Category: Jeremia

1 Nony tamin’ny volana fahafito, tonga tao amin’i Godoliasa zanak’i Ahikama tao Masfà, i Ismaely zanak’i Nataniasa zanak’i Elisamà, taranak’andriana, nomban’ireo andriambaventin’ny mpanjaka sy olona folo lahy koa, dia niara-nihinana tao Masfà izy ireo.

2 Ary nitsangana i Ismaely, zanak’i Nataniasa, mbamin’ireo olona folo lahy niaraka taminy, ary namely sabatra an’i Godoliasa zanak’i Ahikama, zanak’i Safàna, ka matiny izy ilay napetraky ny mpanjakan’i Babilôna ho governora amin’ny tany,

3 mbamin’ny Jodeanina rehetra, izay tao aminy, dia tao amin’i Godoliasa, tao Masfà; novonoin’i Ismaely koa ny Kaldeanina sendra tao, dia ny olona mpiady.

4 Nony afak’ampitson’ny andro namonoana an’i Godoliasa, raha mbola tsy nisy olona nahalala izany akory,

5 nisy olona valopolo lahytonga avy any Sikema sy Silô ary Samaria, samy voaharatra ny volombavany, voatriatra ny fitafiany, voatetikany tenany, nitondra fanatitra aman’emboka manitra, haterina ao an-tranon’i Iaveh.

6 Nivoaka avy ao Masfà i Ismaely zanak’i Nataniasa, hitsena azy ireo, sady nitomany ka nony tafahaona taminy, dia nanao tamin’izy ireo: «Andeha ianareo ho ao amin’i Godoliasa zanak’i Ahikama.»

7 Kanjo vao tonga teo afovoan’ny tanàna izy ireo, dia novonoin’i Ismaely, zanak’i Nataniasa sy iretsy olona niaraka taminy, ka natsipiny tao afovoan’ny lava-drano.

8 Nisy folo lahy tamin’izy ireo anefa, nilaza tamin’i Ismaely hoe: «Aza mba vonoina izahay, fa manam-pitaovana miafina any an-tsaha, dia varimbazaha, orja, diloilo, sy tantely.» Ka dia nijanona izy, fa tsy namono an’ireo teo afovoan’iretsy rahalahiny.

9 Ny lava-drano nanarìan’i Ismaely ny fatin’ireo olona novonoiny noho ny amin’i Godoliasa, dia ilay nataon’i Asa, mpanjaka, noho ny amin’i Baasa, mpanjakan’i Israely, io no nofenoin’i Ismaely zanak’i Nataniasa, faty.

10 Dia nentin’i Ismaely ho babo ny olona sisa tao Masfà, ireo zanaka vavin’ny mpanjaka mbamin’ny vahoaka rehetra tafajanona tao Masfà, izay nomen’i Nabozardàna lehiben’ny mpiambina an’i Godoliasa zanak’i Ahikama, ho filohany; nentin’i Ismaely zanak’i Nataniasa ho babo ireo, dia lasa nankany amin’ny taranak’i Amôna izy.

11 Nony ren’i Johanàna zanak’i Karea mbamin’ny mpifehy miaramila rehetra teo aminy ny ratsy rehetra nataon’i Ismaely zanak’i Nataniasa,

12 dia nitondra ny miaramilany rehetra izy ka niainga hiady amin’i Ismaely zanak’i Nataniasa; tratrany tao akaikin’ny kamory lehibe ao Gabaôna io.

13 Faly ireo vahoaka rehetra teo amin’i Ismaely, nony nahita an’i Johanàna zanak’i Karea, mbamin’ny mpifehy miaramila rehetra niaraka taminy,

14 ka niverina nandeha nikambana tamin’i Johanàna zanak’i Karea, avokoa ny vahoaka rehetra nentin’i Ismaely ho babo avy any Masfà.

15 Fa i Ismaely zanak’i Nataniasa no afa-nandositra teo anatrehan’i Johanàna ka nankany amin’ny taranak’i Amôna, nomban’ny olona valo lahy.

16 Noraisin’i Johanàna zanak’i Karea mbamin’ny mpifehy miaramila rehetra nomba azy, ny vahoaka sisa rehetra izay efa nentin’i Ismaely zanak’i Nataniasa, avy any Masfà, nony avy namono an’i Godoliasa, zanak’i Ahikama izy, dia ny olona mpiady, ny zaza amam-behivavy, ary ny eonòka, ka nentiny niverina avy any Gabaôna izy ireo.

17 Dia nandeha izy ireo, ka teo amin’ny tranom-bahiny ao Kanaama, akaikin’i Betlehema, no nijanona, vao lasa nankany Ejipta,

18 nanalavitra ny Kaldeanina izay natahorany, noho ny namonoan’i Ismaely zanak’i Nataniasa an’i Godoliasa zanak’i Ahikama, izay napetraky ny mpanjakan’i Babilôna, ho governoran’ny tany.

Ny nandosirana tany Ejipta

1 Tamin’izay, nanatona an’i Jeremia avokoa ny mpifehy miaramila rehetra mbamin’i Johanàna zanak’i Karea, i Jezoniasa zanak’i Osaiasa, ary ny vahoaka rehetra na kely na lehibe,

2 ka nanao taminy hoe: «Aoka ho tonga eo anatrehanao anie izao fihantanay izao: mivavaha amin’i Iaveh Andriamanitrao, ho an’izao sisa rehetra izao, fa maro izahay taloha, nefa efa tonga vitsy sisa araka izao hitan’ny masonao izao.

3 Aoka hambaran’i Iaveh Andriamanitrao aminay, izay lalana tokony hizoranay, sy izay zavatra tokony hataonay.»

4 Ary hoy i Jeremia mpaminany, namaly azy ireo: «Dia reko izany; ka indro aho, hivavaka amin’i Iaveh Andriamanitrareo araka ny teninareo; ary hambarako aminareo avokoa, fa tsy misy hanafenako izay havalin’i Iaveh anareo.»

5 Dia hoy izy ireo tamin’i Jeremia: «Aoka i Iaveh ho vavolombelona marina sy mahatoky miampanga anay, raha tsy manatanteraka ny zavatra rehetra araka ny tenin’i Iaveh Andriamanitrao izay hampitondrainy anao ho anay izahay. Hanaiky ny feon’i Iaveh Andriamanitray, izay nanirahanay anao izahay,

6 na ho soa na ho ratsy, mba hiavian’ny soa aminay amin’ny fanekenay ny feon’i Iaveh Andriamanitray.»

7 Nony afaka folo andro, tonga tamin’i Jeremia ny tenin’i Iaveh,

8 ka nantsoin’i Johanàna zanak’i Karea, mbamin’ny mpifehy miaramila rehetra teo aminy, sy ny vahoaka rehetra na kely na lehibe,

9 dia nilazany hoe: Izao no lazain’i Iaveh Andriamanitr’i Israely, izay nanirahanareo ahy hitondra eo anatrehany ny hatakareo:

10 Raha manohy ny fonenana amin’ity tany ity ianareo, dia haoriko fa tsy horavako, hamboleko fa tsy hongotako, fa anenenako ny loza namelezako anareo.

11 Aza matahotra ny mpanjakan’i Babilôna, izay atahoranareo; aza matahotra azy – teny marin’i Iaveh, – fa momba anareo Aho, hamonjy sy hanafaka anareo amin’ny tanany.

12 Hataoko mahazo famindram-po ianareo, ka hamindra fo aminareo izy, dia hampody anareo amin’ny taninareo.

13 Fa raha hoy kosa ianareo: Tsy honina amin’ity tany ity izahay, ka tsy manaiky ny feon’i Iaveh Andriamanitrareo ianareo;

14 raha hoy ianareo: Tsia, fa any Ejipta no halehanay, izay tsy hahitanay ady, tsy handrenesanay feon’anjomara, tsy hahatsiarovanay noana, ka any no honenanay;

15 dia henoinareo ny tenin’i Iaveh, ry sisa amin’i Jodà: Izao no lazain’i Iaveh Andriamanitr’i Israely: Raha mitodi-maso mankany Ejipta ianareo mba ho any ka miditra hitoetra any ianareo,

16 ny sabatra atahorananreo, hahatratra anareo any amin’ny tany Ejipta, ny mosary ahìnareo mafy, hanjòhy anareo any Ejipta, ary ho faty any ianareo.

