Category: Salamo

Fifonana

1 Ho an’ny mpampianatra hira. Salamo nataon’i Davida,

2 fony i Natàna mpaminany nankao aminy, nony efa nandeha tamin’i Betsabea izy.

3 Andriamanitra ô, mamindrà fo amiko,

araka ny fiantranao;

vonoy ny hadisoako, araka ny haben’ny famindram-ponao.

4 Sasao tanteraka aho amin’ny heloko,

ary diovy aho amin’ny fahotako.

5 Fa miaiky ny hadisoako aho,

ary eo anatrehako mandrakariva ny fahotako.

6 Taminao irery ihany no nanotako;

nanao izay ratsy eo imasonao aho,

mba ho hitan’ny olona

fa marina Ianao amin’ny teny fitsaranao.

7 Indro izaho teraka tamin’ny heloka;

ineny koa torontoronina ahy tamin’ny fahotana.

8 Indro anefa tianao mba ho ao anatin’ny fo ny fahitsiana;

dia ampahafantaro ahy, ato anatiko, ny fahendrena.

9 Diovy amin’ny hisopaaho, dia hadio;

sasao aho, dia ho fotsy noho ny oram-panala.

10 Ampandreneso fifaliana amam-piravoravoana aho,

dia hifaly ny taolako izay efa novakivakinao.

11 Afeno ny tavanao ny fahotako,

ary vonoy avokoa ny heloko.

12 Ry Andriamanitra ô, amorony fo madio aho;

ary fanahy mihenjana no havaozy ato anatiko,

13 aza ariana lavitra ny Tavanao aho;

aza esorina amiko ny Fanahinao Masina.

14 Ampodio ny fifaliana amin’ny famonjenao,

ary tohany amin’ny fananana fo mazoto aho.

15 Hampianariko ny lalànao, ry zareo mandika azy,

ka hiverina aminao indray ny mpanota.

16 Andriamanitra ô, ry Andriamanitry ny famonjena ahy,

afaho amin’ny ra nalatsaka aho,

dia hidera ny fahamarinanao ny vavako.

17 Tompo ô, sokafy ny molotro,

dia hidera ny fiderana Anao ny vavako.

18 Tsy sitrakao ny sorona, – fa homeko raha tianao izany;

tsy mahafaly Anao ny sorona dorana.

19 Fa fanahy torotoro no sorona ho an’Andriamanitra;

aza tebahinao, ry Andriamanitra, ny fo torotoro sy malahelo.

20 Manaova soa be ho an’i Siôna, araka ny hatsaram-ponao,

atsangano ny mandan’i Jerosalema.

21 Dia hankasitrahinao ny sorom-pahamarinana,

ny sorona dorana ary ny fanatitra lavorary;

ka dia hanaterana ombalahy eo ambonin’ny ôtelinao.

Fitsàran’ny matokitoky foana

1 Ho an’ny mpampianatra hira. Hira nataon’i Davida,

2 fony i Dôega, Edômita, tonga nilaza tamin’i Saola hoe: Nankany an-tranon’i Akimeleka i Davida.

3 Ahoana no mirehareha amin’ny haratsianao, ry ilay mahery!

– Maharitra mandrakizay ny hatsaram-pon’Andriamanitra!

4 Tsy misaina afa-tsy ny ratsy ny lelanao,

mova tsy ny antsy maranitra, ry mpihatsaravelatsihy!

5 Aleonao ny ratsy toy izay ny soa;

ny lainga, toy izay ny marina.

– Selà

6 Ny teny mamohehatra rehetra no tianao,

ry lela mpandainga!

7 ka indro Andriamanitra hanongana anao mandrakizay kosa;

hosamboriny sy hotsoahany avy eo an-dainaoianao,

dia hofongorany eo amin’ny tanin’ny velona.

– Selà

8 Hahita izany ny marina, dia hatahotra,

ka hihomehy azy hoe:

9 io no olona tsy nanao an’Andriamanitra ho mandany,

fa nitoky tamin’ny habetsahan’ny hareny,

sy nihambo tamin’ny haratsiany!

10 Fa izaho kosa dia toy ny ôliva maitso

ao an-tranon’Andriamanitra,

ny hatsaram-pon’Andriamanitra no itokiako mandrakizay doria.

11 Hidera Anao lalandava aho, fa nanao izany Ianao;

ary hanantena ny Anaranao aho, fa tsara Izy,

eo anatrehan’ny miraiki-po aminao.

