Category: Ekleziastika

Fanginana sy fitenenana

1 Misy anatra tsy tandrifin’ny tokony hanaovana azy,

ary misy mangina, maneho fahamalinana.

2 Aleo mananatra, toy izay mirehi-katezerana ao am-po,

ary izay mitsotra, dia hierem-patiantoka.

3 Sahala amin’ny eonòka maniry handoto zazavavy,

izay mamoaka fitsarana, manao am-bohoka fotsiny.

Endrey, mba tsara loatra raha anarina ny maneho fanenenana!

fa amin’izany no ahafahanao amin’ny fahotana iniana atao.

4 Misy miseho ho hendry, amin’ny fanginana;

ary misy tonga mahadikidiky

noho ny tsy fahalalany onony amin’ny fitenenana.

5 Misy mangina, fa tsy mahita havaly;

misy mangina fa mahalala ny fotoana mety.

6 Ny hendry mangina, mandra-pisin’ny fotoana mety;

fa ny mahery vava sy tsy mihevitra kosa, mihoatra an’izany.

7 Izay mampitombo teny, hankahalaina,

ary izay manaram-po loatra hanjary hahadikidiky.

Misy zavatra mifanohitra

8 Misy olona mahita zavatra mahasoa azy amin’ny fahoriana,

ary ny fanambinana tsy nampoizina tonga loza ho azy.

9 Misy fanomezana, tsy ahazoana ninoninona

ary misy fanomezana valiana avo sasaka.

10 Misy toe-draharaha be voninahitra, mampiditra fatiantoka;

ary misy manandratra ny lohany, avy amin’ny fietrena.

11 Misy mividy zavatra betsaka mora vidy foana,

izay mandoa izany im-pito hoatra ny vidiny.

12 Izay hendry am-pitenenana dia tiavin’ny olona,

fa very maina ny teny malefaka ataon’ny adala.

13 Tsy ahazoanao ninoninona ny fanomezan’ny adala,

satria tsy mba tokana ny masony fa maro.

14 Kely fanome izy, ary be fanadidy,

ary miloa-bava toy ny mpiantso kabary.

Anio izy mampisambotra, rahampitso izy mitaky,

maharikoriko ny olona toy izany.

15 Hoy ny adala: Tsy manan-tsakaiza aho;

ary tsy sitraky ny olona ny soa ataoko;

ratsy vava izay mihinana ny mofoko. –

16 Impiry sy olona firy akory, no manao azy ho fihomehezana!

Teny diso toerana

17 Aleo lavo amin’ny gorodona toy izay lavon’ny lela;

izany no mahatonga faingana ny faharavan’ny ratsy fanahy.

18 Ny olona mahasosotra, dia angano ivelan’ny fotoana,

tsy afaka am-bavan’ny olona ratsy taiza.

19 Tsy raisin’ny olona ny foto-kevitra aloaky ny vavan’ny adala,

satria tsy mba lazainy amin’ny fotoana mety aminy.

20 Misy tsy afa-manota, noho ny tsy fananany,

ary main’ny fitsaharany, dia tsy manam-panenenana izy.

21 Misy manary tena, noho ny henatra tsy an-drariny,

ary latsaka am-paharavana noho ny fijerin’ny adala.

22 Misy mampanantena be ny sakaizany, noho ny henatra tsy an-drariny,

ka mahatonga azy ho fahavalonymaimaim-poana.

Ny lainga

23 Manisy pentina mahamenatra amin’ny olona ny lainga:

eo am-bavan’ny olona ratsy taiza mandrakariva izy.

24 Aleo mpangalatra toy izay olona manao ny lainga ho raharahany;

samy faharavana no ho anjaran’izy roa tonta.

25 Ny fomban’ny mpandainga manala baraka;

ary ny henatry ny mpandainga, dia momba azy hatrany hatrany.

Ambony ny hendry fa mety ho azon-doza

26 Izay hendry amin’ny teniny, dia misandratra fanajana,

ary ny olona malina, mahazo sitraka amin’ny lehibe.

27 Izay miasa ny taniny hanangom-bary miavosa be,

izay mahazo sitraka amin’ny lehibe, mahazo fanalana ny hadisoany.

28 Ny fanatitra amam-panomezana, mahajamba maso ny hendry;

ary misakana ny tsiny, toy ny fehivavam-biby.

29 Fahendrena miafina, harena tsy hita:

inona no asan’izy roa ireo?

30 Aleo olona manafina ny hadalany,

toy izay olona manafina ny fahendreny.

Fahotana samihafa

1 Anaka, manota va ianao? Aza manao izany intsony.

2 Mandosira toy ny eo anatrehan’ny bibilava,

eo anatrehan’ny fahotana;

fa raha manatona azy ianao, hokaikeriny.

Nifin-diona ny nifiny,

ka mahafaty ny olombelona.

3 Tahaka ny sabatra roa lela, ny fandikan-didy rehetra,

tsy azo sitranina ny ratra afitsony.

4 Mandrava harena ny fandrahonana amam-panevatevana,

izany no naharava ny tranon’ny mpiavonavona.

5 Ny fangatahan’ny mahantra,

miakatra avy amin’ny molony ho amin’ny sofin’ny mpanana;

fa ho tonga faingana amin’ny mpiavonavona, ny fitsarana azy.

6 Izay mankahala anatra, manara-dia ny mpanota,

fa izay matahotra an’Andriamanitra mitodika Azy amin’ny fo tsotra.

7 Ny olona mahery am-bavany dia efa manambara tena mbola lavitra any;

fa ny olona manan-tsaina, mahalala raha diso izy.

8 Ny olona manao trano amin’ny vola tsy azy,

dia tahaka izay manangom-batoho amin’ny ririnina.

