Category: Izaia

Asa iantsoan’Andriamanitra an’i Sirosy.

1 Mangina hihaino Ahy ianareo, ry nosy,

ary aoka ny firenena hamelombelona ny heriny,

ka hanatona sy hiteny!

Andeha isika hiaraka ho eo amin’ny fitsarana

2 «Iza no nampiakatra avy any atsinanana

an’ilay ifanenan’ny fahamarinana. ny diany?

Iza no nanolotra azy an’ireo firenena,

sy nampanaiky azy an’ireo mpanjaka?

Mampanjary ny sabany ho vovoka Izy;

ary ataony tonga sahala amin’ny akofa entin-drivotra ny tsipìkany.

3 Enjehiny ireo, ka mizotra soa aman-tsara Izy;

eo amin’ny lalana mbola tsy nodiavin’ny tongony.

4 Iza no nanao izany? Iza no nahefa izany?

Ilay niantso ny taranaka hatramin’ny voalohany,

Izaho Iaveh, Izay voalohany,

sady ho eo amin’ny farany koa!»

5 Mahita izany ireo nosy, ka raiki-tahotra;

mangovitra ny vazantany;

manatona izy ireo ka tonga.

6 Samy manampy ny namany avy izy,

ary mifampilaza hoe: «Matokia!»

7 Ny mpanefymankahery ny mpanao anidina;

ny mpandama amin’ny tantanana mankahery ny mively eo amin’ny riandriana;

hoy izy, miantso ny faninginana: «Tsara ity»;

dia homboany amin’ny fantsika ilay sampy tsy hihozongozona.

Momba an’i Israely Andriamanitra

8 Fa ianao kosa, ry Israely, mpanompoko,

ianao, ry Jakôba nofidiko,

taranak’i Abrahama, sakaizako.

9 Ianao izay notantanako avy any am-paran’ny tany,

sy nantsoiko avy any amin’ireo tany lavitra ireo:

ianao izay nilazako hoe: «Mpanompoko ianao,

efa nofidiko, ka tsy mba nariako.»

10 Aza matahotra ianaofa momba anao Aho;

aza mijerijery amin’ahiahy, fa Izaho no Andriamanitrao;

Nohazoniko mafy ianao, ka manampy anao Aho;

ary manohana anao amin’ny tanana ankavanan’ny fahamarinako.

11 Ho menatra sy hangaihay foana,

izay rehetra misafoaka hamely anao;

hanahaka ny zava-poana sy ho levona,

izay mifanditra aminao.

12 Hozahanao fa tsy ho hitanao intsony,

ry zareo mila sotasota aminao;

hanahaka ny zava-poana, hanjary tsinontsinona,

ry zareo miady aminao.

13 Fa Izaho Iaveh Andriamanitrao,

mitantana anao amin’ny tanana ankavanana,

milaza aminao hoe: «Aza matahotra,

Izaho no tonga mamonjy anao.»

14 Aza matahotra, ry kankana avy amin’i Jakôba,

ry olom-bitsy sisa, tamin’i Israely!

fa Izaho no tonga mamonjy anao – teny marin’i Iaveh –

ary ilay Masin’i Israely no mpanavotra anao.

15 Indro ataoko ambaràmba maranitraianao

sady vao no marani-daniroa,

hodiavinao ny tendrombohitrasy hotorotoroinao,

ary hampanjarianao akofa ny havoana.

16 Hokororohinao izy, ka hopaohin’ny rivotra,

sy haelin’ny ranonoram-baratra.

Fa ianao kosa hientan-kafaliana amin’i Iaveh,

ary ilay Masin’i Israely no hireharehanao.

Zava-mahagaga vaovao tamin’ilay Eksaody faharoa

17 Ireo ory sy mahantra,

izay mitady rano fa tsy mahita,

ka mainan’ny hetaheta ny lelany,

dia Izaho Iaveh no hihaino azy,

Izaho Andriamanitr’i Israely tsy handao azy.

18 Hampiboiboika renirano,

eo amin’ny tendrombohitra mangadihady Aho,

ary loharano eo afovoan’ny lohasaha;

hovako ho farihy ny efitra;

ary ho loharano miboiboika, ny tany karankaina.

19 Ny efitra hampaniriako sedera

akasià, mirta sy ôliva;

hataoko indray maniry eo amin’ny tany lava volo

ny sipresa, platàna, ary boisy.

20 Mba ho hitany sy fantany

ary hodinihiny sy hiarahany mahalala,

fa ny tanan’i Iaveh no nanao izany,

ary ilay Masin’i Israely no nahary izany.

I Iaveh no hany Andriamanitra

21 «Alaharo ny teninareo, hoy i Iaveh,

Asehoy izay mahamarina ny anareo,

hoy ny mpanjakan’i Jakôba.

22 Aoka hasehony sy hambarany amintsika,

izay zavatra ho avy!

Ambarao izay zavatra taloha,

mba inona sy inona avy ireny?

hiezaka handinika izany ny fonay,

hahalalanay izay nahatanterahany!

Na hoe ampandreneso anay, izay zavatra ho avy!

23 Lazao izay zavatra ho avy any aoriana any,

dia ho fantatray fa andriamanitra ianareo.

Manaova soa, na manaova ratsy,

mba nahitanay izany sy hiarahantsika migaga.

24 Indro fa tsinontsinona ianareo,

ary zava-poana ny asanareo;

vetaveta izay mifidy anareo!»

Ambaran’Andriamanitra mialoha ny handresen’i Sirosy

25 «Nampitranga azy avy any avaratra Aho, ka tonga izy,

avy any atsinanana izy miantso ny Anarako;

hoseny hoatra ny fanosy fotaka, ny mpanapaka;

sy tahaka ny fanosin’ny mpanao vilany ny tanimanga.»

26 Iza no nampahalala azyhatramin’ny voalohany

mba hahafantaranay izany,

sy teo aloha ela, mba hilazanay hoe: «Marina izany?»

Tsia: tsy nisy olona nilaza azy!

Tsia, tsy nisy olona nampandre azy!

Tsia, tsy nisy olona nandre ny teninareo!

27 Izaho no voalohany nilaza tamin’i Siôna hoe: «Indro! indreo izy.»

ary mandefa mpitondra teny soa mahafaly hoe

an’i Jerosalema Aho.

28 Mijery Aho, ka tsy misy olona;

tsy misy mpanolo-tsaina amin’izy ireo,

izay azoko nanontaniana sy hamaly Ahy.

29 Indro fa zava-poana avokoa izy rehetra;

tsinontsinona ny asany; rivo-poana ny sampiny.

