiza, mba hahatongavanareo fananan’izay sisa amin’ny firenena, ary noho ianareo tonga fitenenan’ny vava mitsaontsaona, sy firesaka ratsin’ny olona;

4 noho izany, ry tendrombohitr’i Israely, dia mihainoa ny tenin’ny Tompo Iaveh: Izao no lazain’ny Tompo Iaveh amin’ny tendrombohitra sy havoana, amin’ny hantsan-driaka sy ny lohasaha, amin’ny toeran-dravarava mahalao monina sy amin’ny tanàna haolo, izay efa natolotra horobaina sy hihomehezan’ny sisa amin’ny firenena manodidina;

5 noho izany, izao no lazain’ny Tompo Iaveh: Eny, noho ny firehitry ny fahasaro-piaroko, no nitenenako namely izay sisa amin’ny firenena sy namely an’i Idomea manontolo izay nisazoka ny taniko ho fananany tamin’ny hafalian’ny fony rehetra sy tamin’ny fanesoan’ny fanahiny, hataony fandroba foana.

6 Koa noho izany maminania ianao ny amin’ny tanin’i Israely, ary lazao amin’ny tendrombohitra sy ny havoana, amin’ny hantsan-driaka sy ny lohasaha hoe: Izao no lazain’ny Tompo Iaveh: Indro Aho miteny amin’ny fahasaro-piaroko amam-pahatezerako, satria ianareo nitondra ny latsa avy tamin’ny firenena.

7 Koa noho izany, izao no lazain’ny Tompo Iaveh: Efa nanangan-tanana Aho! Ireo firenena manodidina anareo, dia hitondra latsa koa izy ireo.

8 Ary ianareo kosa, ry tendrombohitr’i Israely, haniry ny rantsanareo, sy hahavokatra ny voanareo ho an’i Israely vahoakako; fa efa akaiky ny hiaviany.

9 Indro Aho ho avy eo aminareo, sy hitodika ny tavako ho aminareo, ka dia hasaina sy hofafazana ianareo.

10 Hohamaroiko ny olona eo aminareo, dia ny taranak’i Israely rehetra rehetra; ny tanàna, honenana; ary ny efa rava, haorina indray.

11 Hampitomboiko ny olona sy ny biby fiompy eo aminareo; ka ho maro sy hitombo ireny; hataoko honenan’olona toy ny taloha ianareo. Hanao soa aminareo, mihoatra noho ny tamin’ny niandohanareo Aho; ka ho fantatrareo fa Iaveh Aho.

12 Hitondra olona ho eo aminareo Aho dia i Israely vahoakako, ka izy hanana anao; ho lovany ianao, ary tsy hahalany fara azy intsony.

13 Izao no lazain’ny Tompo Iaveh: Noho ny anaovany aminareo hoe: «Nandany olona ianao, sady nahalany fara ny firenenao:»

14 noho izany dia tsy handany olona intsony ianao, na hahalàny fara ny firenenao, – teny marin’ny Tompo Iaveh.-

15 Tsy avelako handre latsa avy amin’ny firenena intsony ianao, na hitondra fanaratsiana avy amin’ny firenena, sady tsy hahatafintohina ny firenenao koa, -teny marin’ny Tompo Iaveh.-

16 Tonga tamiko ny tenin’i Iaveh nanao hoe:

17 Ry zanak’olona, ry zareo taranak’i Israely, fony izy nitoetra teo amin’ny taniny, dia nandoto azy, tamin’ny fitondran-tenany aman’asany; fa ny fitondran-tenan’izy ireo dia toy ny fahalotoan’ny vehivavy teo anatrehako.

18 Ka naidiko tamin’izy ireo ny fahatezerako, noho ny ra nalatsany tamin’ny tany, sy noho ny nandotoany azy tamin’ny sampiny vetaveta.

19 Naeliko ho any amin’ny firenena izy ireo, ka nahahaka tany amin’ny tany samihafa. Notsaraiko araka ny fitondran-tenany aman’asa nataony izy.

20 Nony mby tany amin’ny firenena nalehany izy ireo, dia nanala baraka ny Anarako Masina, fa izao no filazan’ny olona azy: «Ireo no olon’i Iaveh, avy any amin’ny taniny no nialany.»

21 Ka nangoraka ny Anarako Masina Aho, izay nalan’ny taranak’i Israely baraka, tamin’izay firenena nalehany any.

22 Noho izany, lazao amin’ny taranak’i Israely hoe: Izao no lazain’ny Tompo Iaveh: Tsy noho ny aminareo, no anaovako an’izao, ry taranak’i Israely, fa noho ny Anarako Masina izay nalanareo baraka, tany amin’ny firenena nalehanareo.

23 Hohamasiniko ny Anarako lehibe izay voaala baraka, eny amin’ny firenena nanalanareo baraka azy, dia ho fantatry ny firenena fa Tompo Iaveh Aho – teny marin’ny Tompo Iaveh, – rehefa manamasin-tena ao aminareo, eo imasony Aho.

24 Halaiko avy any amin’ny firenena ianareo, hangoniko avy any amin’ny tany rehetra ka hampodiko eo amin’ny taninareo.

25 Hofafazako rano madio ianareo, dia hadio; ny fahalotoanareo rehetra mbamin’ny fahavetavetanareo rehetra, ataoko afaka aminareo.

26 Homeko fo vaovao ianareo, ary hasiako fanahy vaovao ao anatinareo; hoesoriko amin’ny nofonareo ny fo vato, ka homeko fo nofo ianareo.

27 Hataoko ao anatinareo ny Fanahiko, ary hataoko manaraka ny fitsipiko ianareo, ka hitandrina ny didiko, sy hanaraka izany.

28 Honina eo amin’ny tany nomeko ny razanareo ianareo, dia ho vahoakako ianareo, ary Izaho ho Andriamanitrareo.

29 Hovonjeko ianareo ho afaka amin’ny lotonareo rehetra; hantsoiko ny vary, ary hataoko be dia be, ary tsy haniraka mosary aminareo intsony Aho.

30 Hampitomboiko ny voankazo, mbamin’ny vokatry ny saha, mba tsy hitondranareo intsony latsa ama-mosary eo amin’ny firenena.

31 Hahatsiaro ny lalan-dratsinareo ianareo mbamin’ny asa tsy mety nataonareo, ka haharikoriko anareo ny tenanareo, noho ny hadisoanareo amam-pahavetavetanareo.

32 Tsy noho ny aminareo no anaovako izany, – teny marin’ny Tompo Iaveh, – ka aoka ho azonareo izany; aoka ho menatra sy hivoaramena ianareo, noho ny nataonareo, ry taranak’i Israely.

33 Izao no lazain’ny Tompo Iaveh: Amin’ny andro hanadiovako anareo ho afaka amin’ny helokareo rehetra, dia haveriko ho amin’ny tanànany ny mponina ao aminy, ary ny efa rava haorina indray.

34 Ny tany voarava, hasaina, izy izay efa tany lao teo imason’ny mpandalo rehetra.

35 Holazaina hoe: «Io tany io efa foana teo, nanjary hoatra ny sahan’i Edena, ary ny tanàna efa rava, lao, nirodana, efa misy mponina hoatra ny tanàna mimanda.»

36 Ary ho fantatry ny firenena sisa tavela manodidina anareo, fa Izaho Iaveh dia nanorina indray ny efa rava, namboly ny efa fongotra. Izaho Iaveh sady nilaza no manatanteraka!

37 Izao no lazain’ny Tompo Iaveh: Amin’izao koa Aho no mba hety hotadiavin’ny taranak’i Israely mba hanaovako izany ho fanasoavana azy: hohamaroiko toy ny biby fiompy ny olona.

38 Toy ny andian’ondry masina, toy ny andian’ondry any Jerosalema, amin’ny fetiny lehibe, ny olona hanao andiany, hameno ny tanàna rava; dia ho fantatry ny olona fa Iaveh Aho.

