Category: Salamo

Ny andriana tonga lafatra

1 Salamon’i Davida.

Ny hatsaram-po amam-pahamarinana no tiako hohiraina;

Ianao Iaveh no tiako hankalazaina.

2 Hitandrina ny lalan’ny tsy fananan-tsiny aho.

– Rahoviana no ho tonga aty amiko Ianao? –

Handeha amin’ny fahitsian’ny foko aho,

eo afovoan’ny tranoko.

3 Eo anoloan’ny masoko aho,

tsy hanisy asa ratsy na inona na inona;

halako ny fitondran-tena ratsy;

tsy hipetraka amiko izany.

4 Tsy mba ho fo mivaona ny ahy na oviana na oviana;

tsy te-hahalala izay ratsy akory aho.

5 Hofongorako,

ny mpifosa mandrovitra ny namany mangingina.

Ny olona misolanandrana sy bontsinin’ny hambom-po,

tsy ho tohako.

6 Hijery izay olona mahatoky amin’ny tany, ny masoko,

mba hitoerany ato akaikiko;

izay mandeha amin’ny lalana marina, no ho mpanompoko.

7 Tsy mba hanan-toerana ao an-tranoko,

izay manao am-pitaka;

tsy hijanona eo anoloan’ny masoko,

izay milaza lainga,

8 haripako isa-maraina

ny ratsy fanahy rehetra amin’ny tany,

mba hamongorako eo an-tanan’i Iaveh

izay rehetra manao ratsy.

Vavaka ao anatin’ny fahoriana

1 Vavaky ny ory, mivesa-pahoriana, sy mandoatrany fitarainany eo anatrehan’i Iaveh.

2 Iaveh, henoy ny fivavahako,

3 ary aoka ho tonga hatrany aminao ny fitarainako.

Aza manafina ny Tavanao amin’ny andron’ny fahoriako,

atongilano atỳ amiko ny sofinao,

faingàna hamaly ahy, nony mitaraina aho.

4 Fa levona toy ny lasan-ko setroka ny androko,

ary mirehitra, toy ny doran’ny afo, ny taolako.

5 Voajinja toy ny ahitra ny foko, ka malazo;

hadinoko aza ny mihinan-kanina.

6 Tafaraikitra amin’ny taolako ny nofoko,

azon’ny mitaraina sy misento.

7 Tahaka ny pelikanoany an’efitra aho,

ary zary toa vorondolotokana an-tanàna haolo.

8 Tsy mahita tory aho mandritra ny alina,

toa vorona manirery eny an-tafon-trano.

9 Tsiratsirain’ny rafilahiko tontolo andro aho,

ary ny fahavaloko entim-pisafoahany mianiana ny hamono ahy.

10 Mihinan-davenonaho tahaka ny mofo aho,

ary haroako ranomaso ny zavatra sotroiko;

11 noho ny hatezeranao amam-pahaviniranao,

fa naingainao aho, ary natsipinao lavitra.

12 Tahaka ny aloka efa mandroso mihalava ny androko,

ary mihamalazo toy ny ahitra aho.

13 Fa Ianao kosa, ry Iaveh, dia mipetraka eo amin’ny seza fiandrianana mandrakizay,

ary velona amin’ny taona rehetra mifandimby ny fahatsiarovanao.

14 Hitsangana Ianao, hamindra fo amin’i Siôna,

fa ny andro hamindram-po aminy,

ny fotoana voatendry dia efa tonga.

15 Satria lalain’ny mpanomponao ny vatony,

nampangoraka ny fony hatramin’ny vovo-taniny.

16 Amin’izay dia hanaja ny Anaran’i Iaveh ny firenena,

ary hanaja ny fiandriananao ny mpanjaka rehetra amin’ny tany

17 Fa i Iaveh nanangana an’i Siôna indray,

niseho tamin’ny voninahiny Izy;

18 nihaino ny vavaky ny fadiranovana,

tsy nanamavo ny fitarainany.

19 Aoka hatao an-tsoratra izany, ho an’ny taranaka ho avy;

ary aoka hankalazain’ny firenena vao hiforona i Iaveh.

20 Satria nitsinjo amin’ny havoany masina Izy,

satria nitsinjo ny tany teny an-danitra i Iaveh;

21 mba hihaino ny fitarainan’ireo voababo,

mba hanafaka an’ireo efa voatendry hovonoina ho faty,

22 mba hitorian’ireo ny Anaran’i Iaveh ao Siôna,

sy ny fiderana Azy ao Jerosalema;

23 raha avy izay hiangonan’nyfirenena rehetra,

mbamin’ny fanjakana, hanompo an’i Iaveh.

24 Efa nanaketraka ny heriko teny an-dalana izy,

efa nanafohy ny androko izy.

