Baiboly Katolika (MBC)

Tso-drano ampanantenaina

1 Raha manaiky tsara ny feon’i Iaveh Andriamanitrao ianao, ka manaraka sy mitandrina ny didiny rehetra andidiako anao anio, i Iaveh Andriamanitrao hanandratra anao ho ambonin’ny firenena rehetra amin’ny tany.

2 Izao fitahiana rehetra izao no ho tonga aminao sy ho azonao, raha manaiky ny feon’i Iaveh Andriamanitrao ianao.

3 Ao an-tanàna ianao hotahîna; any an-tsaha ianao hotahîna.

4 Hotahina ny naloaky ny kibonao, ny vokatry ny taninao, ny ateraky ny biby fiompinao, dia ny teraky ny biby manompo lehibe sy madinika.

5 Hotahina ny sobika sy ny vata fitahiriza-mofonao.

6 Miditra ianao hotahina, mivoaka ianao hotahina.

7 Ny fahavalo mitsangan-kiady aminao hataon’i Iaveh vaky mandositra eo anoloanao; lalana iray no nandrosoany hiady aminao, fa lalana fito kosa no handosirany eo anoloanao.

8 Handidy ny fitahîny homba anao i Iaveh, amin’ny sompitrao sy amin’ny asan-tananao rehetra. Hotahîny ianao any amin’ny tany homen’i Iaveh Andriamanitrao anao.

9 Hampaharitra anao i Iaveh ho vahoaka masina ho Azy, araka ny efa nianianany taminao, raha mitandrina ny didin’i Iaveh Andriamanitrao ianao, ka mandeha amin’ny lalany;

10 dia ho hitan’ny firenena rehetra fa antsoina aminao ny Anaran’i Iaveh ka hatahotra anao izy ireo.

11 Hofenoin’i Iaveh soa ianao, dia ny aloaky ny kibonao, ny teraky ny biby fiompinao, ary ny vokatry ny taninao, any amin’ny tany efa nianianan’i Iaveh tamin’ny razanao homena anao.

12 Hovohan’i Iaveh ho anao ny raki-tsoany, dia ny lanitra, handatsahany ny ranonorana amin’ny fotoany eo amin’ny taninao, sy hitahiany ny asan-tananao rehetra. Firenena maro no hampisamboranao, fa ianao kosa tsy mba hisambotra.

13 Halahatr’i Iaveh ho lohany ianao, fa tsy ho rambony. Ho ambony mandrakariva ianao, fa tsy ho ambany na oviana na oviana, raha tahiny ianao mitandrina ny didin’i Iaveh Andriamanitrao, izay andidiako anao anio, ka mitandrina sy manaraka azy,

14 fa tsy mivily ho amin’ny ankavanana na ho amin’ny ankavian’ny didy rehetra andidiako anao anio mba hanaraka sy hanompo andriamani-kafa.

Ozona

15 Fa raha tsy manaiky ny feon’i Iaveh Andriamanitrao kosa ianao, mba hitandremanao ny didiny rehetra sy ny lalàna rehetra andidiako anao anio, dia izao ny ozona rehetra ho tonga sy hihatra aminao:

16 Ao an-tanàna ianao hozonina; any an-tsaha ianao hozonina.

17 Hozonina ny sobika amam-bata fitahiriza-mofonao.

18 Hozonina ny aloaky ny kibonao, ny vokatry ny taninao, ny teraky ny biby fiompinao lehibe sy madinika.

19 Miditra ianao hozonina, mivoaka ianao hozonina.

20 Ozona, horohoro ary fampitahorana no hatsindrin’i Iaveh anao amin’izay raharaha hataonao rehetra mandra-paharingana sy levona faingana anao, noho ny haratsian’ny asa nataonao, izay nahafoizanao ahy.

21 Hopetahan’i Iaveh areti-mandringana ny tenanao, mandra-pahalevona anao tsy ho eo amin’ny tany vao hidiranao hanananao azy.

22 I Iaveh hikapoka anao amin’ny areti-mampitsimozimozy, tazo, fanaintainana, hafanana mahamay, andro mihantona, aretim-bary sy niela, ka hoenjehin’ireo ianao, mandra-pahalevona anao.

23 Ny lanitrao eo ambony lohanao ho varahina, ary ny tany eo ambany tongotrao ho vy.

24 Ny vovoka amam-pasika no ranonorana halatsak’i Iaveh amin’ny taninao, ka hidina avy any an-danitra hankaminao, mandra-pahalany ritra anao.

25 Hataon’i Iaveh resy eo anoloan’ny fahavalonao ianao, lalana iray no hivoahanao hiady aminy, fa lalana fito kosa no handosiranao eo anoloany, ary ho zavatra mahatsiravina ho an’ny fanjakana rehetra ambonin’ny tany ianao.