Ireo taolam-paty maina

1 Tonga tamiko ny tanan’i Iavehka nentin’i Iaveh nivoaka am-panahy aho, dia napetrany teo amin’ny tany lemaka feno taolana.

2 Nentiny nandeha teo akaikin’ireo manodidina azy aho. Be dia be izy ireo teo an-tampon’ity tany lemaka, sady maina dia maina.

3 Ary hoy Izy tamiko: «Ry zanak’olona, mbola ho velona va ireo taolana ireo?» Ka hoy ny navaliko azy: «Iaveh Tompo ô, Ianao no mahalala!»

4 Dia hoy Izy tamiko: «Aminanio ireo taolana ireo, ka ataovy aminy hoe: Ry taola-maina, mihainoa ny tenin’i Iaveh!

5 Izao no lazain’ny Tompo Iaveh amin’ireto taolana ireto: Indro hampiditra fanahy ao aminareo Aho, dia ho velona ianareo.

6 Hasiako hozatra eo aminareo, hampidirako nofo eo aminareo, hovelarako hoditra eo amboninareo, ary hasiako fanahy ao aminareo, dia ho velona ianareo; ka ho fantatrareo fa Iaveh Aho.»

7 Dia naminany araka ny teny azoko aho; ka nony naminany, dia nisy feo re, dia injay zavatra mitatatata; dia nifanatona ireo taolana.

8 Nojereko ka indro fa nisy hozatra ama-nofo naniry teo ambonin’ireo ary nisy hoditra nivelatra teo ambonin’ireo; saingy tsy mbola nisy fanahy teo aminy.

9 Ary hoy izy tamiko: «Maminania amin’ny fanahy; maminania, ry zanak’olona, ka lazao amin’ny fanahy hoe: Izao no lazain’ny Tompo Iaveh: Avia, ry fanahy avy any amin’ny vazantany efatra; tsotsofy ireto olona voavono ireto, ary aoka ho velona izy.»

10 Dia naminany araka ny nandidiany ahy aho, ka niditra tamin’ireo ny fanahy, dia velona izy, sady nitsangana tamin’ny tongony; tafika lehibe, tena lehibe indrindra.

11 Hoy Izy tamiko: «Ry zanak’olona, ireo taolana ireo, dia ny taranak’i Israely rehetra. Indreo izy ireo manao hoe: ‹Maina ny taolanay; levona ny fanantenanay, very izahay!›

12 Koa maminania, ary lazao aminy hoe: Izao no lazain’ny Tompo Iaveh: Indro aho hanokatra ny fasanareo, hampiakatra anareo avy ao am-pasanareo, ry vahoakako ô, ary hitondra anareo ho eo amin’ny tanin’i Israely.

13 Ary dia ho fantatrareo fa Iaveh Aho, rehefa voasokatra ny fasanareo, ary tafakatra avy ao am-pasanareo ianareo, ry vahoakako.

14 Hataoko ao anatinareo ny Fanahiko, dia ho velona ianareo, sady homeko fitsaharana eo amin’ny taninareo, ka dia ho fantatrareo fa Izaho Iaveh dia milaza sy manatanteraka koa.» – teny marin’i Iaveh.-

I Jodà sy i Israely tonga firenena iray

15 Tonga tamiko ny tenin’i Iaveh, nanao hoe:

16 Ary ianao, ry zanak’olona, makà hazo iray, asio soratra hoe: «Ho an’i Jodàsy ho an’ny zanak’i Israely tafakambana aminy.» Dia makà hazo iray hafa koa, asio soratra hoe: «Ho an’i Josefa; ka ho hazon’i Efraima sy ny taranak’i Israely rehetra tafakambana aminy izany.»

17 Ampifanatony izy roa, mba ho hazo iray ihany, ka ho iray ihany izy eny an-tananao.

18 Ary raha hiteny aminao ny zanaky ny firenenao, hanao hoe: «Tsy ho voasanao aminay va, izay ambaran’izany araka ny hevitrareo?»

19 Lazao aminy hoe: Izao no lazain’ny Tompo Iaveh: Indro fa alaiko ny hazon’i Josefa, eny an-tanan’i Efraima sy ny firenen’i Israely izay tafakambana aminy, ka hakambako amin’ny hazon’i Jodà izy, dia hataoko hazo iray ihany, sy ho iray tokoa eo an-tanako izy ireo.

20 Ho eny an-tananao, eo imasony, ireo hazo hosoratanao.

21 Ary lazao aminy hoe: Izao no lazain’ny Tompo Iaveh: Indro halaiko any amin’ny firenena nalehany, ny zanak’i Israely; hangoniko avy any rehetra any izy, dia hoentiko miverina eo amin’ny taniny.

22 Hataoko firenena iray ihany eo amin’ny tany, eo ambonin’ny tendrombohitr’i Israely izy; mpanjaka iray ihany no hanjaka amin’izy rehetra; tsy ho firenena roa intsony izy, na tafasaraka ho fanjakana roa.

23 Tsy handoto tena intsony izy, na amin’ny sampiny vetaveta, na amin’ny fahavetavetany, na amin’ny hadisoany rehetra; hovonjeko ho afaka amin’ny fiodinany rehetra nanotany izy, ary hodioviko; izy ireo ho vahoakako, ary Izaho ho Andriamaniny.

24 I Davida mpanompoko no ho mpanjakany; ary izy rehetra hiray mpiandry, hanaraka ny fitsipiko, hitandrina ny didiko, ary hanaraka izany.

25 Honina eo amin’ny tany nomeko an’i Jakôba mpanompoko sy nonenan’ny razany, izy ireo; dia honina eo izy mbamin’ny zanany sy ny zanaky ny zanany mandrakizay, ary i Davida mpanompoko no ho mpanapaka azy mandrakizay.

26 Sady hanao fanekem-pihavanana amin’izy ireo Aho, ka ho fanekena aminy mandrakizay izany; ary Izaho hanorina azy, hampitombo azy, ary hanangana ny fitoerako masina eo aminy mandrakizay.

27 Ny fonenako ho eo ambonin’izy ireo; Izaho ho Andriamaniny; ary izy ho vahoakako.

28 Dia ho fantatry ny firenena fa Iaveh Aho manamasina an’i Israely, rehefa ho eo aminy mandrakizay ny fitoerako masina.

Teny mamely an’i Goga mpanjakan’i Magôga

1 Tonga tamiko ny tenin’i Iaveh nanao hoe:

2 Ry zanak’olona, atodiho mankany Goga ny tavanao, any amin’ny tany Magôga, izay mpanapaka ambony any Mosòka sy Tobala, ary maminania ny aminy, ka ataovy hoe:

3 Izao no lazain’ny Tompo Iaveh: Indro avy Aho ho any aminao, ry Goga, mpanapaka ambony any Mosòka sy Tobala.

4 Hotarihiko ianao, hasiako farango ny valanoranonao, ary hoentiko mivoaka avokoa ianao sy ny tafikao rehetra, soavaly ama-mpitaingina azy, samy àry fitaovana tsara indrindra avokoa; miaramila maro, mitondra ampinga be aman’ampinga kely, samy mahay sabatra avokoa.

5 Ny Persa sy ny Etiôpianina ary ny Libianina hiaraka aminy, samy manana ampinga be amam-piarovan-doha avokoa.

6 I Gômera sy ny antoko-miaramilany rehetra, ny taranak’i Tôgôrmà avy any amin’ny faritany avaratra, sy ny antoko-miaramilany rehetra; vahoaka maro be dia be hiaraka aminao avokoa.

7 Aoka ho voaomana ianao, ataovy ny fitaovanao, dia ianao sy ny vahoaka be rehetra, tafavory manodidina anao; ary ianao no aoka ho lehibeny.