25 Hoy aho: «Ry Andriamanitro,

aza alainao aho eo antenantenan’ny androko,

Ianao izay aharetan’ny taonanao, amin’ny taona mifandimby.»

26 Nanorina ny tanytamin’ny voalohany Ianao,

ary asan’ny tananao ny lanitra.

27 Ho velona ireo, fa Ianao kosa maharitra,

hihatonta toy ny fitafiana ireo;

hanova azy toy ny lamba Ianao, ka ho voaova izy.

28 Fa Ianao kosa maharitra tsy miova,

ary tsy manam-pahataperana ny taonanao.

29 Ny zanaky ny mpanomponao honina amin’ny taniny,

ary haharitra eo anatrehanao ny taranany.

Andriamanitra dia fitiavana

1 Nataon’i Davida.

Misaora an’i Iaveh, ry fanahiko,

ary misaora ny Anarany masina, ry ato anatiko rehetra!

2 Misaora an’i Iaveh, ry fanahiko,

ary aza manadino ny soa rehetra avy aminy.

3 Fa Izy no mamela ny helokao rehetra,

manasitrana ny aretinao rehetra.

4 Izy no manavotra ny ainao tsy hidina any an-davaka,

manarona hatsaram-po amam-pamindram-po anao.

5 Izy no manototra soa ny fanirianao,

ary manavao ny fahatanoranaohanana ny herin’ny voromahery.

6 Manao ny fitsarana i Iaveh,

manome rariny an’izay rehetra nampahorîna.

7 Nampiseho ny lalany tamin’i Môizy Izy,

ary ny asany lehibe, tamin’ny zanak’i Israely.

8 Mamindra fo sy miantra i Iaveh,

mahari-po sy be hatsaram-po.

9 Tsy mba ho mandrakizay no mandevilevy Izy,

tsy mitana fahatezerana mandrakizay.

10 Tsy manao amintsika, araka ny fahotantsika,

ary tsy mamaly antsika, araka ny helotsika.

11 Fa tahaka ny haavon’ny lanitraambonin’ny tany,

no haben’ny hatsaram-pony amin’izay matahotra Azy.

12 Tahaka ny halaviran’ny atsinanana amin’ny andrefana,

no halaviran’ny anesorany amintsika ny hadisoantsika.

13 Sahala amin’ny fangoraky ny ray ny zanany,

no fangorak’i Iaveh an’izay matahotra Azy.

14 Satria fantany izay iforonantsika,

tsaroany fa vovoka ihany isika.

15 Ny olombelona! Tahaka ny ahitra ny androny,

tahaka ny voninkazo any an-tsaha ny famoniny,

16 ka vao tsofin’ny rivotra izy dia tsy eo intsony,

ary ny toerana nisy azy, tsy mahalala azy intsony.

17 Fa maharitra mandrakizay kosa ny hatsaram-pon’i Iaveh

ho an’izay matahotra Azy,

sy ny fahamarinany amin’ny taranaky ny zanak’izy ireo,

18 dia amin’izay mitandrina ny fanekeny,

sady mahatsiaro ny didiny mba hitandremany azy.

19 Nampiorina ny seza fiandrianany any an-danitra i Iaveh,

ary mihatra amin’ny zavatra rehetra ny fanjakany.

20 Misaora an’i Iaveh ianareo Anjeliny,

izay mahefa sy mahery sy mankatò ny didiny,

amin’ny fanekena ny feon’ny teniny.

21 Misaora an’i Iaveh ianareo rehetra tafiny,

izay mpanompony sy manatanteraka ny sitrapony!

22 Misaora an’i Iaveh ianareo asany rehetra,

amin’ny fitoerana rehetra fanjakany.

Misaora an’i Iaveh, ry fanahiko.

Ny hasoan’ny zava-boaary

1 Misaora an’i Iaveh, ry fanahiko!

Iaveh Andriamanitro ô, lehibe tsy manam-petra Ianao!

Mitafy fiandrianana amam-pamirapiratana Ianao!

2 Mihodidina amin’ny fahazavanatoy ny amin’ny lamba izy,

mamelatra ny lanitra toy ny lay.

3 Manorina ny fonenany amin’ny ranon’ny lanitra,

manao ny rahona ho kalesiny;

mandeha amin’ny elatry ny rivotra.

4 Manao ny rivotraho irany,

ary ny lelafo ho mpanompony.

5 Manorona ny tany eo amin’ny fanorenany Izy,

ka tsy mihetsiketsika mandrakizay io.

6 Nahodidinao azy, toy ny lamba, ny rano lalina,

ka saron’ny rano ny tendrombohitra.

7 Saingy nandositra teo anoloan’ny fanandrinanao ireny,

lasa nirifatra aman-tahotra noho ny feon’ny kotrok’oranao izy.

8 Dia nitranga ny tendrombohitra, nilempona ny lohasaha,

teo amin’ny toerana voatendrinao ho azy avy.