17 Izay rehetra mitodi-maso mankany Ejipta mba ho any sy honina any, dia ho fatin’ny sabatra sy ny mosary ary ny pesta avokoa, fa tsy misy ho velona sy afa-mandositra ny loza hahàtrako aminy.

18 Fa izao no lazain’i Iavehn’ny tafika, Andriamanitr’i Israely: Toy ny niantefan’ny fahatezerako amam-pahavinirako tamin’ny mponina tao Jerosalema, no hiantefan’ny fahatezerako aminareo, nony tafiditra any Ejipta ianareo, ka dia ho fisahato, fitalanjonana, fanozona ary fandàtsan’ny olona ianareo sady tsy hahita ity tany ity intsony.

19 Ry sisa amin’i Jodà ô, izao no lazain’i Iaveh aminareo: Aza miditra any Ejipta ianareo; fantaro tsara fa efa nanariko ampahibemaso ianareo izao androany.

20 Fa efa naningo-tena ianareo, tamin’ny nanirahanareo ahy ho any amin’i Iaveh Andriamanitsika, nanao hoe: Mivavaha amin’i Iaveh Andriamanitsika ho anay, fa izay rehetra holazain’Iaveh Andriamanitsika, dia ambarao anay fa hotanterahinay avokoa.

21 Nanambara izany taminareo aho androany, fa tsy nihaino ny feon’i Iaveh Andriamanitrareo kosa ianareo, na ny zavatra inona na ny zavatra inona nanirahany ahy ho aminareo.

22 Koa aoka ho fantatrareo marimarina izao, fa ho fatin’ny sabatra sy ny mosary ary ny pesta any amin’ny tianareo haleha honenana ianareo.

1 Nony tapitra voalazan’i Jeremia tamin’ny vahoaka rehetra avokoa ny tenin’i Iaveh Andriamaniny, ireo teny rehetra nanirahan’i Iaveh Andriamaniny azy ho aminy,

2 dia niteny i Azariasa zanak’i Osaiasa, sy i Johanàna zanak’i Karea, mbamin’ireo lehilahy mpiavonavona rehetra, ka nanao tamin’i Jeremia hoe: «Milaza lainga ianao; i Iaveh Andriamanitsika tsy naniraka anao hilaza aminay hoe: ‹Aza miditra any Ejipta mba hitoetra ao›.

3 Fa i Baròka zanak’i Nerià, no nanome fo anaohamely anay, mba hanolotra anay ho eo an-tanan’ny Kaldeanina, hahafaty anay sy hahalasan-ko babo anay any Babilôna.»

4 Ka dia tsy nihaino ny feon’i Iaveh nandidy azy hitoetra amin’ny tanin’i Jodà i Johanàna zanak’i Karea, sy ny mpifehy miaramila rehetra mbamin’ny vahoaka rehetra.

5 Fa nentin’i Johanàna zanak’i Karea, mbamin’ireo mpifehy miaramila rehetra ihany ny sisan’i Jodà rehetra, ireo izay efa niverina avy any amin’ny firenena rehetra nielezany, honina eo amin’ny tanin’i Jodà,

6 ny lehilahy, ny zaza amam-behivavy, ny zanaka vavin’ny mpanjaka, mbamin’ny olona rehetra navelan’i Nabozardàna lehiben’ny mpiambina niaraka tamin’i Godoliasa zanak’i Ahikama, zanak’i Safàna, ary koa i Jeremia mpaminany, mbamin’i Baròka zanak’i Nerià.

7 Niditra tany amin’ny tany Ejipta izy ireo, dia tonga hatrany Tafnesa, fa tsy nihaino ny feon’i Iaveh.

Nolazain’i Jeremia mialoha ny fanafihan’i Nabokodonozora

8 Ary tonga tamin’i Jeremia tao Tafnesa ny tenin’i Iaveh nanao hoe:

9 «Mitondrà vato lehibe eny an-tananao, ka afeno eo anatrehan’ny lehilahy amin’i Jodà, ataovy ao anaty simenitra eo amin’ny ngorodona taila, izay anoloan’ny tranon’i Faraôna, ao Tafnesa;

10 dia lazao amin’izy ireo hoe: Izao no lazain’i Iavehn’ny tafika, Andriamanitr’i Israely: Indro Aho haniraka haka an’i Nabokodonozora, mpanjakan’i Babilôna mpanompoko, sy hametraka ny seza fiandrianany eo ambonin’ireto vato nafeniko ireto; ary izy hamelatra ny karpetrany eo ambonin’ireo.

11 Ho avy izy, ka hamely ny tany Ejipta; ka izay ho amin’ny fahafatesana, matesa; izay ho amin’ny fahababoana, baboy; izay ho amin’ny sabatra, alavoin-tsabatra.

12 Handrehitra afo ao amin’ny tranon’ireo andriamanitr’i Ejipta Aho, ka hodorana izany, ary hoentiny babo ireo andriamanitra ireo; ary hihodidinany hoatra ny hihodidinan’ny mpiandry ondry ny lambany ny tany Ejipta, vao hiala eo amim-piadanana izy.

13 Ireo tsangam-bato ao an-tranon’ny Masoandro, eo amin’ny tany Ejipta, hotorotoroina, ary ireo tranon’ny andriamanitr’i Ejipta hodorana.»

Fara asan’i Jeremia: Ireo vehivavy Jody sy ny Mpanjaka vavin’ny lanitra

1 Ny teny tonga tamin’i Jeremia, ho an’ny Jodeanina rehetra nitoetra tany amin’ny tany Ejipta, dia izay nitoetra tany Migdôla, tany Tafnesa, tany Nôfa, sy tany amin’ny tany Fatoresa, nanao hoe:

2 Izao no lazain’i Iavehn’ny tafika, Andriamanitr’i Israely: Efa hitanareo ny loza rehetra nahàtrako tamin’i Jerosalema sy ny tanànan’i Jodà rehetra, fa indreo izy ankehitriny, fa efa tany lao sy tsy misy mponina intsony,

3 noho ny ratsy nataony hampahatezitra Ahy tamin’ny nandehanany hanatitra emboka manitra amam-panompoana amin’izay andriamani-kafa tsy nisy nahalala, na izy, na ianareo, na ny razanareo.

4 Efa naniraka ny mpaminany mpanompoko rehetra taminareo Aho, sady naniraka azy hatramin’ny vao maraina, hilaza aminareo hoe: «Aza dia manao izany fahavetavetana hàlako izany ianareo.»

5 Kanefa tsy nihaino izy ireo, na nanongilan-tsofina mba hialany amin’ny haratsiany sy tsy hanaterany emboka manitra intsony, amin’izay andriamani-kafa.

6 Ka dia niantefa tamin’izy ireo ny fahavinirako amam-pahatezerako, ka nirehitra tamin’ny tanànan’i Jodà sy ny lalam-ben’i Jerosalema, ka tonga tany lao sy efitra izany, araka ny hita ankehitriny izao.

7 Koa ankehitriny dia izao no lazain’i Iaveh, Andriamanitry ny tafika, Andriamanitr’i Israely: Nahoana ianareo no nampidi-doza mafy toy izao aminareo, dia izay haharingana anareo ao amin’i Jodà, na ny lehilahy na ny vehivavy aminareo, na ny zaza na ny vao minono aminareo, tsy hisy izay sisa havela akory;

8 dia izay hampahatezitra Ahy amin’ny asan-tananareo, amin’ny anateranareo emboka manitra amin’izay andriamani-kafa, eo amin’ny tany Ejipta, izay nidiranareo hitoerana, mba haharingana anareo, sy hahatonga anareo ho fanozona sy fandatsa amin’ny firenena rehetra ambonin’ny tany?

