Category: Salamo

Eo amin’ny fankalazana ny trano lay, tabernakla

1 Ho an’ny mpampianatra hira. Amin’ny Gitianina. Nataon’i Asafa.

2 Manaova hira fifaliana ho fankalazana an’Andriamanitra herintsika.

Manaova hobim-pifaliana ho fankalazana ny Andriamanitr’i Jakôba!

3 Miventesa hira arahim-peon’ny ampogatapaka,

sy harpa mireondreona mbamin’ny valiha.

4 Tsofy ny anjomara amin’ny tsinam-bolana,

amin’ny andro fenomanana, amin’ny andro fetintsika.

5 Fa didy ho an’i Israely izany;

fitsipika avy amin’ny Andriamanitr’i Jakôba.

6 Nataony lalàna ho an’i Josefa

fony izy nandeha namely ny tany Ejipta.

Mandre feo tsy fantatroaho:

7 Nanala entana ny sorony aho,

dia nitsahatra tsy nitondra sobika, ny tanany.

8 Niantso tao anatin’ny fahoriana ianao dia novonjeko,

namaly anao tao anatin’ny rahona mitondra ranonoram-baratra Aho,

nizaha toetra anao, tao amin’ny ranon’i MeribàAho.

– Selà

9 Mihainoa, ry vahoakako, fa misy fananarana hataoko anao;

enga anie ka hihaino ahy ianao, ry Israely.

10 Aza misy andriamani-kafa eo aminao,

aza mivavaka amin’ny andriamanitry ny vahoaka hafa.

11 Izaho, Iaveh, Andriamanitrao,

no nitondra anao niakatra avy any an-tany Ejipta,

sokafy ny vavanao dia hofenoiko.

12 Kanjo tsy nihaino ny feoko ny vahoakako,

tsy nakatò Ahy i Israely.

13 Ka navelako izy hanaraka ny ditran’ny fony

dia nanaraka izay saim-pantany izy.

14 Eh! raha mba mihaino ny foeko ny vahoakako,

raha mba mandeha amin’ny lalako i Israely!…

15 Dia hokorokoroiko vetivety foana ny fahavalony,

hafotitro hamely ny mpampahory azy ny tanako.

16 Hidera azy ry zareo mankahala an’i Iaveh,

ary ho azo antoka mandrakizay, ny faharetan’i Israely.

17 Vary tsara indrindra no hamelomako azy,

ary tantely avy amin’ny vatolampy no hamokisako azy.

Hanoherana an’ireo mpitsara tsy marina

1 Fihirana nataon’i Asafa.

Eo amin’ny fiangonan’ny Tsitoha, Andriamanitra;

namoaka ny teniny eo afovoan’ireo andriamanitra izy:

2 Mandra-pahoviana no hanaovanareo fitsarana tsy marina?

3 Omeo ny rariny ny mahantra sy ny kamboty,

omeo ny hitsiny ny ory sy ny malahelo.

4 Vonjeo ny fadiranovana sy ny tsy manana,

afaho amin’ny tanan’ny ratsy fanahy izy.

5 Tsy manam-pahaizana na hazavan-tsaina ireny,

fa mandeha amin’ny maizina;

mihorohoro ny fanambanin’ny tanyrehetra.

6 Hoy aho: «andriamanitra ianareo,

zanaky ny Avo indrindra avokoa ianareo.»

7 Kanefa ho faty tahaka ny olona ihany ianareo;

ho lavo tahaka izay andriandahy na iza na iza.

8 Mitsangàna, ry Andriamanitra ô, tsarao ny tany,

fa Anao ny firenena rehetra.

Hanoherana an’ireo fahavalon’i Israely

1 Fihirana. Salamon’i Asafa.

2 Ry Andriamanitra ô, aza dia mijanom-potsiny;

aza mangina na mitsahatra, ry Andriamanitra!

3 Fa indreto mikofokofoka amim-pitabatabana ny fahavalonao,

misolanandrana erỳ izay mankahala Anao.

4 Mamoron-tsaina hamandrihana ny vahoakanao izy,

miara-mioko hamely ny olona arovanao.

5 Andao, hoy izy, hofongorantsika eo amin’ny firenena izy ireo,

ka aoka tsy hotononina intsony ny anarana hoe Israely.

