Category: Asan’i Apôstôly

Nanamarina ny nataony i Piera tany Jerosalema

1 Ren’ny Apôstôly sy ireo havana iray finoana tany Jodea fa hoe nandray ny tenin’Andriamanitra koa ny Jentily.

2 Koa nony tafakatra tany Jerosalema i Piera, dia nomen’ireo mpino voafora tsiny,

3 nataony hoe «Nahoana ianao no niantrano tany amin’ny olona tsy voafora, sady niara-nihinana taminy?»

4 Dia nitantara ny zavatra niseho hatramin’ny niandohany i Piera ka nanao hoe:

5 Raha nivavaka tany an-tanàna Jôpe aho, dia azon-tsindrimandry ka nahita zavatra anankiray toa lamba lehibe nifatotra tamin’ny zorony efatra, nidina avy any an-danitra, tonga tao amiko.

6 Nony nijery azy aho ka nandinika, dia hitako tao ny biby manana tongotra efatra, ny biby dia, ny biby mandady, ary ny voromanidina.

7 Ary nisy feo reko koa nanao hoe: Mitsangàna, ry Piera, mamonoa ka mihinàna.

8 Fa hoy izaho: Sanatria, Tompoko, tsy mbola nisy zavatra fady sy maloto mba niditra tao am-bavako.

9 Fa niteny indray ilay feo tany an-danitra nanao hoe: Aza ataonao ho maloto izay efa nodiovin’Andriamanitra.

10 Intelo no naverina natao izany, dia nakarina tany an-danitra indray izany rehetra izany.

11 Niaraka tamin’izay, dia indreo nisy olona telo lahy tonga tao an-trano nitoerako, nirahina avy tany Sezarea hankany amiko.

12 Ary hoy ny Fanahy Masina tamiko: Aza misalasala hiaraka amin’izy ireo. Dia niaraka tamiko koa ireto havana iray finoana enina ireto, ka niditra tao an-tranon’i Kôrnely izahay.

13 Notantarain-dralehilahy taminay ny nahitany ny Anjely nitsangana tao an-tranony, ka nanao taminy hoe: Maniraha ho any Jôpe, ampanalao i Simôna izay atao hoe Piera,

14 fa izy no hilaza aminao ny teny izay hahavonjy anao sy ny ankohonanao rehetra.

15 Ary raha vao niteny tamin’izy ireo aho, dia nidina taminy toy ny nidinany tamintsika talohakoa ny Fanahy Masina.

16 Tamin’izay dia tsaroako ny tenin’ny Tompo nanao hoe:‹I Joany nanao batemy tamin’ny rano, fa ianareo kosa hatao Batemy amin’ny Fanahy Masina.›

17 Koa raha fanomezana sahala no nomen’Andriamanitra azy sy antsika izay nino an’i Jesoa Kristy Tompo, iza moa aho no ho afa-mifanohitra amin’Andriamanitra?

18 Nony nandre izany izy ireo, dia sady nangina no nankalaza an’Andriamanitra nanao hoe: Efa nomen’Andriamanitra ny fibebahana hahazoany ny fiainana koa ny Jentily.

Nanorenana Fiangonana tany Antiôkia

19 Tamin’izany, izay naelin’ny fanenjehana noho ny amin’i Etienina dia tonga hatrany Fenisia sy Sipra ary Antiôkia, nefa tsy nitory teny afa-tsy tamin’ny Jody ihany.

20 Ny sasany tamin’izy ireo anefa, izay lehilahy avy any Sipra sy Sirena, dia mba nisy niteny tamin’ny Grika ihany nony tonga tao Antiôkia, nitory an’i Jesoa Tompo.

21 Nomban’ny tanan’ny Tompo izy ireo, ka betsaka no nino sy nanatona ny Tompo.

22 Nandre ny lazan’izany ny Eglizy tao Jerosalema, ka naniraka an’i Barnabe hankany Antiôkia.

23 Nony tonga tany izy ka nahita ny fahasoavan’Andriamanitra, dia faly sy namporisika azy rehetra mba haharitra ao amin’ny Tompo amin-kerim-po.

24 Fa lehilahy tsara fanahy izy, sady feno ny Fanahy Masina sy finoana, ka vahoaka betsaka no nikambana tamin’ny Tompo.

25 Dia lasa nankany Tarsa i Barnabe hitady an’i Saoly; ary nony efa hitany izy, dia nentiny nankany Antiôkia.

26 Ka herintaona maninjitra no nanaovany fivoriana tao amin’io Eglizy io, ary vahoaka betsaka no nampianariny. Tao Antiôkia koa no voalohany nandraisan’ny mpianatra ny anarana hoe: Kristianina.

I Barnabe sy i Saoly nirahina ho any Jerosalema

27 Tamin’izany andro izany, dia nisy mpaminany sasanyavy tany Jerosalema tonga tao Antiôkia.

28 Ary voatsindrin’ny Fanahy Masina ny anankiray tamin’izy ireo atao hoe Agabosy, ka nitsangana nilaza fa hisy mosary lehibe amin’izao tontolo izao. Dia tonga tokoa izany tamin’ny andron’ny Klaody.

29 Ary nanapa-kevitra ny mpianatra fa hampitondra fiantrana araka ny ananany, hamonjy ireo havana iray finoana nonina tany Jodea,

30 ka notanterahiny tokoa izany; i Barnabe sy i Saoly no nampitondrainy izany fanampiana izany ho any amin’ny Pretra.

Voasambotra i Piera, fa nafahan’ny Anjely

1 Tamin’izany andro izany, dia nasain’i Herôdampanjaka nosamborina mba hampahoriana ny sasany anisan’ny Eglizy.

2 Nasainy novonoina tamin’ny sabatra i Jakôba rahalahin’i Joany.

3 Nony hitany fa nankasitrahin’ny Jody izany, dia nasainy nosamborina koa i Piera. Andron’ny Azima tamin’izay.

4 Nony efa nosamborina izy, dia nataony tao an-tranomaizina ka nasainy nambenan’andia-miaramilaefatra, misy miaramila efatra avy; fa rehefa afaka ny Paka vao kasainy hatolotra ny vahoaka izy.

5 Raha mbola notanana tao an-tranomaizina i Piera, dia tsy tapaka ny fivavahana nataon’ny Eglizy ho azy.

6 Tamin’ny alin’ny hamoahan’i Herôda azy, raha natory teo anelanelan’ny miaramila roa lahy i Piera, sady nifatotra tamin’ny rojo vy roa, ary nisy mpiambina niambina teo am-baravaran’ny tranomaizina,

7 dia indro nisy Anjelin’ny Tompo sy fahazavana namirapiratra tonga tampoka tao an-tranomaizina; nanohina ny andilan’i Piera ilay Anjely, namoha azy nanao hoe: «Mitsangàna faingana,» dia niala tamin’ny tanany ny rojo vy,

8 Ary hoy ilay Anjely taminy: «Anaovy ny fehikibonao, ary fehezo ny kapanao. Dia nataony izany, ka hoy indray ity Anjely: Tafio ny lambanao, ary manaraha ahy.»

9 Dia nivoaka i Piera ka nanaraka azy; tsy fantany ho tena zavatra anefa ny nataon’ny Anjely, fa nataony ho fahitana fotsiny izany.

10 Nony efa nandalo ny fiambenana voalohany sy faharoa izy, dia tonga tao amin’ny vavahady vy, fidirana ao an-tanàna; nivoha ho azy io, ka tafavoaka izy ireo, dia nizotra tamin’ny lalana iray, vao nilaozan’ilay Anjely tampoka izy.

11 Izay vao nahatsiaro fanahy i Piera, ka nanao hoe: «Fantatro ankehitriny fa efa naniraka ny Anjeliny tokoa ny Tompo, ka nanafaka ahy tamin’ny tanan’i Herôda, sy ny fanampoizan’ny vahoaka Jody.»

12 Dia nieritreritra kely izy aloha vao nankany an-tranon’i Maria renin’i Joany, izay atao hoe Marka; olona maro no tafavory nivavaka tao.

13 Nodoniny ny vavahady, dia nanatona hihaino ity ankizivavy anankiray atao hoe Rôdy.

14 Vao nahalala ny feon’i Piera io, dia nentin-kafaliana ka tsy ny vavahady no novohainy, fa ny tao an-trano no nihazakazahany nilazana hoe: «Ao am-bavahady ao i Piera.»

15 Dia hoy ireo taminy: «Very saina ianao.» Nefa nilaza marina dia marina izy fa izany tokoa; ka hoy izy ireo: «Anjeliny izany.»

