Category: Ohabolana

Lalana samihafa

1 Rano mandeha eo an-tanan’i Iaveh ny fon’ny mpanjaka,

ka atongilany amin’izay rehetra tiany.

2 Mahitsy eo imason’ny olona ny lalany rehetra,

nefa i Iaveh ihany no mandanja ny fo.

3 Ny manaraka ny rariny sy ny hitsiny,

no tsara eo imason’i Iaveh mihoatra noho ny sorona.

4 Ny fijery miandranandrana sy fo miavonavona:

fanilon’ny ratsy fanahy, dia fahotana avokoa izany.

5 Ny fikasan’ny olo-mazoto ahazoan-karena be;

fa izay mikorapaka foana amin’ny ataony dia mosary ihany no azony.

6 Ny rakitra azon’ny lela mandainga,

dia rehareha mihelina ho an’olona mila faty.

7 Ny hatezeran’ny ratsy fanahy mampivaona azy;

satria efa tsy tiany ny hanaraka ny rariny.

8 Miolikolika ny lalan’ny olo-meloka,

fa ny tsy manan-tsiny kosa dia mahitsy amin’ny asany.

9 Aleo mitoetra eny an-joron-tafon-trano,

toy izay miara-monina amin’ny vehivavy tia ady.

10 Maniry ny ratsy ny fanahin’ny ratsy fanahy,

ka ny sakaizany avy no tsy mahita fitia aminy.

11 Raha faizina ny ratsy fanahy, mihahendry ny kely saina,

ary raha toroana ny hendry dia vao mainka mihahendry.

12 Dinihin’ny Marinany tranon’ny ratsy fanahy;

Andriamanitra mamarina ny ratsy fanahy amin’ny loza.

13 Izay manentsin-tadìny amin’ny fitarainan’ny mahantra,

dia mba hitaraina koa fa tsy hovaliana akory.

14 Ny fanomezana mangingina mampitony hatezerana;

ny fanatitra alaina anaty valombalonan-damba

mampitsahatra fahavinirana efa tafahoatra.

15 Hafaliana ho an’ny marina, ny manaraka ny rariny,

fa vadi-po kosa, no an’izay manao ratsy.

16 Ny olona miala amin’ny lalan’ny fahamalinana,

dia handry eny amin’ny fivorian’ny maty.

17 Ho tratry ny fahantrana izay tia fifaliana,

tsy mba mitombo harena izay tia divay aman-diloilo manitra.

18 Ny ratsy fanahy hisolo voina ny marina;

ary ny mpivadika hisolo voina ny olo-mahitsy fo.

19 Aleo mitoetra any an’efitra,

toy izay amin’ny vehivavy tia ady sy foizina.

20 Ny tranon’ny hendry misy rakitra sarobidysy diloilo;

fa ny adala kosa mikepoka ireny.

21 Izay fatra-panaraka ny fahamarinana amam-pamindram-po,

hahazo ny fiainana amam-pahamarinana ary ny voninahitra.

22 Mahanika ny vohitry ny mahery ny hendry;

sady mandrodana ny manda nataony fianteherana.

23 Izay miambina ny vavany aman-delany,

mpiaro ny fanahiny tsy ho azon’ahiahy.

24 Ny atao hoe mpamazivazy dia izay olona mianjonanjona, feno avona,

izay fatra-pirehaka amin’ny ataony.

25 Ny faniriana foan’ny kamo mahafaty azy,

satria mandà tsy hiasa ny tanany.

26 Maniry mafy izy tontolo andro,

fa manome tsy an-kijanona kosa, ny marina.

27 Ny soron’ny ratsy fanahy, dia fahavetavetana,

indrindra fa raha sain-dratsy no anaterany azy.

28 Ny vavolombelona mandainga, ho faty;

fa ny olona mihaino kosa manan-kalahatra mandrakariva.

29 Ny ratsy fanahy maneho hasahisahiana amin’ny endriny,

fa ny mahitsy fo kosa manitsy ny lalany.

30 Tsy misy fahendrena na fahamalinana,

na fisainana eo anatrehan’i Iaveh.

31 Ny olona manomana ny soavalyho amin’ny andro hiadiana,

fa i Iaveh ihany, no iankinan’ny fandresena.

Ny laza tsara

1 Aleo laza tsara, toy izay harem-be,

ary ny fanajana dia ambony vidy noho ny volafotsy amam-bolamena.

2 Mihaona ny mpanana sy ny mahantra,

samy asan’i Iaveh izy roa tonta.

3 Ny mahira-tsaina, mahatsinjo ny ratsy, dia miery;

fa ny kely saina kosa, mandroso ihany ka voa.

4 Ny vokatry ny fanetren-tena, dia ny fahatahorana an’i Iaveh;

harena amam-boninahitra ary fiainana izany.

5 Tsilo amam-pandrika no eny amin’ny lalan’ny ratsy fanahy,

fa izay miaro ny fanahiny kosa manalavitra izany.

6 Ampianaro ny zaza ny lalana tokony halehany,

dia tsy hiala amin’izany izy, na rehefa antitra aza.

7 Ny manan-karena manapaka ny mahantra;

ary ny misambotra, mpanompon’ny mpampisambotra.