Ny olona tsy misy an’Andriamanitra

1 Ho an’ny mpampianatra hira. Amin’ny feo mitaraina. Hiran’i Davida.

2 Ny adala manao anakampo hoe: «Tsy misy Andriamanitra!»

Efa simba izy ireo, nanao heloka vetaveta;

tsy misy manao ny tsara na dia iray aza.

3 Mijery ny zanak’olombelona eny an-tampon’ny lanitra, Andriamanitra.

Mba hahita raha misy olona manan-tsaina eny;

na misy olona mitady an’Andriamanitra.

4 Efa nania, efa tonga ratsy avokoa izy,

tsy misy iray akory manao ny tsara,

na dia iray monja ihany aza.

5 Moa tsy manana fahalalana va ry zareo mpanao ratsy?

fa ny vahoakako haniny toy ny fihinan-kanina;

izy ireo tsy miantso an’Andriamanitra akory.

6 Ho tera-kovitry ny tahotra tampoka izy ireo,

tsy misy anefa izay tokony hatahorany,

fa naelin’Andriamanitra ny taolan’izay nitoby hamely anao;

nampahamenatra azy ianao satria efa narian’Andriamanitra izy.

7 Enga anie ka hivoaka avy ao Siôna ny famonjena an’i Israely!

Amin’ny fampodian’Andriamanitra ireo lasan-ko babo amin’ny vahoakany,

dia hifaly i Jakôba, ary hiravoravo i Israely.

Fiantsoana ny fitsaràn’Andriamanitra

1 Ho an’ny mpampianatra hira. Ampiarahina amin’ny zava-maneno tendrena. Hiran’i Davida.

2 Fony ny Zifeanina tonga nilaza tamin’i Saola hoe: «Miery any aminay i Davida.»

3 Vonjeo aho, ry Andriamanitra, noho ny Anaranao,

ary omeo ny rariny aho, noho ny herinao.

4 Henoy ny fivavahako, ry Andriamanitra,

atongilano ny sofinao amin’ny teny aloaky ny vavako.

5 Fa misy olon-kafa firenena, mitsangan-kamely ahy;

misy olona mpanao an-keriny mitady ny aiko;

tsy manao an’Andriamanitra eo imasony izy.

– Selà

6 Indro, Andriamanitra no vonjiko,

ny Tompo no tohan’ny fanahiko.

7 Hanatsingerina ny ratsy amin’ny mpanohitra ahyizy.

Noho ny Fahamarinanao dia aoka haringanao izy.

8 Hanatitra sorona aminao, amin’ny foko rehetra aho;

Hidera ny Anaranao aho, ry Iaveh, fa tsara Izy.

9 Manafaka ahy amin’ny fahoriana rehetra Izy;

ary faly mijery ny fahavaloko ny masoko.

Vavaky ny enjehina

1 Ho an’ny mpampianatra hira. Ampiarahina amin’ny zava-maneno tendrena. Hiran’i Davida.

2 Henoy ny fivavahako, ry Andriamanitra,

aza iambohoanao ny fitarainako.

3 Henoy aho, ary valio koa!

Efa miriorio be ihany, mitoreo sy mitoloko aho,

4 noho ny fandrahonan’ny fahavalo

sy ny fampahorian’ny ratsy fanahy;

satria ampidirany loza aho,

ary enjehiny amim-pahatezerana.

5 Ka ny foko mangorohoro ato anatiko;

ny tahotra ny fahafatesana manindry ahy.

6 Ny hovitra amam-badi-po mamely ahy;

ny horohoro koa manarona ahy.

7 Ary hoy aho: Endrey! raha manana elatry ny voromahailala mantsy aho,

dia hanidina sy hipetraka amim-piadanana;

8 dia handositra lavitra dia lavitra aho,

ka honina any an’efitraany.

– Selà

9 Hitady fialofana faingana aho,

lavitra ny tafio-drivotra aman-dranonoram-baratra.

10 Tompo ô, aringano izy, ary akoroy ny fiteniny!

fa ao an-tanàna dia heriny sy ady no hitako;

11 Voahodidiny andro aman’alina ny mandany;

ny heloka sy ny fampahoriana no ao afovoany,

12 ny faharatsiana no ao anatiny;

tsy mandao ny kianjany ny famoretana amam-pitaka.

13 Fa tsy mba hoe fahavalo akory no manaratsy ahy;

raha izany dia zakako ihany;

tsy mba rafilahy no mitsangan-kamely ahy;

raha izany, hiery azy aho.

14 Fa ianao izay nataoko toy ny tenako;

mpanolo-tsaina tsy anafenana aman-tsakaizako.