16 Tamin’izany mbola nandondòna ihany i Piera; nony namoha azy izy ireo ka nahita azy vao talanjona foana.

17 Nohofain’i Piera tanana izy ireo mba hangina, dia nitantarany ny namoahan’ny Tompo azy tao an-tranomaizina, sy nilaza hoe: «Ambarao amin’i Jakôbasy amin’ireo havana iray finoana izany.» Raha efa izany dia lasa hankany amin’ny toeran-kafa izy.

18 Nony nazava ny andro, dia nifanaritaka be ihany ny miaramila nikaroka izay nanjavonan’i Piera.

19 Rehefa nampikarohin’i Herôda izy, ka tsy hitany, dia ny mpiambina no nadininy sy nasainy novonoina. Taorian’izany dia niala tany Jodea izy ka nankany Sezarea, ary nitoetra tao.

Ny nahafatesan’i Herôda mpanenjika

20 Tezitra tamin’ny mponina any Tira sy Sidona i Herôda fahizany. Koa nony efa nahazo an’i Blasta mpitandrina ny trano fandrian’ny mpanjaka ho sakaizany ry zareo ireo, dia niara-nanatona azy mba hangataka fihavanana taminy, satria ny tanin’i Herôda no niveloman’ny fireneny.

21 Nony tonga ny andro voatendry, nipetraka teo amin’ny seza fiandrianana i Herôda niakanjo ny fanamian’ny mpanjaka, dia nikabary tamin’izy ireo.

22 Ary ny vahoaka niantso hoe: «Feon’Andriamanitra izany, fa tsy mba feon’olombelona!»

23 Niaraka tamin’izay, dia nisy Anjelin’ny Tompo namely azy, satria tsy nanome voninahitra an’Andriamanitra izy, ka maty nohanin’ny kankana.

I Barnabe sy i Paoly nody tany Antiôkia

24 Tamin’izany dia nandroso niely ny tenin’ny Tompo, ka nahavokatra mpianatra maro hatrany.

25 Nony vita ny raharahan’i Barnabe sy i Saoly tao Jerosalema, dia niverina tany Antiôkia izy, ary nitondra an’i Joany izay atao hoe Marka hiaraka aminy.

Ny nanirahana azy mirahalahy

1 Tao amin’ny Eglizy tany Antiôkia nisy mpaminany sy mpampianatra: dia i Barnabe sy i Simeôna izay atao hoe Mainty, i Lisiosa avy any Sirena, sy i Manahena izay niolo-nono tamin’i Herôda Tetrarka, ary i Saoly.

2 Raha nanao fanompoam-pivavahanatamin’ny Tompo sy nifady hanina izy ireo, dia hoy ny Fanahy Masina taminy: «Atokàny ho ahy i Saoly sy i Barnabe, mba hanao ny asa izay niantsoako azy.»

3 Koa nony avy nifady hanina sy nivavaka izy ireo dia nametra-tananatamin’izy roa lahy, vao nandefa azy handeha.

Tany Sipra. I Elimasy mpanao mazia

4 Dia nirahin’ny Fanahy Masina i Saoly sy i Barnabe, ka lasa nankany Seleosia, mba hiondrana an-tsambo eo, ho any Sipra.

5 Nony tonga tany Salamìna izy, dia nitory ny tenin’Andriamanitra tao amin’ny sinagogan’ny Jody; nentin’izy ireo hiaraka taminy koa i Joany ho mpanampy azy.

6 Ary rehefa nitety ny nosy manontolo izy ireo ka tonga tany Pafôsy, dia nahita Jody anankiray atao hoe Barjesoa mpamoha angatra sy mpaminany sandoka,

7 izay nitoetra tao amin’ny governora Serjio Paoly lehilahy hendry. Nampanalain’ity governora i Barnabe sy i Paoly, fa naniry handre ny tenin’Andriamanitra izy.

8 Nefa nanohitra azy roa lahy i Elimasy ilay mpamoha angatra (fa izany no dikan’ny anarany), ka nitady hisakana ny governora tsy hanaiky ny finoana.

9 Tamin’izay dia feno ny Fanahy Masina i Saoly, izay atao hoe koa Paoly, ka nibanjina azy,

10 sy nanao taminy hoe: «Akay, ry ilay feno fitaka sy hafetsen-dratsy ity, zanaky ny devoly sy fahavalon’ny marina rehetra! Tsy hitsahatra ny hampivily ny lala-mahitsin’ny Tompo va ialahy?

11 Ary indro ankehitriny, hamely an’ialahy ny tanan’ny Tompo, ka ho jamba tsy hahita ny masoandro ialahy mandra-pahatongan’ny fotoana.» Niaraka tamin’izay, dia nosaronan’ny haizim-pito izy.

12 Nony nahita izany ny governora, dia talanjona ka nino ny fampianaran’ny Tompo.

Tonga tany Antiôkia any Pisidia izy roa lahy

13 Dia niondrana an-tsambo tao Pafôsy i Paoly sy ny namany, ka tonga tany Perja any Panfilia; ary nisaraka tamin’izy ireo teo i Joany, ka lasa niverina tany Jerosalema.

14 Fa izy ireo kosa niala tany Perja, dia tonga tany Antiôkia any Pisidia, ary niditra tao amin’ny sinagoga izy tamin’ny andro sabata, ka nipetraka teo.

15 Nony vita ny famakiana ny bokin’ny Lalàna sy ny mpaminany, dia nilaza tamin’izy ireo ny lehiben’ny sinagoga nanao hoe: «Ry rahalahy, ataovy raha misy teny famporisihana holazainareo amin’ny olona.»

16 Dia nitsangana i Paoly, nanofa tanana azy hangina, ka nanao hoe:

Toritenin’i Paoly teo anatrehan’ny Jody

«Mihainoa, ry Israelita, sy ianareo izay matahotra an’Andriamanitra.

17 Ny Andriamanitr’izao vahoaka Israely izao no efa nifidy ny razantsika, sy nanandratra ny vahoaka fony izy nitoetra tany Ejipta; ary tamin’ny sandry mahery no nanesorany azy tao.

18 Namelona azy tokony ho efapolo taona tany an’efitra Izy,

19 ary nony efa nandrava firenena fito tany amin’ny tany Kanaàna Izy dia nanome ny faritan’ireny ho fananany,

20 tokony ho dimampolo sy efajato taona. Taorian’izany dia nomeny mpitsara izy ireo, hatramin’i Samoely mpaminany.

21 Nony afaka izany dia nangataka mpanjaka izy ireo, ka nomen’Andriamanitra an’i Saoly zanak’i Sisy, lehilahy avy amin’ny fokon’i Benjamina, naharitra efapolo taona.

22 Nony nesoriny kosa indray i Saoly, i Davida no natsangany ho mpanjakan’izy ireo, dia ilay nankatoaviny tamin’ny teny hoe:Efa hitako i Davida zanak’i Jese, lehilahy araka ny foko, izay hanao ny sitrapoko rehetra.»

23 Avy tamin’ny taranany no namoahan’Andriamanitra an’i Jesoa, araka ny nampanantenainy, ho Mpamonjy an’i Israely.

24 Talohan’ny nahatongavany anefa, dia i Joany no nitory batemim-pibebahana tamin’ny vahoaka Israely rehetra;

25 ary rehefa nadiva ho tapitra ny dian’i Joany, dia hoy izy: «Tsy izaho no Ilay andrasanareo, fa indro avy ao aoriako Izy, ka tsy mendrika hamaha ny kofehin-kapany akory aho.»

26 Ry rahalahy taranak’i Abrahama, sy ireo matahotra an’Andriamanitra eo aminareo koa, ho antsika indrindra no nampitondrana ny tenin’izao famonjena izao,

27 satria ry zareo monina any Jerosalema sy ny lehibeny dia tsy nahalala Azy, ka nahatanteraka ny tenin’ny mpaminany izay vakina isan-tsabata, tamin’ny nanamelohany Azy;

28 ary na dia tsy nahita izay tokony hanamelohana Azy ho faty aza izy ireo, dia nangataka ny hamonoana Azy tamin’i Pilaty.

29 Tanterak’izy ireo ny zavatra rehetra voasoratra momba Azy, vao nesoriny tamin’ny hazo Izy, ka naleviny tao am-pasana.

30 Fa Andriamanitra kosa nanangana Azy ho velona.

31 Ary niseho nandritra ny andro maromaro tamin’izay niara-niakatra taminy avy tany Galilea ho any Jerosalema Izy, ka dia ireo no vavolombelony amin’ny vahoaka ankehitriny.

32 Ary izahay koa mitory aminareo ilay teny napetraka tamin’ny razantsika,

33 fa notanterahin’Andriamanitra tamintsika zanak’izy ireo izany, tamin’ny nananganany an’i Jesoa ho velona, araka izay voasoratra amin’ny Salamo faharoa hoe:Zanako Ianao; Izaho no niteraka Anao androany.