8 Izay mamafy heloka, hijinja fahoriana,

ary ho foana ny tsora-kazon’ny fahatezerany.

9 Hambinina ny olona antra fijery,

fa anomezany ny mahantra ny mofony.

10 Roahy ny mpamazivazy, dia ho tapaka ny fifandirana,

hitsahatra ny ady amam-panalam-baraka.

11 Izay tia ny fahadiovam-po

sy mahafinaritra ny tenin’ny molony, dia ho sakaizan’ny mpanjaka.

12 Miaro ny fahaizana ny mason’i Iaveh,

fa mamaky betroka ny tenin’ny olon-dratsy kosa izy.

13 Hoy ny kamo: «Misy liona any ivelany!

Ho vonoin-ko faty eny an-kianja eny aho!»

14 Lavaka lalina ny vavan’ny vehivavy an’olon-kafa;

izay mahatezitra an’i Iaveh ho latsaka ao.

15 Miraikitra amin’ny fon’ny zaza ny hadalana;

ny tsora-kazon’ny famaizana no hanesotra izany aminy.

16 Ny mampahory ny mahantra no mampitombo harena azy;

ny manome ny manan-karena no mampihena ny ananany.

Araho ny tsara, ialao ny ratsy

17 Mampandria sofina ka henoy ny tenin’ireo hendry,

manombena saina amin’ny fampianarako.

18 Fa zava-mahafinaritra izany raha tany tahirizinao ao anatinao;

aoka hipetraka eo amin’ny molotrao avokoa izy!

19 Mba hianteheran’ny fitokianao amin’i Iaveh,

dia ianao no tiako hotoroana izao.

20 Moa tsy efa imbetsaka va izaho no nanao an-tsoratra,

torohevitra amam-pampianarana ho anao?

21 Mba hampianarana anao ny mahamarina ny zavatra fantatra tsara,

hahazoanao mamaly teny marina an’izay maniraka anao.

22 Aza endahanao ny mahantra noho izy mahantra,

ary aza mampahory ny ory eo am-bavahady.

23 Fa i Iaveh hiaro azy ireny amin’ny adiny;

sy hanala aina an’izay nanendaka an’ireny.

24 Aza mikambakambana amin’izay olona foizina,

na miarakaraka amin’izay olona masiaka:

25 fandrao mianatra ny lalany ianao,

ka manomana fandrika ho an’ny fanahinao.

26 Aza mba mety ho isan’izay mora manao fanekena,

dia ireo izay miantoka trosan’olona.

27 Raha tsy manan-kaloa ianao,

nahoana no dia mitono tena, halain’olom-parafara eo ambaninao?

28 Aza mamindra ny faritany fahataloha,

izay efa naorin’ireo razanao.

29 Mahita olona mailaka amin’ny raharahany va ianao?

Ho eo anilan’ny mpanjaka no honenany,

fa tsy mba hifanila fonenana amin’ny olona ambany izy.

Aza tia harena, mahonòna, madiova

1 Raha tafaray latabatraamin’ny lehibeianao,

dia hevero tsara izay eo anatrehanao.

2 Andraso antsy ny tendanao,

raha dia liana loatra ianao.

3 Aza mitsiriritra ny hanim-piny,

fa hanina manodòka izany.

4 Aza miferinaina ho tonga mpanan-karena,

fadio ny mandà ny ron-doha amin’izany.

5 Te hanara-maso izay zava-mandalo va ianao?

fa maniry elatra ny harena,

ka misidina ho eny an-danitra, toy ny voromahery.

6 Aza mihinana ny mofon’ny mpialona,

ary aza mitsiriritra izay hanim-piny;

7 fa izy akory tsy tsara noho ny hevitra ao am-pony;

Mihinàna, misotroa, hoy izy aminao,

kanjo ny fony tsy momba anao akory.

8 Haloanao izay sombiny voatelinao;

ary ho very maina ny teny soa nataonao.

9 Aza mba miteny hohenoin’ny adala,

fa hohamavoiny foana, ny fahendren’ny lahateninao.

10 Aza mamindra ny faritany fahataloha;

ary aza mitsofoka amin’ny sahan’ny kamboty.

11 Fa mahery ny mpamaly ho azy,

dia hiaro azy amin’ny adiny aminao.

12 Mandraiketa ny fonao amin’ny fanoroana,

ary ny sofinao amin’ny tenin’ny fahaizana.

13 Aza mitsitsy famaizana aman-janaka,

fa tsy dia hahafaty azy akory raha kapohinao amin’ny tsora-kazo.

14 Ny mikapoka azy amin’ny tsora-kazo,

no anafahanao ny fanahiny amin’ny Seoly.

15 Anaka, raha hendry ny fonao,

izaho koa, dia hifaly ny foko.

16 Dia hientan-kafaliana ny kiboko,

raha miteny izay marina ny molotrao.

17 Aoka tsy hialona ny mpanota ny fonao,

fa hitoetra mandrakariva amin’ny fahatahorana an’i Iaveh.

18 Satria misy tokoa ny ho avy,

ka tsy ho foana ny fanantenanao.

19 Mihainoa, anaka, ka hendre;

ampizory amin’ny lala-mahitsy ny fonao.