6 Miray fo avokoa izy rehetra mioko,

manao fanekena hanohitra Anao izy,

7 dia ny lain’ny Edôma sy ny Ismaelita,

i Moaba sy ny Agarenianina,

8 i Gebala, i Amôna ary i Amaleka,

ny Filistinina mbamin’ny mponina any Tira;

9 I Asora koa mikambana amin’izy ireo,

ka manampy ny taranak’i Lôta.

– Selà

10 Ataovy tahaka an’i Madiànaireo,

tahaka an’i Sisarà, mbamin’i Jabìna teo amin’ny ranon’i Sisôna.

11 Ripaka tao Andôra izy,

ka tonga zeziky ny tany.

12 Ataovy tahaka an’i Oreba sy i Zeba ny lehiben’izy ireo,

ary tahaka an’i Zebea sy i Salmanà ny andriandahy rehetra aminy.

13 Fa hoy izy: «Aoka halaintsika ho antsika,

ireo fonenan’Andriamanitra!»

14 Ry Andriamanitra ô, ataovy tahaka ny tadio ireo,

tahaka ny mololo entin’ny rivotra!

15 Tahaka ny afo mandevona ny ala,

tahaka ny lelafo mampirehitra ny tendrombohitra;

16 tahaka izany no anenjeho azy amin’ny tadionao;

ampitahory azy amin’ny tafio-drivotrao.

17 Ataovy safo-kenatra ny tavany,

mba hitadiavany ny Anaranao, ry Iaveh!

18 Aoka izy ho menatra sy ho raiki-tahotra mandrakizay,

sy hangaihay ary ho azon’ny fandringanana.

19 Aoka ho fantany fa Ianao – dia Iaveh no Anaranao, –

Ianao ihany no ilay Avo indrindra ambonin’ny tany rehetra!

Hira fivahiniana masina

1 Ho an’ny mpampianatra hira. Amin’ny Gitiena. Salamon’ny zanak’i Kôre.

2 Mahatehotia loatra ny fonenanao,

Ry Iavehn’ny tafika!

3 Trotraka ny fanahiko misento, manina ny kianjan’i Iaveh;

mientana ho amin’Andriamanitra velona, ny foko sy ny nofoko.

4 Ny fody aza, mahita fonenana,

ny sindintsidina koa mahita akany hametrahany ny zanany;

ny ôtelinao, ry Iavehn’ny tafika,

ry mpanjakako sy Andriamanitro!

5 Sambatra izay monina ao an-tranonao!

Mbola mahazo midera Anao izy ireo!

– Selà

6 Sambatra izay olona manana ny heriny ao aminao;

tsy mihevitra afa-tsy ny fiakarana masinaizy.

7 Raha mamaky ny lohasahan-dranomaso izy,

ovany ho fitoerana feno loharano izany,

ary ny ranonoram-pararano mandrotsaka fanambinana aminy.

8 Mitombo hery eny am-pandehanana izy,

ary miseho eo anatrehan’Andriamanitra any Siôna:

9 Iaveh, Andriamanitry ny tafika ô, hoy izy, henoy ny fivavahako,

mandrenesa, ry Andriamanitr’i Jakôba!

– Selà

10 Ianao izay ampinganay, ry Andriamanitra, mba jereo,

ka tsinjovy ny tavan’ilay Voahosotrao!

11 Fa aleo andro iray ao an-kianjanao, toy izay arivo;

aleoko mitoetra eo an-tokonam-baravaran’ny tranon’ny Andriamanitro,

toy izay monina ao an-dain’ny ratsy fanahy.

12 Fa masoandro aman’ampinga, i Iaveh Andriamanitra;

manome fahasoavana amam-boninahitra i Iaveh,

tsy misy zava-tsoa tsy omeny an’izay mandeha amin’ny tsy fananan-tsiny.

13 Ry Iavehn’ny tafika,

sambatra izay olona mitoky aminao!

Vavaka fangatahana fandriam-pahalemana

1 Ho an’ny mpampianatra hira. Salamon’ny zanak’i Kôre.

2 Ry Iaveh ô, efa nanambina ny taninao Ianao,

nampody ireo voababo teo amin’i Jakôba;

3 namela ny heloky ny vahoakanao,

nanarona ny fahotany rehetra;

– Selà

4 najanonao ny hatezeranao rehetra,

nalanao ny hatezeranao mirehitra.

5 Ampodio indray amin’ny toetranay taloha izahay,

ry Andriamanitry ny famonjena anay ô;

atsaharo ny hatezeranao aminay.