Tapany voalohany

1 Indro ny mpanompokoizay tantanako;

ilay voafidiko ka sitraky ny foko;

napetrako ao aminy ny fanahiko;

hamoaka fahamarinana ho an’ny firenena izy.

2 Tsy hiantso mafy izy, na hanandra-peo,

na hanao izay handrenesana ny feony eny an-dalambe.

3 Ny volotara efa poritra, tsy hotapahiny;

ny lahin-jiro efa ho faty, tsy hovonoiny.

Hanambara ny rariny, araka ny marina izy;

4 tsy ho ketraka izy na ho kivy akory,

mandra-panoriny ny rariny amin’ny tany;

ary ny nosy hiandry ny lalàny.

Tapany faharoa

5 Izao no lazain’i Iaveh Andriamanitra

Izay nahary ny lanitra sy namelatra azy,

izay namelatra ny tany mbamin’ny vokatra ao aminy,

izay nanome fofon’aina ny olona eo aminy,

sy fofon’aina ho an’izay mandeha eo.

6 Izaho Iaveh no niantso anao, tamin’ny fahamarinana,

sy nandray tanana anao,

miaro anao Aho ary manao anao ho fanekem-pihavananaho an’ny vahoakako

sy fahazavan’ny firenena,

7 hampahiratra ny mason’ny jamba,

hamoaka ny mifatotra eo amin’ny tranomaizina,

sy ireo mipetraka ao anatin’ny haizina ao amin’ny fonja.

8 Izaho no Iaveh, izany no Anarako;

ary ny voninahitro tsy homeko ny hafa.

Ny fanajana Ahy, tsy ho an’ny sampy.

9 Efa tanteraka izay, ireo zavatra taloha;

ary zava-baovao indray izao no ambarako;

alohan’ny hitrangany

dia ampandrenesiko rahateo ianareo.

Antsa fandresena

10 Mihirà fihiram-baovao ho an’i Iaveh;

sy fiderana Azy, hatramin’ny faran’ny tany,

ianareo miantsambo amin’ny ranomasina sy monina ao aminy,

ianareo, nosy, mbamin’ireo mponina aminareo!

11 Aoka hanandra-peo ny efitra mbamin’ny tanàna eo aminy;

ny toby onenan’i Sedera!

Aoka hientan-kafaliana, ny mponina any Selà;

aoka hihobim-piravoravoana any an-tampon-tendrombohitra!

12 Aoka hanome voninahitra an’i Iaveh,

sy hitory fiderana Azy eny amin’ny nosy!

13 Fa mivoaka i Iaveh toy ny lehilahy mahery;

mamoha ny firehetam-pony, toy ny mpiady,

mandefa akoran’ady, akora mikotrokotroka;

manampatra ny heriny, handresy ny fahavalony.

14 «Ela nangina Aho;

nitam-bava tsy niteny sy nanindry fo Aho;

mitolokoloko toy ny vehivavy miteraka,

misentosento sy mihanahana Aho.

15 Hofoanako ny tendrombohitra aman-kavoana;

hataoko maina avokoa izay maitso eo aminy;

hampanjariako nosy ny ony,

ary homainiko ny farihy.

16 Hampandehaniko amin’ny lalan-tsy fantany ny jamba;

ary hotarihikoamin’ny sakeli-dalana mbola tsy hitany;

ny maizina hataoko mazava eo anoloany;

ary ny tany be havoana halamako.

Hotanterahiko ireo teny ireo;

ary tsy havelako tsy hatao.

17 Hihemotra sy ho safo-kenatra ireo izay matoky ny sampy,

izay milaza amin’ny sarin-javatra anidina hoe:

Ianareo no andriamanitray.»

Hajamban’ny vahoaka

18 Mihainoa, ianareo marenina;

mihirata hijery, ianareo jamba!

19 Iza no jamba afa-tsy ny mpanompoko;

iza no marenina tahaka ny iraka irahiko?

Iza no jamba tahaka an’izay nataoko sakaizako,

sy jamba tahaka ny mpanompon’i Iaveh?

20 Nahita zavatra maro ianao, fa tsy nahatana na inona na inona;

nisokatra ny sofiny, fa tsy nandre na inona na inona izy.

21 Sitrak’i Iaveh noho ny fahamarinany,

ny nanome lalàna lehibe sy be voninahitra!

22 Ary indro ity vahoaka ity, dia voababo sy norobaina ny fananany.

Voafatotra ao an-johy avokoa izy rehetra;

voahiboka ao an-tranomaizina izy;

robaina izy nefa tsy misy mamonjy azy,

baboina ny fananany, nefa tsy misy manao hoe: «Avereno!»

23 Iza aminareo moa no hety handre izany

dia handinika sy hihaino amin’ny sisa?

24 Iza no nanolotra an’i Jakôba horobaina,

sy i Israely hobaboina?

Moa tsy i Iaveh va, izay nanotantsika?

Tsy nety nanaraka ny lalany izy ireo;

ary ny lalàny tsy nohenoiny?

25 Dia nalatsany tamin’izy ireo ny afon’ny fahatezerany,

sy ny firehitry ny ady:

ka nirehitra nanodidina azy izany, nefa tsy azony an-tsaina,

ary nandoro azy, nefa tsy noheveriny.

Fanafahana an’i Israely

1 Ary ankehitriny, izao no lazain’i Iaveh,

dia ilay nahary anao, ry Jakôba,

sy namorona anao, ry Israely:

«Aza matahotra fa Izaho efa nanavotra anao,

Izaho efa niantso anao amin’ny anaranao, ka Ahy ianao!

2 Raha mita rano ianao, dia homba anao Aho;

raha mamaky ny ony ianao, tsy hanafotra anao izy;

raha mandeha eo afovoan’ny afo ianao, tsy ho may;

ary ny lelafo tsy handoro anao.

3 Fa izaho Iaveh no Andriamanitrao;

ilay Masin’i Israely no mpamonjy anao.

Efa nomeko ho avotrao, i Ejipta,

ary ho solonao i Etiôpia sy i Sabà.

4 Satria sarobidy eo imasoko

sy mendrika hohajaina ianao, sady tia anao Aho,

hanome olona maro ho takalonao Aho,

sy firenena maro, ho solon’ny ainao.

5 Aza matahotra fa momba anao Aho,

hamerina ny taranakao avy any Atsinanana Aho,

ary hanangona anao avy any Andrefana.

6 Ny Avaratra hilazako hoe: ‹Atolory izy!›

ary ny Atsimo hataoko hoe: ‹Aza mitana azy!›

Avereno ny zanako lahy, avy any lavitra any,

sy ny zanako vavy, avy any am-paran’ny tany,

7 dia izay rehetra mitondra ny Anarako,

izay noarîko ho voninahitro sy noforoniko ary nataoko.»