8 Raha afaka andro maro, hovangiana ianao; nony any am-paran’ny taona any dia ho avy ianao, hamely ny firenena afaka tamin’ny sabatra, nangonina avy eny amin’ny firenena maro, ho ao an-tendrombohitr’i Israely izay efa lao nandritra ny ela, hamely ny firenena nampodina avy any amin’ny firenena, sy efa monina mandry feizay avokoa izy manontolo.

9 Hiakatra ianao, ka ho avy toy ny rivo-doza, hanahaka ny rahona hanarona ny tany, ianao mbamin’ny antoko-miaramilanao rehetra, ary ny firenena maro miaraka aminao.

10 Izao no lazain’ny Tompo Iaveh: Amin’izany andro izany, hisy hevitra hitranga ao am-ponao, ka hamoron-tsain-dratsy ianao.

11 Ianao hilaza hoe: «Hiakatra aho hamely izany tany misokatra izany, ho avy aho ho ao amin’ireo olona miadana sy mandry feizay ireo, izay samy manana fonenana tsy mimanda avy, tsy manana hidy, na vavahady akory.

12 Dia handeha ianao mba handroba, hanangona babo, hamely ny tanàna efa rava saingy ankehitriny efa misy mponina, dia firenena nangonina avy any amin’ny firenena, izay miompy biby sy efa mihary fananana, ary monina eo afovoan’ny tany.

13 I Sabà sy i Debàna ary ny mpandranton’i Tarsisa mbamin’ireo liona tanorany rehetra, hanao aminao hoe: Tonga handroba va ianao? Nanangona ny miaramilanao va ianao, mba hanangona babo, hanala volafotsy sy volamena, hangorona biby fiompy aman-karena, ary hipaoka babo betsaka?»

14 Koa maminania, ry zanak’olona, ka lazao amin’i Goga hoe: Izao no lazain’ny Tompo Iaveh: Tsy izao va? Amin’izany andro izany, rehefa mandry feizay ny vahoakako,

15 dia hahalala izany ianao, ka ho tonga avy any amin’ny taninao, avy any amin’ny farany avaratra, ianao sy ireo firenena maro miaraka aminao, samy an-tsoavaly avokoa, miaramila betsaka, tafika mahery.

16 Ary hiakatra hamely an’i Israely vahoakako ianao, toy ny rahona hanarona ny tany. Any am-paran’ny andro any no hitondrako anao hamely ny taniko mba hahafantaran’ny firenena Ahy rehefa manamasina ny Tenako ao aminao Aho, ry Goga, eo imason’ireo.

17 Izao no lazain’ny Tompo Iaveh: Tsy ianao va no nolazaiko tamin’ny andro fahiny, tamin’ny vavan’ireo mpanompoko, ny mpaminanin’i Israely, izay naminany nandritra ny taona maro, tamin’izany andro izany, ny amin’ny hampiakarako anao hamely azy ireo?

18 Ary izao no hitranga amin’izany andro izany, dia amin’ny andro hiakaran’i Goga amin’ny tanin’i Israely; – teny marin’ny Tompo Iaveh, – hiefonefona eo am-bavoroko ny fahatezerako,

19 ary noho ny fahasaro-piaroko amam-pirehitry ny fahatezerako – teniko izany, – amin’izany andro izany, dia hisy horohoron-tany mafy eo amin’ny tanin’i Israely.

20 Ny hazandrano ao an-dranomasina hangovitra eo anatrehako avokoa, mbamin’ny voromanidina amam-bibin’ny tany, sy ny biby mandady rehetra mikisaka amin’ny tany, ary ny olona rehetra ambonin’ny tany; ny tendrombohitra hirodana, ny vatolampy hianjera; ary ny manda rehetra hikoa amin’ny tany.

21 Hiantso sabatra hamely azy eny amin’ny tendrombohitra rehetra eny Aho, – teny marin’ny Tompo Iaveh, – ka samy hamotitra ny sabany hamely ny rahalahiny avy izy.

22 Hanao fitsarana azy Aho amin’ny pesta, sy ny ra; handatsaka ranonorana manafotra aman-kavandra vato, afo aman-tsolifara hihatra aminy sy amin’ny miaramilany, ary amin’ny firenena maro hiaraka aminy.

23 Hiseho ho lehibe sy masina Aho, ary hampahanfantatra ny Tenako eo imason’ny firenena maro, ka ho fantatr’izy ireo fa Iaveh Aho.

1 Ary ianao, ry zanak’olona, maminania ny hamelezana an’i Goga, ka lazao hoe: Izao no lazain’ny Tompo Iaveh: Indro Aho ho avy hamely anao, ry Goga, mpanapaka lehiben’i Mosòka sy i Tobala.

2 Halaiko, hotarihiko ianao, hampianariko avy any amin’ny farany avaratra, ary hoentiko any an-tendrombohitr’i Israely.

3 Any dia halatsako avy eny an-tananao ankavia ny tsipìkanao, ary hararako avy eny an-tananao ankavanana ny zana-tsipìkanao,

4 Hitsingidina eny an-tendrombohitr’i Israely ianao, dia ianao sy ny antoko-miaramila rehetra, mbamin’ireo firenena hiaraka aminao; ny vorona mpihaza, ny vorona isan-karazany, mbamin’ny bibin’ny tany no hanolorako anao mba hohaniny.

5 Hiampatra eny an-tampon-tanety eny ianao, fa Izaho no efa niteny, – teny marin’ny Tompo Iaveh. –

6 Handefa afo ho any amin’ny tany Magôga Aho sy ho any amin-dry zareo monina feizay any amin’ireo nosy, ka ho fantany fa Iaveh Aho.

7 Ary hataoko fantatra ny Anarako Masina, eo amin’i Israely vahoakako, ka tsy hoekeko hotsiratsiraina intsony ny Anarako Masina, dia ho fantatry ny firenena fa Iaveh Aho, ilay masina eo amin’i Israely.

8 Indro tonga izany zavatra izany ka ho tanteraka, – teny marin’ny Tompo Iaveh: – izany no ilay andro nolazaiko!

9 Amin’izany, hivoaka ny mponina amin’ny tanànan’i Israely, handoro sy hampiredakany fiadiana, dia ny ampinga amam-piarovan-tena, ny tsipìka aman-jana-tsipìka, ny langilangy aman-defom-pohy, hatainy izany mandritra ny fitotaona.

10 Tsy hitondra kitay hazo avy any an-tsaha intsony izy ireo, na hikapa hazo any an’ala, fa ny fiadiana no hatainy; hamabo an’izay namabo azy izy; ary handroba an’izay nandroba azy, – teny marin’ny Tompo Iaveh. –

11 Ary izao no hitranga amin’izany andro izany: I Goga homeko fitoerana izay isian’ny fasany, eo amin’i Israely, dia ny lohasahan’ny Mpandalo ao atsinanan’ny ranomasina, ary hanampin-dalana tsy halehan’ny mpandalo izany fasana izany. Eo no handevenana an’i Goga mbamin’ny vahoakabeny rehetra, ary lohasahan’i Hamôna-Gôga no hatao anaran’io fitoerana io.

12 Handevina azy ireony taranak’i Israely, mba hanadiovany ny tany, mandritra ny fito volana mipaka.

13 Handevina avokoa ny vahoaka amin’ny tany; ary ho andro malaza ho azy ireo izany, fa andro hanehoako ny voninahitro an-karihary, – teny marin’ny Tompo Iaveh. –

14 Hanendry olona izy ireo izay homena raharaha mba hitetitety ny tany, mandevina ny mpandalo izay sisa tavela teo ambonin’ny tany, – mba hanadiovany ny tany; rehefa afaka ny fito volanadia handeha hikaroka, ireo.

15 Ary rehefa mitety ny tany ireo olona ireo, raha misy mahita taolan’olona, dia hanangana famantarana eo anilany izy, mandra-pandevin’ny mpandevina azy, ao amin’ny lohasaha Hamôna-Gôga.

