Category: Ekleziastika

Ory ny olombelona

1 Ny olona rehetra dia voadidy hiharam-pahoriana lehibe;

ary jioga mavesatra no manindry ny zanak’olombelona,

hatramin’ny andro nivoahany tao an-kibon-dreniny,

ka hatramin’ny andro handevenana azy ao an-kibon’ny reny iombonany.

2 Ny manabataba ny hevitr’izy ireo sy mampatahotra ny fony

dia ny fiheverana ny zavatra ampoiziny, ny tahotra ny fahafatesana.

3 Hatramin’ny olona mipetraka eo amin’ny seza fiandrianana ao amin’ny voninahitra

ka hatramin’ny ory mipetraka amin’ny tany sy eo ambony lavenona;

4 hatramin’izay mitafy sy manao satroboninahitra,

ka hatramin’ny fadiranovana mitafy vorokitsay,

5 dia samy azon’ny hatezerana, fialonana, fitabatabana, tebiteby,

fahatahorana ny fahafatesana, hasarotam-po amam-pifandirana:

ary amin’ny fotoana ialana sasatra eo am-pandriana aza,

korontanin’ny torimaso amin’ny alina ny heviny.

6 Vao miala sasatra kely, tsy ampy toy inona akory izy,

dia kotranin’ny nofy miaraka amin’izay:

mihevitra azy ho mandry tsy aman’afo amin’ny antoandro izy,

ary tsiravina amin’ny fahitan’ny sainy,

mova tsy ny olona mandositra raha hiady.

7 Amin’ny fotoanaahafahany dia tafafoha izy,

ka gaga noho ny tahotahony foana.

8 Toy izany no manjò ny nofo rehetra,

hatramin’ny olombelona ka hatramin’ny biby,

ary ny an’ny mpanota aza mbola mihoatra im-pito noho izany.

9 Ny pesta, ny vonoana olona, ny tsy fifanarahana, ny sabatra,

ny antambo, ny mosary, ny fandringanana mbamin’ny loza hafa,

10 dia noarîna hamely ny mpanota avokoa,

ary ny amin’izy ireo koa no nahatongavan’ny safodrano.

11 Izay rehetra avy amin’ny tany dia miverina amin’ny tany;

toy ny iverenan’izay avy amin’ny rano ho any amin’ny ranomasina.

Teny fandinika samihafa

12 Ny fanatitra aman-karena rehetra azo tsy an-drariny, ho levona,

fa ny hitsim-po haharitra mandrakizay.

13 Ny haren’ny tsy marina, ho ritra tahaka ny riaka;

sy toy ny kotrokorana mafy, manakoako mandritra ny orana.

14 Hifaly ny olona mahalala malala-tanana,

fa hiharam-pahoriana tanteraka kosa ny mpivadika.

15 Ny taranaky ny ratsy, tsy mba mitsimoka sampana maro;

ary ny faka maloto dia eo ambony vatolampy mideza.

16 Ny volotara maniry eo akaikin’ny rano sy amoron’ny ony,

no ongotana alohan’ny zava-maitso hafa rehetra.

17 Ny fanirian-tsoa dia toy ny saha voatahy,

ary ny fanaovan-tsoa mitoetra mandrakizay.

Teny fandinika

18 Mamy ny fiainan’ny olona mahavita tena sy ny mpiasa:

fa mamy noho izy roa tonta ireo ny fiainan’izay mahita rakitra.

19 Ny zanaka maro sy ny fanorenan-tanàna mampaharitra anarana,

tombanana mihoatra azy roa tonta ireo anefa ny vehivavy tsy misy tsiny.

20 Mahafaly ny fo ny divay sy ny zava-maneno,

fa mihoatra noho izy roa tonta indray ny fitiavana ny fahendrena.

21 Andrenesana feo manga ny sodina sy ny harpa:

fa mihoatra noho izy roa tonta ireo ny vava maniry soa.

22 Hafinaretan’ny masonao ny hasoam-bika sy ny hatsaran-tarehy,

fa mihoatra noho izy roa tonta ireo, ny zava-maitso eny an-tsaha.

23 Tafahaona indraindray ny sakaiza sy ny namany,

fa mihoatra noho izy roa indray ny vehivavy sy ny vadiny.

24 Ny rahalahy sy ny vonjy dia ho an’ny andro mahory,

fa manafaka mihoatra noho izy ireo indray ny asam-pitiavana.

25 Ny volamena sy ny volafotsy mahamatotra ny fandeha,

fa ny fahamalinana atao, ambony mihoatra noho ireo.

26 Ny harena aman-kerim-po manandratra ny fo,

fa ny fahatahorana ny Tompo no ambony noho ireo.

tsy manan-java-mahory ny olona raha eo aminy ny tahotra ny Tompo;

raha eo Izy tsy mila izay hiantso vonjy akory.

27 Toy ny zaridaina voatahy ny fahatahorana ny Tompo;

ary noravahan’ny Tompo voninahitra tsy misy toa azy izy.

Mpangataka

28 Anaka, enga anie ka tsy ho velon-kangataka ianao;

aleo maty toy izay mangataka.

29 Raha misy olona tafalatsaka hanandrandra ny fihinanan’ny sasany,

tsy azo isaina ho fiainana akory ny fiainany.

Fa mandoto ny fanahiny amin’ny hanin’olon-kafa izy,

nefa zavatra hofadin’ny olona mahita fianarana sy tsara taiza izany.

30 Eo am-bavan’ny olona tsy manan-kenatra, mahafinaritra ny mangataka;

nefa mandoro hoatra ny afo ao an-kibony.

Fahafatesana

1 Akory ity hangidin’ny fahatsiarovana anao, ry fahafatesana,

ho an’ny velona am-piadanana ao anatin’ny hareny;

ho an’ny olona afaka ahiahy, sy ambinina amin’ny zavatra rehetra;

sady mbola afa-mankafy ny hafaliana amin’ny fihinanana.

2 Ry fahafatesana ô, mahafinaritra ny fanapahanao,

ho an’ny tsy manana, ho an’izay efa lany hery,

ho an’ny antitra efa vesaran’ny taona sy sahiran’ny ahiahy tsy hita isa,

ho an’ny tsy mionona amin’ny anjarany sy manary toky.

