Categories
Lioka

Lioka 22

Tetika hamelezana an’i Jesoa ary famadihan’i Jodasy

1 Efa mby akaiky ny fetin’ny Azima atao hoe Paka,

2 ary ny lohandohan’ny mpisorona sy ny mpanora-dalàna dia nikaroka izay hevitra hamonoana an’i Jesoa, fa natahotra ny vahoaka izy ireo.

3 Nidiran’i Satana kosa i Jodasy, ilay atao hoe IsKariota, anisan’ny roa ambin’ny folo lahy,

4 ka lasa izy nankany amin’ny lohandohan’ny mpisorona sy ny manam-pahefana niraharaha ny amin’izay hanolorany Azy amin’izy ireo.

5 Dia faly izy ireo ka nanaiky hanome vola azy.

6 Ary nanaiky izy ka nikendry izay fotoana tsy hisy olona, hanolorany Azy.

Fanomanana ny sakafo Paka

7 Dia tonga ny andron’ny Azima izay tsy maintsy hamonoana ny zanak’ondrin’ny Paka,

8 ka naniraka an’i Piera sy i Joany i Jesoa nanao hoe: «Mandehana manamboatra ny Paka hohanintsika.»

9 «Aiza no tianao hanamboaranay azy?» hoy ireo.

10 Dia hoy Izy taminy: «Indro, rehefa miditra ao an-tanàna ianareo, dia hifanena amin’ny lehilahy anankiray mitondra siny feno rano, ka manaraha azy any amin’izay trano hidirany,

11 dia lazao amin’ny tompon-trano hoe: ‹Izao no asain’ny Mpampianatra lazaina aminao: Aiza ny efitrano hihinanako ny Paka miaraka amin’ny mpianatro?›

12 Dia hotoroany efitrano malalaka àry fanaka ianareo, ka ao no amboary izay ilaina.»

13 Dia nandeha izy ireo ka nahita araka izay nolazainy taminy, ary nanamboatra ny Paka.

Ny sakafo Paka

14 Nony tonga ny fotoana, dia nipetraka hihinana Izy sy ny Apôstôly roa ambin’ny folo lahy.

15 Ary hoy Izy tamin’izy ireo: «Naniry dia naniry hiara-mihinana ity Paka ity aminareo Aho alohan’ny hijaliako,

16 fa lazaiko aminareo fa tsy mba hihinana azy intsony aho mandra-pahatanteranyany amin’ny fanjakan’Andriamanitra.»

17 Dia nandray kalisyIzy ka nisaotra, ary nanao hoe: «Raiso ity, ka zarao aminareo;

18 fa lazaiko aminareo fa hatramin’izao dia tsy hisotro ny vokatry ny voaloboka intsony Aho mandra-pahatongan’ny fanjakan’Andriamanitra.»

Ny namoronana ny Eokaristia

19 Raha efa izany, dia nandray mofo Izy, ka nony efa nisaotra dia namaky azy, sy nanome azy ireo nanao hoe: «Vatako ity izay atolotra ho anareo; manaova izany ho fahatsiarovana Ahy.»

20 Dia nataony toy izany koa ny kalisy rehefa avy nihinana, ka hoy izy: «Ity kalisy ity no fanekena vaovao amin’ny Rako, izay alatsaka ho anareo.»

Fanambaràna ny hamadihan’i Jodasy

21 «Kanefa indro ny tanan’izay mamadika Ahyefa mby eto amiko ambony latabatra.

22 Raha ny Zanak’olona, dia mandeha araka ny lahatra; fa loza no hanjò an’izay lehilahy hamadika Azy.»

23 Dia nifanontany ny mpianatra hoe iza re no dia hahavita izany amin’izy ireo.

Iza no lehibe indrindra

24 Ary velona koa ny ady hevitra tamin’izy ireo, momba ny hahalalany izay lehibe indrindra amin’izy ireo,

25 ka hoy i Jesoa taminy: Amin’ny Jentily ny mpanjaka no mizaka azy rehetra, ary izay mandidy azy no atao hoe mpanao soa;

26 fa aminareo kosa tsy mba toy izany, fa aoka izay lehibe aminareo no ho toy ny zandry, ary izay mandidy no ho toy ny mpanompo.

27 Fa iza moa no lehibebe kokoa, ny mihinana amin’ny latabatra va sa ny manompo? Moa tsy ny mihinana amin’ny latabatra va? Ary Izaho anefa eto aminareo dia toy ny mpanompo.

Valisoa nampanantenaina ny Apôstôly

28 Ianareo moa, naharitra nanaraka Ahy tamin’izay nanjò Ahy,

29 Izaho kosa hanamboatra fanjakana ho anareo, tahaka ny nanamboaran’ny Raiko fanjakana ho Ahy,

30 mba hihinananareo sy hisotroanareo eo amin’ny latabatro any amin’ny fanjakako, ary hipetrahanareo amin’ny seza fiandrianana hitsara ny foko roa ambin’ny folo amin’i Israely.

Fanambaràna ny hiverenan’i Piera sy ny handavany

31 Ary hoy ny Tompo: «Ry Simôna, ry Simôna, indro i Satana nitady hikororòka anareo tahaka ny vary,

32 fa Izaho nangataka ho anao, mba tsy ho lavo ny finoanao, ary rehefa mibebaka ianao dia hamafiso ny rahalahinao.»

33 Ary hoy i Piera taminy: «Vonon-kanaraka Anao aho, Tompoko, na ho ao an-tranomaizina, na ho any amin’ny fahafatesana aza.»

34 Fa hoy i Jesoa: «Lazaiko aminao, ry Piera, fa mbola tsy haneno ny akoho anio, dia handà intelo ho tsy mahalala Ahy ianao.»

Ny fotoanan’ny ady hahatapaka ny zavatra rehetra

35 Ary hoy koa Izy tamin’ny mpianany: «Raha naniraka anareo tsy nitondra kitapom-bola na kitapom-batsy na kiraro Aho, moa orin-javatra va ianareo?»

36 «Tsy orin’inon’inona izahay» hoy izy ireo. Dia hoy Izy taminy: «Fa amin’izao kosaizay manan-kitapom-bola aoka hitondra azy; toy izany koa izay manan-kitapom-batsy, ary izay tsy manan-tsabatra aoka hivarotra ny akanjony ka hividy iray;

37 fa lazaiko aminareo fa ity teny voasoratra ity koa tsy maintsy ho tanteraka amiko, dia ilay hoe:Natao lasitra iray amin’ny ratsy fanahy Izy;fa efa ho tapitra daholo ny amiko.»

38 Dia hoy izy ireo: «Tompoko, indreto misy sabatra roa» Dia hoy i Jesoa taminy: «Ampy izay.»

Tao an-tendrombohitr’ôliva

39 Dia nivoaka nankany an-tendrombohitra Oliva araka ny fanaony Izy, ka nanaraka Azy koa ny mpianany.

40 Nony tonga tany Izy dia nanao tamin’izy ireo hoe: «Mivavaha mba tsy ho azon’ny fakam-panahy ianareo.»

41 Dia nihataka tamin’izy ireo tokony ho tra-toraka Izy ka nandohalika, dia nivavaka,

42 nanao hoe: «Raiko ô! raha sitrakao, halaviro Ahy ity kapoaka ity; ny sitraponao anefa no aoka ho tanteraka, fa tsy ny Ahy.»

43 Tamin’izay dia nisy Anjely anankiray avy tany an-danitra niseho taminy sy nankahery Azy. Dia voan’ny fiadiana aina Izy, fa vao mainka nivavaka mafimafy kokoa.

44 Ary nanjary toy ny ra ny hatsembohany sady nipotrapotraka tamin’ny tany.

45 Nony nitsangana avy nivavaka Izy, dia nankeo amin’ny mpianany ka nahita azy matory noho ny alahelo,

46 ary nilaza taminy hoe: «Nahoana no matory ianareo? Mifohaza, ka mivavaha mba tsy ho azon’ny fakam-panahy ianareo.»

Ny nisamborana an’i Jesoa

47 Raha mbola niteny Izy, dia indro nisy andian’olona maromaro nitranga, ka ilay atao hoe Jodasy, anankiray tamin’ny roa ambin’ny folo lahy, no loha lalana, ary nanatona an’i Jesoa ilay io mba hanoroka Azy.

48 Ary hoy i Jesoa taminy: «Ry Jodasy, dia fanorohana lahy no amadihanao ny Zanak’olona?»

49 Nony hitan-dry zareo teo amin’i Jesoa izay hanjò, dia hoy izy taminy: «Tompoko, mba hamely amin’ny sabatra va izahay?»

50 Dia nasian’ny anankiray taminy tokoa ny mpanompon’ny lehiben’ny mpisorona, ka afaka terỳ ny sofiny ankavanana.

51 Fa hoy i Jesoa: «Aoka izay» Dia nanendry ny sofin-dralehilahy Izy, ka nahasitrana azy.

52 Ary hoy i Jesoa tamin’ny lohandohan’ny mpisorona sy ny mpandraharaha amin’ny Tempoly ary ny loholona izay tonga teo handray Azy: «Mova tsy ny hisambotra jiolahy izato fiavinareo, mitondra sabatra sy langilangy!

53 Teo aminareo isan’andro tao an-Tempoly Aho, nefa tsy nikasi-tanana Ahy akory ianareo; fa izao tonga ny fotoanareo sy ny herin’ny maizina.»

Ny fandavan’i Piera

54 Dia nisambotra Azy izy ireo ka nitondra Azy tany an-tranon’ny lehiben’ny mpisorona. I Piera izany nanaraka teny lavidavitra eny ihany.

55 Ary nampirehitra afo teo afovoan’ny tokotany ny olona, dia nipetraka nanodidina, ka mba niara-nipetraka taminy teo koa i Piera.

56 Nisy ankizivavy anankiray kosa nahita azy nipetraka tao akaikin’ny afo, ka nijery azy, dia nanao hoe: «Ity koa niaraka taminy.»

57 Fa nandà i Piera nanao hoe: «Ravehivavy, tsy mahalala Azy akory aho.»

58 Nony afaka kelikely dia nisy lehilahy anankiray koa nahita azy ka nanao hoe: «Ianao koa lahy naman’irony olona irony.» Fa hoy i Piera: «Ry sakaiza, tsy namany akory aho.»

59 Ora iray taorian’izany, dia nisy hafa nilaza tamim-pitokiana hoe: «Tena marina raha tsy namany koa ralehilahy ity, satria Galileanina izy.»

60 Dia hoy i Piera: «Ry sakaiza, tsy fantatro izay lazainao.» Niaraka tamin’izay raha mbola niteny izy, dia naneno ny akoho.

