Category: 1Mpanjaka

Fahanteran’i Davida sy teti-dratsin’i Adoniasa

1 Efa zokiolona sy nandroso fahanterana i Davida, ka na norakofan-damba aza tsy nahatsiaro hafanana intsony.

2 Ary hoy ny mpanompony taminy: «Aoka hitadiavana zazavavy virjiny ny mpanjaka tompoko, hitoetra eo anatrehan’ny mpanjaka sy hitaiza azy, ary handry eo amin’ny tratranao, ka dia hafana ny mpanjaka tompoko.»

3 Dia nitady zazavavy tsara tarehy eran’ny tanin’i Israely rehetra ny olona, ka nahita an’i Abisaga Sonamita, ary nentina tao amin’ny mpanjaka io.

4 Tsara tarehy tokoa razazavavy, sady nitaiza sy nanompo ny mpanjaka, nefa ny mpanjaka tsy nahalala azy.

5 Ary i Adoniasa nanandra-tena, ka nanao anakampo hoe: «Izaho no ho mpanjaka.» Ary nanomana kalesy aman-tsoavaly ho azy izy, ary olona 50 lahy ho mpihazakazaka eo alohany.

6 Ary ny rainy tsy mbola mba nampalahelo azy na oviana na oviana tamin’ny andro niainany nanao hoe: «Nahoana ianao no manao toy izao?» Sady tsara tarehy tokoa moa i Adoniasa, ary nateraky ny reniny izy nanaraka an’i Absalôma.

7 Nisy resadresaka natao tamin’i Jôaba, zanak’i Sarvià sy tamin’i Abiatara mpisorona, fa rafitra niandany tamin’i Adoniasa izy ireo.

8 Tsy mba nety nikambana tamin’i Adoniasa kosa i Sadôka mpisorona, i Banaiasa zanak’i Jôiadasa, i Natàna mpaminany, i Semeià, i Reia, mbamin’ny lehilahy maherin’i Davida.

9 Ary i Adoniasa namono ondry sy omby ary zanak’omby matavy, teo akaikin’ny vaton’i Zoheleta anilan’i En-Rogela, ka nanasa ny rahalahiny rehetra, zanaky ny mpanjaka, mbamin’ny lehilahy rehetra amin’i Jodà mpanompon’ny mpanjaka.

10 Samy tsy nasainy anefa na i Natàna mpaminany, na i Banaiasa, na ny lehilahy mahery, na i Salômôna rahalahiny.

Firaisan-tetik’i Natàna sy i Betsabea

11 Ka hoy i Natàna tamin’i Betsabea renin’i Salômôna: «Tsy renao va fa efa tonga mpanjaka i Adoniasa zanak’i Hagita, nefa tsy mahalala izany akory i Davida tompontsika?

12 Koa etsy ange avelao homeko hevitra ianao ankehitriny hamonjenao ny ainao sy ny ain’i Salômôna zanakao.

13 Mandehana midira ao amin’i Davida mpanjaka ka lazao aminy hoe: ‹Ry mpanjaka tompoko ô: tsy efa nianiana tamiko mpanomponao va ianao, nanao hoe: I Salômôna zanakao hanjaka handimby ahy, ary izy no hipetraka eo amin’ny seza fiandrianako? Ka ahoana àry no i Adoniasa indray ity no tonga mpanjaka?›

14 Ary indro fa ilay mbola miteny amin’ny mpanjaka iny ianao, dia hiditra avy aorianao koa aho, ka hanamarina ny teninao.»

15 Dia nankao amin’ny mpanjaka tao an’efitranony, i Betsabea; efa antitra dia antitra ny mpanjaka, ary i Abisaga Sonamita nanompo azy teo.

16 Niondrika i Betsabea, dia niankohoka teo anatrehany, ka hoy ny mpanjaka: «Inona no ilainao?»

17 Dia hoy ny navaliny azy: «Tompokolahy ô, i Iaveh Andriamanitrao no efa nianiananao tamin’ny mpanompovavinao hoe: I Salômôna zanakao no hanjaka handimby ahy, ary izy no hipetraka eo amin’ny seza fiandrianako.

18 Kanjo ankehitriny, indro fa i Adoniasa no tonga mpanjaka; kanefa ianao tsy mahalala izany akory, ry mpanjaka tompoko.

19 Izy efa namono omby aman-janak’omby matavy mbamin’ny ondry betsaka; efa nasainy avokoa ny zanaka lahin’ny mpanjaka sy i Abiatara mpisorona, ary i Jôaba filohan’ny tafika, fa i Salômôna mpanomponao tsy mba nasainy.

20 Ny mason’i Israely rehetra anefa izao, ry mpanjaka tompoko ô, dia samy manandratra anao, hanambara izay hipetraka handimby anao, eo amin’ny seza fiandrianan’ny mpanjaka tompoko.

21 Fa raha tsy izany, rehefa mody amin’ny razany ny mpanjaka tompoko, dia hatao olo-meloka izaho sy i Salômôna zanako.»

22 Mbola niteny amin’ny mpanjaka ao Betsabea, dia indro tonga koa i Natàna mpaminany.

23 Ka nambara tamin’ny mpanjaka hoe: «Indro i Natàna mpaminany.» Dia niditra nanoloana ny mpanjaka izy, dia niankohoka tamin’ny tany teo anatrehany,

24 ary hoy i Natàna hoe: «Ry mpanjaka tompoko ô, ianao angaha efa nilaza hoe: I Adoniasa no hanjaka handimby ahy, sy hipetraka eo amin’ny seza fiandrianako?

25 Fa nidina androany izy izao, ka namono omby aman-janak’omby matavy sy ondry be dia be; nasainy avokoa ny zanaka lahin’ny mpanjaka sy ny filohan’ny tafika ary i Abiatara mpisorona. Indro mihinana sy misotro eo anatrehany ireo izao, ka manao hoe: Ho ela velona anie i Adoniasa mpanjaka!

26 Samy tsy nasainy anefa na izaho mpanomponao na i Sadôka mpisorona, na i Banaiasa zanak’i Jôiadasa, na i Salômôna mpanomponao.

27 Ka moa ve avy amin’ny mpanjaka tompoko no hisehoan’izany zavatra izany, fa tsy mba nampahafantarinao ny mpanomponao izay hipetraka handimby ny mpanjaka tompoko eo amin’ny seza fiandrianany?»

I Salômôna tendren’i Davida sy hosorana ho mpanjaka

28 Ary namaly i Davida mpanjaka nanao hoe: «Asaovy mankatỳ i Betsabea.» Dia niditra teo anatrehan’ny mpanjaka ravehivavy ary nandroso ho eo anatrehan’ny mpanjaka.

29 Ka nanao izao fianianana izao ny mpanjaka: «Ho velona anie i Iaveh, izay nanafaka ahy tamin’ny loza rehetra,

30 dia hotanterahiko anio ilay fianianana nataoko tamin’i Iaveh Andriamanitr’i Israely hoe: I Salômôna zanakao lahy hanjaka handimby ahy ary hipetraka eo amin’ny seza fiandrianako hisolo ahy.»

31 Koa niondrika nihohoka tamin’ny tany teo anoloan’ny mpanjaka i Betsabea, dia nanao hoe: «Ho velona mandrakizay anie ny tompoko Davida mpanjaka!»

32 Ary hoy i Davida mpanjaka: «Asaovy mankatỳ i Sadôka mpisorona sy i Natàna mpaminany, ary i Banaiasa zanak’i Jôiadasa.» Nony niditra nankeo anatrehan’ny mpanjaka ireo,

33 dia hoy ny mpanjaka tamin’ireo: «Ento miaraka aminareo ny mpanompon’ny tomponareo, ka ampitaingeno ny mole vaviko i Salômôna zanako, dia ento miditra mankany Gihôna.

34 Rehefa mby any, i Sadôka mpisorona sy i Natàna mpaminany dia hanosotra azy ho mpanjaka amin’i Israely, ary ianareo hitsoka anjomara sy hilaza hoe: Ho ela velona anie i Salômôna mpanjaka!

35 Raha efa izany, miakara manaraka azy ianareo, fa ho avy hipetraka eo amin’ny seza fiandrianako izy, ka hanjaka hisolo ahy, satria izy no tendreko ho filohan’i Israely sy i Jodà.»

36 Dia namaly i Banaiasa zanak’i Jôiadasa ka nanao tamin’ny mpanjaka hoe: «Amen! Ho toy izany koa anie no didin’i Iaveh Andriamanitry ny mpanjaka tompoko!

37 Ho toy ny nomban’i Iaveh ny mpanjaka tompoko anie no hombàny an’i Salômôna koa ary hasandrany ho ambony noho ny seza fiandrianan’i Davida mpanjaka tompoko anie ny seza fiandrianan’i Salômôna!»

38 Dia nandeha i Sadôka mpisorona sy i Natàna mpaminany, ary i Banaiasa zanak’i Jôiadasa mbamin’ny Keretianina sy ny Feletianina; nasainy nitaingina ny mole vavin’i Davida mpanjaka i Salômôna, dia nentiny nankany Gihôna.

39 Ary i Sadôka mpisorona, naka ny tandroka misy diloilo tao amin’ny taberbakla, dia nanosotra an’i Salômôna, ary nitsoka anjomara ny olona, ary ny vahoaka rehetra nanao hoe: «Ho ela velona anie i Salômôna mpanjaka!»

40 Raha efa izany, dia niakatra nanaraka azy ny vahoaka rehetra. Nitsoka sodina ny vahoaka sy nifaly indrindra, ka nahavaky ny tany ny horakoraka avy amin’izy ireo.

Tahotr’i Adoniasa

41 Ren’i Adoniasa sy ireo nasainy rehetra, izay teo aminy, izany, tamin’ilay nanapitra ny fihinanam-beny iny izy. Ary hoy i Jôaba nandre ny feon’anjomara: «Tabataba inona izato avy amin’ny tanàna mihotakotaka?»

42 Mbola miteny eo izy, no indro tonga i Jônatasy zanak’i Abiatara mpisorona. Hoy i Adoniasa taminy: «Mandrosoa fa lehilahy mahery fo ianao, ka mpitondra zava-baovao tsara.»

43 Dia namaly i Jônatasy, ka nanao tamin’i Adoniasa hoe: «Eny lahy, izany tokoa, fa nanangana an’i Salômôna ho mpanjaka i Davida mpanjaka tompontsika.

44 Nirahin’ny mpanjaka hiaraka aminy i Sadôka mpisorona sy i Natàna mpaminany ary i Banaiasa zanak’i Jôiadasa, mbamin’ny Keretianina sy ny Feletianina, ka nampitaingenan’ireo ny mole vavin’ny mpanjaka izy.

45 Nohosoran’i Sadôka mpisorona sy i Natàna mpaminany ho mpanjaka izy, tany Gihôna; dia niakatra avy eny tamim-piravoravoana izy ireo, ka mihotakotaka ny tanàna, ary ny tabataban’izany ilay renareo teo.