34 Ary voalazany fa natsangany ho velona Izy, ka tsy hiverina amin’ny lo intsony, tamin’ny teny hoe:Homeko anareo ny fanambinana nanomezan-toky an’i Davida;

35 ary tamin’ny teny hafa koa hoe:Tsy havelanao ho tratry ny lo ny Masinao.

36 Raha i Davida aloha, dia nody mandry izy rehefa nahatanteraka ny sitrapon’Andriamanitra tamin’ny androny, ka nakambana tamin’ny razany, sytratry ny lo;

37 fa izay natsangan’Andriamanitra ho velona no tsytratry ny lo.

38 Aoka ho fantatrareo àry, ry rahalahy, fa Izy ihany no itoriana famelan-keloka aminareo, ary ny ota rehetra tsy nahazoanareo fanamarinana tamin’ny Lalàn’i Môizy,

39 dia ao aminy no anamarinana an’izay rehetra mino mba ho afaka amin’izany.

40 Koa mitandrema ianareo fandrao dia iharan’izay voalazan’ny mpaminany hoe:

41 Mihevera, ry mpamotsifotsy, ka migagà sy levòna ianareo; fa Izaho hanao zavatra anankirayamin’ny andronareo, dia zavatra tsy hinoanareo na dia holazaina aminareo aza.

42 Nony nivoaka izy ireo, dia nangatahiny mba hilaza izany teny izany indray amin’ny sabata manaraka.

43 Rehefa nirava ny fiangonana, dia betsaka ny Jody sy ny prôselita nanompo an’Andriamanitra no nanaraka an’i Paoly sy i Barnabe, ary izy roa lahy kosa niresaka tamin’izy ireo sy namporisika azy haharitra amin’ny fahasoavan’Andriamanitra.

Tenin’i Paoly sy i Barnabe tamin’ny Jentily

44 Tamin’ny sabata nanaraka, dia saika tafangona hihaino ny tenin’Andriamanitra avokoa ny tao an-tanàna rehetra.

45 Fa feno fialonanany Jody nony nahita izany vahoaka be izany, ka sady nanohitra ny teny nolazain’i Paoly no nanevateva azy.

46 Tamin’izay i Paoly sy i Barnabe dia niteny tamin-kasahiana hoe: «Ianareo no tsy maintsy nitoriana ny tenin’Andriamanitra voalohany indrindra; nefa noho ianareo mandà azy sy manao ny tenanareo ho tsy mendrika ny fiainana mandrakizay, dia indro hankany amin’ny Jentily izahay.

47 Fa toy izao no nandidian’ny Tompo anay:Efa natsangako ho fahazavan’ny Jentily ianareo, mba hitondra famonjena hatramin’ny fara vazantany».

48 Faly ny Jentily nony nandre izany, ka nankalaza ny tenin’ny Tompo, ary nino avokoa izay rehetra voalahatra ho amin’ny fiainana mandrakizay.

49 Dia niely eran’izany tany izany ny tenin’ny Tompo.

50 Nefa notarihin’ny Jody ny vehivavy tia vavaka sy ambony toetra, mbamin’ny loholona tao an-tanàna, ka nampanenjika an’i Paoly sy i Barnabe, sy nandroaka azy hiala amin’ny taniny.

51 Tamin’izay, izy roa lahy nanintsana ny vovoka tamin’ny tongony hiampanga an’ireo, dia lasa nankany Ikonioma,

52 ary ny mpianatra kosa, feno hafaliana sy Fanahy Masina.

Fitoriana ny Vaovao Mahafaly tany Ikonioma

1 Nony tany Ikonioma izy roa lahy, dia niara-niditra tao amin’ny sinagogan’ny Jody ka nitory teny, ary betsaka no nino, na Jody na Jentily.

2 Ny Jody izay tsy nino anefa, dia nitarika sy nanome fo ny Jentily hanohitra ny rahalahy.

3 Fa na izany aza, dia nitoetra ela tao ihany izy roa lahy, ka nitory tamin-kasahiana noho ny fitokiany ny Tompo, izay nanamarina ny tenin’ny fahasoavany tamin’ny nampanaovana azy ireo famantarana sy fahagagana.

4 Dia nisara-tsaina ny olona rehetra tao an-tanàna, ny sasany nomba ny Jody, ny sasany nomba ny Apôstôly;

5 Efa nivonon-kanala baràka sy hitora-bato ny Apôstôly ny Jentily sy ny Jody mbamin’ny lehibeny;

6 saingy reny izany, ka lasa nankany Listra sy Derbe, tanàna any Likaônia, ary tamin’ny tany rehetra manodidina izy ireo, dia nitory ny Evanjely tany.

Ny nanasitranana olona malemy

7 Tany Listra, nisy lehilahy anankiray nalemy tongotra hatrany an-kibon-dreniny ka tsy mbola namindra, fa nipetraka hatrany hatrany.

8 Nihaino an’i Paoly nitory teny izy io, ary nibanjina azy i Paoly, ka nahita fa nino izy fa ho sitrana,

9 dia hoy izy tamin’ny feo mahery: «Mitsangàna, ka mijoroa amin’ny tongotrao.» Dia niantsàmbotra ralehilahy, ka namindra.

10 Nony hitan’ny vahoaka ny nataon’i Paoly, dia niantso mafy tamin’ny fitenin’i Likaônia izy nanao hoe: «Andriamanitra maka endrik’olona no nidina nankatỳ amintsika.»

11 Dia i Barnabe moa nantsoiny hoe Jopitera, ary i Paoly kosa Merkiora satria izy no mpandaha-teny.

12 Mihoatra noho izany, ny mpisoron’i Jopitera takaikin’ny tanàna mbamin’ny vahoaka aza, dia efa nitondra ombalahy sy fehiloha teo am-bavahady mihitsy, ka nikasa hanao sorona.

13 Fa nony nandre izany ny Apôstôly Barnabe sy Paoly, dia nandriatra ny akanjony, ka nandroso teo afovoan’ny vahoaka niantso mafy hoe:

14 «Nahoana ray olona, no dia manao izany ianareo? Izahay dia olombelona toa anareo ihany, ka ny mitory aminareo no anay, mba hialanareo amin’izao zava-poana izao, sy hanatonanareo an’Andriamanitra velona, izay nanao ny lanitra sy ny tany, ary ny ranomasina mbamin’ny zavatra rehetra ao amin’ireo.

15 Namela ny firenena rehetra teo aloha handeha amin’ny lalana tiany izy;

16 kanefa tsy nitsahatra ny nanisy vavolombelona hanambara ny Tenany mandrakariva tamin’ny soa nataony, dia ny mandatsaka ny ranonorana avy any an-danitra, ny mahavokatra ny tany amin’ny fotoana, ka mahavoky hanina antsika, sy mahafeno hafaliana ny fontsika.»

17 Fa na dia izany aza no tenin’izy roa lahy, dia saiky tsy nahasakana ny vahoaka tsy hanao sorona taminy izy.

Nifarana ny asa anirahana

18 Tamin’izay dia nisy Jody tonga avy tany Antiôkia sy Ikonioma, nanome fo ny vahoaka, ka nitora-bato an’i Paoly izy ireo, sy nitarika azy ho any ivelan’ny tanàna, satria nataony ho efa maty izy.

19 Kanjo nony tonga nanodidina azy ny mpianatra, dia nitsangana izy, ka niditra tao an-tanàna. Ny ampitso ihany dia lasa nankany Derbe izy sy i Barnabe.

20 Ary rehefa nitory ny Evanjely tamin’izany tanàna izany izy ka nahazo mpianatra maro, dia niverina tany Listra sy Ikonioma ary Antiôkia,

21 nankahery fo ny mpianatra, sy namporisika azy haharitra amin’ny finoana, ary nilaza fa amim-piaretana fahoriana betsaka no tsy maintsy idirantsika amin’ny fanjakan’Andriamanitra.

22 Isan’Eglizy nalehany, nony efa nivavaka sy nifady hanina izy ireo, dia nanendry Pretra, sy nanankina azy tamin’ny Tompo izay efa ninoany.

23 Dia namaky an’i Pisidia izy ireo, ka tonga tany Panfilia.

24 Ary rehefa nitory ny tenin’ny Tompo tany Perja izy, dia nidina nankany Atalia.

25 Avy ao izy, dia niondrana an-tsambo hankany Antiôkia, fa teo no nanolorana azy hoentin’ny fahasoavan’Andriamanitra hanao ny asa izay vitany.

26 Vao tonga tao izy, dia namory ny fiangonana, ka nitantara ny zavatra lehibe nataon’Andriamanitra taminy, sy ny namohàny ny varavaran’ny finoana ho an’ny Jentily.

27 Ary elaela ihany no niarahany nitoetra tamin’ny mpianatra tao Antiôkia.

Ady hevitra tany Antiôkia

1 Ary nisy olona avy tany Jodea nampianatra ny rahalahy hoe: «Raha tsy forana araka ny Lalàn’i Môizy ianareo, dia tsy ho voavonjy.»