26 Hohanin’ny voromanidina rehetra sy ny biby dia ny fatinao, ary tsy hisy hanaitra an’ireny.

27 I Iaveh hikapoka anao amin’ny didran’i Ejipta, fivontosam-body, anakandro, ary hatina tsy lai-panafody.

28 I Iaveh hikapoka anao amin’ny firediredena, fahajambana, ary fahaverezan-tsaina,

29 hitsapatsapa amin’ny mitataovovonana, toy ny jamba amin’ny haizim-pito ianao; tsy hahomby amin’ny lalana halehanao, hampahorina isan’andro ianao, ary hobaboina, nefa tsy hisy hamonjy anao.

30 Hifamofo amim-behivavy ianao, fa olon-kafa no hahazo azy; hanao trano ianao fa tsy honina aminy; hamboly voaloboka ianao, fa tsy hahazo ny vokany.

31 Hovonoina eo imasonao ny ombinao, fa tsy hihinana amin’izany ianao, hotsoahana eo anatrehanao ny ampondranao, fa tsy haverina aminao izy, ary hatolotra ny fahavalonao ny ondrinao, fa tsy hisy hamonjy anao akory.

32 Hatolotra ny firenena hafa ny zanakao lahy aman-janakao vavy, ka ny masonao foana no hipitrapitra sy ho valalanina tontolo andro noho ny alahelo azy, fa ny tananao tsy hahefa na inona na inona.

33 Ny vokatry ny taninao, ny vokatry ny asanao rehetra, hohanin’olon-kafa tsy fantatrao akory, ary ianao hampahorina sy homongoin’ny sasany isan’andro.

34 Hanjary adala ianao amin’ny fijerena ny zavatra ho hitan’ny masonao.

35 Hasian’i Iaveh fery ratsy tsy lai-panafody ny lohalikao sy ny fenao, hasiany hatrany am-paladianao ka hatrany an-tampon-dohanao.

36 Hampandehanin’i Iaveh ianao sy ny mpanjaka natsanganao ho lohanao, ho any amin’ny firenena tsy fantatrao sy tsy fantatry ny razanao, dia hanompo andriamani-kafa vato aman-kazo any ianao,

37 ka hanjary figagan’ny olona sy fanao angano amam-pihomehezana ianao, any amin’izay vahoaka rehetra hitondran’i Iaveh anao any.

38 Be no voan-javatra hoentinao any an-tsahanao fa kely no hakarinao, satria ho lanin’ny valala ireny.

39 Hamboly voaloboka ianao, sy hanolikoly azy koa, fa tsy hisotro ary tsy hioty na inona na inona akory, satria hohanin’ny fositra ireny.

40 Hanana fototr’ôliva ianao amin’ny faritaninao rehetra, fa tsy hihosotra diloilo akory, satria hihintsana ny ôlivanao.

41 Hiteraka zazalahy aman-jazavavy ianao, nefa tsy ho anao ireny, fa ho lasan-ko babo.

42 Ho lanin’ny bibikely ny hazonao rehetra sy ny vokatry ny taninao.

43 Ny vahiny monina eo aminao hisondrotra hatrany ho ambony noho ianao; fa ianao kosa hietry mandrakariva ho ambany;

44 izy hampisambotra anao, fa ianao kosa tsy mba hampisambotra azy, izy ho lohany fa ianao kosa ho rambony.

45 Hianjera aminao avokoa ireo ozona rehetra ireo, ary hanenjika sy hahatratra anao tokoa, mandra-paharinganao mihitsy, noho ianao tsy nanaiky ny feon’i Iaveh Andriamanitrao, hitandremanao ny didy aman-dalàny nandidiany anao.

46 Ary ho famantarana amam-pahagagana ho anao sy ny taranakao mandrakizay.

Ady sy sesitany mety hisy

47 Noho ianao tsy nanompo an’i Iaveh Andriamanitrao an-kafaliana sy an-jotom-po ho valin’ny fananam-be amin’ny zavatra rehetra;

48 dia amin’ny hanoanana sy hetaheta, ary amin’ny fitanjahana sy tsy fananana na inona na inona kosa no hanompoanao ny fahavalonao, izay halefan’i Iaveh hamely anao; hanisy jioga vy ny vozonao mandra-pandringany anao Izy.

49 Firenena avy lavitra, avy amin’ny fara vazantany, faingam-pandeha hoatra ny fanidin’ny voromahery, firenena tsy azonao veroka akory no hampandehanin’i Iaveh hamely anao;

50 firenena mahatsiravina endrika, tsy handala ny antitra na hangoraka ny tanora akory.

51 Holaniny ny teraky ny biby fiompinao sy ny vokatry ny taninao mandra-pahalevona anao. Tsy misy hamelany ho anao, na vary, na divay vaovao, na diloilo, na teraky ny biby fiompinao, na lehibe na kely, mandra-pandringany anao.

52 Hataony fahirano ianao, anatin’ny vavahadinao rehetra, mandra-paharavan’ny manda avo sy mafy amin’ny taninao, izay nitokianao. Hataony fahirano ianao ao amin’ny vavahadinao rehetra sy amin’ny tany rehetra, izay nomen’i Iaveh Andriamanitrao anao.

53 Hohaninao ny naloaky ny kibonao, dia ny mofon’ny zanakao lahy aman-janakao vavy, izay nomen’i Iaveh Andriamanitrao anao, fa ho mafy loatra ny horohoro amam-pahoriana haneren’ny fahavalonao anao.