6 Dia ho tezitra mandrakizay aminay va Ianao?

dia hampaharetinao mandrakizay va ny haviniranao?

7 Tsy hovelominao indray va izahay,

mba hifalian’ny vahoakanao aminao?

8 Ry Iaveh, asehoy anay ny hatsaram-ponao,

ary omeo anay ny famonjenao.

9 Te hihaino izay holazain’i Iaveh Andriamanitra aho,

– fa manana teny fiadanana ho an’ny vahoakany sy ny mpino Azy Izy,

raha tahiny tsy miverina amin’ny fahadalany indray izy ireo. –

10 Eny, akaiky an’izay matahotra Azy ny famonjeny,

ary hitoetra amin’ny tanintsika indray ny voninahitra.

11 Efa hihaona ny hatsaram-po sy ny fahamarinana,

hifandray tanana ny rariny sy ny fihavanana.

12 Hitsimoka amin’ny tany, ny fahamarinana,

ary hitsinjo ny rariny any ambonin’ny lanitra.

13 Tenan’i Iaveh no hanome ny soa rehetra

ka hahavokatra ny vokany ny tanintsika.

14 Handeha eo alohany ny rariny,

sy hanoritra lalana hodiaviny.

Vavaka raha tojo fitsapana

1 Vavak’i Davida.

Mandrenesa, ry Iaveh, ekeo vavaka aho,

fa ory sy mahantra aho.

2 Arovy ny fanahiko, fa tia vavaka aho,

vonjeo ny mpanomponao, ry Andriamanitro ô;

fa Ianao no ametrahany ny fitokiany!

3 Mamindrà fo amiko, ry Tompo ô,

fa mitaraina aminao, manontolo andro, aho!

4 Ampifalio ny fanahin’ny mpanomponao,

fa any aminao, Tompo, no anondrotako ny fanahiko.

5 Satria tsara fo sy miantra Ianao, Tompo,

ary feno indrafo ho an’izay rehetra miantso Anao.

6 Ry Iaveh, atongilano ny sofinao amin’ny fivavahako,

henoy tsara ny feon’ny fitarainako.

7 Miantso Anao amin’ny andron’ny fahoriako, aho,

ka hamaly vavaka ahy, Ianao.

8 Tsy misy toa Anao eo amin’ireo andriamanitra,

tsy misy mahatakatra ny asanao, ry Tompo.

9 Ho avy ny firenena rehetra nataonao,

hiankohoka eo anatrehanao, Tompo,

ka hanome voninahitra ny Anaranao.

10 Fa lehibe sy mahavita fahagagana Ianao,

Ianao irery no Andriamanitra.

11 Ampianaro ny lalànao aho, ry Iaveh;

fa te-handeha amin’ny fahitsianao!

Araiketo amin’ny fahatahorana Anao ny foko.

12 Hidera Anao amin’ny foko rehetra aho, ry Tompo Andriamanitra ô,

ary hanome voninahitra ny Anaranao mandrakizay.

13 Fa lehibe ny hatsaram-ponao amiko,

notsoahanao tany amin’ny Seoly ny fanahiko.

14 Andriamanitra ô, mitsangan-kamely ahy ny mpiavonavona,

mitady ny aiko ny antokon’olona mpanao an-keriny,

ka tsy asiany raharaha akory Ianao.

15 Fa Ianao kosa, Tompo ô, dia Andriamanitra mamindra fo sy miantra,

mahari-po sy be indrafo amam-pahamarinana.

16 Mitodiha atỳ amiko, ka amindrao fo aho;

omeo ny herinao ny mpanomponao;

ary vonjeo ny zanaky ny ankizivavinao.

17 Aharihario ny indrafonao amiko,

ka hahita izany ny fahavaloko, dia ho menatra!

Fa Ianao, ry Iaveh, no mamonjy sy mampionona ahy.

I Siôna renin’ny vahoaka

1 Salamon’ny zanak’i Kôre. Fihirana.

Nanorina azy teo an-tendrombohitra masina Izy.

2 Ny vavahadin’i Siônadia tian’i Iaveh,

mihoatra noho ny fonenan’i Jakôba rehetra.

3 Zava-malaza maro no voatantara momba Anao,

ry tanànan’Andriamanitra.