I Iaveh ihany no Andriamanitra

8 Avoahy ny olona jamba mana-maso,

sy ny marenina manan-tsofina.

9 Aoka hivory ny firenena rehetra,

sy hiangona ny vahoaka!

Iza amin’izy ireo no nanambara izany zavatra izany,

sy nilaza tamintsika ny faminaniana taloha?

Aoka hasehony izay vavolombelona sy hanamarina ny filazana izy;

aoka hihaino azy ny olona sy hanao hoe: «Marina izany!»

10 Ianareo no vavolombeloko, – teny marin’i Iaveh

sady mpanompoko, izay nofidiko;

mba hahafantaranareo sy hinoanareo Ahy

ary hahazoanareo an-tsaina, fa Izaho no izy.

Tsy misy Andriamanitra voaforona talohako;

ary tsy hisy koa any aoriako.

11 Izaho dia Izaho ihany no Iaveh

ary tsy misy mpamonjy afa-tsy Izaho.

12 Izaho no nilaza, Izaho no namonjy, Izaho no nilaza mialoha,

tsy mba andriamani-kafa eo aminareo;

ary ianareo no vavolombeloko – teny marin’i Iaveh.

13 Izaho no Andriamanitra.

Amin’ny sisa Izaho ihany koa no izy,

ary tsy misy olona mahafaka amin’ny tanako;

Hiasa Aho, ka zovy moa no hahasakana izany?

Ho rava i Babilôna

14 Izao no lazain’i Iaveh, mpanavotra anareo,

ilay Masin’i Israely:

«Noho ny aminareo, dia naniraka hamely an’i Babilôna Aho,

ka hataoko vaky mandositra avokoa izy ireo,

dia ny Kaldeanina, ka hidina any amin’ny sambo ireharehany fatratra!

15 Izaho no Iaveh, ilay Masinareo,

ilay mpahary an’i Israely, mpanjakanareo!»

Zava-mahagaga teo amin’ilay Eksaody faharoa

16 Izao no lazain’i Iaveh,

Izay nanao lalanaeny amin’ny ranomasina,

sakeli-dalana eny amin’ny rano mahery,

17 izay namoaka kalesy aman-tsoavaly,

sy tafika ama-mpiady mahery, hiantafika,

– indray lavo tsy hiarina intsony izy rehetra;

voakenda sy maty toy ny lahin-jiro izy. –

18 Aza mahatsiaro ny zavatra lasa intsony,

ary aza mihevitra ny zavatra taloha intsony!

19 Fa indro aho, hanao zava-mahagaga vaovao;

efa hiposaka izy izao, tsy hahalala izany va ianareo?

Hanisy lalana any an’efitra Aho,

sy ony eny an-tany karankaina.

20 Hanome voninahitra Ahy ny biby eny an-tsaha,

mbamin’ny amboadia sy ny ostritsa,

satria nanisy rano tany an’efitra Aho,

sy ony eny amin’ny tany karankaina,

hampisotroana ny vahoakako, ny olom-boafidiko,

21 ny vahoaka noforoniko mba ho Ahy,

ka hitory ny fiderana Ahy.

Tsy mahay mankasitraka i Israely

22 Kanefa, ry Jakôba ô, tsy mba niantso Ahy ianao,

na nisahirana tamiko akory, ry Israely.

23 Tsy mba nateranao ny ondrin’ny sorona dorana Aho,

na nomenao voninahitra tamin’ny soronao akory.

Tsy namesatra anao tamin’ny fanatitra Aho

na nanasatra anao tamin’ny emboka manitra.

24 Tsy lany vola namidy veromanitra ho Ahy ianao;

na namoky Ahy tamin’ny saboran-tsoronao;

fa ianao aza no namesatra Ahy tamin’ny fahotanao;

nanasatra Ahy tamin’ny tsy fahamarinanao.

25 Izaho dia Izaho ihany no namono ny fahadisoanao,

noho ny fitiavako ny Tenako,

ka tsy hotsarovako intsony ny fahotanao.

26 Ampahatsiarovy Aho; aoka hifandahatra isika.

Aoka ny tenanao no hilaza izay mahamarina ny anao.

27 Nanota ny rainao voalohany,

ary nivadika tamiko ireo mpanalalanao.

28 Ka izany no nanonganako an’ireo loholon’ny fitoerana masina,

nanolorako an’i Jakôba ho anatema

sy i Israely ho fandatsa.

Tso-drano ho an’i Israely

1 Ary ankehitriny, mihainoa, ry Jakôba mpanompoko

sy ianao, ry Israely voafidiko.

2 Izao no lazain’i Iaveh, izay nanao anao,

sy namorona anao hatrany am-bohoka, sady namonjy anao:

«Aza matahotra, ry Jakôba mpanompoko,

ry Israeliko, izay nofidiko!

3 Fa handatsaka rano amin’ny tany mangentana Aho;

sy sakeli-drano eo amin’ny tany karankaina.

Handatsaka ny fanahiko amin’ny taranakao Aho,

sy ny fitahiako amin’ny solofonao.

4 Dia haniry eo amin’ny ahi-maitso izy,

tahaka ny hazomalahelo amoron’ny rano mandeha.

5 Ny iray hilaza hoe: An’i Iaveh aho!

ny iray kosa hiantso ny anaran’i Jakôba ho fiarovana;

ny hafa indray hanoratra amin’ny tanany hoe: An’i Iaveh!

ary halainy ho fanampin’anarana, ny anaran’i Israely.»

Tokana ihany mihitsy Andriamanitra

6 Izao no lazain’i Iaveh, mpanjakan’i Israely

sy mpanavotra azy, dia i Iavehn’ny tafika:

«Izaho no voalohany, ary Izaho no farany,

ary tsy misy Andriamanitra afa-tsy Izaho.

7 Iza no tahaka Ahy? – aoka hiteny izy;

aoka hilaza izy sy hampiseho izany! –

hatrizay nanorenako ny karazan’olombelon’ny andro fahagola.

Aoka hambarany àry ny zavatra ho avy sy izay tsy maintsy ho tonga!

8 Aza taitra na matahotra foana ianareo!

Tsy efa nampahalala anao, hatry ny ela va Aho,

sy efa nilaza izany taminao? – Ianareo no vavolombeloko!-

Moa misy Andriamanitra afa-tsy izaho va?

Tsy misy Vatolampy hafa; tsy mahita izany aho.»

Fanarabiana ny fanompoan-tsampy

9 Zava-poana avokoa ny mpanao sampy,

ary tsy misy asany akory izay asany tampony indrindra.

Tsy mahita na inona na inona ny vavolombelon’izy ireny,

tsy mahalala na inona na inona, ka henatra ho azy izany.