61 Ary nitodika nijery an’i Piera ny Tompo, ka tsaroan’i Piera ilay tenin’ny Tompo nanao hoe: Alohan’ny maneno akoho anio, dia handà Ahy intelo ianao;

62 dia nivoaka tany ivelany izy ka nitomany fatratra.

Ireo faniratsirana voalohany

63 Dia nataon’ireo olona nitana Azy fihomehezana i Jesoa sady nokapohiny,

64 notampenany ny masony, notehafiny ny tavany, dia hoy izy taminy: «Vinanio hoe izay namely Anao?»

65 Ary maro ny teny ratsy hafa nanaratsiany Azy.

I Jesoa eo anatrehan’ny Sanedrìna

66 Nony vao maraina ny andro, dia nivory ny loholona sy ny lohandohan’ny mpisorona ary ny mpanora-dalàna, ka nentiny tao amin’ny Sanedrìna i Jesoa, ary hoy izy taminy: «Raha Ianao no i Kristy, dia lazao aminay.»

67 Fa hoy Izy taminy: «Na hilaza aminareo aza Aho, tsy hinoanareo akory;

68 ary raha hanontany anareo aza Aho, tsy hovalianareo na halefanareo akory.

69 Fa hatramin’izao ny Zanak’olona diahipetraka eo ankavanan’ny herin’Andriamanitra.»

70 Dia hoy izy rehetra: «Zanak’Andriamanitra izany Ianao?» Ary hoy Izy taminy: «Voalazanareo, izy Aho.»

71 Ka hoy izy ireo: «Inona indray no ilàntsika vavolombelona? Tenantsika no nandre tamin’ny vavany.»

Categories
Lioka

Lioka 23

1 Tamin’izay dia nitsangana izy rehetra ka nitondra an’i Jesoa tany amin’i Pilaty,

I Jesoa eo anatrehan’i Pilaty

2 Ary ry zareo niampanga Azy toy izao: «Azonay nampiodina ny firenenay Ilay io, sy nandrara tsy handoa hetra ho an’i Sezara, ary nilaza ny Tenany ho Kristy mpanjaka.»

3 Dia nanontany Azy i Pilaty nanao hoe: «Moa mpanjakan’ny Jody va Ianao?» ka novaliany hoe: «Voalazanao.»

4 Ary hoy i Pilaty tamin’ny lohandohan’ny mpisorona sy ny vahoaka: «Tsy hitako izay mahameloka io Lehilahy io.»

5 Fa vao mainka nanao letrezana izy ireo nanao hoe: «Mampiodina ny vahoaka Izy, aeliny eran’i Jodea manontolo ny fampianarany, dia hatrany Galilea izay nanombohany ka hatraty.»

6 Nony nandre ny teny hoe Galilea i Pilaty, dia nanontany raha olona avy any Galilea Izy,

7 ka nony fantany fa hoe avy any amin’ny tany fehezin’i Herôda Izy, dia nampanateriny tany amin’i Herôda, izay tao Jerosalema koa tamin’izany andro izany.

I Jesoa eo anatrehan’i Herôda

8 Faly dia faly i Herôda nony nahita an’i Jesoa, fa ela no naniriany hahita Azy, noho ny fandrenesany Azy efa maresaka erỳ, sady nanantena izy fa hahita Azy hanao fahagagana.

9 Nanao fanontaniana maro taminy izy, fa tsy namaly na inona na inona kosa i Jesoa.

10 Eo izany ny lohandohan’ny mpisorona sy ny mpanora-dalàna efa nikiribiby erỳ miampanga Azy.

11 Dia notebahin’i Herôda sy ny miaramilany Izy, ka nony efa nampiakanjoiny akanjo fotsysy nolalaoviny, dia naveriny tany amin’i Pilaty indray.

12 Tamin’izay andro izay dia tonga nisakaiza terỳ i Herôda sy i Pilaty, ilay efa nifandrafy teo iny.

I Jesoa averina eo anatrehan’i Pilaty

13 Nasain’i Pilaty novorina ny lohandohan’ny mpisorona sy ny mpifehy ary ny vahoaka,

14 dia nilazany hoe: «Nentinareo tatỳ io Lehilahy io, fa hoe mandrendri-bahoaka hikomy, ary efa nanadina Azy teo anatrehanareo aho, nefa tsy hitako velively izay helony amin’izay iampanganareo Azy.

15 Tahaka izany koa i Herôda, fa namerina Azy ho atỳ amintsika Izy; ary indro tsy misy na inona na inona tokony hanamelohana Azy ho faty.

16 Koa hofaiziko Izy, dia halefako.»

17 Fa tsy maintsy mandefa mpifatotra iray ho an’ny vahoaka rahateo izy amin’ny andro fety.

18 Kanjo indray niredona ny vahoaka niantso hoe: «Vonoy io, fa i Barabasy alefaso ho anay.»

19 I Barabasy anefa dia natao an-tranomaizina, satria sendra nisy fikomiana tao an-tanàna, ka namono olona izy.

20 Dia mbola niteny ihany i Pilaty, fa te handefa an’i Jesoa;

21 nefa niantso mafy ny vahoaka nanao hoe: «Fantsiho! fantsiho amin’ny Hazofijaliana Izy!»

22 Fa niteny tamin’izy ireo fanintelony indray i Pilaty nanao hoe: «Inona àry no ratsy nataony? Tsy hitako izay heloka tokony hahafaty Azy; ka hofaiziko Izy, dia halefako.»

23 Nefa nikiry izy ireo niantso mafy nangataka Azy hofantsihana amin’ny Hazofijaliana, ka nitombo nitombo ihany ny horakoraka.

24 Dia nasain’i Pilaty hatao izay nangatahiny;

25 ilay notadiaviny ho afaka sy natao an-tranomaizina noho ny fikomiana sy vonoana olona moa nalefany, ary i Jesoa kosa natolony hanaovany izay sitrapony.

Eny an-dalana mankany amin’ny Kalvery

26 Ary raha nitondra Azy izy ireo, dia nisy lehilahy Sireneanina anankiray avy any an-tsaha atao hoe Simôna notanany, dia nampitondrainyny Hazofijaliana nanaraka an’i Jesoa.

27 Nisy vahoaka betsaka nanaraka Azy sy vehivavy koa izay nandòn-tratra nitomany Azy.

28 Fa nitodika azy ireo i Jesoa ka nanao hoe: «Ry zanaka vavin’i Jerosalema, aza mitomany Ahy foana, fa ny tenanareo sy ny zanakareo no itomanio,

29 fa indro ho avy ny androhanaovana hoe: ‹Sambatra ny momba sy ny kibo izay tsy niteraka ary ny nono izay tsy ninonoana.›

30 Amin’izay ny olona vaohilaza amin’ny tendrombohitra hoe: ‹Mianjerà aminay› sy amin’ny havoana hoe: Saròny izahay;

31 fa raha toy izany no ataony amin’ny hazo lena, hatao ahoana amin’ny maina?»

32 Ary nisy olon-dratsy roa lahy koa nentin’ny miaramila, hiara-kovonoina amin’i Jesoa.

Famantsihana amin’ny Hazofijaliana

33 Nony tonga tany amin’ny fitoerana atao hoe Kalvery izy ireo, dia nofantsihany tamin’ny Hazofijaliana Izy, sy ireo mpangalatra ireo, ny iray moa teo ankavanany ary ny iray kosa teo ankaviany.

34 Dia hoy i Jesoa: «Raiko, avelao ny helony, fa tsy fantany izay ataony.» Ary nanaovan’izy ireo loka no fizara ny fitafiany.

I Jesoa eo amin’ny Hazofijaliana esoina sy tevatevaina

35 Ny vahoaka nijanona nijery teo, ary ny loholona avy no nandatsa Azy nanao hoe: «Namonjy ny sasany Izy ka aoka hamonjy ny Tenany, raha Izy no Kristin’Andriamanitra, Ilay voafidy.»

36 Ny miaramila koa naneso Azy ka nanatona nanolotra vinaingitra Azy,

37 ary nanao hoe: «Raha Ianao no Mpanjakan’ny Jody, vonjeo ny Tenanao.»

38 Teo ambonin’ny lohany koa dia nisy soratra tamin’ny teny grika sy latinina ary hebrio nanao hoe: ITY NO MPANJAKAN’NY JODY.

Ilay jiolahy nivalo

39 Ary ny anankiray tamin’ireo mpangalatra izay nihantona teo dia nanevateva Azy nanao hoe: «Raha Ianao no Kristy, vonjeo ny Tenanao sy izahay.»

40 Fa nanarin’ilay anankiray izy, nataony hoe: «Ialahy koa ve tsy matahotra an’Andriamanitra, saingy hoe samy voaheloka ho faty izao?

41 Ny antsika dia rariny izao, satria mandray ny valin’ny ratsy nataontsika isika; fa ny Azy kosa tsy mba nanao ratsy na inona na inona Izy.»

42 Dia hoy izy tamin’i Jesoa: «Tompoko, tsarovy aho rehefa mby any amin’ny fanjakanao Ianao.»

43 Ka hoy ny navalin’i Jesoa azy: «Lazaiko marina aminao fa anio dia hihaona amiko any am-paradisa ianao.»

Ny nahafatesan’i Jesoa

44 Ary rehefa tokony ho tamin’ny ora fahenina, dia rakotra haizina ny tany rehetra ka naharitra hatramin’ny ora fahasivy izany,

45 fa nihamaizina ny masoandro; ary rovitra nisasaka roa ny efitra lamba tao amin’ny Tempoly.

46 Ary niantso tamin’ny feo mahery i Jesoa nanao hoe: «Raiko!apetrako ao an-tananao ny fanahiko.»Nony voalazany izany, dia niala aina Izy.

Taorian’ny nahafatesan’i Jesoa

47 Rehefa nahita ny zava-niseho teo ny kapiteny, dia nankalaza an’Andriamanitra ka nanao hoe: «Tena olo-marina tokoa io Lehilahy io.»

48 Ny vahoaka rehetra vory teo mba hijery koa, nony nandinika ny zava-niseho, dia lasa niverina nandondòna ny tratrany.

49 Fa ny olom-pantatr’i Jesoa rehetra kosa dia nijoro teny lavidavitra omban’ireo vehivavy nanaraka Azy avy tany Galilea, ka samy nijery izany.

Ny nandevenana an’i Jesoa

50 Ary nisy lehilahy tsara fanahy sady marina anankiray atao hoe Josefa izay anisan’ny Sanedrìna;

51 tsy mba nisy neken’izy io na ny hevi-dratsin’ny sasany na ny nataon’izy ireo; avy any Arimatia tanànan’i Jodea izy, ary mba nanantena ny fanjakan’Andriamanitra koa.

52 Nanatona an’i Pilaty izy, ka nangataka ny vatan’i Jesoa.

53 Dia nampidininy ny faty ka nofonosiny lamba, ary naleviny tao anatin’ny fasana anankiray nolavahana tamin’ny vato, sy tsy mbola nandevenana olona.