16 Ary ho anaran-tanàna koa i Hamôna; toy izany no hanadiovana ny tany.

17 Ary ianao, ry zanak’olona, izao no lazain’ny Tompo Iaveh: Lazao amin’ny voromanidina isan-karazany, mbamin’ny biby rehetra any an-tsaha hoe: Mivoria ianareo, ka mankanesa atỳ! Miangòna avy eny amin’ny manodidina eny, ho amin’ny sorona izay ataoko ho anareo, dia sorona lehibe any an-tendrombohitr’i Israely; hihinana nofo ianao sy hisotro ra.

18 Nofon’ny lehilahy mahery no hohaninareo, ran’ny mpanapaka amin’ny tany no hosotroinareo, dia ondralahy, zanak’ondry, osilahy, vantotr’ombalahy, omby mifahy, avy any Basàna, samy tafatambatra avokoa.

19 Hihinana tavin-kena ianareo, ka ho voky, hisotro ra ianareo, mandra-pahaleonareo, amin’izany sorona nataoko ho anareo izany.

20 Amin’ny latabatro ianareo hivoky soavaly ama-mpitaingina azy, lehilahy mahery ama-mpiady isan-karazany; – teny marin’ny Tompo Iaveh. –

Teny famaranana

21 Haneho ny voninahitro eo amin’ny firenena Aho, ka ho hitan’ny firenena rehetra ny fitsarana hataoko sy ny tanako hahinjitro amin’izy ireo.

22 Ka ho fantatry ny taranak’i Israely, fa Iaveh Andriamaniny Aho, hatramin’izay andro izay, ka hatramin’ny ho avy.

23 Ary ho fantatry ny firenena fa noho ny heloka nataon’ny zanak’i Israely, no nahalasan-ko babo azy, satria nivadika tamiko izy. Koa nanafina ny Tavako taminy Aho ary natolotro ho eo an-tanan’ny fahavalony, mba ho lavon-tsabatra izy rehetra.

24 Noho ny fahalotoany amam-pivadihany no nanaovako izany taminy sy nanafenako ny tavako taminy.

25 Koa izao no lazain’ny Tompo Iaveh: Ankehitriny, hampodiko ny babo amin’ny taranak’i Jakôba, hamindrako fo ny taranak’i Israely rehetra, ary hasehoko ny fahasaro-piaroko ny Anarako Masina.

26 Hitondra ny fahafaham-barakany izy, mbamin’ny fivadihany rehetra nataony tamiko, raha avy izay handriany feizay eo amin’ny taniny, ka tsy hisy mpanaitaitra intsony.

27 Rehefa hampody azy avy any amin’ny firenena Aho sy hanangona azy avy any amin’ny tanim-pahavalony, ary hanamasina tena ao amin’izy ireo eo imason’ny firenena maro,

28 dia ho fantany fa Iaveh Andriamaniny Aho, tamin’ny nitondrako azy ho babo any amin’ny firenena sy nanangonako azy indray eo amin’ny taniny; ary tsy hisy havelako hitoetra any intsony izy ireo, na dia iray aza.

29 Ary tsy hanafina ny Tavako aminy intsony Aho, satria hampidiniko amin’ny taranak’i Israely ny Fanahiko; – teny marin’ny Tompo Iaveh.-

Ny tempoly vaovao

1 Tamin’ny taona faha-25n’nynahababo antsika, tamin’ny fiandohan’ny taona, andro fahafolon’ny volana, taona faha-14n’ny naharavan’ny tanàna, tonga tamiko androtr’izay ihany ny tanan’i Iaveh, ka nitondra ahy ho any amin’izany fitoerana izany.

2 Tamin’ny fahitana avy amin’Andriamanitra no itondrany ahy, ho any amin’ny tanin’i Israely, dia napetrany teo amin’ny tendrombohitra anankiray avo dia avo; ary nisy hoatra ny tanàna naorina eo amin’ny ilany atsimo amin’izany tendrombohitra izany.

3 Nony tongany teo amin’io fitoerana io aho, dia nahita lehilahy anankiray, ka ny tarehiny toa nitarehim-barahina no fijery azy; ary kofehy rongony aman-tehina fandrefesana no teny an-tanany, ary teo amin’ny vavahady izy.

4 Dia hoy ralehilahy tamiko: «Ry zanak’olona, mijere amin’ny masonao, mihainoa amin’ny sofinao, ary mandiniha tsara ao am-ponao, ny zavatra rehetra hasehoko anao, fa ny hanehoana an’izany aminao no nitondrana anao etoana. Ampahalalao ny taranak’i Israely avokoa, izay rehetra ho hitanao.»

Ny tamboho ivelany

5 Nisy manda ivelany nanodidina ny trano, tamin’ny lafiny rehetra; ary nisy volotara fandrefesana enina hakiho teny an-tanan-dralehilahy; nihoatra vodivoam-pelatanana avy ny iray hakiho. Norefesiny ny hatevin’io rafitra io, ka eran’ny volotara; ary ny haavony, ka eran’ny volotara.

Ny vavahady atsinanana

6 Raha efa izany dia nankeo amin’ny vavahady, dia ilay mitodika miantsinanana ny anoloany, ka niakatra ny ambaratonga izy; ary norefesiny ny tokonam-bavahady, ka eran’ny volotara ny sakany, dia ny tokonana voalohany izany, eran’ny volotara ny sakany

7 Ny efitrano tsirairay avy dia eran’ny volotara ny lavany, eran’ny volotara ny sakany; dimy hakiho avy no elanelan’ny efitra. Ny tokonam-bavahady anilan’ny efitra fidirana amin’ny vavahady tandrifin’ny trano dia eran’ny volotara.

8 Norefesiny ny efitra fidirana amin’ny vavahady tandrifin’ny trano dia eran’ny volotara.

9 Norefesiny indray ny efitra fidirana amin’ny vavahady ka nisy valo hakiho; ary ny andriny, roa hakiho. Ny efitra fidirana amin’ny vavahady dia tandrifin’ny trano.

10 Ny efitry ny vavahady atsinanana dia telo no teo an-daniny iray, telo koa no teo an-daniny iray; mitovy refy avokoa izy telo avy ireo; sady mitovy refy ny andriny.

11 Norefesiny ny vavan’ny vavahady, ka folo hakiho ny sakany, telo ambin’ny folo hakiho ny halavany.

12 Teo anoloan’ny efitra nisy fefy, iray hakiho avy ny lafiny; ny efitra dia samy enina hakiho ny lafiny iray, ary enina hakiho ny lafiny iray hafa.

13 Norefesiny ny vavahady hatramin’ny tafon’ny efitra iray, ka hatramin’ny tafon’ny iray hafa; nisy 25 hakiho ny sakany, hatramin’ny varavarana anankiray ka hatramin’ny varavarana iray hafa.

14 Ary 60 hakiho no nisainy momba ny andry, ary nifanolotra tamin’ireo andry ireo ny kianja manodidina ny vavahady.

15 Ny elanelan’ny hatreo anoloan’ny vavahady fidirana, ka hatreo anoloan’ny trano fidirana anatiny, dia 50 hakiho.

16 Nisy varavarankely makarakara, tamin’ny efitra sy tamin’ny andry, amin’ny lafiny manodidina ao anatin’ny vavahady; toy izany koa tamin’ny efitra fidirana; ka dia varavarankely manodidina ny tao anatiny, ary nisy rofia avokoa ny andry.

Ny kianja ivelany

17 Dia nentiny aho, ho eo amin’ny kianja ivelany; ary teo dia nisy efitranosy lampivato voavoatra manodidina ny kianja ary nisy efitrano 30manaraka ny lampivato.

18 Nanaraka an’ireo vavahady ny lampivato, sady nifanerana tamin’ny halavan’ny vavahady; ny lampivato ambany io.

19 Norefesiny ny sakan’ny teo anoloan’ny vavahady ambany hatreo amin’ny anoloan’ny kianja anatiny, ka nisy zato hakiho ny teo atsinanana sy teo avaratra.