10 Iza no namorona andriamanitra sy nanao sampy anidina,

mba tsy hahazoany soa na inona na inona?

11 Ho menatra avokoa ny mpivavaka aminy;

fa olombelona ihany ny mpanao azy!

Aoka hivory avokoa izy, ka hiseho!…

Hangovitra sy ho indray menatra avokoa izy rehetra.

12 Ny mpanefy vy miasa amin’ny fandraka,

ataony amin’ny arina mivaivay ny taozavatra,

amboariny amin’ny tantanana,

foromporoniny amin’ny sandry matanjaka izy.

Kanefa noana izy, ka indro tsy manan-kery;

tsy misotro rano, ka indro reraka.

13 Ny mpanao taozavatra amin’ny hazo manenjana ny kofehy,

manoritra ny endri-javatra amin’ny pensily,

manamboatra azy amin’ny fandraka,

mandrefy azy amin’ny kômpà.

Manao azy hanana endrik’olona,

ilay endrika tsara, izay endriky ny olombelona,

mba hamponenany azy ao an-trano.

14 misy olona mandeha hikapa sedera;

maka sena sy aoka izy;

mifidy amin’izay hazo any an’ala;

na mamboly sedera hampanirian’ny ranonorana.

15 Izany hazo izany dia ataon’ny olona kitay, misy alainy hamindroany, misy koa ampirehetiny handrahoan-kanina; misy koa ataony andriamanitra hivavahany; misy anaovany sampy, dia iankohofany eo anoloany.

16 Ny antsasany dorany tamin’ny afo; ny antsasany andrahoany hena ho azy, manatsatsika hena izy, dia mivoky. Mamindro koa izy ka manao hoe: «Adre! mihamafana aho izany; mahatsiaro ny hafanan’ny afo aho izany!»

17 Ny sisan’izany anaovany andriamanitra ho azy, sampy ho azy, dia miankohoka izy, mivavaka aminy, ary eo anatrehany izy dia mangataka manao hoe: «Vonjeo aho, fa andriamanitro ianao!»

18 Tsy mahalala na mahafantatra na inona na inona izy ireo, fa voatentina ny masony ka tsy mahita, ary ny fony koa, ka tsy mahazo an-tsaina.

19 Ary tsy mieritreritra ao am-pony izy,

tsy mba manan-tsaina na manam-pahalalana ka hanao anakampony hoe: Efa nodorako tamin’ny afo ny antsasany, efa nanendy mofo tamin’ny vain’afo aho, efa nanatsatsika hena aho, dia nihinana; ka ny sasan’izany va hanaovako fahavetavetana, hiankohofako eo anatrehan’izay vatan-kazo foana!

20 Voky lavenona izy; mivoana entin’ny fony voafitaka izy. Tsy hamonjy ny fanahiny izy, na hilaza hoe: «Moa tsy lainga va izay eto an-tanako?»

Fanambaràn’Andriamanitra

21 Tsarovy izany zavatra izany, ry Jakôba,

ry Israely ô, fa mpanompoko ianao!

Izaho namorona anao mba ho mpanompoko ianao;

tsy hanadino anao Aho, ry Israely!

22 Efa nolevoniko toy ny zavona ny fahadisoanao;

ary toy ny rahona ny fahotanao;

ka miverena amiko, fa efa nanavotra anao Aho.

23 Mihobia an-kafaliana, ry lanitra, fa efa vitan’i Iaveh izany.

Mirohondrohòna, ry fanambanin’ny tany!

Ataovy maresaka ny fifaliana, ry tendrombohitra,

mbamin’ireo ala sy hazo rehetra eo aminareo:

fa I Iaveh efa nanavotra an’i Jakôba,

sy naneho ny voninahiny eo amin’i Israely!

Hira fifaliana

24 Izao no lazain’i Iaveh mpanavotra anao,

izay namorona anao hatrany am-bohoka:

Izaho Iaveh, no nanao ny zavatra rehetra,

Izaho irery no mamelatra ny lanitra,

sy mampiorina ny tany: Iza moa no niaraka tamiko?

25 Izaho no mahafoana ny fanambaràn’ny mpaminany mpandainga,

mahabedibedy foana ny mpimasy,

mampikoy ny olon-kendry,

ary manova ny fahaizany ho fahadalana.

26 Izaho no mahatò ny tenin’ny mpanompoko,

sy mahatanteraka ny hevitra lazain’ny irako;

ny amin’i Jerosalema dia ilazako hoe: «Honenana anie izy!»

ny amin’ny tanànan’i Jodà hoe:

«Hatsangana indray anie izy ireo!»

Hamboariko indray izay rava aminy.

27 Izaho no milaza amin’ny hantsana hoe:

«Tankìna! Hataoko ritra ny oninao.»

28 Ny amin’i Sirosy dia milaza Aho manao hoe:

«Mpiandry ondriko izy;

hanatanteraka ny sitrapoko manontolo izy,

hilaza amin’i Jerosalema hoe:

‹Haorina indray anie ianao!›

Sy amin’ny tempoly hoe: ‹Hatsangana indray anie ianao!› »

Tenin’Andriamanitra manasoa an’i Sirosy

1 Izao no lazain’i Iaveh, amin’ilay voahosony, amin’i Sirosy,

izay notantanako tamin’ny tanany havanana,

mba handavo ny firenena rehetra eo anatrehany,

sy hamaha ny fehikibon’ireompanjaka,

ary hamoha ny varavarana eo anoloany,

mba tsy ho voasakana tsy hiditra amin’ireny izy:

2 «Izaho handeha eo alohanao,

handravona ny lalana mikitoantoana,

hanorotoro ny vavahady varahina,

ary hanapatapaka ny hidy vy.

3 Homeko anao ny rakitra miafina, sy ny harena voalevona,

mba hahafantaranao fa Izaho no Iaveh,

Andriamanitr’i Israely, izay niantso anao tamin’ny anaranao.

4 I Jakôba mpanompoko, sy i Israely voafidiko,

no niantsoako anao tamin’ny anaranao;

sy nanendreko anao, fony mbola tsy nahalala Ahy ianao.

5 Izaho no Iaveh, ary tsy misy hafa koa;

tsy misy Andriamanitra afa-tsy Izaho!

Nampisikina anao Aho, fony ianao mbola tsy nahalala Ahy;

6 mba hahafantaran’ny olona, hatramin’ny fiposahan’ny masoandro ka hatramin’ny filentehany

fa tsy misy na inona na inona afa-tsy Izaho!»

Fanambaràna famonjena

Izaho no Iaveh ary tsy misy hafa.

7 Izaho no mamorona ny mazava, sy mahary ny maizina;

manao ny fiadanana sy mahary ny loza;

Izaho Iaveh no manao izany rehetra izany.