54 Andro fiomananatamin’izay andro izay, sady efa hiantomboka ny sabata.

55 Ary ny vehivavy nanaraka an’i Jesoa avy tany Galilea dia niaraka tamin’i Josefa koa, ka nijery ny tao am-pasana sy izay fomba hametrahana ny vatan’i Jesoa.

56 Rehefa niverina avy any izy ireo, dia namboatra zava-manitrasy menaka manitra; fa nony sabata ny andro vao nitsahatra araka ny Lalàna izy.

Categories
Lioka

Lioka 24

Ny fasana foana sy ny hafatry ny Anjely

1 Nony marainakoan’ny andro voalohany amin’ny herinandro, dia nankany amin’ny fasana izy ireo nitondra ny zava-manitra efa namboariny,

2 ary hitany fa efa voakodia lavidavitry ny fasana ny vato,

3 ka niditra izy ireo, fa tsy nahita ny fatin’i Jesoa Tompo.

4 Mbola very hevitra noho izany eo izy ireo, dia indro nisy olona roa lahyniseho teo akaikiny, nitafy fitafiana mamirapiratra.

5 Dia natahotra izy ireo ka niondrika, fa nilazan’iretsy hoe: «Nahoana no atỳ amin’ny maty no itadiavanareo izay velona?

6 Tsy eto Izy fa efa nitsangana; tsarovy ny teny nolazainy taminareo fony Izy mbola tany Galilea, hoe:

7 ‹Tsy maintsy atolotra eo an-tanan’ny mpanota ny Zanak’olona sy hofantsihana amin’ny Hazofijaliana, ary hitsangana amin’ny andro fahatelo.› »

8 Izay vao tsaroany ny tenin’i Jesoa.

Tsy nino ny filazan’ireo vehivavy ny Apôstôly

9 Ka tafaverina avy tany amin’ny fasana izy ireo dia nilaza izany rehetra izany tamin’ny iraika ambin’ny folo lahy sy ny namany rehetra.

10 dia i Maria Madelenina sy i Joana ary i Maria renin’i Jakôba izany, ary ny vehivavy hafa niaraka taminy koa dia samy nilaza izany tamin’ny Apôstôly.

11 Fa nataony ho arirarira foana ny tenin’izy ireo ka tsy ninoany.

I Piera teo amin’ny fasana

12 I Piera kosa anefa dia nitsangana nihazakazaka nankany amin’ny fasana, ary niondrika izy, fa ny lambam-paty ihany no hany hitany tao ka lasa nody, gaga foana noho ny zava-niseho tao.

Ireo mpianatra tany Emaosy

13 Androtr’izay ihany dia nisy mpianatra roa lahy nankany amin’ny vohitra anankiray atao hoe Emaosy, tokony ho enimpolo stadyraha avy eo Jerosalema.

14 Niresaka izany zava-niseho rehetra izany izy ireo.

15 Ary raha mbola niresaka sy nifampilaza izay heviny teny izy, dia nanatona azy i Jesoa ka niara-dalana taminy;

16 fa voasakana tsy hahafantatra Azy ny mason’izy ireo.

17 «Inona izato resahinareo etỳ an-dalana, hoy Izy taminy, no toa dia efa malahelo erỳ ianareo izany?»

18 Dia namaly ny anankiray atao hoe Kleôfasy ka nanao taminy hoe: «Ianao irery angaha no vahiny ao Jerosalema tsy mahalala izay zava-niseho tao tato ho ato?»

19 Fa hoy Izy tamin’ireo: «Zavatra inona moa izany?» Dia hoy ireo: «Ny amin’i Jesoa avy any Nazareta, izay Mpaminany mahery tamin’ny asany sy ny teniny teo anatrehan’Andriamanitra sy ny vahoaka rehetra,

20 dia ny amin’ny nanoloran’ny lohandohan’ny mpisorona sy ny lehibentsika Azy ho faty, mbamin’ny namantsihana Azy tamin’ny Hazofijaliana.

21 Nanantena izahay fa hoe Izy no Ilay hanavotra an’i Israely: kanjo indro fa androany izao no andro fahatelo hatramin’ny nisehoan’izany.

22 Nisy ihany tokoa vehivavy sasany namanay nahasanganehana anay fatratra, fa tany amin’ny fasana maraina koa izy ireo,

23 ary niverina nilaza fa tsy nahita ny fatiny, nefa nahita Anjely niseho taminy, nanambara fa velona Izy.

24 Dia nankany amin’ny fasana ny sasany taminay ka nahita araka izay nolazain’ny vehivavy, nefa tsy nahita Azy.»

25 Ary hoy Izy tamin’izy ireo: «Ry adala, sy votsa saina amin’ny finoana izay rehetra voalazan’ny mpaminany!

26 Moa tsy tokony ho niaritra izany va i Kristy mba hidirany amin’ny voninahiny?»

27 Dia novoasany tamin’izy ireo ny tenin’i Môizy sy ny mpaminany rehetra manambara Azy ao amin’ny Soratra Masina.

28 Nony mby teo akaikin’ny vohitra halehan’izy roa lahy izy ireo, dia nanao hoatra ny mbola handeha lavidavitra ihany i Jesoa,

29 fa notanan’izy ireo nataony hoe: «Mitoera re atỳ aminay, fa efa hariva izao, efa mandrorona ny andro.» Dia niditra niara-nijanona tamin’izy ireo Izy.

30 Ary rehefa niara-nihinana izy ireo, dia nandray ny mofo Izy ka notsofiny rano sy novakiny, dia natolony azy ireo.

31 Izay vao nisokatra ny mason’izy ireo ka nahalala Azy, fa Izy kosa tonga tsy hitany intsony.

32 Dia nifampilaza izy hoe: «Akory izany firehidrehitry ny fontsika tao anatintsika fony Izy niresaka tamintsika teny an-dalana, sy nivaofy ny Soratra Masina tamintsika!»

33 Niaraka tamin’izay, dia nitsangana izy ireo ka niverina tany Jerosalema, ary nahita ny iraika ambin’ny folo lahy sy ny namany tafavory

34 sady nilaza hoe: «Efa nitsangana tokoa ny Tompo, ary efa niseho tamin’i Simôna Izy.»

35 Dia mba notantarain’izy ireo kosa ny zavatra niseho taminy teny an-dalana sy ny nahafantarany Azy tamin’ny famakiana ny mofo.

I Jesoa niseho tamin’ny Apôstôly miaraka

36 Mbola niresaka toy izany eo izy ireo, dia niseho teo afovoany i Jesoa ka nanao taminy hoe: «Ho aminareo anie ny fiadanana! Aza matahotra, fa Izaho ihany.»

37 Taitra sady natahotra izy ireo, fa nataony ho matoatoa no hitany.

38 Ka hoy Izy taminy: «Nahoana no mitebiteby ianareo, ary nahoana no miahanàhana ao am-ponareo?

39 Zahao ny tanako sy ny tongotro, fa Izaho mihitsy ity: tsapao ka jereo, fa ny matoatoa tsy mba mana-nofo aman-taolana tahaka izao ahitanareo Ahy izao.»

40 Ary rehefa nilaza izany Izy, dia nasehony azy ny tanany, sy ny tongony.

41 Ary ilay mbola tsy nino ihany iny izy ireo noho ny hafaliany sady mbola talanjona, dia hoy i Jesoa taminy: «Moa manan-kanina eto va ianareo?»

42 Dia notoloran’izy ireo tapa-kazandrano voatono sy tantely Izy.

43 ka noraisiny dia nohaniny teo imason’izy rehetra, ary ny sisa nomeny azy ireo.

Hafatra farany tamin’ny Apôstôly

44 Dia hoy Izy tamin’izy ireo: «Izao no voalazako taminareo fony mbola teo aminareo Aho, fa tsy maintsy ho tanteraka izay rehetra voasoratra momba Ahy ao amin’ny Lalàn’i Môizy sy ny mpaminany ary ny Salamo.»

45 Dia nosokafany ny sain’izy ireo hahafantatra ny Soratra Masina,

46 ka hoy Izy taminy: Araka ny voasoratra dia tsy maintsy hijaly i Kristy sy hitsangan-ko velona avy any amin’ny maty amin’ny andro fahatelo,

47 ary tsy maintsy torina amin’ny firenen-drehetra, miantomboka amin’i Jerosalema ny fibebahana sy ny famelan-keloka amin’ny Anarany.

48 Ianareo no vavolombelon’izany.

49 Ary Izaho kosa haniraka aminareo Ilay nampanantenain’ny Raiko; fa mitoera ao an-tanàna ianareo mandra-pandrainareo ny hery avy any ambony.

Ny niakaran’i Jesoa any an-danitra

50 Dia nentiny nivoaka ny tanàna hatrany Betania izy ireo, ary nanandratra ny tanany Izy ka nitso-drano azy.

51 Raha mbola nitso-drano azy Izy, dia nisaraka taminy, ka nakarina ho any an-danitra.

52 Iretsy kosa rehefa avy nitsaoka Azy, dia niverina tany Jerosalema tamin-kafaliana lehibe,

53 ary tao anatin’ny Tempoly mandrakariva izy ireo nidera sy nisaotra an’Andriamanitra. Amen.

Categories
Joany

Joany 1

1 Tamin’ny voalohany ny Teny, ary ny Teny dia tao amin’Andriamanitra, ary Andriamanitra ny Teny.

2 Tao amin’Andriamanitra tamin’ny voalohany Izy.

3 Izy no nahariana ny zavatra rehetra, ary raha tsy Izy, tsy nisy àry ny zavatra àry rehetra.

4 Tao aminy ny fiainana, ary ny fiainana no fahazavan’ny olona.

5 Ary mamirapiratra amin’ny maizina ny fahazavana, fa tsy nandray Azy ny maizina.

6 Nisy lehilahy anankiray nirahin’Andriamanitra, Joany no anarany;

7 tonga ho vavolombelona hanambara ny Fahazavana izy mba hinoan’ny olon-drehetra noho ny teniny.

8 Tsy izy anefa no Fahazavana fa tonga ho vavolombelona manambara ny fahazavana fotsiny izy.

9 Fa ny Teny ihany no tena Fahazavana, izay manazava ny olona rehetra tonga amin’izao tontolo izao.

10 Teo amin’izao tontolo izao Izy, ary Izy no nahariana izao tontolo izao, nefa tsy nahalala azy izao tontolo izao

11 Tonga tao amin’ny olony Izy, fa ny olony tsy nandray Azy.

12 Fa izay rehetra nandray Azy dia nomeny fahazoana ho tonga zanak’Andriamanitra, dia izay mino ny Anarany

13 ka tsy mba nateraka avy amin’ny ra, na ny sitrapon’ny nofo, na ny sitrapon’ny olona ireo, fa nateraka avy amin’Andriamanitra.