9 Ny andiam-pahavalo, dia tahaka ny antontan-drongony,

ka ho rembin’ny afo no hiafarany.

10 Vita ngorodom-bato ny lalan’ny mpanota,

fa ny hantsan’ny Seoly no any am-parany.

Ny hendry sy ny adala

11 Izay mitandrina ny lalàna, mamolaka ny heviny;

ary ny vokatra faran’ny fahatahorana ny Tompo, dia ny fahendrena.

12 Izay tsy ampy fahakingana tsy ho vita fianarana;

nefa misy fahakingana miteraka fahoriana be mangidy.

13 Be hoatra ny rano tondraka, ny fahaizan’ny hendry,

ary loharanon’aina ny toroheviny.

14 Toy ny vilany vaky ny fon’ny adala,

ka tsy mahatam-pahalalana, na dia iray aza.

15 Raha tsy manan-tsaina no mandre teny maneho fahendrena,

dia mankalaza izany izy, ary mampitombo azy koa aza.

Fa raha ny mpanaram-batana kosa no mandre izany, halany izany,

ary ariany any ivohony.

16 Ny lahatenin’ny adala, toy ny entana fitondra mivahiny;

fa amin’ny molotry ny manan-tsaina no misy ny mahafinaritra.

17 Ilaina eo am-piangonana, ny vavan’ny olon-kendry,

ary saintsainina ao am-po ny teniny.

18 Ny fahendrena dia trano rava ho an’ny adala,

ary ny fahaizan’ny adala, dia teny tsy mifandray akory.

19 Amin’ny adala ny fampianarana, toy ny gadra amin’ny tongotra,

sy famatorana amin’ny tanana ankavanana.

20 Ny adala mitokalakàlaka erỳ, raha mihomehy,

fa ny olon-kinga kosa mitsiky kely foana tsy re.

21 Amin’ny olona manan-tsaina

ny fampianarana sahala amin’ny firavaka volamena

sy fehi-tanana amin’ny tanana ankavanana.

22 Raha miditra an-trano, ny adala manao dia faingana,

fa ny olon-kendry kosa miahotra toa tsy sahy eo am-pidirana.

23 Ny adala miondrika hanarangarana ny ao an-trano, eo am-baravarana,

fa ny olona tsara taiza kosa, mijanona any ivelany.

24 Tsy fahaiza-miaina ho an’ny olona, ny mihaino ao am-baravarana;

ka mahatezitra ny manan-tsaina, ny asa mahamenatra toy izany.

25 Ny molotry ny adala, tsy manonona afa-tsy hadalana;

fa ny tenin’ny olon-kendry kosa, voalanja amin’ny mizana.

26 Ny fon’ny adala dia eo am-bavany,

fa ny fon’ny hendry kosa, dia ny vavany.

27 Raha manozona ny fahavalony ny ratsy fanahy,

dia manozona ny tenany ihany.

28 Mandoto tena ny mpitati-bolana,

ka ankahalain’ny olona rehetra manatona azy.

Ny kamo

1 Sahala amin’ny vato feno maloto ny kamo,

ka akorain’ny olona rehetra ny fahafaham-barakany.

2 Sahala amin’ny vongan-taim-biby ny kamo,

ka izay mandray azy manifikifi-tanana.

Ny zaza ratsy taiza

3 Ny zazalahy ratsy taiza, dia henatra ho an’ny rainy niteraka azy.

ny zazavavy torak’izany, latsaka an-tany ho fanimbana azy.

4 Ny zazavavy malina hahazo vady;

fa izay ahazoan-kenatra kosa, mampalahelo ny rainy.

5 Ny vehivavy tsy valahara, henatra ho an-drainy sy ny vadiny,

ka samy hanamavo azy izy roa tonta ireo.

6 Sahala amin’ny mozika amin’ny fisaonana,

ny lahateny tsy amin’ny fotoana,

fa ny tsora-kazo amam-pamaizana, dia fahendrena amin’ny fotoana rehetra.

Fahendrena sy hadalana

7 Ny mampianatra adala, dia mamitrana vilany tany vaky,

(milaza zavatra amin’ny tsy mihaino)

dia mamoha olona rendrika lalina amin’ny torimaso.

8 Miteny amin’ny olona matory ny miresaka amin’ny adala,

farany izy vao hanontany hoe: Ahoana hoe a?

9 Itomanio ny maty, fa tsy manam-pahazavana,

itomanio ny adala, fa tsy manan-tsaina.

Ny maty itomanio moramora, satria mahazo fitsaharana,

fa ny fiainan’ny adala no ratsy noho ny fahafatesana.

10 Ny fisaonanany maty, maharitra hafitoana;

fa ny an’ny adala sy ny mpankahala fivavahana,

mandritra ny andro iainany.

11 Aza lava resaka amin’ny adala,

ary aza miara-mandeha amin’ny olona tsy misy saina.

mitandrema tena aminy, raha tsy te-hahazo hasosorana,

dia tsy ho voaloton’ny fifandraisana aminy ianao.

Mihodivira aminy, dia hahita fitsaharana ianao,

sy tsy hahazo alahelo amin’ny fahitana ny hadalany.

12 Inona no mavesatra noho ny firaka?

ary inona no anaran-kafa azo omena azy, afa-tsy ny hoe adala?

13 Ny fasika, ny sira, ny vongam-by,

dia mora entina kokoa noho ny olona tsy manan-tsaina.

14 Ny fitambaran’ny hazon-tafo tsara rafitra,

tsy mba hosarahin’ny horohoron-tany:

toy izany ny fo miraikitra amin’ny fikasana voahevitra tsara,

tsy mba hanan-tahotra, na avy aza ny fotoana sarotra.

15 Ny fo miankina amin’ny hevi-pahendrena,

dia toy ny lalotra voaharo fasika amin’ny rindrina voalama.

