Category: Lioka

Ny «Pater»

1 Indray andro nivavaka tao amin’ny fitoerana anankiray i Jesoa, ka nony nitsahatra Izy dia hoy ny mpianany anankiray taminy: «Mba ampianaro hivavaka izahay, Tompoko, tahaka ny nampianaran’i Joany ny mpianany.»

2 Ary hoy Izy taminy: Raha mivavaka ianareo, manaova hoe:

Ray ô, hohamasinina anie ny Anaranao. Ho tonga anie ny fanjakanao.

3 Omeo anay anio ny hanina ilainay isan’andro.

4 Avelao ny fahotanay, fa izahay koa mamela izay rehetra nanao ratsy taminay. Ary aza avelanao ho resin’ny fitaoman-dratsy izahay.

Ilay sakaiza manelingelina

5 Dia hoy indray koa Izy taminy: «Raha misy aminareo manan-tsakaiza mankao aminy misasaka alina ka manao aminy hoe: ‹Ry sakaiza, ampisambory mofo telo aho,

6 fa misy sakaizako nandeha nivahiny ka tonga ao amiko, nefa tsy manan-katolotra azy aho›,

7 ary ilay ao an-trano kosa hamaly ka hanao hoe: ‹Aza manahirana ahy, fa ny varavarana efa mihidy; izaho sy ny zanako efa tafandry, ka tsy afaka hifoha hanome anao aho.›

8 Lazaiko aminareo, fa raha maharitra mandondòna izy, na dia tsy hifoha hanome azy noho ny fisakaizany aza ilay ao an-trano, dia hifoha hanome izay ilainy noho ny fanaovany lemozy.»

Ny vavaka mandaitra

9 «Ary hoy Izaho aminareo: Mangataha, dia homena ianareo; mitadiava, dia hahita; mandondòna, dia hovohana.

10 Fa izay rehetra mangataka no mahazo; izay mitady no mahita, ary izay mandondòna no vohaina.

11 Iza aminareo no ray hanome vato ny zanany, raha mofo no angatahiny, na hanome bibilava azy, raha hazandrano no angatahiny,

12 na hanome maingoka azy raha atody no angatahiny?

13 Koa raha ianareo, na dia ratsy toy inona aza, mahalala manome zava-tsoa ny zanakareo, tsy mainka va ny Rainareo izay any an-danitra no hanome ny Fanahy Masinaho an’izay mangataka aminy?»

I Jesoa sy i Belzeboba

14 Ary nandroaka demony i Jesoa, ka moana izany demony izany. Nony voaroaka ny demony, dia niteny ilay moana, ka gaga ny vahoaka;

15 fa ny sasany tamin’izay teo nanao hoe: «I Belzeboba lehiben’ny demony no androahany ny demony.»

16 Ary ny sasany kosa naka fanahy Azy ka nangataka famantarana avy any an-danitra taminy.

17 Fa i Jesoa nahalala ny heviny ka nanao taminy hoe: Rava izay fanjakana miady an-trano; mianjera mifanongoa ny trano;

18 ka raha miady an-trano àry i Satana, ahoana no haharetan’ny fanjakany? satria lazainareo fa i Belzeboba no androahako ny demony.

19 Ary raha amin’ny herin’i Belzeboba àry no androahako ny demony, amin’ny herin’iza kosa no androahan’ny zanakareo azy? Koa izy ireo ihany no ho mpitsara anareo.

20 Fa raha ny rantsan-tanan’Andriamanitra no androahako ny demony, dia efa tonga aminareo tokoa ny fanjakan’Andriamanitra.

21 Raha lehilahy matanjaka sy àry fiadiana tsara no miambina ny tranony, dia voaaro ny fananany rehetra;

22 fa raha tonga kosa ny mahery noho izy ka mandresy azy, dia sady hahalasa ny fiadiany rehetra izay nitokiany no hizara izay nobaboiny.

Ny tsy ileferan’i Jesoa

23 «Izay tsy momba Ahy, dia manohitra Ahy, ary izay tsy miara-mamory amiko, dia manahaka.»

Miverina mamely mafy ny fanahy maloto

24 «Raha mivoaka amin’ny olona ny fanahy maloto, dia mandehandeha mitady fialan-tsasatra eny amin’ny tanety maina izy, ka nony tsy mahita dia manao hoe: ‹Hody any an-tranoko izay nivoahako aho.›

25 Ary nony tonga izy dia mahita azy voadio sy voaravaka,

26 ka mandeha maka fanahy fito ratsiratsy kokoa noho izy, dia miditra ireo ka mitoetra eo. Ary ny faran’izany olona izany dia tonga ratsiratsy kokoa noho ny voalohany.»

Ny tena hasambarana

27 Raha nilaza izany Izy, dia nisy vehivavy anankiray niantso teo afovoan’ny vahoaka ka nanao taminy hoe: «Sambatra ny kibo izay nitondra Anao sy ny nono izay ninonoanao!»

28 «Fa vao mainka sambatra aza, hoy i Jesoa, izay mihaino ny tenin’Andriamanitra ka mitandrina azy.»

I Jônasy famantarana

29 Ary nitangorona betsaka ny vahoaka, dia nilazany hoe: «Taranaka ratsy ity taranaka ity; mitady famantarana izy, nefa tsy homena afa-tsy ny famantaran’i Jônasy mpaminany.

30 Fa tahaka ny naha-famantarana an’i Jônasy tamin’ny olona tany Niniva no haha-famantarana ny Zanak’olona koa amin’ity taranaka ity.

31 Hiara-mitsangana amin’ny olona amin’ity taranaka ity ny mpanjakavavy avy any atsimo amin’ny andro fitsarana ka hanameloka azy, satria niala avy tany amin’ny fara vazantany izy hihaino ny fahendren’i Salômôna, nefa indro misy mihoatra noho i Salômôna eto.

32 Hiara-mitsangana amin’ity taranaka ity ny olona tany Niniva amin’ny andro fitsarana ka hanameloka azy, satria nibebaka tamin’ny toritenin’i Jônasy izy ireny, nefa indro misy mihoatra noho i Jônasy eto.»

Mbola fanoharana amin’ny jiro arehitra

33 «Tsy misy olona mandrehitra jiro ka mametraka azy ao an-katakonana na ao ambanin’ny vata famarana, fa eo amin’ny fanaovan-jiro izy no apetrany mba hahitan’izay miditra ny mazava.

34 Ny maso no jiron’ny tenanao, ka raha tsara ny masonao dia hazava ny tenanao rehetra; fa raha ratsy kosa izy, dia ho maizina koa ny tenanao.

35 Tandremo àry fandrao zary haizina ny fahazavana ao anatinao.

36 Fa raha ao amin’ny mazava tsy mifangaro haizina ny tenanao manontolo, dia hazava avokoa izy rehetra, mova tsy ny hazavain’ny jiro tsara firehitra ianao.»

Fanoherana ny Farisianina sy ny mpanora-dalàna

37 Raha mbola niteny Izy, dia nisy Farisianina anankiray nanasa Azy hisakafo ao aminy, ka niditra Izy dia nipetraka nihinana.

38 Fa velona eritreritra ilay Farisianina nahita ity Izy tsy nisasa alohan’ny hihinana,

39 ka hoy ny Tompo taminy: Ianareo Farisianina kosa iky mandio ny vohon’ny kapoaka sy ny lovia, kanefa ao anatinareo feno halatra sy faharatsiana.

40 Ry adala, moa izay manao ny vohony tsy nanao ny atiny koa?

41 Izao ihany e: manaova fiantrana araka izay anananareo, dia hadioho anareo ny zavatra rehetra.

42 Fa mila loza ianareo, ry Farisianina, satria ny fahafolon’ny solila sy ny rota ary ny anana rehetra aloanareo, ary ny rariny sy ny fitiavana an’Andriamanitra tsy asianareo raharaha akory; nefa tsy maintsy atao izany, ary tsy azo ajanona koa ny sisa.

43 Mila loza ianareo, ry Farisianina, fa tia ny toerana voalohany ao amin’ny sinagoga sy ny arahaba eny an-kianja ianareo.

44 Mila loza ianareo, fa toy ny fasana tsy hita ianareo, ka hitsahin’ny olona fa tsy fantany.

45 Dia niteny ny mpampiana-dalàna anankiray ka nanao taminy hoe: «Ry Mpampianatra ô, raha izany no ataonao, dia manala baraka anay koa Ianao.»

46 Fa hoy i Jesoa: «Mila loza ianareo, ry mpampianatra ny Lalàna, fa mampitondra ny tsy zaka ny olona ianareo, nefa na dia ny rantsan-tananareo iray aza tsy akasikareo an’izany akory.

47 Mila loza ianareo, fa manao fasana ho an’ny mpaminany ianareo, kanefa ny razanareo ihany no namono azy!

48 Koa mitsangan-ko vavolombelona sy mpankasitraka ny nataon’ny razanareo ianareo, fa izy moa namono ny mpaminany, ianareo kosa manao fasana ho azy.

49 Izany no nanaovan’ny Fahendren’Andriamanitra hoe: Haniraka mpaminany sy apôstôly ho any aminy Aho, ka ny sasany hovonoiny ary ny sasany hoenjehiny,

50 mba hampamoahina an’ity taranaka ity avokoa ny ran’ny mpaminany rehetra izay nalatsaka hatramin’ny nahariana an’izao tontolo izao,

51 dia hatramin’ny ran’i Abela ka hatramin’ny ran’i Zakaria izay novonoina tanelanelan’ny ôtely sy ny Tempoly. Eny, lazaiko aminareo fa hampamoahina an’izany tokoa ity taranaka ity.