9 Nanisy faritra tsy hihoaran’ny rano Ianao,

ka tsy hiverina hanarona ny tany intsony ireny.

10 Mandefa loharano amin’ny lohasaha Izy

dia mandeha eny anelanelan’ny tendrombohitra ireny;

11 hisotroan’ny biby any an-tsaha ireny,

ary hankanesan’ny ampondra diahanala ny hetahetany.

12 Mitoetra eny amorony eny ny voromanidina;

sady mampanakoako ny feony, eny amin’ny ravin-kazo izy ireo.

13 Manondraka ny tendrombohitra, avy eny amin’ny fonenany avo Izy;

ny vokatry ny asanao no ivokisan’ny tany,

14 mampaniry ahitraho an’ny biby fiompy Izy,

mbamin’ny zava-maniry ho an’ny olombelona;

mamoaka hanina avy amin’ny kibon’ny tany Izy,

15 mbamin’ny divay izay mampifaly ny fon’ny olona,

omeny diloiloizy hahamandina ny tavany,

ary mofo hankahery ny fony.

16 Feno ranony ny hazon’i Iaveh,

mbamin’ny sederan’iLibànaizay namboleny.

17 Manao ny akaninyeo ny vorona,

mbamin’ny vanoizay mitoetra ao amin’ny sipresy;

18 ny tendrombohitra avo, ho an’ny osy dia,

ary ny haram-bato ialofan’ny jeriboazy.

19 Ny volana nataony famantarana andro;

ary ny masoandro mahalala ny ora filentehany.

20 Mampiavy ny haizina Izy, ka alina ny andro,

dia mihetsiketsika miaraka amin’izay ny biby rehetra any an’ala.

21 Mierona maniry toha, ny liona tanora,

mangataka ny haniny amin’Andriamanitra.

22 Miposaka ny masoandro dia mihataka ireny

ka lasa mamitsaka any an-davany.

23 Ny olombelona mivoaka amin’izay ho any amin’ny asany;

sy ho any amin’ny raharahany mandra-paharivan’ny andro.

24 Akory ity hamaroan’ny asanao, ry Iaveh;

nataonao tamim-pahendrena izy rehetra.

Henika ny harenao ny tany.

25 Indro ny ranomasina, sady lehibe no malalaka;

iriariavam-biby tsy hita isa,

ao ny kely, ao ny lehibe.

26 Mivezivezy ao ny sambo,

mbamin’i Leviatànanataonao hilalao eo amin’ny onja.

27 Izy rehetra miandry Anao,

hanome ny haniny amin’ny fotoany.

28 Manome azy Ianao, dia mandray izy;

manokatra ny tananao Ianao, dia voky ny soa avy aminao izy.

29 Manafina ny Tavanao Ianao, dia raiki-tahotra izy;

alànao indray ny fofon’ainy, dia maty izy,

ka miverina indray any amin’ny vovoka.

30 Maniraka ny fofon’ainao Ianao, dia àry ireny;

ary manavao ny tarehin’ny tany Ianao.

31 Haharitra mandrakizay anie ny voninahitr’i Iaveh!

hifaly amin’ny asany anie i Iaveh!

32 Mijery ny tany Izy dia mihorohoro io;

manendry ny tendrombohitraIzy dia midonaka ireny.

33 Sitrako ny mihira ho an’i Iaveh, ny andro rehetra iainako,

sy mankalaza ny Andriamanitro raha mbola misy koa aho.

34 Ho sitrany anie ny hirako,

fa izaho, dia i Iaveh no nataoko fifaliako.

35 Ho fongotra eto an-tany anie ny mpanota,

ary tsy hisy intsony ny ratsy fanahy!

Misaora an’i Iaveh, ry fanahiko, Aleloia!

Tantara mahagagan’i Israely

1 Mankalazà an’i Iaveh, miantsoa ny Anarany;

ampahafantaro eny amin’ny firenena ny asa lehibe nataony.

2 Mihirà ho Azy, mankalazà Azy!

Torio ny fahagagana rehetra ataony.

3 Mireharehà amin’ny Anarany masina;

hiravoravo anie ny fon’izay mitady an’i Iaveh.

4 Mitadiava an’i Iaveh sy ny heriny,

aza mitsahatra mitady ny Tavany.

5 Tsarovy ny asa mahagaga nataony,

ny fahagagana amam-pitsarana navoaky ny vavany,

6 ry taranak’i Abrahamampanompony,

tamingan’i Jakôba olom-boafidiny.

7 Izy Iaveh Andriamanitsika;

mihatra amin’ny tany rehetra ny fitsarany.

8 Tsaroany mandrakizay ny fanekeny,

ilay teny nolazainy marimarina ho an’ny taranaka mandimby;

9 Fanekena nataony tamin’i Abrahama;

ary fianianana nataony tamin’i Isaaka.