46 Ary efa nipetraka amin’ny seza fiandrianan’ny fanjakana aza i Salômôna;

47 ary ny mpanompon’ny mpanjaka aza, efa avy nisaotra an’i Davida mpanjaka tompontsika, nanao hoe: Hataon’ny Andriamanitrareo malaza noho ny anaranao anie ny anaran’i Salômôna, ary hasandrany ho ambony noho ny seza fiandriananao ny seza fiadrianany! Dia niankohoka teo am-parafara ny mpanjaka.

48 Ary niteny toy izao aza ny mpanjaka nanao hoe: ‹Hisaorana anie i Iaveh Andriamanitr’i Israely, fa nanome ahy mpandimby eo amin’ny seza fiandrianako Izy androany, hahazoako mahita maso an’izany.› »

49 Raiki-tahotra mafy izy rehetra nasain’i Adoniasa ka tafatsangana dia samy lasa nandeha amin’izay nalehany avy.

50 I Adoniasa natahotra an’i Salômôna ka nitsangana, dia nandeha namikitra tamin’ny tandroky ny ôtely.

51 Ary nisy nilaza izany tamin’i Salômôna nanao hoe: «Indro, i Adoniasa matahotra an’i Salômôna mpanjaka, ary indro izy namikitra amin’ny tandroky ny ôtely, nanao hoe: Aoka hianiana amiko i Salômôna mpanjaka anio, fa tsy hamono ny mpanompony amin’ny sabatra.»

52 Dia hoy i Salômôna: «Raha miseho ho lehilahy mahery izy, dia tsy hisy latsaka amin’ny tany na dia singam-bolony iray aza, fa raha misy heloka hita aminy kosa, dia ho faty izy.»

53 Ary naniraka olona hampidina azy hiala teo amin’ny ôtely i Salômôna; ka tonga niankohoka teo anatrehan’i Salômôna mpanjaka izy, dia hoy i Salômôna taminy hoe: «Mandehana any an-tranonao.»

Fara hafatr’i Davida sy ny nahafatesany

1 Nony efa akaiky ny andro hahafatesan’i Davida, dia nandidy an’i Salômôna zanany izy, nanao hoe:

2 «Handeha amin’ny lalana falehan’ny tany rehetra aho ity, ka mahereza ianao, misehoa ho lehilahy.

3 Tandremo ny fanompoana an’i Iaveh Andriamanitrao, fa araho ny lalany, tandremo ny didy aman-dalàny, ny fitsipika amam-pandaharany, araka ny voasoratra ao amin’ny lalàn’i Môizy, mba hahomby ianao amin’izay hataonao rehetra sy izay rehetra noherehinao,

4 ka dia hotanterahin’i Iaveh ilay teny nilazany ny amiko hoe: Raha mitandrina ny diany ny zanako, ka mandeha eo anatrehako amim-pahamarinana amin’ny fony rehetra sy amin’ny fanahiny rehetra, dia tsy ho lany taranaka ho eo amin’ny seza fiandrianan’i Israely ianao.

5 Ary fantatrao ihany ny nataon’i Jôaba zanak’i Sarvià tamiko, dia ilay nataony tamin’izy roa lahy, i Abnera zanak’i Nera, sy i Amasà zanak’i Jetera, filohan’ny tafik’i Israely, fa novonoiny ireo, ka ny ra fandatsaka amin’ny ady, nalatsany amin’izao tany mandry izao, ary ny ra fandatsaka amin’ny ady dia nataony tamin’ny fehikibo teny am-balahany sy tamin’ny kapa teny amin’ny tongony!

6 Izay azon’ny fahendrenao no ataovy, fa aza avela hidina amim-piadanana any amin’ny fonenan’ny maty ny volo fotsiny.

7 Fa ireo zanak’i Berzelaia galaadita kosa dia hanehoy fitiavana ka aoka ho isan’izay mihinana eo amin’ny latabatrao izy ireo, fa tahaka izany koa no nanatonany ahy, fony aho nandositra teo anoloan’i Absalôma rahalahinao.

8 Indro eto akaikinao i Semeià, zanak’i Gerà, Benjaminita, avy ao Bahorima. Ozona mafy no notononiny tamiko, tamin’ny andro nankanesako tany Mahanaîma. Nefa noho izy nidina nitsena ahy tany Jordany dia nianiana taminy, tamin’ny anaran’i Israely aho, nanao hoe: Tsy hovonoiko amin’ny sabatra ianao.

9 Ary ankehitriny aza avela ho afa-maina anefa izy, fa olon-kendry ianao, ka mahalala izay tokony hanaovanao azy. Fandatsahan-dra no ampidinanao ny volo fotsiny any amin’ny fonenan’ny maty.»

10 Dia nandry any amin’ny razany i Davida, ka nalevina tao an-tanànan’i Davida.

11 Efapolo taona no andro nanjakan’i Davida tamin’i Israely, ny fito taona nanjakany tany Hebrôna, ary ny 33 taona tao Jerosalema.

12 Ary i Salômôna nipetraka teo amin’ny seza fiandrianan’i Davida rainy, ary niorina tsara ny fanjakany.

Ny nahafatesan’i Adoniasa

13 Ary i Adoniasa zanak’i Hagita nankao amin’i Betsabea renin’i Salômôna. Ary hoy ravehivavy: «Hevi-pihavanana va no ahatongavanao?» Dia hoy ny navaliny: «Eny, hevi-pihavanana,»

14 sady nampiany hoe: «Misy teny indraimbava holazaiko aminao.» Ka hoy ravehivavy; «Lazao àry.»

15 Dia hoy izy: «Fantatrao fa efa tato amiko ny fanjakana; izaho no efa nandrandrain’i Israely rehetra mba hanjakako. Kanjo nafindra ny fanjakana ka lasan’ny rahalahiko, fa efa natokan’i Iaveh ho azy.

16 Koa ankehitriny, zavatra iray ihany no mba hangatahiko aminao, ka aza dia lavinao aho.» Dia hoy ravehivavy namaly azy: «Lazao.»

17 Dia ho izy: «Miangavy anao aho hilaza amin’i Salômôna mpanjaka, fa tsy handà anao izy, mba hanomezany an’i Abisaga Sonamita ho vadiko.»

18 Dia hoy i Betsabea: «Tsy maninona fa dia hiteny amin’ny mpanjaka ny aminao aho.»

19 Dia nankany amin’i Salômôna mpanjaka, i Betsabea, hilaza aminy ny amin’i Adoniasa. Nitsangana nitsena azy ny mpanjaka, sady niankohoka teo anatrehany; dia nipetraka teo amin’ny seza fiandrianany, sy nampanisy seza fiandrianana ho an’ny renin’ny mpanjaka, ka nipetraka teo ankavanany ravehivavy.

20 Izay izy vao niteny hoe: «Misy zavatra kely anankiray hangatahiko aminao, ka aza dia lavinao aho.» Ary hoy ny mpanjaka taminy: «Mangataha, ry reny, fa tsy handà anao aho.»

21 Dia hoy izy: «Aoka homena ho vadin’i Adoniasa rahalahinao i Abisaga Sonamita.»

22 Fa hoy ny navalin’i Salômôna mpanjaka tamin-dreniny: «Ahoana no angatahanao an’i Abisaga Sonamita ho an’i Adoniasa? Angataho ho azy koa ny fanjakana; fa izy rahateo no zokiko, dia ho azy sy ho an’i Abiatara mpisorona ary ho an’i Jôaba zanak’i Sarvià.»

23 Nianiana tamin’i Iaveh teo i Salômôna mpanjaka, nanao hoe: «Hataon’i Iaveh amiko anie izay ngidiny indrindra, raha tsy ho faty noho ny nanaovany an’izany teny izany i Adoniasa.

24 Koa ankehitriny, velona i Iaveh ilay nampiorina sy nampipetraka ahy eo amin’ny seza fiandrianan’i Davida raiko, sady nanorina trano ho ahy, araka ny voalazany rahateo, dia hovonoin-ko faty ihany i Adoniasa.»

25 Dia nanendry an’i Banaiasa zanak’i Jôiadasa i Salômôna mpanjaka; nasian’io Adoniasa dia maty.

Ny nahafatesan’i Abiatara sy i Jôaba

26 Ary hoy ny mpanjaka tamin’i Abiatara mpisorona: «Mandehana ianao mankany amin’ny taninao, any Anatôta, nefa noho ianao nitondra ny Fiaran’i Iaveh Tompo teo anatrehan’i Davida raiko, sy noho ianao nanana anjara tamin’ny fahoriana rehetra nahazo an’ikaky, dia tsy ataoko maty amin’izao andro izao ianao.»

27 Koa nesorin’i Salômôna tsy ho mpisoron’i Iaveh intsony i Abiatara, ary tanterany tamin’izay ilay nolazain’i Iaveh tany Silao ny amin’ny fianakavian’i Helì.

28 Tonga tao amin’i Jôaba izany vaovao izany satria niandany tamin’i Adoniasa i Jôaba, na dia tsy niandany tamin’i Absalôma aza. Ary nandositra tao amin’ny tabernaklan’i Iaveh i Jôaba, ka namikitra ny tandroky ny ôtely

29 Ary nampandrenesina i Salômôna mpanjaka fa nandositra ao amin’ny tabernaklan’i Iaveh i Jôaba, ka tao anilan’ny ôtely izy; ka nirahin’i Salômôna i Banaiasa nataony hoe: «Mandehana asio izy.»

30 Nony tonga tao amin’ny tabernaklan’i Iaveh i Banaiasa, dia nilaza taminy hoe: «Izao no lazain’ny mpanjaka: ‹Mivoaha ianao.› » Fa hoy ny navaliny: «Tsia, fa ho faty eto aho.» Dia nakarin’i Banaiasa tamin’ny mpanjaka izany teny izany, nataony hoe: «Izany no teny nataon’i Jôaba, ary izany no navaliny ahy.»

31 Ka hoy ny mpanjaka tamin’i Banaiasa: «Dia ataovy araka ny voalazany, ka asio izy dia avelao, mba hanesoranao amiko sy amin’ny taranaky ny raiko, ny ra nalatsak’i Jôaba tsy misy antony akory.

32 Hatsingerin’i Iaveh eo an-dohany ihany ny rany, fa olona roa lahy, marina sy tsara noho izy, no nasainy sy novonoiny tamin’ny sabatra, nefa tsy fantatr’i Davida raiko izany, dia i Abnera zanak’i Nera, filohan’ny tafik’i Israely, sy i Amasà, zanak’i Jetera, filohan’ny tafik’i Jodà.

33 Ka ny lohan’i Jôaba sy ny lohan’ny taranany hatrany hatrany no hitsingerenan’ny ran’izy roa lahy ireo. Fa ny ho an’i Davida sy ny taranany mbamin’ny fianakaviany aman-tseza fiandrianany kosa, dia fiadanana lalandava avy amin’i Iaveh!»

34 Dia niakatra i Banaiasa zanak’i Jôiadasa, ka namely an’i Jôaba sy nahafaty azy, ary nalevina tany amin’ny fonenany tany an’efitra.

35 I Banaiasa zanak’i Jôiadasa no nataon’ny mpanjaka filohan’ny tafika, ho solony, ary i Sadôka no nataon’ny mpanjaka mpisorona, ho solon’i Abiatara.