52 Mila loza ianareo, ry mpampianatra ny Lalàna, fa nalainareo ny fanalahidin’ny fahalalana, ka ianareo tsy niditra, ny te hiditra nosakananareo.»

53 Raha mbola niteny izany Izy, dia nododonan’ny Farisianina sy ny mpanora-dalàna, ary nozezehany fanontaniana maro,

54 mba hamandrihany Azy sy hahazoany vava latsaka hiampangana Azy.

Tokony hiteny miharihary, tsy matahotra

1 Tamin’izay dia tafangona an’arivony maro ny olona ka efa nila hifanosy mihitsy, dia niteny tamin’ny mpianany i Jesoa nanao hoe: Tandremo aloha indrindra sao voan’ny lalivain’ny Farisianina ianareo, izany hoe: ny fihatsarambelatsihy.

2 Fa tsy misy takona izay tsy haseho, na miafina izay tsy ho fantatra.

3 Koa izay rehetra nolazainareo tao amin’ny maizina dia ho re ao amin’ny mazava, ary izay nobitsihinareo tamin’ny sofina tao an-trano, dia hotorina eny an-tafon-trano.

4 Ka izao no lazaiko aminareo sakaizako: Aza matahotra izay mahafaty ny nofo, nefa raha efa izany tsy afa-manoatra intsony;

5 fa hany tokony hatahoranareo dia izao: matahora izay manam-pahefana hamarina any amin’ny afobe rehefa novonoiny ianareo; eny, hoy Izaho aminareo, matahora azy.

6 Moa tsy ilavoamena va no vidin’ny fody dimy? Kanefa tsy misy hadinoina eo anatrehan’Andriamanitra amin’ireny na dia iray aza.

7 Fa na dia ny volon-dohanareo aza dia voaisa avokoa. Koa aza matahotra àry, fa mihoatra lavitra noho ny fody maro ianareo.

8 Ary lazaiko aminareo koa fa na iza na iza hanaiky Ahy eo anatrehan’ny olona dia hoeken’ny Zanak’olona koa izy eo anatrehan’ny Anjelin’Andriamanitra;

9 fa izay handà Ahy eo anatrehan’ny olona kosa dia holavina koa izy eo anatrehan’ny Anjelin’Andriamanitra.

10 Na iza na iza hanao teny manohitra ny Zanak’olona dia hahazo famelan-keloka ihany; fa izay hiteny ratsy ny Fanahy Masina kosa dia tsy hahazo famelan-keloka intsony.

11 Raha entina ho any amin’ny sinagoga sy ny mpanapaka ary ny manam-pahefana ianareo, dia aza manahy izay hamalianareo na izay holazainareo,

12 fa hatoron’ny Fanahy Masina anareo eo no eo ihany izay holazainareo.

Aza manangona na mitahiry

13 Tamin’izay dia nisy anankiray tao amin’ny vahoaka nanao taminy hoe: «Ry Mpampianatra, mba ilazao kely ny rahalahiko hizara ny lovanay amiko.»

14 Fa hoy i Jesoa taminy: «Ralehilahy ô, iza moa no nanendry Ahy ho mpitsara na ho mpizara aminareo?»

15 Ary hoy Izy tamin’ny olona: «Tandremo tsara sao azon’ny fahihirana ianareo, fa ny ain’ny olona tsy miankina amin’ny habetsahan’izay ananany.»

16 Dia nanao fanoharana tamin’izy ireo Izy ka nanao hoe: Nanan-tany nahavokatra be ity lehilahy mpanan-karena anankiray,

17 ka velona eritreritra toy izao: Inona re no hataoko, fa tsy manan-toerana hamoriako ny vokatro aho ity?

18 Izao lahy no ndeha hataoko, hoy izy: horavako ny toeram-bariko ka hanao lehibebe kokoa aho, dia hangoniko ao daholo rehefa mety ho vokatro sy fananako rehetra,

19 ary holazaiko amin’ny fanahiko hoe: Ry fanahiko, manam-pananana be ampy ho amin’ny taona maro ianao ka mialà sasatra, mihinàna, misotroa, manaova fihinanam-be.

20 Fa hoy kosa Andriamanitra taminy: ‹Ry adala, anio alina ihany dia halaina aminao ny fanahinao, ka ho an’iza àry izay novorinao?›

21 Toy izany ny olona izay manangon-karena ho an’ny tenany ihany, fa tsy mba mihary eo amin’Andriamanitra.

Miantehera amin’ny fitsimbinan’Andriamanitra

22 Dia hoy i Jesoa tamin’ny mpianany: Noho izany dia lazaiko aminareo fa aza manahy izay hanina hivelomanareo, na izay fitafiana hitafian’ny vatanareo;

23 fa ambony noho ny hanina ny aina, ary mihoatra noho ny fitafiana ny tena.

24 Diniho ange ny goaika e: tsy mamafy izy na mijinja, ary tsy manan-trano fitahirizan-kanina, na toeram-bary, fa Andriamanitra no mamelona azy, ka moa tsy mihoatra lavitra noho ireny va ianareo?

25 Ary na dia hanahy aza ianareo, iza moa no mahay mampitombo ny halavany iray hakiho akory?

26 Koa raha ny kely indrindra aza tsy efanareo, ahoana no anahianareo ny zavatra hafa?

27 Diniho koa ange ny fanirin’ny lisy e: tsy mba miasa na mamoly ireny; kanefa lazaiko aminareo fa na i Salômôna teo amin’ny voninahiny rehetra aza tsy mba nitafy tahaka ny anankiray amin’izy ireny.

28 Koa raha toy izany àry no ampitafian’Andriamanitra ny ahitra izay eny an-tsaha anio nefa hariana any am-patana rahampitso, tsy mainka va ianareo, ry kely finoana?

29 Ka aoka re ianareo tsy hikaroka izay hohaninareo na izay hosotroinareo, ary aza be ahiahy foana;

30 fa ny Jentily amin’izao tontolo izao no manahy ny amin’izany rehetra izany. Fantatry ny Rainareo anie fa ilainareo izany e.

31 Koa katsaho àry aloha ny fanjakan’Andriamanitra, dia homena anareo ho fanampiny izany rehetra izany.

32 Aza matahotra, ry ondry vitsy, fa efa sitraky ny Rainareo ny hanome anareo ny fanjakana.

Amidio ny fananana, manaova fiantrana

33 «Amidio izay anananareo ka anaovy fiantrana; manaova kitapom-bola tsy tontan’ny ela ho anareo, dia rakitra tsy mety lany any an-danitra, izay tsy azon’ny mpangalatra idirana sady tsy misy kalalao manimba;

34 fa izay misy ny harenareo no hisy ny fonareo koa.»

Aoka ho vonona amin’ny hiverenan’ny Tompo

35 «Aoka ho voaetra ny andilanareo, ary ho voarehitra ny jironareo.

36 Manaova toy ny olona izay miandry ny fotoana hiverenan’ny tompony avy any amin’ny fampakaram-bady, mba hamoha azy miaraka amin’izay raha vantany vao tonga sy mandondòna izy.

37 Sambatra ireo mpanompo tratran’ny tompony miambina raha tonga izy; lazaiko marina aminareo fa hisikina ny tompony ka hampipetraka azy hihinana, ary ho avy hampihinana azy.

38 Na tonga amin’ny fiambenana faharoa izy, na tonga amin’ny fiambenana fahatelo ka mahatratra azy manao toy izany, dia sambatra ireo mpanompo ireo.

39 Ary fantaro tsara fa raha fantatry ny tompon-trano ny ora hiavian’ny mpangalatra, dia hiambina izy, fa tsy hamela ny tranony hotamìna.

40 Koa mivonòna koa ianareo, fa ho avy amin’izay ora tsy ampoizinareo ny Zanak’olona.»

41 Dia hoy i Piera taminy: «Tompoko, ho anay ihany va no ilazanao izany fanoharana izany, sa ho an’ny olona rehetra koa?»

42 Ary hoy ny Tompo: «Iza no mpitandrim-pananana mahatoky sy hendry izay notendren’ny tompony hifehy ny mpanompony mba hanome azy ny anjara variny ara-potoana?

43 Sambatra izany mpanompo izany raha tratran’ny tompony manao tahaka izany raha avy izy.

44 Lazaiko marina aminareo fa hotendreny ho mpitandrina ny fananany rehetra izy.

45 Fa raha izany mpanompo izany kosa, no manao anakampo hoe: ‹Ela vao ho avy ny tompoko› ka amin’izany dia mikapoka ny ankizy lahy sy ny ankizy vavy izy, sady mihinana sy misotro ka mamo,

46 dia ho avy amin’ny ora tsy ampoiziny sy amin’ny ora tsy fantany ny tompon’izany mpanompo izany, ka hataony rotiky ny kapoka izy, ary homeny anjara any amin’ny mpanompo ratsy.

47 Izay mpanompo nahalala ny sitrapon’ny tompony ihany nefa tsy niomana, na tsy nanao araka ny sitrapony, no hokapohina imbetsaka;

48 fa izay tsy nahalala kosa, na nanao zavatra mendri-pamaizana aza, dia hokapohina kelikely ihany. Izay nomena be no hitakiana be, ary izay nanankinana be no hadinina be koa.»

I Jesoa eo anatrehan’ny Fijaliany

49 «Tonga hanipy afoetỳ ambonin’ny tany Aho, ka akory ity faniriako mba hirehetan’izany sahady!