16 Tsy maharitra ny rivotra ny arofanina an-tampon’ny avo,

tsy mahatoha ny tahotra toy izany koa ny fo saro-tahotra mbamin’ny fikasany.

Ny fisakaizana

17 Ny maneritery maso, mampilatsa-dranomaso;

ny maneritery fo, manetsika alahelo.

18 Ny mitora-bato ny vorona, mampandositra azy,

ny mandatsa ny sakaiza amin’ny soa natao taminy,

manapaka ny fihavanana.

19 Manatsoaka sabatra hamely ny sakaizanao va ianao?

Aza manary toky:

fa mbola mety hisy ihany ny hiverenany.

20 Niloa-bava hamely ny sakaizanao va ianao?

Aza matahotra:

mbola azo atao ny mihavana indray.

Fa raha latsa ny amin’nysoa natao kosa,

na ny eso an’avonavona;

na ny fanambaràna ny zava-miafina, na ny famelezan’ny lela mamitaka,

dia mampandositra ny sakaiza rehetra izany.

21 Aza mivadibadika amin’ny sakaizanao ao anatin’ny fahantrany,

mba hiarahanao miarana aminy, amin’ny fanambinana azy.

Aza mandao azy amin’ny andro fitsapana azy,

mba hanananao anjara amin’ny fananana ho tonga aminy.

22 Misondrotra alohan’ny afo, ny etona avy amin’ny memy sy ny setroka;

mipoaka alohan’ny fandatsahan-dra koa ny teny manala baraka.

23 Tsy hahamenatra ahy ny miaro ny sakaizako;

ary tsy hiery aho eo anatrehany.

24 Ka raha avy izay manjò ahy, amin’ny ataony,

izay handre izany dia hitandrin-tena aminy avokoa.

Mailo sy mitandrina

25 Iza no hanisy fiambenana eo amin’ny vavako,

sy fitomboka malina eo amin’ny molotro;

mba tsy ho lavo aho noho ny amin’ireo,

ka tsy ho verin’ny lelako?

1 Tompo ô, ry Ray sy Tompo tokan’ny aiko,

aza afoinao ho amin’ny hevitry ny molotro aho,

ary aza avelanao aho hahita izay hahalavo ahy eo!

2 Iza no hampahatsiaro kotopia ny hevitro,

fifehezan’ny fahendrena ny foko,

ka tsy hitsimbina ahy amin’ny hadalako,

sy tsy hamela ahy hiarana amin’ny fahotana;

3 fandrao dia mitombo ny hadalako,

sy mihamaro ny fahotako,

ka lavo eo ny fahavaloko amin’ny momba ahy.

4 Ry Tompo, Ray sy Andriamanitry ny aiko,

aza omena fanarana-maso aho,

5 ary avilio hiala amiko ny fanirian-dratsy.

6 Aoka tsy hahazo ahy, ny filan’ny nofo amam-panaranam-batana,

ary aza atolotra amin’ny fanahy tsy maotona aho.

Fianianana

7 Anaka, henoy ny fifehezan’ny vava,

fa izay hitandrina izany, tsy ho voafandrika.

8 Ho voafandriky ny molony ny mpanota,

hahita izay hahalavo azy eo, ny mpifosa sy ny mpaniratsira.

9 Aza manazatra ny vavanao hanao fianianana;

ary aza mihazatra hanonona ny Anaran’Ilay Masina.

10 Fa toy ny mpanompo asiana fampijaliana matetika

tsy mety ho afa-dratra;

toy izany izay mianiana sy manonona tsy an-kijanona

ny Anaran’ny Masina,

tsy mety ho afaka amin’ny fahotana.

11 Mampitombo ny tsy fahamarinana ny olona mahery mianiana,

ka tsy hialan-kotopia ny tranony,

raha nanao izay mahameloka azy izy dia ao aminy ny fahotany;

raha tsy ahoany izany dia avo sasaka ny fahotany.

Raha manao fianianana tsy marina izy tsy havela heloka,

fa ho tototra famaizana ny tranony.

Teny maloto

12 Misy teny miantso ny fahafatesana;

tsy hisy izany anie, eo amin’ny lovan’i Jakôba!

Lavitra ny olona tia vavaka izany rehetra izany;

tsy mba miditra amin’izany fahotana izany izy.

13 Aza manazatra ny vavanao amin’ny fomba fiteny ambany ratsy,

fa mitarika amin’ny fiteny mahameloka izany.

14 Tsarovy ny rainao sy ny reninao,

raha mitoetra eo amin’ny lehibe ianao,

fandrao raha manadino azy eo anatrehan’ireo ianao,

tonga manao hadalana, noho ny fahazarana,

ka hanjary maniry ny tsy ho nateraka akory,

sy manozona ny andro nahaterahanao.

15 Ny olona zatra amin’ny fiteny ambany ratsy foana,

tsy mba hahatratra ny fahendrena, na oviana na oviana.

Vehivavy janga

16 Roa karazana ny olona mitombo fahotana;

ary ny fahatelo miantso ny fahatezerana.

Ny olona mirehitra ny fanirian-dratsy, hoatra ny afo midedadeda,

tsy maty mandra-pahalevony.

Izay tsy madio amin’ny nofon’ny tenany,

tsy hijanona mandra-pirehitry ny afo:

17 Mamy avokoa ny hanina, amin’ny mpanaram-batana,

ka tsy hijanona izy mandra-pahafatiny.

18 Ny olona mandao ny fandrian’izy mivady,

dia manao anakampo hoe: «Iza no hahita ahy?

Ny haizina manarona, ny rindrina manakona ahy;

ary tsy misy olona mitazana ahy; ka inona no hatahorako?

Ny Avo Indrindra, tsy hahatsiaro izay fahotako akory.»