Ny vavahady avaratra

20 Ny amin’ny kianja ivelany, izay mitodika mianavaratra ny anoloany dia norefesiny koa ny lavany sy ny sakany,

21 – ny efitra aminy telo an-daniny avy, sy ny andriny aman’efitra fidirana, mitovy refy amin’ireo vavahady voalohany- 50 hakiho ny lavany, ary 25 ny sakany.

22 Ny varavaran-keliny sy ny efitra fidirany aman-drofiany, sahala refy amin’ireo eo amin’ny vavahady mitodika miantsinanana ny anoloany; ambaratonga fito no iakarana mankeo, ary mifanatrika amin’ny ambaratonga ny efitra fidirana.

23 Nisy vavahady teo amin’ny kianja anatiny mifanandrify amin’ny vavahady avaratra, tahaka ny amin’ilay atsinanana. Norefesiny ny hatreo amin’ny vavahady anankiray ka hatreo amin’ny anankiray hafa, dia 100 hakiho.

Ny vavahady atsimo

24 Dia nentina indray aho nianatsimo, ary inty vavahady mianatsimo; norefesiny ny andry sy ny efitra fidirana ao, ka toraky ny teo ihany koa ny refiny;

25 – ny manodidina dia nisy varavarankely mitovy amin’ireo varavarankely hafa ihany koa mbamin’ny efitra fidirana -: 50 hakiho ny lavany, 25 hakiho ny sakany.

26 Ambaratonga fito no iakarana mankeo, teo anoloan’ireo ny efitra fidirana; nisy rofia ny andriny: ny iray teo an-daniny, ny iray koa teo an-daniny hafa.

27 Nisy vavahady koa nitodika mianatsimo, ao amin’ny kianja anatiny; norefesiny ny hatreo amin’ny vavahady anankiray ka hatreo amin’ny anankiray mandeha mianatsimo, ka zato akiho.

Ny kianja anatiny sy ny vavahady atsimo

28 Nentiny niditra teo amin’ny vavahady atsimo aho, ho ao amin’ny kianja anatiny; ary norefesiny ny vavahady atsimo, ka sahala ny refiny –

29 ny efitranony, ny andriny, ny efitra fidirana dia nitovy refy; nisy varavarankely manodidina teo aminy sy tamin’ny efitrano fidirana -: 50 hakiho ny lavany, 25 hakiho ny sakany.

30 Nisy efitra fidirana manodidina azy: 25 hakiho ny halavany, ary 5 hakiho ny sakany.

31 Ny efitra fidiranadia eo amin’ny lafin’ny kianja ivelany; nisy rofia tamin’ny andriny, ary ambaratonga valo no iakarana ho ao.

Ny alo-baravarana atsinanana

32 Avy eo dia nentiny aho ho eo amin’ny kianja anatiny mandeha miantsinanana; ary norefesiny ny vavahady, ka toraky ny teo ihany koa ny refiny –

33 ny efitranony, ny andriny, ny efitra fidirana, toraky ny teo ihany koa ny refiny; ary nisy varavarankely manodidina teo aminy sy teo amin’ny efitra fidirana -: 50 hakiho ny lavany, 25 hakiho ny sakany.

34 Nipaka tamin’ny kianja ivelany ny efitra fidirany; nisy rofia tamin’ny andriny teo an-daniny roa avy, ary ambaratonga valo no iakarana ho eo.

Ny alo-baravarana avaratra

35 Dia nentiny aho, eo amin’ny vavahady avaratra; ka toraky ny teo ihany koa ny refiny nandrefesany ny teo –

36 nisy varavarankely manodidina koa ny efitra sy ny andriny ary ny efitra fidirana -: 50 hakiho ny lavany, 25 hakiho ny sakany.

37 Nipaka tamin’ny kianja ivelany ny andriny, nisy rofia tamin’ny andriny, ary ambaratonga valo no iakarana ho eo.

Ireo efitrefitra mpomba ny alo-baravarana

38 Nisy efitrano mbamin’ny varavarana momba azy, teo anilan’ny andrin’ny vavahady; teo no nanasana ny soronadorana.

39 Teo amin’ny efitra fidirana eo am-bavahady, nisy latabatra roa avy isan-dafiny roa, izay tsy maintsy namonoana ny zavatra hanaovana ny sorona dorana, sy sorona noho ny ota, ny sorona noho ny fahadisoana.

40 Teo amin’ny lafiny ivelany ao avaratra raha miakatra hiditra ny vavahady, dia nisy latabatra roa; ary teo amin’ny ilany iray, amin’ny efitra fidirana eo amin’ny vavahady koa nisy latabatra roa.

41 Koa nisy latabatra efatra izany, teo amin’ny ilan’ny vavahady, ary efatra koa tamin’ny ilany iray, dia valo no tontaliny, hatao famonoana ny sorona.

42 Nisy koa latabatra efatra, ho an’ny sorona dorana, natao tamin’ny vato voapaika, iray hakiho sy sasany ny lavany, iray hakiho sy sasany ny sakany, iray hakiho ny haavony, fametrahana ny fiasana hamonoana ny sorona dorana sy ny sorona hafa.

43 Nisy farango vodivoam-pelatanana ny habeny, naompana teny amin’ny rindrina manodidina; ary ny hena atao sorona, dia tsy maintsy napetraka teo ambony latabatra.

44 Teo ivelan’ny vavahady anatiny, nisy ny efitranon’ny mpihira, teo amin’ny kianja anatiny: ny iray teo anilan’ny vavahady avaratra mitodika mianatsimo ny anoloany, ny iray teo anilan’ny vavahady atsinanana mitodika mianavaratra.

45 Hoy izy tamiko: «Ilay efitrano mitodika mianatsimo, dia an’ny mpisorona miadidy ny fanompoana momba ny trano;

46 ary ny efitrano mitodika mianavaratra kosa ho an’ny mpisorona miadidy ny fanompoana momba ny ôtely. Ireo taranak’i Sadôkaamin’ny taranak’i Levì no manatona an’i Iaveh, hanao ny fanompoana azy.»

Ny kianja anatiny

47 Dia nandrefy ny kianja, izay efa-joro sokera, izy, ka zato hakiho ny lavany, zato hakiho koa ny sakany; ary ny ôtely dia teo anoloan’ny trano.

Ny Tempoly sy ny efitrano fidirana: Olama

48 Nentiny ho eo amin’ny efitrano fidirana ao an-trano aho nony avy eo, dia norefesiny ny andrin’ny efitrano fidirana, ka dimy hakiho ny lafiny iray, dimy hakiho koa ny lafiny iray; ary haben’ny alo-baravarana koa: telo hakiho ny lafiny iray; telo hakiho ny lafiny iray hafa.

49 Ny efitra fidirana 20 hakiho ny halavany; 11 hakiho ny sakany, amin’ny ambaratonga miakatra ho eo; nisy andry varahina teo anilan’ny andry: iray teo amin’ny lafiny iray; iray teo amin’ny lafiny iray hafa.

Ilan’ny Tempoly: Ekala

1 Dia nentiny ho ao amin’ny tempoly aho, ary norefesiny ny andriny, ka enina hakiho ny sakany amin’ny lafiny iray, enina hakiho koa ny sakany amin’ny lafiny iray, – hoatra ny sakan’ny trano iray.

2 Folo hakiho ny sakan’ny varavarana; dimy hakiho ny ati-rindrim-baravarana ankilany, dimy hakiho koa ny ankilany iray. Norefesiny ny halavan’ny tempoly, ka efapolo hakiho; ary ny sakany roapolo hakiho.

Toerana masina indrindra: Debira

3 Raha efa izany, nandroso ho ao anatiny izy, dia nandrefy ny andrim-baravarana, ka roa hakiho; ary ny varavarana enina hakiho; ary ny haben’ny varavarana fito hakiho.