50 Ary manana batemyhanaovana batemy Ahy koa Aho, ka ory manao ahoana Aho ambara-pahatanterak’izany!»

I Jesoa antony hifanoheran’ny olona

51 «Moa ataonareo fa tonga hitondra fihavanana etỳ an-tany Aho? Tsia, hoy Izaho aminareo, fa fampisarahana aza.

52 Satria hatramin’izao raha olona dimy an-trano iray, dia hanao an-daniny, ka hifanohitra ny telo amin’ny roa, ary ny roa amin’ny telo;

53 ny ray amin’ny zanany lahy, ary ny zanaka lahy amin’ny rainy; ny reny amin’ny zanany vavy, ary ny zanaka vavy amin’ny reniny; ny rafozam-bavy amin’ny vinantony vavy, ary ny vinanto vavy amin’ny rafozany vavy.»

Mahaiza mamantatra ny andro diavina

54 Dia hoy koa Izy tamin’ny vahoaka: «Raha vao mahita rahona avy any andrefana ianareo, dia manao hoe: ‹Ho avy ny orana›, ka avy tokoa izy;

55 ary raha renareo avy atsimo ny rivotra, dia hoy ianareo: ‹Hafana ny andro›, ka tonga tokoa izany.

56 Ry mpihatsaravelatsihy, hainareo fantarina ny toetry ny lanitra sy ny tany, ka ahoana àry no tsy ahafantaranareo izao andro diavintsika izao?

57 Nahoana koa no tsy amantaran’ny tenanareo izay marina,

58 Fa raha miara-mandeha amin’izay manana ady aminao ianao hanatrika ny mpitsara, dia ataovy izay hahafahanao aminy raha mbola eny an-dalana ianareo, fandrao tongany any amin’ny mpitsara ianao ka atolotry ny mpitsara amin’ny mpamatotra an-tranomaizina.

59 Lazaiko aminao fa tsy ho afaka ao ianao ambara-pahaloanao ny variraiventy farany indrindra.

Fiantsoan’Andriamanitra hibebaka

1 Tamin’izany andro izany koa no nisy olona sasany tonga nilaza tamin’i Jesoa ny nanjò an’ireo Galileanina, fa nalatsak’i Pilaty niaraka tamin’ny soron’izy ireo ny rany.

2 Ary novaliany hoe: «Moa ataonareo fa ireny Galileanina ireny dia mpanota mihoatra noho ny Galileanina rehetra matoa nozoin-doza toy izany?

3 Tsia, hoy Izaho aminareo; fa raha tsy mibebaka ianareo, dia ho very tahaka azy avokoa ianareo rehetra.

4 Na moa ataonareo fa ny olona valo ambin’ny folo maty nianjeran’ny tilikambon’i Siloe no meloka noho ny mponina rehetra tao Jerosalema?

5 Tsia, hoy Izaho aminareo; fa raha tsy mibebaka ianareo, dia ho very tahaka azy avokoa ianareo rehetra.»

Fanoharana amin’ny aviavy tsy mamoa

6 Dia nanao ity fanoharana ity koa Izy: «Nisy lehilahy anankiray nanana aviavy nambolena tamin’ny tanimboalobony, ka nankeo aminy mba hitady voa fa tsy nahita.

7 Dia hoy izy tamin’ny mpiasa ny tanimboalobony: ‹Indro efa telo taona izay no tonga mitady voa amin’ity aviavy ity aho, nefa tsy mahita; koa kapao io, fa nahoana no manimba ny tany foana eo?›

8 Ary hoy ny mpiasa namaly azy: ‹Aoka re ho eo ihany izy amin’ity taona ity, Tompoko, dia hoevoiko ny fotony sady hasiako zezika;

9 angamba hamoa izy, fa raha tsy izany dia hokapainao ihany izy.› »

Ilay vehivavy nanjoko nositranina sabata

10 Ary nampianatra tao amin’ny sinagoga anankiray i Jesoa indray sabata.

11 Ka nisy vehivavy anankiray teo azon’ny demony hatramin’ny valo ambin’ny folo taona, ka efa nataony saozanina sy nanjoko tsy afa-nitraka mihitsy.

12 Nony nahita azy i Jesoa dia niantso azy ka nanao taminy hoe: «Ravehivavy, afaka ny aretinao.»

13 Dia nametrahany tanana izy, ka nitraka niaraka tamin’izay, sy nankalaza an’Andriamanitra.

14 Fa sosotra ny lehiben’ny sinagoga noho i Jesoa nanasitrana tamin’ny andro sabata, ka niloa-bava tamin’ny vahoaka nanao hoe: «Henemana no andro azo iasana ka tongava hositranina amin’ireo ianareo, fa aza amin’ny andro sabata.»

15 Fa hoy ny navalin’ny Tompo azy: «Ry mpihatsaravelatsihy, moa tsy samy mamaha ny ombiny na ny ampondrany hiala amin’ny tranony avy ianareo, ka mitondra azy hisotro rano na dia sabata aza ny andro?

16 Ary ity zanaka vavin’i Abrahama izay efa nafatotr’i Satana hatramin’ny valo ambin’ny folo taona ity ve tsy tokony hovahana amin’izany fatorana izany amin’ny andro sabata?»

17 Tamin’Izy niteny izany, izay rehetra nanohitra Azy dia nangaihay foana, fa ny vahoaka rehetra kosa nifaly noho ny zavatra malaza rehetra nataony.

Fanoharana amin’ny voan-tsinapy

18 Dia hoy koa i Jesoa: «Ny inona no tahaka ny fanjakan’Andriamanitra, ary ny inona no hanoharako azy?

19 Tahaka ny voan-tsinapy izy, izay nalain’ny olona ka namboleny tamin’ny tanimboliny, dia nitombo ka tonga hazo ary nitoeran’ny voromanidina ny rantsany.»

Fanoharana amin’ny lalivay

20 Dia hoy indray Izy: «Inona no hanoharako ny fanjakan’Andriamanitra?

21 Tahaka ny lalivay izay nalain’ny vehivavy anankiray izy, ka nampifangaroiny tamin’ny lafarina intelon’ny famarana mba hampibohaka ny koban-dafarina rehetra.»

Ny varavarana ety; ny Jody tsy mino ailika, ny tsy mpino antsoina

22 Dia nitety ny tanàna sy ny vohitra Izy ka nampianatra sy nandroso ho any Jerosalema.

23 Ary nisy olona anankiray nanontany Azy hoe: «Tompoko, moa dia vitsy ihany no ho voavonjy?» Ka hoy Izy tamin’ny olona:

24 Mikeleza aina hiditra amin’ny varavarana ety; fa lazaiko aminareo fa maro no hitadyhiditra nefa tsy ho afaka.

25 Satria rehefa hitsangana manidy ny varavarana ny tompon-trano no tavela any alatrano ianareo ka handondòna ny varavarana hanao hoe: Tompoko, vohay izahay, dia hovaliany hoe: Tsy fantatro izay niavianareo

26 Ary amin’izay ianareo dia hanao hoe: Nihinana sy nisotro teo anatrehanao izahay, ary nampianatra teny amin’ny kianjanay Ianao.

27 Fa hovaliany hoe: Lazaiko aminareo fa tsy fantatro izay niavianareo;mialà amiko ianareo rehetra mpanao ratsy.

28 Ary amin’izay vao hisy fitomaniana sy fikitroha-nify, rehefa hitanareo eo amin’ny fanjakan’Andriamanitra i Abrahama sy i Isaaka ary i Jakôba mbamin’ny mpaminany rehetra, fa ianareo kosa ho voaroaka any ivelany.

29 Hisy olona avy any atsinanana sy andrefana, ary avy any avaratra sy atsimo, hipetraka hihinana eo amin’ny fanjakan’Andriamanitra.

30 Ary indro hisy farany izay ho voalohany, ary hisy voalohany izay ho farany.

I Herôda, amboadia

31 Tamin’izay andro izay ihany dia nisy Farisianina sasany nanatona Azy, ka nanao taminy hoe: «Mandehana miala eo ianao, fa tadiavin’i Herôda hovonoina.»

32 Dia hoy Izy tamin’ireo: «Mandehana lazao amin’izany amboadia izany hoe: ‹Indro mandroaka demony sy manasitrana marary aho anio sy rahampitso, fa amin’ny andro fahatelo vao ho tanteraka ny amiko.›

33 Kanefa tsy maintsy tohiziko ihany ny diako anio sy rahampitso ary rahafakampitso; satria tsy mety raha mpaminany ka dia hovonoina ivelan’i Jerosalema.»

Antso mivantana amin’i Jerosalema

34 «Ry Jerosalema, ry Jerosalema, izay mamono ny mpaminany sy mitora-bato izay irahina aminao, impiry re no nitadiavako hamory ny zanakao tahaka ny reniakoho mambomba ny zanany eo ambany elany, fa tsy nety ianao!

35 Ary indro fa havela aminareo ny tranonareo. Fa lazaiko aminareo fa tsy hahita Ahy intsony ianareo ambara-pilazanareo hoe:‹Hohasoavina anie Ilay avy, amin’ny Anaran’ny Tompo.›»

Ilay lehilahy manirano nositranina sabata

1 Indray sabata, raha niditra, hisakafo tao an-tranon’ny loholon’ny Farisianina anankiray i Jesoa, dia nitsikilo Azy izy ireo.

2 Ary indro nisy lehilahy anankiray manirano teo anatrehany.

3 Dia niteny i Jesoa ka nanao tamin’ny mpampianatra ny Lalàna sy ny Farisianina hoe: «Azo atao ve ny manasitrana amin’ny andro sabata?»