Tsy faneken’i Semeià sy ny nahafatesany

36 Nampiantso an’i Semeià koa ny mpanjaka, dia nilaza taminy hoe: «Manaova trano ho anao eto Jerosalema dia hitoeranao, ary tsy hialanao hivezivezy atsỳ amin’arỳ.

37 Fa amin’izay andro hivoahanao hita ny ranondriaka Sedrôna no fantaro, fa tsy maintsy hahafatesanao, ary ho eo ambonin’ny lohanao ihany ny ranao.»

38 Namaly ny mpanjaka i Semeià nanao hoe: «Tsara izany teny izany, ka hanao araka izany voalazan’ny mpanjaka tompoko izany ny mpanomponao.» Dia nitoetra andro maro be tany Jerosalema i Semeià.

39 Kanjo nony afaka telo taona, dia sendra nandositra ny mpanompon’i Semeià roa lahy, tany amin’ny Akisa, zanak’i Maakà, mpanjakan’i Geta. Dia nilazana izany i Semeià, natao hoe: «Indro any Geta ny mpanomponao.»

40 Dia nitsangana i Semeià, nankany amin’i Akisa, any Geta.

41 Ary nambara tamin’i Salômôna, fa niala tao Jerosalema i Semeià nankany Geta, ka efa tafaverina.

42 Dia naniraka olona hiantso an’i Semeià ny mpanjaka ka hoy izy taminy: «Tsy efa nampianiana anao tamin’i Iaveh va aho, sy nanome didy anao nanao hoe: Fantaro fa amin’ny andro hivoahanao hivezivezy atsỳ arỳ no tsy maintsy hahafatesanao! Ary tsy efa namaly va ianao, nanao tamiko hoe: Tsara izany teny izany?

43 Ka nahoana àry ianao no tsy nitandrina ny fianianana tamin’i Iaveh sy ny didy nomeko anao?»

44 Ary hoy ny mpanjaka tamin’i Semeià: «Fantatrao, eny fantatry ny fonao, ny ratsy rehetra nataonao tamin’i Davida raiko, ka hatsingerin’i Iaveh amin’ny lohanao ny haratsianao.

45 Fa i Salômôna mpanjaka kosa hambinina ary ny seza fiandrianan’i Davida hatao mafy orina mandrakizay eo anatrehan’i Iaveh.»

46 Dia nomen’ny mpanjaka didy i Banaiasa zanak’i Jôiadasa, ka nivoaka namono an’i Semeià, ary maty izy. Ary niorina teo an-tanànan’i Salômôna ny fanjakana.

Teny mialoha

1 Nisy fihavanam-panambadiana nampiray an’i Salômôna tamin’i Faraôna mpanjakan’i Ejipta, fa nanambady ny zanaka vavin’i Faraôna izy, dia nitondra azy ho ao an-tanànan’i Davida, mandra-pahatapitra ny fanorenana ny tranony sy ny tranon’i Iaveh ary manda manodidina an’i Jerosalema.

2 Nefa teny amin’ny fitoerana avo ihany no nanaovan’ny vahoaka sorona, fa mbola tsy nisy trano natao ho an’ny anaran’i Iaveh hatramin’izany andro izany.

3 Tia an’i Iaveh i Salômôna ary nandeha araka ny fitsipik’i Davida rainy, nefa mbola teny amin’ny fitoerana avo ihany no nanaterany sorona sy nandoroany zava-manitra.

Nofy tany Gabaôna

4 Dia nankany Gabaôna i Salômôna hanao sorona, fa tany no fitoerana avo malaza. Sorona dorana arivo no nateriny teo ambonin’io ôtely io

5 Ary i Iaveh niseho tamin’i Salômôna tamin’ny nofy, nony alina, tany Gabaôna, ka hoy Andriamanitra taminy: «Angataho izay tianao homeko anao.»

6 Dia hoy ny navalin’i Salômôna: «Efa naneho fitiavana lehibe tamin’i Davida mpanomponao raiko Ianao, araka ny nandehanany teo anatrehanao, tamin’ny tsy fivadihana, sy fahamarinana, ary fahitsiam-po taminao; notohizinao izany fitiavana lehibe izany, ka nomenao zanaka lahy izay mipetraka eo amin’ny seza fiandrianany izy, araka izao hita izao.

7 Ary ankehitriny, Iaveh Andriamanitra ô, efa nampanjaka ny mpanomponao handimby an’i Davida raiko Ianao; izaho anefa dia mbola tovolahy tanora kely tsy mahay mitondra tena.

8 Ary ny mpanomponao dia eo afovoan’ny vahoakanao, izay nofidinao, vahoaka be dia be, tsy azo vinavinaina ny habetsahany, tsy tambo isaina, fa maro be loatra.

9 Koa saina mahiratra no omeo ny mpanomponao, hitsarako ny vahoakanao, hanavahako ny soa sy ny ratsy. Fa iza moa no hahay mitsara izao vahoakanao maro be izao!»

10 Nankasitrahin’i Iaveh ny nangatahan’i Salômôna izany zavatra izany taminy.

11 Ka hoy Andriamanitra taminy: «Noho ianao nangataka izany zavatra izany, ka tsy nangataka andro maro ho anao, sy tsy nangataka harena ho anao, ary tsy nangataka ny ain’ny fahavalonao ho anao; fa ny saina no nangatahinao ho anao mba hitsara araka ny rariny;

12 dia indro, tanterahiko ny teninao, fa omeko saina hendry sy mahiratra ianao, ka ny olona talohanao tsy nisy toa anao, ary tsy hisy toa anao ny olona hitsangana ato aoriana.

13 Omeko anao mbamin’izay tsy nangatahinao koa aza, dia harena amam-boninahitra, hany ka tsy hisy toa anao na iza na iza amin’ny mpanjaka mandritra ny andronao rehetra.

14 Ary raha mandeha amin’ny lalako ianao, ka mitandrina ny didy aman-dalàko toy ny nandehanan’i Davida rainao, dia hohalavaiko ny andronao.»

15 Nahatsiaro i Salômôna ary nahalala fa nofy izany. Ary nony tafaverina tany Jerosalema izy, dia nitoetra teo anatrehan’ny Fiaran’ny Faneken’i Iaveh, ka nanatitra sorona dorana sy sorom-pihavanana ary nanao fanasana ho an’ny mpanompony rehetra.

Fitsaràn’i Salômôna

16 Tamin’izay dia nisy vehivavy ratsy fiaina anankiroa, tonga tao amin’ny mpanjaka ka nitoetra teo anatrehany.

17 Hoy ny iray tamin’izy ireo: «Mitaraina aminao aho tompoko, fa niray trano izaho sy ravehivavy ity, ary teraka teo anilany tao an-trano aho.

18 Nony afaka hateloana ny niterahako, dia mba teraka koa ravehivavy io. Niara-nonina izahay, ary tsy nisy olon-kafa niaraka taminay tao an-trano; fa izahay roa vavy ihany no tao an-trano.

19 Maty tamin’ny alina ny zana-dravehivavy io, fa voatsindriny tao am-pandriana.

20 Ka nony nisasaka ny alina, niarina izy, nalainy ny zanako teo anilako, raha ilay mbola natory iny ny ankizy vavinao, ka io no nampandriny teo an-tratrany, fa ny zanany efa maty no nampandriny teo an-tratrako.

21 Nony niarina aho tamin’ny maraina hampinono ny zanako, dia indro fa maty izy. Nodinihiko tsara anefa ity izy nony maraina, ka hitako fa tsy ilay zanako naterako akory.»

22 Hoy ilay vehivavy anankiray: «Tsia fa ny zanako naterako no velona, ary ny zanakao no maty.» Fa namaly ity anankiray nanao hoe: «Tsy izany velively, fa ny zanakao no maty, ary ny zanako no velona.» Dia nifanditra toy izany teo anatrehan’ny mpanjaka izy ireo.

23 Hoy ny mpanjaka, nanao hoe: «Ny iray manao hoe: Ny zanakao no velona, ary ny zanakao no maty. Ny iray kosa manao hoe: Tsy izany velively, fa ny zanakao no maty, ary ny zanako no velona!»

24 Ary hoy ny mpanjaka: «Itondray sabatra aho.» Dia nitondrana sabatra teo anatrehany ny mpanjaka, ka hoy ny mpanjaka:

25 «Sasaho ny zaza velona, ka ny ilany anankiray omeo an’ity, ary ny anankiray an’itsy.»

26 Niteny tamin’izay ity vehivavy tompon’ny zaza velona; fa nahatsiaro mangoraka ny fony noho ny amin’ny zaza, ka hoy izy tamin’ny mpanjaka: «Tompokolahy ô, omeo azy re ny zaza velona; fa aza dia vonoina!» Fa hoy kosa ity anankiray: «Aoka tsy ho ahy, tsy ho anao, fa zarao.»

27 Dia namaly ny mpanjaka nanao hoe: «Omeo an’ity ny zaza velona fa aza vonoina; fa ity no reniny.»

28 Nandre ny fitsarana navoakan’ny mpanjaka i Israely rehetra, ka natahotra ny mpanjaka ny olona, satria hitany fa misy fahendren’Andriamanitra ao aminy, mba hitsarany marina.

Ireo manamboninahitr’i Salômôna

1 Nanjaka tamin’i Israely rehetra i Salômôna mpanjaka.

2 Izao no lehibe, mpanao raharahany: i Azariasa, zanak’i Sadôka, no filohan’ny mpanao raharaha.

3 I Elihôrefa sy i Ahià, zanak’i Sisà, no mpanoratra; i Jôsafata zanak’i Ahiloda, no mpitahiry boky;

4 i Banaiasa zanak’i Jôiadasa no komandin’ny tafika; i Sadôka sy i Abiatara no mpisorona.

5 I Azariasa zanak’i Natàna no lehiben’ny mpikarakara ny hanin-kohanina; i Zaboda zanak’i Natàna mpisorona no mpanolo-tsaina, manolotra ny mpanjaka;

6 i Ahisara no lehiben’ny tao an-dapa; ary i Adônirama zanak’i Abdà no mpiadidy ny momba ny fanompoana.

Ireo mpikarakara hanin’i Salômôna

7 Nanana mpikarakara hanina 12 lahy tamin’i Israely rehetra i Salômôna. Ireo no namonona izay nilain’ny mpanjaka sy ny ankohonany, amin’ny fivelomany, samy tsy maintsy namonona izany ho an’ny volana iray avy isan-taona.