14 Ary ny Teny dia tonga nofo, ka nonina tatỳ amintsika; ary nibanjina ny voninahinyizahay, dia voninahitra tahaka izay zakain-Janaka Lahy tokana avy amin’ny Rainy, sady feno fahasoavana sy fahamarinana Izy.

15 Nanambara Azy i Joany, ka niantso nanao hoe: «Izy ilay nolazaiko hoe: Izay avy ao aoriakodia efa tonga eo alohako, satria talohako Izy.

16 Ary avy amin’ny hafenoany no nandraisantsika rehetra fahasoavana miampy fahasoavana,

17 satria ny Lalàna moa nomena tamin’ny alalan’i Môizy, fa ny fahasoavana sy ny fahamarinana kosa dia avy amin’ny alalan’i Jesoa Kristy.

18 Tsy dia nisy nahita an’Andriamanitra na oviana na oviana; fa ny Zanaka tokana izay ao anatin’ny Ray ihany no hany nanambara Azy.»

Fanambaràn’i Joany

19 Ary izao no nambaran’i Joany raha naniraka mpisorona sy Levita, avy tany Jerosalema, hankany aminy ny Jody mba hanontany Azy hoe: Iza moa Ianao?

20 Nilaza marina izy ka tsy nandà, fa nanao hoe: «Tsy i Kristy aho.»

21 Dia nanontany azy izy ireo nanao hoe: «Iza àry? I Elia va ianao?» Fa hoy izy: «Tsy izy aho.» «Ilay Mpaminany va ianao?» Fa hoy ny navaliny: «Tsia.»

22 Ka hoy izy ireo taminy: «Iza àry ianao, mba hitondranay valy amin’izay naniraka anay? Ataonao ho iza ny tenanao?»

23 Dia hoy izy: «Izaho nofeon’ny miantso any an’efitra hoe: Ahitsio ny lalan’ny Tompo,araka izay voalazan’i Izaia mpaminany.»

24 Ary Farisianina ireo iraka ireo.

25 Dia nanontany azy indray ireo ka nanao taminy hoe: «Nahoana àry ianao no manao batemy raha tsy i Kristy, na i Elia, na ilay Mpaminany?»

26 Ka novalian’i Joany hoe: «Izaho manao batemy amin’ny rano; fa eo aminareo misy anankiray tsy fantatrareo,

27 dia Ilay avy ao aoriako, ary tsy mendrika hamaha ny kofehin-kapany aza aho.»

28 Tany Betania an-dafin’i Jordany, izay nanaovan’i Joany batemy, no natao izany zavatra izany.

29 Nony ampitso, nahita an’i Jesoa nanatona azy i Joany, ka hoy izy: «Indro ny Zanak’ondrin’Andriamanitra; indro Ilay manala ny fahotan’ny olona.

30 Izy no ilay nantsoiko hoe: ‹Misy lehilahy avy ao aoriako, sy efa tonga eo alohako, satria talohako Izy.›

31 Ary izaho tsy nahalala Azy; fa mba hampisehoana Azy amin’i Israely no nahatongavako manao batemy amin’ny rano.»

32 Ary nilaza marina i Joany nanao hoe: «Efa hitako ny Fanahy Masina nidina avy any an-danitra toy ny voromahailala, ka nitoetra teo amboniny.

33 Ary izaho tsy nahalala Azy, fa Izay naniraka ahy hanao batemy amin’ny rano no nilaza tamiko hoe: ‹Izay hitanao hidinan’ny Fanahy Masina sy hitoerany eo amboniny no Ilay manao Batemy amin’ny Fanahy Masina.›

34 Ary nahita aho ka milaza marina fa Izy no Zanak’Andriamanitra.»

Ireo mpianatra voalohany

35 Nony ampitson’izay indray, dia mbola teo koa i Joany sy ny mpianany roa lahy;

36 ka hoy izy nahatazana an’i Jesoa nandalo: «Indro ny Zanak’ondrin’Andriamanitra.»

37 Nandre izany ireo mpianany roa lahy ireo, dia nanaraka an’i Jesoa.

38 Ary nitodika i Jesoa ka nahita azy ireo nanaraka Azy, dia nanao taminy hoe: «Inona no tadiavinareo?» Ary hoy izy ireo taminy: «Raby, (izany hoe, ry Mpampianatra, raha adika) aiza Ianao no mitoetra?»

39 dia hoy Izy taminy: «Avia fa ho hitanareo.» Dia nandeha izy ireo ka nahita izay nitoerany, sy nitoetra teo aminy tamin’iny andro iny; ary tokony ho tamin’ny ora fahafolotamin’izay.

40 I Andre rahalahin’i Simôna Piera no anankiray tamin’izy roa lahy izay nandre ny tenin’i Joany ka nanaraka an’i Jesoa.

41 Ary ny olona voalohany nifanena taminy kosa dia i Simôna rahalahiny ka nilazany hoe: «Efa hitanay ny Mesia» (izany hoe: Kristy, ilay Voahosotra raha adika).

42 Dia nentiny nankany amin’i Jesoa izy, ka nony nijery azy i Jesoa dia nanao hoe: «Ianao no Simôna zanak’i Joany; hatao hoe Sefasy ianao, izany hoe, Piera vato»

43 Nony ampitso, niroso nankany Galilea i Jesoa, ary nifanena tamin’i Filipo Izy ka nanao taminy hoe: «Manaraha Ahy.»

44 Avy ao Betsaida tanàna niavian’i Andre sy i Piera ihany koa i Filipo.

45 I Filipo kosa nifanena tamin’i Natanaely ka nanao taminy hoe: «Efa hitanay Ilay voalazan’i Môizy tao amin’ny Lalàna, sy nambaran’ny mpaminany, dia i Jesoa zanak’i Josefa avy any Nazareta.»

46 Ka hoy i Natanaely taminy: «Moa mba mety hisy zava-tsoa va avy any Nazareta?» Dia hoy i Filipo taminy: «Avia, ary zahao.»

47 Nony nahita an’i Natanaely tamy nanatona Azy i Jesoa, dia nilaza azy hoe: «Io no tena Israelita tokoa, izay tsy misy fitaka.»

48 Ka hoy i Natanaely taminy: «Ahoana no nahalalanao ahy?» Ary hoy ny navalin’i Jesoa azy: «Talohan’ny niantsoan’i Filipo anao, dia hitako tao ambanin’ny aviavy ianao.»

49 Dia namaly Azy i Natanaely, ka nanao hoe: «Raby ô, Ianao no zanak’Andriamanitra, Ianao no Mpanjakan’i Israely.»

50 Ary hoy i Jesoa taminy: «Mino ianao satria nilazako fa hitako tao ambanin’ny aviavy ianao; mbola hahita zava-dehibe noho izany aza ianao.»

51 Dia hoy koa Izy: «Lazaiko marina dia marina aminareo fa hahita ny lanitra misokatrasy ny Anjelin’Andriamanitra miakatra sy midina ao ambonin’ny Zanak’olona ianareo.»

Categories
Joany

Joany 2

Fampakaram-bady tao Kanà

1 Nony afaka hateloana dia nisy fampakaram-bady tany Kanà any Galilea, ary tao ny Renin’i Jesoa.

2 I Jesoa sy ny mpianany koa dia nasaina tao amin’ny fampakaram-bady.

3 Nony inona, lany ny divay, ka hoy ny Renin’i Jesoa taminy: «Tsy manan-divay izy ireo.»

4 Ary hoy i Jesoa taminy: «Izaho sy ianao moa no ahoana amin’izany, ravehivavy? Tsy mbola tonga ny fotoako.»

5 Dia hoy ny Reniny tamin’ny mpanompo:«Ataovy izay rehetra holazainy aminareo.»

6 Ary nisy siny vato enina teo, fidiovana araka ny fanaon’ny Jody, nahalany rano indroa na intelon’ny famaranaavy,

7 ka hoy i Jesoa tamin’izy ireo: «Fenoy rano ireo siny ireo.» Dia nofenoiny hatramin’ny molony.

8 Ary hoy i Jesoa taminy: «Tovozy amin’izao, ka ento amin’ny mpandahatra ny fanasana.» Dia nentiny.

9 Vao nanandrana ny rano voaova ho divay ny mpandahatra ny fanasana (izay tsy nahalala ny niaviany, fa ny mpanompo nanovo ny rano no nahalala), dia niantso ny mpampakatra

10 ka nanao taminy hoe: «Ny an’ny olona rehetra, dia ny divay tsara no arosony aloha, ary rehefa nisotro be ny olona vao arosony izay tsy tsara loatra; fa ny anao kosa, dia ny divay tsara indray no notahirizinao mandraka ankehitriny.»

11 Izany nataon’i Jesoa tany Kanà any Galilea izany no santatry ny famantarana nataony; naneho ny voninahiny Izy ka nino Azy ny mpianany.

12 Ary rehefa afaka izany, dia nidina nankany Kafarnaoma Izy sy ny Reniny mbamin’ny rahalahiny sy ny mpianany; nefa tsy nitoetra ela tao izy ireo.

Ny nanadiovana ny Tempoly

13 Ary akaiky ny Pakan’ny Jody, ka niakatratany Jerosalema i Jesoa.

14 Hitany tao anatin’ny Tempoly ny mpivarotra omby aman’ondry sy voromahailala ary ny mpanakalo vola nipetraka tao,

15 ka nanao kotopia tamin’ny tady madinika Izy, dia nandroaka azy rehetra mbamin’ny omby aman’ondry hiala amin’ny Tempoly; nararany ny volan’ny mpanakalo vola, nazerany ny latabatra,

16 ary hoy Izy tamin’izay nivaro-boromahailala: «Esory eto ireo; fa aza ataonareo trano fivarotana ny tranon’ny Raiko.»

17 Dia tsaroan’ny mpianany fa efa voasoratra hoe:

«Ny fitiavako ny tranonao no maharîtra ny aiko.»

18 Fa niteny kosa ny Jody ka nanao taminy hoe: «Inona no famantarana asehonao aminay no manao toy izao Ianao?»

19 Dia namaly azy i Jesoa nanao hoe: «Ravao ity tempoly ity, fa hatsangako indray amin’ny hateloana.»

20 Ka hoy ny Jody: «Enina amby efapolo taona no nanaovana ity Tempoly ity, ka Ianao ve dia hanangana azy indray amin’ny hateloana e?»

21 Ny Vatany anefa no Tempoly nolazainy.

22 Ary nony tafatsangan-ko velona Izy, dia tsaroan’ny mpianany fa voalazany izany, ka nino ny Soratra Masina sy ny teny voalazan’i Jesoa izy ireo.