4 Fa tsy niteny tsy nivolana izy ireo. Dia noraisin’i Jesoa tamin’ny tanany kosa ralehilahy ka nositraniny ary nalefany nandeha.

5 Izay Izy vao nilaza tamin’ireo hoe: «Raha latsaka amin’ny fantsakana lalina ny ampondra na ny ombinareo, iza aminareo no tsy hanafaka azy faingana na dia sabata aza ny andro?»

6 Fa tsy nanan-kavaly an’izany izy ireo.

Ny mifidifidy toerana

7 Raha efa izany, nony hitan’i Jesoa ny hamaimaizan’ny olona nasaina naka ny fitoerana voalohany, dia nanao ity fanoharana ity tamin’izy ireo Izy:

8 «Raha asaina amin’ny fampakaram-bady ianao, aza mipetraka amin’ny fitoerana voalohany, fandrao misy olona nasaina ambony toetra noho ianao,

9 ka ho avy izay nanasa anao sy izy, hilaza aminao hoe: ‹Omeo an’ity ny fitoeranao›, ary amin’izay ho menatra ianao hifindra arỳ amin’ny fitoerana farany.

10 Fa raha asaina ianao, dia any amin’ny fitoerana farany mipetraka, ka raha tonga izay nanasa anao, dia hilaza aminao hoe: ‹Mandrosoa, ry sakaiza, etsy alohaloha kokoa, amin’izay dia hahazo voninahitra eo imason’izay rehetra hiara-mihinana aminao ianao.›

11 Fa izay rehetra manandra-tena no haetry, ary izay manetry tena no hasandratra.»

Fifidianana izay olona hasaina

12 Ary hoy kosa Izy tamin’ilay nanasa Azy: «Raha manasa olona hisakafo antoandro na hariva ianao, aza dia ny sakaizanao na ny rahalahinao na ny havanao na ny mpanan-karena mifanakaiky aminao no asaina, fandrao asain’ireo koa ianao ka ho voavaliny izay nataonao taminy.

13 Fa raha manao fanasana ianao, ny mahantra, ny kilemaina, ny mandringa, ny jamba, no asao:

14 dia ho sambatra ianao, satria tsy mba manan-kavaly anao ireo; fa rehefa mby amin’ny fitsanganan’ny olo-marina vao hovaliana ianao.»

Ireo nasaina tsy nety tonga

15 Nony nandre izany ny anankiray tamin’izay niara-nihinana teo, dia nanao tamin’i Jesoa hoe: «Sambatra lahy izay hanana anjara amin’ny fihinanam-be any amin’ny fanjakan’Andriamanitra.»

16 Fa hoy Izy taminy: «Nisy lehilahy anankiray nanao fanasana lehibe ka nanasa olona maro.

17 Nony tonga ny fotoana fisakafoana, dia naniraka ankizilahy iray izy hanainga ny nasaina hoe: ‹Ndeha ianareo, fa efa vonona ny zavatra rehetra.›

18 Fa samy niala tsiny izy rehetra. Hoy ny voalohany taminy: ‹Efa nividy saha aho ka tsy maintsy mandeha hizaha azy; koa mihanta aminao aho, aoka re mba tsy ho tsiniko.›

19 Hoy kosa ny faharoa: ‹Efa nividy omby folo aho ka handeha hitsapa azy; koa mihanta aminao aho, aoka re mba tsy ho tsiniko.›

20 Ary hoy koa ny anankiray: ‹Vao nampaka-bady aho ka tsy afa-mankany.›

21 Dia nody ilay ankizilahy ka nilaza izany tamin’ny tompony. Tezitra tamin’izay ny tompony ka nanao tamin’ny ankizy lahiny hoe: ‹Mandehana faingana mankany amin’ny kianja sy ny lalam-ben’ny tanàna, ka ento mankaty ny mahantra sy ny kilemaina sy ny jamba ary ny mandringa.›

22 Ary hoy ilay ankizilahy: ‹Tompoko, vita ny nasainao natao, nefa mbola misy fitoerana ihany.›

23 Dia hoy ny tompo tamin’ilay ankizy lahy: ‹Mandehana mankeny amin’ny lalam-be sy ny fefim-boly, ka tereo ny olona hiditra mba ho feno ny tranoko.

24 Fa lazaiko aminareo fa tsy hisy hanandrana ny sakafoko amin’ireo olona nasaina ireo na dia iray aza.› »

Mandao izay rehetra tsy foy

25 Ary nisy vahoaka betsaka niaraka tamin’i Jesoa, ka nitodika Izy nanao tamin’ireo hoe:

26 «Raha misy manatona Ahy ka tsy mankahalany rainy sy ny reniny, ary ny vadiny sy ny zanany, mbamin’ny rahalahiny sy ny anabaviny ary na dia ny ainy aza, dia tsy mety ho mpianatro.

27 Ary izay tsy mitondra ny Hazofijaliany sy tsy manaraka Ahy dia tsy mety ho mpianatro.»

Mamoy ny fananana rehetra

28 «Ka iza tokoa moa aminareo no te-hanao tilikambo ka tsy hipetraka aloha hitety izay holaniany, na hanana ny ampy hamitana azy izy, na tsia;

29 sao vita ny fototra vao tsy afa-manefa azy izy ka holatsain’izay rehetra mahita hoe:

30 ‹Mba nanomboka nanao trano ralehilahy io, nefa tsy nahavita tsinona!›

31 Sa iza no mpanjaka handeha hiady amin’ny mpanjaka hafa, ka tsy hipetraka aloha hihevitra na ho azony atao amin’ny miaramila iray alina ny hikatroka amin’ny fahavalo roa alina avy hamely azy na tsia?

32 Fa raha tsy hahomby izy, dieny mbola lavitra ilay mpanjaka anankiray dia handefa iraka hanao raharaham-pihavanana aminy izy.

33 Toy izany koa, na iza na iza aminareo tsy mahafoy izay rehetra ananany dia tsy mety ho mpianatro.»

Tsy tokony hatsatso

34 «Tsara ny fanasina; nefa raha ny fanasina no tonga matsatso, hatao ahoana indray no fanasina azy?

35 Tsy hahasoa tany, tsy hahasoa zezika izy, ka dia hariana any alatrano. Aoka hihaino izay manan-tsofina hihainoana.»

Fanoharana telo momba ny famindram-po

1 Ary nanatona hihaino Azy ny Poblikanina rehetra sy ny mpanota,

2 ka nimonjomonjo ny Farisianina sy ny mpanora-dalàna nanao hoe: «Ilay ity mandray ny mpanota sy miara-mihinana aminy.»

3 Dia nanao ity fanoharana ity tamin’izy ireo i Jesoa hoe:

Ny ondry very

4 «Iza moa aminareo no manana ondry zato ka very ny anankiray no tsy handao ny sivy amby sivifolo any an’efitra, ka handeha hitady ilay very mandra-pahitany azy?

5 Ary rehefa hitany dia ataony eo an-tsorony an-kafaliana,

6 ka nony tonga any an-tranony izy, dia mamory ny sakaizany sy ny olo-mifanakaiky aminy ary manao amin’ireo hoe: ‹Miaraha mifaly amiko, fa efa hitako ny ondriko very.›

7 Lazaiko aminareo, fa toy izany koa hisy hafaliana lehibe kokoaany an-danitra amin’ny mpanota iray mibebaka, noho ny amin’ny olo-marina sivy amby sivifolo tsy mila fibebahana.»

Ny dragma very

8 «Sa iza no vehivavy manana dragma folo ka very ny anankiray, no tsy hampirehitra jiro sy hifafa trano, ary hitady azy tsara ambara-pahitany azy?

9 Ary rehefa hitany dia mamory ny sakaizany sy ny vehivavy mifanakaiky aminy izy ka manao hoe: ‹Miaraha mifaly amiko, fa efa hitako ny dragmako very›

10 Toy izany koa lazaiko aminareo, fa hisy hafaliana lehibe eo anatrehan’ny Anjelin’Andriamanitra raha misy mpanota iray mibebaka.»

11 Hoy koa izy: Nisy lehilahy anankiray nanan-janaka mirahalahy,

12 ka hoy ilay zandriny tamin-drainy: ‹Dada ô, omeo ahy ny anjara fananana tokony ho ahy›. Dia nozarainy tamin’izy roa lahy ny fananany.

13 Nony afaka andro vitsivitsy, dia nangonin’ilay zandriny ny fananany rehetra ka lasa nankany an-tany lavitra izy, nandany ny fananany tamin’ny fitondran-tena ratsy.

14 Rehefa laniny avokoa ny fananany rehetra, dia nisy mosary lehibe tamin’izany tany izany ka nahantra izy.

15 Dia lasa ny anao nikarama tamin’ny tompon-tany anankiray tany, ka nirahiny hiandry kisoa tany an-tsaha.

16 Naniry hivoky ny hodi-boan-javatra nohanin’ny kisoa izy, fa tsy nisy nanome azy.

17 Izay vao nody ny sainy ka hoy izy: Firifiry akory moa ny mpikaraman’idada no manan-kanina be, nefa izaho kosa ity maty noana atỳ!

18 Hitsangana aho ho any amin’ny raiko ka hanao aminy hoe: Dada ô! efa nanota tamin’ny lanitra sy teo anatrehanao aho,

19 ka tsy mendrika hantsoina hoe zanakao intsony; fa mba ataovy tahaka ny anankiray amin’ny mpikaramanao re aho.

20 Dia niainga izy ka lasa nankany amin-drainy. Mbola lavitra kosa izy, dia nahatazana azy irainy, ka onena nidodododo nitsena azy, ary namihina ny vozony sy nanoroka azy.