54 Ny lehilahy fatra-piangentsana sy zatra manao fiainana indrindra aminareo, ho ratsy fijery ny rahalahiny sy ny vady mandry eo am-pofoany ary ny zanany sisa tsy novonoiny,

55 ary tsy misy homeny amin’ny mofon-janany izay hohaniny, satria tsy hisy sisa intsony ao aminy noho ny hamafin’ny horohoro amam-pahoriana haneren’ny fahavalonao anao, anatin’ny vavahadinao rehetra.

56 Ny vehivavy fatra-piangentsana sy zatra manao fiainana indrindra aminareo, izay malemilemy sy sarotsarotiny ka tsy sahy manitsaka ny tany amin’ny faladiany akory, dia ho ratsy fijery ny vady mandry eo am-pofoany, sy ny zanany lahy aman-janany vavy,

57 noho ny amin’ny ahitra izay nivoaka avy eo anelanelan’ny tongony, sy noho ny zanany vao teraka, satria hohaniny mangingina izany, fa tsy manana na inona na inona izy, noho ny hamafin’ny horohoro amam-pahoriana haneren’ny fahavalonao anao, anatin’ny vavahadinao rehetra.

58 Raha tsy tandremanao tsara ny fanarahana ny teny rehetra amin’ity lalàna ity, izay voasoratra amin’ity boky ity, ka tsy atahoranao ity Anarana be voninahitra sy mahatahotra ity hoe Iaveh Andriamanitrao,

59 dia hataon’i Iaveh mahatsiravina mihitsy ny loza hamelezany anao sy ny loza hamelezany ny taranakao, loza lehibe sady tsy tapaka, aretina mafy sady tsy azo sitranina.

60 Hataony hihatra aminao indray ny aretina rehetra tany Ejipta izay nampangovitra anao, ka hiraikitra aminao izany.

61 Fanampin’izany, hataon’i Iaveh mahazo anao koa, ny aretina amam-pery isan-karazany izay tsy voasoratra amin’ny bokin’ity lalàna ity, mandra-paharinganao.

62 Ianao efa maro toy ny kintana eny an-danitra iny, ka ho olom-bitsy sisa tavela aminao, noho ianao tsy nihaino ny feon’i Iaveh Andriamanitrao.

63 Ho toy ny nifalian’i Iaveh tamin’ny nanasoavany sy nampitomboany anao ihany no hifalian’i Iaveh koa amin’ny handringanany sy handravàny anao kosa, ka hofongorana ianareo amin’ny tany hidiranao hanananao azy.

64 Haelin’i Iaveh any amin’ny vahoaka rehetra hatrany amin’ny fara vazantany ianao, ary any dia hanompo andriamani-kafa vato aman-kazo tsy fantatrao na fantatry ny razanao akory.

65 Any amin’izany firenena izany ianao, dia tsy ho afaka ahiahy ary tsy misy tany hitsaharan’ny faladianao; fo tebiteby, maso manjambena ary fanahy miferinaina no homen’i Iaveh anao any.

66 Ny ainao hihevingevina eo anoloanao, ianao hangovitra andro aman’alina, ka tsy hanampò izay ho velona intsony ianao.

67 Maraina ianao hanao hoe: Malakia hariva! Hariva ianao hanao hoe: Malakia maraina! noho ny tahotra hampivadi-po anao sy ny zavatra ho hitan’ny masonao.

68 Haverin’i Iaveh an-tsambo ho any Ejiptaianao, hihazo ny lalana voalazako taminao hoe: Tsy ho hitanao intsony izany, ary any ianareo hivaro-tena ho andevolahy sy andevovavy amin’ny fahavalonareo nefa tsy hisy mpividy.

Famaranana

69 Izao no tenin’ny fanekena nandidian’i Iaveh an’i Môizy hatao amin’ny zanak’i Israely, tany amin’ny tany Moaba, afa-tsy ilay fanekena nataony taminy tany Horeba.

Fampahatsiahivana ny Eksaody sy ny fanekem-pihavanana

1 Niantso an’i Israely rehetra i Môizy, dia nilaza taminy hoe: Efa hitanareo izay nataon’i Iaveh teo imasonareo, tany amin’ny tany Ejipta, tamin’i Faraôna sy ny mpanompony rehetra ary ny taniny rehetra,

2 dia ny fizahan-toetra lehibe, ireo famantarana amam-pahagagana lehibe efa hitan’ny masonao.

3 Mandrak’androany anefa dia mbola tsy nomen’i Iaveh fo mahalala sy maso mahita ary sofina mahare ianareo.

4 Efapolo taona no nitondrako anareo tany an’efitra; nefa ny fitafiana teny an-koditrareo tsy tonta, ny kapa tamin’ny tongotrareo tsy tonta,

5 tsy mofo nohaninareo, tsy divay na labiera nosotroinareo; mba hahazoanareo mahalala fa Izaho no Iaveh Andriamanitrareo.