8 Ampidino, ry lanitra, ny andonao avy any ambony;

ary aoka ny rahona handatsaka ny fahamarinana toy ny ranonorana!

Aoka ny tany hisokatra, hahavokatra ny famonjena,

ka hampitsimoka ny fahamarinana, miaraka amin’izany!

Izaho Iaveh no maharyireo zavatra ireo.

Tsy refesi-mandidy i Iaveh

9 Loza ho an’izay miady hevitraamin’ilay namorona azy,

nefa tavim-bilany isan’ny tavim-bilany tany ihany izy.

Ny tanimanga va hilaza amin’izay namolavola azy hoe:

«Inona ity ataonao?»

Ny asanao va hanao hoe: «Tsy manan-tanana izy?»

10 Loza ho an’izay manao amin-dray anankiray hoe: «Nahoana no niteraka ianao?»

na amin’ny vehivavy iray hoe: «Nahoana no velom-bao ianao?»

11 Izao no lazain’i Iaveh,

ilay Masin’i Israely sy izay namorona azy:

«Sahinareo va ny hanontany ahy ny amin’ny ho avy,

dia ny hanome didy Ahy ny amin’ny zanako sy ny asan’ny tanako?

12 Izaho no nanao ny tany,

sy nahary ny olona eo amboniny;

izaho no namelatra ny lanitra tamin’ny tanako,

izaho no mandidy ny tafika rehetra aminy.

13 Izaho no nanangana azyio, tamin’ny fahamarinako,

ka mandravona ny lalany rehetra;

Izy no hanangana ny tanànako indray,

sy hampody ny oloko voababo,

tsy amin’avotra na fanatitra,»

hoy i Iavehn’ny tafika.

Hanaraka an’i Iaveh ireo tsy mpino

14 Izao no lazain’i Iaveh:

«Ny vokatra azon’i Ejipta, ny tombony azon’i Etiôpia,

sy ny Sabeanina olona lava tsanganana,

dia samy ho tonga ao aminao sy ho anao,

fa izy ireo dia hanaraka anao;

ho tonga am-patorana sy hiankohoka eo anatrehanao,

ary hifompona aminao, hanao hoe:

Tsy misy Andriamanitra afa-tsy ato aminao, ka tsy misy hafa.

Tsy misy Andriamanitra hafa iray akory!»

15 Marina tokoa fa Andriamanitra miafina Ianao,

ry Andriamanitr’i Israely mpamonjy ô!

16 Menatra sy mangaihay avokoa izy rehetra,

lasa mandeha amin-kenatra ny mpanao sampy.

17 Fa i Israely kosa novonjen’i Iaveh amin’ny famonjena mandrakizay;

tsy ho menatra na hangaihay intsony ianareo,

amin’ny taona ho avy.

Miharihary ny asan’i Iaveh

18 Fa izao no lazain’i Iaveh,

Izay nahary ny lanitra,

Izy dia ilay Andriamanitra namorona ny tany,

sy nahavita ary nampiorina azy,

ka tsy nataony zava-mifanjevo foana,

fa nataony fonenana:

«Izaho no Iaveh, ary tsy misy hafa!

19 Tsy niteny tao amin’ny mangingina Aho,

tao amin’ny toerana maizimaizina amin’ny tany.

Tsy nilaza tamin’ny taranak’i Jakôba Aho nanao hoe:

Aoka hitady foana anie ianareo!

Fa izaho Iaveh dia milaza ny marina,

manambara ny fahamarinana.»

I Iaveh no Andriamanitry ny olona rehetra

20 Mivoria ianareo, ka avia, miaraha manatona,

ry sisan’ny firenena izay afaka.

Tsy mahalala na inona na inona

izay mitondra ny sampy hazony,

sy miantso izay andriamanitra tsy mba mamonjy.

21 Antsoy izy ireo; asaovy manatona izy;

ary aoka hiara-misaina avokoa izy!

Iza no efa nilaza izany zavatra izany hatramin’ny voalohany,

sy manambara izany hatramin’ny ela?

Tsy izaho Iaveh va?

Ary tsy misy Andriamanitra afa-tsy Izaho;

Izaho no Andriamanitra marina,

ary tsy misy mpamonjy afa-tsy Izaho.

22 Mitodiha atỳ amiko, dia hovonjena ianareo,

ianareo rehetra mponina amin’ny tany,

fa Izaho no Andriamanitra, ary tsy misy hafa.

23 Efa nianiana tamin’ny Tenako Aho;

ny marina no aloaky ny vavako,

dia ny teny iray, izay tsy hofoanana;

Ny lohalika rehetra handohalika amiko,

ary ny lela rehetra hianiana amiko.

24 Izao no hilazan’ny olona ahy: Amin’i Iaveh irery

no mitoetra ny fahamarinana sy ny hery!

Hanatona azy ny olona; fa ho menatra kosa

izay rehetra tezitra taminy.

25 Hohamarinina sy homem-boninahitra ao amin’i Iaveh avokoa,

ny taranak’i Israely rehetra.

Hirodana i Bela

1 Mirodana i Bela, miletsy i Nebô;

ataingina eo ambony biby, eo ambony biby mpitondra entanany sariny.

Ireo sampy izay nentinao dia ataingina

toy ny entana mavesatra, eo ambony biby sasatra.

2 Miletsy izy ireo, miara-mirodana izy;

tsy nahavonjy ny entana izy;

lasan-ko babo mbamin’ny tenany aza.

3 «Mihainoa ahy, ry taranak’i Jakôba,

mbaminareo sisa rehetra amin’ny taranak’i Israely;

ianareo izay nataoko an-tsangory hatry ny fony vao teraka,

nentiko hatrany an-kibon-dreninareo.

4 Tsy hiova Aho hatramin’ny fahanteranareo,

fa hanohana anareo mandra-pahafotsy volo anareo.

Efa nanao izany Aho, ka mbola hitondra anareo;

hanohana anareo sy hanafaka anareo.»

Tsy misy mitovy amin’i Iaveh

5 Hampitahainareo amin’iza Aho, ary ataonareo sahala amin’iza?

Hampitahafinareo amin’iza Aho ka hitovy izahay?

6 Izy ireo dia maka volamena ao an-kitapony,

mandanja volafotsy amin’ny mizàna,

ary manakarama mpanao anidina, hanao andriamanitra amin’izany,

dia miankohoka sy mivavaka.

7 Lanjainy io, tohanany,

dia lasa izy ireo mametraka azy eo amin’ny fitoerany;

ka mitsatoka eo, tsy mihetsika amin’ny fitoerany izy.