15 Nifanerasera tamim-pifankazarana mamy isika;

niara-nandeha tamin’ny maro,

ho any an-tranon’Andriamanitra isika.

16 Aoka ho azon’ny fahafatesana tampoka izy ireo,

ka hidina velona any amin’ny Seoly!

Fa ao amin’ny fonenany, ao afovoan’izy ireo, ny hasomparana.

17 Izaho kosa, Andriamanitra no antsoiko,

ary i Iaveh no hamonjy ahy.

18 Hariva, maraina, am-pamatonan’andro, mitaraina aho,

mitoloko aho ka handre ny feoko Izy.

19 Hanafaka ny fanahiko amin’ny ady amelezany ahy,

ho amin’ny fiadanana, Izy,

fa maro ry zareo miady amiko.

20 Ho ren’Andriamanitra ka hanetry an’ireny Izy,

izay mipetraka mandrakizay ao amin’ny fiketrahany.

– Selà

Satria tsy misy fiovana ireny,

tsy manana ny tahotra an’Andriamanitra.

21 Maninji-tanana amin’izay mihavana aminy,

mamadika ny fanekeny.

22 Mamy hoatry ny ronono ny teny aloaky ny vavany,

nefa ady no ao am-pony.

Malemy noho ny diloilo ny teniny,

nefa lela sabatra miharihary.

23 Miankìna amin’i Iaveh fa hanohana anao Izy;

tsy havelany hangozohozo mandrakariva ny marina.

24 Ary Ianao, ry Andriamanitra, dia hampidina azy any an-davaka fahaverezana;

ireo olona mandatsa-dra sy mpamitaka,

tsy hahatratra ny antsasaky ny androny.

Fa ny amiko kosa, dia Ianao no ametrahako ny fitokiako.

Tsy hidaboka ny mitoky amin’Andriamanitra

1 Ho an’ny mpampianatra hira. Amin’ilay Voromahailala gina any an-tany lavitra. Hiran’i Davida. Fony izy nosamborin’ny Filistinina tany Geta.

2 Mamindrà fo amiko, ry Andriamanitra,

fa milofo mamely ahy ny olona,

miady amiko tontolo andro izy, sady manenjika ahy;

3 mamely ahy tontolo andro ny mpanohitra ahy,

maro izy ireo miandranandrana miady amiko.

4 Rehefa azon-tahotra aza aho, dia mitoky aminao.

5 Amin’ny fanampian’Andriamanitra

no iderako ny fahatanterahan’ny teniny.

Andriamanitra no itokiako, ka tsy matahotra na inona na inona aho:

Inona no ho efan’ny olona foana amiko?

6 Asiany sain-katezerana mandrakariva ny teniko;

ao amiko no ambentin-keviny rehetra hamerezany ahy.

7 Mioko izy, mametraka mpitsikilo izy, mitsikilo ny diako izy,

satria mikendry ny aiko.

8 He izany heloka mitambesatra aminy,

ka aiza no hahafahany indray?

Aringano amin’ny fahatezeranao ireo vahoaka ireo, ry Andriamanitra.

9 Efa voaisanao izay ny dia nirenireneko tamin’ny andro niainako,

efa voaangonao an-tsininao hoditra ny ranomasoko;

moa tsy efa voasoratra ao amin’ny bokinao ireny?

10 Ka dia hiamboho ny fahavaloko,

amin’ny andro iantsoako Anao;

fantatro izao, fa momba ahy Andriamanitra.

11 Amin’ny fanampian’Andriamanitra

no iderako ny fahatanterahan’ny teniny.

Amin’ny fanampian’i Iaveh

no iderako ny fahatanterahan’ny fampanantenany.

12 Andriamanitra no itokiako,

ka tsy matahotra na inona na inona aho.

Inona no ho efan’izay olona foana amiko?

13 Ny voady nataoko taminao, ry Andriamanitra, tsy maintsy hoefaiko;

hanatitra sorona fisaorana aminao aho.

14 Fa nanafaka ny fanahiko tamin’ny fahafatesana Ianao,

– moa va tsy niaro ny tongotro tsy ho solafaka? –

mba handehanako eo anatrehan’Andriamanitra amin’ny fahazavan’ny velona.

Hodidinina «liona»

1 Ho an’ny mpampianatra hira. Aza mandrava.Hiran’i Davida, fony izy nenjehin’i Saola, niery tao amin’ny zohy.

2 Mamindrà fo amiko Andriamanitra ô, mamindrà fo amiko,

fa ao aminao no itadiavan’ny fanahiko fiarovana,

amin’ny aloky ny elatrao no iafenako,

mandra-pahalasan’ny loza.