6 Toy izany no nahatongavanareo teto amin’ity toerana ity. Nivoaka nitsena antsika hiady tamintsika i Sehôna mpanjakan’i Hesebona, sy i Oga mpanjakan’i Basàna, fa resintsika

7 ka nalaintsika ny taniny, dia nomentsika ho zaratanin’ny Robenita sy ny Gadita ary ny antsasam-pokon’ny Manasita.

8 Koa tandremo àry ny tenin’ity fanekena ity, ary araho izy, mba hahomby ianareo, amin’izay rehetra hataonareo.

9 Miseho eto anatrehan’i Iaveh Andriamanitrareo ianareo rehetra anio, dia ny lehibenareo, ny fokonareo, ny loholonareo, ny mpifehy anareo, ny lehilahy rehetra amin’i Israely,

10 ny zanakareo sy ny vadinareo ary ny vahiny eo an-tobinao hatramin’ny mpikapa hazonao ka hatramin’ny mpantsaka ranonao,

11 mba hiditra amin’ny faneken’i Iaveh Andriamanitrao, sy amin’ny fianianany; dia nyfanekenaizay ataon’i Iaveh Andriamanitrao aminao anio,

12 mba hanandratany anao anio ho vahoakany, dia Izy no ho Andriamanitrao, araka ny nolazainy taminao sy nianianany tamin’ny razanao Abrahama sy Isaaka ary Jakôba.

Ho an’ny taranaka ho avy koa ny Fanekem-pihavanana

13 Tsy aminao ihany no anaovako izao fanekena sy fianianana izao

14 fa amin’izay rehetra eto amintsika anio, eto anatrehan’i Iaveh Andriamanitsika, sy amin’ireo tsy eto amintsika anio koa na iza na iza.

15 Fantatrareo izay nitoerantsika tany Ejipta sy izay namakiantsika ny tanin’ny firenena izay nandalovanareo;

16 efa hitanareo ny fahavetavetan’izy ireo sy ny sampy vato aman-kazo, volafotsy amam-bolamena, tany amin’izy ireo.

17 Koa aoka tsy hisy aminareo anio, na lahy na vavy, na fianakaviana na foko, hanana fo mivily miala amin’i Iaveh Andriamanitsika, mba handeha hanompo ny andriamanitr’ireny firenena ireny; aoka tsy hisy aminareo ho fototra hiteraka poizina sy absinta.

18 Aoka tsy hisy amin’izay mandre ny tenin’ity fianianana ity, hihambo anakampony manao hoe: Hiadana ihany aho, na dia mandeha manaraka ny ditran’ny foko aza; ka dia ho voatariky ny efa leony izay mangetaheta.

19 Tsy hanaiky hamela heloka izany olona izany i Iaveh, fa hirehitra amin’izany olona izany ny fahatezeran’i Iaveh sy ny fahasarotam-piarony ka hianjera aminy avokoa ny ozona rehetra voasoratra amin’ity boky ity, ary hovonoin’i Iaveh tsy ho eto ambanin’ny lanitra ny anarany.

20 Hosarahin’i Iaveh amin’ny fokon’i Israely rehetra izy, ka hatolony amin’ny loza, araka ny fanozonana momba ny fanekena voasoratra amin’ity bokin’ny lalàna ity.

21 Ny taranaka any aoriana, ny zanakareo mbola ho teraka handimby anareo mbamin’ny vahiny avy amin’ny tany lavitra, hahita ny loza sy ny aretina hamelin’i Iaveh izany tany izany,

22 dia ny solifara sy ny sira, fanakilana an’izany tany rehetra izany, izay tsy hofafazana, tsy hanome vokatra avy aminy, tsy haniriana ahitra akory, toy ny tamin’ny fikorontanan’i Sôdôma sy i Gômôra, i Adamà sy i Sebôima, izay nakorontan’i Iaveh tamin’ny fahatezerany amam-pahavinirany,

23 ka hiteny izany firenena rehetra izany hanao hoe: Nahoana i Iaveh no dia nanao izao tamin’izany tany izany? Inona no dia nahatonga izao firehetam-pahatezerana lehibe izao? Dia hisy hilaza hanao hoe:

24 Noho izy ireo nahafoy ny fanekena tamin’i Iaveh Andriamanitry ny razany, izay nataony tamin’izy ireo, fony Izy nampivoaka azy avy tany amin’ny tany Ejipta

25 ka nandeha nanompo andriamani-kafa sy niankohoka teo anatrehan’ireny andriamanitra tsy fantany akory, na nomen’i Iaveh ho anjarany,

26 dia nirehitra tamin’izany tany izany ny fahatezeran’i Iaveh, nazerany taminy avokoa ny ozona rehetra voasoratra amin’ity boky ity.

27 Fahatezerana sy fahavinirana amam-pisafoahana lehibe no nanatsoahan’i Iaveh azy hiala amin’ny taniny, sy nanilihany azy ho any an-tany hafa, tahaka izao ankehitriny izao.