19 Tsy manan-tahotra ny mason’ny olombelona,

tsy fantany fa ny mason’ny Tompo

mamirapiratra inarivo hoatry ny masoandro,

ka voajeriny avokoa ny lalan’ny olombelona,

ary takany hatrany amin’ny fitoerana maizina.

20 Fantatry ny Tompo, talohan’ny nahariana azy, izao tontolo izao;

ary mbola fantany koa rehefa tanteraka ireny.

21 Hofaizina eny an-dalamben’ny tanàna ny mpaka vadin’olona;

ary amin’ny fotoana tsy nampoiziny akory no hahavoazany.

Tenin’ny fahendrena

22 Torak’izany koa ny vehivavy nandao ny vadiny,

sy niteraka mpandova amin’ny firaisana amin’olon-kafa.

23 Satria voalohany, nandika ny lalàn’ny Avo Indrindra izy;

manaraka izany meloka tamin’ny vadiny izy;

farany nanao fijangajangana izy,

sy niteraka zaza, avy amin’ny ran’olon-kafa.

24 Hoentina eo anatrehan’ny fiangonana izy;

ary ny famaizana hitsidika ny zanany.

25 Ny zanany tsy handatsa-paka,

ary ny sampany tsy hitondra voa.

26 Hamela fahatsiarovana voan’ny fanozonana izy;

ary ny fanalam-baraka azy, tsy ho faty na oviana na oviana.

27 Dia ho fantatr’izay ho avy any aoriana

fa tsy misy tsara noho ny fahatahorana ny Tompo;

tsy misy mamy noho ny mitandrina ny didiny.

Voninahitra lehibe ny manaraka ny Tompo;

manalava andro iainana, ny miraikitra aminy.

1 Midera ny tenany ny fahendrena,

ary manome voninahi-tena eo amin’ny vahoakany izy.

2 Miloa-bava eo amin’ny fiangonan’ny Avo Indrindra izy,

ary manome voninahi-tena eo anatrehan’ny fiandrianany, hoe:

3 «Nivoaka avy amin’ny vavan’ny Avo Indrindra aho,

ary nanarona ny tany, sahala amin’ny rahona.

4 Nonina tany amin’ny avo aho;

ary ny seza fiandrianako, dia eo an-tampon’ny andry rahona.

5 Izaho irery no nahatety ny faritra manodidina ny lanitra,

ary nitsangantsangana tany amin’ny halalin’ny hantsana.

6 Tanatin’ny onjan-dranomasina sy tambonin’ny tany rehetra,

tamin’ny vahoaka rehetra, sy tamin’ny firenena rehetra

dia nampiasa ny fahefako aho.

7 Teny amin’izy rehetra aho, nitady ny fitoerana ho fitsaharako,

sy izay tany tsy maintsy honenako.

8 Tamin’izay, nampitondra didy tamiko Ilay Mpahary ny zavatra rehetra;

ary nampijanona ny laiko Ilay nahary ahy,

ka nanao tamiko hoe: ‹Monena amin’i Jakôba,

aoka ho amin’i Israely ny lovanao.›

9 izaho dia efa noarîna hatramin’ny voalohany,

talohan’ny taona rehetra,

ary tsy hitsahatra ny ho misy aho, hatramin’ny mandrakizay.

10 Nanao ny fandraharahanateo anatrehany aho,

teo amin’ny tabernakla masina,

ka dia nanana fonenan-draikitra tao Siôna aho.

11 Nampijanona ahy toy izany koa izy tao amin’ny vohitra malala,

ka dia ao Jerosalema no fipetrahan’ny fanjakako.

12 Nandatsa-paka aho teo amin’ny vahoaka be voninahitra,

teo amin’ny anjaran’ny Tompo, teo amin’ny lovany.

13 Nisondrotra toy ny sedera eny Libàna aho,

sy tahaka ny sipresa, eny an-tendrombohitra Hermôna.

14 Nisondrotra toy ny antrendry eny amoron-drano aho,

sy tahaka ny rôzy eny Jerikao;

tahaka ny fototr’ôliva tsara eny amin’ny tany lemaka,

ary nisondrotra tahaka ny platàna.

15 Nandefa fofona manitra tahaka ny kanela sy ny ditin-kazo manitra aho,

ary nandraraka fofona mamerovero, toy ny mira voafantina,

toy ny galbanôma, ny ôniksa, ny stakta,

ary tahaka ny eton’emboka eo amin’ny tabernakla.

16 Namelatra ny rantsako toy ny terebinta aho,

ary ny sampako dia sampan’ny voninahitra amam-pahasoavana.

17 Nandefa tsiry mahafinaritra,

toy ny foto-boaloboka aho,

ary voam-boninahitra aman-karena no avy amin’ny voniko.

Renin’ny fitiavana madio, ny fahatahorana an’Andriamanitra,

ny fahaizana ary ny fanantenana masina aho.

18 Avia atỳ amiko ianareo rehetra maniry ahy,

ka mivokisa amin’ny voako ianareo.

19 Fa mamy noho ny tantely ny fahatsiarovana ahy,

ary noho ny toho-tantely, ny fananana ahy.

20 Izay mihinana ahymbola ho noana,

izay misotro ahy mbola hangetaheta.

21 Izay mihaino ahy tsy ho menatra mandrakizay,

ary na iza na iza, raha izaho no entiny miasa, tsy mba hanota.»

Ny fahendrena sy ny lalàna

22 Izany rehetra izany dia ny bokin’ny faneken’Andriamanitra Avo Indrindra, lalàna nomen’i Môizy,

ho lovan’ny fiangonan’i Jakôba.

23 Izany lalàna izany no mahatondraka ny fahendrena tahaka an’i Fisôna,

tahaka an’i Tigra, amin’ny fotoan’ny voankazo vao.