Na dia misy miantso azy aza tsy mamaly izy,

na mahavonjy olona ho afaka amin’ny fahoriany.

I Iaveh no tompon’ny ho avy

8 Mihevera izany, ary misehoa ho lehilahy;

ampoizy izany, ry mpiodina;

9 tsarovinareo ny zavatra lasa, tamin’ny andro taloha.

eny, Izaho dia Andriamanitra, ary tsy misy hafa.

10 Andriamanitra Aho, ary tsy misy mitovy amiko,

Izaho no manambara ny farany, hatramin’ny voalohany,

sy ny mbola tsy eo akory, hatrarỳ aloha ela;

Izaho izay manao hoe: Ho tò ny fikasako,

ary hoefaiko ny sitrapoko rehetra;

11 izay miantso ilay voromaheryavy any Atsinanana,

dia ilay lehilahy araka ny hevitro avy any an-tany lavitra.

Efa niteny Aho, ka hanatanteraka!

Efa nikasa Aho, ka hanefa izany!

12 Mihainoa ahy, ianareo olona madî-po,

izay lavitry ny fahamarinana.

13 Ampanakaikeziko ny fahamarinako, ka tsy lavitra izy;

ary ny famonjekotsy ho ela;

hanome famonjena an’i SiônaAho,

sy ny voninahitro ho an’i Israely.

Fitomaniana an’i Babilôna

1 Midìna, mipetraha amin’ny vovoka,

ry virjiny, zanaka vavin’i Babilôna;

mipetraha amin’ny tany, fa tsy amin’ny seza fiandrianana,

ry zanaka vavin’ny Kaldeanina;

fa ianao tsy hantsoina intsony hoe:

Ikala kiankianina, Ikala miangetsana.

2 Alao ny vato fikosoham-bary, ka totoy ny lafarina.

Esory ny voalinao;

akaro ny morontongotr’akanjonao, asehoy ny ranjonao,

fa hita ny ony.

3 Aoka hiharihary ny fitanjahanao, aoka ho hita ny fahamenaranao!

Fa hamaly faty Aho, ka tsy misy olona hananako antra. –

4 Ny Anaran’ny Mpanavotra antsika dia Iavehn’ny tafika,

ilay Masin’i Israely! –

5 Mipetraha tsy miteny, midira ao amin’ny maizina,

ry zanaka vavin’ny Kaldeanina;

fa ianao tsy hantsoina intsony hoe:

ilay tompovavin’ny fanjakana.

6 Efa tezitra tamin’ny vahoakako Aho,

ka navelako hozimbaina ny lovako,

dia natolotro ho eo an-tananao izy.

Tsy nanananao antra izy;

nasianao jioga mavesatra mbamin’ny antitra.

7 Ary hoy ianao: «Tompovavy ho amin’ny mandrakizay aho!»

ka dia tsy mba nandinika izany akory ianao,

na mba nitsapa izay hiafaran’izany rehetra izany.

8 Fa ankehitriny, mihainoa, ry ilay nihantahanta,

izay nipetraka tsy nanana ahiahy akory,

sy nilaza tao am-ponao hoe:

«Izaho ity, dia izaho irery ihany!

tsy ho mpitondratena na oviana na oviana aho,

na hofoanana anaka!»

9 Kanjo ireo zava-droa ireo ho indray mianjera aminao,

tampoka, indray andro monja,

dia ny fahafoanana anaka, sy ny fananoantena,

ho tonga aminao tanteraka an-tsakany sy an-davany izany,

na dia eo aza ny hamaroan’ny odinao,

na dia eo aza ny herin’ny fankatoavanao.

10 Fa nitoky tamin’ny hafetsenao ratsy ianao,

nanao hoe: «Tsy misy mahita ahy!»

Ny fahendrena amam-pahaizanao,

dia izany no nanodòka anao

raha ianao nanao anakampo hoe:

«Izaho ity, dia izaho irery ihany!»

11 Indro, ho tonga aminao ny loza,

tsy azonao sakanana;

hianjera aminao ny antambo,

tsy azonao ahodivitra,

ary hanjò anao ny faharavana tampoka,

tsy nampoizinao velively akory.

12 Aoka àry ianao haharitra amin’ny fankatoavanao,

sy amin’ireo odinao marobe,

izay nanarananao fo hatramin’ny fahatanoranao.

Soa mba mety hahita soa amin’izany ianao;

sao mba mety hampahatahotra, ianao!

13 Efa nisasatra tamin’ny fanontaniana betsaka ianao;

ka aoka handroso hamonjy anao ireo izy ireo,

izay mpandrefy ny lanitra,

sy mpandinika ny kintana,

izay manambara, isaky ny tsinam-bolana,

ny zavatra tsy maintsy ho tonga aminao.

14 Indreo izy, fa tonga tahaka ny vodivary;

hodoran’ny afo, nefa tsy hahavonjy ny ainy,

amin’ny herin’ny lelafo;

fa tsy mba vain’afo hamindroana akory ity

na afo hitaninana eo anoloany!

15 Ho toy izany aminao ireo nanasaranao tena,

ireo nifampiraharahanao, hatramin’ny hatanoranao:

samy mipariaka amin’izay alehany avy izy,

fa tsy misy hamonjy anao!

I Iaveh irery no miasa sady Tompon’ny ho avy

1 Mihainoa izao, ry taranak’i Jakôba,

ianareo izay antsoina amin’ny anaran’i Israely;

nateraky ny loharanon’i Jodà,

mianiana amin’ny Anaran’i Iaveh,

ary mankalaza ny Andriamanitr’i Israely,

nefa tsy amin’ny fo mahitsy na araka ny hitsim-po.

2 Fa maka ny anarany amin’ny tanàna masina izy ireo,

sy miankina amin’ny Andriamanitr’i Israely,

izay mitondra Anarana hoe: Iavehn’ny tafika.

3 Ny zavatra taloha, dia efa nambarako hatramin’ny ela;

naloaky ny vavako izany, sady nantsoiko ampahibemaso;

ary tampoka Aho dia nanao,

ka tanteraka ireo zavatra ireo.

4 Noho ny fahalalako fa ianao dia mafy hatoka,

ary anjam-by ny vozonao,

sy varahina ny handrinao,

5 dia nambarako taminao hatramin’ny ela izany zavatra izany;

nolazaiko taminao talohan’ny hahatongavany izany,

fandrao lazainao hoe: «Ny sampiko no nanao izany;

ny andriamanitro hazo na anidina no nandidy izany.»

6 Efa nandre izany ianao;

jereo fa tanteraka avokoa izy;

fa ianareo kosa, tsy hanambara izany va ianareo?

Ankehitriny mampandre anao zava-baovaoAho,

dia zava-miafina mbola tsy fantatrao.

