Category: Joely

1. LOZA AVY AMIN’NY VALALA

1 Tenin’i Iaveh tonga tamin’i Joelyzanak’i Fatoely.

A. Hira fitomaniana amin’ny loza manjò ny tany

2 Mihainoa an’izao ianareo anti-panahy;

mitongilàna sofina ianareo rehetra monina amin’ny tany!

Mba efa nisy toy izao va tamin’ny andronareo,

na tamin’ny andron’ny razanareo?

3 Aoka hilaza izao ianareo amin’ny zanakareo,

ny zanakareo amin’ny zanany,

ary ny zanak’izy ireo, amin’ny taranaka mandimby azy.

4 Ny sisan’ny Gazànanohanin’ny valala;

ny sisan’ny valala nohanin’ny ieleka

ny sisan’ny ieleka nohanin’ny kasila.

5 Mifohazaianareo mpimamo, ka mitomania;

ianareo rehetra mpisotro divay dia midradradradrà,

noho ny amin’ny divay vaovao;

izay notapahina tsy ho amin’ny vavanareo intsony.

6 Fa misy firenena niakatra tamin’ny taniko

sady mahery no tsy hita isa;

ka ny nifiny dia nifin-diona;

ary ny vazany vazan-diom-bavy.

7 Nosimbany ny voaloboko;

notapatapahiny ny aviaviko;

dia nataony makiky sady nazerany ireny;

ary tonga tena fotsy mihitsy ny rantsany.

8 Midradradradrà ianao toy ny virjiny mitafy lasàka

hitomany ny vadin’ny fahatanorany.

9 Tapaka tsy misy intsony ny fanatitra amam-panatitra araraka, ao an-tranon’i Iaveh;

misaona ny mpisoronampanao raharahan’i Iaveh!

10 Simba ny saha; misaona ny tany, fa levona ny vary,

mangaihay ny divay vaovao, reraka ny diloilo.

11 Mangaihaiza, ry mpiasa tany,

midradradradrà ry mpamboly voaloboka,

noho ny amin’ny vary sy ny orja;

satria majifa ny vary hojinjaina any an-tsaha.

12 Mangaihay ny voaloboka, ary reraka ny aviavy;

ny ampongabendanitra mbamin’ny antrendry sy ny paoma,

dia ny hazo rehetra any an-tsaha, no efa maina avokoa;

menatra ny hafaliana ka nihataka

lavitra ny zanak’olombelona.

B. Fiantsoana hibebaka sy hivavaka

13 Mietrà, mitolokoa, ianareo mpisorona;

midradradradrà ianareo mpanao ny fanompoana momba ny ôtely!

Avia hiari-tory mitafy lasàka,

ianareo mpandraharahan’ny Andriamanitro,

fa ny fanatitra amam-panatitra araraka

dia voatana lavitra ny tranon’ny Andriamanitrareo.

14 Miantsoa fifadian-kanina; mamoria ny fiangonana;

vorio ny loholona, izay rehetra monina amin’ny tany,

ao an-tranon’i Iaveh Andriamanitrareo,

15 ka mitaraina amin’i Iaveh hoe: «Indrisy, ity andro ity!

Fa efa antomotra ny andron’i Iaveh!

Tamy toy ny fandravana avy amin’ny Tsitoha!»

16 Tsy efa noesorina teo imasontsika va ny hanina

mbamin’ny fifaliana amam-piravoravoana izay voaesotra

tao an-tranon’ny Andriamanitsika?

17 Maina tao ambany bainga ny voa nafafy;

foana ny sompitra;

mirodana ny trano fitahirizana,

satria mangaihay ny vary.

18 Endrey izany fitolokon’ny biby;

Mihoalahoala ny andian’omby,

satria tsy manan-kanina izy,

miferinaina mbamin’ny andian’ondry.

19 Mitaraina aminao aho, Iaveh ô,

fa levon’ny afo ny kijana an’efitra,

voadoron’ny lelafo ny hazo rehetra any an-tsaha.

20 Mimamamama miantso Anao hatramin’ny biby dia,

satria ny renirano ritra;

ny kijana an’efitra levon’ny afo.