2 Ka nony efa nifanditra sy niady hevitra mafy tamin’ireo i Paoly sy i Barnabe, dia izao no hevitra nifanarahana: hiara-miakatra any Jerosalema i Paoly sy i Barnabe, ary ny sasany amin’izy an-daniny, handinika amin’ny Apôstôlysy ny Pretra ilay zavatra niadiany hevitra.

3 Dia naterin’ny fiangonana teny ho eny izy ireo, vao nanohy ny diany namaky an’i Fenisia sy i Samaria, nitantara ny nibebahan’ny Jentily, ka nahafaly indrindra ny havana rehetra iray finoana izany.

4 Nony tonga tany Jerosalema izy ireo, dia noraisin’ny Eglizy sy ny Apôstôly mbamin’ny Pretra, ary nilaza ny zava-dehibe nataon’Andriamanitra taminy.

Ady hevitra tany Jerosalema

5 Fa mba nitsangana kosa ny mpino sasany tariky ny Farisianina, ka nanao hoe: «Tsy maintsy forana ny Jentily, sy didiana hanaraka ny Lalàn’i Môizy.»

6 Dia nivory ny Apôstôlysy ny loholona mba handinika izany raharaha izany,

7 ka niady hevitra mafy naharitra ela; fa nitsangana i Piera ka nanao taminy hoe:

Lahatenin’i Piera

«Ry havana iray finoana, fantatrareo fa efa ela izay no nifidianan’Andriamanitra ahy teto aminareo mba handrenesan’ny Jentily amin’ny vavako ny tenin’ny Evanjely sy hinoany.

8 Ary Andriamanitra izay mahalala ny fo, dia naneho ny fankasitrahany azy ireo tamin’ny nanomezany azy ny Fanahy Masina tahaka antsika koa;

9 nataony tsy nisy hafa isika sy izy, fa nodioviny tamin’ny finoana ny fony.

10 Koa nahoana àry no maka fanahy an’Andriamanitra ianareo izao, ka manisy jioga amin’ny vozon’ny mpianatra, nefa samy tsy nahazaka izany na isika na ny razantsika?

11 Fa noho ny fahasoavan’i Jesoa Tompo ihany no inoantsika hahazoana famonjena, tahaka ny azy ireo ihany koa.»

12 Dia nangina ny olona rehetra, ka nihaino an’i Barnabe sy i Paoly nitantara ny famantarana amam-pahagagana betsaka nampanaovin’Andriamanitra azy tany amin’ny Jentily.

Lahatenin’i Jakôba

13 Nony nitsahatra ny tenin’izy roa lahy, dia namaly i Jakôba nanao hoe: Ry rahalahy, henoy aho.

14 Ny amin’ny namangian’Andriamanitra ny Jentily aloha, mba hangalany vahoaka hanaja ny Anarany amin’izy ireo, dia efa voatantaran’i Simôna.

15 Ary mifanaraka amin’izany koa ny tenin’ny mpaminany, araka ny voasoratra hoe:

16 Rehefa afaka izany, dia hiverina Aho, ka haoriko indray ny tranon’i Davida izay efa nianjera; hamboariko izay rava, dia hatsangako indray izy,

17 mba hitady ny Tompo ny olona sisa mbamin’ny Jentily rehetra izay niantsoana ny Anarako, hoy ny Tompo,

18 izay manatanteraka izany zavatra fantatra hatrizay hatrizay izany.

19 Koa amin’izany, izao no hevitro: tsy mety ny manome fahasahiranana ny Jentily izay manatona an’Andriamanitra,

20 fa aoka hampitondrana taratasy izy ireo mba hifady ny hena natolotra tamin’ny sampy, sy ny fijangajangana, ary ny biby nokendaina, mbamin’ny ra.

21 Fa hatramin’ny taranaka mifanesy hatry ny ela dia manana izay mitory azy isan-tanàna rehetra i Môizy, satria vakina ao amin’ny sinagoga isan-tsabata ny teniny.

Taratasy avy amin’ny Apôstôly

22 Nankasitrahin’ny Apôstôly sy ny Pretra mbamin’ny Eglizy rehetra izany; ka nifidy ny sasany tamin’izy rehetra izy ireo, mba hirahina ho any Antiôkia hiaraka amin’i Paoly sy i Barnabe: dia i Jodà izay atao hoe Barsabasy, sy i Silasy, lehilahy lohandohany tao amin’ny havana iray finoana, no laniny.

23 Ka izao no taratasy nampitondrainy azy ireo:

«Ny Apôstôly sy ny Pretra ary ny rahalahy avy miarahaba ny rahalahy any amin’ny Jentily, izay any Antiôkia sy Siria ary Silisia.

24 Noho ny nandrenesanay fa nisy olona avy tatỳ aminay, izay tsy nahazo teny taminay velively, nampitabataba anareo tamin’ny teniny sy nampitebiteby ny sainareo,

25 dia nivory izahay rehetra, ka nifanara-kevitra ny hifidy olona hirahina ho any aminareo, hiaraka amin’i Barnabe sy i Paoly malalanay,

26 lehilahy nanao vy very ny ainy ho voninahitry ny Anaran’i Jesoa Kristy Tompontsika.

27 Koa indreny i Jodà sy i Silasy nirahinay hilaza am-bava izany zavatra izany aminareo.

28 Sitraky ny Fanahy Masina sy izahay ny tsy hampitondra ny mavesatra anareo, afa-tsy izao zavatra tsy maintsy tandremana izao:

29 dia ny hifadianareo ny hena natolotra tamin’ny sampy, sy ny ra, ary ny biby nokendaina, mbamin’ny fijangajangana; soa ho anareo ny mifady an’izany. Veloma.»

Ireo solontena nankany Antiôkia

30 Dia nalefany izy ireo ka lasa nankany Antiôkia; ary namory ny olona sy nanolotra ny taratasy tamin’izy ireo.

31 Nony namaky izany ny olona, dia nifaly avokoa noho ny fanalana alahelo tao anatiny.

32 I Jodà sy i Silasy, izay mpaminany koa, nanao teny maro mba hanafaka alahelo ny havana iray finoana sy hankahery fo azy ireo.

33 Nony nitoetra teo elaela ihany izy ireo, dia nampandehanin’ny havana iray finoana soa aman-tsara ho any amin’izay naniraka azy.

34 Mbola nankasitraka ny hijanona anefa i Silasy, ka dia i Jodà irery no niverina tany Jerosalema.

35 Ary i Paoly sy i Barnabe kosa nitoetra tany Antiôkia, ka nampianatra sy nitory ny tenin’ny Tompo niaraka tamin’ny namany maromaro.

I Paoly nisaraka tamin’i Barnabe ary naka an’i Silasy

36 Nony afaka andro vitsivitsy, dia hoy i Paoly tamin’i Barnabe: «Andeha indray isika hamangy ny havana iray finoana any amin’ny tanàna rehetra efa nitoriantsika ny tenin’ny Tompo, hahitantsika izay toetrany.»

37 Ary i Barnabe moa nikasa hitondra an’i Joany, izay atao hoe Marka, hiaraka aminy.

38 Fa i Paoly kosa nangataka ny tsy hitondra an’io, satria efa nandao azy ireo tany Panfilia io fa tsy niara-niasa taminy.

39 Dia nifanditra mafy izy roa lahy, hany ka tafasaraka terỳ: i Barnabe moa nitondra an’i Marka, dia niondrana an-tsambo hankany Sipra izy roa lahy.

40 Fa i Paoly kosa nifidy an’i Silasy

Tany Likaônia i Paoly naka an’i Timote

41 Namaky an’i Siria sy i Silisia izy, nankahery fo ny Eglizy rehetra, dia nandidy azy hitandrina ny didin’ny Apôstôly sy ny Pretran’ny Eglizy.

1 Dia tonga tany Derbe sy Listra izy, ary indro nisy mpianatra anankiray teo atao hoe Timote, zanaky ny vehivavy Jody sady mpino, fa ny rainy no Jentily. dia lasa, rehefa natolotry ny havana iray finoana hoentin’ny fahasoavan’ny Tompo.

2 Tsara laza tamin’ny havana iray finoana tao Listra sy Ikonioma izy,

3 ka tian’i Paoly hoentina miaraka aminy; dia nalainy izy ka noforàny, noho ny Jody izay nitoetra tamin’izany tany izany, satria fantatr’izy rehetra fa Jentily ny rainy.

4 Ary raha nitety ny tanàna izy ireo, dia nasainy notandreman’ny olona ny didy navoakan’ny Apôstôly sy ny Pretra tany Jerosalema.