3 Mitaraina amin’Andriamanitra Avo indrindra aho,

ilay Andriamanitra izay manao ny zavatra rehetra ho ahy.

4 Haniraka famonjena avy any an-danitra ho ahy koa Izy;

– fanalam-baraka no atolotry ny mpanenjika ahy!

– Selà

Haniraka ny hatsaram-pony amam-pahamarinany Andriamanitra.

5 Mandry eo afovoan’ny liona aho,

dia ao afovoan’ny olona miloaka afo,

izay manana lefona aman-jana-tsipìka, ho solon’ny nify;

ary sabatra maranitra no lelany!

6 Misandratra any ambonin’ny lanitraIanao, Andriamanitra ô!

Hamirapiratra ambonin’ny tany rehetra anie ny voninahitrao!

7 Namela-pandrika teo alohan’ny diako izy;

efa nitanondrika sahady ny fanahiko;

efa nihady lavaka teo anoloako izy:

ny tenany ihany no latsaka tao!

– Selà

8 Tafaorina mafy ny foko, ry Andriamanitra,

tafaorina mafy ny foko;

hihira aho ary hampanakoako zava-maneno an-kafaliana.

9 Mifohaza ianao, ry voninahitro!

Mifohaza ianareo, ry valihako amana harpako!

Hampifoha ny maraina aho!

10 Hidera Anao eo amin’ny vahoaka aho, ry Tompo,

hankalaza Anao eo amin’ny firenena aho.

11 Fa mahatakatra ny lanitra ny tsy fivadihanao,

ary mihatra amin’ny rahona ny fahamarinanao.

12 Misandrata any ambonin’ny lanitra Ianao, ry Andriamanitra,

hamirapiratra ambonin’ny tany rehetra anie ny voninahitrao!

Ilay hitsara ny mpitsara eto an-tany

1 Ho an’ny mpampianatra hira. Aza mandrava. Hiran’i Davida.

2 Ny tsy fitenenana va no amoahanareo fitsarana?

Araka ny rariny va no itsaranareo, ry zanak’olombelona?

3 Tsia, mamorona hevi-dratsy ao am-ponareo ianareo,

amidinareo an-danjanyeo amin’ny tany ny fanaovan’ny tananareo an-keriny.

4 Simba hatrany am-bohoka ny ratsy fanahy,

mania hatramin’ny fony vao teraka ny fandainga.

5 Manahaka ny poizin’ny menarana ny poizina aminy,

dia ny an’ny menarana marenina, izay manentsin-tadìny,

6 ka tsy mihaino izay feon’ny mpahavariana azy,

ny feon’ny mpanasondriana izay kinga amin’ny fahaiza-manasondriana.

7 Andriamanitra ô, torotoroy ny nifiny ao am-bavany;

ry Iaveh ô, omboty ny valanoranon’ireo liona tanora!

8 Aoka ho tonga foana toy ny riaka mandalo!

Raha mametraka zana-tsipìka, dia aoka ho dombo, izy ireo!

9 Aoka hanahaka ny lelosy izay miempo eo am-pandehanana!

Aoka tsy hahita masoandro toa zaza vaky manta ireo!

10 Raha mbola tsy maimbo tsilo akory ny vilaninareo,

dia hindaosin’ny oram-baratra ireny, na ny lena na ny maina.

11 Hifaly amin’ny fahitana ny famaliana, ny marina;

handro tongotra amin’ny ran’ny ratsy fanahyizy.

12 Ka dia hiteny hoe ny olona: «Eny misy valiny tokoa ho an’ny marina,

misy tokoa Andriamanitra izay mitsara etỳ ambonin’ny tany.»

Lanio harena ny ratsy fanahy

1 Ho an’ny mpampianatra hira. Aza mandrava. Hiran’i Davida. Fony i Saola naniraka hiambina ny tranony, hamonoany azy.

2 Afaho amin’ny fahavaloko aho, Andriamanitra ô,

arovy tsy ho azon’ireo mpanohitra ahy aho!

3 Afaho amin-dry zareo mpanao ratsy aho,

ary vonjeo tsy ho azon’ny olona mpandatsa-dra.

4 Fa indro izy manotrika hanala ny aiko;

olona mpanao an-keriny no miray tetika hamely ahy;

na dia tsy meloka aza aho, na dia tsy nanota aza aho, ry Iaveh,

5 na dia manan-tsiny aza aho, dia mirohotra hanotrika izy ireo.