10 Naoriny ho lalàna izany, tamin’i Jakôba,

ary ho fanekena mandrakizay tamin’i Israely,

11 nataony hoe: «Homeko anao ny tany Kanaana,

ho anjara lovanao.»

12 Mbola olom-bitsy izy fahizany,

sady vitsy no vahiny teo amin’ny tany;

13 ka nifindrafindra tany tamin’ny firenena;

niala tamin’ny fanjakana iray ho amin’ny firenen-kafa.

14 Tsy nisy navelany hampahory azy;

ary izy ireo no namaizany mpanjaka:

15 Aza mikasika an’ireo voahosotro,

ary aza manisy ratsy an’ireo mpaminaniko.

16 Niantso mosary hamely ny tany Izy,

notapahiny ny haninyizay tohan’ainy.

17 Naniraka olona hialona azy ireo Izy:

i Josefanamidy ho andevo.

18 Nogiazana tamin’ny fatorana ny tongony,

nogadrana vy izy,

19 mandra-pahatongan’ny andro nahatanterahan’izay voalazany mialoha,

izay nanamarinan’ny tenin’Andriamanitra azy.

20 Naniraka hanesotra ny fatorany ny mpanjaka:

nalefan’ny filohan’ny vahoaka ho afaka izy.

21 Dia natsangany ho tompon’ny tranony,

sy ho mpanapaka ny taniny rehetra,

22 mba hifehy ireo andriandahy araka izay sitraky ny fony,

sy hampianatra fahendrena an’ireo loholony.

23 Izay vao nankany Ejipta i Israely,

ka nitoetra teo amin’ny tanin’i Kamai Jakôba.

24 Nohamaroin’Andriamanitra fatratra ny vahoakany,

ary nataony mahery noho ireo mpampahory azy.

25 Novany ny fon’ireo, ka tonga nankahala ny vahoakany,

sy nanao famadihana an’ireo mpanompony.

26 Dia nirahiny i Môizy mpanompony,

sy i Aarôna olom-boafidiny.

27 Ary ireo nanao ny famantaran’Andriamanitra teo amin’izy ireo,

nanao fahagagana teo amin’ny tanin’i Kama.

28 Nandefa haizina Izy, ka nampanjariany alina ny andro,

fa tsy nandà ny teniny ireny.

29 Nanova ny ranony ho ra Izy,

ka nahafaty ny hazandranon’izy ireo.

30 Nisy sahona nihahohaho teo amin’ny taniny,

hatrany amin’ny efitranon’ny mpanjakany.

31 Niteny izy ka lalitra zavon-tany no tonga,

dia moka nanerana ny faritaniny.

32 Norotsahany havandra ho solon’ny ranonorana izy ireo;

sy afo nidedadeda teo amin’ny taniny.

33 Namono ny voalobony aman’aviaviny izy,

ary nanapatapaka ny hazo teo amin’ny taniny.

34 Niteny Izy dia tonga ny valala,

ka valala tsy hita isa.

35 Ka nohanin’ireny avokoa ny ahitra teo amin’ny taniny,

nolevonin’ireny ny vokatry ny sahany.

36 Namono ny lahy matoa rehetra teo amin’ny taniny Izy,

dia ny voalohan’ainy rehetra.

37 Dia nentiny nivoakany vahoakany nitondra volafotsy sy volamena,

ary tsy nisy nangozohozo tamin’ireo fokony, na dia iray aza.

38 Nifaly tamin’ny nahalasanany ny Ejiptianina,

satria nahazo an’ireo ny fahatahorana an’i Israely.

39 Namelatra rahona hanalokaloka azy Izy,

ary afo hanazava azy amin’ny alina.

40 Nangataka izy ireo dia nandefasany papelika,

ary mofo avy any an-danitra no namokisany azy,

41 Nanokatra ny vatolampy izy, dia niboiboika ny rano,

ka nandriaka sahala amin’ny ony tany an’efitra.

42 Fa tsaroany ny teny masina,

sy i Abrahama mpanompony.

43 Ka nentiny nivoaka tamin-kafaliana ny vahoakany;

ary tamin’ny hobim-pifaliana ny olom-boafidiny.

44 Nomeny azy ireo ny tanin’ny firenena,

ary nahazo nizaka ny vokatry ny asan’ny firenena izy ireo.

45 Raha tahiny nitandrina ny didiny anefa izy ireo:

sy nitana ny lalàny.

Aleloia!

Fiaikena heloky ny firenena

1 Aleloia!

Ankalazao i Iaveh, fa tsara fo Izy,

satria mandrakizay ny famindram-pony.

2 Iza no mahalaza ny asa amin-kerim-po ataon’i Iaveh,

iza no mahambara ny voninahiny rehetra?

3 Sambatra izay mitandrina ny lalàna,

ka manaraka ny rariny mandrakariva!