5 Koa sady nitombo finoana ny Eglizy rehetra no nihamaro isa isan’andro.

Ny nandavana an’i Azia Andrefana

6 Nony avy nitety an’i Frijia sy i Galatia izy ireo, dia noraran’ny Fanahy Masina tsy hitory ny tenin’Andriamanitra any Azia.

7 Efa tonga tany Mizia izy, sy efa niomana ho any Bitinia, nefa tsy navelan’ny Fanahin’i Jesoa,

8 ka nandalo faingana an’i Mizia, dia lasa nankany Trôasy.

9 Nony alina, nahita tsindrimandry i Paoly; indro nisy lehilahy anankiray nitsangana teo anatrehany, ka nihanta taminy nanao hoe: «Mità mankatỳ Masedônia, ka vonjeo izahay.»

10 Ary rehefa nahita izany izy, dia nitady hankany Masedònia haingana izahay, satria nahalala marina fa nantsoin’Andriamanitra hitory ny Evanjely amin’ny olona any.

Tonga tany Filipy

11 Koa dia niondrana an-tsambo tany Trôasy izahay, ka nizotra nankany Samôtrasy, ary ny ampitso dia nankany Neapôlisy.

12 Nony niala teo izahay dia nankany Filipy, izay tanàna voalohany amin’izany faritanin’i Masedônia izany, sy zanatany rômanina. Nampianatra andro vitsivitsy tamin’izany tanàna izany izahay.

13 Ary tamin’ny andro sabata, dia nivoaka teo ivelan’ny vavahady izahay, ka nankeny amoron’ny ony, fa nataonay ho any no toerana fivavahana; nipetraka teo izahay, dia niresaka tamin’ny vehivavy izay tafavory teo.

14 Nisy vehivavy anankiray tamin’izy ireo atao hoe Lidia mpivaro-jaky, avy any an-tanàna Tiatira, izay nivavaka tamin’Andriamanitra; nihaino anay izy, ary nosokafan’Andriamanitra ny fony mba hitandrina izay nolazain’i Paoly.

15 Ary rehefa vita Batemy izy mbamin’ny ankohonany, dia nangataka taminay izy nanao hoe: «Raha mba ataonareo ho mpanompon’Andriamanitra koa aho, dia midira ao an-tranoko ka mitoera ao.» Nanaovany lemozy mihitsy izahay.

Natao an-tranomaizina i Paoly sy i Silasy

16 Indray andro raha nandeha hivavaka izahay, dia nifanena tamin’ny ankizivavin’olona anankiray izay notsindriam-panahy maminany, ka nampahazo harena be ny tompony tamin’ny faminaniana nataony;

17 Rafitra nanaraka anay sy i Paoly izy io, sady niantso hoe: «Ireto lehilahy ireto no mpanompon’Andriamanitra Avo indrindra, izay hanoro anareo ny lalam-pamonjena.»

18 Andro maro no nanaovany toy izany, ka sosotra i Paoly sy nitodika tamin’ny fanahy nanao hoe: «Mandidy anao amin’ny Anaran’i Jesoa Kristy aho hivoaka aminy.» Dia nivoaka niaraka tamin’izay izy.

19 Nony hitan’ireo tompony fa very ny fanantenany hahazo harena, dia nisambotra an’i Paoly sy i Silasy izy ireo, ka nitondra azy tany amin’ny fitsarana any amin’ny lehibe.

20 Ary nony efa nanolotra azy tamin’ny mpitsara izy ireo, dia nanao hoe: «Mampitabataba ny tanànantsika loatra ireto lehilahy ireto;

21 Jody izy ireo ary mampianatra fanao tsy azontsika raisina na arahina velively, noho ny maha-Rômanina antsika.»

22 Niaraka tamin’izay dia nirohotra hamely azy ny vahoaka; nasain’ny mpitsara nendahana ny lambany vao handalasina amin’ny hazo izy ireo.

23 Ary rehefa naratra be ihany izy, dia nataony an-tranomaizina, ka nasainy nambenan’ny mpiambina mafy.

24 Nony nahazo teny toy izany ny mpiambina, dia nampiditra azy tao amin’ny tranomaizina anatiny indrindra, sy nangia ny tongony tamin’ny bolaky hazo.

Nafahana tamin’ny fomba mahagaga ireo irak’Andriamanitra

25 Rehefa tokony ho nisasaka ny alina, dia nihira fiderana an’Andriamanitra i Paoly sy i Silasy, ka nihaino azy ny tao an-tranomaizina.

26 Niaraka tamin’izay dia nisy horohoron-tany mafy dia mafy, nanozongozona ny trano hatrany am-potony, ka nivoha tampoka ny varavarana rehetra, ary nivaha daholo ny fatoran’izy rehetra.

27 Taitra tamin’izay ny mpiambina ny tranomaizina, ka nony nahita ny varavaran’ny tranomaizina nivoha izy, dia nanatsoaka ny sabany ndeha hamono tena, satria nataony ho nitsoaka nandositra ny mpifatotra.

28 Fa niantso tamin’ny feo mahery i Paoly nanao hoe: «Aza mamono tena foana, fa eto daholo ihany izahay rehetra.»

29 Dia nangataka jiro ny mpiambina, ka niditra faingana sady nangovitra niankohoka teo an-tongotr’i Paoly sy i Silasy.

30 Nentiny nivoaka izy roa lahy, dia hoy izy: «Tompoko, inona no tokony hataoko mba ho voavonjy aho?»

31 Ary hoy ny navalin’izy roa lahy: «Minoa an’i Jesoa Tompo, dia ho voavonjy ianao sy ny ankohonanao.»

32 Dia nilazan’izy roa lahy ny tenin’ny Tompo izy sy izay rehetra tao an-tranony.

33 Iny alina iny ihany, dia nitondra azy roa lahy izy, ka nanasa ny feriny; ary tamin’izay ora izay ihany dia natao Batemy izy, sy ny tao an-tranony rehetra.

34 Dia nentiny nankao an-tranony izy roa lahy, ka norosoany hanina, ary nifaly izy mianakavy rehetra, satria efa nino an’Andriamanitra.

35 Nony maraina ny andro, nirahin-dry zareo lehibe ny mpitan-defona nanao hoe: «Alefaso ireo lehilahy ireo.»

36 Dia nolazain’ny mpiambina ny tranomaizina tamin’i Paoly izany teny izany. «Naniraka handefa anareo ny lehibe, hoy izy, koa mivoaha ankehitriny, ary mandehana soa aman-tsara.»

37 Fa hoy i Paoly taminy: «Lehilahy Rômanina izahay, nefa sady nokapohina ampahibemaso tsy voatsara no natao an-tranomaizina koa indray, ka dia ho azony havoaka an-tsokosoko fotsiny izao ve? Tsy azo atao izany, fa aoka ny tenany no hankatỳ handefa anay.»

38 Dia nolazain’ny mpitan-defona tamin’ny lehibe izany teny izany, ka natahotra izy ireo nony nandre fa hoe Rômanina izy roa lahy;

39 Dia tonga tokoa izy ireo, ka nifona taminy mba hivoaka, sy niangavy taminy mba hiala amin’ny tanàna.

40 Nony avy tao an-tranomaizina izy roa lahy, dia niditra tao an-tranon’i Lidia; ary rehefa nahita sy nanafaka alahelo ny havana iray finoana izy, dia lasa.

Fifanolanana tamin’ny Jody

1 Dia namaky an’i Anfipôlisy sy i Apôlônia izy ireo, ka tonga tany Tesalonika, izay nisy sinagogan’ny Jody.

2 Niditra tao araka ny fanaony i Paoly, ary sabata telo no niadiany hevitra tamin’ny olona tao, momba ny Soratra Masina.

3 Nasehony sy noporofoiny mazava fa tsy maintsy ho nijaly sy nitsangan-ko velona i Kristy, ary izany Kristy izany dia i Jesoa izay toriko aminareo, hoy izy.

4 Nino ny sasany tamin’izy ireo, ka nikambana tamin’i Paoly sy i Silasy, toraka izany koa Jentily maro be tia vavaka, sy vehivavy ambony toetra betsaka.

5 Fa velom-pialonana kosa ny Jody, ka namory olona ratsy fanahy tamin’ny faikan’olona, ary nony tafavory betsaka izy ireo, dia nampitabataba ny tanàna. Nanodidina ny tranon’i Jasôna izy ireo nitady hamoaka azy roa lahy ho eo anatrehan’ny vahoaka.

6 Nony tsy nahita azy roa lahy izy ireo, dia i Jasôna sy ny havana iray finoana sasany no notarihiny ho any amin’ny lehiben’ny tanàna, nampangainy hoe: «Tonga atỳ koa irony olona mpanakorontam-bahoaka irony,

7 ka noraisin’i Jasôna; nefa manohitra ny tenin’i Sezara izy ireo, satria milaza fa misy mpanjaka hafa koa, dia i Jesoa.»