8 Izao no anaran’izy ireo: Ben-Hora, tamin’ny tendrombohitr’i Efraima;

9 Ben-Dekara, tao Maksesa, tao Salebima, tao Betsamesa, tao Elôna any Betanàna;

10 Ben-Heseda, tao Harobôta, azy avokoa i Sokao sy ny tany Efara rehetra;

11 Ben-Abinadaba, ny havoan’i Dora rehetra no azy, ary Tafeta zanakavavin’i Salômôna no vadiny;

12 Banà, zanak’i Ahiloda; azy avokoa i Tanàka sy i Magedao ary i Betsàna rehetra, akaikin’i Sartàna, eo ambanin’i Jezraela, hatrany Betsàna, ka hatrany Abelmehôla, hatrany ambadik’i Jekimaana;

13 Ben-Gabera tao Ramôtan’i Galaada; izao no azy: Ny tanàna madinik’i Jaira, zanak’i Manase, any Galaada; ny tany Argoba, any Basàna, misy tanàna lehibe 60, mimanda sy misy hidy varahina;

14 Ahinadaba zanak’i Adaô tao Manaima;

15 Akimaasa tao Neftalì. Izy koa naka ho vady ny zanaka vavin’i Salômôna anankiray dia i Basemata;

16 Baanà, zanak’i Hosì, tao Asera sy i Alota;

17 Jôsafata zanak’i Faroe, tao Isakara;

18 Semeià zanak’i Elà, tany Benjamina;

19 Gabara zanak’i Orì, tamin’ny tany Galaada, amin’ny tany Sehôna, mpanjakan’ny Amôreana, sy Oga mpanjakan’i Basàna, fa iray ihany no mpikarakara tamin’izany tany izany.

20 Maro toy ny fasika eny amoron-dranomasina i Jodà sy i Israely; ary nihinana sy nisotro sy nirobiroby.

1 Nanjaka tamin’ny fanjakana rehetra, hatramin’ny ony ka hatramin’ny tanin’i Filistinina sy ny sisin-tanin’i Ejipta i Salômôna, ary nitondra fanatitra sy nanoa an’i Salômôna nandritra ny andro niainany izy ireo.

2 Izao no hanina lanin’i Salômôna isan’andro: lafarina tsara indrindra telopolo kora, lafarina antonintoniny enimpolo kora,

3 omby mifahy folo, omby an-tondraka roapolo ary ondry zato,

4 fa izy no nanapaka ny tany rehetra an-dafin’ny ony, hatrany Tafsà ka hatrany Gazà, dia tamin’ny mpanjaka rehetra an-dafin’ny ony, ary nandry fahalemana izy tamin’izay rehetra nanoa azy hatraiza hatraiza.

5 Nandry feizay i Jodà sy i Israely tamin’ny andro rehetra niainan’i Salômôna. Samy teo ambanin’ny voalobony sy ny aviaviny avy, hatrany Dàna ka hatrany Bersabea.

6 40.000no efitranon’ny soavaly mpitarika kalesin’i Salômôna, ary 12.000 no soavaly fitaingina.

7 Novonoin’ireo mpikarakara hanina samy amin’ny volana anjarany avy izay hanina nilain’i Salômôna mpanjaka sy ireo rehetra voaray hiray latabatra amin’i Salômôna mpanjaka, ka tsy navelany hisy tsy ampy na inona na inona.

8 Ny soavaly mpitarika kalesy sy fitaingina koa, dia nitondrany orja amana mololo tany amin’izay toerana nisy azy, samy araka izay nandidiana azy avy.

Ny lazan’i Salômôna

9 Nomen’Andriamanitra fahendrena amam-pahiratan-tsaina lehibe, ary saina mahataka-javatra be toy ny fasika amoron-dranomasina i Salômôna,

10 ka nihoatra noho ny fahendren’ny zanaky ny Tatsinanana rehetra sy ny fahendren’i Ejipta rehetra, ny fahendren’i Salômôna.

11 Hendry noho ny olon-drehetra izy; nihoarany i Etàna, i Ezrahita, i Hemàna, i Kakôla, i Dordà ireo zanak’i Mahôla, ary niely tamin’ny firenena rehetra manodidina ny lazany.

12 Nanao ohabolana 3.000 izy, nahavita tononkira 1005.

13 Nanao lahateny momba ny zava-maniry izy, hatramin’ny hazo sedera maniry any Libàna ka hatramin’ny hisopa mitsimoka eny amin’ny ampiantàny. Nandaha-teny momba ny biby efa-tongotra sy momba ny voromanidina koa izy, mbamin’ny biby mandady aman-kazandrano.

14 Avy amin’ny firenena rehetra, dia nisy olona tonga hihaino ny fahendren’i Salômôna, ary avy amin’ny mpanjakan’ny tany rehetra izay nandre ny lazan’ny fahendreny.

Fiomanana hanorenana ny tempoly

15 Ary i Hirama, mpanjakan’i Tira, naniraka ny mpanompony ho any amin’i Salômôna, fa reny hoe voahosotra ho mpanjaka handimby an-drainy izy, ary sakaizan’i Davida hatrany hatrany i Hirama.

16 Ary i Salômôna naniraka olona hilaza amin’i Hirama hoe:

17 «Fantatro fa i Davida raiko, dia tsy afa-nanao trano ho an’ny Anaran’i Iaveh Andriamaniny, noho ireo ady avy amin’ny fahavalony nanodidina azy, mandra-panaon’i Iaveh an’ireny ho eo ambany faladiany.

18 Fa izaho kosa ankehitriny, dia nomen’i Iaveh Andriamanitro fitsaharana amin’ny manodidina rehetra; fa tsy misy fahavalo na zava-manahirana intsony.

19 Ka indro aho mikasa hanao trano ho an’ny anaran’i Iaveh Andriamanitro, araka ny voalazan’i Iaveh tamin’i Davida, raiko, hoe: Ny zanakao izay hapetrako eo amin’ny seza fiandriananao, handimby anao, no hanao ny trano ho an’ny Anarako.

20 Koa ankehitriny asaovy misy mikapa hazo sedera ho ahy, any Libàna. Hiaraka amin’ny mpanomponao ny mpanompoko, ary homeko anao ho karaman’ny mpanomponao izay rehetra holazainao, satria fantatrao fa tsy mba misy olona mahay mikapa hazo, toy ny Sidonianina, atỳ aminay.»

21 Faly indrindra i Hirama nony nandre ny tenin’i Salômôna ka nanao hoe: «Hankalazaina anie i Iaveh ankehitriny fa nomeny zanaka hendry i Davida, hanapaka izany vahoaka be izany.»

22 Ary nanirahan’i Hirama olona i Salômôna hilaza hoe: «Efa reko ny zavatra nampilazainao ahy, ka hotanterahiko ny fanirianao momba ny hazo sedera sy ny hazo sipresa.

23 Hampidinin’ny mpanompoko ho any amin’ny ranomasina izany avy any Libàna, dia hampitaiko ny ranomasina izany, ho any amin’izay toerana hotondroinao, any vao asaiko hovahany izy, hampanalainao. Ary ianao kosa hanatanteraka ny faniriako amin’ny famononan-kanina ho an’ny ankohonako.»

24 Dia nomen’i Hirama an’i Salômôna ny hazo sedera sy ny hazo sipresa, araka izay nilainy,

25 ary ny nomen’i Salômôna an’i Hirama kosa, dia varimbazaha 20.000 kora, sy diloilo avy amin’ny ôliva voatoto 20 kora, ka isan-taona i Salômôna manome toy izany an’i Hirama ihany.

26 Nomen’i Iaveh fahendrena i Salômôna araka ny nampanantenainy azy, ary nihavana i Hirama sy i Salômôna, ka nanao fanekena izy ireo.

27 Naka olona tamin’i Israely rehetra i Salômôna ho mpanao fanompoana ary 30.000 no isan’ny olona mpanao fanompoana.

28 Ireo no nirahiny hankany Libàna nifandimby isam-bolana, natao 10.000 avy, ka iray volana izy no tany Libàna, roa volana kosa tany an-tranony, ary i Adônirama no nifehy ny olona mpanao fanompoana.

29 I Salômôna koa nanana mpitondra entana 70.000, sy tambato teny an-tendrombohitra 80.000,

30 afa-tsy ny lehibe notendren’i Salômôna hitandrina ny asa atao, izay nisy 3.300; izy ireo nifehy ny vahoaka izay niasa tamin’ny asa atao.

31 Vato lehibe, vato voafantina no nasain’ny mpanjaka nalaina mba hanorenana ny fototry ny trano amin’ny vato voapaika.

32 Ny mpandrafi-baton’i Salômôna sy ny mpandrafi-baton’i Hirama, ary ny Giblianina, no nipaika sy namboatra ny hazo sy ny vato hanaovana ny trano.

Ny nanorenana ny tempoly

1 Tamin’ny taona faha-480, taorian’ny nivoahan’ny zanak’i Israely tany amin’ny tany Ejipta, tamin’ny taona fahefatra nanjakan’i Salômôna tamin’i Israely, tamin’ny volana ziva, izay volana faharoa, no nanorina ny tranon’i Iaveh izy.

2 Ary ny trano nataon’i Salômôna ho an’i Iaveh dia enimpolo hakiho ny lavany, roapolo hakiho ny sakany, telopolo hakiho ny haavony.

3 Ny trano heva eo anoloan’ny tempoly amin’ny tranodia roapolo hakiho ny lavany, manaraka ny sakantrano, ary folo hakiho ny sakanymanoloana ny trano.

4 Makarakara tsy miova no nataon’ny mpanjaka varavaran-kelin’ny trano.

5 Manolotra ny rindrin-trano, dia nasiana rihana manodidina ny rindrin-trano, manodidina ny Fitoerana Masina, sy ny Fitoerana Masina indrindra, nasiany efitrefitra ny lafin-trano manodidina.

6 Ny rihana ambany dia dimy hakiho ny sakany, ny antenatenany enina hakiho ny sakany, ary ny fahatelo fito hakiho ny sakany, fa namelàna hatrany ny rindrin-trano amin’ny manodidina eo ivelany, mba tsy hitsatohan’ny sakamandimby amin’ny rindrin-trano.

7 Raha natao ny trano, dia vato voavoatra hatrany amin’ny tany fihadiam-bato no nanaovana azy, ka tsy nisy feon-tantanana na famaky na fandraka na fiasana vy, na inona na inona, re tao an-trano tamin’ny nandrafetana azy.

8 Tao amin’ny ilany ankavanan’ny trano no fidirana mankao amin’ny rihana eo antenatenany, ary tohatra miholikolika no iakarana ho ao amin’ny rihana antenatenany, ary avy eo amin’ny antenatenany kosa indray ho any amin’ny fahatelo.

9 Nanao ny trano izy dia nahavita azy, ary rairainy sy hazo fisaka sedera no natafony ny trano.

10 Ary nataony ny rihana manolotra ny trano manontolo izay nisy dimy hakiho ny haavony, ary hazo sedera no nanakambanany azy tamin’ny trano.

11 Dia niteny tamin’i Salômôna i Iaveh ka nanao hoe:

12 «Ity trano ataonao ity… raha mandeha araka ny lalàko ianao sy manaraka ny fitsipiko ary mitandrina ny didiko rehetra ka mampifanaraka ny fitondran-tenanao amin’izany, dia ho tanteraka aminao ny teniko izay nolazaiko tamin’i Davida rainao;

13 honina eo amin’ny zanak’i Israely Aho, ary tsy hahafoy an’i Israely vahoakako.»

14 Nanorina ny trano i Salômôna dia nahavita azy.

Fanamboarana ny atiny. Ny Toerana Masina indrindra

15 Nopetahany hazo fisaka sedera ny ati-rindrin-trano, hatramin’ny tokotanin-trano ka hatramin’ny valin-drihana, vitany peta-drindrina avokoa ny ao anatiny, ary ny tokotanin-trano norakofany tamin’ny hazo fisaka sipresa.