D. Ny andron’i Iaveh. Loza mahatsiravina fanairana amin’ny andron’i Iaveh

1 Tsofy ao Siôna ny anjomara;

ary ampanenoy ao an-tendrombohitra masina ny trômpetra.

Ary aoka hangovitra ny mponina rehetra amin’ny tany,

fa tonga ny andron’i Iaveh, fa efa antomotra!

2 Andro maizina sy manjombona,

andro mandrahona sy manjavona mainty!

Toy ny fahazavan’ny maraina, manerana ny tendrombohitra,

no iavian’ity firenena maro sady mahery,

tsy mbola nisy toy izany hatrizay hatrizay,

ary tsy hisy toy izany any aoriana any,

hatramin’izay taon-ko avy amin’ny andro mbola ho ela indrindra.

Ilay tafika mamely

3 Eo anoloany misy afo mandevona,

ary eo aoriany misy lelafo mandoro.

Ny tany eo alohany, toy ny zaridain’i Edena,

ary ny eo aoriany, toy ny efitra voarava;

tsy misy tsy asiany na kely akory aza.

4 Toy ny soavalyno fijery azy,

ary toy ny mpitaingin-tsoavaly ny firiotrany.

5 Misy re hoatra ny firodorodon’ny kalesy

mievotrevotra eny antampon-tendrombohitra;

tahaka ny firohondrohon’ny lelafo,

mandevona ny mololo;

ary tahaka ny firenena mahery,

voalahatra hiady.

6 Eo anoloan’izy ireony firenena, mangovitra matahotra,

ny tarehy mivaloarika avokoa.

7 Mihazakazaka hoatra ny olo-mahery izy ireo,

mananika ny manda, toy ny lehilahy mpiady,

samy mandeha amin’ny lalany avy;

fa tsy mifanjevo amin’ny lalana alehany akory.

8 Tsy mba misy mifanosika izy,

fa samy mizotra amin’ny lalany avy;

mirimorimo eo afovoan’ny zana-tsipìka izy,

ary tsy mba mandrava laharana.

9 Miely eran’ny tanàna izy,

mihazakazaka eo ambonin’ny manda,

mananika ny trano,

mitsofoka amin’ny varavarankely toy ny mpangalatra.

Fahitana ny andron’i Iaveh

10 Eo anoloan’izy io, mihorohoro ny tany,

mihozongozona ny lanitra,

mihamaizina ny masoandro amam-bolana,

ary mihamaloka ny kintana.

11 Ampandrenesin’i Iaveh ny feony eo amin’ny loha tafiny;

fa tsy erany ny haben’ny tobiny,

ary mahery fo ny mpanatanteraka ny teniny.

Fa lehibe sy mahatahotra indrindra ny andron’i Iaveh,

ka zovy no hahatanty an’izany?

E. Fiantsoana ny olona hibebaka

12 Na ankehitriny aza anefa, – teny marin’i Iaveh, –

miverena amiko, amin’ny fonareo rehetra,

amin’ny fifadian-kanina sy amin-dranomaso amam-pitarainana.

13 Ny fonareo no triatriaro, fa aza ny fitafianareo,

dia miverena amin’i Iaveh Andriamanitrareo,

fa mamindra fo sy miantra izy,

malain-kitezitra sy be hatsaram-po,

ary ny loza afitsony dia alahelovany.

14 Iza moa no mahalala fa tsy mihemotra sy tsy hanenina,

ary tsy hamela hitafiana eo aoriany izy,

dia ny fanatitra amam-panatitra araraka ho an’i Iaveh Andriamanitsika?

15 Tsofy ao Siôna, ny trômpetra,

miantsoa fifadian-kanina,

mamoria fiangonana.

16 Eho ny vahoaka,

miantsoa fivoriana masina,

angony ny anti-panahy,

vorio ny ankizy madinika,

sy ny zaza minono.

Aoka ny mpampakatra handao ny efitranony,

ary ny ampakarina ny trano lainy.

17 Eo anelanelan’ny alo-baravarana sy ny ôteliny,

dia aoka ny mpisorona

mpanao raharahan’i Iaveh, hitomany

ka hanao hoe: «Iaveh ô, tsimbino ny vahoakanao,

aza atolotrao halaim-baraka ny lovanao,

ka hataon’ny firenena fandatsa.

Ahoana no dia anaovanao any amin’ny firenena hoe:

Fa aiza izay Andriamaniny?»