Fiverenana avy any an-tsesitany sy fibebahana

28 Ny zava-miafina, an’i IavehAndriamanitsika; fa ny zava-nambara kosa, antsika sy ny taranatsika mandrakizay, mba hanatanterahantsika ny teny rehetra amin’ity lalàna ity.

1 Rehefa tonga izay hiharan’izao zavatra rehetra izao aminao dia ny tso-drano sy ny ozona izay nataoko teo anoloanao ary hataonao ho zavatra tokoa indray izany any amin’ny firenena handroahan’i Iaveh Andriamanitrao anao,

2 ka miverina amin’i Iaveh Andriamanitrao sy mihaino ny feony amin’ny fonao rehetra sy ny fanahinao rehetra ianao sy ny taranakao, araka izao andidiako anao anio izao,

3 i Iaveh Andriamanitrao kosa hampody izay babo aminao sy hamindra fo aminao. Hangoniny avy amin’ny firenena nanelezan’i Iaveh anao indray ianao.

4 Na dia efa any amin’ny fara vodilanitra aza ny voasesitany aminao, dia avy any no hanangonan’i Iaveh Andriamanitrao anao, any no hangalany anao.

5 Ary haverin’i Iaveh Andriamanitrao amin’ny tany efa nananan’ny razanao, ka hanana izany ianao. Hanisy soa anao Izy ary hahamaro anao mihoatra noho ny razanao.

6 Hoforàn’i Iaveh Andriamanitrao ny fonao sy ny fon’ny taranakao, hitiavanao an’i Iaveh Andriamanitrao, amin’ny fonao rehetra sy amin’ny fanahinao rehetra mba ho velona ianao.

7 Ary hazeran’i Iaveh Andriamanitrao amin’ny fahavalonao, izay nankahala sy nanenjika anao, ireny fanozonana rehetra ireny.

8 Ka dia hihaino ny feon’i Iaveh Andriamanitrao indray ianao, sy hanaraka izao didy rehetra andidiako anao anio izao,

9 ka hanototra soa anao i Iaveh Andriamanitrao, amin’ny asan-tananao, ny naloaky ny kibonao, ny teraky ny biby fiompinao ary ny vokatry ny taninao, fa hifaly aminao indray i Iaveh manisy soa anao, toy ny nifaliany tamin’ny razanao,

10 raha mihaino ny feon’i Iaveh Andriamanitrao ianao, ka mitandrina ny didy aman-dalàna voasoratra amin’ity bokin’ny lalàna ity, raha miverina amin’i Iaveh Andriamanitrao, amin’ny fonao rehetra, sy amin’ny fanahinao rehetra.

11 Izao didy andidiako anao izao tsy dia hoe, ambiny ho anao na ivelan’ny takatrao.

12 Tsy any an-danitra izy ka hisy hanaovanao hoe: Iza no hiakatra any an-danitra haka izany ho antsika mba hanarahantsika izany?

13 Tsy any an-dafin’ny ranomasina izany, ka hisy hanaovanao hoe: Iza no hampita ny ranomasina haka izany ho antsika, sy hampahafantatra izany antsika mba hanarahantsika azy?

14 Fa eo akaikinao indrindra ny teny, dia eo am-bavanao sy ao am-ponao, mba hanarahanao azy.

Lalana roa

15 Indro, nataoko eo anoloanao androany ny fiainana sy ny tsara, ny fahafatesana sy ny ratsy,

16 tamin’ny nandidiako anao androany ho tia an’i Iaveh Andriamanitrao sy handeha amin’ny lalany, ary hitandrina ny didy aman-dalàny mbamin’ny fitsipiny, mba ho velona ianao, sy hihamaro ary hambinin’i Iaveh Andriamanitrao any amin’ny tany efa hidiranao mba hanananao azy.

17 Fa raha mivily kosa ny fonao, ka tsy mihaino ianao, fa mety hotarihina hiankohoka amin’andriamani-kafa sy hanompo azy,

18 dia ambarako anareo dieny ankehitriny, fa ho ringana tokoa ianareo; tsy ho lava andro any amin’ny tany efa hidiranareo hanananareo azy, rehefa tafita an’i Jordany, ianao.

19 Miantso ny tany aman-danitra ho vavolombelona aminareo anio aho, fa nataoko eo anoloanao ny fiainana sy ny fahafatesana, ny tso-drano sy ny ozona; koa fidio àry ny fiainana, mba ho velona ianao sy ny taranakao,

20 amin’ny fitiavana an’i Iaveh Andriamanitrao, sy fihainoana ny feony, ary firaiketana Aminy, fa izany no fiainanao sy andro lava honenanao any amin’ny tany efa nianianan’i Iaveh homena an’i Abrahama sy i Isaaka ary i Jakôba, razanao.

Ny asa anirahana an’i Jôsoe

1 Ary nanao izao teny izao tamin’i Israely rehetra koa i Môizy ka nanao tamin’izy ireo hoe:

2 «Efa roapolo amby zato taona androany aho izao, ka tsy afaka mivoaka sy miditra intsony, ary i Iaveh efa nilaza tamiko hoe: Tsy hita an’io Jordany io ianao.