9 Hadinonareo va ny heloky ny razanareo, ny heloky ny mpanjakan’i Jodà, ny heloky ny vehivavy ao Jodà, ny heloky ny tenanareo, ary ny heloky ny vadinareo, izay nataony teo amin’ny tanin’i Jodà, sy teny an-dalamben’i Jerosalema?

10 Mandrak’androany izy ireo tsy mbola nanenina, tsy mbola nanan-tahotra, tsy mbola nandeha araka ny lalàko na ny didy nataoko teo anoloanareo sy teo anoloan’ny razanareo.

11 Noho izany, izao no lazain’i Iavehn’ny tafika, Andriamanitr’i Israely: Indro Aho hitodi-tava hamely anareo, hahatonga loza aminareo sy handringana an’i Jodà rehetra.

12 Halaiko ny sisa amin’i Jodà, izay nitodi-maso mankany Ejipta mba ho tonga hitoetra any: Ho levona any amin’ny tany Ejipta, dia ho lavo izy ireo: ho levon’ny sabatra sy ny mosary; na ny kely na ny lehibe, ho fatin’ny sabatra sy ny mosary izy ireo ary ho tonga fisahato, fitalanjonana, fanozona, ary fandatsa.

13 Toy ny namangiako an’i Jerosalema tamin’ny sabatra sy ny mosary ary ny pesta no hamangiako an’izay mitoetra eo amin’ny tany Ejipta.

14 Tsy hisy ho afaka handositra na ho velona ny sisa amin’i Jodà, tamin’ireo izay tonga mba honina eto amin’ny tanin’i Ejipta, ka hiverina indray amin’ny tanin’i Jodà, izay irin’ny fony hiverenany mba honenana. Satria tsy hisy hody any izy afa-tsy izay vitsivitsy afa-mandositra ihany.

15 Tamin’izay namaly an’i Jeremia ny lehilahy rehetra, nahalala fa efa nanatitra emboka manitra tamin’ireo andriamani-kafa, ny vadiny sy ny vehivavy rehetra tafavory teo amin’ny fivoriam-beary ny vahoaka rehetra nitoetra tany amin’ny tany Ejipta tao Fatoresa, ka nanao hoe:

16 «Tsy nihaino anao izahay amin’ny teny nolazainao taminay, amin’ny Anaran’i Iaveh.

17 Fa ny teny rehetra naloakan’ny vavany, dia tsy maintsy tanterahinay tokoa tokoa, amin’ny fanaterana emboka manitra amin’ny Mpanjaka vavin’ny lanitra, amin’ny fandraràhana fanatitra araraka ho azy, araka ny efa nataonay, dia izahay sy ny razanay ary ny mpanjakany ama-mpifehy anay tany amin’ny tanin’i Jodà sy teny an-dalamben’i Jerosalema. Tamin’izay, izahay voky hanina, niadana ary tsy nahita loza.

18 Fa hatramin’ny nitsaharanay tsy nanatitra emboka manitra ho an’ny Mpanjaka vavin’ny lanitra sy tsy nandrarahanay fanatitra araraka ho azy, vao tsy nanana na inona na inona izahay, sady levon’ny sabatra ama-mosary.

19 Ary raha nanatitra emboka manitra sy nandraraka fanatitra araraka ho an’ny Mpanjaka vavin’ny lanitra izahay, moa takona ny vadinayva ny nanaovanay mofomamy manambara azy, sy nandrarahanay fanatitra araraka ho azy?»

20 Dia niteny tamin’ny vahoaka rehetra i Jeremia, namelively ny lehilahy sy ny vehivavy sy ireo namaly azy toy izany, ka nanao taminy hoe:

21 «Tsy izany indrindra va no tsaroan’i Iaveh sy tafasondrotra tao am-pony, dia ny emboka manitra nodoranareo tany an-tanànan’i Jodà, sy teny an-dalamben’i Jerosalema, na ianareo sy ny razanareo, na ny mpanjakanareo ama-mpanapaka anareo, na ny vahoaka tamin’ny tany?

22 Tsy nahalefitra mihoatra noho izay intsony i Iaveh, noho ny haratsian’ny nataonareo, sy noho ny fahavetavetana notanterahinareo, ka dia zary efitra lao, voaozona, ary tsy misy mponina ny taninareo, araka izao hita anio izao.

23 Satria ianareo nanolotra emboka manitra sy nanota tamin’i Iaveh, fa tsy nihaino ny feon’i Iaveh, ny lalàny sy ny fitsipika aman-didiny; dia noho izany no niharan’izao loza manjò anareo izao ianareo, araka izao hita anio izao.»

24 Ka dia hoy i Jeremia tamin’ny vahoaka rehetra sy tamin’ny vehivavy rehetra nanao hoe: «Mihainoa ny tenin’i Iaveh, ianareo Jodà rehetra atỳ amin’ny tany Ejipta.

25 Izao no lazain’i Iavehn’ny tafika, Andriamanitr’i Israely: Ianareo sy ny vadinareo, samy efa nanambara tamin’ny vavanareo sy nanatanteraka tamin’ny tananareo nanao hoe: ‹Hoefainay tokoa ny voady nataonay, hanolotra emboka manitra sy handraraka fanatitra araraka ho an’ny Mpanjaka vavin’ny lanitra.› Aoka àry, ka efao ny voadinareo, aza diso ny manatanteraka ny voadinareo.

26 Koa mihainoa ny tenin’i Iaveh, ry Jodà rehetra mitoetra atỳ amin’ny tany Ejipta: Indro Aho fa mianiana amin’ny Anarako lehibe, hoy i Iaveh, fa tsy hotononin’ny vavan’ny lehilahy amin’i Jodà eran’ny tany Ejipta intsony, ny Anarako, hatao hoe: ‹Velona i Iaveh Tompo›.

27 Indro Aho miambina azy ireo, hampidi-doza fa tsy soa amin’izy ireo, ka dia ho levon’ny sabatra sy ny mosary avokoa, ny lehilahy amin’i Jodà, mandra-paharingany.

28 Ary izay vitsy kely no ho afa-mandositra ny sabatra, dia ho tafaverina any amin’ny tanin’i Jodà, avy atỳ amin’ny tany Ejipta. Ka dia ho fantatr’izay sisa amin’i Jodà rehetra, dia izay tonga tany Ejipta, hitoetra tany, izay tò teny, na izaho, na izy ireo.

29 Ary izao no famantarana ho anareo – teny marin’i Iaveh, – fa hovangiako eto amin’ity fitoerana ity tokoa ianareo, mba hampiharihary aminareo fa tsy maintsy tò mihitsy ny teniko hahatonga loza aminareo.

30 Izao no lazain’i Iaveh: Indro Aho manolotra an’i HôfràFaraôna, mpanjakan’i Ejipta, eo an-tanan’ny fahavalony, sy eo an-tanan’izay mitady ny ainy; toy ny nanolorako an’i Sedesiasa, mpanjakan’i Jodà, tamin’i Nabokodonozora, mpanjakan’i Babilôna, fahavalony sy nitady ny ainy.»

Teny fampaherezana an’i Baròka

1 Ny teny nolazain’i Jeremia mpaminany tamin’i Baròka zanak’i Nerià, fony izy nanoratra ireo teny ireo tamin’ny taratasy araka ny nanononan’i Jeremia azy, tamin’ny taona fahefatra nanjakan’i Jôakima, zanak’i Josiasa, mpanjakan’i Jodà, toy izao:

2 Izao no lazain’i Iaveh mpanjakan’i Israely ny aminao, ry Baròka:

3 Ianao nanao hoe: «Idiran-doza aho ity! fa tsindrian’i Iaveh alahelo ny fijaliako, reraky ny misento aho, fa tsy mahita fitsaharana.» Ka lazao aminy hoe:

4 Izao no lazain’i Iaveh: Indro fa izay efa noarîko ravàko, izay efa namboleko ongotako; dia izao tany rehetra izao.

5 Ary ianao kosa hitady zava-dehibe ho anao? Aza mitady izany, fa indro hahatonga loza amin’ny nofo rehetra Aho, – teny marin’i Iaveh, – fa ianao kosa homeko ny ainao ho babonao, any amin’izay fitoerana rehetra halehanao.