2. Valy avy amin’i Iaveh

18 Nentanin’ny fahasaro-piaro ny taniny i Iaveh

ka namindra fo ny vahoakany.

Fiafaran’ny loza sy fanafahana

19 Dia namaly i Iaveh ka nanao tamin’ny vahoakany hoe:

«Indro ianareo efa nandefasako vary,

sy divay vaovao aman-diloilo,

dia ho vokin’izany ianareo;

ary tsy hataoko fandatsa any amin’ny firenena intsony ianareo.

20 Hampanalaviriko anareo ilay avy any avaratra,

ka horoahiko ho any amin’ny tany karankaina sy efitra izy;

Ny lohalalany ho any amin’ny ranomasina atsinanana.

Ny vodilalany ho any amin’ny ranomasina andrefana;

ka fofona mantsinano hanetona avy aminy,

ary hiakatra ny fahamaimboany!»

Satria nahefa zava-dehibe izy!

Fahitana fanambinana

21 Aza matahotra, ry tany,

fa mifalia sy miravoravoa,

satria nanao zava-dehibe i Iaveh!

22 Aza matahotra, ry biby any an-tsaha,

fa ny kijana any an’efitra efa nihamaitso indray,

ny hazo, efa namoa;

ny aviavy amam-boaloboka nanolotra ny vokany sarobidy

23 Ary ianareo, ry zanak’i Siôna, aoka hientan-kafaliana

sy ho ravoravo ao amin’i Iaveh Andriamanitrareo;

fa ny mpampianatra efa nomeny anareo hanoro ny marina,

ny andro alatsany ho anareo,

dia ny fara orana sy ny loha orana,

toy ny taloha indray.

24 Ho feno vary ny famoloanareo;

ary ho tondraka ny divay vaovao aman-diloilo ao amin’ny barìka.

25 Honerako aminareo ny taona

nolevonin’ny valala

sy ny ieleka ary ny kasila sy ny gazàna,

izay tafiko lehibe

efa nalefako hamely anareo.

26 Hihinana be ianareo ka ho voky,

dia hidera ny Anaran’i Iaveh Andriamanitrareo,

izay nanao zava-mahagaga ho anareo;

ary tsy ho menatra intsony ny vahoakako, na oviana na oviana.

27 Dia ho fantatrareo fa eo afovoan’i Israely Aho!

Izaho no Iaveh Andriamanitrareo, fa tsy misy hafa intsony;

ary tsy ho menatra intsony ny vahoakako

na oviana na oviana!

1. Firotsahan’ny Fanahy

1 Ary rehefa afaka izany, dia indro

fa handatsaka ny Fanahiko amin’ny nofo rehetraAho,

ka ny zanaka lahy aman-janaka vavinareo haminany;

ny anti-panahinareo hahita nofy,

ny zatovonareo hahazo fahitana.

2 Na dia ny mpanompo lahy ama-mpanompo vavy aza,

handatsahako ny Fanahiko amin’izany andro izany.

3 Haneho zava-mahagagaeny an-danitra sy etỳ

an-tany Aho,

dia ra sy afo aman-tsetroka mitankosina.

4 Ny masoandro hiova ho haizina,

ary ny volana ho ra,

alohan’ny hahatongavan’ny andron’i Iaveh,

izay sady lehibe no mahatahotra.

5 Ary na zovy na zovy hiantsony Anaran’i Iaveh, dia ho voavonjy;

fa ao an-tendrombohitra Siôna sy ao Jerosalema

dia hisy fivorian’ny voavonjy araka ny voalazan’i Iaveh,

mbamin’ireo eo amin’izay sisa velona, izay antsoin’i Iaveh.

2. Fitsarana ny vahoaka

1 Fa amin’izany andro izany, sy amin’izany fotoana izany,

izay hampodiakoireo lasan-ko babo avy amin’i Jodà sy i Jerosalema,

2 dia indro fa hovoriko ny firenena rehetra,

ka hoentiko midina ho eo amin’ny lohasahan’i Jôsafata;

ary eo no hifandaharako amin’izy ireo,

noho ny amin’i Israely vahoakakosy lovako,

izay naeliny tany amin’ny firenena,

sy noho ny amin’ny taniko izay nozarazarainy.