4 Ary amin’ny ilan’ny tempoly dia nandrefy roapolo hakiho izy amin’ny an-davany, ary roapolo hakiho amin’ny sakany, dia hoy izy tamiko: «Io ny fitoerana masina indrindra».

Ireo paosin-trano

5 Ary norefesiny ny rindrin-trano, ka enina hakiho; sy ny sakan’ny paosin-trano manodidina ny trano ka efatra hakiho.

6 Ary ny amin’ny efitra an-daniny avy dia nisy efitra telo mifanao ambony sy ambany, samy telopolo avy ny andalany; nipaka tamin’ny rindrina naorina hanaovana an’ireo efitra manodidina ny trano, ka niankina tamin’ny rindrin-trano, fa tsy tafatsofoka ao anatiny.

7 Nihamalalaka isaky ny ifanongoavan’ireo efitra ireo, fa isan-drihana dia nisy lalan-tsara handehanana manodidina hatrany hatrany. Ka noho izany dia nihamalalaka isaky ny mifanongoa io ilan-trano io, ka ny lalan-tsara amin’ny tany dia etiety kokoa noho ny amin’ny rihana ambony; mifanao ara-keviny amin’ny roa sisa koa, ny lalan-tsara ao antenatenany.

8 Hitako fa niorina tambonin’ny avoavo teo amin’ny manodidina, ny trano; eran’ilay volotara ny fanorenan’ny efitra an-daniny avy, ary enina hakiho erỳ amin’ny zorony.

9 Enina hakiho ny hatevin’ny rindrina ivelany amin’ny paosin-trano; manaraka izany dia nisy rarivaton’ny paosin-trano amin’ny trano.

10 Ny elanelan’ny hatreo ka hatreo amin’ny efitrano, dia nisy roapolo hakiho, manodidina ny trano.

11 Teo ambonin’io rarivato io no nisy ny fidirana mankeo am-paosin-trano; ny varavarana iray teo avaratra, ny varavarana iray teo atsimo; dimy hakiho no hatevin’io rarivato manodidina io.

Ny «endri-trano» andrefana

12 Ilay trano nifanatrika tamin’ny fitoerana foana amin’ny lafiny andrefana, dia fitopolo hakiho ny sakany; dimy hakiho manodidina no hatevin’ny rindrin-trano, ary sivy folo hakiho ny lavany.

13 Nandrefy ny trano izy, ka zato hakiho ny sakany, ny fitoerana foana, ny trano sy ny rindriny, zato hakiho ny lavany,

14 ary ny anoloan’ny trano sy ny fitoerana foana eny amin’ny atsinanana, zato hakiho ny sakany.

15 Norefesiny ny lavan’ny trano mifanatrika amin’ny fitoerana foana izay teo ivohon’ny trano mbamin’ny lalan-tsarany eo an-daniny roa, ka zato hakiho.

Ravaky ny ati-trano

16 Tao amin’ny tempoly, dia ao anatiny sy ao amin’ny efitrano fidirana ho any amin’ny kianja, dia voapetaka hazo mitovy tantana amin’ny manodidina, na ny tokonana, na ny varavarankely makarakara aman-dalan-tsara manodidina, amin’izy telo manandrify ny tokonana. Hatramin’ny tany ka hatreo amin’ny varavarankely – mirindrina ny varavarankely –

17 hatreo ambonin’ny varavarana ka hatreo amin’ny faran’ny trano ary eo ivelany koa, tamin’ny rindrina rehetra manodidina, na ao anatiny na eo ivelany, dia samy voarakotra lamba temitra

18 sy kerobima ary rofia avokoa; rofia iray no teo anelanelan’ny kerobima roa, ary ny kerobima iray nanan-tava roa:

19 ny iray tavan’olona mitodika ny rofia eo an-daniny iray ary ny iray tavan-diona kosa mitodika ny rofia eo an-daniny iray hafa; nasiana an’izany avokoa ny trano manontolo.

20 Hatramin’ny tany ka hatreo ambonin’ny varavarana, nisy kerobima aman-drofia voaseho amin’ny rindrin’ny Tempoly.

Ny ôtely hazo

21 Efa-joro ny tolàna tamin’ny tempoly, ary teo anoloan’ny fitoerana masina indrindra, nisy zavatra toy ny ôtely hazono fijery azy:

22 telo hakiho ny haavony, roa hakiho ny halavany: nisy zorony izy, ary hazo ny rindriny manaraka ny halavany rehetra. Dia hoy izy tamiko: Io no latabatra eoanatrehan’i Iaveh.

Ireo varavarana

23 Ny Tempoly sy ny fitoerana masina indrindra dia samy nisy varavarana;

24 ary ny varavarana samy kopa-droa, ary ny lela varavarana roa samy nisy takelaka roa misavily, takelaka roa amin’ny lela varavarana iray, ary takelaka roa amin’ny lela varavarana iray hafa.

25 Teo amin’ny varavaran’ny Tempoly nisy kerobima aman-drofia tahaka ny voaseho ao amin’ny rindrina, ary nisy tafo hazo teo anoloan’ny efitrano fidirana eo ivelany.

26 Nisy varavarankely makarakara sy rofia teo an-daniny roa amin’ny rindrin’ny efitrano fidirana sy tamin’ny efitrano anilan’ny trano, ary tamin’ireo tafo hazo.

efitrano sy tamboho

1 Nentin-dralehilahy nivoaka nianavaratra aho, ho ao amin’ny kianja ivelany, dia nentiny ho ao amin’ny efitrano manatrika ny fitoerana foana sy ny rindrina eo amin’ny avaratra.

2 Zato hakiho ny lavany – varavarana avaratra, – dimampolo hakiho ny sakany;

3 tandrifin’ny roapolo hakiho amin’ny kianja anatiny, ary tandrifin’ny lampivato amin’ny kianja ivelany, nisy lalan-tsara nifanandrify mifanongoa telo.

4 Teo anoloan’ny efitrano, nisy l?lana folo hakiho no habeny, nisy l?lana miditra ho ao anatiny koa, iray hakiho, ary nitodika nianavaratra ny varavarany.

5 Etiety kokoa ny efitrano ambony, – fa nangalana ho lalan-tsarany, – ka etiety kokoa noho ny efitrano ambany sy ny efitrano antenantenany amin’ny trano,

6 fa nifanongoa telo izy ireo sady tsy mba nisy andry toy ny amin’ny kianja; ka izany no nahaety ny efitrano ambony noho ny efitrano ambany sy ny antenantenany.

7 Ny tamboho ivelany, mifanila amin’ireo efitrano eo amin’ny lafin’ny kianja ivelany, dia dimampolo hakiho ny laniny manatrika ny efitrano.

8 Fa dimampolo hakiho ny lavan’ny efitrano eo amin’ny lafin’ny kianja ivelany, ary zato hakiho kosa ny eo amin’ny lafin’ny tempoly.

9 Teo ambanin’ireo efitrano ireo, nisy fidirana mitodika miantsinanana ho an’izay avy ao amin’ny kianja ivelany.

10 Teo amin’ny sakan’ny rindrin’ny kianja atsinanana, manatrika ny fitoerana foana sy ny tamboho, nisy efitrano koa,

11 ary teo anoloany nisy lalana toy ny hita ao amin’ireo efitrano teo amin’ny lafiny avaratra; sahala ny lavany sy ny sakany, torak’izany koa ny fidirana aman-toetoetrany;

12 mitovy amin’ny an’ireo ihany koa ny varavaran’ireto efitrano eto atsimo; misy varavarana koa eo amin’ny fiandohan’ny lalana manaraka ny tamboho mifanandrify eo andrefana halehan’izay miditra.