2 – ANDININDININY AMIN’IREO TENIN’ANDRIAMANITRA

1 Tenin’i Iavehtonga tamin’i Jeremia mpaminany, ny amin’ireo firenena mpanompo sampy.

Tenin’Andriamanitra mamely an’i Ejipta- Ho resy i Karkemisa

2 Ny amin’i Ejipta. Teny mamely ny tafik’i NekôFaraôna mpanjakan’i Ejipta, teo amoron’ny ony Eofrata, tao Karkemisa, izay resin’i Nabokodonozora. mpanjakan’i Babilôna, tamin’ny taona fahefatra nanjakan’i Jôakima, zanak’i Josiasa, mpanjakan’i Jodà.

3 Vonòny ny ampinga kely aman’ampinga be ka mandrosoa hiady!

4 Ataovy amin’ny kalesy ny soavaly;

Miakara ambony soavaly ianareo mpitaingina azy!

Ianareo misatroka fiarovan-doha, milahara!

Fotsio ny lefona, iakanjoy ny fiarovan-tratra.

5 Fa inona re ity hitako e? Raiki-tahotra izy ireo

ka miamboho lahy!

Resy ny mpiadiny!

Mandositra tsy miherika akory izy ireo!

Fa misy fampangorohoroana hatraiza hatraiza,

– teny marin’i Iaveh. –

6 Ny faingan-tongotra, aza afa-mandositra!

ny lehilahy mahery fo, aza afa-mitsoaka!

Any amin’ny tany avaratra, amoron’ny ony Eofrata,

indro izy mivembena dia lavo.

7 Iza izao miakatra hoatra an’i Nila

sy misamboaravoara ny onjany hoatra ny ony be?

8 I Ejipta izao miakatra hoatra an’i Nila izao,

ka misamboaravoara ny onjany hoatra ny ony be,

Hoy izy: «Hiakatra aho, ka hanapaka ny tany,

haringako ny tanàna mbamin’ny mponina ao aminy.

9 Mandrosoa, ry soavaly; mirimorimoa, ry kalesy!

Miaingà, ry mpiady!

Ry Etiôpianina sy Libianina mitana ampinga,

Ry Lidianina, mitana sy manenjana tsipìka!»

10 Fa andron’ny Tompo Iavehn’ny tafika ity,

andro famaliana, hamaliany ny fahavalony!

Mihinana ny sabatra ka mivoky,

etsaky ny ran’ireny izy;

fisoronana ho an’ny Tompo Iavehn’ny tafika izao,

any amin’ny tany avaratra amoron’ny ony Eofrata.

11 Miakara any Galaada, ka makà ditin-kazo manitra,

Ry virjiny, zanaka vavin’i Ejipta.

Mampitombo ny fanafody foana ianao;

fa tsy hanam-pahasitranana tsy akory.

12 Ren’ny firenen-tsamihafa ny henatrao;

manenika ny tany ny fikiakiakanao;

fa ny samy mahery no mifandona;

ka samy lavo izy roa tonta.

Fanafihana an’i Ejipta

13 Teny nataon’i Iaveh tamin’i Jeremia, mpaminany, ny amin’ny hiavian’i Nabokodonozora mpanjakan’i Babilôna hamely ny tany Ejipta:

14 Torionareo any Ejipta, ampandreneso any Migdôla,

ampandreneso any Nôfa sy any Tafnesa;

ka lazao hoe: Milahara ianareo, ka miomàna;

fa efa mandripaka sahady eny amin’ny manodidina anareo ny sabatra!

15 Hanky! efa lavo ny maherinao,

tsy nahajoro izy,

satria nazeran’i Iaveh amin’ny tany izy.

16 Hamaroiny ny isan’izay tafintohina,

ka lavo mifanindry ireny, sady manao hoe:

«Mitsangàna isika, miverena any amin’ny firenentsika,

sy any amin’ny tany nahaterahantsika,

lavitra ny sabatra mahafaty olona.»

17 Izao no fiantsoantsony any: «Voa i Faraôna, mpanjakan’i Ejipta;

nandiso ny fotoana mety izy!»

18 Velona Aho, – teny marin’ny Mpanjaka,

tompon’ny anarana hoe: Iavehn’ny tafika:

Tahaka an’i Tabôra eo amin’ny tendrombohitra,

tahaka an’i Karmela, eo ambonin’ny ranomasina, dia tamy izy.

19 Fehezo ny entanao, entan-tambotra,

ry mponina zanaka vavin’i Ejipta,

fa indro i Nôfa ho zary tany efitra;

hodorana izy, ka tsy hisy mponina intsony.

20 I Ejipta dia ombivavy kely tsara tarehy fatratra,

fa misy fihitra tonga avy any avaratra.

21 Ny mpikarama eo aminy kosa,

hoatra ny zanak’omby voafahy.

Indreny miamboho koa izy ireo

dia miara-mandositra, fa tsy manohitra izy,

fa nihatra taminy ny androm-pahoriana,

dia ny fotoana hamaliana azy.

22 Ny feony diahoatra ny sasasasan’ny menarana mandeha;

satria marobe izy ireo no tonga,

dia tonga eo aminy, mitondra famaky,

sahala amin’ny mpikapa hazo.

23 Nokapain’ireo ny alany, – teny marin’i Iaveh, –

nefa nikitroka efa izaitsizy;

satria maro noho ny valala izy ireo,

ka efa tsy tambo isaina.

24 Mangaihay ny zanaka vavin’i Ejipta;

natolotra eo an-tanan’ny firenena any avaratra izy!

25 Hoy i Iavehn’ny tafika, Andriamanitr’i Israely:

Indro, hovangiako avokoa i Amôna any Nô,

sy i Faraôna sy i Ejipta, ireo andriamaniny sy ny mpanjakany,

ary i Faraôna mbamin’ireo natoky azy.

26 Ary hatolotra eo an-tanan’izay mitady ny ainy izy ireo,

dia eo an-tanan’i Nabokodonozora, mpanjakan’i Babilôna,

sy eo an-tanan’ny mpanompony.

Fa any aorian’izany, vao honenana izy,

toy ny tamin’ny andro taloha, – teny marin’i Iaveh.

27 Ary ianao, aza matahotra, ry Jakôba, mpanompoko,

aza manam-badi-po, ry Israely.

Indro ianao, halaiko avy any an-tany lavitra,

ary ny taranakao, avy any amin’ny tany nahababo azy.

Ho tafaverina i Jakôba, ka hiadana,

handry fehizay, tsy misy mpanaitaitra.

28 Aza matahotra ianao, ry Jakôba, mpanompoko,

– teny marin’i Iaveh, – fa momba anao Aho!

Haringako avokoa ny firenena rehetra

nandroahako anao.

Fa ianao kosa tsy mba haringako.

Hofaizako ara-drariny anefa ianao,

fa tsy dia havelako ho afa-potsiny tsy akory.

Tenin’Andriamanitra mamely ny Filistinina

1 Tenin’i Iaveh tonga tamin’i Jeremia mpaminany, ny amin’ny Filistinina, fony i Faraônatsy mbola namely an’i Gazà.

2 Izao no lazain’i Iaveh:

Indro, misy rano be misondrotra avy any avaratra;

dia tonga sahala amin’ny renirano maria tondraka,

ka hanafotra ny tany mbamin’izay rehetra ao aminy,

na ny tanàna, na ny mponina.

Mihorakoraka ny lehilahy,

ary midradradradra avokoa ny mponina amin’ny tany.

3 Rehefa re ny fikatraokan’ny tongo-tsoavaliny,

sy ny firodorodon’ny kalesiny aman-tabataban’ny kodiarany:

tsy miherika izay zanany intsony ny rainy,

fa efa miraviravy tanana fatratra ny olona.