3 I Iaveh Andriamanitrao no hita eo alohanao, Izy no handringana ireo firenena ireo eo anoloanao, ka dia hahazo azy ireo ianao. I Jôsoe no hita eo alohanao, araka ny voalazan’i Iaveh.

4 Toy ny nataon’i Iaveh tamin’i Sehôna sy i Oga, mpanjakan’ny Amôreana, izay naringany mbamin’ny taniny, no hataony amin’ireo koa.

5 Hatolotr’i Iaveh aminareo izy, ka ataovy araka ny lalàna rehetra nandidiako anareo.

6 Mahereza ary matanjaha tsara, fa aza matahotra na mimalo amin’ireo akory, satria i Iaveh Andriamanitrao no miara-mandeha aminao, tsy hahafoy anao Izy na handao anao.»

7 Dia nantsoin’i Môizy i Jôsoe, ka hoy izy taminy, teo anatrehan’i Israely rehetra: «Mahereza ary matanjaha tsara, fa ianao no hiditra miaraka amin’ity vahoaka ity, any amin’ny tany efa nianianan’i Iaveh tamin’ny razany homena azy ireo; ary ianao no hampanana azy ireo izany.

8 Fa i Iaveh no handeha eo alohanao, Izy no homba anao fa tsy hahafoy anao na handao anao Izy, ka aza matahotra na mivadi-po ianao.»

Hovakina eo amin’ny fotoam-pivavahana ny lalàna

9 Nosoratan’i Môizy izany lalàna izany, dia natolony tamin’ny mpisorona, taranak’i Levì mpitondra ny fiaran’ny faneken’i Iaveh, mbamin’ny loholon’i Israely rehetra.

10 Ary nomeny izao didy izao izy: «Aorian’ny isam-pito taona amin’ny fotoan’ny taom-panafahana, amin’ny fetin’ny Tabernakla,

11 raha ilay tonga hiseho eo anatrehan’i Iaveh Andriamanitrao iny i Israely rehetra, any amin’ny fitoerana izay hofidiny; dia vakio eo anatrehan’i Israely rehetra ity lalàna ity, mba hohenoiny.

12 Vorio avokoa ny vahoaka, na lahy na vavy, na ankizy na vahiny eo anatin’ny vavahadinao, mba hihaino ka hianatra ny hatahotra an’i Iaveh Andriamanitrareo, ka hitandrina tsara sy hanaraka ny teny rehetra amin’ity lalàna ity.

13 Ary handre izany ny zanany, izay tsy mahalala, ka hianatra ny hatahotra an’i Iaveh Andriamanitrareo, amin’ny andro rehetra hiainanareo eo amin’ny tany izay efa hankanesanareo hanananareo azy, rehefa tafita an’i Jordany ianareo.»

Tenin’i Iaveh amin’i Môizy

14 Dia hoy i Iaveh tamin’i Môizy: «Indro, antomotra ny fotoana hahafatesanao; koa antsoy i Jôsoe, ary tongava ao an-trano lay fihaonana ianareo, mba hanomezako azy ny didiko.» Dia nandeha nankao an-trano lay fihaonana i Môizy sy i Jôsoe,

15 ka niseho tao an-trano i Iaveh tamin’ny andry rahona, ary ny andry rahona nijanona teo am-baravaran’ny trano lay fihaonana.

16 Dia hoy i Iaveh tamin’i Môizy: «Indro efa ho tafandriana any amin’ny razanao ianao, ary ity vahoaka ity hitsangana hitolo-tena amin’ny andriamani-kafa any amin’ny tany efa hidirany. Handao Ahy izy ary hivadika ny fanekena nataoko taminy.

17 Dia hirehitra aminy ny fahatezerako amin’izany, hafoiko izy, ary hafeniko aminy ny Tavako, ka dia hataon’ny olona levona izy, sady hianjeran-doza amam-pahoriana be dia be. Izay vao ho vaky hoe: Moa ve tsy noho Andriamanitro tsy eto amiko no nianjeran’izao fahoriana izao amiko?

18 Izaho anefa amin’izany andro izany dia hanakona ny tavako noho ny ratsy rehetra nataony, tamin’ny niviliany hanaraka andriamani-kafa.»

Ny tononkira vavolombelona

19 «Koa soraty izao tononkira izao. Ampianaro ny zanak’i Israely, ary ataovy eo am-bavany mba ho vavolombelona hoentiko miampanga ny zanak’i Israely izany tononkira izany.

20 Satria izy ireo rehefa tafiditra eo amin’ny tany nampanantenaiko ny razany tamim-pianianana, tany tondra-dronono sy tantely, ka efa nihinana sy voky, ary nihamatavy, dia amin’izay izy no hivily hanaraka andriamani-kafa ka hanompo azy ary haniratsira Ahy sy hivadika ny fanekeko.

21 Koa rehefa hidiran-doza amam-pahoriana be izy, dia izao tononkira izao no ho vavolombelona hiampanga azy, fa tsy ho very tadidy,tsy ho afaka am-bavan’nytaranany izao. Satria efa fantatro izay saina eo aminy hatramin’ny ankehitriny, na dia alohan’ny hampidirako azy any amin’ny tany nampanantenaiko tamim-pianianana aza».