7 Vao izao no noarîna izany, fa tsy taloha;

hatramin’izao anio izao, tsy mbola nandre izany ianao,

fandrao lazainao hoe: «Indro fa efa fantatro ihany izany.»

8 Tsy mbola nandre izany ianao,

tsy nahalala izany ianao;

tsy mbola nandre izany velively ny fonao.

Satria fantatro ianao fa mpivadika loatra,

ary ny anaranao hatrany an-kibon-dreninao dia hoe

mpivadika.

9 Noho ny Anarako, dia manindry ny hatezerako Aho,

ary noho ny voninahitro, dia mandefitra aminao Aho,

mba tsy hamongorana anao.

10 Indro fa nandrendrika anao Aho,

nefa tsy nahazo volafotsy;

ary nizaha toetra anao tamin’ny memin’ny fahoriana Aho.

11 Noho ny fitiavako ny Tenako, dia noho ny

fitiavako ny Tenako no hanaovako izany;

satria ahoana no hanazimbana ny Anarako?

Tsy hafoiko ho an’ny hafa ny voninahitro.

Olon-tian’i Iaveh i Sirosy

12 «Mihainoa Ahy, ry Jakôba,

sy ianao, ry Israely, izay nantsoiko;

Izaho dia izaho ny voalohany, izaho koa no farany.

13 Ny tanako ihany no nanorina ny tany,

ary ny tanako ankavanana no namelatra ny lanitra;

izaho no miantso azy ireo,

dia tonga miaraka amin’izay izy.

14 Mivoria ianareo rehetra, ka mihainoa:

Iza tamin’ireny no mba efa nilaza izany?

Ilay tian’i Iaveh dia hanatanteraka ny sitrapony amin’i Babela,

ary ny sandriny hamely ny Kaldeanina. –

15 Izaho dia Izaho ihany no niteny sady niantso azy;

nasaiko tonga izy, ka hambinina ny alehany.

16 Manatòna Ahy ianareo, ka henoy izao:

Hatramin’ny voalohany, tsy niteny an-takontakona Aho;

hatramin’ny ahatongavan’ireo zavatra ireo dia eo Aho;

– Ary ankehitriny i Iaveh, Tompo,

maniraka ahy omban’ny Fanahiny.»

Ny nokasain’i Iaveh hanaovana an’i Israely

17 Izao no lazain’i Iaveh mpanavotra anao,

ilay Masin’i Israely:

«Izaho Iaveh, Andriamanitrao,

mampianatra anao mba hahitanao soa;

mitarika anao amin’ny lalana tokony halehanao aho.

18 Enga anie ka hihaino ny teniko ianao,

dia ho tahaka ny ony ny fiadananao;

ho tahaka ny onjan-dranomasina ny fahamarinanao;

19 ho tahaka ny fasika ny taranakao;

dia ho tahaka ny vovo-pasika, ny haloaky ny kibonao;

tsy hoesorina ny anarany,

na hovonoina eo anatrehako.»

Hira nialana avy ao Babilôna

20 «Mivoaha avy ao Babilôna, mandosira ny Kaldeanina,

amin’ny hobin-kafaliana!

Torio izany, ataovy antso avo koa,

ampandreneso hatrany am-paran’ny tany!

Lazao hoe: I Iaveh efa nanavotra

an’i Jakôba mpanompony!

21 Tsy mangetaheta ireo any amin’ny efitra nitondrany azy;

fa mampiboiboika rano avy amin’ny vatolampy Izy ho an’ireo;

mampitresaka ny vatolampy Izy, dia migororoana ny rano.

Tsy misy fiadanana ho an’ny ratsy fanahy, hoy i Iaveh.»

Hira faharoan’ilay Mpanompon’i Iaveh

1 Mihainoa ahy, ry Nosy;

mitandrema ianareo, ry firenena lavitra!

I Iaveh efa niantso ahy hatrany am-bohoka,

efa nilaza ampahibemaso ny anarako,

hatrany an-kibon’i neny.

2 Nataony sabatra maranitra ny lelako;

nalofany tamin’ny aloky ny tanany aho;

nataony zana-tsipìka maranitra aho,

nafeninyteo amin’ny tranon-jana-tsipìkany.

3 Ary hoy Izy tamiko: «Mpanompokoianao, ry Israely,

izay hataoko reharehako.»

4 Dia hoy kosa aho: «Foana ny nisasarako;

zava-poana sy tsinontsinona, no nandaniako ny heriko;

fa ao amin’i Iaveh ny rariny ananako,

ao amin’Andriamanitro ny valisoa ho ahy.»

5 Ary ankehitriny miteny i Iaveh,

izay namorona ahy hatrany am-bohoka mba ho mpanompony,

hampody an’i Jakôba aminy indray,

ary mba ho tafakambana aminy indray i Israely.

– Ary mahazo voninahitra eo imason’i Iaveh aho,

ary Andriamanitro no heriko. –

6 Hoy Izy: «Mbola zavatra kely foana

ny maha-Mpanompoko anao,

hanangana ny firenen’i Jakôba indray,

sy hampody ireo sisa voatahiry amin’i Israely;

fa hatsangako ho fahazavan’ny firenena ianao,

mba hitaran’ny famonjeko

hatramin’ny faran’ny tany.»

Ny nodiana tantaraina an-kira

7 Izao no lazain’i Iaveh,

ilay Mpanavotra sy ilay Masin’i Israely;

amin’ilay esoina sy tevatevain’ny vahoaka,

mpanompon’ny mpanapaka masiaka:

«Hahita anao ny mpanjaka, ka hitsangana;

ary ny mpanapaka, ka hiankohoka,

noho ny amin’i Iaveh izay mahatoky,

sy ilay Masin’i Israely izay nifidy anao.»

8 Izao no lazain’i Iaveh:

«Mihaino anao amin’ny andro fankasitrahana Aho,

ary mamonjy anao amin’ny andro famonjena;

niaro anao Aho,

ary nanangana anao ho faneken’ny firenena,

hanandratra indray ny tany, hizara ny loza nosimbana;

9 hilaza amin’izay lasan-ko babo hoe: ‹Mivoaha!›

sy amin’izay ao anatin’ny aizina hoe:

‹Mankanesa atỳ amin’ny mazava;›

hahazo hiraotra izy ireo manaraka ny lalana,

ary ny vilon-kohaniny dia eny amin’ny havoana rehetra;

10 tsy ho noana izy na hangetaheta,

tsy ho tratry ny fasika mahamay, na ny masoandro.

Fa ilay mamindra fo aminy no hitarika azy ireo,

sy hitondra azy ho eo amin’ny rano miboiboika.