20 Aza mba anisan’ny mpiboboka divay,

na eo amin’izay fatra-piletra hena,

21 fa hahantra ny fatra-pisotro amam-pihinan-kanina,

ary mampisingo-borodamba ny faharendremana.

22 Maneke ny rainao, izy izay niteraka anao;

ary aza manamavo an-dreninao, saingy efa antitra izy.

23 Mahazoa ny marina, ka aza amidinao,

mbamin’ny fahendrena, ny fampianarana, ary ny fahalalana.

24 Ravoravo ny rain’ny marina;

izay miteraka ny hendry dia ho faly amin’izany.

25 Aoka hifaly ny ray aman-dreninao;

aoka hiravoravo ny reninao niteraka anao.

26 Anaka, omeo ahy ny fonao,

ary aoka hitandrina ny lalako, ny masonao;

27 fa lavaka lalina, ny akangavavy,

ary lavaka famorian-drano ety, ny an’olon-kafa.

28 Mamela-pandrika toy ny hihaza remby izy,

ary mampitombo isa ny mpivadika ao amin’ny olombelona.

29 Ho an’iza ny indrisy? Ho an’iza ny endrey?

Ho an’iza ny fanditra? Ho an’iza ny fimonjomonjoana?

Ho an’iza ny ratra tsy ahoan-tsy ahoana?

Ho an’iza ny maso mivaivay?

30 Ho amin’ireo mijanonjanona ela amin’ny divay;

ho an’ireo mandeha manandrana divay miharo zava-manitra.

31 Aza mijery ny divay: He izany hamenany,

izany famirapirany eo amin’ny kopy,

izany fikararànany mora loatra.

32 Fa hanaikitra toy ny bibilava izy amin’ny farany,

ary hanindrona toy ny menarana.

33 Dia ho any amin’ny vehivavy an’olon-kafa ny masonao,

ary hanao resaka ratsy ny fonao.

34 Hanahaka ny olona mandry eo afovoan’ny ranomasina, ianao;

na ny olona matory eo an-tampon’ny andrin-tsambo.

35 Nokapohiny aho, hoy ianao, fa tsy mahatsiaro maharary;

nandalasiny aho… fa tsy mahare na inona na inona!…

Rahoviana aho no hifoha?… Mbola ilaiko ihany izany!

Halaviro ny olon-dratsy sy ny adala

1 Aza mialona ny ratsy fanahy,

na maniry hiaraka aminy akory.

2 Fa fandozàna no saintsainin’ny fony,

ary fampahoriana no mahavantam-bava azy.

3 Ny fahendrena no itsanganan’ny trano,

ary ny fahalalana no iorenany mafy.

4 Ny fahaizana no amenoana ny ao anatiny,

amin’ny harena soa sy mahafinaritra rehetra.

5 Feno hatanjahana, rehefa olon-kendry,

ary maneho hery lehibe, izay manam-pahaizana.

6 Fa ny fahamalinana no itarihanao ny ady,

ary ny mpanolo-tsaina maro no isian’ny famonjena.

7 Avo tsy takatry ny adala ny fahendrena,

tsy mba mahaloa-bava izy, eo am-bavahady;

8 Izay misaintsaina hanao ratsy,

no atao hoe mpamoron-tsain-dratsy.

9 Ota no fikasan’ny adala,

ary fahavetavetana eo imason’ny olona mpamazivazy.

10 Raha osa amin’ny andron’ny fahoriana ianao,

dia fahosana ihany ny herinao.

11 Afaho izay entina hovonoina ho faty;

ary vonjeo izay mandroso mangozohozo entin-kovonoina.

12 Raha hoy ianao: «Tsy mahalala izany anie izahay!»

moa tsy mahita izany va Ilay mandanja ny fo?

tsy mahalala izany va, Ilay mitandrina ny fanahinao?

ary tsy hovaliany araka ny nataony avy va ny olona rehetra?

13 Anaka, mihinàna tantely fa tsara izany,

ho mamy eo am-bavanao ny takela-tantely.

14 Ary fantaro fa torak’izany ny fahendrena ho an’ny fanahinao;

ka raha mahazo azy ianao, dia hanan-kiafarana,

ary tsy ho foana ny fanantenanao.

15 Aza manotrika eo amin’ny fonenan’ny marina, ry ilay ratsy;

ary aza mandrava ny toerana fitsaharana,

16 fa ny marina, lavo impito, nefa tafarina ihany;

ny ratsy fanahy kosa avarina amin’ny loza.

17 Aza mifaly raha lavo ny fahavalonao;

ary aza miravoravo fo amin’ny faharavàny,

18 fandrao hitan’i Iaveh izany, ka ratsy eo imasony,

dia haviliny tsy ho any aminy, ny hatezerany.

19 Aza sosotra noho ny amin’ny ratsy fanahy,

na mialona an-dry zareo olon-dratsy,

20 fa tsy manan-kiafarana ny manao ratsy,

ary ho faty ny jiron’ny ratsy fanahy.

21 Anaka, matahora an’i Iaveh sy ny mpanjaka,

ary aza mba miharoharo amin’ny olona mpanakorontana.

22 Fa hidona tampoka ny lozan’ireny,

ary iza moa no mahalala izay hanjò azy isany?