22 Dia nosoratan’i Môizy androtr’izay ihany izany tononkira izany, ka nampianariny ny zanak’i Israely.

23 Ary i Iaveh nanome didy an’i Jôsoe, zanak’i Nona, ka nanao taminy hoe: «Mahereza sy matanjaha tsara, fa ianao no hampiditra ny zanak’i Israely any amin’ny tany nampanantenaiko azy tamim-pianianana, ary Izaho homba anao».

Ny lalàna apetraka eo anilan’ny Fiaran’ny Fanekena

24 Nony efa tapitra voasoratr’i Môizy tamin’ny boky anankiray ny tenin’ity lalàna ity,

25 dia nanome izao didy izao tamin’ny Levita mpitondra ny fiaran’ny faneken’i Iaveh izy:

26 «Raiso ity bokin’ny lalàna ity ka apetraho eo anindran’ny fiaran’ny faneken’i Iaveh Andriamanitrareo, ka eo izy dia vavolombelona miampanga anao.

27 Fa fantatro ny ditran’ny fonao sy ny hamafy hatokao; amin’izao aho mbola velona eo aminareo izao aza, efa niodina tamin’i Iaveh ianareo, ka mainka izany fa rehefa maty aho.»

Vorìna i Israely hihaino ny tononkira

28 «Koa vorio eto amiko ny loholona rehetra amin’ny fokonareo sy ny mpitsara anareo, dia hanonona izao teny izao amin’ny sofiny aho, ary hiantso ny lanitra sy ny tany ho vavolombelona miampanga azy.

29 Satria fantatro fa rehefa maty aho, dia hihasimba marina tokoa ianareo, dia hivily hiala amin’ny lalana nasaiko nalehanareo ianareo, ka ho tratry ny loza, any amin’ny andro aoriana any, noho ianareo nanao izay ratsy eo imason’i Iaveh sy nampahatezitra azy tamin’ny asan-tananareo.»

30 Dia nolazain’i Môizy hatramin’ny farany, teo an-tsofin’ny fiangonan’i Israely rehetra, izao tononkira izao:

TONONKIRAN’I MÔIZY

1 Mampandria sofina, ry lanitra, fa hiteny Aho;

ary aoka ny tany hihaino ny teny haloaky ny vavako.

2 Aoka hirotsaka toa ranonorana ny fampianarako;

ary hilatsaka tahaka ny ando ny teniko,

dia tahaka ny tandrifin-drahona amin’ny zava-maitso,

toy ny rano mitete amin’ny ahi-maitso.

3 Fa hitory ny Anaran’i Iaveh aho:

ka omeo voninahitra ny Andriamanitsika.

4 Ny vatolampy, lavorary ny asany,

ara-drariny ny lalany rehetra;

fa Andriamanitra mahatoky sy tsy misy ratsy Izy;

marina sy mahitsy.

5 Nanota taminy izy ireo, tsy mba ny zanany fa ny faikan’izy ireo,

taranaka ratsy sy mpivadika.

6 Izany va no avalinareo an’i Iaveh,

ry vahoaka adala, tsy manam-pahendrena?

Tsy Izy va no Rainao sy Mpahary anao,

Izay nanao anao sy nanorina anao?

7 Tsarovy ny andro taloha,

saino ny taona tamin’ny taranaka taloha,

anontanio an-drainao, fa hatorony anao,

amin’ny anti-panahy, fa halazany anao:

8 Nony nomen’ny Avo indrindra zaratany ny firenena,

nony natokotokony ny zanak’olombelona,

dia nametra ny faritanin’ny vahoaka Izy;

araka ny isan’ny zanak’i Israely.

9 Satria ny anjaran’i Iaveh dia ny vahoakany,

ary i Jakôba no anjara lovany.

10 Hitany tany an-tany efitra izy,

dia tao an-tany foana misy biby dia mierona,

ka nofefeny sy nokolikoleny

ary notandremany toy ny anakandriamasony.

11 Mova tsy ny voromahery manaitaitra ny zanany madinika

sy manidintsidina eo ambonin’ny zanany

no namelarany ny elany nandraisany azy,

sy nitondrany azy teo ambonin’ny elany.

12 I Iaveh irery no nitondra azy;

fa tsy nisy andriamani-kafa niaraka taminy.

13 Teo ambonin’ny havoana amin’ny tany no nampiakarany azy;

ary ny vokatry ny saha no nohanin’i Israely:

nampitsentsefiny azy ny tantely avy amin’ny vatolampy

sy ny diloilo avy amin’ny vato mafy indrindra;

14 ary ny hero-dronono avy amin’ny ombivavy sy ny rononon’ondry,

mbamin’ny tavin’ny zanak’ondry,

sy ny ondralahy teraka tany Basàna sy ny osilahy,

ary ny vary faran’izay tsara indrindra;

ary ny ran’ny salohim-boaloboka no nosotroinao dia ny divay mandroatra.