13 Dia hoy izy tamiko: «Ireo efitrano eo avaratra, sy efitrano eo atsimo manatrika ny fitoerana foana ireo, no efitranon’ny fitoerana masina, ihinanan’ny mpisorona manatona an’i Iaveh ny zava-masina indrindra; ao no ametrahany ny zavatra masina indrindra, ny fanatitra, ny sorona noho ny ota sy noho ny fahadisoana, satria masina io fitoerana io.

14 Rehefa tafiditra ao ny mpisorona dia tsy hiala ao amin’ny fitoerana masina izy mba ho ao amin’ny kianja ivelany, raha tsy efa navelany ao ny fitafiana nentiny nanao ny fanompoana; fa masina izany fitafiana izany. Miova fitafiana aloha izy, vao manatona mankao amin’ny raharaha momba ny vahoaka.»

Refin’ny kianja

15 Nony tapitra norefesiny ny tao anatin’ny trano, dia nentiny nivoaka aho ho ao amin’ny vavahady, izay mitodika miantsinanana ny anoloany, dia norefesiny ny manodidina io.

16 Norefesiny tamin’ny volotara fandrefesana ny lafiny atsinanana, ka indimanjaton’ny volotara araka ny volotara fandrefesana, ny manodidina azy.

17 Norefesiny ny lafiny avaratra, dia indimanjaton’ny volotara araka ny volotara fandrefesana, ny manodidina azy.

18 Norefesiny ny lafiny atsimo: indimanjaton’ny volotara araka ny volotara fandrefesana.

19 Nitodika ny lafiny andrefana izy dia nandrefy indimanjaton’ny volotara araka ny volotara fandrefesana.

20 Norefesiny ny lafiny efatra amin’ny manodidina; fa nisy tamboho manodidina ny tempoly, ka dimanjato ny lavany, dimanjato ny sakany, mba hampiavaka ny masina sy ny tsy masina.

Fiverenan’i Iaveh

1 Dia nentiny ho eo am-bavahady aho, eo amin’ilay vavahady mitodika miantsinanana.

2 Ary indro, tamy avy any atsinanana ny voninahitry ny Andriamanitr’i Israely. Ny feony, tahaka ny firohondrohon’ny rano be; ary ny tany namirapiratra azon’ny voninahiny.

3 Ny tarehin-javatra hitako, dia tahaka ilay tarehin-javatra hitako no fijery azy, fony aho tonga handrava ny tanàna; sady nanahaka ny tarehin’ilay zavatra hitako teo amoron’ny ony Kobara ihany koa, no fijery azy, ka nitrosona nihohoka aho.

4 Dia niditra nankao an-trano ny voninahitr’i Iaveh, nihazo ny lalana teo amin’ny vavahady mitodika miantsinanana.

5 Tamin’izay, naingain’ny Fanahy aho, nentiny ho eo amin’ny kianja anatiny; ary indro, feno ny voninahitr’i Iaveh ny trano.

6 Reko nisy niteny tamiko avy ao an-trano; ary nisy lehilahy nitsangana teo akaikiko.

7 Hoy izy tamiko: Ry zanak’olona! Eto no fitoeran’ny seza fiandrianako, fitoerana hametrahako ny faladian-tongotro, honenako eo amin’ny zanak’i Israely na izy na ny mpanjakany, tsy handoto intsony ny Anarako masina, amin’ny fahavetavetany, na ny fati-mpanjakany, na ny fitoerana avony,

8 mametraka ny tokonany eoanilan’ny tokonako, sy ny tolanany eo anilan’ny tolànako, hany ka rindrina sisa no nanelanelana ahy sy azy ireo, ka nandoto ny Anarako masina izy tamin’ny fahavetavetana nataony, ary naringako noho ny fahatezerako.

9 Fa amin’izao kosa, hoesoriny lavitra ahy ny fahavetavetany sy ny fati-mpanjakany, ka honina eo aminy mandrakizay Aho.

10 Ianao, ry zanak’olona, aoka hampahalala ny taranak’i Israely an’ity trano ity, mba hahamenatra azy noho ny fahotany; ary aoka handrefy azy araka ny marika izy.

11 Raha menatra izy noho izay rehetra efa nataony, dia ambarao azy ny endrik’ity trano ity, ny filaminany, ny fivoahana amam-pidirana aminy, ny andriny, ny fandaharana rehetra momba azy, ary ny fombany aman-dalàna rehetra; ataovy an-tsoratra eo imasony izany rehetra izany, mba hitandremany ny fombany amam-pitsipiny rehetra, sy hanatanterahany an’izany.

12 Izao no lalàna amin’ny trano: Masina dia masina avokoa, ny tokotany rehetra momba azy manodidina, eo an-tampon’ny tendrombohitra. Izany no lalàna amin’ny trano.

Ny ôtely

13 Izao no refin’ny ôtely amin’ny hakiho, fa ny hakiho kosa dia hakiho sy vodivoam-pelatanana; ny lakan-drano iray hakiho ny haavony, iray hakiho ny sakany; ny molony manodidina azy irain-jehy. Toy izany no fiantombenan’ny ôtely.

14 Hatramin’ny lakan-drano eo amin’ny tany, ka hatreo amin’ny koronosy manodidina ambany, roa hakiho, ary iray hakiho ny sakany; hatramin’ny koronosy kely ka hatramin’ny koronosy lehibe, efatra hakiho, ary iray hakiho ny sakany.

15 Efatra hakiho ny Harely; ary ny avy eo amin’ny Ariela eo ambony no ijoroan’ny tandroka efatra.

16 Roa ambinin’ny folo hakiho, ny lavan’ny Ariela; 12 hakiho koa ny sakany; efa-joro sokera tsara izy.

17 Ary 14 hakiho ny koronosy amin’ny lafiny efatra, 14 hakiho ny halavany, ary 14 hakiho ny sakany; antsasaky ny hakiho, ny molony manodidina; misy lakan-drano iray hakiho manodidina azy; mitodika miantsinanana ny ambaratongany.

Fanamasinana ny ôtely

18 Ary hoy izy tamiko: Ry zanak’olona, izao no lazain’ny Tompo Iaveh: Izao no lalàna ny amin’ny ôtely amin’ny andro hanaovana azy, hanaterana sorona dorana sy hamafazana ra aminy:

19 Tolory vantotr’ombalahy iray hatao sorona noho ny ota, ny levita mpisorona izay avy amin’ny taranak’i Sadôka, sy manatona Ahy, – teny marin’i Iaveh Tompo, – hanompo Ahy.

20 Hangalanao ny rany, dia atenteno ny tandrony efatra amin’ny ôtely, ny zorony efatra amin’ny koronosiny, ary ny molony manodidina, hanaovanao fanonerana amam-panavotana ny ôtely.

21 Halainao ny ombalahy natolotra noho ny ota, ka hodorana amin’ny fitoerana efa voatokana ao amin’ny trano ivelan’ny fitoerana masina.

22 Amin’ny andro faharoa, manatera vantotr’osilahy, tsy misy kilema, ho fanatitra noho ny ota; ary manaova fanonerana ho an’ny ôtely toy ny natao tamin’ny ombalahy.

23 Rehefa vitanao ny fanonerana dia manatera vantotr’ombalahy iray tsy misy kilema, sy ondralahy iray, avy amin’ny andiany, tsy misy kilema.

24 Ianao moa, hanatitra ireo, eo anatrehan’i Iaveh; ny mpisorona kosa handraraka sira aminy, sy hanolotra azy ho sorona dorana amin’i Iaveh.

25 Hafitoanano hanateranao osilahy isan’andro, ho sorona noho ny ota; manatera koa ombalahy iray sy ondralahy iray, avy amin’ny andiany, tsy misy kilema.

26 Hafitoana no hanaovam-panavotana ho an’ny ôtely dia hanadiovana azy sy hanamasinana azy.

27 Rehefa tapitra ny hafitoana, ny andro fahavalo sy ny manaraka dia hanoloran’ny mpisorona eo ambonin’ny ôtely ny sorona doranareo sy ny sorona fisaoranareo, ka hankasitrahiko ianareo, – teny marin’ny Tompo Iaveh. –

Fandehanana eo amin’ny alo-baravarana atsinanana

1 Dia nentiny niverina aho, tamin’ny lalana mankamin’ny alo-baravarana ivelany amin’ny fitoerana masina mitodika miantsinanana; nikatona io.