21 Dia hoy ity zanany taminy: Dada ô! efa nanota tamin’ny lanitra sy teo anatrehanao aho, ka tsy mendrika hantsoina ho zanakao intsony.

22 Fa hoy irainy tamin’ny mpanompony: Alao haingana ny akanjo tsara indrindra ka ampiakanjoy azy; asio peratra ny rantsan-tanany, kiraroy ny tongony,

23 ary ento ny zanak’omby matavy ka vonoy, dia aoka hihinana sy hifaly isika,

24 fa ity zanako ity dia maty ka velona indray, ary very ka hita indray. Dia nifaly izy rehetra.

25 Sendra tany an-tsaha kosa ny zanany lahimatoa tamin’izay. Nony nody izy sy mby teo akaikin’ny trano, dia nandre zava-maneno sy dihy,

26 ka niantso ankizilahy anankiray sy nanontany azy izay anton’izany.

27 Dia hoy ilay mpanompo taminy: Tonga ny rahalahinao, ka namono zanak’omby matavy irainao, satria tafaverina soa aman-tsara izy.

28 Dia tezitra izy, ka tsy nety niditra, ary nivoaka irainy hampandroso azy.

29 Fa hoy ny navaliny an-drainy: Indro efa ela no nanompoako anao, ary tsy mbola nandika ny didinao akory aho, nefa tsy mbola mba nomenao zanak’osy iray akory hifaliako amin’ny sakaizako;

30 fa nony tonga kosa io zanakao io, izay avy nandany ny fanananao tamin’ny vehivavy janga, dia namonoanao zanak’omby matavy izy.

31 Fa hoy irainy taminy: Ianao, anaka, dia eto amiko mandrakariva ka anao avokoa izay rehetra ananako,

32 fa mety kosa ny manao fihinanam-be sy fifaliana, satria io rahalahinao io, dia maty ka velona indray, ary very ka hita indray.

Ilay mpitandrim-pananana tsy mahatoky

1 Ary hoy koa i Jesoa tamin’ny mpianany: «Nisy lehilahy mpanan-karena anankiray nanana mpitandrim-pananana izay nampangain’ny olona taminy fa nandany ny fananany.

2 Dia nantsoiny izy ka nilazany hoe: ‹Ahoana izany fandrenesako anao izany? Avoahy kely hoe ny fitandremanao, fa amin’ny sisa dia tsy hahazo miadidy ny fananako intsony ianao.›

3 Tamin’izay ilay mpitandrina dia nanao anakam-po hoe: ‹Inona re no hataoko, fa esorin’ny tompoko amin’ny fitandremana ny fananany aho ity? Ny miasa tany moa tsy vitako, ny mangataka indray mahamenatra ahy.

4 Aoka fa fantatro izay hataoko, mba handraisan’ny olona ahy any an-tranony rehefa esorina amin’ny raharahako aho.›

5 Dia nampanalainy tsirairay izay rehetra nitrosa tamin’ny tompony, ka hoy izy tamin’ny voalohany: ‹Ananan’ny tompoko hoatrinona ianao?›

6 ‹Diloilo injaton’ny barìka›, hoy io. Dia hoy ny mpitandrina taminy: ‹Raiso ny taratasinao, ary mipetraha ka soraty haingana dimampolo.›

7 Dia hoy indray izy tamin’ny anankiray: ‹Hoatrinona kosa ny trosa aminao?› ‹Vary injaton’ny famarana›, hoy izy. Dia hoy ilay mpitandrina: ‹Raiso ny taratasinao ka soraty valopolo.›

8 Noderain’ny tomponyilay mpitandrina tsy marina satria nampiseho hafetsena, fa hendrihendry kokoa ny zanak’izao tontolo izao amin’izy samy izy, noho ny zanaky ny fahazavana.»

Ny fampiasana tsara ny vola

9 «Ka hoy Aho aminareo: Aoka ny harena tsy marinano hahazoanareo sakaiza, mba handraisany anareo any amin’ny tranolay mandrakizay raha avy izay haharerahanareo.

10 Izay mahatoky amin’ny kely, dia mahatoky koa amin’ny lehibe, ary izay tsy marina amin’ny kely, dia tsy marina koa amin’ny lehibe.

11 Koa raha tsy mahatoky amin’ny harena tsy marina ianareo, iza no hametraka aminareo ny harena marina?

12 Ary raha tsy mahatoky amin’izay tsy anareo ianareo, iza no hanome anareo izay anareo?»

13 «Tsy misy mpanompo mahay manompo tompo roa, fa na hankahala ny iray izy ka ho tia ny anankiray; na homba ny anankiray kosa ka hanamavo ny iray indray. Tsy mahay manompo an’Andriamanitra sy ny harena ianareo.»

Hanoherana ny Farisianina tia vola

14 Ny Farisianina izay fatra-pitia vola dia mba nihaino izany rehetra izany koa, ka dia naneso Azy.

15 Fa hoy Izy tamin’izy ireo: «Ianareo dia mpanamarin-tena eo imason’ny olona, nefa fantatr’Andriamanitra ihany ny fonareo, ary izay ambony eo imason’ny olombelona dia fahavetavetana eo anatrehan’Andriamanitra kosa.»

Ny hahazoana ny Fanjakan’Andriamanitra

16 «Ny Lalàna sy ny Mpaminany no niroso hatramin’i Joany, fa hatramin’i Joany kosa dia ny Fanjakan’Andriamanitra no torina, ka samy mikezaka hiditra ao ny olona.»

Maharitra ny Lalàna

17 «Moramora kokoa ny hahalevonan’ny tany aman-danitra noho ny tsy hahatanterahan’ny Lalàna na dia ny tendri-tsoratra iray aza.»

Tsy azo sarahina ny fanambadiana

18 «Izay rehetra misao-bady ka manambady hafa dia mijangajanga, ary izay manambady ny efa voasaotra dia mijangajanga koa.»

Ilay mpanan-karena ratsy fanahy sy i Lazara mahantra

19 «Nisy mpanan-karena anankiray niakanjo jaky sy rongonim-bazaha madinika, sady nanao fihinanam-be isan’andro.

20 Ary nisy kosa mahantra ferena anankiray atao hoe Lazara nivalandòtra teo am-bavahadiny.

21 Naniry hihinana ny sombin-kanina latsaka tamin’ny latabatr’ilay mpanan-karena izy, fa ny alika aza no tonga ka nilelaka ny feriny.

22 Ary maty ilay mahantra ka nentin’ny Anjely tany an-tratran’i Abrahama; dia maty koa ilay mpanan-karena ka nalevina.

23 Tao amin’ny fitoeran’ny maty, ilay nijaly iny izy, dia niandrandra, ka tazany teny lavitra teny i Abrahama sy i Lazara teo an-tratrany,

24 ka niantso izy nanao hoe: ‹Ry kiaky Abrahama ô! mamindra fo amiko, mba iraho kely re i Lazara handroboka ny loha fanondrony ao anaty rano mba hampangatsiatsiaka ny lelako ahay, fa mijaly loatra aho eto anatin’ity lelafo ity.›

25 Fa hoy i Abrahama taminy: ‹Anaka, tsarovy fa tamin’ny andro niainanao ianao moa nahita soa, ary i Lazara kosa nozoim-pahoriana: koa ankehitriny kosa mba azy ny fanalana alahelo, fa anao ny fijaliana.

26 Sady amin’ireto toerantsika ireto, dia misy hantsana makadiry natao hanelanelana antsika, ka izay te hiala atỳ hankany aminareo tsy afaka; ary izay eny kosa tsy afaka miampita atỳ.›

27 Dia hoy izy: ‹Mihanta aminao re aho, ry kiaky, mba iraho kely i Lazara ho any an-tranon-draiko

28 (fa manan-drahalahy dimy aho), mba hilaza aminy ny marina, fandrao tonga amin’itony fitoerana fijaliana itony koa izy ireo.›

29 Fa hoy i Abrahama taminy: ‹Manana an’i Môizy sy ny Mpaminany izy ireo, ka aoka hihaino an’ireo izy.›

30 Fa hoy izy: ‹Tsia re, ry ikaky Abrahama ô! Fa raha anankiray amin’ny maty no mankany aminy, dia hibebaka izy.›

31 Fa hoy i Abrahama taminy: ‹Raha tsy mihaino an’i Môizy sy ny Mpaminany izy, dia tsy hino na dia misy mitsangana avy any amin’ny maty aza.› »

Ny fanafintohinana

1 Ary hoy indray i Jesoa tamin’ny mpianany: «Tsy maintsy ho avy ny fanafintohinana, fa loza no hanjò an’izay iaviany!

2 Aleo anantonana vato fikosohan-dafarina ny vozony ka alentika any anatin’ny ranomasina izy, toy izay manafintohina na dia ny anankiray amin’ireto madinika ireto aza.

3 Koa mitandrema ianareo.»

Fifananarana am-pihavanana

«Raha diso aminao ny rahalahinao, anaro izy, ka raha mivalo izy, dia mamelà azy.

4 Ary na dia ho diso aminao impito indray andro aza izy, ka miverina impito koa manao hoe: ‹Mifona aho›, dia mamelà.»

Herin’ny finoana

5 Ary hoy ny Apôstôly tamin’ny Tompo, «Ampitomboy ny finoanay.»

6 Fa hoy ny Tompo: «Raha manam-pinoana ohatra ny voan-tsinapy iray ianareo, dia mahazo milaza amin’io voaroihazo io hoe: ‹Miongòta, ka mifindrà any anatin’ny ranomasina›, dia hanaiky anareo izy.»