8 Taitra ny vahoaka sy ny lehiben’ny tanàna raha nandre izany,

9 ka tsy navelany handeha i Jasôna sy ny namany raha tsy efa nametraka antoka.

Fifanolanana hafa tany Berea

10 Nony alina, dia nampandehanin’ny havana iray finoana niaraka tamin’izay i Paoly sy i Silasy hankany Berea. Ary nony tonga tany izy roa lahy, dia niditra tao amin’ny sinagogan’ny Jody.

11 Tsara toe-panahy kokoa ry zareo tao noho ny tany Tesalonika, satria sady nandray ny teny tamin-jotom-po lehibe izy ireo no nandinika ny Soratra Masina isan’andro, mba hahitany raha mifanaraka amin’izay ampianarina azy na tsia.

12 Koa betsaka tamin’izy ireo no nino, ary maro koa ny vehivavy Jentily ambony toetra sy ny lehilahy no nandray ny finoana.

13 Nony ren’ny Jody tany Tesalonika anefa fa nitory ny tenin’Andriamanitra tany Berea i Paoly, dia nankany indray izy ireo, nampitaitra sy nampitabataba ny vahoaka.

14 Niaraka tamin’izay, dia nampandehanin’ny rahalahy i Paoly hankany amoron-dranomasina, fa i Silasy sy i Timote no nijanona tao Berea.

15 Niaraka tamin’i Paoly hatrany Atena ry zareo nanatitra azy; raha efa izany dia nohafaran’i Paoly handefa an’i Silasy sy i Timote hanatona azy faingana izy ireo, dia lasa.

I Paoly tany Atenina

16 Raha mbola niandry azy ireo tany Atena i Paoly, dia nangorakoraka ny fanahiny, nahita ity tanàna feno sampy.

17 Koa dia niady hevitra tamin’ny Jody sy ny prôselita tao amin’ny sinagoga izy, ary tamin’izay tafavory tao an-kianja isan’andro.

18 Nisy filôzôfysasany tamin’ny Epikorianina sy ny Stôisianina niady hevitra taminy koa. Hoy ny sasany: «Inona re no tadiavin’io mpibedibedy io e?» Ary hoy kosa ny sasany nandre azy nitory an’i Jesoa sy ny fitsanganan’ny maty: «Toa mitory andriamani-baovao izy izany.»

19 Dia nalain’izy ireo i Paoly, ka nentiny tany amin’ny Areôpazy, nilazany hoe: «Mba azonay fantarina va re izao fampianarana vaovao lazainao izao e?

20 Fa zavatra tsy fandren’ny sofinay no lazainao; koa mba ta hahalala izay hevitr’izany izahay.»

21 Fa ny Atenianina rehetra sy ny vahiny nitoetra tao, dia tsy nandany ny andro afa-tsy tamin’ny filazana na fihainoana zava-baovao.

22 Dia nitsangana teo afovoan’i Areôpazy i Paoly ka nanao hoe:

Lahatenin’i Paoly teo amin’ny Areôpazy

«Ry lehilahy Atenianina, hitako amin’ny zavatra rehetra etoana fa olona fatra-pivavaka loatra ianareo.

23 Satria raha nandalo aho ka nijery ny zavatra ivavahanareo, dia nahita ôtely anankiray misy izao soratra izao: ‹Ho an’ny Andriamanitra tsy fantatra›. Koa izay ivavahanareo izay, nefa tsy fantatrareo no toriko aminareo:

24 Ny Andriamanitra izay nanao izao tontolo izao sy ny zavatra rehetra ao aminy no Tompon’ny lanitra sy ny tany, ka tsy mba ny tempoly nataon’ny tanan’ny olona fotsiny no itoerany.

25 Tsy mba tompoin’ny tanan’olombelona Izy, fa tsy misy toy ny hoe zavatra ilainy, fa Izy aza no manome an’izao rehetra izao ny aina sy ny fofon’aina, ary ny zavatra rehetra.

26 Avy tamin’ny olona iray no nampiaviany ny firenena rehetra, mba hamenoany mponina ny vohon’ny tany rehetra, ary Izy ihany no nametra ny taona hisiany sy ny faritany honenany avy,

27 mba hitady an’Andriamanitra izy, raha tahiny hahatsapa ka hahita Azy, na dia tsy lavitra antsika rehetra aza Izy;

28 fa ao anatiny no ivelomantsika, sy ihetsiketsehantsika, ary iainantsika, araka ny voalazan’ny mpanao tononkira sasany taminareo hoe: ‹Taranany koa isika.›

29 Koa raha taranak’Andriamanitra àry isika, dia tsy tokony hino fa ny fomban’Andriamanitra dia mitovy amin’ny volamena, na ny volafotsy, na ny vato izay nataon’ny tanana amam-pahaizan’ny olombelona.

30 Tsy nahoan’Andriamanitra ny andron’ny tsy fahalalana fahizany; fa asainy mibebaka daholo kosa ankehitriny ny olona rehetra amin’izao tontolo izao.

31 Satria Izy efa nanendry andro anankiray hitsarany an’izao tontolo izao araka ny rariny, amin’ny alalan’ny Lehilahy anankiray izay efa voatendriny sy nohamarininy mba hinoan’ny olona rehetra, tamin’ny nananganany Azy ho velona avy any amin’ny maty.»

32 Nony nandre izany hoe fitsanganan’ny maty izy ireo, dia nihomehy ny sasany, fa ny sasany kosa nanao hoe: «Mbola hihaino anao indray izahay ny amin’izany.»

33 Toy izany no nialan’i Paoly teo amin’izy ireo.

34 Nisy olona vitsivitsy nino sy nikambana taminy ihany anefa; anisan’ireo i Denis isan’ny Areôpazy, sy vehivavy anankiray atao hoe Damarisy, ary ny sasany hafa koa.

Ny niorenan’ny Fiangonana tany Kôrinty

1 Taorian’izany, dia niala tao Atenina i Paoly ka nankany Kôrinty.

2 Ary tao izy dia nahita Jody anankiray atao hoe Akilasy teraka tany Pônto, vao tonga avy tany Italia, niaraka tamin’i Prisila vadiny fa nodidian’i Klaodyhiala tany Rôma ny Jody rehetra, ka nanatona azy mivady.

3 Iray raharaha taminy izy, fa ny manao lay no raharahany, ka dia nitoetra niasa tao izy.

4 Nampianatra isan-tsabata izy tao amin’ny sinagoga ary nampanaiky ny Jody sy ny Jentily.

5 Nony tonga avy tany Masedônia i Silasy sy i Timote, dia nahery nitory teny i Paoly, ka nanamarina tamin’ny Jody fa i Jesoa no Kristy.

6 Ary noho izy notoherin’ny Jody sy notevatevainy, dia nakopany ny lambany, ka hoy izy tamin’ireo: «Aoka ho eo amin’ny lohanareo ny ranareo, fa afa-tsiny aho, ary hatramin’izao dia any amin’ny Jentily no halehako.»

7 Nony niala teo izy, dia niditra tao an-tranon’ny olona anankiray atao hoe Tito ilay Marina; lehilahy natahotra an’Andriamanitra izy io, ary nifanolotra tamin’ny sinagoga ny tranony.

8 Ary nino ny Tompo i Krisposa lehiben’ny sinagoga mbamin’ny ankohonany rehetra; ka nisy maro ny tao Kôrinty no nino sy natao Batemy koa, nony efa nihaino an’i Paoly.

9 Indray alina, dia hoy ny Tompo tamin’i Paoly tamin’ny tsindrimandry: «Aza matahotra, fa mampianara, ka aza mangina.

10 Satria momba anao Aho, ka tsy hisy olona hahazo hanisy ratsy anao, sady be ny vahoakako amin’ity tanàna ity.»

11 Dia nitoetra taoherintaona sy enim-bolana izy, nampianatra ny tenin’Andriamanitra tao.

I Paoly notorin’ny Jody tamin’ny fitsarana

12 Ary nony i Galiôna no governora tao Akaia, dia niray tetika hamely an’i Paoly ny Jody, ary nitondra azy teo amin’ny fitsarana,

13 ka nanao hoe: «Ilay ity mitaona ny olona hanaraka fombam-pivavahana mifanohitra amin’ny Lalàna.»

14 Nony niloa-bava ndeha hamaly i Paoly, dia hoy i Galiôna tamin’ny Jody: «Ry Jody, ny amin’ny ratsy natao, na ady heloka no ihainoako ny fitorianareo;

15 fa raha izay ady hevitra momba ny fampianarana sy ny anarana, ary ny lalànareo kosa, raharahanareo izany, ka tsy te hitsara an’izany aho.»