3 Aza matahotra ny fanapahan’ny fahafatesana:

tsarovy ireo mialoha anao, sy izay ho avy any aoriana any.

4 Fanapahana nahatran’ny Tompo amin’ny nofo rehetra izany;

ary haninona ianao no hiodina amin’ny sitrapon’ny Avo Indrindra?

na velona folo taona ianao, na zato taona, na arivo taona;

any amin’ny Seolymampaninona izay halavan’ny andro niainana.

Ny hanjò ny ratsy fanahy

5 Zanaka ratsy loatra ny zanaky ny mpanota,

izay miantrano matetika any amin’ny fonenan’ny mpankahala fivavahana.

6 Ho rava no alehan’ny lovan’ny zanaky ny mpanota,

ary fahafaham-baraka no miraikitra amin’ny taranany.

7 Faniratsirana no atolotry ny zanaka ny ray mpankahala fivavahana,

satria noho io ihany no nilatsahany amin’ny fahafaham-baraka.

8 Loza ho anareo, ry olona mpankahala fivavahana,

izay mahafoy ny lalàn’Andriamanitra Avo Indrindra!

9 Amin’ny nahaterahanareo, dia teraka ho an’ny fanozonana ianareo,

ary amin’ny fahafatesanareo, dia ny fanozonana no ho anjaranareo.

10 Izay rehetra avy amin’ny tany dia miverina amin’ny tany;

toy izany koa ny mpankahala fivavahana avy amin’ny fanozonana,

ka mankany amin’ny faharavana.

Henatra

11 Malahelo ny olona noho ny amin’ny vatany,

fa ny anara-maharikorikon’ny mpanota ho foana.

12 Tandremo tsara ny anaranao, fa haharitra ho anao izany

mihoatra noho ny rakitra volamena lehibe an’arivony.

13 Ny andro iainana amim-piadanana azo isaina,

fa ny anarana soa kosa maharitra mandrakizay.

14 Anaka, tandremo amim-piadanana ny fampianarako:

Fahendrena afenina, rakitra tsy hita;

Inona no ho asan’izy ireo?

15 Aleo olona manafina ny hadalany,

toy izay olona manafina ny fahendreny.

16 Koa manàna henatra amin’ny zavatra holazaiko izao.

fa tsy tsara ho fitahiry avokoa ny henatra rehetra,

ary tsy tsarain’ny olona araka ny marina avokoa ny zavatra rehetra.

17 Manàna henatra ny amin’ny fijangajangana,

eo anatrehan’ny ray aman-dreninao,

ary ny amin’ny lainga eo anatrehan’ny mpanapaka sy ny manam-pahefana;

18 ny amin’ny heloka eo anatrehan’ny mpitsara sy ny mpifehy,

ny amin’ny fandikana ny lalàna, eo anatrehan’ny fiangonana sy ny vahoaka;

ny amin’ny tsy fahamarinana, eo anatrehan’ny namana aman-tsakaiza;

ny amin’ny halatra eo anatrehan’ny tany ama-monina.

19 Amin’ny anaran’ny fahamarinan’Andriamanitra sy ny fanekeny,

ataovy henatra ny mitehin-kiho eo ambonin’ny mofo;

ny mihatsy eso amin’ny fandraisana amam-panomezana;

20 ny mangina eo anatrehan’izay miarahaba anao;

ny mijery vehivavy janga;

21 ny mampiamboho ny tavanao amin’ny havana;

ny maka ny anjarany sy ny fanomezana azy,

ary ny mitily vehivavy manam-bady;

22 ny mivarilena amin’ny ankizy vavinao,

ka aza mijanona eo akaikin’ny fandriany;

aoka ho menatra ny manao teny maharary eo anatrehan’ny sakaizanao ianao

ary aza mandatsa rehefa avy nanome.

1 Aoka ho menatra ny manambara ny zavatra renao ianao,

sy milaza ny zavatra miafina.

Dia hanan-karena marina ianao amin’izay,

ary hahazo sitraka eo anatrehan’ny olona rehetra.

2 Aza menatra amin’ireto zavatra ireto,

ary aza resin-kenatra olona, ka manao fahotana:

Aza menatra ny lalàn’ny Avo Indrindrasy ny fanekeny,

ny teny fanamarinana ny mpankahala fivavahana,

3 ny miresaka amin’ny namana sy ny mpandalo,

ny manome soa kely ny sakaizanao,

4 ny mampiasa mizana marina sy vato marina,

ny hahazo be na kely,

5 ny tsy mifidifidy olona amin’ny varotra sy amin’ny mpivarotra,

ny mamay mafy ny zanakao,

ny mikapoka hatramin’ny manao loa-dra, ny mpanompo ratsy fanahy.

6 Amin’ny vehivavy ratsy fanahy, mety ny fitomboka,

ary rehefa misy ny tana-maro, hidio am-panalahidy ny zavatra.

7 Isao sy lanjao izay atolotrao ny olonao;

ary ataovy an-tsoratra izay omenao sy izay raisinao.

8 Aza menatra ny mananatra ny adala sy ny ketrina,

mbamin’ny anti-panahy mifanditra amin’ny zatovo.

Dia ho tena vita fianarana tokoa ianao amin’izany,

sady hankatoavin’ny olona rehetra.

Mampitebiteby ray ny zanaka vavy

9 Ahiahy takona mahazo ny rainy ny zazavavy,

ary tsy ahitany torimaso ny fiahiany azy;

raha mipetraka ho mpitovo izy sao hihoatra ny taonan’ny fahatanorany,

raha tafakambana amin’ny vadiny, sao halan-dralehilahy;

10 mbola virjiny izy, mety ho voakojikojy,

ka hanana anaka ao an-tranon-drainy;

manam-bady indray sao hivadika amin’ny lalàm-panambadiana;

miara-mipetraka aminy izy sao hitoetra ho momba.