4 Izany dia noho ny fahatongavan’ny andro

handringanana ny Filistininarehetra;

handripahana an’izay sisa amin’ny mpikambana

amin’i Tira sy i Sidona;

fa horavan’i Iaveh ny Filistinina,

izay sisa amin’ny nosy Kaftôra.

5 Tonga mangadihady loha i Gazà;

levona i Askalôna,

mbamin’ny lohasaha manodidina azy.

Mandra-pahoviana ianao no mbola hiteti-tena ihany?

6 Indrisy, ry sabatr’i Iaveh,

mandra-pahoviana no tsy hanam-pitsaharana ianao?

Midira indray ao amin’ny tranonao,

miatoa ary mandria!

7 Hataonao ahoana moa no fitsahatra,

fa nomen’i Iaveh didy ianao?

Mankany Aksalôna sy any amoron-dranomasina

no itarihany azy.

Tenin’Andriamanitra mamely an’i Moaba

1 An’i Moaba.

Izao no lazain’i Iavehn’ny tafika,

Andriamanitr’i Israely:

Loza ho an’i Nabô, fa rava;

safo-kenatra i Kariataima, fa azo;

safo-kenatra ny trano mimanda, fa voazera;

2 tsy misy intsony izay voninahitr’i Moaba!

Any Hesebona no hidinihana ny loza hamelezana azy:

Andeha hofongorantsika eo amin’ny firenena izy!

Ianao koa, ry Madmena, hatao gina;

mandeha manaraka eo aoriana ny sabatra.

3 Injany, avy ao Hôrônaima misy antsoantso hoe:

«Fandringanana sy fandravana lozan-tany re!»

4 Montsana i Moaba;

mandefa antsoantso ny ankizy madinika ao aminy.

5 Eny, fa misy fitomaniana ao amin’eny fiakaran’i Loita,

mitomany ny olona no miakatra eo;

eny, eo amin’ny fidinan’i Hôrônaima,

fitarainam-pahoriana no re.

6 «Mandosira, vonjeo ny ainareo!

Ho tahaka ny anjavidy an-tany foana anie izy.»

7 Fa noho ianao nitoky tamin’ny asan-tananao aman-drakitrao,

dia ho lasan’ny hafa koa ianao;

ary indray ho lasan-ko babo i Kamosy

mbamin’ny mpisorona amam-pilohany rehetra.

8 Ho tonga hamely ny tanàna rehetra ny mpandringana,

ka tsy hisy ho afaka aminy izy ireo na iray aza;

ny lohasaha, hosimbana; ary ny tanety, horobaina,

araka ny voalazan’i Iaveh.

9 Omeo elatra i Moaba, fa tokony hidina izy;

horavàna ny tanànany, ka tsy hisy mponina intsony.

10 Ho voaozona anie izay mitsilamodamoka amin’ny asan’i Iaveh!

Ho voaozona anie izay mihazona ny sabany tsy handatsa-dra!

11 Hatry ny fony mbola zaza i Moaba dia nandry feizay,

niotrika teo amin’ny faikany,

tsy nafindrafindra vilany,

tsy lasana ho any amin’ny fahababoana,

ka dia naharitra ny tsirony, ary tsy niova ny fofony.

12 Koa indro, tonga ny andro, – teny marin’i Iaveh, –

hanirahako mpamindra am-bilany, hamindra vilany azy,

hofoanany ny vilaniny,

ary hovakiny ny sininy.

13 Dia ho menatra i Moaba noho ny amin’i Kamosy

toy ny nahamenaran’ny taranak’i Israely,

noho ny amin’i Betelaizay nitokiany.

14 Ahoana no ahazoanareo milaza hoe: «Mpiady izahay,

lehilahy mahery an’ady izahay?»

15 I Moaba efa rava; ny tanànany efa midona-tsetroka;

ny zatovony voafantina, midina ho any am-pamonoana;

– teny marin’ny mpanjaka.

manana anarana hoe: Iavehn’ny tafika. –

16 antomotra ny fandravana an’i Moaba;

mimaona fatratra ny loza hanjò azy.

17 Ianareo rehetra mifanakaiky aminy,

samia mitsapa alahelo azy,

ary ianareo rehetra mahalala ny Anarany,

samia milaza hoe:

«Ahoana no dia tapaka ny tehina mafy toy izany,

ny tehim-panjakana kanto toy izany?»

18 Mietre amin’ny voninahitrao dia mipetraha amin’ny tany,

ry mponina, zanaka vavin’i Dibôna;

fa tafakatra hamely anao ny mpandringana an’i Moaba,

ny mandanao efa voazerany.

19 Mijanòna eo an-dalambe, ka mitazàna, ry kala mponina ao Arôera;

anontanio ny lehilahy mandositra, sy ny vehivavy mitsoaka,

ka ataovy hoe: «Inona no mihatra?»

20 «Mangaihay i Moaba, fa voazera;

samia ianareo mitoloko sy mitaraina!

Ambarao any Arnôna,

fa rava i Moaba!»

21 Misy fitsarana tonga,

mihatra amin’ny tany lemaka,

amin’i Helona, amin’i Jasà,

22 amin’i Mefaata, amin’i Dibôna,

amin’i Nabô, amin’i Beta-Deblataima,

23 amin’i Kariataima, amin’i Beta- Gamola,

amin’i Beta-Maona,

24 amin’i Kariota, amin’i Bôsrà,

sy amin’ny tanàna rehetra amin’ny tanin’i Moaba,

na ny lavitra na ny akaiky.

25 Voakapa ny tandrok’i Moaba,

ary tapaka ny sandriny, – teny marin’i Iaveh. –

26 Ataovy doroka izy, fa nitsangan-kanohitra an’i Iaveh.

Aoka i Moaba hihosinkosina amin’ny loany,

ary aoka izy koa ho tonga fihomehezana!

27 Fa moa i Israely tsy fihomehezana taminao va?

Moa nisy nahatratra azy ho naman’ny mpangalatra va?

no dia nihifikifi-doha ianao, isaky ny miteny ny aminy?

28 Ilaozy ny tanàna, mitoera any amin’ny vatolampiny,

ry mponina any Moaba, ka aoka ho tahaka ny domohina

izay manao ny akaniny eny ambonin’ny hantsana mangotanatana.

29 Efa renay ny avonavon’i Moaba, ilay fatra-piavonavona,

ny fisolanàndrany, ny avonavony, ny reharehany,

ary ny hambom-pony.

30 Izaho koa dia mahalala, – teny marin’i Iaveh, –

ny fihoa-bavany sy ny bedibedy foanany,

ary ny asany tsinontsinona.

31 Koa migogogogo aho, noho ny amin’i Moaba;

midradradradra aho, noho ny amin’i Moaba rehetra,

mitsetra ny olona, noho ny amin’ny mponina ao Kir-Heresa.

32 Mihoatra noho ny fitomaniana an’i Jazera no itomaniako anao,

ry tanimboalobok’i Sabamà.

Tafita ny ranomasina ny rantsanao

tafapaka amin’ny ranomasin’i Jazera izy.

Kanjo ny fitoazana anao amam-pitoazana ny voalobokao,

nianjeran’ny mpandringana.

33 Foana ny fifaliana amam-piravoravoana,

eo amin’ny saha voavoly hazo mamoa sy ny tanin’i Moaba;

nataoko tankina ny divay eo amin’ny barìka fandomam-boaloboka;

tsy hosihosena intsony amam-pihobiana maresaka izy;

ny hoby efa tsy hoby intsony.

34 Noho ny antsoantson’i Hesebona re hatrany Eleale;

hatrany Jasà, dia mandefa ny antsoantsony izy ireo;

hatrany Segôra ka hatrany Hôrônaima,

hatrany Eglata-Selisia,

fa mbamin’ny ranon’i Nemrima aza no ho tankina.

35 Tiako hofaranana ny amin’i Moaba, – teny marin’i Iaveh, –

izay miakatra ho eo amin’ny fitoerana avony,

sy manolotra emboka manitra amin’ny andriamaniny.