24 Mandefa onjam-pahalalana tahaka an’i Eofrata izy,

tahaka an’i Jordany amin’ny taom-pijinjana.

25 Mampiboiboika ny fahaizana, tahaka ny Onyizy;

tahaka an’i Gehôna, amin’ny fotoam-piotazam-boaloboka.

26 Ny voalohany nianatra azy, tsy nahatapitra ny fahalalana azy;

ary ny farany, tsy mbola nahatakatra azy.

27 Fa malalaka noho ny ranomasina ny sainy,

ary lalina noho ny hantsana lehibe ny fisainany.

28 Ary izaho dia nisononoka toy ny lakan-drano avy amin’ny ony,

tahaka ny tetezan-drano manondraka tanimboly mahafinaritra.

29 Hoy aho: «Hanondraka ny tanimboliko aho,

handena ny kisahasahako,

ary indro fa tonga ony ny lakan-dranoko,

tonga ranomasina ny oniko.»

30 Koa mbola maniry hampamirapiratra ny fahendrena

hoatra ny mazava atsinanana aho

sy hampahalala ny foto-kevitra any lavitra any.

31 Mbola iriko koa ny hampiely ny fampianarana,

hoatra ny faminaniana,

sy hamela azy ho lovan’ny taranaka any aoriana any.

32 Fantaro fa tsy miasa ho an’ny tenako irery aho,

fa ho an’izay rehetra mitady ny fahendrena.

Ohabolana

1 Misy zavatra telo ankasitrahiko,

sady tsara izy ireo eo anatrehan’ny Tompo sy ny olombelona:

dia ny fifanarahan’ny mpirahalahy, ny fifankatiavan’ny mpihavana,

ary ny fifanarahan’ny mpivady tsara.

2 Fa misy olona telo karazana halako,

sady tena tsy tiako fiaina mihitsy:

dia ny mahantra miavonavona, ny mpanana manambaka,

ary ny anti-panahy manaram-batana, tsy misy saina.

Ny zokiolona

3 Tsy nahangona na inona na inona ianao tamin’ny fahatanoranao,

ahoana no hanananao amin’ny fahanteranao?

4 Zavatra tsara loatra ny itsaran’ny fotsy volo araka ny mety

sy ny ahalalan’ny anti-panahy ny hevitra tsara!

5 Tandrifiny tsara ho an’ny anti-panahy ny fahendrena,

ary ho an’izay hajaina, ny fahamalinana amam-pisainana.

6 Ny fehilohan’ny anti-panahy dia ny nahitany zavatra betsaka.

Ny voninahiny, dia ny fahatahorana ny Tompo.

Ohabolana ambara amin’ny isa

7 Misy zavatra sivy tombanan’ny foko ho mahafaly,

ary ny iray fahafolo koa ankalazain’ny lelako.

Ny olona mahazo hafaliana amin’ny zanany,

izay ampy andro iainana, hahita ny faharavan’ny fahavalony.

8 Sambatra izay miara-monina amin’ny vehivavy manan-tsaina;

mbamin’izay tsy manota amin’ny lelany.

Sambatra izay nahazo sakaiza mahatoky,

mbamin’izay tsy manompo tompo tsy manendrika azy!

9 Sambatra izay mahazo fahamalinana,

sady mampianatra izany amin’ny sofina mitandrina!

10 Endrey ny halehiben’ny olona nahazo fahendrena!

kanefa tsy ambony noho izay matahotra ny Tompo izy.

11 Mihoatra noho ny zavatra rehetra ny fahatahorana ny Tompo;

zovy moa no hampitahaina amin’izay manana azy?

Ny fahatahorana ny Tompo no fiandohan’ny fitiavana Azy,

ary ny finoana no fiandohan’ny firaiketana amin’Andriamanitra.

Ny vehivavy

12 Ny fahoriana rehetra anie, fa aza ny fahorian’ny fo;

ny hasomparana rehetra anie, fa aza ny hasomparan’ny vehivavy!

13 Ny loza rehetra anie, fa aza ny loza afitsoky ny rafilahy,

ny famaliana rehetra anie, fa aza ny famalian’ny fahavalo!

14 Tsy misy poizina ratsy noho ny poizin’ny menarana;

ary tsy misy hatezerana lehibe noho ny hatezeran’ny vehivavy.

15 Aleo miara-monina amin’ny liona sy ny dragona,

toy izay miara-monina amin’ny vehivavy ratsy fanahy.

16 Manova endrika ny vehivavy ny haratsiam-panahiny,

fa manamainty ny tarehiny tahaka ny lasàka.

17 Mba mandeha mipetraka eo amin’ireo sakaizany ny lahy,

ka misento fatratra izy, mandre an’ireo!

18 Maivana ny haratsiana rehetra,

miolotra amin’ny haratsian’ny vehivavy:

aoka ny anjaran’ny mpanota hianjera aminy.

19 Sahala amin’ny fiakarana be fasika, amin’ny tongotry ny anti-panahy,

ny vehivavy basivava amin’ny vadiny bonaika.

20 Aza mety ho sodokan’izay hatsaran-tarehim-behivavy,

aoka tsy hisy vehivavy hamelom-paniriana anao.

21 Zava-mahatezitra, fahafaham-baraka aman-kenatra be vava

raha vehivavy mamonona fivelomana ho an’ny lahy.

22 Hareraham-po, endrika malahelo, fahoriam-panahy;

izany no vokatry ny vehivavy ratsy fanahy.

Tanana osa, lohalika ketraka:

izany no vokatra avy amin’ny vehivavy tsy manome hafaliana ny vadiny.

23 Vehivavy iray no niandohan’ny fahotana:

ka izy no anton’ny hahafatesantsika rehetra

24 Aza avela hanam-pivoahana ny rano,

na hanam-pahefana akory ny vehivavy ratsy.