3 Satria nanaovany lokany vahoakako,

zaza lahy no nataony takalon’ny vehivavy janga,

ary zaza vavy no namidiny divay, ka nisotro izy ireo.

Fitarainana amin’ny ataon’ny Fenisianina sy ny Filistinina

4 Ny aminareo koa dia mifaninona Izaho sy ianareo, ry Tira sy Sidona,

mbaminareo faritany rehetra any Filistia?

Mitady ny hamaly Ahy va ianareo?

Raha mba mihaika Ahy ianareo,

dia vetivety foana tsy ampy toy inona no hanatsingerenako

eo an-dohanareo ny fihaikanareo;

5 fa ianareo no naka ny volafotsy amam-bolamenako,

ianareo no nitondra ho any an-tempolinareo

ny firavako sarobidy indrindra;

6 ianareo no nivarotra tamin’ireo zanak’i Javàna

ny zanaka lahin’i Jodà sy ny zanaka lahin’i Jerosalema,

mba hitondrana azy lavitra ny taniny.

7 Fa indro Aho kosa efa hampitsangana azy

any amin’ny tany nivarotanareo azy,

sy hampitsingerina ny fihaikanareo ho eo an-dohanareo.

8 Hamidiko ny zanaka lahy aman-janaka vavinareo

ho eo an-tanan’ny zanak’i Jodà,

ka hamidiny amin’ny Sabeanina

amin’ny firenena lavitra any;

fa i Iaveh efa niteny.

Fiantsoana ny vahoaka

9 Miantsoa izao any amin’ny firenena:

Miomàna hiady ianareo!

Asaovy mitsangana ny lehilahy mahery!

Aoka hanatona, aoka hiakatra avokoa,

ny lehilahy mpiady rehetra!

10 Manaova sabatra amin’ny angadinareo;

sy lefona amin’ny antsinareo;

aoka ny osa hilaza hoe: olo-mahery fo aho!

11 Faingàna ianareo, tongava avokoa

ianareo firenena manodidina rehetra, ka mivoria.

Iaveh ô, ento midina ao ny maherinao!

12 Aoka hitsangana ny firenena, ary aoka hitraka izy

ho eny amin’ny lohasahan’i Jôsafata!

Fa any no hipetrahako hitsara

ny firenena rehetra manodidina.

13 Raiso ny antsyfijinjàna fa masaka ny vary;

avia hanosihosy fa feno ny famiazam-boaloboka,

mihoatra ny barìka;

satria be ny haratsian’izy ireo.

14 Vahoaka be, vahoaka be,

ao amin’ny lohasahan’ny fanapahana!

Ny andron’i Iaveh

15 Ny masoandro amam-bolana, nihamaizina,

afaka amin’ny kintana ny famirapiratany.

16 Hierona avy ao Siôna i Iaveh,

ary hampandre ny feony avy eo Jerosalema Izy;

hihorohoro ny tany aman-danitra.

Nefa i Iaveh no ho fialofana ho an’ny vahoakany,

ho fiarovana ho an’ny zanak’i Israely.

17 Dia ho fantatrareo fa Iaveh Andriamanitrareo Aho,

izay monina ao Siôna, tendrombohitro masina;

ho fitoerana masina i Jerosalema,

ka tsy hodiavin’ny hafa firenena intsony.

Fiadanan’i Israely tafarina

18 Amin’izany andro izany dia hitete

avy amin’ny tendrombohitra rehetra

ny divay vaovao;

ny havoana handriaka ronono;

ary ny lohasahan-driaka any Jodà, hitsororohan’ny rano avokoa.

Hisy loharano hivoaka avy ao an-tranon’i Iaveh,

ka handena ny lohasahan’ny Akasià.

19 I Ejipta kosa, hanjary tany lao,

i Edôma ho efitrafaharavana,

noho ny fahasahiana namelezany ny taranak’i Jodà,

fa nandatsaka ny ra tsy manan-tsiny teo amin’ny taniny izy ireo.

20 Ary i Jodà, honenana mandrakizay,

ary i Jerosalemakoa mandritra ny taona mifandimby.

21 Fa hosasako ny ran’izy ireo, izay mbola tsy voasasako.

Dia honina ao Siôna i Iaveh.