Ireo mpanjaka dimy miady amin’i Gabaôna
1 Ren’i Adônisedeka, mpanjakan’i Jerosalema, fa i Haia dia efa azon’i Jôsoe, ka nataony anatema; toy ny nanaovany an’i Jerikô sy ny mpanjakany, no nanaovany an’i Haia sy ny mpanjakany koa, ary ny mponina ao Gabaôna efa nanao fihavanana tamin’i Israely ka mitoetra eo aminy.
2 Dia raiki-tahotra mafy izy, satria i Gabaôna dia tanàna lehibe toy ny iray amin’ny tanànan’andriana, lehibe aza noho i Haia, sady lehilahy mahery avokoa ny ao aminy.
3 I Adônisedeka, mpanjakan’i Jerosalema dia nampitondra teny tamin’i Ohama mpanjakan’i Hebrôna, sy i Farama mpanjakan’i Jerimota, sy tamin’i Jofià mpanjakan’i Lakisa, ary tamin’i Dabira mpanjakan’i Eglôna, nanao hoe:
4 «Miakara atỳ amiko ianareo, avia hanampy ahy hamelezantsika an’i Gabaôna, satria nanao fihavanana tamin’i Jôsoe sy ny zanak’i Israely izy.»
5 Dia niangona ny mpanjakan’ny Amôreana dimy lahy, ny mpanjakan’i Jerosalema, ny mpanjakan’i Hebrôna, ny mpanjakan’i Jerimota, ny mpanjakan’i Lakisa ary ny mpanjakan’i Eglôna, ka niakatra niaraka tamin’ny mpiantafika rehetra, ary nanorina ny tobiny teo akaikin’i Gabaôna sy nanao fahirano azy.
I Jôsoe mamonjy an’i Gabaôna
6 Dia naniraka olona ny mponina ao Gabaôna nilaza tamin’i Jôsoe tao an-tobin’i Galgalà hoe: «Aza manohon-tanana tsy manampy ny mpanomponao, fa miakara faingana ho atỳ aminay, afaho izahay, fa nikambana hamely anay ny mpanjakan’ny Amôreana rehetra monina amin’ny tendrombohitra.»
7 Dia niakatra avy any Galgalà i Jôsoe sy ny mpiantafika rehetra niaraka taminy, mbamin’ny mpiady mahery rehetra.
8 Hoy i Iaveh tamin’i Jôsoe: «Aza matahotra azy, fa efa natolotro eo an-tananao izy, ka tsy hahatoha anao na dia iray aza.»
9 Nirotsaka tampoka tamin’izy ireo i Jôsoe: fa nanao lava alina izy no niakatra avy any Galgalà.
Ny vonjy avy any ambony
10 Sady nampifanaritahin’i Iaveh teo anoloan’i Israely izy ireo, ka nataon’i Israely kila hotohoto tao akaikin’i Gabaôna sy nenjehiny tamin’ny lalana mankany Betôrôna, ary nasiany hatrany Azekà sy Makedà.
11 Tamin’ny nandosiran’izy ireo teo anatrehan’ny zanak’i Israely teo amin’ny fidinan’i Betôrôna dia nampianjeran’i Iaveh vato vaventyizy ireo hatrany Azekà, ka maty; be lavitra ny matin’ny havandra vato noho ny matin’ny sabatry ny zanak’i Israely.
12 Dia niteny tamin’i Iaveh i Jôsoe tamin’ny andro nanoloran’i Iaveh ny Amôreana tamin’ny zanak’i Israely, ka hoy izy teo imason’ny zanak’i Israely:
«Ry masoandro, mijanònaeo ambonin’i Gabaôna
ary ianao, ry volana, ambonin’ny lohasaha Ajalôna.»
13 Dia nijanona ny masoandro ary tsy nandroso koa ny volana
Mandra-pamalin’ny firenena ny fahavalony.
14 Tsy nisy andro toy izany, na tany aloha na tatỳ aoriana, izay nihainoan’i Iaveh ny feon’ny olona anankiray, fa niady momba an’i Israely i Iaveh.
15 Dia niverina nankany an-toby any Galgalà i Jôsoe sy i Israely rehetra niaraka taminy koa.
Ireo mpanjaka dimy tao amin’ny zohy ao Makedà
16 Nandositra niery tao anaty zohy tao Makedà ny mpanjaka dimy lahy;
17 ka nolazain’ny olona tamin’i Jôsoe hoe: «Hita miery ao anatin’ny zohy ao Makedà, ny mpanjaka dimy.»
18 Dia hoy i Jôsoe: «Kodiavo vato lehibe ny vava zohy, dia asio olona hiambina azy.
19 Ary ianareo aza mijanona fa enjeho ny fahavalonareo, asio izy amin’ny vodilalany, aza avela ho tafiditra any an-tanànany ireny, fa efa natolotr’i Iaveh Andriamanitrareo eo an-tananareo.»
20 Nony efa nasian’i Jôsoe sy ny zanak’i Israely ireny tamin’ny nandreseny azy mafy dia mafy ka naringany, izay mba nety ho afaka kosa dia nandositra tamin’ny tanàna mimanda;
21 ary ny vahoaka rehetra niverina tsy amin’ahiahy tao an-toby any amin’i Jôsoe any Makedà, ary tsy nisy olona sahy niteny indraimbava akory manohitra ny zanak’i Israely.