Ny nijanonana tao Jerosalema

23 Raha mbola tany Jerosalema Izy tamin’ny fetin’ny Paka, dia maro no nino ny Anarany, fa nahita ny fahagagana nataony;

24 nefa tsy natoky azy ireo i Jesoa, satria nahalala azy rehetra Izy.

25 sady tsy mba nila olona hilaza aminy ny amin’ny olona Izy, fa ny Tenany ihany dia nahalala izay ao am-pon’ny olona.

Categories
Joany

Joany 3

Dinidinika tamin’i Nikôdema

1 Nisy Farisianina anankiray atao hoe Nikôdema, isan’ny lehibe tamin’ny Jody.

2 Nankao amin’i Jesoa izy nony alina ka nanao taminy hoe: «Raby, fantatray fa Mpampianatra avy amin’Andriamanitra Ianao, fa tsy misy olona hahefa izao fahagagana ataonao izao raha tsy Andriamanitra no momba azy.»

3 Dia namaly i Jesoa ka nanao taminy hoe: «Lazaiko marina dia marina aminao fa raha tsy ateraka indray ny olona, dia tsy mahazo mahita ny fanjakan’Andriamanitra.»

4 Ary hoy i Nikôdema taminy: «Ataon’ny olona ahoana no ateraka indray rehefa antitra izy? Moa mahazo miditra any an-kibon-dreniny indray va izy ka hateraka indray?»

5 Fa hoy i Jesoa: «Lazaiko marina dia marina aminao fa raha tsy ateraky ny rano sy ny Fanahyindray ny olona, dia tsy mahazo miditra amin’ny fanjakan’Andriamanitra.

6 Izay ateraky ny nofo, dia nofo, ary izay ateraky ny Fanahy dia fanahy.

7 Aza gaga ianao noho ny nilazako taminao hoe: Tsy maintsy ateraka indray ianareo.

8 Ny rivotra mitsoka amin’izay tiany ary renao ny feony, nefa tsy fantatrao izay iaviany na izay alehany; tahaka izanyizay rehetra ateraky ny Fanahy.»

9 Dia namaly i Nikôdema ka nanao taminy hoe: «Hatao ahoana no hahatonga izany?»

10 Ary hoy i Jesoa taminy: Mpampianatra amin’i Israely ianao ka tsy mahalala izany va?

11 Lazaiko marina dia marina aminao fa izay fantatray no lazainay, ary izay hitanay no ambaranay, nefa tsy raisinareo ny filazànay.

12 Raha tsy mino Ahy ianareo amin’ny filazàko ny zavatra etỳ an-tany, hataonareo ahoana no fino ny filazàko ny any an-danitra?

13 Ary tsy nisy niakatra tany an-danitra afa-tsy Izay nidina avy tany an-danitra ihany, dia ny Zanak’olona Izay any an-danitra.

14 Tahaka ny nanandratan’i Môizy ny bibilava tany an’efitra no tsy maintsy hanandratana ny Zanak’olona koa,

15 mba tsy ho very izay rehetra mino Azy, fa hanana ny fiainana mandrakizay.

16 Fa fatratra tokoa ny fitiavan’Andriamanitra izao tontolo izao: ka nomeny ny Zanany tokana, mba tsy ho very izay rehetra mino Azy, fa hanana ny fiainana mandrakizay.

17 Fa Andriamanitra tsy naniraka ny Zanaka tamin’izao tontolo izao, mba hitsara izao tontolo izao, fa mba hamonjy izao tontolo izao.

18 Izay mino Azy dia tsy tsaraina: fa izay tsy mino kosa dia efa voatsara rahateo, satria tsy mino ny Anaran’ny Zanak’Andriamanitra tokana.

19 Ary izao no fitsarana: tonga amin’izao tontolo izao ny fahazavana, nefa naleon’ny olona ny haizina toy izay ny fahazavana, satria ratsy ny asany.

20 Fa izay rehetra manao ratsy dia tsy tia ny fahazavana, ka tsy manatona ny fahazavana sao hita miharihary ny asany;

21 fa izay manao ny marina no manatona ny fahazavana, mba hiharihary ny asany, fa atao amin’Andriamanitra.

Fanambaràna farany nataon’i Joany Batista

22 Taorian’izany, dia nankany amin’ny tany Jodea i Jesoa sy ny mpianany, ary niara-nitoetra tamin’izy ireo tany, sady nanao batemy ny olona.

23 I Joany koa nanao batemy tany Enòna akaikin’i Salima, fa be rano tao, ka nanatona ny olona sy nataony batemy;

24 fa tsy mbola natao tao an-tranomaizina i Joany.

25 Ary nifanditra tamin’ny Jody anankiray ny amin’ny fanadiovanany mpianatr’i Joany,

26 ka nankany amin’i Joany ny mpianany nanao taminy hoe: «Raby, Ilay teny aminao, teny an-dafin’i Jordany, izay nambaranao manko, ka indro manao batemy koa ary mankany aminy ny olona rehetra.»

27 Dia namaly i Joany ka nanao hoe: «Tsy mahazo mandray na inona na inona ny olona raha tsy nomena azy avy any an-danitra izany.

28 Ary ianareo ihany no vavolombelon’ny nilazako hoe: Tsy i Kristy aho, fa nirahina hialoha Azy.

29 Izay manana ny ampakarina no mpampakatra; fa ny sakaizan’ny mpampakatra izay mitsangana eo sy mihaino azy, dia faly tokoa mandre ny feon’ny mpampakatra; ary izany hafaliana izany no tanteraka amiko,

30 Izy tsy maintsy mitombo, fa izaho kosa tsy maintsy mihena.

31 Izay avy any ambony no ambonin’ny olona rehetra; fa izay avy amin’ny tany dia tany, ka ny etỳ an-tany ihany no lazainy. Izay avy any an-danitra no ambonin’ny olona rehetra;

32 ary izay efa hitany sy reny no ambarany, nefa tsy misy mandray ny fanambaràny.

33 Izay nandray ny fanambaràny dia nanisy tombokase fa marina Andriamanitra.

34 Satria izay nirahin’Andriamanitra dia milaza ny tenin’Andriamanitra fa tsy misy fetranyno fanomen’Andriamanitra ny Fanahy.

35 Ny Ray tia ny Zanaka, ka napetrany eo am-pelatanany ny zavatra rehetra.

36 Izay mino ny Zanaka no manana ny fiainana mandrakizay, fa izay tsy mino ny Zanaka dia tsy hahita ny fiainana, fa itoeran’ny hatezeran’Andriamanitra.

Categories
Joany

Joany 4

Fanambaràna ny Mpamonjy an’izao tontolo izao tamin’ny Samaritanina

1 Nony fantatry ny Tompo fa ren’ny Farisianina hoe maromaro kokoa ny mpianatr’i Jesoa sy ny olona ataony batemy noho ny an’i Joany

2 – na dia tsy izy aza fa ny mpianany no nanao batemy ny olona, –

3 dia niala tany Jodea Izy ka nankany Galilea indray.

4 Ary tsy maintsy hamaky an’i Samaria Izy,

5 ka tonga tany amin’ny tanànan’i Samaria anankiray atao hoe Sikara, akaikin’ny saha nomen’i Jakôba an’i Josefa zanany;

6 teo no nisy ny fantsakan’i Jakôba. Ary sasatry ny dia nalehany i Jesoa ka nipetraka tsotra izao teo amoron’ny fantsakana, tokony ho tamin’ny ora fahenina.

7 Dia inty nisy vehivavy Samaritanina anankiray tonga teo hantsaka rano, ka hoy i Jesoa taminy: «Mba omeo kely Aho hosotroiko»

8 fa lasa nankany an-tanàna hividy hanina ny mpianany.

9 Dia hoy ilay vehivavy Samaritanina taminy: «Nahoana Ianao no Jody ka no mangataka rano hosotroina amiko, nefa aho vehivavy Samaritanina?» (Fa tsy mifankahay moa ny Jody sy ny Samaritanina).

10 Namaly i Jesoa ka nanao taminy hoe: «Raha fantatrao mantsy ny fanomezan’Andriamanitra sy Izay milaza aminao hoe: Mba omeo kely Aho hosotroiko, dia ianao indray aza no ho nangataka taminy ka homeny rano velona.»

11 Hoy ravehivavy taminy: «Ianao, Tompoko, tsy manan-kanovozana, ary ny fantsakana lalina; ka aiza ange no hahazoanao izany rano velona izany?

12 Ianao angaha lehibe noho i Jakôba razantsika, izay nahazoanay ity fantsakana ity sy nisotro teto na ny tenany, na ny zanany mbamin’ny bibiny?»

13 Dia hoy i Jesoa namaly azy: «izay rehetra misotro amin’ity rano ity mbola hangetaheta ihany; fa izay hisotro amin’ny rano homeko azy no tsy hangetaheta mandrakizay,

14 satria ny rano homeko azy, dia ho tonga loharano miboiboika ao anatiny hatrany amin’ny fiainana mandrakizay.»

15 Ka hoy ravehivavy taminy: «Omeo amin’izany rano izany re aho, Tompoko, mba tsy hangetaheta intsony, dia tsy hankatỳ hantsaka koa.»

16 Fa hoy i Jesoa taminy: «Mandehana miantsoa ny vadinao, ka mankanesa atỳ.»

17 «Tsy manam-bady aho,» hoy ravehivavy. Dia hoy i Jesoa taminy: «Marina ny filazanao hoe: tsy manam-bady aho;

18 fa efa nanam-bady indimy ianao, ary tsy vadinao ilay itoeranao ankehitriny, ka marina ny voalazanao.»

19 Dia hoy ravehivavy taminy: «Tompoko, hitako fa Mpaminany ianao.

20 Ny razanay nivavaka teo amin’io tendrombohitra io, ary ianareo kosa milaza fa any Jerosalema no tsy maintsy ivavahana.»

21 Ary hoy i Jesoa taminy: «Ravehivavy, minoa Ahy, fa tonga ny andro, ka tsy amin’io tendrombohitra iona any Jerosalema aza no hivavahanareo amin’ny Ray.

22 Hianareo mivavaka amin’izay tsy fantatrareo, fa izahay no mivavaka amin’izay fantatray, satria avy amin’ny Jody ny famonjena.

23 Fa ho avy ny andro, ary efa tonga sahady aza, izay hivavahan’ny mpivavaka marina amin’ny Ray amin’ny fanahy sy fahamarinana, fa ny mpivavaka aminy toy izany no tadiavin’ny Ray.

24 Andriamanitra dia fanahy, ary izay mivavaka aminy tsy maintsy mivavaka amin’ny fanahysy fahamarinana.»

25 Dia namaly ravehivavy ka nanao taminy hoe: «Fantatro fa avy ny Mesia (izay atao hoe Kristy); ka rehefa tonga Izy, dia hanambara amintsika ny zavatra rehetra.»