11 Amin’ny zazavavy maditra manaova fitandremana mafy,

fandrao ianao ataony fihomehezan’ny fahavalonao,

fanoharan’ny ao an-tanàna, ambetin-dresaky ny vahoaka,

ary alany baraka eo afovoan’ny vahoaka rehetra.

Ny vehivavy

12 Aza ataonao zavatra loatra rehefa mety ho olona tsara tarehy,

ary aza mipetraka eo amin’ny vehivavy;

13 fa ny fitafiana no ivoahan’ny kalalao,

ary ny vehivavy kosa, ny haratsiam-behivavy.

14 Aleo lehilahyratsy fanahy toy izay vehivavy mpanejokejo,

fa mahasafo-kenatra sy mahafa-baraka ny vehivavy.

1. EO AMIN’NY ZAVA-BOAARY

15 Hotsahiviko izao ny asan’ny Tompo,

ary hotoriko izay hitako.

Ny tenin’ny Tompono nahavitana ny asany rehetra.

16 Ny masoandro izay manazava azy ireo dia mibanjina azy rehetra,

asan’ny Tompo, feno ny voninahiny izy.

17 Ny olo-masinydia tsy nataon’ny Tompo mahavatra

ny mitory ny zava-mahagaga rehetra vitany,

izay naorin’ny Tompo Tsitoha mafy,

mba ho mafy orina izao tontolo izao amin’ny voninahiny.

18 Tsapainy ny halalin’ny ranomasina sy ny fon’ny olombelona;

ary fantany ny heviny saro-pantarina indrindra.

Fa manana ny fahalalana rehetra ny Tompo;

ary hitany ny famantaram-potoana.

19 Manambara ny lasa sy ny ho avy Izy,

ary mampiharihary ny dian’ny zava-miafina.

20 Tsy misy hevitra miafina aminy,

tsy misy teny takona azy.

21 Noravahany ny asa lehiben’ny fahendreny:

talohan’ny taona rehetra Izy, ary haharitra mandrakizay;

tsy nampiana na inona na inona ny tenany,

tsy nanesorana na inona na inona,

ary tsy nila mpanolo-tsaina na iza na iza Izy.

22 Endrey, ny hatsaran-tarehin’ny asany rehetra!

ary ilay banjinin’ny olona amin’ireny anefa dia kilalaon’afo fotsiny.

23 Velona daholo ny zavatra rehetra ary maharitra mandrakizay,

ho amin’izay rehetra ilana azy;

ary manaiky ny Mpahary ny zavatra rehetra.

24 Mikambana tsiroaroaavy izy,

ny iray tandrifin’ny iray,

ary tsy nisy nataony mankamin’ny faharavana.

25 Fa ny anankiray dia antoky ny fahasambaran’ny anankiray:

iza no mety ho afa-po amin’ny fijerena ny voninahitry ny Tompo?

Ny masoandro

1 Ny reharehan’ny havoana,

dia ny habakabaka amin’ny famirapiratany madio;

ary ny endriky ny lanitra dia fahitam-boninahitra.

2 Ny masoandro, raha mipoaka izy,

mankalaza ny Tompo amin’ny fiposahany;

zava-boaary mahagaga izy, asan’ny Tompo Avo Indrindra.

3 Mitatao vovonana izy, manamaina ny tany;

iza no mahatanty ny firehitry ny hafanàny?

4 Mamelona ny afon’ny memy ny mpiasa amin’ny asa ataony;

fa manafana ny tendrombohitra intelo mihoatra noho izany ny masoandro.

Mampirehitra ny etona amin’ny rivotra izy;

ary mampanjambena ny maso, rehefa mamirapiratra ny tsirim-pahazavany!

5 Lehibe ny Tompo nanao azy,

ary didiny no ihazakazahany amin’ny fandehany.

Ny volana

6 Ny volana koa, manaraka mandrakariva ny ora voatendry ho azy,

ka manondro ny fotoana amin’ny taona, sy manambara ny ho avy.

7 Ny volana no famantarana ny fotoan’ny fety;

mihena ny fahazavany, rehefa fenomanana izy.

8 Avy aminy no ahazoan’ny volana ny anarany,

mahagaga ny fitombony, amin’ny fiovaovany samihafa.

Izy no lain’ny toby eny amin’ny havoan’ny lanitra,

mamirapiratra eny amin’ny habakabaky ny lanitra izy.

Ny kintana

9 Ny hatsaran-tarehin’ny lanitra dia ny famirapiratan’ny kintana,

haingo mamirapiratra eny amin’ny havoan’ny Tompo.

10 Maharitra amin’ny filaharany ireny, araka ny didin’ny Masina,

ary tsy sasatry ny fiaretany tory izy.

Ny avana

11 Jereo ny avana, ka isaory Ilay nanao azy,

fatratra ny hatsaran-tarehiny, amin’ny famirapiratany.

12 Mandrefy ny lanitra, amin’ny faribolany mamirapiratra izy;

ny tanan’ny Avo Indrindra no nanenjana azy.

Ireo zava-mahagaga eo amin’ny voaary

13 Noho ny didiny no irotsahan’ny oram-panala,

sy mihamateti-piavy ny hela-baratra, mpanatanteraka ny fitsaràny.

14 Noho izany misokatra ny firaketany,

ary manidina toy ny vorona ny rahona.

15 Noho ny fahefany, dia omeny hery ny rahona,

ary milatsaka toy ny sila-bato ny havandra.

16 Mampihorohoro ny tany ny feon’ny kotrok’orana,

ary raha miseho izy, dia mihozongozona ny tendrombohitra.

17 Amin’ny sitrapony no itsofan’ny rivotra avy atsimo,

ifofofofoan’ny rivotra avy avaratra sy isafoahan’ny tadio.

mandatsaka oram-panala, toy ny vorona mirotsaka amin’ny tany izy;

dia midina toy ny andiam-balala mipetraka izany.

18 Ka ny maso migaga ny hatsaran’ny hafotsiany,

ary ny fo talanjona amin’ny fivarimbariny.

19 Mandatsaka ny fanala toy ny sira amin’ny tany izy,

dia hamafisin’ny hatsiaka, ho toy ny tsilo maranitra izy.