16 Nopetahany hazo fisaka sedera ny roapolo hakiho hatreo amin’ny fara rindrina hatrany amin’ny tany ka hatrany amin’ny loha rindrina, ary ny trano dia nanavahany izay ho Fitoerana Masina, Fitoerana Masina indrindra.

17 Ny trano, izany hoe, ny tempoly teo anoloana, dia nisy efapolo hakiho.

18 Ny hazo sedera tamin’ny ati-trano, dia voasikotra vita sarim-boantango sy voninkazo mivelatra. Sedera avokoa izy manontolo fa ny vato tsy nisy hita akory.

19 Ny hametrahana ny Fiaran’ny Faneken’i Iaveh no nanamboarany ny Fitoerana Masina, tao anatin’ny trano, tarỳ anatiny indrindra.

20 Ny atin’ny Fitoerana Masina, dia roapolo hakiho ny lavany, roapolo hakiho ny sakany, roapolo hakiho ny haavony.

21 Nopetahan’i Salômôna volamena madio izy, ary nopetahany sedera koa ny ôtely. Nopetahan’i Salômôna volamena madio avokoa ny ati-trano, ary nasiany rojo volamena nisakana, teo anoloan’ny Fitoerana Masina, izay norakofany volamena koa.

22 Ka toy izany no nametahany volamena avokoa ny trano manontolo, dia ny trano manontolo, ary ny ôtely teo anoloan’ny Fitoerana Masina nopetahany volamena.

Ireo Kerobima

23 Kerobima roa vita tamin’ny hazo ôliva maniry ho azy, no nataony tao anatin’ny Fitoerana masina, folo hakiho avy no haavony.

24 Dimy hakiho avy ny elatra iray amin’ny kerobima, ary dimy hakiho ny elatra iray amin’ny kerobima, ka folo hakiho izany, hatramin’ny tendron’ny elany iray ka hatramin’ny tendron’ny elany iray ankilany.

25 Ny kerobima iray koa folo hakiho, fa mitovy habe sy mitovy tarehy ny kerobima roa;

26 folo hakiho ny haavon’ny kerobima iray, ary toy izany koa ny kerobima iray.

27 Mivelatra elatra no nametrahan’i Salômôna ireo kerobima ireo, tao afovoan’ny trano anatiny, ka ny elatry ny anankiray nipaka tamin’ny rindrina iray, ary ny elatry ny kerobima iray nipaka tamin’ny rindrina hafa, ny ila elany sisa kosa nifanendry sahabo ho eo afovoan’ny trano,

28 ary nopetahany volamena ny kerobima.

29 Ny rindrin-trano rehetra manodidina na ny atiny na ny ivelany nasainy nosokirina nasiana sarin-kerobima mivohitra sy foto-drofia amam-boninkazo mivelatra avokoa.

30 Ny ngorodon-trano nopetahany volamena na ao anatiny na eo ivelany.

Ireo varavarana sy ny tokotany

31 Ny varavaran’ny Fitoerana Masina nasiany lela varavarana vita tamin’ny hazo ôliva maniry ho azy, ary feno ny tolàna sy ny momba azy ny ampahadimin’ny rindrina nisy azy;

32 ka ny lela varavarana kopa-droa natao tamin’ny hazo ôliva maniry ho azy, nasainy nisokirana sarin-kerobima sy rofia amam-boninkazo mivelatra, ary nopetahany volamena, nataony mahazo ny kerobima sy ny rofia ny volamena.

33 Toy izany koa ny varavaran’ny tempoly dia hazo ôliva maniry ho azy no nanaovany ny tolàna, izay nahafeno ny ampahefatry ny rindrina nisy azy,

34 ary hazo sipresa no nanaovany ny kopa-droa; ny kopaka iray dia nisy lelany roa mahazo mivalona, ny kopaka iray dia nisy lelany roa mahazo mikopaka.

35 Samy nosokirina nasiana sarin-kerobima sy rofia amam-boninkazo mivelatra avy ireo, ary nopetahany volamena mifanarakaraka amin’ny sorany.

36 Vato voapaika telo andalana, sy sakamandimby sedera iray andalana no nataony kianja anatiny.

Datin’andro

37 Tamin’ny taona fahefatra, volana ziva, no nandatsahana ny tototry ny tranon’i Iaveh,

38 ary tamin’ny taona faha-11, volana bola, izay volana fahavalo, vao vita izy amin’ny zavatra rehetra iforonany, araka ny mahamety azy. Tao anatin’ny fito taona no nanaovan’i Salômôna azy.

Ny lapan’i Salômôna

1 13 taona no nanaovan’i Salômôna ny tranony, dia vitany izy manontolo.

2 Nanao ilay trano Alan’i Libànaizy, ka zato hakiho ny lavany, dimampolo hakiho ny sakany, telopolo hakiho ny haavony; andry sedera efatra andalana no nanohana azy, ary rairainy sedera no tambonin’ny andry.

3 Hazo sedera no natafony ny trano tambonin’ny efitrano izay ao ambonin’ny andry, 45 ny efitrano fa 15 isan’andalana izy.

4 Telo andalana ny efitrano; intelo mifanandrify koa ny varavarankely.

5 Hazo fisaka efa-joro avokoa no nanaovana ny varavarana rehetra sy ny tolàna rehetra ary nifanandrify intelo ny varavarankely.

6 Nanao ny trano heva misy andriny izy; 50 hakiho ny sakany, ary telo anoloan’io koa nasiany trano heva, nisy andriny sy ambaratonga teo anoloan’ireo.

7 Nanao ny trano hevan’ny seza fiandrianana koa izy, izay nanaovany fitsarana, dia nopetahany hazo sedera hatramin’ny tokotany ka hatramin’ny valin-drihana.

8 Ny trano nitoerany dia nataony torak’izany koa, tao amin’ny kianja anankiray manarakaraka ny trano heva, ary nanao trano mitovy amin’io trano heva io koa izy, ho an’ny zanaka vavin’i Faraôna izay nampakarin’i Salômôna ho vady.

9 Ny nandrafetana izany rehetra izany, dia vato be vidy avokoa, voapaika ara-marika, voatsofa tamin’ny tsofa, na atiny na ivelany, hatraty am-potony ka hatrany amin’ny koronosy, ary teo ivelany koa hatrany amin’ny tokotany lehibe.

10 Ny fototra koa natao tamin’ny vato be vidy, vato lehibe, vato folo hakiho sy valo hakiho.

11 Teo ambony dia nisy vato be vidy koa voapaika ara-marika, ary hazo sedera.

12 Amin’ny manodidina ny tokotany lehibe, dia nisy vato voapaika telo andalana sy sakamandimby sedera iray andalana tahaka ny kianja eo anatin’ny tranon’i Iaveh, sy tahaka ny trano hevan’ny trano.

I Hirama mpanao asa varahina

13 Naniraka haka an’i Hirama avy any Tira i Salômôna.

14 Zanaky ny vehivavy mpitondra tena anankiray amin’ny fokon’i Neftalì izy io, fa ny rainy no Tirianina, mpanefy varahina. Feno fahendrena amam-pahiratan-tsaina sy fahakingana izy, mba hanao ny asa isan-karazany rehetra momba ny varahina. Dia tonga tao amin’i Salômôna mpanjaka izy, ka nahavita ny asany rehetra.

Ireo andry varahina

15 Nanao ny andry varahina roa izy, 18 hakiho ny haavon’ny andry iray, ary kofehy 12 hakiho no maharefy ny haben’ny andry iray hafa manodidina azy.

16 Nanao koronosy varahina anidina roa izy teo an-tampon’ireo andry; dimy hakiho ny haavon’ny koronosy iray, ary dimy hakiho ny haavon’ny koronosy hafa.

17 Nasiany makarakara mitarehin-karato sy tanjomiolaka mitarehin-drojo teo amin’ny koronosy izay teo ambonin’ny tampon’ny andry, ka nasiany fito ny koronosy, ary fito ny koronosy hafa;

18 nasiany voan’ampongabendanitra roa andalana manodidina ny iray amin’ny harato makarakara, hanarona ny koronosy teo an-tampon’ny andry anankiray, dia nataony toy izany koa ny koronosy anankiray.

19 Nataony mitarehim-boninkazo lisy, efatra hakiho ny haavony, ny koronosy ao an-tampon’ny andry teo amin’ny trano heva.

20 Ny koronosy nataingina eo ambonin’ny andry roa dia voahodina voan’ampongabendanitra roan-jato, eny ambony, anilan’ny mivohitra an-koatra ny harato; voahodidina voan’ampongabendanitra roan-jato mitandahatra koa ny koronosy anankiray.

21 Natsangany ny andry tamin’ny trano hevan’ny tempoly, ka natsangany ny andry teo ankavanana, ka nataony hoe Jakîna; dia natsangany ny andry teo ankavia, ka nataony hoe Bôaza.

22 Teo an-tampon’ny andry dia nisy voan-javatra mitarehim-boninkazo lisy. Toy izany no nahavitan’ny asa momba ireo andry ireo.

Ny ranomasina varahina

23 Ary nanao ny ranomasina anidina izy, folo hakiho ny habeny, hatramin’ny molony iray ka hatramin’ny molony iray, boribory ny tenany manontolo, dimy hakiho ny haavony, kofehy 30 hakiho no naharefy manodidina azy.

24 Nisy voatango nanodidina azy tambanin’ny molony, folo no tamin’ny iray hakiho, ary roa andalana izy no nanodidina ny ranomasina manontolo; indray natao anidina taminy ny voatango, ka iray tena taminy.

25 Omby 12 no nanaingenana azy; telo nanatrika ny avaratra, telo nanatrika ny andrefana, telo nanatrika ny atsimo, telo nanatrika ny atsinanana, teo ambonin’izy ireo ny ranomasina; ary ny tapany aoriana rehetra amin’ny vatany dia tao ampovoany.

26 Vody voampelatanana no hateviny, sahala amin’ny molo-kapoaka, manahaka ny vonin’ny lisy ny molony; rano roa arivo bata no laniny.

Ireo tongony varahina sy dobo varahina

27 Nanao ny tongotra varahinafolo izy, efatra hakiho avy ny halavany, efatra hakiho ny zakany, ary telo hakiho ny haavony.

28 Toy izao no nanaovana ireo tongotra ireo: Natao am-panoa izy, ary niditra teo anelanelan’ny batàna ny panoa.

29 Ka nisy liona sy ombalahy sy kerobima tambonin’ny panoa iray izay tafiditra anelanelan’ny batàna; nisy faladiany tambonin’ny batàna, ary nisy tanjomiolaka nihantona tambanin’ny liona sy ombalahy ary kerobima.

30 Isan-tongony iray nisy kodiarana varahina avy; ka samy nisy faladiany ny tongony, ary ireo faladiany anidina ireo no tambanin’ny fitoeran-drano sy any an-koatry ny tanjomiolaka.

31 Tamin’ny tampon’ny tongony sy ao anatiny, nisy ny loaka fandraisana ny fitoeran-drano, iray hakiho no halaliny; boribory izany loaka izany, mitarehina fototr’andry, ary iray hakiho sy sasany ny habeny; ary nisy zavatra voasikotra tamin’izany loaka izany; ny panoa dia efa-joro fa tsy boribory.