26 Hoy i Jesoa taminy: «Izaho izay miresaka aminao izao no Izy.»

27 Tamin’izay dia tonga ny mpianany ka gaga, satria vehivavy no niresahany; nefa tsy nisy nanao hoe: Inona no tadiavinao? na Ahoana no iresahanao aminy?

28 Ravehivavy kosa tamin’izay dia nandao ny sininy ka lasa nankany an-tanàna nilaza tamin’ny olona hoe:

29 «Andeha ianareo hizaha izao Lehilahy izao, fa nolazainy tamiko avokoa ny nataoko rehetra; ka izao angaha no Kristy?»

30 Dia nivoaka avy tao an-tanàna ny olona hanatona an’i Jesoa.

31 Mbola tsy tonga ny olona dia nanasa Azy ny mpianany nanao hoe: «Hano, Raby ô.»

32 Fa hoy Izy taminy: «Izaho manan-kanin-kohanina izay tsy fantatrareo.»

33 Dia nifampilaza hoe ny mpianany: «Nisy olona nanati-javatra hohaniny angaha?»

34 Fa hoy i Jesoa tamin’izy ireo: «Ny haniko dia ny manao ny sitrapon’Izay naniraka Ahy, sy ny manatanteraka ny asany.

35 Moa tsy lazainareo fa mbola efa-bolana vao taom-pijinjana? Kanefa lazaiko aminareo: Atopazo ny masonareo, ka tazano ny eny an-tsaha, fa efa manopy menasahady ny vary ka efa ho fijinja.

36 Izay mijinjadia mandray karama, ary mamory vokatra ho an’ny fiainana mandrakizay, mba hiara-mifaly ny mpamafy sy ny mpijinja.

37 Fa amin’ity, marina ilay ohabolana hoe: Hafa no mamafy, hafa no mijinja.

38 Nirahiko hijinja amin’izay tsy nasainareo ianareo; fa olon-kafa no niasa, ka ianareo no nanohy ny asany.»

39 Maro ny Samaritanina tamin’izany tanàna izany no nino Azy, noho ny tenin-dravehivavy nanao hoe: «Nolazainy tamiko avokoa ny nataoko rehetra.»

40 Fa nony tonga teo aminy ny Samaritanina, dia nangataka Azy hitoetra tao aminy, ary nitoetra tao indroa andro Izy.

41 Ka vao mainka maro aza no nino Azy noho ny teny nataony,

42 sy nanao tamin-dravehivavy hoe: «Tsy noho ny filazanao intsony no inoanay fa ny tenanay izao no nandre, ka fantatray fa Izy tokoa no Mpamonjy ny olona.»

Fanasitranana ny zanakalahin’ilay mpiasam-panjakana manamboninahitra

43 Nony afaka ny indroa andro, dia niala tao Izy ka nankany Galilea.

44 Fa araka ny efa voalazany dia tsy misy mpaminany hajaina amin’ny taniny.

45 Ary nony tonga tany Galilea Izy, dia noraisin’ny Galileanina, satria efa hitany izay rehetra nataony tany Jerosalema tamin’ny andro fety, fa tany koa izy ireo tamin’ny fety.

46 Dia nankany Kanà any Galilea indray Izy, tany amin’ilay nanovàny ny rano ho divay. Ary nisy kosa manamboninahitra anankiray nanan-janakalahy narary tany Kafarnaoma,

47 ka nony reny fa hoe tonga avy any Jodea ao Galilea i Jesoa, dia nanatona Azy izy ka nangataka Azy hidina hanasitrana ny zanany efa ho faty.

48 Fa hoy i Jesoa taminy: «Raha tsy mahita famantarana sy fahagagana ianareo, dia tsy mba mety mino.»

49 Ka hoy ilay manamboninahitra taminy: «Andeha re, Tompoko, dieny mbola tsy maty ny zanako.»

50 Dia hoy i Jesoa taminy: «Modia, fa velona ny zanakao.» Ary nino ny teny nolazain’i Jesoa taminy izy ka lasa nody.

51 Nony nandeha izy, dia notsenain’ny ankiziny, ka nilazany fa velona ny zanany.

52 Ary nanontaniany azy ireo ny ora nahasitranany ka hoy ireo taminy: «Omaly tamin’ny ora fahafitono nialan’ny tazo taminy.»

53 Dia fantatry ny rainy, fa tamin’izany ora izany indrindra no nilazan’i Jesoa taminy hoe: «Velona ny zanakao» ka nino izy sy ny mpianakaviny rehetra.

54 Izany no fahagagana faharoa nataon’i Jesoa, rehefa tonga tany Galilea avy tany Jodea Izy.

Categories
Joany

Joany 5

Fanasitranana ilay malemy tao Betesdà

1 Taorian’izany, nisy andro fety tamin’ny Jody, ka niakatra tany Jerosalema i Jesoa.

2 Ary any Jerosalema ao akaikin’ny vavahadin’ny ondry, dia misy dobo anankiray atao hoe Betesdà amin’ny teny hebrio, izay misy trano heva dimy.

3 Nisy marary maro nandry tamin’ireo trano ireo, dia ny jamba, ny mandringa, ny malemy, izay niandry ny fihetsiketsehan’ny rano.

4 Fa nidina tao anatin’ny dobo ny Anjelin’Andriamanitra indraindray nampihetsiketsika ny rano, ka izay niroboka voalohany ao anatin’ny dobo rehefa nihetsiketsika ny rano, dia sitrana, na inona na inona aretiny.

5 Ary nisy lehilahy anankiray narary hatramin’ny valo amby telopolo taona teo.

6 Nony nahita azy nivalandòtra teo i Jesoa, sady fantany fa ela no naharariany, dia hoy Izy taminy: «Te ho sitrana ve ianao?»

7 Ary hoy ny navalin’ny marary: «Tompoko, tsy mba manana olona handroboka ahy amin’ny dobo aho rehefa mihetsiketsika ny rano; ka nony mba mandeha aho, dia ny hafa no tafiditra alohako.»

8 Hoy i Jesoa taminy: «Mitsangàna, ento ny fandrianao ka mandehana.»

9 Niaraka tamin’izay dia sitrana ralehilahy, ka nentiny ny fandriany dia lasa izy nandeha. Ary sabata ny andro tamin’izay.

10 Koa hoy ny Jody tamin’ny vao sitrana: «Sabata ny andro, ka tsy mahazo mitondra ny fandrianao ianao.»

11 Fa hoy ny navaliny azy: «Ilay nahasitrana ahy no nanao tamiko hoe: ‹Ento ny fandrianao ka mandehana.› »

12 Dia hoy ireo nanontany azy: «Iza moa izany lehilahy nanao taminao hoe: Ento ny fandrianao ka mandehana, izany?»

13 Tsy nahalala Azy anefa ilay vao sitrana, fa ny vahoaka moa betsaka, i Jesoa koa niala teo.

14 Taorian’izany dia hitan’i Jesoa tao an-Tempoly ralehilahy ka hoy Izy taminy: «Indro efa sitrana ianao, ka aza manota intsony sao dia ratsy noho ny teo indray no hanjò anao.»

15 Dia lasa ralehilahy nilaza tamin’ny Jody fa i Jesoa no nahasitrana azy.

16 Koa nanenjika an’i Jesoa ny Jody satria nanao izany tamin’ny andro sabata Izy.

17 Fa hoy i Jesoa taminy: «Ny Raiko miasa mandraka ankehitriny, ary Izaho koa miasa.»

18 Izay indray vao mainka nitady hamono Azy ny Jody, satria sady tsy nitandrina ny sabata Izy no nilaza fa rainy Andriamanitra, ka nanao ny Tenany ho mitovy amin’Andriamanitra.

Teny momba ny asa ataon’ny Zanaka

Dia notohizin’i Jesoa indray ny teniny, ka hoy Izy tamin’izy ireo:

19 Lazaiko marina dia marina aminareo: Tsy mahazo manao na inona na inona avy amin’ny Tenany ny Zanaka, afa-tsy izay hitany ataon’ny Ray; ary izay rehetra ataon’ny Ray dia ataon’ny Zanaka.

20 Fa tia ny Zanaka ny Ray, ka maneho aminy izay rehetra ataon’ny Tenany, ary mbola haneho aminy asa lehibe noho izao aza Izy, mba ho gaga ianareo.

21 Fa toy ny ananganan’ny Ray sy amelomany ny maty no ameloman’ny Zanaka izay tiany koa.

22 Ary ny Ray aza tsy mitsara olona, fa ny Zanaka no nomeny ny fitsarana rehetra,

23 mba hanajan’ny olona rehetra ny Zanaka tahaka ny fanajany ny Ray. Izay tsy manaja ny Zanaka, dia tsy manaja ny Ray izay naniraka Azy.

24 Lazaiko marina dia marina aminareo: Izay mihaino ny teniko sy mino Izay naniraka Ahy no manana ny fiainana mandrakizay ka tsy hohelohina, fa efa niala tamin’ny fahafatesana ho amin’ny fiainana Izy.

25 Lazaiko marina dia marina aminareo: Avy sady efa tonga sahady ankehitrinyaza ny andro handrenesan’ny maty ny feon’ny Zanak’Andriamanitra, ka izay handre dia ho velona.

26 Fa toy ny ananan’ny Ray ny fiainana ao anatiny, no nanomezany ny Zanaka hanana ny fiainana ao anatiny koa.

27 Ary nomeny fahefana hitsara Izy, satria Zanak’olona.

28 Aza gaga amin’izany, fa avy ny andro handrenesan’izay rehetra any am-pasana ny feon’ny Zanak’Andriamanitra,

29 dia hivoaka izy, ka izay nanao soa dia ho any amin’ny fitsanganam-piainana, fa izay nanao ratsy kosa, dia ho any amin’ny fitsanganam-pahamelohana.

30 Raha Izaho ihany, tsy mahazo manao na inona na inona; fa araka izay reko no itsarako, ka marina ny fitsaràko, satria tsy mitady ny sitrapoko aho, fa ny sitrapon’Izay naniraka Ahy.

31 Raha Izaho ihany no manambara ny Tenako, tsy marinany fanambaràko;

32 fa misy hafaizay manambara Ahy, ary fantatro fa marina ny fanambaràny Ahy.

33 Naniraka tany amin’i Joany ianareo, ary nanambara ny marina izy.

34 Tsy dia ny fanambaràna avy amin’olona anefa no iankinako, fa ny mba hahavoavonjy anareono ilazako izany.

35 I Joany dia jiro nirehitra sy nazava, ka nahafinaritra anareo sy nifalianareo vetivety ny fahazavany.

36 Fa manana fanambaràna manoatra ny an’i Joany Aho, satria ny asa nomen’ny Ray hovitaiko sady ataoko tokoa no manambara fa iraky ny Ray Aho.