20 Rehefa mifofofofo ny rivotra mangatsiaka avy avaratra,

mihamafy ho ranomandry ny rano;

ka mivelatra tsy mihetsika manarona ny rano miangona izany ranomandry izany

ary manamafy ny rano toy ny akanjo fiarovan-tratra.

21 Mandevina ny tendrombohitra sy mandoro ny efitra ny Tompo,

ary mandrehitra ny zava-maitso, toy ny afo.

22 Izany loza rehetra izany dia ny rahona tamy faingana no fanafodiny aminy,

ny ando tonga no mampionona ny olona amin’ny hafanana mahamay.

23 Nofolahiny ny hantsanaaraka ny hevitra nokasainy,

ary namboleny eny ny nosy.

24 Tantarain’ireo mandeha ambony ranomasina ny zava-mahatahotra eny,

ka talanjona foana isika mandre ny fitantarany azy.

25 Fa ao no misy ny zava-boaary hafahafa sy mahagaga,

dia biby isan-karazany, sy karazam-bibiben-dranomasina.

26 Noho ny Tompo no izoran’ny zavatra rehetra tsara ho amin’izay hiafarany,

ary ny teniny no aharetan’ny zavatra rehetra.

27 Mahazo milaza be izahay, kanefa tsy hahatakatra azy,

fa izao ihany no ventin-teninay: Izy no zavatra rehetra.

28 Raha te hidera Azy izahay dia aiza no hahitanay hery hanaovana izany?

Mahefa ny zavatra rehetra Izy, ary ambony noho ny asany rehetra.

29 Ny Tompo dia mahatahotra, lehibe indrindra,

ary mahagaga ny fahefany.

30 Amin’ny fiderana ny Tompo, ankalazao araka izay azonao atao Izy,

fa mbola ambonimbony kokoa mandrakariva.

Mba hankalaza Azy angony avokoa ny herinareo,

ary aza miketraka, fa tsy hahatakatra Azy ianareo.

31 Iza no nahita Azy, ka hahalaza Azy?

Zovy no afa-midera Azy, araka ny tena izy?

32 Mbola betsaka no lehibe kokoa aza ny zava-mahagaga miafina,

satria zava-bitsy foana no hitantsika amin’ny asany.

33 Ny Tompo no nanao ny zavatra rehetra;

ary manome ny fahendrena ho an’ny olona tia vavaka Izy.

2. EO AMIN’NY TANTARA (1Mak 2,51-64; Heb 11)

Fiderana ireo razana malaza

1 Ataovintsika izao ny fiderana ny olo-malaza,

sy ny razan’ny karazantsika.

2 Nanao zava-mahagaga be voninahitra amin’izy ireo ny Tompo;

naneho ny fahalehibeazany hatramin’ny voalohany Izy.

3 Izy ireo dia mpanjaka teo amin’ny fanjakany;

lehilahy malaza noho ny fahefany,

mpanolo-tsaina feno fahendrena,

manambara ny sitrapon’Andriamanitra tamin’ny faminaniany;

4 Mpitarika ny vahoaka tamin’ny toroheviny amam-pahamalinany,

mpampianatra ny vahoaka, nanoro azy tamin’ny teny maneho fahendrena;

5 olona nianatra ny fahaiza-mamoron-kira masina,

sady nandatsaka an-tsoratra tantara mirindra;

6 mpanan-karena, nanam-pananana be,

nonina tao an-tranony tamim-piadanana:

7 Izany olona rehetra izany dia nohajain’ny niara-belona taminy,

samy voninahitry ny fotoana niainany avokoa.

8 Ny sasany tamin’izy ireo, namela anarana,

ka azo atao ny mitantara ny fiderana azy.

9 Ny sasany kosa dia tsy misy ahatsiarovana azy intsony;

fa levona toy ny tsy nisy akory;

nanjary toy ny tsy teraka akory,

ary toy izany koa ny zanany nanaraka azy.

10 Ireo voalohany dia olona tia vavaka,

ka tsy hadino ny hatsaram-panahiny.

11 Raikitra ho anjaran’ny taranany ny hasambarana

ary misy lova azo antoka ho an’ny zanany.

12 Maharitra tsy mivadika amin’ny fanekena ny taranany;

mbamin’ny zanany koa noho ny amin’izy ireo.

13 Maharitra mandrakizay ny taranany,

ary tsy ho levona na oviana na oviana ny voninahiny.

14 Ny vatany nalevina tamim-piadanana

ary ny anarany velona amin’ny taona mifandimby.

15 Ny vahoaka mankalaza ny fahendreny;

ary ny fiangonana mitory fiderana azy.

I Enôka

16 Sitraky ny Tompo i Enôka ka nafindra;

ohatra amin’ny fivalozana, ho an’ny taranaka.

I Nôe

17 Hita fa lavorary sady marina i Nôe;

izy no avotra ho an’ny olombelonatamin’ny andron’ny fahatezerana,

hany ka mbola nisy sisa tavela tamin’ny tany,

tamin’ny nahatongavan’ny safodrano.

18 Nisy fanekena mandrakizay natao taminy,

mba tsy handringana ny nofo rehetra amin’ny safodrano intsony.

I Abrahama

19 Raza-malazan’ny firenena maroi Abrahama,

ary tsy nisy olona nitovy voninahitra taminy.

20 Nitandrina ny lalàn’ny Avo Indrindra izy,

ary nanao fanekena taminy.

Naoriny tamin’ny nofonyizany fanekena izany;

ary niseho ho mahatoky izy tamin’ny fizahan-toetraazy.

21 Ka dia nanome toky azy tamim-pianianana Andriamanitra

fa amin’ny taranany no hitahiana ny firenena;

nomeny toky fa hohamaroiny toy ny vovoky ny tany izy

sy hasandrany toy ny kintana ny taranany,

ary homeny ho lovany ny hatramin’ny ranomasina ka hatramin’ny ranomasina,

hatramin’ny ony ka hatramin’ny faran’ny tany.