4 Ry Iaveh ô, tsarovy aho amin’ny hatsaram-ponao amin’ny vahoakanao,

vangio amin’ny famonjenao aho,

5 hahitako ny hasambaran’ny olom-boafidinao,

hifaliako amin’ny fifalian’ny vahoakanao,

ary hiravoravoako miaraka amin’ny lovanao.

6 Efa nanota toy ny razanay izahay,

nahavita heloka izahay, nanao ratsy izahay.

7 Ny razanay tany Ejipta tsy nihevitra ny fahagagana nataonao,

tsy nahatsiaro ny hamaroan’ny fahasoavanao;

niodina teo amoron-dranomasina, dia ny Ranomasina Mena.

8 Namonjy azy anefa Izy noho ny Anarany,

mba hampiharihary ny fahefany.

9 Nambanany ny Ranomasina Mena, dia maina io,

ka nentiny nita ny hantsana toy ny hamaky ny efitra izy ireo.

10 Namonjy azy tamin’ny tanan’izay nankahala azy Izy,

nanafaka azy tamin’ny tanan’ny mpampahory azy.

11 Nosaforan’ny onjan-drano ireo mpandrafy azy,

ka tsy nisy niangana na dia iray aza.

12 Dia nino ny teniny izy ireo tamin’izay,

ary nihira fiderana Azy.

13 Kanjo kosa izy ireo nalaky nanadio ny asany,

tsy niandry ny hanatanterahany izay voakasany.

14 Voan’ny fitsiriritana tany an’efitra izy,

ka naka fanahy an’Andriamanitra tany an-tany mangingina.

15 Nomeny azy ihany izay nangatahiny,

fa nasiany fahiazana kosa izy ireo.

16 Tao an-toby indray izy ireo nialona an’i Môizy,

sy i Aarôna ilay olo-masin’i Iaveh.

17 Fa nisokatra ny tany, ka nitelina an’i Datàna,

sy nikatona nanarona ny antokon’i Abirôna.

18 Nolevonin’ny afo ny antokon’izy ireo,

dia levon’ny lelafo ny ratsy fanahy.

19 Nanao zanak’ombalahy izy teo an-tendrombohitra Horeba,

dia niankohoka teo anoloan’ny sarin-javatra anidina.

20 Ny voninahitr’izy ireo, dia natakalony

sarin’omby miraoka ahitra.

21 Nohadinoiny Andriamanitra Mpamonjy azy,

izay nanao zava-dehibe tany Ejipta,

22 fahagagana tany amin’ny tanin’i Kama,

famantarana teo amin’ny Ranomasina Mena.

23 Efa nolazainy haringana izy ireo;

raha tsy i Môizy olom-boafidiny,

no nitsangana teo anatrehany

hisakana ny hatezerany tsy handringana azy.

24 Izy ireo nanamavo ny tanim-pahafinaretana

tsy nino ny tenin’i Iaveh.

25 Nimonomonona tao an-dainy,

ary tsy nanaiky ny feony izy ireo.

26 Ka dia nanainga ny tanany Izy hamely azy ireo,

handringana azy any an’efitra:

27 hahavery ny taranany any amin’ny firenena,

ary hanely azy any an-tany hafa.

28 Niraikitra tamin’i Beelfegôra izy ireo,

ka nihinana ny sorona natolotra ho an’ny maty.

29 Nampahatezitra an’i Iaveh tamin’ny nataony izy ireo,

dia nibosesehan’ny loza.

30 Nitsangana nanolotra fanonerana i Finea,

dia nitsahatra ny loza.

31 Notanana ho fahamarinana ho azy izany nataony izany,

hatramin’ny taona mifandimby mandrakizay.

32 Nampahatezitra an’i Iaveh izy ireo tao amin’ny ranon’i Meribà,

ary nozoim-pahoriana noho ny nataon’izy ireo i Môizy;

33 fa nampahasosotra ny fanahiny izy ireo,

ka nahavoaka teny tsy voahevitra izy.

34 Tsy naringan’izy ireo ny firenena

nasain’i Iaveh naringany.

35 Fa niharo tamin’ny firenena izy

nianatra ny asan’ireny.

36 Nanompo ny sampin’ireny,

izay tonga fandrika ho azy.

37 Nataony sorona ho an’ny demony,

ny zanany lahy aman-janany vavy.

38 Nandatsaka ny ra tsy manan-tsiny izy

dia ny ran’ireo zanany lahy aman-janany vavy,

nataony sorona tamin’ny sampin’i Kanaana,

ka ny tany voaloton’ny vonoana olona.

39 Izy ireo nandoto tena tamin’ny asany,

ary nitolo-tena tamin’andriamani-kafa.

40 Dia nirehitra tamin’ny vahoakany ny fahatezeran’i Iaveh,

ary tonga tsy tiany mainty ny lovany.