32 Tambanin’ny panoa ny kodiarana efatra ary niraikitra tamin’ny tongotra ny lahin-tangerin’ny kodiarana, iray hakiho sy sasany avy no haavon’ny kodiarana.

33 Natao toy ny kodiaran’ny kalesy ihany ny kodiarana, ary anidina avokoa ny lahin-tangerina, ny hazon-kodiarany, ny tanan-kodiarany, ary ny foibeny.

34 Nisy faladiany efatra tamin’ny zorony efatry ny tongotra, niray tena tamin’ny tongotra ireo faladia ireo.

35 Ny tampon-dohan’ny tongotra dia nisy fehim-barìka, ka antsasa-kakiho ny haavony, ary tao an-tampon’ny tongotra, dia iray tena ihany ny fitehenany sy ny panoany.

36 Ny tavan’ny fitehenany sy ny panoany, dia nisokirany kerobima sy liona ary rofia, araka ny halalahan’ny fitoerana voatokana ho azy avy, sady nasiana tanjomiolaka manodidina.

37 Toy izany no nanaovany ny tongotra folo, indray natao anidina, iray habe, iray tarehy avokoa izany rehetra izany.

38 Dia nanao fitoeran-drano varahina folo izy, samy nahalany efapolo vata avy, efatra hakiho ny haben’ny fitoeran-drano avy, samy nitombina tamin’ny tongotra anankiray tamin’ny iray amin’ny tongotra folo.

39 Ka toy izao no nandaharany ny tongotra folo: ny dimy nataony teo amin’ny ilan’ny trano ankavanana, ny dimy kosa nataony teo amin’ny ilan’ny trano ankavia; ary ny ranomasina nataony teo amin’ny ilan’ny trano ankavanana, amin’ny atsinanana somary atsimo.

Ireo fanaka madinika. Famintinan-tantara

40 Nanao ny vilany sy ny sotron’afo ary ny kapoaka i Hirama

Ary vitan’i Hirama ny asa rehetra nataony ho an’i Salômôna mpanjaka, tao amin’ny tranon’i Iaveh:

41 ny andry roa, ny koronosy aman-tsikalany boribory roa teny an-tampon’ny andry, ny harato roa manarona ny tsikalana boribory roa amin’ny koronosy eo an-tampon’ny andry,

42 ny voan’ampongabendanitra efajato, tamin’ny harato roa, ampongabendanitra roa andalana isan-karato, nanarona ny tsikalany boribory roa tamin’ny koronosy teny an-tampon’ny andry.

43 Ny tongotra folo sy ny fitoeran-drano folo tambonin’ireo tongotra,

44 ny ranomasina sy ny omby 12, teo ambanin’ny ranomasina,

45 ny tavy sy ny sotron’afo ary ny kapoaka. Varahina manganohano avokoa ireo fanaka nataon’i Hirama ho an’i Salômôna ireo, tao amin’ny tranon’i Iaveh.

46 Tao amin’ny tany lemak’i Jordany, amin’ny tany be tany manga anelanelan’i Sokôta sy i Sartàna no nasain’ny mpanjaka nanaovana anidina azy.

47 Navelan’i Salômôna tamin’izao, fa tsy nolanjaina ireo fanaka rehetra ireo, satria be loatra ka tsy notsapaina ho fantatra marina izay lanjan’ny varahina.

48 Nataon’i Salômôna koa ny fanaka hafa rehetra izay tao an-tranon’i Iaveh: ny ôtely volamena, ny latabatra volamena fametrahana ny mofo alahatra,

49 ny fanaovan-jiro volamena madio, dimy teo ankavanana, ary dimy teo ankavia, teo anoloan’ny orakla, mbamin’ny voniny; ny lela fanaovan-jiro sy ny hetin-jirony volamena,

50 ny tavin-drano, ny antsy, ny kapoaka, ny lovia kely, sy ny fanembohana volamena madio, mbamin’ny lahin-tsavily amin’ny varavaran’ny efitrano anatiny, izany hoe: ny Fitoerana Masina indrindra, sy amin’ny varavaran’ny trano, izany hoe ny Fitoerana Masina.

51 Toy izany no nahavitana ny voa-javatra rehetra nataon’i Salômôna mpanjaka, tamin’ny tranon’i Iaveh, dia nentin’i Salômôna izay rehetra nataon’i Davida rainy, ny volafotsy, ny volamena, sy ny fanaka rehetra, ka napetrany tao amin’ny rakitry ny tranon’i Iaveh.

Famindrana ny Fiaran’ny Fanekena

1 Tamin’izany novorin’i Salômôna tao aminy, tany Jerosalema, avokoa ny loholon’i Israely, sy ny lehibe rehetra isam-pokony, ary ny filoham-pianakavian’ny zanak’i Israely, mba hamindra ny Fiaran’ny Faneken’i Iaveh avy amin’ny tanànan’i Davida, izany hoe any Siôna.

2 Ka nivory tao amin’i Salômôna mpanjaka avokoa ny lehilahy rehetra amin’i Israely, tamin’ny fety, amin’ny volana Etanima, volana fahafito.

3 Nony tonga ny loholona rehetra amin’i Israely, dia nentin’ny mpisorona ny Fiara.

4 Nentiny ny Fiaran’i Iaveh mbamin’ny trano lay fihaonana sy ny fanaka voahasina rehetra izay tao amin’ny trano lay, ka ny mpisorona sy ny Levita no nitondra ireo.

5 Ary i Salômôna mpanjaka sy ny fiangonan’i Israely rehetra izay nantsoiny ho eo aminy, dia niaraka taminy teo anoloan’ny Fiara. Ondry sy omby tsy hita isa sy tsy tambo isaina noho ny hamaroany no novonoiny ho sorona.

6 Dia nentin’ny mpisorona teo amin’ny toerany ny Fiaran’ny faneken’i Iaveh, dia tao amin’ny Toerana Masin’ny trano, ao amin’ny Fitoerana Masina indrindra, teo ambonin’ny elatry ny kerobima.

7 Fa namelatra ny elany tambonin’ny fitoeran’ny Fiara ny kerobima ka nanaloka ny Fiara sy ny baony teo amboniny.

8 Lava be moa ny bao, ka dia hita izy raha eo amin’ny Fitoerana Masina; fa ny any ivelany no tsy mahita azy. Dia tao izy mandraka androany.

9 Tao anatin’ny Fiara tsy nisy afa-tsy ny takela-bato roa, napetrak’i Môizy tao, tany an-tendrombohitra Horeba, fony i Iaveh nanao fanekena tamin’ny zanak’i Israely, tamin’ny nivoahany avy tany amin’ny tany Ejipta.

Noraisin’Andriamanitra ny Tempoliny

10 Nony nivoaka avy tao amin’ny Fitoerana Masina ny mpisorona dia nameno ny tranon’i Iaveh ny rahona,

11 ka tsy nahajanona hanao ny fanompoany tao ny mpisorona, noho ny amin’ny rahona, fa nameno ny tranon’i Iaveh ny voninahitr’i Iaveh.

12 Tamin’izay dia hoy i Salômôna: «Sitrak’i Iaveh ny honina ao anatin’ny haizina.

13 Nanao trano aho ho fonenanao, fitoerana hipetrahanao mandrakizay.»

Kabarin’i Salômôna tamin’ny vahoaka

14 Dia natodiky ny mpanjaka ny tavany ary notsofiny rano ny fiangonan’i Israely rehetra, ary tafatsangana avokoa ny fiangonan’i Israely rehetra.

15 Ary hoy izy: «Hankalazaina anie i Iaveh Andriamanitr’i Israely, fa ny vavany efa niteny tamin’i Davida raiko, ary ny tanany efa nanatanteraka izay nolazainy hoe:

16 Hatramin’ny andro nitondrako an’i Israely vahoakako nivoaka avy tany Ejipta dia tsy nifidy tanàna teo amin’ny fokon’i Israely rehetra aho, hanaovan-trano hitoeran’ny Anarako, fa efa nifidy an’i Davida hanjaka amin’i Israely vahoakako aho.

17 Ary efa nanan-kevitra hanao trano ho an’ny Anaran’i Iaveh Andriamanitr’i Israely ihany i Davida raiko,

18 kanefa hoy i Iaveh tamin’i Davida raiko: Rehefa nanan-kevitra hanao trano ho an’ny Anarako ianao, dia tsara ny nanaovanao izany hevitra izany.

19 Saingy tsy ianao no hanao ny trano, fa ny zanakao lahy, izay naloaky ny kibonao, no hanao ny trano ho an’ny Anarako.

20 Ary notanterahin’i Iaveh ny teny efa nolazainy, fa nisandratra handimby an’i Davida raiko aho, ary nipetraka eo amin’ny seza fiandrianan’i Israely, araka ny efa voalazan’i Iaveh ary nanao ny trano ho an’ny Anaran’i Iaveh Andriamanitr’i Israely.

21 Nasiako fitoerana teo, ho an’ny Fiara misy ny faneken’i Iaveh izay nataony tamin’ny razantsika, fony Izy nitondra azy nivoaka avy tany amin’ny tany Ejipta.»

Vavaka lehibe nataon’i Salômôna

22 Dia tao anoloan’ny ôtelin’i Iaveh i Salômôna, nanatrika ny fiangonan’i Israely rehetra sy nanandratra ny tanany mankany an-danitra ka nanao hoe:

23 Ry Iaveh Andriamanitr’i Israely ô, tsy misy Andriamanitra tahaka Anao, na amin’ny lanitra ambony na amin’ny tany ambany, fa Ianao mitandrina ny fanekenao amam-pamindram-ponao, amin’ny mpanomponao, izay mandeha eo anatrehanao amin’ny fony tokoa,

24 araka ny efa nanatanterahanao ny voalazanao tamin’i Davida raiko mpanomponao; fa notanterahin’ny tananao izay voalazan’ny vavanao, araka izao hita anio izao.

25 Koa ankehitriny, ry Iaveh Andriamanitr’i Israely ô, noho ny fankasitrahanao an’i Davida raiko mpanomponao, dia tanteraho izay voalazanao taminy hoe: Tsy ho lany taranaka hipetraka eo amin’ny seza fiandrianan’i Israely eo anatrehako, ianao, raha mitandrina ny lalany ny zanakao, ka mandeha eo anatrehako, toy ny nandehananao teo anatrehako.

26 Koa ankehitriny, ry Andriamanitr’i Israely, dia aoka ho tanteraka anie ny teny nataonao tamin’i Davida raiko mpanomponao.

27 Fa moa dia marina va fa monina eto an-tany Andriamanitra? Indro, ny lanitra sy ny lanitry ny lanitraaza, tsy omby Anao, koa mainka fa ity trano nataoko ity!

28 Kanefa, ry Iaveh Andriamanitra ô, tsimbino ny vavaka amam-pifonan’ny mpanomponao, henoy ny fiantsoam-pifaliana sy ny fangatahana ataon’ny mpanomponao eo anatrehanao anio;

29 ka ataovy mihiratra andro aman’alina amin’ity trano ity anie ny masonao, dia amin’ny fitoerana izay nilazanao hoe: Ho ao ny Anarako; ka henoy ny vavaka ataon’ny mpanomponao amin’ity fitoerana ity.