4. TOHIN’NY TAHIRIN-TENIN’OLON-KENDRY

23 Izao manaraka izao no avy amin’ny hendry:

Tsy mety ny mizaha tavan’olona amin’ny fitsarana.

24 Izay milaza amin’ny ratsy hoe: «Marina ianao,»

dia hozonim-bahoaka, ho halam-pirenena.

25 Fa izay mamay azy kosa ankalazaina,

mirotsaka aminy ny tso-drano amam-pahasambarana.

26 Manorokaao amin’ny molotra,

izay mahavoaka valy marina.

27 alamino ny asanao eo ivelany;

ny sahanao aloha no iraiketo asaina,

vao izay no manao ny tranonao ianao.

28 Aza mba mety ho vavolombelona foana, hamely ny namana,

fa ianao angaha te hamitaka amin’ny molotrao?

29 Aza manao hoe: «Hataoko aminy izay nataony tamiko;

hovaliako araka ny nafitsony iny olona iny.»

30 Nandalo ny sahan’ny kamo aho,

sy nanamorona ny tanimboaloboky ny adala.

31 Ka indro tsilo no maniry hatraiza hatraiza,

roy no mandrakotra eny rehetra eny,

mirodana koa ny tamboho vato aminy.

32 Nijery aho, ka nandinika tao am-poko,

nieritreritra aho, ka izao no fianarana nalaiko tao:

33 Torimaso kely ihany, firendremana kely ihany,

ohon-tanana kely hatory,

34 dia indro, tonga toy ny jiolahy ny fahantranao,

ary toy ny lehilahy mitam-piadiana ny tsy fanananao.

Lanjalanjao ny teny sy ny atao

1 Izao koa no ohabolan’i Salômôna, nangonin’ny olon’i Ezekiasa, mpanjakan’i Jodà.

2 Voninahitr’Andriamanitra ny manafin-javatra,

fa voninahitry ny mpanjaka kosa ny mandini-javatra.

3 Ny lanitra amin’ny haavony, ny tany amin’ny halaliny,

ary ny fon’ny mpanjaka, samy zavatra tsy azo takarina.

4 Esory ny taim-bolafotsy,

dia hisy hanaovana fanaka hataon’ny mpanao anidina.

5 Esory ny ratsy fanahy eo anoloan’ny mpanjaka.

dia hiorina mafy ny seza fiandrianany amin’ny fahamarinana.

6 Aza manao endrika miavonavona eo anatrehan’ny mpanjaka,

ary aza mipetraka eo amin’ny fitoeran’ny lehibe;

7 Fa aleo ny olona no hilaza aminao hoe: Miakara atỳ;

toy izay ianao no haetry eo imason’ny andriana,

izay efa hitanao maso.

8 Aza dia faingam-panohitra foana,

fandrao tsy mahita izay hatao ianao amin’ny farany.

9 Raha naniratsira anao ny namanao,

dia tohano ny adinao amin’ny namanao,

10 fa aza manambara ny zavatra miafin’ny olon-kafa,

fandrao mahasafo-kenatra anao, izay mandre izany,

ka tsy ho afaka aminao ny fahafaham-baraka.

11 Toy ny paoma volamenaeo amin’ny ravaka voasikotra amin’ny volafotsy,

ny teny atao amin’ny antony.

12 Toy ny kavim-bolamena amam-piravaka volamena tsara,

ny olon-kendry mananatra olona manan-tsofina mihaino tsara.

13 Toy ny fangatsiatsiakan’ny oram-panalaamin’ny taom-pijinjana,

ny iraka mahatoky amin’izay naniraka azy:

mamelombelona ny fanahin’ny tompony izy.

14 Fa toy ny rahona aman-drivotra tsy misy orana kosa,

ny olona mirehaka amin’ny fanatitra hosoka.

15 Ny fahari-po mety hampiekena ny mpitsara;

ary ny vava malefaka, mahafolaka ny taolana.

16 Raha tojo tantely ianao, ny sahaza anao ihany hanina,

fandrao voky azy ianao, ka handoa azy indray.

17 Aza mateti-piavy ao an-tranon’ny namanao,

fandrao tofoka anao izy, ka hankahala anao.

18 Kanonta aman-tsabatra ary zana-tsipìka maranitra;

toy izany ny olona mitsangan-kiampanga tsy marina ny namany.

19 Nify tapatapaka sy tongotra mibolisatra,

dia toy izany no fitokiana ny mpamadika, amin’ny andron’ny fahoriana.

20 Toy ny miala lamba amin’ny andro mangatsiaka,

na manisy vinaingitra amin’ny sirahazo,

ny manao kalokalo amin’ny malahelo am-po.

21 Raha noana ny fahavalonao, omeo mofo hohaniny,

raha mangetaheta izy, omeo rano hosotroiny;

22 fa amin’izany ianao hanangona vainafo ho eo an-dohany;

ary i Iaveh hamaly soa anao.

23 Ny rivotra avy avaratra miteraka orana;

ny lela mpifosa kosa, mampahasosotra endrika.

24 Aleo mitoetra eny an-joron-tafon-trano,

toy izay miara-mipetraka amin’ny vehivavy tia ady.