36 Koa mitaraina hoatra ny sodinany foko,

noho ny amin’i Moaba;

eny, ny foko, noho ny amin’ny mponina ao Kir-Heresa,

mitaraina hoatra ny sodina.

Koa very avokoa izay tombony efa azony.

37 Fa nibory ny loha rehetra,

voaharatra ny somotra rehetra,

misy tetika amin’ny tanana rehetra,

ary misy lasàka koa ny valahana.

38 Eny ambony tafon-trano rehetra sy eny amin’ny kianja ao Moaba,

tsy misy afa-tsy figogogogoana fotsiny;

fa nomontsaniko i Moaba

hoatra ny fanaka tsy ahoan’ny olona intsony,

– teny marin’i Iaveh. –

39 He ity fahatorotoròny! Mba misentoa ianareo.

He ity fiambòhon’i Moaba amin-kenatra!

Tonga fihomehezana i Moaba,

tonga fampitahorana ho an’izay rehetra mifanakaiky aminy izy.

40 Fa izao no lazain’i Iaveh:

Indro izy miezaka hanidina toy ny voromahery,

mamelatra elatra eo ambonin’i Moaba.

41 Azo i Kariota; afaka ny trano mimanda;

ary ny fon’ny mpiady maherin’i Moaba amin’izany andro izany,

dia toy ny fon’ny vehivavy mihetsi-jaza.

42 Voaongana i Moaba amin’ny maha-firenena azy,

satria nitsangan-kanohitra an’i Iaveh.

43 Tahotra, lavaka amam-pandrika,

no mitatao anao, ry mponina any Moaba,

– teny marin’i Iaveh. –

44 Izay mandositra ny zava-mahatahotra azy, voan’ny fandrika;

fa hataoko tonga aminy, dia amin’i Moaba,

ny taona famangiana azy, – teny marin’i Iaveh. –

45 Mijanona eo amin’ny alokalok’i Hesebona

ny mpandositra lany hery;

kanjo misy afo mivoaka avy ao Hesebona,

ary misy lelafoavy ao afovoan’i Sehôna;

ka nandevona ny valahan’i Moaba,

sy ny karan-dohan’ny zanaky ny fitabatabana.

46 Loza ho anao, ry Moaba!

Very ny vahoaka ao Kamosy;

fa ny zanakao lahy entina atao sesitany,

ny zanakao vavy lasan-ko babo.

47 Mbola hampodiko anefa ny voababo amin’i Moaba,

any amin’ny farandro any, – teny marin’i Iaveh. –

Hatreto ny fitsarana an’i Moaba.

1 Teny mamely ny taranak’i Amôna.

Izao no lazain’i Iaveh:

Tsy manan-taranaka va i Israely?

Tsy manan-kandova va izy?

Ahoana no nangalan’i Melkoma an’i Gada ho azy,

sy nakan’ny vahoakany fonenana eo amin’ny tanànany?

2 Noho izany, indro avy ny andro,

– teny marin’i Iaveh, –

hampikotrokotrohako ao Rabàn’ny taranak’i Amôna

ny akoran’ady.

Dia hanjary antontan-java-drava izy,

ary ny zanany hodorana amin’ny afo;

ary i Israely kosa handova ny an’ireo efa nandova ny azy,

– teny marin’i Iaveh. –

3 Migogogogoa, ry Hesebona, fa voaroba i Hai;

Midradradradrà, ry zanaka vavin’i Rabah,

misikìna lasàka, migogogogoa;

mivoivoiza manaraka ny fefy;

fa nentin-ko sesitany i Melkôma,

mbamin’ny mpisorony ama-mpanapaka miaraka aminy koa.

4 Ahoana ny ireharehanao amin’izay lohasahanao,

– mahavokatra be hoe ny lohasahanao, –

ry zanaka vavy mpiodina,

izay mitoky amin’ny harenao, manao hoe:

«Zovy moa no sahy handroso hamely Ahy?»

5 Indro Aho mitondra ny tahotra hamely anao;

– tenin’ny Tompo, Iavehn’ny tafika,-

avy amin’izay rehetra manodidina anao;

ka samy horoahina hizotra amin’izay hitsiny avy ianareo,

sady tsy hisy hamory izay mandositra akory.

6 Rehefa afaka anefa izany, mbola hampodiko

ny voababo amin’ny taranak’i Amôna,

– teny marin’i Iaveh. –

7 Teny mamely an’i Edôma.

Izao no lazain’i Iavehn’ny tafika:

Efa tsy misy fahendrena intsony va ao Temàna?

Lany hevitra va ireo mahira-tsaina?

Efa levona va ny fahendren’izy ireo?

8 Mandosira, miverena ilalana, mifitsaha ianareo,

ry mponina any Dedana,

fa hahatonga fandravana amin’i Esao Aho,

amin’ny andro hamangiako azy.

9 Raha mpioty voalobokano tonga aminao,

tsy mamela hotsimponina izy, na dia kely aza;

raha mpangalatra tonga alina kosa,

mandroba izy, mandra-pahafa-pony.

10 Fa Izaho no nampiboridana an’i Esao,

sy nampiharihary ny fiereny,

ka tsy afa-miery intsony izy.

Ringana avokoa ny taranany, ny rahalahiny,

ny mifanakaiky aminy,

ka tsy misy intsony izy.

11 Ilaozy ny kambotinao, fa Izaho no hamelona azy,

ary Izaho no aoka hitokian’ny mpitondra tena ao aminao.

12 Satria izao no lazain’i Iaveh:

Indro, fa izay tsy tokony hisotro amin’ity kapoaka ity

dia hisotro marina tokoa;

ka ianao kosa ve ho afa-potsiny?

Tsia, tsy ho afa-potsiny ianao,

fa hisotro azy marina tokoa!

13 Satria, izao no efa nianianako tamin’ny Tenako,

– teny marin’i Iaveh: –

I Bôsrà dia ho fitalanjonana sy fandatsa,

ho tany efitra sady voaozona;

ary ny tanànany rehetra ho rava mandrakizay.

14 Nahazo filazana avy amin’i Iaveh aho,

sady nisy iraka nalefa ho any amin’ny firenena hanao hoe:

«Mivoria ianareo, ary mandehana mamely azy,

mitsangàna ianareo mba hiady!»

15 Fa efa nataoko kely bitika ianao eo amin’ny firenena,

ataon’ny olona tsy ho zavatra.

16 Nahasodòka anao ny tahotra nampihorohoroanao ny olona

sy ny hambom-ponao,

ianao izay monina eny an-tsefatsefa-bato,

sady mitoetra eny an-tampon-kavoana.

Nefa na hataonao avo toy ny an’ny voromahery aza ny akaninao,

dia havariko avy any ianao, – teny marin’i Iaveh.-

17 Ho zary fitalanjonana i Edôma:

Ho talanjona avokoa ny mpandalo,

sady hisitrìsitra, mahita ny feriny rehetra.

18 Hanahaka ny nandravana an’i Sôdôma sy i Gômôra

mbamin’ireo tanàna nanodidina azy izy, hoy i Iaveh;

ka tsy hisy olona monina ao,

na hisy zanak’olombelona hipetraka ao.

19 Indro izy, miakatrasahala amin’ny liona

avy ao an-kirihitralan’i Jordany izay misy vilona mandrakariva;

ka hampandosiriko tampoka hiala ao Edôma,

dia ilay voafidiko no hapetrako ao.

Fa iza moa no tahaka Ahy? Zovy no hihantsy Ahy?

ary iza moa no mpiandry ondry hifanandrina amiko?

20 Ka henoy àry ny fikasana naraikitr’i Iaveh

hamelezana an’i Edôma,

sy ny hevitra nosaininy hamelezana ny mponina any Temàna:

eny, hotaritarihina hoatra ny ondry malemy izy;

eny, hitanàka mihitsy ny taniny fiandrasana biby fiompy.