11 Hataoko lalana ny tendrombohitra rehetra;

ary hasandratra indray ny lalako.

12 Indreo ny sasany avy lavitra,

indreo ny sasany avy any avaratra sy avy any andrefana,

ary indreo koa ireo avy any amin’ny tanin’ny Sinima.

13 Mihobia an-kafaliana, ry lanitra; miontàna, ry tany!

Velomy ny hobin-kafaliana, ry tendrombohitra!

Fa i Iaveh efa nampionona ny vahoakany,

sy nangoraka ireo izay nampahorîna!»

14 Hoy Siôna: «Nafoin’i Iaveh aho;

hadinon’ny Tompo aho!» –

15 Hanadino ny taizany va ny vehivavy,

ka tsy hamindra fo amin’ny naloaky ny kibony?

Na hanadino aza ny reny,

Izaho tsy mba hanadino anao!

16 Jereo, efa vitako tombo-kavatsa eo amin’ny felatanakoianao;

eo anatrehako mandrakariva ny mandanao.

17 Ny zanakao, tamy faingana;

ry zareo nanimba sy nandrava anao, manalavitra anao.

18 Atopazo manodidina ny masonao, ka jereo,

fa mivory avokoa izy ireo, manatona anao izy ireo.

Velona Aho, – teny marin’i Iaveh, –

dia hihaingoanao, toy ny firavaka, ireo rehetra ireo;

ary hisikinanao toy ny sikin’ny ampakarina.

19 Fa ny tanànanao rava, ny efitrao, ny taninao foana,

ireo rehetra ireo dia tsy ho ampy

amin’izay ho an’ny mponina eo aminao;

ary izay nandany anao, lasa lavitra!

20 Amin’izany, hiteny eo an-tsofinao

ireo zanakao nesorina taminao, hanao hoe:

«Ety loatra aho amin’ity tany ity,

ka omeo fitoerana hahazoako honenana aho;

ka ataovy izay hahazoako tany honenana.»

21 Ary ianao kosa hanao anakampo hoe:

«Iza no niteraka ireto ho ahy?

Fa tsy nanan-janaka aho, momba aho,

noroahina sy nisaorana aho;

ary ireto kosa, iza no nitaiza azy?

Indro Aho nitoetra irery;

ka taiza ireto?»

22 Izao no lazain’i Iaveh Tompo:

Indro Aho hanandratra ny tanako amin’ny firenena,

ary hanangana ny fanevako amin’ny vahoaka;

dia hoentiny miverina eo an-tanany ny zanakao lahy;

ary hoentiny miverina eny an-tsorony, ny zanakao vavy.

23 Mpanjaka lahyno ho mpitaiza anao

ary ny andriambaviny no ho mpitaiza anao;

hiankohoka amin’ny tany eo anatrehanao izy ireo,

ary hilelaka ny vovoka amin’ny tongotrao;

dia ho fantatrao fa Iaveh Aho,

ary tsy ho menatra izay manantena Ahy.

24 Fa moa alaina amin’ny mahery va ny rembiny,

ary mety ho afaka hitsoaka va ny marina lasan-ko babo?

25 Izao no lazain’i Iaveh:

Halaina aminy na ny sambotry ny mahery aza,

ary ho afaka aminy ny babon’ny mpanao an-keriny.

Fa ny mpandrafy anao, dia Izaho no hiady aminy,

ny zanakao, dia Izaho no hamonjy azy ireo.

26 Hataoko mihinana ny nofonyny mpampahory anao;

hidoroka amin’ny ran’ny tenany,

hoatra ny amin’ny divay vaovao;

dia ho fantatry ny nofo rehetra

fa Izaho Iaveh no Mpamonjy anao,

ary ilay Maherin’i Jakôba no mpanavotra anao!

Vonon-kamonjy hatrany Andriamanitra

1 Izao no lazain’i Iaveh:

Aiza izay taratasy fisaorana an-dreninao,

nisaorako azy?

Iza no manan-trosa amiko, nivarotako anareo?

Tsia, noho ny tsy fahamarinanareo ihany,

no nivarotana anareo;

noho ny fahotanareo ihany, no nisaorana an-dreninareo.

2 Tonga Aho: nahoana no tsy nisy olona?

Niantso Aho: nahoana no tsy nisy namaly?

Moa fohy tanana va Aho, ka tsy afa-namonjy?

Sa tsy ampy hery hoenti-manafaka?

Vao rahonako fotsiny dia maina ny ranomasina,

zary efitra ny ony, maimbo ny hazandranony,

fa ritra ny rano, ka matin’ny hetaheta ireny.

3 Azoko tafiana fahamaintisana ny lanitra,

sy saronana amin’ny lamba fisaonana.

A – Tenin’ilay Mpanompon’i Iaveh

4 Nomen’i Iaveh Tompo,

ny lelan’ny mpianatra aho,

mba hahaizako mankahery ny reraka, amin’ny teniko.

mamoha isa-maraina izy;

mamoha ny sofiko izy,

mba hihainoako, hoatra ny fihainon’ny mpianatra.

5 Nosokafan’i Iaveh Tompo ny sofiko,

ary tsy mba nanohitra aho,

na nihemotra akory,

6 Natolotrotamin’ny mpikapoka ahy ny lamosiko;

ary tamin’ireo nanongotra ny volombavako, ny takolako;

ary ny tavako tsy nafeniko tamin’ny latsa sy ny rora.

7 Fa i Iaveh Tompo namonjy ahy,

ka ny latsa tsy nahaketraka ahy;

ka ny tavako nataoko manahaka ny afovato,

ary fantatro fa tsy ho menatra aho.

8 Akaiky ilay manamarina ahy: iza no handahatra manohitra ahy?

Aoka hifanatrika isika!

Iza no manohitra ahy? Aoka izy hankatỳ amiko! –

9 I Iaveh Tompo namonjy ahy: Ka iza no hanameloka ahy?

He! ho kotikotika hoatra ny voro-damba izy rehetra,

ho lanin’ny kalalao!

B – Famporisihana hanaraka an’ilay Mpanompo

10 Iza aminareo no matahotra an’i Iaveh,

sy mihaino ny feon’ny Mpanompony?

Na iza na iza mandeha amin’ny maizina,

sy tsy manana fahazavana,

aoka izy hatoky ny Anaran’i Iaveh,

sy hiankina amin’ny Andriamaniny!

11 Fa ianareo rehetranampirehitra afo kosa,

sy mandray zana-tsipìka mirehitra ho fiadiana,

mandehana amin’ny lelafonareo,

sy eo afovoan’ny zana-tsipìka narehitrareo!

Izao no hanjò anareo avy amin’ny tanako;

hampandrina amin’ny fahoriana ianareo!