Category: Salamo

Ilay Mpiambina an’i Israely

1 Fihirana fiakarana.

Manopy maso eny amin’ny tendrombohitra aho;

Avy aiza no hiavian’ny famonjena ahy?

2 Ny famonjena ahy dia avy amin’i Iaveh,

izay nanao ny lanitra sy ny tany.

3 Tsy havelany ho tafintohina ny tongotro;

tsy ho rendremana ilay miambina anao.

4 Tsia, tsy rendremana na matory

ilay miambina an’i Israely.

5 I Iaveh no mpiambina anao,

I Iaveh no fialofanao, eo ankavananao.

6 Tsy hisy hamely anao, na ny masoandro amin’ny andro,

na ny volana amin’ny alina.

7 Hiaro anao amin’ny ratsy rehetra i Iaveh,

hiaro ny fanahinao Izy.

8 Hiaro anao i Iaveh, na mivoaka na miditra ianao,

hatramin’izao ka ho mandrakizay.

Fiarahabana an’i Jerosalema

1 Fihirana fiakarana. Nataon’i Davida.

Nahazo hafaliana aho raha nilazana hoe:

«Andeha isika ho any an-tranon’i Iaveh!»

2 Indro fa tapitra ny dianay

eto am-bavahadinao, ry Jerosalema.

3 Ry Jerosalema, ianao voaorina toy ny tanàna,

izay iraisan’ny zavatra rehetra.

4 Ao no iakaran’ny foko,

dia ny fokon’i Iaveh,

araka ny lalàn’i Israely,

mba hidera ny Anaran’i Iaveh.

5 Voapetraka ao ny seza fitsarana,

dia ny sezan’ny fianakavian’i Davida.

6 Manaova fanirian-tsoa ho an’i Jerosalema:

ho sambatra anie ilay tia anao!

7 Hanjaka ao anatin’ny mandanao anie ny fiadanana,

ary ao an-dapanao ny fanambinana.

8 Noho ireo rahalahiko aman-tsakaizako,

dia mangataka fiadanana ho anao aho,

9 Noho ny tranon’ny Andriamanitsika,

dia maniry fahasambarana ho anao aho.

Vavaky ny tsy ambinina

1 Fihirana fiakarana.

Miandrandra Anao ny masoko,

dia Ianao izay mitoetra any an-danitra.

2 Toy ny ibanjinan’ny mason’ny ankizy lahy

ny tanan’ny tompo lahiny,

sy ny mason’ny ankizy vavy

ny tanan’ny tompo vaviny,

no ibanjinan’ny masontsika an’i Iaveh Andriamanitsika,

mandra-pamîndrany fony amintsika.

3 Mamindrà fo aminay, ry Iaveh ô, mamindrà fo aminay,

fa efa tototry ny faniratsirana izaitsizy izahay.

4 Efa nanototra ny fanahinay izaitsizy,

ny famingavingan’ny mpirehareha, ny fanevatevan’ny mpiavonavona.

Ilay Mpamonjy an’i Israely

1 Fihirana fiakarana. Nataon’i Davida.

Raha tsy nomba antsika i Iaveh,

– aoka i Israely hitory izany, –

2 raha tsy nomba antsika i Iaveh,

fony nitsangan-kamely antsika ny olona…

3 ho nateliny velona mihitsy isika,

raha nirehitra tamintsika ny fahatezerany;

4 ho natelin’ny rano isika,

ho nandeha teo ambonin’ny fanahintsika ny riaka be.

5 Tao ambonin’ny fanahintsika

no ho nandehanan’ny rano mirimorimo.

6 Hisaorana anie i Iaveh,

fa tsy natolony tamin’ny nifin’ireo isika.

7 Afaka ny fanahintsika toy ny fody nitsoaka

tamin’ny fandrika haraton’ny mpihaza:

tapaka ny fandrika dia afaka isika.

8 Ny famonjena antsika dia amin’ny Anaran’i Iaveh,

izay nanao ny lanitra sy ny tany.

Arovan’Andriamanitra izay mifikitra aminy

1 Fihirana fiakarana.

Izay mitoky amin’i Iaveh,

dia tahaka ny tendrombohitra Siôna:

tsy mba mangozohozo izy, fa miorina mandrakizay.

2 I Jerosalema mirehitra tendrombohitra manodidina azy:

i Iaveh manodidina ny vahoakany toy izany koa,

hatramin’izao ka ho mandrakizay.

3 Tsy hitoetra eo amin’ny lovan’ny marina

ny tehim-panjakan’ny ratsy fanahy,

mba tsy hanaingan’ny olo-marina,

ny tanany hanao ratsy koa.

4 Iaveh ô, totofy soa ny tsara fanahy,

sy ny mahitsy fo.

5 Fa raha ireo mivily amin’ny lala-miolikolika kosa,

aoka izy hafoin’i Iaveh miaraka amin’izay manao ratsy.

Fiadanana anie ho amin’i Israely!