41 Natolony ho eo an-tanan’ny firenena izy ireo,

ka notapahin’ireo mankahala azy.

42 Nampahorin’ny fahavalo izy,

ary voaetry tambanin’ny tanan’ireny.

43 Nanafaka azy ireo matetika Izy;

nefa niodina nanaraka ny fisainany izy ireo;

ka ny helony no nahaverezany ny tenany.

44 Nijery ny fahorian’izy ireo anefa Izy,

nony nandre ny fitarainany.

45 Notsarovany, hitsimbinana azy, ny fanekeny;

namindra fo taminy araka ny hatsaram-pony lehibe Izy;

46 ary nataony nahita famindram-po aminy izy ireo,

teo anatrehan’izay rehetra nitana azy ho babo.

47 Vonjeo izahay, ry Iaveh, Andriamanitray,

ka angony avy amin’ny firenena izahay,

mba hankalazanay ny Anaranao masina,

ary hireharehanay amin’ny fiderana Anao.

48 Hisaorana anie i IavehAndriamanitr’i Israely,

hatramin’ny mandrakizay ka ho mandrakizay!

Ary aoka ny vahoaka rehetra hilaza hoe:

Amen! Aleloia!

Vonjen’Andriamanitra amin’ny loza rehetra ny olombelona

1 Ankalazao i Iaveh, fa tsara fo Izy,

mandrakizayny famindram-pony.

2 Izany anie no holazain’ireo navotan’i Iaveh,

dia ireo navotany ho afaka tamin’ny tanan’ny fahavalony,

3 sy nangoniny avy any amin’ny tany rehetra,

avy any atsinanana sy andrefana,

avy any avaratra sy any amin’ny ranomasina.

4 Nirenireny tany an’efitra ireny tamin’ny lalana mangingina,

tsy nahita tanàna iray akory honenana.

5 Nianjadian’ny hanoanana aman-ketaheta,

efa tsaroany reraka ny ainy.

6 Fa nitaraina tamin’i Iaveh tao anatin’ny fahoriana izy,

ka novonjeny ho afaka tamin’ny fahaporetany.

7 Nitondra azy tamin’ny lala-mahitsy izy,

hampahatongavany azy amin’ny tanàna fonenana.

8 Hoderainy anie i Iaveh noho ny hatsaram-pony,

sy noho ny fahagagana nataony ho an’ny zanak’olombelona!

9 Fa ny fanahy mangetaheta, nataony afa-ketaheta,

ary ny fanahy noana novokisany soa.

10 Tao amin’ny maizina sy ny aloky ny fahafatesana no nitoeran’izy ireo,

voababo ao anatin’ny fahoriana sy ny gadra vy.

11 Satria niodina tamin’ny teny ton’Andriamanitra izy

sy naniratsira ny fananaran’ny Avo Indrindra.

12 Dia naetriny tamin’ny fijaliana ny fony;

nitambotsotra izy ka tsy nisy namonjy!

13 Nitaraina tamin’i Iaveh tao anatin’ny fahoriany izy,

ka novonjeny ho afaka amin’ny fahaporetany.

14 Nesoriny tamin’ny haizina sy ny aloky ny fahafatesana izy,

ary notapahiny ny fatorany.

15 Hoderainy anie i Iaveh, noho ny hatsaram-pony;

sy noho ny fahagagana nataony tamin’ny zanak’olombelona!

16 Fa nanorotoro ny varavarana varahina izy,

ary nanapatapaka ny hidy vy.

17 Adala lahy ireo! Noho ny fitondran-tenany mahameloka,

sy noho ny helony dia notaritiny hanjò azy ny fijaliana.

18 Nahamonamonaina azy avokoa izay hanina rehetra;

ary efa mby akaikin’ny vavahadin’ny fahafatesana izy.

19 Nitaraina tamin’i Iaveh tao anatin’ny fahoriana izy;

ka novonjeny ho afaka amin’ny fahaporetany.

20 Nandefa ny teniny Izy dia nanasitrana azy,

sy nanafaka azy hiala amin’ny fasany.

21 Hoderainy anie i Iaveh noho ny hatsaram-pony,

sy noho ny fahagagana nataony, ho an’ny zanak’olombelona!

22 Hanatitra sorona fisaorana anie izy,

ary hitory ny asany amin’ny hobin-kafaliana!

23 Nirotsaka an-tsambo izy ireo teny amin’ny ranomasina,

mba hanao fandrantoana eny amin’ny rano lehibe. –

24 Ireo no nahita ny asan’i Iaveh,

mbamin’ny fahagagana nataony tao amin’ny hantsam-be. –

25 Fa niteny Izy, ary nampifofofofo tafio-drivotra,

izay nampisondrotra ny onjan-dranomasina;

26 ka tafasavoana hatrany an-danitra izy ireo,

tafalentika ao amin’ny hantsana;

trotraky ny fahoriana ny fanahiny.