– Selà

4 Amin’ireo mahalala ahy hotononiko i Rahabasy i Babilôna;

indreo koa ny Filistinina sy i Tira mbamin’i Etiôpia:

tao ireo no teraka.

5 Ary izao no hilazan’ny olona an’i Siôna: «Samy teraka tao aminy ity sy irỳ:

dia Izy, ny Avo indrindra, no nanorina azy.»

6 Izao no hosoratan’i Iaveh amin’ny fanisam-bahoaka:

Teraka tao ity.

– Selà

7 Ny mpihira sy mpitendry zava-maneno, hanao hoe:

«Ao aminao ny loharanoko rehetra.»

Vavaka anatin’ny fijaliana lalina

1 Fihirana. Salamon’ny zanak’i Kôre. Ho an’ny mpampianatra hira. Hiraina amin’ny feo mitaraina. Fihiranan’i Hemàna, Ezrahita.

2 Ry Iaveh, Andriamanitry ny famonjena ahy ô,

raha mitaraina eo anatrehanao amin’ny alina aho,

3 aoka ho tonga eo anatrehanao ny fivavahako,

henoy ny fitarainako!

4 Fa vontom-pahoriana ny fanahiko,

ary mipaka amin’ny Seoly ny aiko.

5 Natao anisan’izay midina any an-davaka aho,

tahaka ny olona efa lany hery.

6 Tahaka ny nafoy eny amin’ny maty aho,

tahaka ny faty miampatra ao am-pasana,

izay efa tsy tsaroana intsony,

sy efa voaesotra eo an-tananao!

7 Natsipinaoho ao amin’ny vodilavaka aho,

anatin’ny haizina sy ny hantsana.

8 Manindry ahy ny hatezeranao,

azeranao amiko ny alon-dranonao rehetra.

– Selà

9 Nampanalavirinao ahy ny sakaizako;

nataonao zavatra fankahalan’izy ireo aho.

Voahiboka tsy afa-mivoaka aho.

10 Mihavelona azon’ny fijaliana ny masoko.

Miantso Anao tontolo andro aho, ry Iaveh ô,

manandra-tanana aminao aho.

11 Ny maty vano hanaovanao fahagagana;

sa ny ambiroano hitsangan-kidera Anao?

– Selà

12 Hotorina any am-pasana va ny hatsaram-ponao,

ary any amin’ny hantsana, ny fahamarinanao?

13 Ho fantatra any amin’ny tanin’ny haizina va ny fahagaganao,

ary any amin’ny tany fanadinovana, ny fahamarinanao?

14 Indro aho mitaraina aminao, ry Iaveh ô.

Vao maraina dia efa miroso ho eo anatrehanao ny fivavahako.

15 Ry Iaveh ô, nahoana no manary ny fanahiko Ianao,

sy manafina ny Tavanao amiko?

16 Ory sy efa ho faty hatramin’ny fahatanorako aho,

tsy fantatro izay hataoko, itambesaran’ny fampitahoranao.

17 Ny hatezeranao manafotra ahy,

ny fampitahoranao mandreraka ahy.

18 Tahaka ny rano tondraka,

dia manodidina ahy tontolo andro izany,

miara-mitangorona amiko avokoa izany.

19 Nampanalavirinao ahy ny havana aman-tsakaizako;

ny haizina ao am-pasana no namako.

Antsa sy Vavaka amin’Andriamanitra mahatoky

1 Fihirana nataon’i Etàna, Ezrahita.

2 Te hihira mandrakizay ny hatsaram-pon’i Iaveh aho:

hanambara ny fahamarinanao amin’ny taranaka rehetra, ny vavako.

3 Fa hoy aho: «Ny hatsaram-po no tranobe soa mandrakizay;

naorinao any an-danitra ny fahamarinanao.

4 Efa nanao fanekena tamin’ilay nofidikoAho;

fianianana efa nataoko tamin’i Davida mpanompoko,

5 fa te hampiorina mafy mandrakizay ny taranakao Aho,

sy hanamafy ny seza fiandriananao, hatramin’ny taranaka rehetra.»

– Selà

6 Ry Iaveh, ny lanitra mankalaza ny fahagagana ataonao,

mbamin’ny fahamarinanao eo amin’ny fiangonan’ny olona masina.

7 Fa iza any an-danitra no hitaha amin’i Iaveh?

Iza amin’ireo zanak’Andriamanitra no manahaka an’i Iaveh?