21 Mihorohoro ny tany, azon’ny fiezinezin’ny fianjerany,

re hatrany amin’ny Ranomasina Menany feony miantsoantso.

22 Indro izy misondrotra, miezaka manidina toy ny voromahery;

mamelatra ny elany eny ambonin’i Bôsrà;

ary ny fon’ireo mpiady maherin’i Edôma,

amin’izany andro izany,

dia tahaka ny fon’ny vehivavy mihetsi-jaza.

Tenin’Andriamanitra mamely tanàna maromaro any Siria

23 Teny mamely an’i Damasa.

Very hevitra i Hamata sy i Arfada,

fa nandre filazàn-doza izy,

ka nivarahontsaky ny tahotra,

mova tsy ny ranomasina

misamboaravoara tsy mety mitony.

24 Ketraka i Damasaka nihodina handositra;

azon’ny vadi-po izy;

ny fangirifiriana amam-panaintainana manindry azy,

tahaka ny vehivavy raha miteraka.

25 Zary haolo manao ahoana re ilay tanàna be voninahitra

ilay tanànam-pahafinaretana sy fifaliana.

26 Koa ho lavo eny amin’ny kianjany ny zatovony,

mbamin’ny miaramilany rehetra,

fa ho faty amin’izany andro izany izy ireo,

– teny marin’i Iavehn’ny tafika. –

27 Handrendrika afo ao anatin’ny mandan’i Damasa Aho,

ka handevona ny lapan’i Bena-Hadada izany.

Tenin’Andriamanitra mamely ireo foko arabo

28 Teny mamely an’i Sedarasy ireo fanjakan’i Hasora, izay nasian’i Nabokodonozora, mpanjakan’i Babilôna.

Izao no lazain’i Iaveh:

Mitsangàna, mandehana mamely an’i Sedara,

aringano ny taranaky ny Atsinanana!

29 Aoka halaina ny lainy sy ny biby fiompiny!

hoesorina aminy ny ambain-dainy,

mbamin’ny entany rehetra sy ny ramevany!

ary aoka hisy hiantsoantso aminy hoe:

«Misy fangorohoroana hatraiza hatraiza!»

30 Manavota aina ianareo,

mandosira araka izay tratry ny ainareo, mamitsaha,

ry mponina any Hasora! – teny marin’i Iaveh. –

Fa i Nabokodonozora mpanjakan’i Babilôna,

namoron-kevitra hamelezana anareo,

nanao fikasana hamelezana anareo,

31 «Mitsangàna, mandehana mamely firenena tsy manana ahiahy,

mandry feizay eo amin’ny fonenany,

– teny marin’i Iaveh, –

dia izay tsy manam-bavahady, na hidy, izay mitoka-monina.

32 Ny ramevany ho babonareo,

ny biby fiompiny, iray dia marenina, ho remby.»

Haeliko any amin’ny rivotra rehetra

ireo olona mihety fihirifana ireo,

ary hahatonga fandravana azy avy hatraiza hatraiza Aho,

– teny marin’i Iaveh. –

33 Ka dia ho zary fieren’amboadia i Hasora,

sy ho tany lao mandrakizay;

tsy hisy olona monina ao,

tsy hisy zanak’olombelona hipetraka ao akory.

Tenin’Andriamanitra mamely an’i Elama

34 Ny tenin’i Iaveh izay natao tamin’i Jeremia mpaminany, ny amin’i Elama, tamin’ny niandohan’ny nanjakan’i Sedesiasa mpanjakan’i Jodà, nanao hoe:

35 Izao no lazain’i Iavehn’ny tafika:

Indro fa andeha hotapahiko ny tsipìkan’i Elama,

izay fototry ny heriny.

36 Hitondra rivotra efatra ho amin’i Elama Aho,

avy amin’ny lafiny efatry ny lanitra,

dia haeliko amin’ireo rivotra rehetra ireo izy;

ka tsy hisy firenena

tsy ho tongan’ny mpandositra avy ao Elama.

37 Hampangovitra an’i Elama eo anoloan’ny fahavalony Aho,

sy eo anoloan’izay mitady ny ainy.

Hahatonga loza aminy Aho,

dia ny afon’ny fahatezerako mirehitra, –

teny marin’i Iaveh. –

Ary handefa sabatra eo aorian’izy ireo Aho,

mandra-pandringako azy.

38 Hapetrako ao Elama ny seza fiandrianako,

ka haripako avokoa, na mpanjaka na mpanapaka ao,

– teny marin’i Iaveh. –

39 Nefa any amin’ny farandro any,

hampodiko ny voababo tamin’i Elama,

– teny marin’i Iaveh. –

Tenin’Andriamanitra mamely an’i Babilôna

1 Ny teny notononin’i Iaveh tamin’ny alalan’i Jeremiampaminany, ny amin’i Babilôna sy ny tanin’ny Kaldeanina.

2 Ambarao any amin’ny firenena, torio izao,

manangàna saina, ka torionareo izao;

aza afeninareo fa lazao hoe: Azo i Babilôna.

Mangaihay i Bela! Voazera i Merodàka!

mangaihay ny sampiny, voazera ny andriamanitra tsy izy ao.

3 Fa misy firenena avy any avaratra miakatra hamely azy,

ka hataony lao ny taniny,

fa tsy hisy olo-monina intsony;

nitsoaka nandositra, na ny olona na ny biby, dia lasa,

– teny marin’i Iaveh. –

4 Amin’izany andro izany, sy amin’izany fotoana izany,

hiverina ny zanak’i Israely,

dia izy sy ny zanak’i Jodà koa miaraka aminy.

Hitomany eny am-pandehanana izy ireo,

ka hitady an’i Iaveh Andriamaniny.

5 Hanontany ny amin’i Siôna Izy, dia hitodika manatrika azy.

«Avia ianareo, ka miraiketa amin’i Iaveh isika,

amin’ny fanekena mandrakizay,

tsy hohadinoina na oviana na oviana.»

6 Efa andian’ondry nanjiona ny oloko,

narebirebin’ny mpiandry azy, teny an-tendrombohitra manodòka;

nitety ny tendrombohitra aman-kavoana ombieny ombieny izy,

ka nanadino ny valany.

7 Izay nahita azy ireo, nihinana azy avokoa;

ka hoy ny fahavalony: «Tsy meloka isika!

satria izy ireo efa nanota tamin’i Iaveh,

ilay fonenan’ny fahamarinana;

tamin’i Iaveh, ilay fanantenan’ny razany.»

8 Mandosira, mialà ao afovoan’i Babilôna ianareo,

ary mitsoaha miala ao amin’ny tanin’ny Kaldeanina;

aoka ho toy ny osy lahy, lohalalan’ny andiam-biby fiompy.

9 Fa indro Aho hanainga

sy handefa hamely an’i Babela

ny fitambaran’ny firenena lehibe

avy amin’ny tany any avaratra.

Hilahatra hiady aminy ireny ka hahafaka azy avy any;

ny tsipìkany dia tsipìkan’ny mpiady mahery

izay tsy mba miverina mitondra tanam-polo.

10 Dia horobaina i Kaldea,

ho voky avokoa izay handroba azy,

– teny marin’i Iaveh. –

11 Eny, mifaliaianareo; eny, miravoravoa ianareo,

ry mpamabo ny lovako;

eny, aoka hifalihavanja hoatra ny omby vavy kely

eny an-tanim-bilona ianareo;

sady haneno toy ny soavaly lahy!

12 Safo-kenatra ny reninareo;

mivoaramenan’ny henatra ilay niteraka anareo.

Indro izy, fa faraidiny amin’ny firenena,

efitra, tany foana, tany karankaina!

13 Noho ny hatezeran’i Israely, tsy honenana intsony izy,

fa ho tonga tany lao;

izay rehetra handalo eo akaikin’i Babela

ho talanjona sy hisitrìsitra avokoa mahita ny feriny.

14 Milahara hamely an’i Babela, manodidina azy, ianareo mitana tsipìka rehetra.

Tofiro izy, aza itsitsian-jana-tsipìka,

fa nanota tamin’i Iaveh.