Ireo vavaka ho an’ny vahoaka

30 Henoy ny fifonan’ny mpanomponao sy i Israely vahoakanao, raha mivavaka amin’ity fitoerana ity izy; mihainoa any amin’ny fitoeram-ponenanao any an-danitra, mihainoa, ka mamelà heloka.

31 Raha misy olona manota amin’ny namany, ka asaina manao fianianana izy, ary tonga hianiana eto anoloan’ny ôtelinao amin’ity trano ity,

32 dia mihainoa azy any an-danitra, ary manefà, dia mitsarà ny mpanomponao, manameloka izay meloka, mampitsingerina amin’ny lohany ny nataony, manambara ny tsy manan-tsiny ho marina sy mamaly azy araka ny tsy fananany tsiny.

33 Nony resin’ny fahavalony i Israely vahoakanao noho izy nanota taminao, raha miverina aminao sy manome voninahitra ny Anaranao izy, ka manao fivavahana sy fifonana aminao eto amin’ity trano ity,

34 dia mihainoa azy Ianao any an-danitra, ka avelao ny fahotan’i Israely vahoakanao ary ampodio amin’ny tany nomenao ny razany izy.

35 Nony mihantona ny andro ka tsy milatsaka ny orana, noho ny nataon’izy ireo taminao, raha mivavaka aminao eto amin’ity fitoerana ity izy, sy manome voninahitra ny Anaranao, sady miala amin’ny fahotany, fa nampahorinao,

36 dia mihainoa azy Ianao any an-danitra ka avelao ny fahotan’ny mpanomponao sy i Israely vahoakanao sady manoroa azy ny lalana tsara tsy maintsy alehany, ary alatsaho ny ranonorana amin’ny tany nomenao ny vahoakanao ho lovany.

37 Raha misy mosary amin’ny tany, na misy pesta, na misy aretim-bary, na niela, na valala, na kasily, na avy izay hanaovan’ny fahavalo fahirano azy amin’ny taniny, amin’ny vavahadiny, na hisian’ny loza aman’aretina, na inona na inona izy,

38 raha manao fivavahana sy fifonana ny olona na iza na iza sy i Israely rehetra vahoakanao, sady samy miaiky ny ferin’ny fony ka mamela-tanana manandrify ity trano ity,

39 mihainoa any an-danitra any amin’ny fitoeran’ny fonenanao, ka mamelà heloka azy, tanteraho ka valio araka ny lalany rehetra avy izy, fa Ianao mahalala ny fony, Ianao irery no mahalala ny fon’ny zanak’olombelona rehetra,

40 mba hatahorana Anao amin’ny andro rehetra hiainany etỳ ambonin’ny tany nomenao ny razany.

Fanampiny

41 Ny amin’ny vahiny, izay tsy isan’i Israely vahoakanao fa avy any an-tany lavitra, noho ny amin’ny Anaranao,

42 fa ho ren’ny olona ny Anaranao be voninahitra sy ny tananao mahery ary ny sandrinao mihenjana, ka ho avy hivavaka eto amin’ity trano ity izy,

43 dia mihainoa any an-danitra any amin’ny fitoeran’ny fonenanao, ka araka izay rehetra hangatahin’ny vahiny aminao no aoka hataonao aminy, mba ho fantatry ny olona rehetra amin’ny tany ny Anaranao, ka hatahorany Anao, tahaka an’i Israely vahoakanao, ary hahalalany fa antsoina amin’ity trano nataoko ity ny Anaranao.

44 Nony hivoaka hiady amin’ny fahavalony ny vahoakanao, manaraka ny lalana hasainao alehany, ka mivavaka amin’i Iaveh izy mitodika ny tanànavoafidinao sy ity trano nataoko ho an’ny Anaranao ity,

45 dia henoy any an-danitra ny vavaka amam-pifonany, ka omeo ny rariny izy.

46 Raha avy izay hanotany aminao, fa tsy misy olombelona tsy manota, ka tezitra aminy Ianao, ary manolotra azy amin’ny fahavalony, aty ny mpandresy hitondra azy ho babo, any amin’ny tanim-pahavalo, na ho lavitra na ho akaiky,

47 raha mieritreritra ao am-pony izy nony mby any amin’ny tanin’ny mpandresy azy, ka mibebaka izy sy manolotra fifonana aminao, any amin’ny tanin’ireo nambabo azy, manao hoe: Efa nanota izahay, efa nanao ratsy izahay, efa nahavita heloka izahay!

48 sady miverina aminao amin’ny fony rehetra sy ny fanahiny rehetra izy, any an-tanin’ny fahavalony izay nitondra azy ho babo, ka manao fivavahana aminao mitodika atỳ amin’ny taniny izay nomenao ny razany, sy atỳ amin’ny tanàna voafidinao, ary atỳ amin’ny trano nataoko ho an’ny Anaranao,

49 dia henoy any an-danitra, any amin’ny fitoeran’ny fonenanao ny vavaka amam-pifonany, ka omeo rariny izy;

50 avelao ny fahotan’ny vahoakanao sy ny fahadisoany rehetra izay nataony taminao, ataovy mangoraka azy, ireo namabo azy, ka hamindra fo aminy;

51 fa vahoakanao sy lovanao izy ireo izay nentinao nivoaka avy tany Ejipta tany amin’ny memy vy.

Famaranana ny vavaka sy tso-drano ho an’ny vahoaka

52 Mba ahirato ny masonao amin’ny fifonan’ny mpanomponao, sy ny fifonan’i Israely vahoakanao, mba hihainoanao azy amin’izay rehetra hangatahiny aminao.

53 Fa navahanao tamin’ny vahoaka rehetra eto an-tany izy mba ho anao, mba ho lovanao, araka ny voalazanao tamin’i Môizy mpanomponao, fony Ianao nitondra ny razanay nivoaka avy tany Ejipta, ry Iaveh Tompo ô!

54 Rehefa tapitra nataon’i Salômôna tamin’i Iaveh izany vavaka amam-pifonana rehetra izany, dia nitsangana izy avy teo anoloan’ny ôtelin’i Iaveh izay nandohalihany sy namelarany tanana nanondro ny lanitra.

55 Nony nitsangana izy dia nitso-drano ny fiangonan’i Israely rehetra nanao hoe:

56 Hankalazaina anie i Iaveh, izay nanome fitsaharana an’i Israely vahoakany araka izay rehetra voalazany. Fa amin’ny teny soa rehetra nampandrenesiny tamin’ny alalan’i Môizy mpanompony dia tsy misy teny tsy tanterakana iray aza.

57 Homba antsika anie i Iaveh Andriamanitsika, toy ny efa nombany ny razantsika. Tsy handao antsika anie Izy, na hahafoy antsika,

58 fa aoka hanongilana ny fontsika ho any aminy, mba hizorantsika amin’ny lalany sy hitandremantsika ny didiny aman-dalàny, ary ny fitsipiny izay nandidiany ny razantsika.

59 Izao teny fifonana nataoko teo anatrehan’i Iaveh izao, dia aoka ho mby akaikin’i Iaveh Andriamanitsika andro aman’alina, mba homeny rariny, araka izay ilaina isan’andro, izaho mpanompony sy i Israely vahoakany,

60 mba ho fantatry ny firenena rehetra eto an-tany, fa Andriamanitra i Iaveh ary tsy misy afa-tsy Izy irery.

61 Ho an’i Iaveh Andriamanitsika anie ny fonareo manontolo, mba hanarahanareo ny lalàny, sy hitandremanareo ny didiny, tahaka izao anio izao.

Ireo sorona sy ny fankalazana ny fitokanana

62 Ary nanatitra soronateo anatrehan’i Iaveh ny mpanjaka sy i Israely rehetra niaraka taminy.

63 Namono omby 22.000 ary ondry 120.000 i Salômôna hatao sorom-pihavanana nateriny tamin’i Iaveh. Toy izany no nitokanan’ny mpanjaka sy ny zanak’i Israely rehetra ny tranon’i Iaveh.

64 Nohamasinin’ny mpanjaka androtr’izay ihany ny afovoan’ny kianja eo anoloan’ny tranon’i Iaveh, fa teo no nanolorany ny sorona dorana, sy ny fanatitra ary ny saboran’ny sorom-pihavanana; satria kely loatra ny ôtely varahina eo anoloan’i Iaveh, ka tsy omby ny sorona dorana sy ny fanatitra ary ny saboran’ny sorom-pihavanana.

65 Tamin’izany andro izany, i Salômôna sy i Israely rehetra niaraka taminy, dia olona zavon-tany avy hatrany amin’ny vava lalan’i Emata, ka hatrany amin’ny ranon-driakan’i Ejipta, dia nankalaza ny fety teo anatrehan’i Iaveh Andriamanitsika nandritra ny fito andro, ary fito andro koa indray, dia 14 andro.

66 Nony tamin’ny andro fahavalo, dia nalefany nody ny vahoaka. Dia nisaotra andriana, sy nandeha nankany amin’ny fonenany avy, sady faly izy ireo no ravo ny fony noho ny soa rehetra nataon’i Iaveh tamin’i Davida mpanompony, sy tamin’i Israely vahoakany.

Fisehoan’Andriamanitra indray

1 Nony vitan’i Salômônany fanaovana ny tranon’i Iaveh sy ny tranon’ny mpanjaka mbamin’izay rehetra sitrak’i Salômôna sy izay niriny,

2 dia niseho fanindroany taminy indray i Iaveh, toy ny nisehoany taminy tany Gabaôna.

3 Ary izao no nolazain’i Iaveh taminy: «Nohenoiko ny vavaka amam-pifonanao, nataonao tamiko, ka efa nohamasiniko ity trano nataonao ity, mba hametrahako ny Anarako ao mandrakizay, ka dia ho eto mandrakariva ny masoko sy ny foko.

4 Ary ianao, raha mandeha eo anatrehako tahaka ny nandehanan’i Davida rainao, amin’ny fahatsoran’ny fonao sy amim-pahitsiam-po manaraka izay nandidiako anao, raha mitandrina ny didy amam-pitsipiko ianao,

5 dia hataoko mafy orina mandrakizay ny seza fiandrianan’ny fanjakanao amin’i Israely, araka ny efa nolazaiko tamin’i Davida rainao hoe: Tsy ho lany taranaka eo amin’ny seza fiandrianan’i Israely ianao.

6 Fa raha mivily miala amiko kosa ianao na ny tenanareo na ny zanakareo, ka tsy mitandrina ny didy aman-dalàko izay nataoko teo anoloanareo, ka mandeha manompo andriamani-kafa sy miankohoka eo anatrehany,

7 dia hofongorako eo amin’ny tany nomeko azy i Israely, hariako tsy ho eo imasoko intsony ny trano nohamasiniko ho an’ny Anarako, hanjary fandatsa sy ambentintenin’ny firenena rehetra i Israely;

8 ho avo toerana ihany ity trano ity, nefa hitalanjonana sy hisitrisîran’ny mpandalo rehetra. Dia hiteny ny olona hanao hoe: Fa naninona no dia nataon’i Iaveh toy izao ity tany ity sy io trano io?