27 Fanina izy, ka nivembena hoatra ny mamo;

ary foana avokoa ny fahendreny rehetra.

28 Nitaraina tamin’i Iaveh tao anatin’ny fahoriana izy,

ka novonjeny ho afaka amin’ny fahaporetany.

29 Novany ho tsotso-drivotra malemy ny tafio-drivotra,

dia nangina ny onjan-dranomasina.

30 Nifaly izy ireo nahita ireo nitony,

ary nentin’i Iaveh, ho amin’ny fitodiana niriny izy.

31 Hoderainy anie i Iaveh noho ny hatsaram-pony,

sy noho ny fahagagana nataony ho an’ny zanak’olombelona!

32 Hankalazainy eo amin’ny fiangonan’ny vahoaka anie Izy,

ary hoderainy eo amin’ny fiangonan’ny loholona.

33 Ny ony, novany ho efitra,

ary ny loharano ho tany karankaina,

34 ny tany mahavokatra ho tanin-tsira

noho ny haratsian’ny mponina teo aminy.

35 Ny efitra kosa novany ho kamory,

ary ny tany karankaina ho tany be loharano,

36 Dia namponeniny eo ny noana,

ka nanorin-tanàna honenany.

37 Namafy ny saha ireny sy namboly voaloboka,

ary nahazo vokatra be.

38 Fa izy nanambina azy ireo, ka nitombo betsaka izy,

ary tsy navelany hihavitsy ny biby fiompiny.

39 Nahenany ho vitsy foana sy naetriny izy ireo,

notsindrian’ny loza amam-pahoriana.

40 Nosaforany henatra ny mpanapaka an’ireny,

nampirenireny any an’efitra tsy misy lalana;

41 fa ny mahantra kosa nasandrany ho afa-pahoriana,

ary ny fianakaviana nataony tonga sahala amin’ny andiam-biby fiompy.

42 Mahita izany ny olona mahitsy fo ka mifaly,

fa mikombom-bava foana kosa ny ratsy fanahy rehetra.

43 Aoka izay hendry hamantatra izany zavatra izany

ka hahalala ny hatsaram-pon’i Iaveh.

Vavaka maraina sy fangatahana ho an’ny firenena

1 Fihirana. Salamon’i Davida.

2 Efa nahazo toky ny foko, ry Andriamanitra ô,

dia hihira sy hampanakoako zava-maneno aho.

Mitsangàna, ry voninahitro!

3 Mifohaza, ry valiha amana harpako!

Aoka hamoha ny mazava atsinanana aho!

4 Hidera Anao eo amin’ny vahoaka aho, ry Iaveh!

hihira ho Anao eo amin’ny firenena aho.

5 Fa misondrotra hihoatra ny lanitra ny hatsaram-ponao,

ary tafapaka amin’ny rahona ny fahamarinanao.

6 Misandratra hihoatra ny lanitra, ry Andriamanitra;

aoka hamirapiratra amin’ny tany rehetra ny voninahitrao.

7 Mba ho afaka ireo malalanao,

vonjeo amin’ny tananao ankavanana, ary valio vavaka aho.

8 Efa niteny tamin’ny fahamasinany Andriamanitra:

Hientan-kafaliana aho!

Fa lasan-ko anjarako i Sikema; horefesiko i Sokôta.

9 Ahy i Galaada, ahy i Manase;

fiadiana aro lohako i Efraima,

ary tehim-panjakako i Jodà;

10 i Moabatavin-drano fandroako,

i Edôma anipazako ny kapako;

Ny tanin’ny Filistinina no anaovako hobin-kafaliana!

11 Iza no hitondra ahy any amin’ny tany mimanda?

Iza no hitarika ahy ho any Edôma?

12 Tsy Ianao izay efa nanary anay va, ry Andriamanitra,

Ianao, ry Andriamanitra, izay efa tsy niara-nivoaka tamin’ny tafikay intsony?

13 Vonjeo amin’ny mpampahory anay izahay,

fa zava-poana ny famonjena avy amin’olombelona.

14 Raha omban’Andriamanitra isika dia herim-po no hasehontsika;

Izy no hanorotoro ny fahavalontsika.

Salamo fitarainana sy ozona ho an’ny fahavalo

1 Ho an’ny mpampianatra hira. Salamon’i Davida.

Ry Andriamanitra fiderako ô, aza mangina Ianao!

2 Fa misokatra hamely ahy, ny vavan’ny ratsy fanahy,

ny vavan’ny mpamadika.

Fiteny mamitaka no itenenany hamely ahy,

3 hodidininy teny fankahalana aho,

ary iadiany tsy ahoan-tsy ahoana izao.

4 Izy miady amiko ho valin’ny fitiavako,

izaho kosa tsy manao afa-tsy ny mivavaka.