25 Rano mangatsiaka ho an’ny olona mangetaheta,

toy izany ny filazan-java-tsoa, avy any an-tany lavitra.

26 Fantsakana voatsikebona, loharano voaloto,

toy izany ny marina mangozohozo eo anoloan’ny ratsy fanahy.

27 Tsy mety ny mihinan-tantely betsaka,

toy izany koa ny mitady hahatakatra ny fiambonian’Andriamanitra,

fa ho resin’ny voninahiny.

28 Tanàna efa afaka ny fahavalo ka tsy misy manda,

toy izany ny olona tsy mahay mifehy tena.

Ataovy mifanendrika amin’ny fahendrena ny atao

1 Toy ny oram-panala fahavaratra sy ranonorana amin’ny taom-pijinjana,

no tsy iendrehan’ny voninahitra ho an’ny adala.

2 Toy ny fitsoatsoaky ny fody, sy fanidintsidin’ny sidintsidina,

no tsy fihàtran’ny ozonozom-poana.

3 Ny karavasy ho an’ny soavaly, ny lamboridy ho an’ny ampondra,

ary ny tsora-kazo ho an’ny lamosin’ny adala.

4 Aza mamaly ny adala araka ny hadalany,

fandrao dia manahaka azy koa ianao.

5 Valio araka ny hadalany ny adala,

fandrao dia manao azy ho hendry izy.

6 Manapaka ny tongony sy misotro tsy fahamarinana,

izay mampitondra teny ny adala.

7 Esory amin’ny mandringa ny tongony,

sy ny oha-teny eo am-bavan’ny adala.

8 Toy ny mamehy vato amin’ny antsamotady,

ny manome voninahitra ny adala.

9 Toy ny tsilomilentika amin’ny tanan’ny mamo,

ny oha-teny eo am-bavan’ny adala.

10 Toy ny mpandefa tsipìka mandratra ny olona rehetra,

ny manakarama ny adala sy ny mpandalo.

11 Toy ny amboa miverina amin’ny loany,

toy izany ny adala miverina amin’ny hadalany.

12 Raha mahita olona manao azy ho hendry ianao,

ny adala no misy hantenaina kokoa noho izy.

13 Hoy ny kamo: «Misy liona any an-dalam-be;

misy liona atsy amin’ny arabe.»

14 Ny varavarana mihodina eo amin’ny saviliny,

toy izany koa ny kamo mihodina eo amin’ny fandriany.

15 Mangaron-dovia amin’ny tanany ny kamo;

ary manahirana azy ny hampakatra izany eo am-bavany.

16 Ny kamo manao ny tenany ho hendry,

mihoatra ny mpihevitra fitomahira-tsaina.

17 Toy ny olona misambotra amboa amin’ny sofiny,

ny mpandalo misafoaka amin’ny adin’ny hafa.

18 Toy ny mpisafoaka mandefa longy mirehitra afo,

sy zana-tsipìka amam-pahafatesana,

19 ny olona izay efa namitaka ny namany,

ka manao hoe: «Vosibositra fotsiny no nataoko.»

20 Raha tsy eo ny kitay, maty ny afo:

halaviro ny mpitati-bolana, mitsahatra ny fanditra.

21 Ny arina mampisy vainafo, ny kitay mampisy afo,

ny olona tia ady kosa mamelona fifandirana.

22 Toy ny hanim-py ny tenin’ny mpitati-bolana,

ka mikorotsaka hatrany anatin’ny tsinay.

23 Vilany tany mipetaka taim-bolafotsy,

ny molotra maimay miaraka amin’ny fo ratsy.

24 Mihatsaravelatsihy amin’ny vavany ny mpankahala,

kanjo manafim-pitaka ao anatiny;

25 koa aza matoky azy raha manao feo malefaka izy,

fa fahavetavetana fito no ao am-pony.

26 Azony afenina ihany amin’ny fihatsarambelatsihiny ny fankahalany,

nefa mbola hiharihary eo amin’ny fivoriana ny faharatsiany.

27 Izay mihady lavaka no ho latsaka ao;

ary izay manakodia vato no hikodiavany.

28 Mankahala izay olona simbany ny lela mandainga,

ary mampidi-doza ny vava mandoka.

Misy ny tsy zaka

1 Aza mirehareha ny amin’ny ho ampitso;

fa tsy fantatrao izay havoakan’ny andro manaraka.

2 Aoka ny hafa no hidera anao, fa tsy ny vavanao;

ary ny vahiny fa tsy ny molotrao.

3 Madonda ihany ny vato, mavesatra koa ny fasika,

fa mavesatra noho ireo indray ny hasosoran’ny adala.

4 Masiaka ny havinirana, miafonafona ny hatezerana,

fa zovy no hahatoetra raha asian’ny fialonana?

5 Aleo anatraimaso,

toy izay fitia miafina.

6 Ny ratra avy amin-tsakaiza dia vokatry ny fitiavany tsy mivadika,

fa ny oroky ny fahavalo kosa, fitaka foana.

7 Amin’ny voky, na ny toho-tantely aza hoseny tongotra fotsiny,

fa amin’ny noana, na ny zava-mangidy aza, maminy avokoa.

8 Toy ny voronamirenireny lavitra ny akaniny:

toy izany koa ny olona mirenireny lavitra ny fonenany.