9 Ary ny olona hamaly hanao hoe: Satria izy ireo nandao an’i Iaveh Andriamaniny, izay namoaka ny razany avy tany amin’ny tany Ejipta, ka andriamani-kafa no nifikirany sy niankohofany teo anatrehany ary notompoiny, ka izany no nampidiran’i Iaveh izao loza rehetra izao tamin’izy ireo.»

Fifanakalozana tamin’i Hirama

10 Nony afaka roapolo taona, ka efa naorin’i Salômônany trano roa, dia ny tranon’i Iaveh sy ny tranon’ny mpanjaka: i Hirama, mpanjakan’i Tira, no efa namonona ny hazo sedera sy ny hazo sipresa mbamin’ny volamena ho an’i Salômôna araka izay nilainy,

11 ka dia nomen’ny mpanjaka Salômôna tanàna roapolo teo amin’ny tany Galilea i Hirama.

12 Dia niala tany Tira i Hirama hizaha ny tanàna nomen’i Salômôna azy, ary tsy tiany ireny,

13 ka hoy izy: «Edrey, itony tanàna mba nomenao ahy, ry rahalahy!» Ary nataony hoe tany Kabolano anaran’ireny mandrak’androany.

14 Efa nampanitatra talenta volamena 120 ho an’i Salômôna i Hirama.

Fanompoana teo amin’ny asa fanorenana

15 Izao kosa no momba ny olona mpanao fanompoana nalain’i Salômôna, hanaovana ny tranon’i Iaveh sy ny tranony, i Melao sy ny mandan’i Jerosalema, i Hasera, i Megedaô, ary i Gazera.

16 I Faraôna mpanjakan’i Ejipta, dia efa niakatra ka nahafaka an’i Gazera, dia nodorany ny tanàna, novonoiny ny Kananeanina nonina tao an-tanàna, dia nomeny ho haren-jazavavy izy, ho an’ilay zanany vadin’i Salômôna.

17 Ary izao no naorin’i Salômôna: Gazera, Bety-Hôrôna ambany,

18 i Baalata, i Tadmora any amin’ny tany efitra,

19 ny tanàna rehetra natao fitahirizana, ka an’i Salômôna, ny tanàna ho an’ny kalesy, ny tanàna ho an’ny mpitaingin-tsoavaly, mbamin’izay rehetra tian’i Salômôna naorina tany Jerosalema sy i Libàna ary tany amin’ny tany rehetra nanapahany.

20 Ary ny vahoaka sisa rehetra tamin’ny Amôreana, Heteanina, Ferzeanina, Heveanina, mbamin’ny Jeboseanina izay tsy isan’ny zanak’i Israely,

21 dia ny taranaka mandimby azy ireo tamin’ny tany, izay tsy azon’ny zanak’i Israely natao anatema, no nalain’i Salômôna andevo mpanao fanompoana, dia mbola toy izany ireo mandrak’androany.

22 Fa tsy mba nisy nataon’i Salômôna andevo ny zanak’i Israely, fa izy ireo no lehilahy mpiantafika, mpanompony, mpifehy, manamboninahitra, komandin’ny kalesy ama-mpitaingin-tsoavaly.

23 550 lahy no lehiben’ny komadaoron’ny mpiasan’i Salômôna.

24 Ary niakatra ny zanaka vavin’i Faraôna avy any an-tanànan’i Davida, ho ao amin’ny tranony, izay nataon’i Salômôna ho azy, ka tamin’izay izy no nanorina an’i Melaô.

Ireo sorona tao an-tempoly

25 Intelo isan-taona no nanateran’i Salômôna sorona dorana aman-tsorom-pihavanana, teo ambonin’ny ôtely nataony ho an’i Iaveh, sady nandoro zava-manitra teo ambonin’ny ôtely izay eo anatrehan’i Iaveh koa izy. Toy izany no nahavitany ny trano.

I Salômôna mpanao sambo

26 Ary i Salômôna mpanjakananao sambo maro tao Asiôngabera, akaikin’ny Ailata amoron’ny Ranomasina Mena, amin’ny tany Edôma.

27 Ary nalefan’i Hirama tamin’izany sambo izany ny mpanompony, izay matilò mahay ranomasina, hiaraka amin’ny mpanompon’i Salômôna.

28 Nankany Ofira izy ireo, naka talenta volamena 420 tany, dia nentiny tamin’i Salômôna mpanjaka.

Famangian’ny mpanjaka vavin’i Sabà

1 Nandre ny lazan’anaran’i Salômônaamin’ny Anaran’i Iaveh, ny mpanjaka vavin’i Sabà, ka tamy hizaha toetra azy amin’ny ankamantatra.

2 Dia tonga tany Jerosalema izy, narahin’ny kalesy maro be sy rameva nitondra zava-manitra, volamena sesehena, ary vatosoa. Dia nandroso ho any amin’i Salômôna izy, dia nolazainy taminy izay rehetra tao am-pony.

3 Voavalin’i Salômôna avokoa ny fanontaniany, fa tsy nisy niafina tamin’ny mpanjaka, ka tsy hainy novaliana.

4 Rehefa hitan’ity mpanjaka vavin’i Sabà ny fahendren’i Salômôna rehetra, ny trano nataony,

5 ny sakafo teo ambony latabany, ny trano fitoeran’ny mpanompony, ny efitra amam-pitafian’ny mpiasa an-tranony mbamin’ny mpandroso divay eo aminy, ny ambaratonga fiakarany ho eo amin’ny tranon’i Iaveh, dia talanjona

6 ka nilaza tamin’ny mpanjaka hoe: «Hay va re, dia marina tokoa ny zavatra reko tany amin’ny taniko, ny amin’ny momba ny tenanao sy ny fahendrenao!

7 Tsy nety nino ny lazan’olona aho, raha tsy efa tonga nahita maso, kanjo hay mbola tsy ampy antsasany akory no voalaza tamiko! Fa mihoatra lavitra noho ny reko tamin’ny filazan’olona ny fahendrena amam-boninahitrao.

8 Sambatra ny olonao, sambatra ny mpanomponao, izay manoloana anao lalandava ka mandre ny fahendrenao.

9 Hankalazaina anie i Iaveh Andriamanitrao, izay mankasitraka anao, ka nametraka anao eo amin’ny seza fiandrianan’i Israely. Fa fitiavany mandrakizay an’i Israely no nametrahan’i Iaveh anao ho mpanjaka, mba hanome rariny ny olona sy hitsara azy marina.»

10 Dia notoloran-dravehivavy talenta volamena 120, zava-manitra be dia be ary vatosoa ny mpanjaka. Tsy nisy be noho ny nomen’ny mpanjaka vavin’i Sabà an’i Salômôna mpanjaka, intsony ny zava-manitra tonga.

11 Ny sambon’i Hirama izay nitondra volamena avy any Ofira, dia nitondra hazo santala be dia be sy vatosoa koa avy any Ofira.

12 Ka nanaovan’ny mpanjaka arofanina amin’ny tranon’i Iaveh sy amin’ny tranon’ny mpanjaka, ary harpa amam-baliha ho an’ny mpihira, ny hazo santala. Tsy nisy tonga intsony izany hazo santala izany, ary tsy nisy nahita izany intsony mandrak’androany.

13 Dia mba nomen’i Salômôna izay rehetra niriny sy nangatahiny kosa ny mpanjaka vavin’i Sabà, afa-tsy ireo fanatitra izay mifanerana amin’ny fahambonian’ny mpanjaka toa an’i Salômôna. Izay vao niverina nody any amin’ny taniny izy sy ny mpanompony.

Ireo haren’i Salômôna

14 Ny lanjan’ny volamena tonga amin’i Salômôna amin’ny indray taona, dia talenta volamena 666,

15 afa-tsy ny azony amin’ny mpandranto sy amin’ny varotry ny mpivarotra ambongadiny sy amin’ny mpanjakan’i Arabiarehetra sy ny mpanapaka ny tany.

16 Nanao ampinga lehibe roan-jato vita tamin’ny volamena voatefy i Salômôna, ka volamena lanjana 600 sikla no lany tamin’ny isan’ampinga.

17 Nanao ampinga kely 300 koa vita tamin’ny volamena voatefy izy, ary volamena lanjana telo minano lany tamin’ny isan’ampinga, ka napetraky ny mpanjaka tao amin’ilay trano Alan’i Libàna ireo.

18 Nanao seza fiandrianana ivoara lehibe ny mpanjaka, nopetahany volamena madio.

19 Io seza fiandrianana io dia nisy ambaratonga enina, boribory ny lohany ambony amin’ny seza eo an-damosina, nisy fitehenan-tanana ny laniny roa amin’ny fipetrahana, nisy liona roa teo akaikin’ny fitehenan-tanana,

20 ary nisy liona 12 amin’ny ambaratonga enina, dia enina isan-daniny avy. Tsy nisy zavatra natao toy izany na tamin’ny fanjakana inona na tamin’ny fanjakana inona.

21 Ny kapoaka fisotroan’i Salômôna mpanjaka, dia volamena avokoa, ny vilia rehetra tao amin’ny trano Alan’i Libàna, volamena madio avokoa. Tsy nisy volafotsy tamin’ireny, fa natao tsinontsinona izany tamin’ny andron’i Salômôna.

22 Fa fanampin’ny sambon’i Hirama, mbola nanana sambo any Tarsisa koa ny mpanjaka, teny ambonin’ny ranomasina; ary tonga isan-telo taona ny sambo avy any Tarsisa, mitondra volamena sy volafotsy ary ivoara, rajako sy vorombola.

23 I Salômôna mpanjaka dia ambony noho ny mpanjaka rehetra teto an-tany, tamin’ny harena amam-pahendrena.

24 Samy nitady hahita an’i Salômôna avokoa ny olona rehetra mba hihaino ny fahendrena nataon’Andriamanitra ao am-pony.

25 Sady samy nitondra ny fanatiny avy, dia fanaka volafotsy, fanaka volamena, fitafiana, fiadiana, zava-manitra, soavaly, mole, isan-taona.

Ireo kalesin’i Salômôna

26 Nanangona kalesysy mpitaingin-tsoavaly i Salômôna, ka nanan-kalesy 1.400, sy mpitaingin-tsoavaly 12.000 izy, ary ireo dia napetrany tao amin’ny tanàna fitoeran-kalesiny, ary tao Jerosalema akaikin’ny mpanjaka.

27 Tao Jerosalema ny volafotsy nataon’ny mpanjaka ho ankabetsahana toy ny vato, ary ny hazo sedera nataony maro toy ny amontana maniry any an-tany lemaka.

28 Avy tany Ejipta no niavian’ny soavalin’i Salômôna: antokony iray tamin’ny mpandranton’ny mpanjaka no nandeha naka azy amin’andiany, araka ny vidiny efa nifanekena.

29 Ka volafotsy 600 sikla no vidin’ny kalesy iray nenti-niakatra avy any Ejipta; ary 150 avy kosa ny soavaly. Ary nisy nentiny nivoaka avy ao tahaka izany koa amin’ny anaran’ny tenany, ho an’ny mpanjakan’ny Heteanina rehetra, sy ho an’ny mpanjakan’i Siria.