25 Raha tsy mandeha araka izay itarihan’ny tananao azy izy,

esory ho afaka amin’ny vatanao.

1 Sambatra ny vadin’ny vehivavy tsara fanahy,

ary hampitomboina avo sasaka ny andro iainany.

2 Ny vehivavy mahery fo, dia fifalian’ny vadiny,

izay miadana amin’ny taona iainany.

3 Anjara soa ny vehivavy tsara fanahy,

ary omena ho anjaran’izay matahotra ny Tompo izy.

4 Ravoravo ny fon’ny lahy, na manan-karena izy na malahelo,

miramirana lava ny tarehiny na rahoviana na rahoviana.

5 Misy zavatra telo atahoran’ny foko,

ary ny amin’ny fahefatra dia mivavaka eo anatrehan’ny Tompo aho:

ny resaka fanaratsiana ataon’ny tanànairay manontolo;

ny fanozonan’ny be sy ny maro, ary ny fanendrikendrehana:

halako noho ny fahafatesana, ireo zavatra rehetra ireo;

6 fa ny vehivavy mpialona ny vehivavy hafa,

no dia fijaliam-po amam-pangirifiriana,

sy ny fioky ny lela mamisavisa amin’ny olon-drehetra ny anton’ny alahelony.

7 Ny vady ratsy fanahy, dia toy ny omby miray jioga tsy mifanaraka,

izay mitana azy io dia sahala amin’izay nahazo mambambohitra.

8 Zava-mahatezitra loatra, ny vehivavy manaram-po amin’ny divay,

fa tsy hanarona ny fahamenarany akory aza izy.

9 Amin’ny fijeriny tsy valahara sy amin’ny fanaovany pi-maso

no ahalalana ny hajangan’ny vehivavy.

10 Ataovy tsara fiambenana ny zazavavy maditra,

fandrao mahita ny fitsirambînanao izy,

ka hanaram-po amin’ny fahalotoana.

11 Mitandrema mba tsy hanaraka ny maso tsy mahalala henatra,

fa raha tsy izany, aza gaga raha voatariny amin’ny ota ianao.

12 Toy ny mpivahiny mangetaheta manoka-bava,

ka misotro izay rano rehetra sendra azy,

ny vehivavy janga mipetraka eo anoloan’ny tsato-kazo rehetra

sy manokatra ny fitoeran-jana-tsipìkany amin’ny zana-tsipìka.

13 Ny hasoan’ny vehivavy dia fifalian’ny vadiny,

ary ny hazavan-tsainy mandrotsaka hery amin’ny taolany.

14 Fanomezana avy amin’Andriamanitra, ny vehivavy mangina,

ary tsy misy azo oharina amin’ny vehivavy tsara taiza.

15 Fahasoavana mihoatra noho ny fahasoavana rehetra ny vehivavy maotina,

ary tsy misy rakitra soa noho ny vehivavy madio.

16 Toy ny masoandro miposaka eny amin’ny hahavon’ny Tompo,

ny famirapiratry ny hatsaran-tarehin’ny vehivavy

eo an-tranony voahaingo tsara.

17 Toy ny fanilo mirehitra eo amin’ny fanaovan-jiro masina,

ny hatsaran-tarehiny eo ambonin’ny tena ranjanana mahate-hanaja.

18 Toy ny andry volamena misy faladia volafotsy

ny tongotra tsara bika, miorina amin’ny ombalahin-tongotra mandonda.

Zavatra mampalahelo

19 Misy zavatra roa mampalahelo ny foko,

ary ny fahatelo manetsika ny fahatezerako;

ny lehilahy mpiady, miaritra ny fahantrana;

ny olona manan-tsaina, ataon’ny olona faniratsira,

izay miala amin’ny fahamarinana ho amin’ny fahotana;

omanin’ny Tompo izy, ho an’ny sabatra.

Varotra

20 Saro-misoro-kadisoana, ny olona mpivarotra;

ary tsy ialam-pahotana, ny mpivaro-divay.

1 Maro no manota hahazoam-bola;

ary izay maniry hanan-karena dia mamily ny masony.

2 Mitsofoka anelanelan’ny vato roa ny tsimatra;

miditra anatin’ny fivarotana sy fividianana toy izany koa ny ota.

3 Raha tsy miraikitra mafy amin’ny fahatahorana an’Andriamanitra ianao,

dia ho rava faingana ny tranonao.

Ny teny lazaina

4 Amin’ny fanetsiketsehana ny sivana, no ijanonan’ny faikany betsaka;

amin’ny tenin’ny olona koa, no isehoan’ny kilemany.

5 Ny memy no fizahan-toetra ny sinin’ny mpanao tanimanga;

ary ny resany kosa no fizahan-toetra ny olombelona.

6 Ny voan’ny hazo no ahafantarana ny tany aniriany;

toy izany koa ny teny maneho ny hevitry ny fon’ny olombelona.

7 Aza midera olona alohan’ny nitenenany,

fa ny teny no fizahan-toetra ny olombelona.

Ny rariny

8 Raha mikatsaka ny fahamarinana ianao, dia hahatratra azy,

ka hitafy azy toy ny akanjom-boninahitra.

9 Mivory eo amin’izay namany ny vorona;

miverina amin’izay manaraka azy, toy izany koa, ny fahamarinana.

10 Ny liona mikendry ny rembiny;

toy izany koa ny fahotana mikendry izay manao ny tsy rariny.

11 Fahendrena mandrakariva ny tenin’ny olona tia vavaka;

fa miovaova hoatra ny volana kosa, ny adala.

12 Tandremo ny fotoana raha ho any amin’ny adala ianao,

fa ny olona mieritreritra kosa dia aoka ho eo afovoany mandrakariva ianao.