15 Manaova akoran’ady amin’ny manodidina azy, hatraiza hatraiza;

manandra-tanana izy,

mirodana ny tilikambony, mikoa ny mandany.

Fa famalian’i Iaveh izao:

ampitondray valim-bonoana izy:

toraky ny nataony no ataovy aminy!

16 Aringano ao Babela izay mamafy,

sy izay mitana antsy fijinjana amin’ny andro fararano.

Eo anatrehan’ny sabatra mpandringana

samia mihodina ho any amin’ny fireneny avy;

samia mandositra ho any amin’ny taniny avy!

17 I Israely dia ondry mania

izay nohazain’ny liona:

ny voalohany nihinana azy, dia ny mpanjakan’i Asiria;

ilay anankiray hafa kosa indray, nanapatapaka ny taolany,

dia i Nabokodonozora, mpanjakan’i Babela.

18 Noho izany, izao no lazain’i Iavehn’ny tafika,

Andriamanitr’i Israely:

Indro Aho hamangy ny mpanjakan’i Babela sy ny taniny,

toy ny efa namangiako ny mpanjakan’i Asiria.

19 Dia hampodiko ho any amin’ny fonenany indray i Israely

ka hiraotra eny Karmela sy eny Basàna izy;

ary eny an-tendrombohitr’i Efraima sy i Galaada,

izy no handeha hivoky.

20 Amin’izany andro izany, sy amin’izany fotoana izany,

– teny marin’i Iaveh, –

hikaroka izay helok’i Israely ny olona, fa tsy hisy intsony izany,

ary izay fahotan’i Jodà, fa tsy ho hita intsony izany,

satria havelako heloka izay sisa navelako.

Ny nirodanan’i Babilôna ambara ao Jerosalema

21 Miaraka hamely ny tanim-piodinana,

sy hamely ny mponim-panasaziana,

ravao, aringano mifanarakaraka izy,

– teny marin’i Iaveh, –

ka tanteraho avokoa izay nandidiako anao.

22 Fikotrokotrok’ady eny amin’ny tany sy fandringanana be!

23 Ahoana re no naharava sy montsana

ilay fampohazan’ny tany rehetra?

Ahoana i Babela no zary zavatra maharikoriko,

eo afovaon’ny firenena?

24 Nofandrihako tamin’ny tady vavarana ianao, ka voa,

ry Babela, nefa tsy nampoizinao velively izany;

hita ianao ka voasambotra,

satria nila ady tamin’i Iaveh.

25 Novohan’i Iaveh ny firaketam-piadiany;

ka navoakany avy ao ny fitaovam-pahatezerany;

fa ananan’ny Tompo, Iavehn’ny tafika, raharaha

ny tanin’ny Kaldeanina.

26 Avia hamely azy avokoa ianareo any rehetra any,

vohay ny sompiny

ka atokotokoy hoatra ny antontam-bary, dia levòny;

fa aza avela hisy sisa na dia kely aza.

27 Vonoy avokoa ireo ombalahy, aoka hidina ho any am-pamonoana izy.

Loza ho azy fa tonga ny androny,

dia ny fotoana hamangiana azy.

28 Fikiakiak’ireo mandositra, sy ireo mitsoaka

miala amin’ny tanin’i Babela!

Manambara any Siôna ny famalian’i Iaveh Andriamanitsika izy,

dia ny famaliany noho ny amin’ny tempoliny!

Avonavona sy eboebo

29 Antsoy hamely an’i Babela ny mpandefa tsipìka,

mbamin’izay rehetra mpanenjana tsipìka,

mitobia manodidina azy ianareo;

aza misy afa-mandositra!

Valio araka ny asany izy.

Toraky ny nataony rehetra no mba ataony aminy kosa,

fa nitsangana hanohitra an’i Iaveh, hanohitra an’ilay Masin’i Israely.

30 Koa noho izany, ny zatovony ho lavo eny amin’ny kianjany,

ary ny lehilahy mpiadiny rehetra ho ringana avokoa,

amin’izany andro izany, – teny marin’i Iaveh. –

31 Indro Aho manandrina anao, ry ilay mpirehareha!

– tenin’ny Tompo, Iavehn’ny tafika, –

fa tonga ny andronao,

dia ny fotoana hamangiako anao.

32 Handraingiraingy ilay mpirehareha, ho lavo izy,

ka tsy hisy mpanarina;

horehetako afo ny tanànany,

ka ho levon’izany avokoa ny manodidina azy.

I Iaveh mpanavotra an’i Israely

33 Izao no lazain’i Iavehn’ny tafika:

ampahorîna ny zanak’i Israely

mbamin’ny zanak’i Jodà miaraka aminy koa;

mitana azy avokoa izay nitondra azy ho babo,

fa tsy mety mandefa azy.

34 Mahery anefa ny mpanao famaliana ho azy ireo,

Iavehn’ny tafika no Anaran’izy io;

ka hiaro azy ireo amim-pahefana tokoa izy

mba hampiadana ny tany,

sy hampangovitra ny mponina ao Babela.

35 Sabatra hamely ny Kaldeanina, – teny marin’i Iaveh,-

sy hamely ny mponina ao Babela,

sy hamely ny mpanapaka aman’olon-kendriny!

36 Sabatra hamely ny mpisandoka, ka aoka ho very saina izy!

Sabatra hamely ny maheriny, ka aoka hivadi-po ireny!

37 Sabatra hamely ny soavaly aman-kalesiny,

mbamin’ireo fakofakon’olona rehetra izay eo afovoany,

ka aoka ho toy ny vehivavy ireny!

Sabatra hamely ny rakiny, ka aoka horobaina ireny!

38 Faharitana anie no ho amin’ny ranony, ka aoka ho tankina!

Satria tanin-tsampiny

ary eo anatrehan’ireny zava-mampahatahotra ireny,

dia mirebireby izy ireo.

39 Koa ny biby any an’efitraaman’amboadia no honina eo,

ny ostritsa no hiorim-ponenana eo;

fa ny olona tsy hisy honina eo intsony mandrakizay;

tsy hisy mponina intsony eo, amin’ny taona mifandimby.

40 Toy ny tamin’nynandravan’Andriamanitra an’i Sôdôma

sy i Gômôra, mbamin’ireo tanàna manodidina azy,

– teny marin’i Iaveh, –

no tsy hisian’olona monina eo;

ny zanak’olombelona tsy hitoetra eo.

Ny vahoaka any avaratra sy ilay lion’i Jordany

41 Indro misy firenenaavy any avaratra;

firenena lehibe, omba-mpanjaka maro,

no mitsangana avy any amin’ny faran’ny tany.

42 Tsipìka aman-dongy no entiny an-tanana;

olo-masiaka tsy mahalala antra izy.

Mireondreona hoatra ny ranomasina ny feony,

mitaingin-tsoavaly izy,

milahatra hoatra ny olona iray monja,

hamely anao, ry zanaka vavin’i Babela.

43 Nandre izany ny mpanjakan’i Babela

dia niraviravy tanana,

nandry andriran’antsy,

tra-panaintainana toy ny vehivavy eo am-piterahana.

44 Indro izymiakatra toy ny liona,

avy ao an-kirihitralan’i Jordany, izay misy vilona mandrakariva,

fa tampoka kosa no hampandosirako azy ireo hiala ao,

ka ilay anankiray voafidiko no hapetrako honina ao.

fa iza moa no tahaka Ahy? Zovy no hihantsy Ahy,

ary iza no mpiandry ondry hahafanandrina amiko?

45 Koa henoy àry ny fikasana naraikitr’i Iaveh hamelezana an’i Babela,

sy ny hevitra nosaininy hamelezana ny tanin’ny Kaldeanina;

Eny, hotaritarihina hoatra ny ondry osa izy;

ary ho gaga foana amin’izany ny tanim-bilona!

46 Mihorohoro ny tany, rehefa re fa hoe azo i Babela,

ka misy antso re any amin’ny firenena.