16 Dia noroahiny hiala teo amin’ny fitsarana izy ireo.

17 Tamin’izay dia nosamborin’izy rehetra i Sôstena lehiben’ny sinagoga, ka nokapohiny teo anoloan’ny fitsarana; fa tsy nahoan’i Galiôna akory izany.

Niverina tany Antiôkia i Paoly dia nanomboka ny dia fahatelo

18 Mbola nitoetra tao Kôrinto andro maromaro ihany i Paoly, vao nanao veloma ny havana iray finoana, ka niondrana nankany Siria, niaraka tamin’i Prisila sy i Akilasy, ary nohetezany tao Senkrea ny volon-dohany, fa nisy voady nataony.

19 Tonga tany Efezy izy ireo, dia nandao azy mivady i Paoly, ka niditra tao amin’ny sinagoga, niady hevitra tamin’ny Jody.

20 Nangataka azy hitoetra elaela kokoa izy ireo, nefa tsy nety izy,

21 fa nanao veloma azy ireo nanao hoe: «Mbola hiverina atỳ aminareo ihany aho raha sitrak’Andriamanitra»; dia niala tao Efezy izy;

22 ka rehefa tafatody tany Sezarea izy dia niakatra tany Jerosalema, niarahaba ny Eglizy, vao nidina nankany Antiôkia.

23 Ary nony nitoetra kelikely tao izy, dia lasa nitety ny tany Galasia sy Frijia, nankahery fo ny mpianatra rehetra.

I Apôlô

24 Ary nisy Jody anankiray atao hoe Apôlô tonga tao Efezy; teraka tany Aleksandria izy io, ary lehilahy nahay nandaha-teny sy nahalala tsara ny Soratra Masina.

25 Efa nianatra ny Lalan’ny Tompo izy, ary niteny tamin-kafanam-po, ka nampianatra tsara ny amin’i Jesoa na dia ny batemin’i Joany ihany aza no fantany.

26 Niteny tamin-kasahiana teo amin’ny sinagoga izy, ka nony ren’i Prisila sy i Akilasy, dia nalainy hankeo aminy, nampianariny tsaratsara kokoa ny Lalan’ny Tompo.

27 Naniry hankany Akaia izy, ka nankasitrahin’ny havana iray finoana izany, dia nampitondrainy taratasy izy mba handraisan’ny any azy tsara. Nony tonga tany izy, dia nahavita soa be tamin’izay efa nino noho ny fahasoavana.

28 Fa nahery nandresy lahatra ny Jody ampahibemaso izy, nampiharihary tamin’ny Soratra Masina fa i Jesoa no Kristy.

Ireo Joanita tao Efezy

1 Raha mbola tany Kôrinty i Apôlô, i Paoly kosa tonga tany Efezy rehefa nitety ny faritany ambony tany Azia. Nony nahita ny mpianatra sasany teo izy,

2 dia nanao taminy hoe: «Efa nandray ny Fanahy Masina va ianareo, fony vao nino?» Fa hoy izy ireo taminy: «Tsy mbola nandre akory aza izahay fa hoe misy Fanahy Masina.»

3 Ary hoy izy: «Batemin’iza no noraisinareo?» «Batemin’i Joany,» hoy ireo.

4 Dia hoy i Paoly: «Batemim-pibebahana no nomen’i Joany, fa Ilay ho avy ao aoriany, izany hoe i Jesoa no nambarany ho tsy maintsy hinoan’ny vahoaka.»

5 Nony nahare izany izy ireo, dia nangataka hatao Batemy amin’ny Anaran’i Jesoa Tompo;

6 ary rehefa nametrahan’i Paoly tanana indray, dia nidinan’ny Fanahy Masina, ka niteny fiteny samihafa sady naminany;

7 tokony ho roa ambin’ny folo lahy izy rehetra.

Ny niorenan’ny Fiangonana tao Efezy

8 Nony afaka izany, dia niditra tao amin’ny sinagoga i Paoly, ka niteny tamin-kasahiana, ary nampianatra telo volana nilazalaza ny momba ny fanjakan’Andriamanitra tamin’ny lahateny mandaitra.

9 Tsy nety nino anefa ny sasany fa nikiribiby, sady nanaratsy ny Lalan’ny Tompo teo anatrehan’ny vahoaka, ka nisaraka tamin’ireo i Paoly, ary navahany ny mpianatra, dia nampianariny isan’andro tao amin’ny trano fampianaran’olona atao hoe Tiranosa.

10 Roa taonano nanaovany an’izany, ka nandre ny tenin’ny Tompo avokoa izay rehetra nonina tany Azia, na Jody na Jentily.

Ireo Jody mpandroaka demony

11 Ary Andriamanitra nanao fahagagana lehibe tamin’ny alalan’i Paoly,

12 fa hatramin’ny mosara mbamin’ny fiaron’akanjo nikasika ny tenany avy no nakasika ny marary, dia nahasitrana ny aretiny, sy naharoaka ny fanahy ratsy taminy.

13 Mba nisy Jody sasany nandehandehanandroaka demony koa, niantso ny Anaran’i Jesoa Tompo teo ambonin’izay azon’ny fanahy ratsy, nanao hoe: «Izaho mandidy anareo amin’ny Anaran’i Jesoa izay torin’i Paoly.»

14 Olona fito mirahalahy, zanaky ny Jody anankiray atao hoe Sevà lehiben’ny mpisorona, no nanao izany.

15 Ary izao no navalin’ny fanahy ratsy azy ireo: «Fantatro i Jesoa, ary fantatro koa i Paoly; fa iza kosa ianareo?»

16 Dia niantoraka tamin’izy ireo ny lehilahy anankiray azon’ny demony masiaka, ka nisambotra roa lahy, sy namely azy mafy; vaky nandositra niala tamin’izany trano izany terỳ izy ireo, sady nitanjaka no naratra.

17 Ren’ny Jody sy ny Jentily rehetra nonina tao Efezy izany, ka sady raiki-tahotra izy rehetra no nankalaza ny Anaran’i Jesoa Tompo.

18 Ary betsaka tamin’izay nino no tonga niaiky sy nilaza ny nataony.

19 Maro koa tamin’ny mpamoha angatra no nitondra ny bokiny, sy nandoro azy teo anatrehan’ny olona rehetra; nony notombanana ireo boky ireo, dia hita fa vola deniedimy alina no an-kevi-bidiny.

20 Hita amin’izany fa niely fatratra sy niseho hery tokoa ny tenin’Andriamanitra.

Ny tetika asan’i Paoly

21 Taorian’izany, dia nomen’ny Fanahy Masina hevitra i Paoly hamaky an’i Masedônia sy i Akaia vao hankany Jerosalema, ka nanao anakampo hoe: «Rehefa tonga any aho, dia tsy maintsy mamangy any Rôma koa.»

22 Nirahiny hankany Masedônia ny roa lahy tamin’izay nanampy azy, dia i Timote sy i Erasta, fa izy kosa mbola nijanona tao Azia andro vitsivitsy.

Fikomian’ireo mpanefy firavaka tao Efezy

23 Ary tamin’izany andro izany, dia nisy tabataba lehibe ny amin’ny lalan’ny Tompo.

24 Fa nisy lehilahy anankiray mpanefy volafotsy atao hoe Demetriosa, nanao sarin’ny tempolin’i Diànatamin’ny volafotsy, ka vola be no azon’ny mpiasany tamin’izany.

25 Ary novoriny izy ireo mbamin’ny mpanefy hafa toa azy koa, ka nilazany hoe: «Ry sakaiza, fantatrareo fa izao taozavatra izao no iankinan’ny fiadanantsika.

26 Ary hitanareo sy renareo fa tsy eto Efezy ihany, fa saika eran’i Azia manontolo, dia mitaona olona betsaka hanary ny sampy iny Paoly iny manao hoe: ‹Tsy andriamanitra ireo nataon-tanan’olona›,

27 ka tsy ny taozavatsika ihany no atahorana hatao zava-poana, fa na hatramin’ny tempolin’i Diàna lehibe koa aza ho tonga tsinontsinona, ka ho levona ny voninahitr’izay ivavahan’i Azia manontolo sy izao tontolo izao.»

28 Tezitra mafy izy ireo nony nahare izany ka niantso hoe: «Lehibe ny Diànan’ny Efezianina!»

29 Vetivety foana dia nanerana ny tanàna ny tabataba; nindaosin’ny olona i Gaiosa sy i Aristarka avy any Masedônia izay niara-dia tamin’i Paoly, ka nimaona nankany an-trano filalaovana izy rehetra.

30 Nikasa hankao amin’ny vahoaka i Paoly, fa tsy navelan’ny mpianatra,

31 sady naniraka olona koa ny lehibe sasany sakaizany nihanta taminy mba tsy hankany an-trano filalaovana.