13 Maharikoriko ny resaky ny adala:

mikakakaka eo amin’ny hafaliana noho ny fahotana ny hehiny.

14 Mampitsangana ny volon-doha ny fitenin’izay fatra-pianiana,

rehefa izy no mifanditra, mitampin-tsofina ny olona.

15 Mahalatsa-dra ny fifandiran’ny mpiavonavona;

ary mampalahelo ny mihaino ny famoapoàhany.

Ny tsiambaratelo

16 Very ny fitokiana an’izay manambara ny tsiambaratelo

ary tsy hahita sakaiza araka ny sitrany intsony izy.

17 Tiavo ny sakaizanao, ary aza mivadika aminy;

fa aza midodododo any aminy intsony,

raha manambara ny tsy ambaratelo avy aminy ianao.

18 Satria toy ny olona namono nahafaty ny fahavalony

no namonoanao ny fitiavan’ny namanao.

19 Ary toy ny raha navelanao handositra ny vorona teo an-tananao

no nampandosiranao ny sakaizanao, tsy hahatratra azy intsony ianao.

20 Aza manenjika azy, fa efa lasa lavitra izy,

nandositra toy ny gazela tafatsoaka tamin’ny fandrika izy.

21 Bandìna ny ratra, ary toy izany koa no hihavanana indray,

rehefa nifanala baraka;

fa raha izay nanambara ny tsy ambaratelo kosa,

dia tsy manam-panantenana intsony.

Fihatsarambelatsihy

22 Mamoron-tsy fahamarinana izay maniringiri-maso,

ary tsy misy olona afa-miala amin’izany.

23 Eo imasonao izy malefaka am-bava erỳ, migaga ny teninao;

nony avy eo anefa izy mivadika ny fiteniny,

ary ahodiny any amin’ny hevitra mamohehatra ny teninao.

24 Maro ny zavatra tsy tiako mainty, fa tsy misy tahaka io;

ary ny Tompo koa mankahala azy.

25 Izay manipy vato savoan-danitra manipy azy amin’ny lohany;

toy izany ny famelezana am-pitaka, mandratra ny mpamitaka.

26 Izay mihady lavaka no hianjera ao;

ary izay mamela-pandrika no ho voan’izany.

27 Izay manao ratsy, hahita izany ratsy izany

hanakodia ny tenany,

ary tsy ho fantany akory, izay iavian’izany aminy.

28 Ao am-bavan’ny mpiavona ny fananihaniana amam-panalam-baraka,

fa mihendry azy toy ny liona kosa ny famalian-dratsy.

29 Ho voan’ny fandrika izay mifaly amin’ny manjò ny tia vavaka,

ary ho levon’ny fijaliana alohan’ny hahafatesany izy.

Lolom-po

30 Mendrika hankahalaina koa ny lolom-po amam-pahatezerana,

ary manana izany ny mpanota.

1 Izay mamaly ratsy, dia hiharan’ny fanahin’Andriamanitra,

izay hitahiry fatratra ny fahotany.

2 Avelao ny nataon’ny namana tsy an-drariny,

dia havela ny fahotanao, rehefa mifona ianao.

3 Akory ity olona mitahiry fahatezerana amin’ny olon-kafa,

nefa mangataka fanasitranana amin’Andriamanitra ho an’ny tenany.

4 Tsy mamindra fo amin’ny olombelona namany izy,

nefa mitaraina noho ny hadisoan’ny tenany.

5 Izy izay nofo foana mitahiry lolom-po;

ka zovy indray no hahazo ny famelana ny fahotany?

6 Tsarovy ny hiafaranao, ka atsaharo ny fankahalana;

tsarovy ny hahalòvana amam-pahafatesana ary tandremo ny didy.

7 Tsarovy ny didy, ka aza manao an-dolompo amin’ny namana;

tsarovy ny faneken’ny Avo Indrindra

ary modia tsy mahita ny fanevatevana anao.

Fifandirana

8 Mijanòna any lavitry ny fifandirana,

dia ho vitsy kokoa ny fahotanao,

fa mampirehitra ny fifandirana ny olona saro-po,

9 ary manisy fikorontanana eo amin’ny mpisakaiza ny mpanota;

sady manipy fanendrikendrehana amin’izay miadam-piainana.

10 Arakaraka ny zavatra amelomana azy no firehitry ny afo;

arakaraka ny fahefana ananany koa no firehitry ny hatezeran’ny olona:

mampisondrotra ny hatezerany araka ny hareny izy,

ka mirehitra araka ny hamafin’ny fifandirana izany.

11 Ny fifandirana malaky mampirehitra ny afo;

ary ny ady vava tsy voahevitra, mahalatsa-dra.

12 Ny pik’afo, raha tsofina izy, dia mirehitra;

raha roranao izy dia maty;

samy avy ao am-bavanao ihany ireo zavatra roa ireo.

Ny lela

13 Ozony ny mpitati-bolana sy ny olona miroa lela,

fa loza ho an’ny maro niaina tamim-piadanana izy.

14 Namarina olona maro be ny lela mpanendrikendrika;

ka nasesiny hifindrafindra firenena izy ireny.

Ny tanàna mimanda narodany;

ny lapan’ny lehibe nazerany amin’ny tany.

15 Nampandroaka vehivavy mahery fo

ny lela mpanendrikendrika,

ary nanendaka ny vokatry ny asany taminy.

16 Izay manongilan-tsofina aminy,

tsy hahita fitsaharana intsony,

ary tsy hanam-piadanana eo amin’ny tranony intsony.

17 Ny famelezan’ny tsora-kazo mahamangana;

ny famelezan’ny lela mahavakivaky ny taolana.

18 Betsaka no matin’ny lelan-tsabatra;

fa tsy betsaka tahaka ny matin’ny lela.