22 Dia hoy i Jôsoe: «Sokafy ny vava zohy, ka avoahy ao ireo mpanjaka dimy hoentina mankatỳ amiko.»
23 Nataony izany, nentiny nankany aminy ny mpanjaka dimy izay navoakany avy ao an-johy, ny mpanjakan’i Jerosalema, ny mpanjakan’i Hebrôna, ny mpanjakan’i Jerimota, ny mpanjakan’i Lakisa, ary ny mpanjakan’i Eglôna.
24 Nony efa navoakany ho eo anatrehan’i Jôsoe, ireo mpanjaka ireo, dia nantsoin’i Jôsoe ny lehilahy rehetra amin’i Israely ka hoy izy tamin’ireo filohan’ny lehilahy mpiantafika, izay niaraka taminy: «Manatòna ianareo, ka ataovy eo amin’ny vozon’ireto mpanjaka ireto ny tongotrareo.» Dia nanatona ireo ka nanitsaka ny vozon’ireo mpanjaka tamin’ny tongony.
25 Ary hoy i Jôsoe taminy: «Aza matahotra na manam-badi-po fa matanjaha ka mahereza, fa toy izao avokoa no hanaovan’i Iaveh ny fahavalonareo rehetra izay hiadianareo.»
26 Raha efa izany dia nasian’i Jôsoe ireo, ka nataony maty, ary nahantony tamin’ny hazo dimy, ka nihantona teo mandra-paharivan’ny andro.
27 Nony efa ho faty ny masoandro, dia nasain’i Jôsoe nampidirina amin’ilay zohy niereny, ary teo am-bava zohy nasiana vato lehibe mbola ao mandraka androany.
Ny nahazoana an’ireo tanàna vakiny atsimo amin’i Kanaana
28 Afak’i Jôsoe androtr’izay ihany koa i Makedà, ka nasiany tamin’ny lelan-tsabatra izy sy ny mpanjakany, ary naringany nataony anatema ny tanàna mbamin’ny manana aina rehetra tao, fa tsy nasiany niangana na dia iray aza, ary tahaka ny nanaovany ny mpanjakan’i Jerikô no nanaovany ny mpanjakan’i Makedà koa.
29 Niala tao Makedà i Jôsoe sy i Israely rehetra niaraka taminy, dia nankany Lebnà, ary namely an’i Lebnà izy.
30 Natolotr’i Iaveh teo an-tanan’i Israely koa izy sy ny mpanjakany, ka nasiany tamin’ny lelan-tsabatra izy mbamin’ny manana aina rehetra tao, tsy nasiany niangana na dia iray aza, ary toy ny nanaovany ny mpanjakan’i Jerikô no nanaovany ny mpanjakany koa.
31 Niala teo Lebnà i Jôsoe sy i Israely rehetra niaraka taminy, dia nankany Lakisa, ka nanorina ny tobiny teo anoloany sy namely azy.
32 Natolotr’i Iaveh teo an-tanan’i Israely i Lakisa, ka tamin’ny andro faharoa dia afany, ary nasiany tamin’ny lelan-tsabatra izy sy ny manana aina rehetra tao, toy ny nataony tamin’i Lebnà.
33 Niakatra hamonjy an’i Lakisa i Horama mpanjakan’i Gazera tamin’izay, fa nasian’i Jôsoe izy sy ny vahoakany ka tsy navelany hisy afa-nandositra akory.
34 Niala tao Lakisa i Jôsoe sy i Israely rehetra niaraka taminy dia nankany Eglôna, ka nitoby teo anoloany sy namely azy.
35 Androtr’izay ihany dia afany izy ka nasiany tamin’ny lelan-tsabatra; ny manana aina rehetra tao dia nataony anatema iny andro iny, araka izay rehetra nataony tamin’i Lakisa.
36 Niakatra avy eo Eglôna i Jôsoe sy i Israely rehetra niaraka taminy, dia nankany Hebrôna, ka namely azy izy ireo.
37 Nony afany dia nasiany tamin’ny lelan-tsabatra izy sy ny mpanjakany ary ny tanàna momba azy rehetra mbamin’izay manana aina rehetra tao, tsy navelany hisy afa-nandositra akory, tahaka ny nanaovan’i Jôsoe an’i Eglôna, fa nataony anatema izy sy ny manana aina rehetra tao.
38 Dia nitodika nankany Dabira i Jôsoe sy i Israely rehetra niaraka taminy.
39 Azony izy sy ny mpanjakany ary ny tanàna rehetra momba azy dia nasiany tamin’ny lelan-tsabatra, ary nataony anatema avokoa ny manana aina rehetra tao, fa tsy navelany hisy afa-nandositra akory. Toy ny nanaovan’i Jôsoe an’i Hebrôna sy ny nanaovany an’i Lebnà sy ny mpanjakany, no nanaovany an’i Dabira sy ny mpanjakany koa.
Fitanisana ny tanàna azon’i Jôsoe
40 Nasian’i Jôsoe avokoa ny tany manontolo, ny tendrombohitra, ny Negeba, ny tany lemaka sy ny tanety, mbamin’ny mpanjakany rehetra; tsy navelany hisy afa-nandositra, fa nataony anatema avokoa rehefa mety ho manana aina koa, araka izay nandidian’i Iaveh Andriamanitr’i Israely.
41 Nasian’i Jôsoe ireny, hatrany Kadesa-Barne ka hatrany Gazà ary ny tany Gôsena rehetra hatrany Gabaôna.
42 Fanafihana indray mandeha monja no nahazoan’i Jôsoe ireo mpanjaka rehetra ireo sy ny taniny rehetra, satria i Iaveh Andriamanitr’i Israely no niady ho an’i Israely.
43 Raha efa izany dia niverina nankany an-toby any Galgalà i Jôsoe, sy i Israely rehetra niaraka taminy koa.