9 Mampiravoravo ny fo ny diloilo aman-java-manitra;

torak’izany ny hamamian-tsakaiza manoro hevitra avy amin’ny fony.

10 Aza mahafoy ny sakaizanao aman-tsakaizan-drainao;

ary aza miditra ny tranon’ny rahalahinaoamin’ny andron’ny fahorianao:

fa aleo namana akaiky toy izay havan-davitra.

11 Anaka, hendre, ary ampifalio ny foko,

mba hahaizako mamaly an’izay miteny ratsy ahy.

12 Ny mahira-tsaina mahatsinjo ny ratsy ka miery;

ny kely saina mandroso ihany ka voan’izany.

13 Endaho ny lambany fa efa niantoka ny hafa izy,

mangalà antoka aminy noho ny amin’ny vahiny.

14 Ny misaotrany namany, maraina koa, amin’ny feo avo,

dia isaina ho toy ny manozona ihany.

15 Ny fijononòkan’ny rano mitete ao an-trano amin’ny andro manorana,

sy ny vehivavy tia ady, sahala tsy misy hafa.

16 Ka izay mitana azy, mitana rivotra,

ary ny tanany mahafihina diloilo.

17 Vy ihany no maharanitra ny vy;

olona ihany koa no maharanitra olon-kafa.

18 Izay mitahiry ny aviaviny hihinana ny voany;

ary izay miaro ny tompony homem-boninahitra.

19 Toy ny ifanahafan’ny tarehy sy ny tandindony ao anaty rano,

no ifanahafan’ny fon’ny olona sy ny an’ny olon-kafa koa.

20 Tsy mety voky ny fasana aman-tSeoly,

tsy mety afa-po toy izany koa ny mason’ny olombelona.

21 Ny memy atao hanadio ny volafotsy; ny fandrendrehana hanadio ny volamena.

ary ny fiderana raisin’ny olona, aoka hozahany toetra toy izany koa.

22 Na hototoinao ao an-daona aza ny adala,

tahaka ny fitoto vary amin’ny fanoto,

tsy hisaraka aminy ny hadalany tsy akory.

23 Fantaro tsara ny toetry ny ondrinao,

ny sainao ento mandinika ny biby fiompinao;

24 fa ny harena tsy maharitra mandrakizay,

na ny satroboninahitra amin’ny taona mifandimby.

25 Nefa rehefa nitranga ny ahitra ka niseho ny zava-maitso,

ary voaangona ny vilona avy eny an-tendrombohitra,

26 dia indreo ny zanak’ondry hahazoanao fitafiana;

ny osilahy hividiananao saha anankiray:

27 be ny rononon’osy

ho sakafonao sy ny ankohonanao,

ary ho famelomana ny ankizy vavinao koa.

Ny olo-marina sy ny olon-dratsy

1 Mandositra tsy enjehina ny ratsy;

fa matoky toy ny liona kosa ny marina.

2 Amin’ny tany tsy mandry, mihamaro ny mpanapaka,

fa amin’ny olona manan-tsaina sy hendry kosa, maharitra ny filaminana.

3 Ny olo-mahantra mampahory ny malahelo,

dia orana mivatravatra mahatonga mosary.

4 Ny mahafoy ny lalàna, mandoka ny ratsy fanahy;

fa ny manara-dalàna kosa mitezitra aminy.

5 Ny olon-dratsy tsy mahalala ny mety,

fa ny mitady an’i Iaveh kosa, mahalala ny zavatra rehetra.

6 Aleo olo-mahantra ombam-pahamarinana,

toy izay olona miolikoli-dalana sy manan-karena.

7 Izay mitandrin-dalàna dia zanaka hendry,

fa izay mamelona ny mpijangajanga manome henatra an-dreniny.

8 Izay manangon-karena amin’ny zana-bola

amam-pilàn-tombony be loatra,

dia manangona izany ho an’izay miantra ny mahantra.

9 Raha misy mamily ny sofiny tsy hihaino ny lalàna,

na ny fivavahany aza dia fahavetavetana.

10 Izay mamily ny mahitsy fo, ho amin’ny lalan-dratsy,

dia mandatsaka ny tenany amin’ny lavaka nohadiny,

fa ny tsy misy tsiny dia handova ny fahasambarana.

11 Ny manan-karena manao ny tenany ho hendry;

fa ny mahantra manan-tsaina kosa, mahalala azy ihany.

12 Raha mandresy ny marina dia misy fety lehibe

fa raha misandratra kosa ny ratsy fanahy, samy miery ny olona.

13 Izay manafina ny fahotany tsy mba hambinina;

fa izay mitsotra sy mahafoy izany dia hahazo famindram-po.

14 Sambatra ny olona izay manam-pahatahorana mandrakariva;

fa izay manadonto ny fony kosa ho latsaka anatin’ny fahoriana.

15 liona mierona sy orsa noana;

toy izany ny ratsy fanahy manapaka amin’ny olo-mahantra.

16 Ny mpanapaka tsy manan-tsaina mampitombo ny famoretana,

fa izay mankahala ny fierenana kosa, ho lava andro iainana.