Manompo am-panetren-tena

7 «Ary iza moa aminareo no manana mpanompo miasa tany na miandry ondry avy any an-tsaha no mba hilaza aminy hoe: ‹Metia faingana, ary mipetraha hihinana›

8 Moa tsy izao aza no holazainy aminy: ‹Amboary ny sakafoko, ary misikìna hampihinana ahy mandra-pitsahatro avy mihinana sy misotro, fa raha efa izany vao hihinana sy hisotro ianao?›

9 Ary moa misaotra izany mpanompo izany akory va izy, satria nanao izay nasainy nataony io?

10 Ataoko fa tsy izany. Koa tahaka izany koa ianareo: rehefa vitanareo izay nandidiana anareo, dia lazao hoe: ‹Mpanompo tsy mahasoaizahay, fa izay tsy maintsy ho nataonay ihany no hany vitanay.› »

Ireo boka folo lahy

11 Nony nandeha ho any Jerosalema i Jesoa dia nanara-tsisina an’i Samaria sy i Galilea.

12 Ary raha niditra tao amin’ny vohitra anankiray Izy, dia nifanena tamin’ny boka folo lahy, izay nijanona teny lavidavitra teny.

13 Dia niantso izy ireo ka nanao hoe: «Ry Jesoa Mpampianatra ô! mamindrà fo aminay.»

14 Vantany vao nahita azy ireo Izy dia nanao hoe: «Mandehana, misehoa amin’ny mpisorona,» ka nony nandeha ho any izy ireo dia sitrana teny am-pandehanana.

15 Ary ny anankiray tamin’ireny, rehefa nahita fa sitrana izy, dia niverina ka nankalaza an’Andriamanitra tamin’ny feo mahery.

16 Niankohoka tamin’ny tongotr’i Jesoa izy, dia nisaotra Azy; ary Samaritanina izy io.

17 Dia niteny i Jesoa ka nanao hoe: «Moa tsy folo lahy va no nadio? Ka nankaiza àry ny sivy?

18 Ny vahiny indray ity no hany niverina tamin’izy ireny mba hankalaza an’Andriamanitra?»

19 Dia hoy Izy taminy: «Mitsangàna, ary mandehana, fa ny finoanao no nahavonjy anao.»

Ho avy ny Fanjakan’Andriamanitra

20 Ary nanontanian’ny Farisianina izay andro hiavian’ny fanjakan’Andriamanitra Izy ka namaly hoe: «Tsy mba manetriketrika fiavy ny fanjakan’Andriamanitra,

21 ary tsy hataon’ny olona hoe: ‹Indro atỳ na arỳ izy›; fa indro ao anatinareo ny fanjakan’Andriamanitra.»

Ny Andron’ny Zanak’olona

22 Dia hoy koa Izy tamin’ny mpianany: «Ho avy ny andro hanirianareo hahita ny anankiray amin’ny andron’ny Zanak’olona, fa tsy hahita ianareo.

23 Hilazan’ny olona ianareo fa hoe: ‹Indro erỳ; na indro etỳ›; nefa aza mankany ianareo, na manaraka izany akory.

24 Fa tahaka ny fanjelatry ny hela-baratra miserana ny faravodilanitra hatramin’ny lafiny iray ka hatrany amin’ny lafiny hafa, dia ho tahaka izany koa no fiavin’ny Zanak’olona amin’ny androny.

25 Fa tsy maintsy hijaly mafy aloha Izy, sy holavin’ity taranaka ity.»

26 «Ary toy ny niseho tamin’ny andron’i Nôe no hiseho koa amin’ny andron’ny Zanak’olona:

27 nihinana sy nisotro ny olona ary nampaka-bady sy namoa-jazavavy, mandra-pahatongan’ny andro nidiran’i Nôe tao amin’ny sambo fiara, dia tonga ny safodrano ka nandringana azy rehetra.

28 Ary koa tahaka ny tamin’ny andron’i Lôta: nihinana sy nisotro ny olona, nividy sy nivarotra, ary namboly sy nanao trano;

29 fa tamin’ny andro nivoahan’i Lôta tao Sôdôma kosa, nisy afo sy solifara avy any an-danitra nilatsaka nandringana azy rehetra.

30 Dia ho tahaka izany koa amin’ny andro hisehoan’ny Zanak’olona.»

31 «Amin’izany andro izany, izay any ambony tafon-trano aoka tsy hiditra haka ny zavany ao an-tranony; toy izany koa, izay any an-tsaha aoka tsy hiverina haka izay nilaozany,

32 Tsarovy ny vadin’i Lôta!

33 Izay hitady hamonjy ny ainy, dia hahavery azy, fa izay hahafoy azy no hamonjy azy.

34 Lazaiko aminareo fa amin’izany alina izany, amin’ny olona roa lahy miray fandriana, ny iray horaisina ary ny iray havela;

35 amin’ny olona roa vavy miara-manodina fikosohan-dafarina, ny iray horaisina ary ny iray havela; ary amin’ny olona roa lahy izay eny an-tsaha, ny iray horaisina ary ny iray havela.»

36 Dia namaly izy ireo ka nanao taminy hoe: «Ho aiza Tompoko?»

37 Ary hoy Izy taminy: «Amin’izay hitoeran’ny faty no hiangonan’ny voromahery.»

Ilay mpitsara ratsy fanahy sy ilay mpitondra tena nanao lemozy

1 Ary nanao fanoharana tamin’izy ireo koa Izy, momba ny tsy maintsy ivavahana lalandava sy amim-paharetana.

2 Hoy Izy: «Tany amin’ny tanàna anankiray nisy mpitsara anankiray tsy natahotra an’Andriamanitra sy tsy menamaso olona.

3 Ary tao amin’izany tanàna izany koa, dia nisy mpitondratena anankiray nankao aminy matetika nanao hoe: ‹Omeo rariny aho amin’ilay miady amiko›;

4 fa tsy nanaiky na oviana na oviana izy. Kanjo tamin’ny farany dia hoy izy anakam-po: ‹Na dia tsy matahotra an’Andriamanitra aza aho sy tsy menamaso olona,

5 dia manahirana ahy ity mpitondratena ity, ka homeko rariny izy mba tsy hiverimberina mandrakariva hanorisory ahy.›

6 Ary henoy, hoy ny Tompo, izay lazain’ilay mpitsara tsy marina,

7 ka Andriamanitra indray va no tsy hanome rariny ny olom-pinidiny izay mitaraina aminy andro aman’alina, ary tsy halaky hamonjy azy?

8 Lazaiko aminareo fa homeny rariny haingana izy ireo. Kanefa rehefa tonga ny Zanak’olona, moa mba hahita finoana etỳ ambonin’ny tany Izy?»

Ilay Farisianina sy ilay Poblikanina

9 Dia nanao ity fanoharana ity koa Izy, mankamin’ny sasany natoky tena ho marina sy nanebaka ny namany:

10 «Nisy roa lahy niakatra hivavaka tany an-Tempoly: Farisianina ny iray ary Poblikanina ny anankiray.

11 Nitsangana ilay Farisianina ka nivavaka tao am-pony hoe: ‹Andriamanitra ô, misaotra Anao aho fa tsy mba tahaka ny olona hafa izay mpangalatra, tsy marina, mpijangajanga, na tahaka itsy Poblikanina itsy akory aza;

12 mifady hanina indroa isan-kerinandro aho, ary mandoa ny ampahafolon’ny fananako rehetra.›

13 Fa ilay poblikanina kosa nijanona eny lavidavitra eny sady tsy sahy niandrandra ny lanitra akory, fa nandona ny tratrany nanao hoe: ‹Andriamanitra ô, mamindrà fo amiko, fa mpanota aho.›

14 Lazaiko aminareo fa ity no nidina efa nohamarinina, tany an-tranony, fa tsy ilay anankiray; fa izay rehetra manandra-tena no haetry, ary izay manetry tena no hasandratra.»

I Jesoa sy ny ankizy madinika

15 Ary nisy koa olona nitondra zazakely ho eo aminy mba hametrahany tanana: fa nony nahita izany ny mpianatra dia niteny azy ireo.

16 Nefa nantsoin’i Jesoa hankeo aminy kosa ireo ka nataony hoe: «Avelao hanatona Ahy ny zazakely, ary aza sakanana izy, fa ny toa azy no hanana ny fanjakan’Andriamanitra.

17 Lazaiko marina aminareo, fa izay tsy handray ny fanjakan’Andriamanitra tahaka ny zazakely, dia tsy hiditra any akory.»

Ilay mpanan-karena tsy nanaraka an’i Jesoa

18 Ary nisy lehibeanankiray nanontany Azy hoe: «Ry Mpampianatra tsara ô, inona no hataoko hahazahoako ny fiainana mandrakizay?»

19 Dia hoy i Jesoa taminy: «Ahoana àry no iantsoanao Ahy hoe: tsara? Tsy misy tsara afa-tsy Andriamanitra irery.

20 Fantatrao ny didy hoe:‹Aza mamono olona, aza mijangajanga, aza mangalatra, aza miampanga lainga, manajà ny rainao aman-dreninao.›»

21 Dia hoy izy: «Efa nitandrina izany rehetra izany hatry ny fony kely aho.»

22 Nony nandre izany i Jesoa, dia nanao taminy hoe: «Zavatra iray loha no tsy ampy aminao: amidio ny fanananao rehetra ka omeo ny mahantra, dia hanan-drakitra any an-danitra ianao, ary avia hanaraka Ahy.»