I Isaaka sy i Jakôba

22 Nohamafisiny toy izany tamin’i Isaaka koa noho ny amin’i Abrahama,

ny fitahiana ny firenena rehetra, sy ny fanekena.

23 Raha efa izany dia nataony mipetraka teo an-dohan’i Jakôbaizany fitahiana izany

ka nataony anton’ny fitahiany ny olona izy;

nomeny ho lovany ny tany;

24 natokotokony maro izany,

dia nozarainy tamin’ny foko roa ambin’ny folo.

I Môizy

1 Napoitrany avy amin’i Jakôba olona anankiray tia vavaka,

izay nahita fitia tamin’ny nofo rehetra,

olona tian’Andriamanitra sy ny olombelona, dia i Môizy:

Hombam-pitahiana anie ny fahatsiarovana azy!

2 Fa izy nomeny voninahitra sahala amin’ireo masina;

nataony malaza noho ny fampahatahorana nampidiriny tamin’ny fahavalo.

3 Ny teniny no nampitsaharany ny zava-mahatalanjona,

nomeny voninahitra teo anatrehan’ny mpanjaka izy:

nomeny didy ho an’ny vahoakany,

ary nampahitany ny tsirim-pahazavam-boninahitra anankiray.

4 Nohamasininy izy, noho ny finoany aman-kalemem-panahiny;

nofidiny tamin’ny olombelona rehetra;

5 nampandrenesiny ny feony;

nampidiriny tao anatin’ny rahona;

nifanatrika taminy izy no notolorany ny didiny,

dia ny lalàn’ny fiainana amam-pahalalana,

mba hampianarany an’i Jakôba ny fanekeny,

sy an’i Israely ny didiny.

I Aarôna

6 Nasandrany koa i Aarônaolo-masina toa azy,

rahalahiny avy amin’ny fokon’i Levì.

7 Nanao fanekena mandrakizay taminy izy,

ary nanome azy ny fisoronan’ny vahoakany.

Nampiraratiny amin’ny fihaingoana mamirapiratra izy

ary nahodidiny azy ny akanjom-boninahitra.

8 Nampitafy azy fiandrianana ambony indrindra,

ary nanendry fitafiam-boninahitra ho azy:

dia ny kalisôna, ny akanjo vita lava sy ny efôda.

9 Nohodidininy ampongabendanitra izy,

mbamin’ny lakolosy volamena madinika maro manodidina,

izay tsy maintsy maneno rehefa mandeha izy,

sy mampandre ny feony, ao amin’ny tempoly;

fampahatsiarovana ho an’ny taranaky ny vahoakany izany.

10 Nahodidiny azy ny fitafiana masina,

tenona volamena sy hiasinta;

ary jaky asan’ny mpanao amboradara;

ny rasionalin’ny fitsarana mbamin’ny Orima sy ny Tomima,

nataon’ny mpahay zavatra, amin’ny kofehy mena mangatrakatraka,

11 misy vatosoa voalatsaka an-tranontranony,

voasikotra toy ny fitomboka,

sy voapetaka amin’ny volamena asan’ny mpahay vatosoa,

mba ho fampahatsiarovana, fa misy anarana voasoratra

araka ny isan’ny fokon’i Israely.

12 Nasiany fehiloha volamena ny tiarany,

misy izao teny voasikotra izao: Masin’ny Tompo;

mari-boninahitra, taozavatra lavorary,

hafinaretan’ny maso, fihaingoana kanto.

13 Tsy nisy zavatra toy izany talohany, sady tsy hisy na oviana koa.

Tsy misy olon-kafa mitafy izany, afa-tsy ny zanany ihany,

mbamin’ny taranany amin’ny taona mifandimby rehetra.

14 Hatolotra ny sorony dorana,

indroa isan’andro tsy tapaka.

15 I Môizy no nameno ny tanany,

ary nanosotra azy amin’ny diloilo masina.

Fanekena mandrakizay izany ho azy,

sy ho an’ny taranany,

raha mbola maharitra koa ny andron’ny lanitra,

mba hanompoany ny Tompo, sy hanefany ny raharahan’ny fisoronana,

ary hitsofany rano ny vahoakany, amin’ny anarany.

16 Nofidin’ny Tompo tamin’ny velona rehetra izy,

mba hanolotra aminy ny fanatitra,

ny zava-manitra, ny fofona manitra ho fahatsiarovana,

sy hanaovana ny fanonerana ny fahotan’ny vahoakany.

17 Nomeny azy ao amin’ny didiny,

ny fahefany amin’ny fandaharana masina,

hampianarany an’i Jakôba ny didiny,

sy hanoroany ny lalàny amin’i Israely.

18 Nisy olona nioko taminy,

sy nialona azy tany an’efitra:

dia ny olona niandany tamin’i Datàna sy i Abirôna,

ary ny antokon’i Kôre, nisafoaka sy niafonafona.

19 Hitan’ny Tompo izany, ka tsy nankasitrahiny,

ka dia voaringana izy ireo tamin’ny firehetan’ny hatezerany;

nanao zava-mahatalanjona namely an’ireny izy,

ka nandevona azy tamin’ny lelafon’ny afony.

20 Ary nampitomboiny ny voninahitr’i Aarôna,

ary nanendry lova ho azy izy.

Nomeny ho anjarany ny voaloham-bokatry ny tany;

fa voalohany indrindra nanomanany mofo hamokisany azy izy ireo.

21 Ny fanatitra ho an’ny Tompo no niveloman’izy ireo;

fa izany no nomeny an’i Aarôna sy ny taranany.

22 Tsy mba nanan-dova eo amin’ny tanin’ny vahoaka anefa izy,

na anjara eo afovoan’ny firenena,

fa Izaho no anjaranao sy lovanao, hoy ny Tompo.

I Finea

23 I Finea zanak’i Eleazara, no fahatelo amin’ny voninahitra,

noho izy niseho ho mafana fo tamin’ny fahatahorana ny Tompo,

ary raha ilay nivadika iny ny vahoaka, izy kosa nijoro

tamin’ny herim-pony be voninahitra,

sy nanao ny fanonerana ho an’i Israely.