17 Izay mivesatra ny ran’olona nalatsany,

dia mandositra hatrany an-davaka: Aza misakana azy.

18 Hahita famonjena ny mandeha amin’ny fahamarinana tanteraka,

fa ho lavo tsy afa-miarina intsony, ny manaraka lala-miolikolika.

19 Ny miasa ny taniny, ho voky hanina;

fa ny manenjika zava-poana, ho voky fahantrana.

20 Ny olona mahatoky, feno fanambinana,

fa ny maimay hanan-karena, tsy hialàm-pahadisoana.

21 Tsy mety ny mizaha tavan’olona,

fa sombi-mofo monja, dia mahatonga ho olo-meloka.

22 Maimay ny hanan-karena, ny mpialona,

tsy fantany fa ho tonga aminy ny tsy fahampiana.

23 Ny mananatra olona dia hahita fitia kokoa rahatrizay,

noho ny mahatonga ny lelany ho mpidoka.

24 Izay mandroba ray aman-dreny,

ka manao hoe: «Tsy fahotana izany»,

dia naman’ny jiolahy.

25 Ny olona matimatin-karena, mamelona ady,

fa izay mitoky amin’i Iaveh, dia ho voky.

26 Adala izay mitoky amin’ny fon’ny tenany,

fa izay mandeha amim-pahendrena dia ho voavonjy.

27 Tsy ho voan’ny tsy fahampiana izay manome ny mahantra,

fa hianjeran’ozona kosa, izay mihirim-belona.

28 Raha misandratra ny ratsy fanahy, miery avokoa ny olona,

fa raha ringana kosa ireny, mihamaro ny marina.

Diniho ny atao

1 Ny olona tandrifin’ny hanarina, ka mihamafy hatoka,

dia ho torotoro tampoka tsy hisy fanafody hahasitrana.

2 Raha mihamaro ny marina, faly ny vahoaka,

fa raha ny ratsy fanahy no mitondra fanjakana, misento ny vahoaka.

3 Izay tia ny fahendrena, mahafaly ny rainy,

fa izay fatra-piaraka amim-behivavy janga, mandany ny hareny.

4 Ny mpanjaka mampiorina mafy ny taniny amin’ny fahamarinana,

fa izay tia kolikoly kosa, mandrava azy.

5 Ny olona mandoka ny namany,

mamela-pandrika ny tongony.

6 Fandrika no amin’ny heloky ny olon-dratsy fanahy;

fa hoby aman-kafaliana kosa no an’ny marina.

7 Ny marina, mahalala ny adin’ny mahantra:

fa ny ratsy fanahy kosa tsy mahatakatra ny fahaizana.

8 Ny mpamazivazy mampirehitra afo handoro ny tanàna,

ny hendry kosa, mampitony ny hatezerana.

9 Raha ny hendry no miadyamin’adala,

na tezitra izy na mihomehy, tsy hisy fihavanana.

10 Halan’ny olona mpandatsa-dra ny tsy misy tsiny;

fa miahy ny ain’izy io kosa, ny mahitsy fo.

11 Ny adala manampatra ny hatezerany rehetra,

ny hendry kosa, manonona sy mahafehy azy.

12 Raha mihaino teny lainga ny mpanapaka,

dia ratsy fanahy avokoa ny mpanompony.

13 Mihaona ny mahantra sy ny mpampahory,

i Iaveh no manazava ny mason’izy roa tonta.

14 Ny mpanjaka mitsara marina ny mahantra,

dia hahamafy orina ho mandrakizay, ny seza fiandrianany.

15 Ny tsora-kazo amam-pamaizana mampahazo ny fahendrena,

fa ny zaza ampanaranina, manome henatra ny reniny.

16 Raha mitombo ny ratsy fanahy, mitombo koa ny heloka,

fa ny marina kosa hahita ny fidabok’ireny.

17 Faizo ny zanakao dia hanome fitsaharana anao izy,

sy hampahazo fifaliana ho an’ny fanahinao.

18 Rehefa tsy misy fahitana intsony tsy misy mahafehy ny vahoaka.

Sambatra izay mitandrina ny lalàna.

19 Tsy mba teny no ananarana ny mpanompo;

fa na azony aza izany dia tsy mba manaiky izy.

20 Raha mahita olona haingam-bava ianao,

dia ny adala no misy hantenaina noho izy.

21 Mpanompo nohantaina fahazaza;

mihambo ho zanaka no farany.

22 Ny olona mora tezitra mamelona ady;

ny olo-masiaka, be hadisoana.

23 Ny avonavon’ny olona, mamarina amin’ny fietrena;

fa ny manetry tena ao am-po mahazo voninahitra.

24 Mankahala ny fanahiny, izay miara-mizara amin’ny mpangalatra,

fa mandre ny fanozonana izy, nefa tsy milazana inona na inona.

25 Ny tahotra olombelona, misy fandrika anatiny;

fa ny matoky amin’i Iaveh, no tafatoetra tsy misy hatahorany.

26 Maro no mila sitraka amin’ny mpanapaka;

fa i Iaveh ihany no iavian’ny fitsarana marina ny olona isam-batana.

27 Ny olon-dratsy, fahavetavetana ho an’ny marina;

ny mahitsy lalana kosa, fahavetavetana ho an’ny ratsy fanahy.