23 Fa nony nandre izany teny izany izy, dia nanjonitra, satria mpanan-karen-doatra izy.

Ny loza ateraky ny harena

24 Koa hoy i Jesoa nony nahita azy nalahelo; «Akory ity hasarotry ny hidiran’ny mpanan-karena amin’ny fanjakan’Andriamanitra!

25 Fa moramora kokoa ny hidiran’ny rameva amin’ny vody fanjaitra noho ny hidiran’ny mpanan-karena amin’ny fanjakan’Andriamanitra.»

26 Dia hoy izay nihaino hoe: «Iza àry no ho voavonjy?»

27 Ka hoy ny navaliny: «Izay tsy azon’ny olona atao, dia azon’Andriamanitra atao.»

Valisoa ho an’izay mahafoy

28 Ary hoy i Piera: «Indro izahay efa nandao ny zavatra rehetra ka nanaraka Anao.»

29 Dia hoy i Jesoa taminy: «Lazaiko marina aminareo fa na iza na iza handao ny tranony, na ny havany, na ny rahalahiny, na ny vadiny, na ny zanany noho ny fanjakan’Andriamanitra,

30 dia sady hahazo bebe kokoa amin’izao fiainana izao, no hanana ny fiainana mandrakizay any aoriana.»

Fanintelony nanambaràn’i Jesoa ny hijaliany

31 Nony inona dia nalain’i Jesoa manokana ny roa ambin’ny folo lahy ka nilazany hoe: «Indro miakatra ho any Jerosalema isika, ka ho tanteraka izay rehetra nosoratan’ny mpaminany ny amin’ny Zanak’olona:

32 fa hatolotra amin’ny Jentily Izy ka hoesoina, holatsaina, hororàna,

33 ary rehefa voakapoka dia hovonoina, fa hitsangan-ko velona avy any amin’ny maty amin’ny andro fahatelo.»

34 Tsy nisy azon’izy ireo anefa izany, fa teny miafina ho azy ka tsy fantany akory izay heviny.

Ilay jamba tao Jerikô

35 Nony mby tao akaikin’i Jerikô Izy, dia nisy kosa jamba anankiray nipetraka nangataka teo amoron-dalana.

36 Ary nony nandre ny vahoaka nandalo izy dia nanontany hoe «Inona izany?»

37 ka nilazana fa i Jesoa avy any Nazareta no nandalo.

38 Dia niantso izy nanao hoe: «Ry Jesoa Zanak’i Davida ô! mamindrà fo amiko.»

39 Noraran’izay teo aloha izy mba hangina, fa vao mainka niantso mafimafy kokoa nanao hoe: «Ry Zanak’i Davida ô! mamindrà fo amiko e!»

40 Dia nijanona i Jesoa, ka nasainy nentina mankeo aminy izy. Ary nony tonga teo akaikiny dia nanontaniany hoe:

41 «Inona no tianao hataoko aminao?» Ary hoy izy: «Mba hahiratra aho, Tompoko.»

42 Dia hoy i Jesoa taminy: «Mahirata, ny finoanao no nahavonjy anao.»

43 Niaraka tamin’izay, dia nahiratra izy ka nanaraka azy sy nankalaza an’Andriamanitra. Ary ny vahoaka rehetra nahita izany koa nidera an’Andriamanitra.

I Zake

1 Nony niditra tao Jerikô i Jesoa, dia namaky ny tanàna.

2 Ary indro nisy lehilahy anankiray atao hoe Zake, lehiben’ny Poblikanina sady mpanan-karena,

3 nitady hahita an’i Jesoa mba hahalala Azy, fa tsy afaka noho ny habetsahan’ny olona, satria fohy izy.

4 Koa nihazakazaka nialoha izy, dia nianika amontana anankiray hitazana Azy, fa eo no handalovany.

5 Nony mby teo i Jesoa dia niandrandra ka nahita azy, ary nanao taminy hoe: «Ry Zake, midìna haingana, fa tsy maintsy hiantrano ao aminao Aho anio.»

6 Dia nidina haingana izy ka nandray Azy tamin-kafaliana.

7 Ary nony nahita izany ny olona, dia nimonomonona nanao hoe: «Lasa niditra any an-tranon’ny mpanota Izy.»

8 Fa i Zake kosa nijoro nanao tamin’ny Tompo hoe: «Tompoko, indro ny antsasaky ny fananako omeko ny mahantra, ary raha misy zavatr’olona nalaiko tsy an-drariny dia honerako inefatra hoatra azy.»

9 Dia hoy i Jesoa taminy: «Tonga amin’ity trano ity androany ny famonjena, satria zanak’i Abrahama koa ity lehilahy ity,

10 fa ny hitady sy hamonjy ny very no nahatongavan’ny Zanak’olona.»

Fanoharana amin’ny mina

11 Raha mbola nihaino izany ny olona dia nanao ity fanoharana ity koa i Jesoa, fa efa akaikin’i Jerosalema Izy, ary nataon’ny olona fa ny fanjakan’Andriamanitra hiseho miaraka amin’izay,

12 ka hoy Izy: Nisy andriandahy anankiray nankany an-tany lavitra mba handray fanjakana, dia mbola hiverina.

13 Dia niantso folo lahy tamin’ny mpanompony izy ka nanome azy mina foloary nanao taminy hoe: Ampitomboy ireny mandra-piveriko.

14 Fa nankahala azy kosa ny vahoaka iray tanindrazana aminy ka nampitondra teny nanaraka azy nanao hoe: Tsy tianay hanjaka aminay iny lehilahy iny.

15 Nony nahazo fanjakana izy ka tafaverina, dia nampaka ny mpanompo nomeny vola mba hahitany izay tombony azony avy.

16 Dia tonga ny voalohany ka nanao hoe: Tompoko, nahazoana mina folo ny mina iray.

17 Ary hoy izy taminy: Tsara izany, ry mpanompo tsara, noho ianao nahatoky tamin’ny kely, dia hanapaka tanàna folo ianao.

18 Dia tonga koa ny faharoa ka nanao hoe: Tompoko, nahazoana mina dimy ny mina iray.

19 Ary hoy izy taminy: Hanapaka tanàna dimy koa ianao.

20 Fa tonga kosa ny anankiray ka nanao hoe: Tompoko, indro ny minanao, fa notahiriziko tao anaty lamba;

21 satria natahotra anao aho, noho ianao lehilahy sarotiny ka maka izay tsy napetrakao, sy mijinja izay tsy nafafinao.

22 Dia hoy ilay mpanjaka taminy: Azoko amin’ny vavanao ianao, ry mpanompo ratsy fanahy; fantatrao fa olona sarotiny aho ka maka izay tsy napetrako ary mijinja izay tsy nafafiko;

23 koa nahoana àry no tsy napetrakao tany amin’ny banky ny volako, mba handraisako azy mban-janany rehefa tafaverina aho?

24 Dia izao no nataony tamin’izay teo: Alao ny minany eny aminy ka omeo ilay manana folo.

25 Fa hoy ireo taminy: Tompoko, efa manana mina folo izy.

26 Lazaiko aminareo fa izay manana no homena; fa izay tsy manana kosa dia halaina mbamin’izay ananany aza.

27 Ary ireo fahavalokotsy nety hanjakako ireo kosa dia ento atỳ, ka vonoy eto anatrehako.

Ny nidiran’i Jesoa Mesia tao Jerosalema

28 Rehefa niteny izany i Jesoa dia nandeha nialoha hiakatra any Jerosalema,

29 ka nony mby akaikin’i Betfage sy i Betania anilan’ny tendrombohitra Oliva Izy, dia naniraka ny mpianany roa lahy,

30 nanao hoe: «Mankanesa amin’itsy vohitra aloha itsy, fa rehefa miditra ao ianareo dia hahita zanak’ampondra mifatotra tsy mbola nitaingenan’olona, ka vahao izy, dia ento atỳ.

31 Ary raha misy manontany anareo hoe: ‹Nahoana io no vahanareo?› valio hoe: ‹Misy ilàn’ny Tompo azy.› »

32 Dia lasa ireo iraka ka nahita ny zavatra araka ny voalazan’i Jesoa taminy.

33 Teo am-pamahana ny zanak’ampondra dia hoy ny tompony tamin’izy ireo: «Nahoana no vahanareo ity zanak’ampondra?»

34 Ka novaliany hoe: «Misy ilàn’ny Tompo azy.»

35 Dia nentiny tany amin’i Jesoa ny zanak’ampondra, ka nataony teo amboniny ny fitafiany, dia natainginy teo i Jesoa.

36 Nony nandroso Izy, dia novelaran’ny olona ny fitafiany ny lalana.

37 Ary rehefa mby akaikin’ny fidinana amin’ny tendrombohitra Oliva Izy, dia nientan-kafaliana ny mpianany maro be ka nankalaza an’Andriamanitra tamin’ny feo mahery, noho ny fahagagana rehetra hitany.

38 «Hankalazaina anie, hoy izy ireo, ny Mpanjaka avy, amin’ny Anaran’ny Tompo! Fiadanana anie any an-danitra, ary voninahitra anie amin’ny Avo Indrindra!»

I Jesoa mankasitraka ny fihobian’ireo mpianany

39 Ary ny Farisianina sasany izay teo amin’ny vahoaka nanao taminy hoe: «Ry Mpampianatra ô, rarao re ny mpianatrao!»

40 Fa novaliany hoe: «Lazaiko aminareo fa raha mangina ireo, dia hiantsoantso ny vato.»

Fitomaniana an’i Jerosalema

41 Ary nony mby akaiky Izy ka nahita an’i Jerosalema dia nitomany azy nanao hoe:

42 «Raha izay kosa mantsy ianao no mba nahalala izay hampiadana anao, na dia amin’ity andro nomena anao ity ihany aza! Fa takona ny masonao izany ankehitriny.