5 Valiany ratsy ny soa nataoko,

valiany fankahalana ny fitiavako.

6 Apetraho eo ambany fanapahan’ny ratsy fanahy izy;

ary aoka ho eo ankavanany ny mpiampanga!

7 Raha tsaraina izy, aoka ho voaheloka no ivoahany,

ary aoka hatao ho fahotana ny fivavahany.

8 Aoka hohafohezina ny androny,

ary aoka ho lasan’ny hafa ny anjara raharahany!

9 Aoka ho tonga kamboty ny zanany,

ary ho mpitondratena ny vadiny!

10 Aoka ho mpirenireny sy mpangataka ny zanany,

ary hitady hanina lavitra ny tranony efa rava!

11 Aoka ho lasan’ny tompon-trosa ny ananany rehetra,

ary aoka hofaohin’ny olon-kafa ny vokatry ny asany!

12 Aoka tsy hisy olona maharitra amin’ny fitiavana azy,

aoka tsy hisy hiantra ny kambotiny.

13 Aoka hatolotra ho amin’ny fandringanana ny taranany,

ary aoka ho mati-maso amin’ny taranaka faharoa ny anarany!

14 Aoka hotsarovana eo anatrehan’i Iaveh ny helo-drainy;

ary tsy hovonoina ny fahotan-dreniny.

15 Aoka ho eo anatrehan’i Iaveh mandrakariva izany,

ary hofoanany eto an-tany ny fahatsiarovana azy.

16 Satria tsy mba nahatsiaro ny hamindra fo izy,

fa nanenjika ny ory sy ny mahantra, sy ny olona toro fo,

mba hamono azy.

17 Tia ozona izy, ka ianjerany,

naneso tso-drano izy, ka halaviriny.

18 Ny ozona no notafiny toy ny lamba;

miditra ao anatiny toy ny rano,

ary maninteraka ny taolany, toy ny diloilo.

19 Ka dia io no aoka ho toy ny lamba ifonosany;

sy sikina manodidina azy lalandava.

20 Izany no aoka ho tamby avy amin’i Israely ho an’ireo fahavaloko,

sy ho an’ireo miteny ratsy mamely ahy.

21 Ary Ianao, ry Iaveh Tompo, arovy aho noho ny Anaranao;

vonjeo aho noho ny hatsaram-ponao lehibe.

22 Fa ory sy mahantra aho,

ary voatsindrona ny foko ato anatiko.

23 Lasa toy ny aloka efa mandrorona aho,

indaosina tahaka ny valala aho.

24 Mangozohozo ny lohaliko azon’ny fifadian-kanina,

ary mihintsana ny nofokoazon’ny hia.

25 Ataon-dry zareo fandatsa aho,

mihifikifi-doha izy mijery ahy.

26 Ampio aho, ry Iaveh Andriamanitro ô,

vonjeo aho noho ny hatsaram-ponao.

27 Aoka ho fantany fa ny tananao,

dia Ianao Iaveh, no nanao izany.

28 Izy ireo manozona fa Ianao kosa hitso-drano,

izy ireo hitsanga-menatra,

fa ny mpanomponao kosa hiravoravo.

29 Hitafy henatra ny fahavaloko,

ary hanarona azy toy ny lamba ny fahamenarany.

30 Hidera an’i Iaveh amin’ny feo avo ny molotro;

hankalaza azy eo afovoan’ny vahoaka be aho.

31 Fa nitsangana eo ankavanan’ny mahantra Izy

hamonjy azy amin’izay manameloka azy.

Ny Mesia Mpisorona

1 Salamon’i Davida.

I Iaveh nilaza tamin’ny Tompokohoe:

Mipetraha eo ankavanakoianao,

mandra-panaokony fahavalonao ho fitoeran-tongotrao.

2 Hanitatra ny tehinafanapahanao, avy ao Siônai Iaveh:

manjakà amim-pahefan’ny Tompoeo amin’ny fahavalonao ianao!

3 Midodododo aminao ny vahoakanao amin’ny andro hamorianao ny tafikao,

mitondra ny fanamiana masina:

avy ao ampofoan’ny mazava atsinanana,

dia mankao aminao ny ranonandon’ny mpiadinao tanora.

4 Efa nianianan’ny Tompo ka tsy hanenenany izao:

Mpisorona mandrakizay Ianao,

araka ny fomban’i Melkisedeka.

5 Eo ankavananao ny Tompo,

handripaka ny mpanjaka Izy amin’ny andron’ny fahatezerany.

6 Manao ny fitsaràny any amin’ny firenena Izy,

feno faty hatraiza hatraiza;

manorotoro ny loha eo amin’ny tany tontolo Izy.

7 Misotro amin’ny renirano izyeny an-dalana,

ka izany no itrakan’ny lohany.