Hira rehefa mody

1 Fihirana fiakarana

Fony i Iaveh nampody ny voababon’i Siôna,

dia toa nofy izany ho antsika.

2 Tamin’izany ny vavantsika nanao hobin-kafaliana,

ny lelantsika nanao hira firavoravoana.

Fahizay izao no ambentinteny amin’ny firenena:

«Nanao zava-dehibe ho azy ireo i Iaveh.»

3 Eny, nanao zava-dehibe ho antsika tokoa i Iaveh;

ka revon-kafaliana isika.

4 Iaveh ô, avereno ny anay voababo,

toy ny ampandehananao ny ranon-driaka ao amin’ny Negeba.

5 Izay mamafy amin-dranomaso,

hijinja amin-kafaliana.

6 Mandeha izy, mandeha amim-pitomaniana,

mitondra sy mamafy ny voa famafiny.

Hiverina kosa izy manao hobin-kafaliana,

mitondra ny amboara avy amin’ny fijinjàny.

Fianteherana amin’Andriamanitra Mpitsimbina

1 Fihirana fiakarana. Nataon’i Salômôna.

Raha tsy i Iaveh no manorina ny trano,

miasa foana izay manorina azy.

Raha tsy i Iaveh no miambina ny tanàna,

miari-tory foana eo am-bavahadiny ny mpiambina.

2 Tsy misy vokany ny fifohazanareo mbola tsy mipoaka ny andro,

sy ny iaorianam-pandriana,

mihinana ny hanim-pahoriana.

Fa ny malalany dia omeny tsy latsaka izany eo am-patoriany fotsiny.

3 Indro fa lova avy amin’i Iaveh ny zanaka;

valisoa ny aloaky ny kibo miteraka.

4 Tahaka ny zana-tsipìka eo an-tanan’ny mpiady,

toy izany koa ny zanaky ny fahatanorana.

5 Sambatraizay mameno ny tranon-jana-tsipìkany amin’izany,

fa tsy ho menatra raha mifamaly amin’ny fahavalo eo am-bavahady.

Tso-drano ho an’ny mpino

1 Fihirana fiakarana.

Sambatra ny lehilahy matahotra an’i Iaveh,

izay mandeha amin’ny lalany.

2 Mihinana ny asan-tananao ianao amin’izany,

ka dia sambatra sy voky soa.

3 Ny vadinao manahaka ny voaloboka mahavanom-boa,

ao an-tokantranonao.

Ny zanakao manahaka ny zanak’ôliva

manodidina ny latabatrao.

4 Toy izany no hitahiana

ny lehilahy matahotra an’i Iaveh.

5 I Iaveh anie hanambina anao, avy ao Siôna!

Enga anie ka hahita an’i Jerosalema miadana tsara ianao,

amin’ny andro rehetra hiainanao!

6 Hahita ny zanaky ny zanakao anie ianao!

Ho amin’i Israely anie ny fiadanana!

Hanoherana ny fahavalon’i Siôna

1 Fihirana fiakarana.

Nampahoriny mafy, hatry ny fony mbola tanoraaho; –

– aoka i Israely hilaza izany! –

2 Nampahoriny mafy, hatry ny fony mbola tanora aho,

nefa tsy naharesy ahy izy ireo.

3 Nolahasainy ny lamosiko,

nosoritany vava asa lava ao.

4 Marina anefa i Iaveh,

ka notapahiny ny famatorananataon’ny ratsy fanahy.

5 Aoka ho menatra sy hiamboho eny,

izay rehetra mankahala an’i Siôna!

6 Aoka hanahaka ny ahitra an-tafon-tranoizy,

izay malazo alohan’ny hanongotana azy.

7 Ny mpijinja tsy mahafeno tanana amin’izany,

sy ny mpamehy amboara ny ampofoany.

8 Any ny mpandalo tsy mba manao hoe:

Ho aminareo anie ny fitahian’i Iaveh!

– Mitso-drano anareo amin’ny anaran’i Iaveh izahay.

Vavaka ao anatin’ny fahoriana

1 Fihirana fiakarana.

Ato ambody hantsanaaho no miantso anao, ry Iaveh,

Tompo ô, henoy ny feoko;

2 aoka ny sofinao anie hihaino

ny feon’ny fivavahako.

3 Raha mitana ny fahatsiarovana ny heloka Ianao, ry Iaveh,

iza no haharitra, Tompo ô?

4 Fa ao aminao ny famelan-keloka,

mba hanajan’ny olona Anao.

5 Manantena an’i Iaveh aho, manantena ny fanahiko,

ary miandry ny teniny aho.

6 Maniry ny Tompo ny fanahiko,

mihoatra noho ny anirian’ny mpiambina ny fipoahan’ny andro.

7 Apetraho amin’i Iaveh ny fitokianao, ry Israely,

fa ao amin’i Iaveh no misy ny famindram-po;

ao aminy no misy fanafahana mihoa-pampana.

8 Izy no hanavotra an’i Israely

amin’ny helony rehetra.