6. TENIN’I AGORA

1 Tenin’i Agòra, zanak’i Jake; oha-teny. Hoy izany lehilahy izany:

Nanasa-tena aho, mba hahalalako an’Andriamanitra,

mba hahalalako an’Andriamanitra dia lany ny heriko.

2 Fa ketrina noho ny olona rehetra aho,

ary tsy mba sain’olombelona ny ahy.

3 Fa tsy mba nianatra ny fahendrena aho,

ary tsy fantatro ny fahalalana an’ilay Masina.

4 Iza no miakatra any an-danitra, ary iza no midina avy any?

Iza no nanangona ny rivotra teo an-tanany?

Iza no nahafono ny rano tamin’ny lambany?

Iza no mampiorina mafy ny faran’ny tany rehetra?

Iza no anarany, ary iza no anaran-janany?

Mahalala izany va ianao?

5 Voazaha toetra tamin’ny afo avokoa ny tenin’Andriamanitra;

ampinga ho an’izay mialoka aminy izy.

6 Aza manampy na inona na inona amin’ny teniny;

sao anariny ianao, ka ho hita fa mpandainga.

7 Zavatra roa no angatahiko aminao,

ka aza dia lavina, dieny mbola tsy maty aho:

8 Ampanalaviro ahy ny fitaka aman-teny mandainga;

aza misy omena ahy, na ny fahantrana na ny harena.

Fa izay hanina ilaiko no omeo ahy:

9 fandrao voky aho dia mandà Anao,

ka hanao hoe: «Iza moa i Iaveh?»

ary andrao koa mangalatra aho, raha mahantra,

ka hanamavo ny Anaran’Andriamanitra.

10 Aza manendrikendrika mpanompo amin’ny tompony,

fandrao hozoniny ianao, ka hitondra faisana amin’izany.

11 Misy taranaka manozona ny rainy,

sady tsy misaotra ny reniny.

12 Misy taranaka manao ny tenany ho madio,

kanjo tsy voasasa amin’ny fahalotoany.

13 Misy taranaka, miandranandram-pijery aoka izany,

sady miavonavona hodimaso erỳ!

14 Misy taranaka, ka sabatra ny nifiny,

ary antsy ny vazany;

hihinana ny ory tsy ho amin’ny tany,

sy ny tsy manana tsy ho eo amin’ny olombelona.

15 Manan-janaka vavy roa ny dinta, dia ny hoe: «Omeo! Omeo!»

Zavatra telo no tsy mety voky,

efatra no tsy mba manao hoe: «Aoka izay!» na oviana na oviana;

16 dia ny Seoly, ny kibo momba,

ny tany tsy vonton-drano,

ary ny afo koa, izay tsy mba manao hoe: «Aoka izay!» na oviana na oviana.

17 Ny maso maniratsira ny ray,

sy maneso ny fanoavan-dreny,

dia hogorobahin’ny goaika eny an-dohasahan-driaka,

sy hohanin’ny zana-boromahery.

18 Misy zavatra telo mihoatra ny saiko,

efatra aza no tsy takatro;

19 dia ny nalehan’ny voromahery teny amin’ny habakabaka;

ny dia nalehan’ny bibilava teny amin’ny vatolampy;

ny dia nalehan’ny sambo teny amin’ny ranomasina;

ary ny famantarana ny nandehanan’ny lehilahy tamin’ny tovovavy.

20 Toy izao no lalan’ny vehivavy mpaka vadin’olona:

Mihinana izy, dia mamafa ny vavany,

ka manao hoe: «Tsy nanao ratsy aho.»

21 Raha vesaran’ny zavatra telo ny tany no mihorohoro,

ary raha vesaran’ny efatra izy no tsy tantiny;

22 raha tsindrian’ny andevo sendra mahazo fanjakana,

na adala rehefa voky hanina izy io;

23 na tsindrian’ny vehivavy tsy nisy mpaka raha ampakarina;

na ankizy vavy mandova tompo vavy.

24 Eto an-tany dia misy efatra kely dia kely,

nefa hendry dia hendry izy ireo:

25 Ny vitsika izay firenena tsy manan-kery,

dia mamonona ny hanina amin’ny fahavaratra;

26 Ny damàna izay firenena tsy manam-pahefana,

dia manao ny tranony eny amin’ny haram-bato.

27 Ny valala, tsy mana-mpanjaka,

nefa miainga, manao antokony avokoa izy ireo;

28 ny antsiantsy, azonao samborin-tanana,

nefa ao an-dapan’ny mpanjaka izy.

29 Misy biby telo tsara famindra,

ary efatra no tsara fandeha;

30 ny liona, biby mahery fo indrindra,

tsy mihemotra, na amin’inona na amin’inona hiadiany;

31 ny biby kinga valahana, mbamin’ny osilahy,

ary ny mpanjaka, tsy azon’olona tohaina.

32 Raha dia efa adala loatra ianao, ka mila hoentin’avonavona,

raha manan-kevitra izany ianao, dia tampeno tanana ny vavanao;

33 fa ny fivelezana ny ronono miteraka dibera,

ny fanerena ny orona miteraka ra;

ary ny fanohinana ny hatezerana, miteraka fifandirana.