24 Izany no nanaovana fanekem-pihavananataminy,

ka nahatonga azy ho lehiben’ny mpisorona sy ny vahoakany,

mba hananany izy sy ny taranany mandrakizay

ny fiandrianana lehiben’ny fisoronana.

25 Nisy fanekena koa natao tamin’i Davida,

zanak’i Jese amin’ny fokon’i Jodà,

ka ny zanany lahy iray ihany no mifandimby hatrany mandova ny mpanjaka,

fa ny lovan’i Aarôna kosa dia ny taranany rehetra no mahazo azy.

26 Homen’ny Tompo anareo anie, ry mpisorona lehibe,

ny fahendrena ao am-ponareo

hitsarana ny vahoakany araka ny rariny,

mba tsy ho foana ny fanambinana azy,

na ny voninahiny amin’ny taona ho avy!

I Jôsoe

1 Nahery an’ady i Jôsoe, zanak’i Nona,

izay nandimby an’i Môizy amin’ny fiambonian’ny mpaminany,

ka nanamarina ny anarany, dia niseho

ho lehibe tamin’ny fanafahana ny voafidin’ny Tompo;

nanafay ireo fahavalo nanohitra,

mba hampahazo an’i Israely ny tany.

2 Endrey izany voninahitra azony, nony nanainga ny tanany izy,

ka nanangana ny sabany, namely ny tanàna.

3 Zovy tany alohany no nahatohana azy be toy izany,

raha ny Tenan’ny Tompo no nampiavy ny fahavalo?

4 Moa tamin’ny hatsi-tanany, tsy nihemotra va ny masoandro,

ary tsy toa andro roa va ny andro iray?

5 Niantso ny Andriana ambony indrindra izy,

raha namoritra ny fahavalo hatraiza hatraiza;

dia nihaino azy ny Tompo Tsitoha,

tamin’ny vato havandra mafy erỳ.

6 Ka tenan’Izy Tompo no nirotsaka tamin’ny firenena nanohitra,

sy nandripaka ny fahavalo, teo amin’ny hadilanana;

mba hahalalan’ny firenena ny fiadian’i Jôsoe rehetra,

sy ny hoe: eo anatrehan’ny Tompo ny ady iandraiketany,

satria manaraka ny Tsitoha izy.

I Kaleba

7 Tamin’ny andron’i Môizy no efa naneho sahady ny fitiavany vavaka izy,

dia izy sy i Kaleba, zanak’i Jefone,

tamin’izy nanoha mafy ny fahavalo,

nisakana ny vahoaka tsy hanota,

ary nampangina ny fimonomononan’ny ratsy fanahy.

8 Ka dia izy roa lahy ireo no hany voatahiry,

tamin’ny miaramila an-tongotra enina hetsy,

mba hampidirina amin’ny lova,

amin’ny tany tondra-dronono aman-tantely.

9 Ary ny Tompo nanome hery an’i Kaleba,

– sady naharitra tao aminy hatramin’ny fahafatesana izany;

ka afa-niakatra teo an-tampon’ny faritany izy,

ary voatanan’ny taranany izany lova izany:

10 mba hahafantaran’ny zanak’i Israely rehetra,

fa tsara ny manaraka ny Tompo.

Ireo Mpitsara

11 Ary ny Mpitsara samy araka ny anarany avy,

izay rehetra tsy niraiki-po tamin’ny fijangajangana,

izay rehetra tsy nihataka niala tamin’ny Tompo,

aoka hombam-pitahiana anie ny fahatsiarovana azy!

12 Ho velona indray anie ny taolany avy ao am-pasana!

Hohavaozina indray anie ny anarany,

eo amin’ny taranak’ireo olo-malaza.

I Samoela

13 Nankasitrahin’ny Tompo Andriamaniny i Samoela;

mpaminanin’ny Tompo izy nanorina ny fanjakana,

ary nanosotra andriana hanapaka ny vahoakany.

14 Nitsara ny fiangonana, araka ny lalàn’ny Tompo,

ka dia nanopy maso nitsinjo an’i Jakôba ny Tompo.

15 Niseho ho mpaminany izy, tamin’ny fahamarinany,

ary hita fa mpahita mendrika hinoana noho ny fahamarinan’ny filazany.

16 Niantso ny Tompo ambony indrindra izy,

tamin’ilay namoritra azy hatraiza hatraiza iny ny fahavalo,

ary zanak’ondry mbola minono no nateriny.

17 Fa ny Tompo nikotrokotroka tany an-danitra ambony,

sy nampandre ny feony nipoaka mafy:

18 ary nanorotoro ireo filohan’ny Sirianina,

mbamin’ireo rehetra mpanapaky ny Filistinina.

19 Talohan’ny fotoan’ny fatoriana mandrakizay,

dia niantso ny Tompo, sy ilay voahosony ho vavolombelona izy,

nanao hoe: «Tsy misy nandraisako

fanomezana akory, na dia kapa aza.»

Ary tsy nisy olona nitsangan-kiampanga azy.

20 Ary nony efa natory izy dia naminany,

ka nilaza tamin’ny mpanjaka fa efa akaiky ny hiafarany.

Nanandratra ny feony izy avy tao anatin’ny tany,

ka naminany mba hanafoana ny heloky ny vahoaka.

I Natana

1 Manaraka izany niseho i Natana,

mba haminany, tamin’ny andron’i Davida.

I Davida

2 Toy ny fanavaka ny saboraamin’ny sorona fisaorana,

no nanavahana an’i Davida teo amin’ny zanak’i Israely.

3 Nilalao tamin’ny liona, toy ny amin’ny zanak’osy izy,

ary tamin’ny orsa, toy ny amin’ny zanak’ondry kely.

4 Fony izy mbola tanora, tsy namono ilay goavam-be va izy,

ka nahafa-kenatra ny vahoaka,

nony nanainga tanana mbamin’ny vaton’antsamotadiny izy,

sy nanongana ny reharehan’i Gôliata?

5 Satria niantso ny Tompo Avo Indrindra izy,

ary ny Tompo nanome hery ny tanany ankavanana,

hamono mahafaty an’ilay mpiady mahery,

mba hanandratra ny tandroky ny vahoakany.