8 Mahatahotra Andriamanitra eo amin’ny fiangonam-ben’ny olo-masina,

mahatahotra ho an’ireo rehetra manotrona Azy Izy.

9 Ry Iaveh, Andriamanitry ny tafika, iza no tahaka Anao?

Mahery Ianao, Iaveh, ary manodidina Anao ny fahamarinanao.

10 Ianao no mamolaka ny fianjonanjonan’ny ranomasina;

Ianao no mampitony azy raha misamboaravoara ny onjany.

11 Ianao no nanorotoro an-dRahabatoy ny faty;

sy nampiely ny fahavalonao, tamin’ny herin-tsandrinao.

12 Anao ny lanitra, Anao koa ny tany;

ny tany sy izay rehetra ao aminy, Ianao no nanorina azy.

13 Ny atsimo sy avaratra, Ianao no nahary azy.

Tabôra sy Hermônaindray mientana amin’ny Anaranao.

14 Ary fitaovana hiady ny sandrinao, dia ny heriny,

mahery ny tananao, avo ny tananao ankavanana.

15 Ny rariny sy ny hitsiny no hiorenan’ny seza fiandriananao,

ny famindram-po sy fahamarinana no eo anatrehan’ny Tavanao.

16 Sambatra ny vahoaka mahalala ny hobin-kafaliana,

sy mandeha amin’ny fahazavan’ny Tavanao, ry Iaveh!

17 Mifaly mandrakariva amin’ny Anaranao izy;

ary misandratra amin’ny fahamarinanao.

18 Fa Ianao no voninahiny amam-pahefany,

ary ny fanambinanao manondrotra ny herinay.

19 Satria avy amin’i Iaveh ny ampinganay;

ary avy amin’ilay Masin’i Israely ny mpanjakanay.

20 Fahiny Ianao niteny tamin’ny malalanao, tamin’ny fahitana nanao hoe:

«Izaho namonjy fanampiana ny mahery anankiray;

nanandratra zatovolahyanankiray avy eo afovoan’ny vahoaka;

21 nahita an’i Davida mpanompoko;

nanosotra azy tamin’ny diloilo masina.

22 Homba azy lalandava ny tanako;

ary hankahery azy ny sandriko.

23 Tsy hotampohin’ny fahavalo izy;

ary tsy haharesy azy ny zanaky ny tsy fahamarinana.

24 Izaho hanorotorony mpanohitra azy eo anatrehany;

sy hamely an’izay mankahala azy.

25 Homba azy ny fahamarinako aman-katsaram-poko;

ary ny Anarako no hitomboan’ny heriny.

26 Hahatrako amin’ny ranomasina ny tanany;

ary amin’ny ony ny tanany ankavanana.

27 Izy hiantso Ahy hoe: Ianao no raiko,

sy Andriamanitro ary vatolampy famonjena ahy.

28 Ary Izaho kosa hanao azy ho lahy matoa,

ambony indrindra amin’ny mpanjakan’ny tany.

29 Hitahiry ny hatsaram-poko aminy mandrakizay Aho;

ary ny fanekeko aminy tsy hivadihana.

30 Hampitoeriko haharitra mandrakizay ny taranany;

ary ny seza fiandrianany haharitra toy ny andron’ny lanitra.

31 Raha mahafoy ny lalàko ny taranany,

ka tsy mandeha araka ny fitsipiko;

32 raha mandika ny teniko izy,

ka tsy mitandrina ny didiko,

33 dia hosaziko amin’ny tsora-kazo ny fahadisoany,

ary amin’ny kapoka ny helony;

34 fa tsy hesoriko aminy ny hatsaram-poko,

ary tsy hampandainga ny toky nomeko azy Aho.

35 Tsy handika ny fanekeko Aho,

ary tsy hanova ny teny naloaky ny vavako.

36 Efa nianianako indray mandeha tamin’ny fahamasinako,

ka tsy handainga amin’i Davida Aho.

37 Haharitra mandrakizay ny taranany,

ho tahaka ny masoandro eo anoloako ny seza fiandrianany;

38 tahaka ny volana izy dia tafaorina ho mandrakizay,

ary mahatoky ny vavolombelona eny amin’ny lanitra.»

– Selà

39 Kanjo narianao sy tsy nasianao raharaha,

ary notezeranao ilay Voahosotrao!