19 Sambatra izay voaaro amin’izany,

tsy voatolotra amin’ny fisafoahany,

tsy nitondra ny jiogany,

ary tsy voafatotry ny famatorany.

20 Fa jioga vy ny jiogany;

ary famatorana varahina ny famatorany.

21 Fahafatesana mahatsiravina ny fahafatesana afitsony,

ka aleo ny Seoly toy izay izany.

22 Ny olona tia vavaka, tsy mba hananany fahefana

ka tsy mba main’ny lelafony.

23 Izay mahafoy ny Tompo, no ho latsaka eo aminy,

ka handevona azy izy mirehitra tsy mety maty.

24 Koa hodidino fefy tsilo ny taninao,

fehezo an-dasàka ny volamena sy volafotsinao,

25 ary manaova mizana sy vato handanjanao ny teninao,

ary manaova hidy amam-baravarana ho an’ny vavanao.

26 Mitandrema mba tsy hanota amin’ny lela,

fandrao dia lavo eo imason’izay mihendry anao ianao.

Ny mampisambotra

1 Manao fiantrana izay mampisambotra ny namany;

ary mitandrina ny didy izay manohana azy amin’ny tanany.

2 Mampisambora ny namanao raha poritra izy;

ary ianao kosa mamerena amin’ny namanao, raha tonga ny fotoana.

3 Tano ny teninao, ary manaova amin’ny ara-dalàna,

dia hahazo izay ilainao na amin’ny fotoana inona na amin’ny fotoana inona.

4 Maro no manao ny zavatra nampisamborina azy,

ho toa zavatra hitany,

ka miteraka fahasahiranana ho an’izay nanampy azy.

5 Mandra-pandrain’ny olona dia orohany ny tanan’ny namany,

ankalazainy amin’ny feo manetry tena ny hareny.

Kanjo nony tonga ny fotoana hamerenany dia mangataka andro ny olona,

teny fitarainana foana no averiny,

ary ny andro sarotra no omeny tsiny.

6 Raha manan-kaloa ny olona

dia zara raha mandray ny antsasany ny mpampisambotra,

dia hihevitra azy ho nahazo zavatra tsy nampoizina.

Raha tsy manan-kaloa indray ny olona dia tsy azony ny volany,

ary ampanjariany tsy fidiny ho fahavalony ilay nasiany soa,

izay mandoa sahato amam-panevatevana aminy,

sy mamerina fanalam-baraka ho solom-boninahitra.

7 Be no mandà tsy hampisambotra, noho ny haratsian’ny olona;

matahotra ny hahaverezan’ny volany maimaim-poana izy.

Fiantrana

8 Nefa aoka ho antra ny ory ianao;

ary aza avela hiandry ny fiantrana omenao azy izy.

9 Mamonje ny mahantra, noho ny didin’Andriamanitra,

ary aza mandefa azy mitondra tanam-polo, noho ny fahoriany.

10 Maneke hanary vola, hanasoavana ny rahalahy aman-tsakaizanao,

fa aza avela ho harafesina foana ao ambany vato izy.

11 Ampiasao ny rakitrao, araka ny didin’ny Avo Indrindra,

dia hahazoanao soa mihoatra noho ny volamena izy.

12 Hidio ao an’efitranonao ny hataonao fiantrana,

fa hamonjy anao amin’ny fahorianao rehetra izany.

13 Mihoatra noho ny ampinga mafy, sy ny lefona mahery,

no hiadiany hiaro anao, eo anoloan’ny fahavalo.

Antoka omena

14 Ny olona tsara fo miantoka ny namany,

fa izay efa lany henatra ihany no mahafoy azy.

15 Aza manadino ny hatsaram-pon’izay niantoka,

fa namehy tena ho anao izy.

16 Mahavery ny hareny rehetra, amin’ny mpiantoka azy, ny mpanota;

ary mahafoy ny mpamonjy azy ny tsy mpankasitraka.

17 Nampiditra faty antoka tamin’olo-miadana maro, ny antoka nomena,

ary nampivezimbezina azy, hoatra ny alon-dranomasina.

18 Nataony sesitany ireo olona nanam-pahefana,

ka heriny mirenireny, any amin’ny firenen-kafa.

19 Mora manaiky hiantoka ny mpanota,

ary hiharan’ny hamafin’ny fitsarana ny fatra-pitady tombony.

20 Manampia ny namana, araka ny azonao atao,

ary mitandrema, mba tsy ho latsaka amin’ny fahoriana ianao.

Mampiantrano vahiny

21 Ny zavatra voalohany amin’ny fivelomana,

dia ny rano sy ny mofo,

ary ny fitafiana aman-trano hanaronana ny fitanjahana.

22 Aleo ny fiveloman’ny mahantra ao ambany tafon-trano hazo,

toy izay nahandro mandany be, any an-tranon’olon-kafa.

23 Mifalia, na kely na be anananao:

dia tsy handre anao esoina ho vahiny ianao.

24 Fiainana mampiferin’aina ny mitety trano mby eny, mby eny;

any amin’izay handraisana anao ho vahiny,

tsy sahy misoka-bava akory.

25 Hanome hanina amam-pisotro ny mpampiantrano anao ianao,

na tsy ankasitrahana anao aza izany,

ary handre teny maharary koa indray aza ianao ho fanampiny.

26 Avia, ry vahiny, amboary ny fihinanana,

ary raha manan-javatra ianao, omeo aho hohaniko.

27 Mandehana any, ry vahiny, ialao ity hanim-be ity;

handray ny rahalahiko aho, ilaiko ny tranoko.

28 Mafy amin’ny olona manan-tsaina,

ny mandre latsa amin’ny fampiantranoana azy,

sy tevatevain’izay ananany trosa.