32 Antsoantso samihafa no re tao, fa nihorakoraka be ihany ny vahoaka, ka betsaka aza no tsy nahalala izay anton’ny nivoriany teo akory.

33 Tamin’izay, nalaina teo amin’ny vahoaka i Aleksandra, ka naroson’ny Jody. Dia nanofa tanana hampangina ny olona i Aleksandra, fa nikasa hiteny tamin’ny vahoaka.

34 Kanjo nony fantatr’izy ireo fa Jody io, dia indray niredona tokony ho ora roa izy rehetra niantso hoe: «Lehibe ny Diànan’ny Efezianina!»

35 Nony farany dia nampangina ny vahoaka ny mpanoratra, ka nanao hoe: «Ry lehilahy Efezianina, iza moa no tsy mahalala fa ny tanànan’ny Efezianina no mpitahiry an’i Diàna lehibe sy ny sariny vongana latsaka avy any an-danitra?

36 Zavatra tsy azo lavina izany, ka tokony hionona ianareo, ary aza manaonao foana,

37 fa ireo lehilahy nentinareo eto ireo dia tsy nandroba tempoly, na niteny ratsy ny andriamanibavintsika.

38 Ary raha manan-javatra hifamaliana amin’olona i Demetriosa sy ny mpanefy momba azy, dia aoka hifandahatra izy ireo, fa ao ny andro fitsarana, ao koa ireo governora.

39 Ary raha raharaha hafa no entinareo, dia azo tsaraina amin’ny fivoriana voatendrin’ny lalàna izany.

40 Fa raha ity tabataba niseho androany ity, dia misy atahorana sao ampangaina isika, satria tsy hita izay antony azontsika anamarinana izao fivoriana izao.» Nony voalazany izany, dia noravany ny olona vory teo.

Niala tao Efezy i Paoly

1 Nony nitsahatra ny tabataba, namory ny mpianatra i Paoly, ka nananatra azy, sy nanao veloma azy, dia lasa nankany Masedônia.

2 Nitety izany faritany izany izy, namporisika ny olona tamin’ny teny maro, dia lasa nankany Gresy.

3 Nitoetra telo volana tao izy, dia niomana hiondrana an-tsambo hankany Siria, kanjo nikendry azy ny Jody, ka nanapa-kevitra izy fa hamaky an’i Masedônia.

4 Ary ireto no niaraka hatrany Azia: i Sôpatera zanak’i Pirosy avy any Berea, i Aristarka sy i Sekondosy avy any Tesalonika, i Gaiosy avy any Derbe, ary i Timote sy i Tisìka sy i Trôfima avy any Azia.

5 Dia nialoha izy ireo, ka niandry anaytany Trôasy.

6 Fa izahay kosa niondrana an-tsambo, niala tao Filipy taorian’ny andron’ny Azima, ka hadimiana vao tonga tany amin’izy ireo tany Trôasy; dia nitoetra tao hafitoana izahay.

7 Ary tamin’ny andro voalohan’ny herinandro, raha niangona hamaky ny mofo izahay, dia nampianatra azy ireo i Paoly, ka nanohy ny toriteniny hatramin’ny misasaka alina, fa nikasa handeha maraina.

8 Jiro maro no tao amin’ny efitra ambony niangonanay.

9 Nisy kosa tovolahy anankiray izay atao hoe Eotìka, nipetraka teo am-baravarankely; sondriantory mafy izy io, fa naharitra ela ny toritenin’i Paoly, ka nirona izy, dia nidaboka tany ambany avy amin’ny rihana fahatelo; nony narenina izy, dia indro fa efa maty.

10 Nidina namonjy azy i Paoly, dia niondrika teo amboniny sy nanohona azy, ary nanao hoe: «Aza manana ahiahy ianareo, fa mbola misy aina ihany izy.»

11 Dia niakatra indray i Paoly, namaky ny mofo sy nihinana, ary niresaka ambara-pahamaraina ny andro, vao lasa nandeha.

12 Ilay tovolahy tamin’izay dia efa velona ka nentin’izy ireo nody tamin-kafaliana lehibe.

Tao Trôasy i Paoly, namelona olona maty

13 Izahay kosa dia niondrana an-tsambo, nialoha nankany Asôsy, fa eo no handraisanay an’i Paoly araka ny teny nomeny, satria nandeha an-tanety izy.

14 Nony tafahaona taminay tany Asôsy izy, dia noraisinay, ka lasa nankany Mitilena izahay.

15 Niondrana an-tsambo avy eo izahay, dia tonga tandrifin’i Kiô ny ampitso, ary nitody tao Samôsy ny ampitson’izay, vao tonga tany Mileto ny ampitson’iny indray.

16 Ny handalo fotsiny fa tsy hijanona ao Efezy no efa nokendren’i Paoly mba tsy hitoerany ela any Azia: satria maika hamonjy ny andron’ny Pantekôty any Jerosalema izy raha azo atao.

Avy ao Trôasy nankany Mileto

17 Raha mbola tany Mileto izy, dia naniraka hankany Efezy, nampaka an’ireo Pretran’ny Fiangonana.

18 Ka nony tafavory teo aminy izy ireo, dia hoy izy taminy: «Fantatrareo hatramin’ny andro voalohany nahatongavako teto Azia, izay toetry ny fitondran-tenako taminareo hatrany hatrany;

19 fa nanompo ny Tompo tamim-panetren-tena lehibe sy tamin-dranomaso aho, ary tamim-piaretana ny fahoriana noho ny nikendren’ny Jody ahy.

20 Tsy nisy nafeniko izay nahasoa anareo, fa notoriko taminareo sy nampianariko anareo ampahibemaso sy isan-trano.

21 Nambarako tamin’ny Jody sy tamin’ny Jentily ny fanatonana an’Andriamanitra amin’ny fibebahana sy ny finoana an’i Jesoa Tompontsika.

22 Ary ankehitriny indro teren’ny Fanahy hankany Jerosalema aho; nefa tsy fantatra izay hanjò ahy any.

23 Izao ihany no ambaran’ny Fanahy Masina amiko isan-tanàna isan-tanàna alehako, dia misy famatorana sy fanenjehana miandry ahy.

24 Tsy misy atahorako anefa izany zavatra izany; ary tsy ataoko ho zavatra ny aiko rehefa tanteraka ny diako, ka vitako ny raharaha noraisiko tamin’i Jesoa Tompo, dia ny mitory ny Evanjelin’ny fahasoavan’Andriamanitra.»

Nanaovam-beloma ny loholona avy any Efezy

25 «Eny iky, ry olona nalehako nitoriako ny fanjakan’Andriamanitra! fantatro fa tsy hahita ny tarehiko intsony ianareo rehetra.

26 Koa izany no ilazako aminareo anio fa afa-tsiny amin’ny ranareo rehetra aho,

27 satria efa nambarako avokoa fa tsy nisy nafeniko taminareo ny sitrapon’Andriamanitra rehetra.

28 Tandremo ny tenanareo sy ny ondry rehetra, nanendren’ny Fanahy Masina anareo ho mpitandrina mba hifehezanareo ny Eglizin’ny Tompo izay novidiny tamin’ny Rany.

29 Fantatro fa rehefa lasa aho, dia hisy amboadia masiaka hiditra eo aminareo, izay tsy hitsitsy ny ondry.

30 Ary ny sasany avy aminareo aza dia hitsangana hampianatra hevi-diso, ka hitaona ny mpianatra hanaraka azy.

31 Koa miambena re, ary tsarovy lahy fa telo taona maninjitra anie aho no tsy nitsahatra andro aman’alina nananatra anareo tsirairay avy, tamin-dranomaso!»

32 «Ary ankehitriny, ankiniko amin’Andriamanitra sy amin’ny tenim-pahasoavany ianareo, dia amin’Ilay mahay mandavorary sy manome lova anareo miaraka amin’Izay efa masina rehetra.

33 Tsy mba naniry izay volafotsy, na volamena, na fitafian’olona aho.

34 Fantatrareo fa ireto tanana ireto no nahazoako izay rehetra nilaiko sy nilain’izay rehetra niaraka tamiko.

35 Nasehoko anareo tamin’ny zavatra rehetra fa tsy maintsy hiasa toy izany koa ianareo mba hanampiana ny mahantra, ka hahatsiaro ny tenin’i Jesoa Tompo manao hoe: ‹Mahasambatra kokoa ny manome noho ny mandray.› »

36 Nony avy nilaza izany izy, dia nandohalika ka niara-nivavaka tamin’izy rehetra.

37 Ary nitomany mafy izy rehetra, sy namihina ny vozon’i Paoly ary nanoroka azy,

38 fa nalahelo loatra izy, indrindra ange fa tamin’ny nilazany hoe: Tsy hahita ny tarehiko intsony ianareo. Dia nanatitra azy hatreny an-tsambo izy ireo.