37 Ary ny Ray izay naniraka Ahy dia Izy indrindra no nanambara Ahy. Ianareo tsy nandre ny feonyna oviana na oviana, na nahita ny tarehiny,

38 sady tsy manana ny teniny mitoetra ao anatinareo, noho ianareo tsy mino Ilay nirahiny.

39 Mandinika ny Soratra Masina ianareo, satria ataonareo fa ao no hanananareo ny fiainana mandrakizay, ary ireny indrindra no manambara Ahy;

40 nefa tsy mety manatona Ahy ianareo mba hanananareo ny fiainana.

41 Izany akory tsy dia fitadiavako voninahitra amin’olombelona;

42 fa fantatro ianareo, fa tsy manana ny fitiavana an’Andriamanitra ao aminareo.

43 Avy Aho amin’ny Anaran’ny Raiko, nefa tsy raisinareo; raha misy hafa avy, amin’ny anaran’ny tenany anefa, dia horaisinareo ihany izy,

44 Hataonareo ahoana kosa moa no fino? Koa aminareo samy hianareo no ilanareo ny voninahitrareo, fa ny voninahitra amin’Andriamanitra irery tsy tadiavinareo tsinona!

45 Aza ataonareo fa Izaho no hiampanga anareo amin’ny Ray; ao ny hiampanga anareo, dia i Môizy, izay itokianareo.

46 Fa raha mba mino an’i Môizy ianareo, dia hino Ahy koa; satria nanoratra nanambara Ahy izy.

47 Ary raha tsy mino izay nosoratany koa ianareo, hataonareo ahoana no fino ny teniko?

Categories
Joany

Joany 6

Ny nampitomboana ny mofo

1 Nony afaka izanydia lasa nankany an-dafin’ny ranomasin’i Galilea, na ny farihin’i Tiberiady i Jesoa,

2 ary vahoaka be no nanaraka Azy, noho izy ireo nahita ny fahagagana nataony tamin’ny marary.

3 Dia niakatra tany an-tendrombohitra i Jesoa, ka nipetraka teo Izy mbamin’ny mpianany.

4 Efa akaiky ny Paka andro lehibe tamin’ny Jody.

5 Nony nanopy ny masony i Jesoa, ka nahita ireto vahoaka be nanatona Azy, dia hoy Izy tamin’i Filipo: «Aiza no hividianantsika mofo hohanin’ireo?»

6 Fantany rahateo ny hataony, fa ny hitsapany azy no nilazany an’izany.

7 Dia hoy i Filipo taminy: «Na dia mofo-na denie roan-jatoaza, tsy ampy hahazoan’izy ireo sombiny kely avy akory.»

8 Ny anankiray tamin’ny mpianany koa, dia i Andre rahalahin’i Simôna Piera, nilaza taminy hoe:

9 «Misy zazalahy anankiray manana mofo orjadimy sy hazandrano roa ao: fa ho ampy inona izany amin’ny olona maro be toy izao?»

10 Dia hoy i Jesoa: «Asaovy mipetraka ny olona.» Ary nisy ahitra be teo, ka dia nipetraka ny olona, ary tokony ho dimy arivo no isan’ny lehilahy.

11 Dia nandray ny mofo i Jesoa, ka nony efa nisaotra dia nizara azy tamin’izay nipetraka ary nomeny toy izany koa ny hazandrano sady nampanaranany fo.

12 Rehefa voky izy ireo, dia hoy i Jesoa tamin’ny mpianany: «Angony ny sombintsombiny sisa tsy lany, mba tsy hisy very.»

13 Dia nangoniny, ka nahafeno sobiky roa ambin’ny folo ny sombintsombin’ny mofo dimy sisa tsy lanin’izay nihinana.

14 Nony nahita ny fahagagana nataon’i Jesoa ireo olona ireo, dia nanao hoe: «Ity tokoa no ilay Mpaminany ho avy amin’izao tontolo izao.»

15 Dia fantatr’i Jesoa fa ho avy haka Azy an-keriny hatao mpanjaka izy ireo, ka lasa indray Izy irery nankany an-tendrombohitra.

I Jesoa mandeha ambony ranomasina

16 Nony hariva ny andro, nidina nankeny amoron-dranomasina ny mpianany,

17 dia niondrana tamin’ny sambo kely ka nita ny ranomasina ho any Kafarnaoma. Efa alina ny andro tamin’izay, nefa tsy mbola tonga teo aminy i Jesoa,

18 ary nanonja ny ranomasina, fa nifofofofo mafy ny rivotra.

19 Rehefa nivoy tokony ho dimy amby roapolo na telopolo stadyizy ireo, dia nahita an’i Jesoa nandeha teny ambony ranomasina sy nanatona ny sambo kely, ka natahotra.

20 Fa hoy Izy taminy: «Izaho ihany, fa aza matahotra.»

21 Dia naniry handray Azy ho eo an-tsambo kely izy ireo, ka niaraka tamin’izay dia tafatody tamin’ny tany nokasainy haleha ny sambo.

Lahateny tao amin’ny sinagogan’i Kafarnaoma

22 Nony ampitso, tsaroan’ny vahoaka izay nijanona teny an-dafin’ny ranomasina fa tsy nisy afa-tsy sambo kely anankiray teo, ary i Jesoa tsy niara-niondrana an-tsambo tamin’ny mpianany, fa ny mpianany ihany no nandeha;

23 nefa nisy sambo kely hafa maro avy any Tiberiady tonga tao akaikin’ny tany nanomezan’ny Tompo mofo hohaniny rehefa nisaotra Izy.

24 Dia niondrana tamin’ireo sambo ireo izy nony nahita fa tsy teo i Jesoa na ny mpianany, ka nankany Kafarnaoma hitady an’i Jesoa.

25 Ary rehefa hitany teny an-dafin’ny ranomasina Izy, dia nilazany hoe: «Raby, oviana no tonga teto Ianao?»

26 Dia namaly i Jesoa ka nanao taminy hoe: «Lazaiko marina dia marina aminareo: Ianareo no mitady Ahy dia tsy noho ny nahitanareo fahagagana, fa noho ny nihinananareo ny mofo ka voky.

27 Miasà ianareo, tsy mba hahazo ny hanina mety ho levona, fa ny hanina maharitra ho amin’ny fiainana mandrakizay, dia izay homen’ny Zanak’olona anareo; fa Izy no nasian’Andriamanitra Ray tombokase»

28 Ary hoy izy ireo taminy: «Inona àry no hataonay mba hiasanay ny asan’Andriamanitra?»

29 Namaly i Jesoa ka nanao tamin’izy ireo hoe: «Izao no asan’Andriamanitra, dia ny hinoanareo Ilay nirahiny.»

30 Fa hoy ireo taminy: Inona àry no fahagagana ataonao, mba ho hitanay ka hinoanay Anao? Inona no asa ataonao?

31 Ny razantsika nihinana ny mana tany an’efitra araka ny voasoratra hoe:

Mofo avy any an-danitra no nomeny azy hohaniny.

32 Dia hoy i Jesoa taminy: «Lazaiko marina dia marina aminareo fa tsy i Môizy no nanome anareo ny mofo avy any an-danitra, fa ny Raiko no manome anareo ny mofo avy any an-danitra izay tena izy tokoa;

33 satria izay mofo midina avy any an-danitra sy manome ny fiainana an’izao tontolo izao no mofon’Andriamanitra.»

34 Ary hoy izy ireo taminy: «Tompo ô, omeo anay mandrakariva izany mofo izany.»

35 Dia hoy i Jesoa taminy: «Izaho no mofon’aina; izay manatona Ahy tsy mba ho noana intsony, ary izay mino Ahy tsy hangetaheta mandrakizay.

36 Fa efa voalazako taminareo, fa nahita Ahy ianareo, nefa tsy mino.

37 Izay rehetra omen’ny Ray Ahy no hanatona Ahy, ary izay manatona Ahy dia tsy horoahiko any ivelany,

38 satria Izaho no nidina avy any an-danitra dia tsy ny hanao ny sitrapoko, fa ny sitrapon’Izay naniraka Ahy.

39 Ary izao no sitrapon’Izay naniraka Ahy, dia ny tsy hamelako hisy very izay rehetra nomeny Ahy, fa ny mba hananganako azy amin’ny farandro.

40 Satria izao no sitrapon’ny Raiko Izay naniraka Ahy, dia ny mba hahazo ny fiainana mandrakizay izay rehetra mahita ny Zanaka ka mino Azy, ary Izaho hanangana azy amin’ny farandro.»

41 Dia nimonomonona taminy ny Jody satria Izy nanao hoe: «Izaho no mofo velona izay nidina avy tany an-danitra.»

42 «Moa tsy i Jesoa zanak’i Josefa va ity», hoy izy ireo, «izay fantatsika ny rainy aman-dreniny? Ka ahoana àry no anaovany hoe: ‹Nidina avy any an-danitra Aho?› »

43 Fa namaly i Jesoa ka nanao taminy hoe: «Aza mimonomonona ianareo.

44 Tsy misy olona mahay manatona Ahy akory raha tsy taomin’ny Ray izay naniraka Ahy, ary Izaho hanangana azy amin’ny farandro.

45 Voasoratra ao amin’ny mpaminany hoe:‹Hampianarin’Andriamanitra izy rehetra.› Koa izay rehetra nahare tamin’ny Ray ka nianatra taminy no manatona Ahy.

46 Tsy dia hoe nisy nahita ny Ray akory: fa Ilay avy amin’Andriamanitra no hany nahita ny Ray.

47 Lazaiko marina dia marina aminareo: Izay mino Ahy no manana ny fiainana mandrakizay.

48 Izaho no mofon’aina.

49 Ny razanareo nihinana ny mana tany an’efitra, nefa maty ihany;

50 tsy toy izany ny mofo nidina avy any an-danitra, fa tsy ho faty izay mihinana azy.

51 Izaho no mofo velona izay nidina avy any an-danitra:

52 raha misy mihinana ity mofo ity dia ho velona mandrakizay izy, ary ny mofo izay homeko dia ny Nofoko ho fiainan’izao tontolo izao.

53 Dia nifanditra ny Jody nanao hoe: «Hataon’ilay io ahoana àry no fanome antsika ny Nofony hohanina?»

54 Fa hoy i Jesoa tamin’izy ireo: «Lazaiko marina dia marina aminareo, fa raha tsy mihinana ny Nofon’ny Zanak’olona ianareo sy tsy misotro ny Rany, dia tsy manana ny fiainana ao aminareo.

55 Izay mihinana ny Nofoko sy misotro ny Rako no manana ny fiainana mandrakizay; ary Izaho hanangana azy amin’ny farandro.