2 Ary hoy i Iaveh tamiko: Hikatona ity alo-baravarana ityfa tsy hivoha na hidiran’olona akory, fa io no nidiran’i Iaveh Andriamanitr’i Israely, ka hikatona izy.

3 Ary ny amin’ny mpanapaka, noho ny maha-mpanapaka azy, dia hipetraka eo izy, hihinan-kaninaeo anatrehan’i Iaveh; eo amin’ny efitrano fidirana ho ao amin’ny alo-baravarana no hidirany, ary eo amin’io lalana io ihany koa no hivoahany.

Fepetra fidirana sy fialana ny Tempoly

4 Nony avy eo, nentiny mankamin’ny alo-baravarana avaratra aho, eo anoloan’ny trano; ka nahita ny voninahitr’i Iaveh nameno ny trano, dia niankarapoka nihohoka aho.

5 Ary hoy i Iaveh tamiko: Ry zanak’olona, mitandrema tsara, mijere amin’ny masonao, mihainoa amin’ny sofinao, izay rehetra holazaiko aminao ny amin’ny fandaharana rehetra momba ny tranon’i Iaveh sy momba ny lalàny rehetra. Tandremo tsara ny amin’izay tsy maintsy miditra ho ao an-tranon’i Iaveh, amin’ny fivoahana rehetra avy ao amin’ny fitoerana masina.

6 Lazao amin’ireo mpiodina amin’ny taranak’i Israely hoe: Izao no lazain’ny Tompo Iaveh: Aoka izay fahavetavetanareo rehetra, ry taranak’i Israely,

7 dia ny nitondranareo ny taranaky ny hafa firenena, tsy mifora fo na mifora nofo akory, ho eo amin’ny fitoerako masina, mba handoto ny tranoko, tamin’ny nanateranareo ny anjara haniko, na ny sabora na ny ra; ka dia nivadika ny fanekeko ireo, tamin’ny fahavetavetanareo rehetra.

8 Ianareo tsy nanefa ny fanompoana momba ireo zavatro masina; fa ireo hafa firenena no notendrenareo hanao ny fanompoana soa.

9 Izao no lazain’ny Tompo Iaveh: Tsy misy hiditra ao amin’ny fitoerako masina amin’ireo taranaky ny hafa firenena tsy mifora fo na mifora nofo akory, rehefa mety ho taranaky ny hafa firenena eo amin’ny zanak’i Israely.

Ny Levita

10 Izao koa: Ireo levita nanalavitra Ahy, tamin’ny andro nivilian’i Israely, izay nivily nanalavitra Ahy, mba hanarahany ny sampiny vetaveta, dia hitondra ny helony.

11 Izy ireo, ao amin’ny fitoerako masina, dia ho mpanompo miandry ny varavaran’ny trano, sy manao fanompoana ao amin’ny trano; izay ireo no hamono ho an’ny vahoaka ny zavatra hatao sorona dorana, na sorona hafa, ary hijanona eo anatrehan’ny vahoaka hanompo azy.

12 Noho izy ireo nanompo azy teo anoloan’ny sampiny vetaveta, sy nandatsaka ny taranak’i Israely tamin’ny heloka, noho izany, dia efa nanangan-tanana hamely azy Aho, – teny marin’ny Tompo Iaveh, – nianiana fa hitondra ny helony izy.

13 Tsy hanatona Ahy hanao ny raharahan’ny fisoronana izy ireo na hanakaiky ny zavatro masina rehetra, eo amin’ny fitoerana masina indrindra, fa hivesatra ny fahafaham-barakany aman-tsazin’ny fahavetavetana nataony.

14 Hataoko miandraikitra ny fanompoana momba ny trano, rehefa mety ho raharaha fanao ao, sy izay rehetra tokony hatao ao.

Ny mpisorona

15 Fa ireo Levita mpisorona, taranak’i Sadôka kosa, izay nitandrina ny fandaharana momba ny fitoerako masina tamin’ny nivilian’ny zanak’i Israely nanalavitra Ahy, dia izay ireo no hanatona Ahy hanao ny fanompoana amiko, sy hitsangana eo anatrehako, hanatitra ny sabora sy ny ra, – teny marin’ny Tompo Iaveh.

16 Izy ireo no hiditra ao amin’ny fitoerako masina; izy ireo no hanatona ny latabatro hanao ny fanompoana Amiko ary hitandrina ny fitsipiko izy.

17 Rehefa miditra ny alo-baravaran’ny kianja anatiny izy ireo, dia hiakanjo rongony fotsy; tsy hisy volon’ondry eny aminy, rehefa manao ny fanompoana eo amin’ny alo-baravaran’ny kianja anatiny sy ao anatiny izy.

18 Satroka rongony fotsy no ho eo an-dohany, kalisaonina rongony fotsy no ho eo aminy, ary tsy hietra zava-mahatsemboka azy izy.

19 Rehefa mivoaka ho any amin’ny kianja ivelany kosa izy, ho eo amin’ny kianja ivelany manatona ny vahoaka, dia hoesoriny ny fitafiana nentiny nanao ny fanompoana ka havelany ao amin’ny efitranon’ny fitoerana masina; ary fitafiana hafa no hanaovany, fa tsy hanamasina ny vahoaka amin’ny fitafiany izy.

20 Ny lohany tsy hoharatany, ary tsy havelany haniry ny volony ho lava fa hihety volon-doha izy.

21 Rehefa mety no mpisorona tsy hisy hisotro divay, raha hiditra ao amin’ny kianja anatiny.

22 Tsy hanambady vehivavy efa maty vady na voasaotra; fa izay virjiny, iray razana amin’ny taranak’i Israely ihany; hahazo manambady vehivavy mpitondratena novinadin’ny mpisorona efa maty.

23 Izy ireo no hampianatra ny vahoakako hahay hanavaka ny masina sy ny tsy masina; izy ireo no hampianatra azy hahay hanavaka ny maloto sy ny madio;

24 izy ireo no hipetraka hitsara, raha misy fifandirana; ka araka ny rariny navoakako no hitsarana. Hitandrina ny lalàna amam-pandaharako amin’ny fetiko rehetra sy hankamasina ny sabatako.

25 Tsy hisy hiditra am-paty handoto ny tenany izy ireo; hany azony handotoan-tena dia noho ny rainy, ny reniny, ny zanany lahy, ny zanany vavy, ny rahalahiny, ny anabaviny tsy manam-bady.

26 Ary rehefa vita fandiovan-tena izy dia hanisana andro fito;

27 ary amin’ny andro hidirany ao amin’ny fitoerana masina ao amin’ny kianja anatiny mba hanao ny fanompoana ao amin’ny fitoerana masina, dia hanatitra ny sorony noho ny ota izy; – teny marin’ny Tompo Iaveh. –

28 Izao no lova ho azy ireo: Izaho no ho lovany; tsy homenareo zaratany eo amin’i Israely izy; fa Izaho no ho anjarany.

29 Ny hiveloman’izy ireo dia ny fanatitra, ny sorona noho ny ota, ary ny sorona noho ny fahadisoana; ary izay rehetra hatao anatema amin’i Israely, dia ho azy ireo avokoa.

30 Ny santatry ny voaloham-bokatra rehetra isan-karazany, mbamin’ny fanatitra rehetra isan-karazany haterinareo, dia ho an’ny mpisorona; omeo ny mpisorona koa ny santatry ny fitotoam-barinareo, mba hitoeran’ny tso-drano ao amin’ny tranonareo.

31 Ny biby maty na voaviravira rehetra, na vorona na biby, dia tsy hohanin’ny mpisorona.