6 Ka dia nankalazaina izy, noho ny amin’ireo iray alina;

noderaina izy, noho ny fitahian’ny Tompo;

ary natolotra azy ny satroboninahitra.

7 Fa nomontsaniny hatraiza hatraiza ny fahavalo,

nohoseny tamin’ny tongony ny Filistinina, ny mpanohitra;

noketrahiny mandrak’androanyny herin’ireny.

8 Tamin’izay rehetra nataony izy nanolotra haja,

ny Masina, ny Avo Indrindra, tamin’ny teny fiderana;

tamin’ny fony tokoa nanao hira fankalazana

ary tia an’Ilay nanao azy.

9 Nanendry mpihira eo anoloan’ny ôtely izy,

ary nampandre hira mireondreona mahafinaritra tamin’ny feon’ireo.

10 Nataony manetriketrika ny fety,

ary kanto tapitra ohatra ny fankalazana ny andro lehibe,

amin’ny fotoana ankalazan’ny mpihira ny Anara-masin’ny Tompo,

sy ampanakoakoany ny fitoerana masina vao maraina.

11 Ny Tompo kosa namela ny hadisoany,

nanandratra ny fahefany ho mandrakizay;

ary nataony azo antoka ny hananany taranaka mpanjaka,

sy ny seza fiandrianana be voninahitra eo amin’i Israely.

I Salômôna

12 Nitsangana nanarakaraka azy ny zanaka feno fahendrena anankiray,

tao anatin’ny fandrosoana no nahavelomany noho ny amin-drainy.

13 Nanjaka tamin’ny androm-piadanana i Salômôna,

fa nomen’Andriamanitra fitsaharana amin’ny manodidina rehetra izy,

mba hanorina tempoly ho an’ny Anarany,

sy hamboatra fitoerana masina mandrakizay.

14 Endrey izany fahendrenao, tamin’ny fahatanoranao,

niboiboika fahalalana toy ny ony!

15 Niely eran’ny tanyny fahiratan-tsainao,

dia nofenoinao oha-teny mifono hevitra izy.

16 Tonga hatrany amin’ny lavitra ny anaranao,

ary tian’ny olona teo amin’ny fiadananao ianao.

17 Ny hiranao masina, ny ohabolanao, ny fanoharanao,

ary ny valin-teninao efa nigagan’izao tontolo izao anao.

18 Tamin’ny Anaran’ny Tompo Andriamanitra,

izay antsoina ho Andriamanitr’i Israely,

ianao nanangona volamena toy ny fira-potsy,

nampiasa volafotsy toy ny firaka.

19 Nanaram-po tamin’ny vehivavy ianao,

ary nomenao fahefana tamin’ny vatanao izy;

20 nasianao pentina ny voninahitrao,

ary nolotoinao ny taranako,

ka dia niantso hatezerana ho amin’ny zanakao ianao.

21 Mahatsiaro mangirifiry noho ny hadalanao aho;

fa izany no antony nivakian’ny fanjakana,

ka avy amin’ny Efraima no nitrangan’ny filohan’ny fanjakana nikomy.

22 Kanefa ny Tompo tsy hiala amin’ny famindram-pony,

ary tsy hasiany levona iray akory ny asany;

tsy hamongotra ny taranak’ilay voafidiny izy,

ary tsy ataony lany tamingana ilay tia Azy.

I Jakôba namelany dimby;

ary i Davida namelany solofo iray razana aminy.

I Rôbôama

23 Nody mandry tany amin’ny razany i Salômôna,

ary ny navelany nanarakaraka azy, dia zanany iray razana aminy,

iray, olona adala eo imason’ny vahoaka, tsy manam-pahalalana,

i Rôbôama izay nanao izay hihatahan’ny vahoaka amin’ny heviny;

I Jerôbôama

ary i Jerôbôama, zanak’i Nabata, izay nampanota an’i Israely,

sy ny sori-dalana hidiran’i Efraima amin’ny fivadihana.

24 Dia tafahoatra loatra ny fahotan’i Israely

ka nentina lavitra ny taniny izy.

25 Nivarina tamin’izao karazam-paharatsiana rehetra

izao izy,

mandra-pidonan’ny famaliana azy ireo.

I Elia

1 Manaraka izany, nitsangana i Elia, mpaminany hoatra ny afo,

ary nirehitra hoatra ny fanilo ny teniny.

2 Niantso mosary hamely an’i Israely izy,

ary nahavitsy isa azy, noho ny zotom-pony.

3 Nanakatona ny lanitratamin’ny tenin’ny Tompo izy,

ary nampilatsakaafo avy any intelo toy izany ihany koa.

4 Voninahitra lehibe manao ahoana, ry Elia,

no azonao tamin’ny fahagagana nataonao

ary zovy no afaka hihambo ho mitovy aminao?

5 Ianaonampitsangana ny matyanankiray hiala amin’ny fahafatesana

sy amin’ny Seoly, tamin’ny tenin’ny Avo Indrindra;

6 Ianao namarina mpanjaka ho amin’ny faharavana,

sy olo-malaza avy amin’ny fandriany ho any amin’ny fahafatesana;

7 ianao nandre fananarana teo ambonin’i Sinaia,

sy didy famaliana tany Horeba;

8 ianaonanokana mpanjakahanao famaliana,

sy mpaminany handimby anao;

9 ianao nofaohina tamin’ny tadio afo,

sy tamin-kalesy tarihin-tsoavaly afo;

10 ianao voatendry ao amin’ny teny mafyan-tsoratra ho amin’ny fotoana ho avy

ho tsy maintsy hampitony ny hatezerana alohan’ny hirehetany,

hitarika ny fon’ny ray ho amin’ny zanaka indray,

ary hanangana ny firenen’i Israely indray.

11 Sambatra izay hahita anao, ka ho voahaingon’ny fitiavana an’Andriamanitra!

Fa izahay koa dia ho velona marina tokoa.

I Elisea

12 Nony voahodidin’ny tadio i Elia

dia tonga feno ny fanahiny i Elisea.