40 Nahatofoka Anao ny fanekena tamin’ny mpanomponao,

natsipinao amin’ny tany ny satroboninahiny efa voatevateva.

41 Nazeranao ny mandany rehetra,

noravanao ny trano mimandany.

42 Izay mandalo mamabo azy avokoa,

tonga fandàtsan’ny mpiray monina aminy izy.

43 Fa nasandratrao kosa ny tanana ankavanan’ny mpampahory azy,

nampifalinao ny fahavalony rehetra.

44 Nalefitrao hihodina ny lela-tsabany,

ary tsy nanohana azy tamin’ny ady Ianao.

45 Nendahanao ny voninahiny,

ary nazeranao amin’ny tany ny seza fiandrianany.

46 Nohafohezinao ny andron’ny fahatanorany,

ary nosaforanao henatra izy.

– Selà

47 Mandra-pahoviana, ry Iaveh, no hierenao lalandava?

sy hirehitra hoatry ny afo ny hatezeranao?

48 Tsarovy ny hafohezan’ny andro iainako,

sy ny zavatra tsinontsinona naharianao ny zanak’olombelona!

49 Iza moa no velona tsy hahita fahafatesana,

ary zovy no hahafaka ny fanahiny amin’ny herin’ny Seoly?

– Selà

50 Aiza ny hatsaram-ponao fahiny, Tompo ô,

izay nianiananao tamin’i Davida, tamin’ny fahamarinanao?

51 Tsarovy, Tompo, ity latsa manjò ny mpanomponao,

fa mitondra ato amin’ny tratrako ny faniratsiràn’ny firenena aho;

52 dia ny faniratsiràn’ny fahavalonao, ry Iaveh,

faniratsirana nanoherany ny dia nandrosoan’ny Voahosotrao.

53 Hisaorana mandrakizay anie i Iaveh!

Amen! Amen!

Malia ny olombelona

1 Vavak’i Môizy, olon’Andriamanitra.

Tompo ô, Ianao no aronay amin’ny taona rehetra mifandimby.

2 Talohan’ny namoronanao ny tendrombohitra,

sy niterahanao ny tany sy izao rehetra izao:

dia efa nisy mandrakizay ka ho mandrakizay Ianao, ry Andriamanitra!

3 Mampanjary ny olombelona ho vovoka Ianao,

ka manao hoe: «Miverena, ry zanak’olombelona!»

4 Fa eo imasonao, ny arivo taona,

dia tahaka ny andro omaly, raha mandalo izy,

ary tahaka ny fiambenana iray amin’ny alina.

5 Manindrona azy toy ny nofy Ianao;

ny maraina, mitsimoka indray izy, toy ny ahitra;

6 mamòny sy maniry izy ny maraina;

fa malazo sy maina ny hariva.

7 Toy izany no andevonan’ny fahatezeranao anay,

sy ampitahoran’ny fahaviniranao anay,

8 apetrakao eo anoloanao ny helokay;

ary eo amin’ny fahazavan’ny Tavanao, ny fahadisoanay takona.

9 Azon’ny hatezeranao, dia foana avokoa ny andronay rehetra,

hitanay mihelina toy ny feo malemy, ny taonanay.

10 Mahatratra ny fitopolo taona no andronay,

valopolo taona no fara fahabetsahany;

nefa hasasarana sy fahoriana foana ny voninahiny,

fa mihelina faingana izy, dia lasa manidina izahay!

11 Zovy no mahafantatra ny herin’ny fahatezeranao,

ary ny fahaviniranao, araka ny fahatahorana mendrika hatao Anao?

12 Ampianaro hanisa tsara ny andronay izahay,

mba hahazoanay fo hendry.

13 Miverena, ry Iaveh, mandra-pahoviana no?…

Mamindrà fo amin’ny mpanomponao!

14 Vokiso ny hatsaram-ponao izahay, ny maraina,

dia hifaly sy hiravoravo, amin’ny andronay rehetra.

15 Ampifalio araka ny andro nampahorianao anay izahay,

sy araka ny taona nahitanay loza.

16 Aoka hiharihary amin’ny mpanomponao ny asanao,

mbamin’ny voninahitrao, ho an’ny taranany!

17 Ho aminay anie ny fanambinan’i Iaveh, Andriamanitray!

Hamafiso aminay ny asan’ny tananay;

eny, hamafiso ny asan’ny tananay!