43 Ka ho avy aminao ny andro hanaovan’ny fahavalonao hady manodidina anao; hosaronany ianao sy hotereny hatraiza hatraiza,

44 ary hofongorany hatramin’ny tany mbamin’ny zanakao eo anatinao ka tsy havelany hisy vato mifanongoa eo aminao, satria tsy nahalala ny andro namangiana anao ianao.»

Fandroahana ireo mpivarotra tao an-Tempoly

45 Nony niditra tao an-Tempoly Izy, dia nandroaka ny mpivarotra sy ny mpividy tao,

46 ka nanao taminy hoe: «Efa voasoratra, fany tranoko dia trano fivavahana,nefa ianareo kosa nanao azy hozohin’ny mpangalatra.»

Fampianarana tao an-Tempoly

47 Dia nampianatra isan’andro tao an-Tempoly Izy; fa ny lehiben’ny mpisorona sy ny mpanora-dalàna ary ny loholona kosa nitady hahafaty Azy;

48 nefa tsy hitan’izy ireo izay hevitra hoenti-manao izany, satria faly sy ravo nihaino Azy ny vahoaka rehetra.

Fanontanian’ny Jody momba ny fahefan’i Jesoa

1 Ary indray androtamin’izany, nampianatra ny vahoaka tao an-Tempoly izy ka nitory ny Evanjely, dia tonga ny lehiben’ny mpisorona sy ny mpanora-dalàna mbamin’ny loholona,

2 ka nanao taminy hoe: «Lazao anay: Inona moa no fahefana anaovanao izao zavatra izao, ary iza no nanome anao izany fahefana izany?»

3 Ary namaly i Jesoa ka nanao tamin’izy ireo hoe: «Mba hanontany zavatra anankiray aminareo koa àry Aho ka valio:

4 Avy aiza moa ny batemin’i Joany, avy amin’Andriamanitra sa avy amin’ny olona?»

5 Dia niara-nisaina izy ireo nanao hoe: «Raha izao mantsy no lazaintsika hoe, avy amin’Andriamanitra, dia hovaliany hoe: Nahoana àry ianareo no tsy nino azy?

6 Ary raha ataontsika hoe, avy amin’ny olona indray, dia hitora-bato antsika ny vahoaka, satria inoany ho mpaminany i Joany.»

7 Koa namaly izy ireo, fa tsy fantany izay niaviany.

8 Dia hoy i Jesoa taminy: «Izaho koa tsy hilaza aminareo izay fahefana anaovako izao zavatra izao.»

Fanoharana amin’ireo mpiasa tanimboaloboka mpamono olona

9 Dia nilaza ity fanoharana ity tamin’ny vahoaka Izy nanao hoe: «Nisy lehilahy anankiray namboly tanimboaloboka ka nahofany tamin’ny mpiasa, dia lasa izy ka nitoetra ela tany an-tany hafa.

10 Nony tonga ny taom-pahavokarana dia naniraka mpanompo anankiray tany amin’ny mpiasa izy, mba haka amin’ny vokatry ny tanimboalobony; nefa nokapohin’izy ireo sy nampodiny maina.

11 Dia naniraka mpanompo anankiray hafa indray izy, fa nokapohin’ireo ihany koa sady notevatevainy sy nampodiny maina.

12 Ary naniraka fanintelony izy, fa io koa sady nataony naratra no noroahiny.

13 Ka hoy ny tompon’ny tanimboaloboka: ‹Inona re no hataoko? ndeha hirahiko lahy ny zanako malalako, fa angamba hanaja azy izy ireo raha mahita azy.›

14 Kanjo nony nahita iny ny mpiasa dia nanao anakampo hoe: ‹Inty ny mpandova ka ndeha hovonointsika, dia ho antsika ny lova.›

15 Dia noroahiny ho any ivelan’ny tanimboaloboka izy ka novonoiny. Inona àry no hataon’ny tompon-tanimboaloboka amin’izy ireo?

16 Ho avy izy ka handringana ireo mpiasa ireo, ary ny tanimboaloboka dia hafindrany amin’olon-kafa.» Nony nandre izany ry zareo teo, dia nanao hoe: «Sanatria izany!»

17 Fa nibanjina azy ireo i Jesoa ka nanao hoe: Inona àry ity voasoratra ity:Ny vato nolavin’ny mpanao trano no efa tonga vato fehizoro?

18 Izay rehetra lavo amin’izany vato izany dia ho torotoro, ary izay hianjerany dia ho mongomongo.

19 Dia notadiavin’ny lehiben’ny mpisorona sy ny mpanora-dalàna hosamborina teo no ho eo ihany Izy, satria fantany fa izy ireo ihany no nanaovan’i Jesoa izany fanoharana izany; saingy ny tahony ny vahoaka no nampiato azy indray.

Ny hetra ho an’i Sezara

20 Koa dia nataony andrimaso Izy sy nanirahany mpitsikilo, izay nody ho marina, mba haningotra Azy amin’ny teniny, hanolorany Azy eo am-pelatanan’ny governora.

21 Ary toy izao no fanontanian’ireo olona ireo Azy: «Ry Mpampianatra ô, fantatray fa miteny sy mampianatra araka ny hitsiny ianao ka tsy mizaha tavan’olona, fa mampianatra ny lalan’Andriamanitra araka ny marina:

22 mety va raha mandoa hetra ho an’i Sezara izahay sa tsia?»

23 Fa fantatr’i Jesoa ny hafetsen-dratsin’izy ireo, ka hoy Izy taminy: «Nahoana no maka fanahy Ahy ianareo?

24 Asehoy Ahy ny vola denie. Sarin’iza sy anaran’iza ity?» «An’i Sezara» hoy iretsy.

25 Dia hoy Izy taminy: «Aloavy ho an’i Sezara àry izay an’i Sezara, ary ho an’Andriamanitra izay an’Andriamanitra.»

26 Gaga foana ry zareo tamin’ny valin-teniny ka kepoka nangina terỳ, fa tsy nahita teny iray akory haniniany Azy teo imason’ny vahoaka teo.

Ny fitsanganan’ny maty

27 Dia nanatona koa ny sasany tamin’ny Sadoseanina izay mandà ny fitsanganan’ny maty, ka nanontany Azy hoe:

28 «Ry Mpampianatra ô, i Môizy nanome lalàna ho antsika hoe: Raha misy lehilahy ka maty momba, dia aoka ny rahalahiny hampakatra ny vadiny mba hiteraka hamelo-maso ny rahalahiny.

29 Koa nisy olona fito mirahalahy, ary nanambady ny zokiny, fa maty momba.

30 Dia nanambady an-dravehivavy ny faharoa, fa maty momba koa.

31 Nanaraka izany dia nanambady azy indray ny fahatelo, ary nanao toy izany avokoa izy fito mirahalahy, fa maty momba daholo.

32 Farany, dia maty koa ravehivavy.

33 Koa ho vadin’iza ravehivavy raha mby amin’ny fitsanganan’ny maty? fa efa samy nanambady azy avokoa izy fito lahy?»

34 Dia hoy i Jesoa taminy: «Ny zanak’izao fiainana izao no mampaka-bady sy avoaka hampakarina;

35 fa izay efa hita ho mendrika hahazo ny fiainana ho avy sy ny fitsanganana avy any amin’ny maty kosa, dia tsy mba mampaka-bady, na avoaka hampakarina,

36 ary tsy mety maty intsony izy, fa tahaka ny Anjely sady zanak’Andriamanitra, satria zanaky ny fitsanganan-ko velona avy any amin’ny maty.

37 Ary raha ny hoe hitsangana ny maty dia zavatra efa nambaran’i Môizy teo amin’ilay nilazany ny Voaroy izany, fa tamin’io izy dia niantso ny Tompo hoe: ‹Andriamanitr’i Abrahama sy Andriamanitr’i Isaaka ary Andriamanitr’i Jakôba.›

38 Koa velona eo anatrehany izy rehetra ireo, satria tsy mba Andriamanitra ny maty Izy, fa an’ny velona.»

39 Dia namaly ny sasany tamin’ny mpanora-dalàna ka nanao taminy hoe: «Ry Mpampianatra ô, marina ny filazanao.»

40 Ary tsy nisy sahy nanontany Azy intsony izy ireo.

I Kristy Zanak’i Davida ary Tompony

41 Dia hoy i Jesoa taminy: Ahoana no iantsoana an’i Kristy hoe zanak’i Davida,

42 nefa i Davida ihany no milaza ao amin’ny bokin’ny Salamo hoe:Ny Tompo nilaza tamin’ny Tompoko hoe: Mipetraha eo an-tanako ankavanana,

43 ambara-panaoko ny fahavalonao, ho fitoeran-tongotrao?

44 Antsoin’i Davida hoe Tompo Izy, ka ahoana no maha-zanany Azy?

Ireo mpanora-dalàna tsarain’i Jesoa

45 Mbola mihaino Azy eo ny vahoaka rehetra dia hoy Izy tamin’ny mpianany:

46 «Tandremo ny mpanora-dalàna, izay finaritra mitsangantsangana amin’ny akanjo rebareba, te hoarahabaina eny amin’ny kianja, tia ny fipetrahana voalohany amin’ny sinagoga mbamin’ny toerana voalohany amin’ny fanasana,

47 fa mifetsy ny fananan’ny mpitondratena amin’ny fivavahana lavareny ataony mba ho fieboana fotsiny, ka hohelohina mafimafy kokoa izy.»