Nandritra ny andro niainany tsy nisy mpanjaka

nahahozongozona azy,

ary tsy nisy olona nanapaka azy.

13 Tsy misy zavatra tsy azony natao,

ary ny vatany tafandry tao am-pasana nanao fahagagana.

14 Velona izy, nanao zava-mahagaga;

maty indray nanao zava-mahatalanjona.

Ny vahoaka nivadika ka voasazy

15 Na dia izany rehetra izany aza tsy nibebaka ny vahoaka,

ary tsy niala tamin’ny fahotany,

mandra-pitondra azy lavitra ny taniny,

sy tafaely amin’ny tany rehetra.

Tsy nisy tavela afa-tsy vahoaka vitsy foana,

mbamin’ny filohany avy amin’ny fianakavian’i Davida.

16 Ireo indray kosa, ny sasany nanao izay sitrak’Andriamanitra,

ary ny sasany nampitombo ny fandikan-dalàna.

I Ezekiasa

17 I Ezekiela nanamafy ny tanànany,

sady nitarika an’i Gihôna ho ao anatin’ny màndany;

nandavaka ny vatolampy tamin’ny vy izy,

ary nanao dobo fitahirizan-drano.

18 Tamin’ny androny niakatra i Senakeriba,

ary naniraka an-dRabsakesa; dia niainga io,

ka nanainga tanana hamely an’i Siôna,

ary nihambohambo noho ny fireharehany.

19 Tamin’izany nivarahontsana ny fo aman-tanan’izy ireo,

ary latsaka am-panaintainana, toy ny vehivavy miteraka, izy.

20 Niantso ny Tompo be indrafo izy,

nanandra-tanana taminy,

ary nandre azy niaraka tamin’izay ny Masina any an-danitra,

ka nanafaka azy tamin’ny alalan’i Izaia.

21 Nasiany ny tafiky ny Asirianina

ary naringan’ny Anjeliny ireny.

I Izaia

22 Fa nanao ny sitraky ny Tompo i Ezekiasa,

ary nifikitra mafy tamin’ny lalan’i Davida rainy,

araka ny famporisihan’i Izaia ilay mpaminany

lehibe sy marina amin’ny fahitany.

23 Tamin’ny androny nihemotra ny masoandro,

ary nohalavain’i Izaia ny andro iainan’ny mpanjaka.

24 Tamin’ny tsindry mandry mahery izy nahita ny andro ho avy,

ary nampiorina ny tra-pahoriana tao Siôna.

Nanambara ny tsy maintsy ho tonga hatramin’ny fahataperan’ny andro,

mbamin’ny zava-miafina alohan’ny fahatanterahany.

I Josiasa

1 Ny fahatsiarovana an’i Josiasa dia zava-manitra,

natao tamin’ny fofona manitra indrindra,

namboarina tamin’ny fahaizan’ny mpamorona zava-manitra;

mamy toy ny tantely ny fahatsiarovana azy, amin’ny vava rehetra,

ary toy ny mozika eo amin’ny fanasana.

2 Hainy ny nitarika ny vahoaka ho amin’ny fibebahana,

ary vitany ny mamoana ny fahavetavetana avy amin’ny fankahalana fivavahana.

3 Nampitodika marina ny fony amin’ny Tompo izy,

ary nanamafy ny fitiavam-bavaka, tamin’ny andron’ny mpankahala fivavahana.

Ireo mpanjaka farany sy mpaminany farany

4 Afa-tsy i Davida sy i Ezekiasa ary i Josiasa,

dia nanao ny ratsy avokoa ny hafa rehetra;

nahafoy ny lalàn’ny Avo Indrindra

ny mpanjakan’i Jodà, ka nizotra ho amin’ny fahaverezany.

5 Satria navelany ho an’ny hafa ny fahefany,

ary ho an’ny firenen-kafa ny voninahiny.

6 Nodoran’izy ireo ny tanàna voafidy ho an’ny fitoerana masina,

ary nataony lao ny kianjany,

noho ny amin’i Jeremia.

7 Fa ratsy fitondra azy izy,

nefa ilay voahasina ho mpaminany hatrany an-kibon-dreniny,

mba hanongana sy handrava ary hamono,

sady hanorina sy hamboly koa.

8 I Ezekiasadia nibanjina ny fahitam-boninahitra,

izay nasehon’ny Tompo azy, tambonin’ny kalesin’ny Kerobima;

9 fa nihevitra ny fahavalo,

tao anatin’ny ranonoram-baratra mananontanona izy,

ary nanisy soa an’izay nanaraka ny lala-mahitsy.

10 Ny amin’ireo mpaminany 12 lahy

dia aoka ho velona indray anie ny taolany avy ao anaty fasany.

Fa nampionona an’i Jakôba izy ireo,

ary namonjy azy tamin’ny fanantenana marina.

I Zôrôbabela sy i Jôsoe

11 Atao ahoana no fankalazana an’i Zôrôbabela?

Fa toy ny peratra fitomboka eo amin’ny tanana ankavanana izy.

12 Torak’izany koa i Jôsoe, zanak’i Josedeka!

Fa izy roa lahy ireo tamin’ny androny nanorina ny tranon’Andriamanitra indray

ary samy nanangana ny Tempoly,

voatokana ho an’ny Tompo,

sy voatendry hanana voninahitra mandrakizay.

I Nehemia

13 Lehibe koa ny fahatsiarovana an’i Nehemia,

izay nanangana indray ny mandantsika efa rava,

sy namboatra indray ny vavahadintsika mbamin’ny hidiny,

ary nanorina ny tranontsika indray.

Famintinana

14 Tsy misy olona tahaka an’i Enôka teto ambany masoandro,

fa izy koa nofaohina tamin’ity tany ity.

15 Tsy nisy olombelona tahaka an’i Josefa,

filohan’ny rahalahiny, tohan’ny fireneny;

ary voatahiry tamim-pitandremana ny taolam-balony.

16 I Sema sy Setakoa, nankalazaina teo amin’ny olombelona;

fa i Adama no ambonin’ny zavatra rehetra tamin’ny zava-boaary.