56 Fa tena fihinana ny Nofoko, ary tena fisotro ny Rako.

57 Izay mihinana ny Nofoko sy misotro ny Rako, dia mitoetra ao anatiko, ary Izaho ao anatiny.

58 Velona ny Ray naniraka Ahy, Izaho koa dia velona amin’ny Ray; toy izany koa no hahavelona amiko izay mihinana Ahy.

59 Izany àry no mofo nidina avy any an-danitra: tsy mba tahaka ny razanareo izay nihinana mana nefa maty ihany; fa izay mihinana ity Mofo ity kosa dia ho velona mandrakizay.»

60 Izany no nolazainy raha nampianatra tao amin’ny sinagoga tany Kafarnaoma Izy.

61 Betsaka tamin’ny mpianany nony nandre izany no nanao hoe: «Sarotra izany teny izany, ka iza no mahahaino izany?»

62 Ary fantatr’i Jesoa tao am-pony fa nimonomonona tamin’izany ny mpianany, ka hoy Izy taminy: «Mahatafintohina anareo va izany?

63 Hanao ahoana ianareo, raha mahita ny Zanak’olona miakatra any amin’izay nitoerany taloha.

64 Ny Fanahy no mahavelona, ny nofo tsy mahasoaohatrinona akory: ny teny voalazako taminareo dia fanahy sy fiainana.

65 Nefa misy tsy mino aminareo. Fa fantatr’i Jesoa hatramin’ny voalohany, izay tsy hino sy izay hamadika Azy.

66 Ary hoy Izy: Izany no nilazako taminareo fa tsy misy mahay manatona Ahy raha tsy nomen’ny Ray azy izany»

Fiekem-pinoan’i Piera

67 Hatramin’izay dia maro tamin’ny mpianany no nihemotra, ka tsy niaraka taminy intsony.

68 Ka hoy i Jesoa tamin’ny roa ambin’ny folo lahy: «Ianareo koa va mba te hiala?»

69 Dia namaly i Simôna Piera ka nanao taminy hoe: «Tompo ô, hankany amin’iza àry izahay? Ianao no manana ny tenin’ny fiainana mandrakizay;

70 ary izahay efa nino sy nahalala fa Ianao no ilay Masin’Andriamanitra.»

71 I Jesoa namaly azy ireo hoe: «Moa tsy Izaho no nifidy anareo roa ambin’ny folo lahy? nefa demony ny iray aminareo.»

72 I Jodasy zanak’i Simôna IsKariota no nantsoiny, fa io, izay isan’ny roa ambin’ny folo lahy, no hamadika Azy.

Categories
Joany

Joany 7

Miakatra any Jerosalema i Jesoa hankalaza ny fety sy hampianatra

1 Taorian’izany dia nitety an’i Galilea i Jesoa fa tsy nety nankany Jodea, satria nitady hahafaty Azy ny Jody.

2 Nony efa akaiky ny fetin’ny Jody atao hoe fetin’ny Tranolay,

3 dia hoy ny rahalahiny taminy: «Mialà eto Ianao, ka mankanesa any Jodea, mba ho hitan’ny mpianatrao koa ny asa ataonao;

4 fa tsy misy mitady ny tenany ho fantatr’olona ka manao zavatra amin’ny takona. Raha manao izany zavatra izany Ianao, dia misehoa amin’izao tontolo izao.»

5 Fa na dia ny rahalahiny aza tsy nino Azy.

6 Dia hoy i Jesoa taminy: «Tsy mbola tonga ny fotoako, fa ny fotoanareo no eo mandrakariva.

7 Satria tsy mahay mankahala anareo izao tontolo izao, fa Izaho no halany, noho Izaho milaza fa ratsy ny asany.

8 Mandehana miakatra mamonjy ny fety ianareo, fa Izaho tsy miakatramamonjy izany, satria tsy mbola tonga ny fotoako.»

9 Rehefa nilaza izany izy, dia nijanona tao Galilea.

10 Kanjo nony lasa ny rahalahiny, dia mba niakatra hamonjy ny fety ihany koa Izy, saingy tsy nisehoseho, fa toa niafinafina.

11 Koa nitady Azy ny Jody tamin’ny andro fety nanao hoe: «Aiza Izy?»

12 Ary nitakoritsika Azy be ihany ny vahoaka; ny sasany nanao hoe: «Tsara fanahy Izy,» ny sasany kosa nanao hoe: «Tsia, fa misoloky ny vahoaka Izy.»

13 Nefa tsy nisy sahy niresaka Azy ampahibemaso noho ny fahatahorany ny Jody

14 Nony mby teo antenantenan’ny fety, niakatra tao amin’ny Tempoly i Jesoa, ka nampianatra.

15 Dia gaga ny Jody ka nanao hoe: «Ahoana re no ahaizany taratasy, nefa tsy nianatra Izy tsinona?»

16 Namaly i Jesoa ka nanao taminy hoe: «Tsy Ahy ny fampianarako, fa an’Ilay naniraka Ahy.

17 Ka raha misy te hanao ny sitrapon’Andriamanitra, dia hahalala na avy amin’Andriamanitra ny fampianarako, na miteny ho Ahy Aho.

18 Izay miteny ho azy dia mitady ny voninahitry ny tenany; fa izay mitady ny voninahitr’ilay naniraka azy no marina, ary tsy misy fitaka ao aminy.

19 Moa tsy nomen’i Môizy ny Lalàna va ianareo? nefa tsy misy aminareo mahatanteraka ny Lalàna.

20 Nahoana no mitady hahafaty Ahy ianareo?» Dia namaly ny vahoaka ka nanao hoe: «Azon’ny demony Ianao; iza no mitady hahafaty Anao eo?.»

21 Fa namaly i Jesoa ka nanao taminy hoe: «Asa iray monja no nataoko, dia safotra ianareo rehetra.

22 Nefa ny famorana nomen’i Môizy anareo (na tsy i Môizy, fa ny razana no niaviany), dia ataonareo na amin’ny sabata aza.

23 Ka raha foràna ny olona na dia amin’ny sabata aza, mba tsy hofoanana ny Lalàn’i Môizy, nahoana no dia tezitra amiko ianareo, raha lehilahy anankiray no mba nositraniko tamin’ny sabata ny tenany manontolo?

24 Aza dia mitsara araka ny ivelany, fa mbà mitsara araka ny marina!»

Ady hevitry ny olona momba izay niavian’i Kristy

25 Tamin’izay, dia nisy mponina sasany tao Jerosalema nanao hoe: «Moa tsy Izy io Ilay tadiavin-dry zareo hovonoina?

26 Ary nahoana no miteny ampahibemaso Izy io, ka no tsy misy sahy miteny Azy akory? Sao dia efa fantatry ny loholona kosa fa io no i Kristy?

27 Ny niavian’Izy io anefa fantatsika; fa ny hiavian’i Kristy kosa tsy misy mahalala rehefa tonga Izy.»

28 Dia niantso àry i Jesoa tao am-pampianarana tao amin’ny Tempoly ka nanao hoe: «Fantatrareo Aho, ary fantatrareo koa izay niaviako. Nefa tsy tonga ho Ahy Aho, fa marina Ilay naniraka Ahy, fa tsy fantatrareo.

29 Izaho no mahalala Azy, satria Izy no niaviako, ary Izy no naniraka Ahy.»

30 Tamin’izay dia nitady hisambotra Azy ny olona, kanefa tsy nisy sahy nitana Azy, satria tsy mbola tonga ny fotoany.

Ambaran’i Jesoa ny handehanany

31 Ary maro tamin’ny vahoaka no nino Azy ka nanao hoe: «Rehefa tonga i Kristy, moa hanao fahagagana betsaka kokoa noho ny ataon’ity Lehilahy ity va?»

32 Ren’ny Farisianina ny vahoaka nitakoritsika toy izany ny aminy, ka naniraka miaramila hisambotra Azy ny lohan’ny mpisorona sy ny Farisianina.

33 Fa hoy i Jesoa: «Kely foana sisa no itoerako aminareo dia hankany amin’Izay naniraka Ahy Aho.

34 Hitady Ahy ianareo, fa tsy hahita, sady tsy azonareo aleha izay itoerako.»

35 Dia nifampilaza hoe ny Jody: «Aiza àry no halehany no tsy ho hitantsika Izy? Ho any amin’izay miely any amin’ny Jentily va re Izy, ka hampianatra ny Jentily?

36 Ahoana no hevitr’ity teniny hoe: Hitady Ahy ianareo, fa tsy hahita, sady tsy azonareo aleha izay itoerako?.»

Fampanantenana ny rano velona

37 Tamin’ny andro lehibe famaranana ny fety, dia nitsangana i Jesoa ka niantso hoe: «Raha misy mangetaheta, aoka izy hanatona Ahy ka hisotro.

38 Fa hisy onin-drano velona hiboiboika avy ao anatin’izay mino Ahy, araka ny volazan’ny Soratra Masina.»

39 Ny Fanahy horaisin’izay hino Azy no nambarany tamin’izany; fa tsy mbola nomena ny Fanahy, satria tsy mbola niditra tamin’ny voninahiny i Jesoa.

Iadiana hevitra indray izay niavian’i Kristy

40 Nony nandre ireo teny ireo ny vahoaka, ny sasany nanao hoe: «Ity tokoa no ilay Mpaminany»;

41 ny sasany manao hoe: «Ity no i Kristy» fa hoy kosa ny sasany: «Fa angaha avy any Galilea no iavian’i Kristy?

42 Tsy voalazan’ny Soratra Masina va fa avy amin’ny taranak’i Davida, sy avy amin’ny tanàna Betlehema nitoeran’i Davida no hiavian’i Kristy?»

43 Koa nisara-tsaina ny aminy be ihany ny vahoaka.

44 Ny sasany tamin’izy ireo aza nitady hisambotra Azy; saingy tsy nisy sahy nitana Azy.

45 Dia niverina tany amin’ny lohan’ny mpisorona sy ny Farisianina ny miaramila, ka nilazan’ireo hoe: «Ahoana no tsy nitondranareo Azy?»

46 Fa hoy ny navalin’ny miaramila: «Tsy mbola nisy olona niteny tahaka iny Lehilahy iny.»

47 Dia hoy ny Farisianina tamin’ireo: «Ianareo koa angaha voasolokiny?

48 Jereo ange raha mba misy loholona na Farisianina iray akory nino Azy?

49 Ary raha izay vahoaka foana tsy mahalala ny Lalàna akory, dia olona voaozona ireny.»

50 Dia i Nikôdema ilay nanatona an’i Jesoa nony alina sy anisan’izy ireo, no nanao taminy hoe:

51 «Moa ny Lalàntsika va manameloka olona raha tsy efa re aloha ny teniny, ka fantatra koa izay nataony?»

52 Fa namaly izy ireo ka nanao taminy hoe: «Ianao koa ve avy any Galilea? Diniho dia ho hitanao fa tsy misy mpaminany avy any Galilea.»

Ilay vehivavy nijangajanga

53 Dia samy lasa nody ho any an-tranony avy izy ireo.