Mifohaza, avia hitsena ahy, sy hijery.

6 Ianao, ry Iaveh, Andriamanitry ny tafika, Andriamanitr’i Israely,

mitsangàna Ianao, hamay ny firenena rehetra,

ka tsy ananana antra akory ireny mpamadika sy mpanao ratsy!

– Selà

7 Miverina izy ny hariva dia manerona toy ny amboa

mandeha manodidina ny tanàna.

8 Fanalikàna no mibasasaka avy ao am-bavany;

sabatra no eo amin’ny molony:

Iza moa no handre? hoy izy.

9 Fa Ianao kosa, ry Iaveh, mihomehy azy ireo,

mananihany ny firenena rehetra.

10 Ry Heriko ô, dia hitodika any aminao aho,

fa Andriamanitra no trano mimandako.

11 Ho avy mialoha ahy ilay Andriamanitra manambina ahy,

hampibanjina ahy ny fahavaloko Izy.

12 Aza vonoina ireny, fandrao hadinon’ny vahoakako,

fa ampirenireneo amin’ny herinao izy, dia haongano,

ry Tompo, ampinganay!

13 Manota ny vavany, isaky ny miteny ny molony;

aoka ho voasingotry ny reharehany ny tenany,

noho ny ozona aman-dainga tononiny!

14 Aringano amin’ny hatezeranao izy, aringano tsy ho eo intsony ireny.

Aoka ho fantany fa Andriamanitra no manjaka eo amin’i Jakôba

hatrany amin’ny faran’ny tany.

– Selà

15 Miverina izy ny hariva, dia mierona toy ny amboa

mandeha manodidina ny tanàna.

16 Mirenireny atsỳ arỳ, mitady ny rembiny,

mitrontròna izy raha tsy voky.

17 Fa izaho kosa hihira ny herinao,

ary hankalaza ny hatsaram-ponao, nony maraina;

satria Trano mimandako Ianao,

sy Fialofako amin’ny andro fahoriako.

18 Ry Heriko ô, hihira ho an’ny voninahitrao aho,

fa Trano mimandako Andriamanitra,

ilay Andriamanitra manambina ahy.

Vavaky ny firenena nony resy

1 Ho an’ny mpampianatra hira. Amin’ny Lisin’ny vavolombelona.Hira nataon’i Davida, hampianarina.

2 Fony izy niady tamin’ny Sirianinaany Mesôpôtamia sy ny Sirianina any Sobà; sy tamin’ny niverenan’i Jôaba avy namely ny Edômita, tao amin’ny Lohasahan-tSira, ka nahafatesany roa arivo sy iray alin-dahy.

3 Ry Andriamanitra ô, nanary anay Ianao, nampihahaka anay,

efa tezitra Ianao: ataovy mahita fitia aminao indray izahay.

4 Efa nampihorohoro ny tany Ianao, nandrotika azy,

dia amboary ny banga aminy fa mihozongozona izy.

5 Nasianao fizahan-toetra sarotra ny vahoakanao,

nampisotroinao divay mahafanina izahay.

6 Kanefa nomenao faneva ireo matahotra Anao,

hitsanganan’io noho ny fahamarinanao. –

– Selà

7 Mba hahafahan’ny malalanao

dia vonjeo amin’ny tananao ankavanana ary henoy ny hatako.

8 Andriamanitra niteny tamin’ny fahamasinana hoe:

«Hientan-kafaliana aho!

Hanana an’i Sikema ho anjarako aho,

horefesiko ny lohasahan’i Sokôta.

9 Ahy i Galaada, ahy i Manase.

Fiadiana aron’ny lohako i Efraima

ary tehim-panjakako i Jodà.

10 Tavin-drano fandroako i Moaba;

anipazako ny kapako i Edôma;

Mihobia ny voninahitro, ry tanin’i Filistinina!»

11 Iza no hitondra ahy ho any amin’ny tanàna mimanda?

Iza no hitarika ahy ho any Edôma?

12 Tsy Ianao izay efa nanary ahy va, ry Andriamanitra,

Ianao, ry Andriamanitra izay efa tsy niara-nivoaka tamin’ny tafikay intsony.

13 Vonjeo amin’ny mpampahory anay izahy!

Fa zava-poana ny famonjena avy amin’ny olombelona.

14 Raha omban’Andriamanitra isika dia herim-po no hasehontsika;

hanorotoro ny fahavalontsika Izy.