15 Kanjo nihanatavy i Jesorònaka nibohy;

– eny efa tonga matavy sy botrefona ary dongadonga ianao,

ka dia nahafoy ny Andriamanitra izay nanao azy

sy naniratsira ny Vatolampy famonjena azy.

16 Nampahasaro-piaro Azy tamin’ny andriamanitra hafa izy ireo

ary nampahatezitra Azy tamin’ny fahavetavetana.

17 Nanao sorona tamin’ny demony izay tsy Andriamanitra izy,

dia tamin’ny andriamanitra tsy fantany,

andriamanitra vaovao, vao niseho tsielatsiela,

izay tsy mba natahoran’ny razanareo akory.

18 Nandao ny Vatolampy izay niteraka anao ianao

ary nanadino ny Andriamanitra izay nanao anao.

19 Nahita izany i Iaveh, ka tezitra,

nohantsin’ny zanany lahy aman-janany vavy Izy.

20 Hoy izy: «Hafeniko azy ny Tavako,

dia ho hitako izay hiafarany,

fa taranaka mpivadibadika izy,

zaza tsy manana hitsim-po.

21 Nampahasaro-piaro Ahy tamin’izay tsy andriamanitra izy

ary nampahatezitra Ahy tamin’ny sampiny tsinontsinona,

ka dia mba hampahasaro-piaro azy amin’izay tsy vahoaka kosa Aho,

sy hampahatezitra azy amin’izay firenena adala.

22 Fa nirehitra ny afon’ny fahatezerako,

ka mandoro ny fonenan’ny maty hatrany amin’ny faran’ny ambany,

mandevona ny tany amam-bokatra eo aminy,

mandrehitra ny tendrombohitra hatramin’ny fotony.

23 Havangongoko aminy ny loza,

holaniko aminy ny zana-tsipìkako;

24 hofezahin’ny mosary izy,

holevonin’ny tazo amam-pesta mpandringana;

ary halefako hamely azy koa ny nifin’ny biby,

mbamin’ny poizin’ny biby mikisaka amin’ny vovoka.

25 Avy any ivelany, dia hovonoin’ny sabatra ny zaza,

ary ao anaty kosa dia hisy fivadiham-po;

na ny zatovolahy na ny zatovovavy,

na ny zaza mbola minono na ny efa antitra.»

26 Saiky hataoko hoe: Hofaohiko amin’ny indray mitsoka ireo,

hofoanako tsy ho eo amin’ny olombelona ny fahatsiarovana azy,

27 raha tsy noho ny tahotro ny hireharehan’ny fahavalo

sy ny hahadiso hevitra ny mpandrafy azy,

ka hilaza hoe: Ny tanany no nahery;

fa tsy i Iaveh no nanao izany rehetra izany.

28 Fa firenena tsy manam-pahendrena izy,

ary tsy misy saina eo aminy.

29 Raha mba hendry dia ho nahalala izao,

sy ho nahafantatra ny tokony hiafarany.

30 Hataon’ny irery lahy ahoana no fanenjika ny arivo,

hataon’ny roa lahy ahoana ny fampandosirana ny iray alina,

raha tsy ny Vatolampy no efa nivarotra azy,

raha tsy i Iaveh no efa nanolotra azy?

31 Fa tsy mitovy amin’ny Vatolampintsika ny vatolampin’izy ireo:

vavolombelon’izany ny fahavalontsika.

32 Fa karazam-boaloboka avy any Sôdôma no foto-boalobony,

sy avy any amin’ny sahan’i Gômôra;

voaloboka misy poizina no mba voalobony,

sampaho mangidy no mba azy.

33 Poizina avy amin’ny dragona no divainy,

poizina mahafaty avy amin’ny aspika.

34 Moa tsy zavatra voaafina ato amiko va izany.

Sy voaisy fitomboka ato amin’ny rakitro?

35 Ahy ny fampanodiavana sy ny famaliana

amin’ny fotoana hahatafintohina ny tongony,

fa antomotra ny andro hahitany loza,

ary ho avy faingana izay anjara ho azy.

36 Fa homen’i Iaveh rariny ny vahoakany,

ary nony mpanompony dia hanenina izy,

rehefa hitany fa lany hery ireo,

ka tsy misy sisa intsony na ny andevo na ny olona afaka.

37 Dia hiteny izy hanao hoe: Aiza izay Andriamanitrareo?

dia ny vatolampy nialofany,

38 izay nihinana ny saboran-tsorona nataony

sy nisotro ny divaim-panatitra nararany?

aoka hoe hitsangana ireny, aoka hamonjy anareo!

Aoka hoe hampialoka anareo ambanin’ny fiarovany!

39 Jereo amin’izao fa Izaho, dia Izaho ihany no izy,

ary tsy misy andriamanitra miolotra amiko;

Izaho no mahafaty sy mahavelona;

Izaho no naharàtra, ary Izaho koa no hahasitrana.

Ary tsy misy olona mahafaka amin’ny tanako.

40 Eny manangana ny tanako manandrify ny lanitra Aho

no manao hoe: Velona mandrakizay Aho!

41 Rehefa hanasa ny sabatro manelatrelatra

sy handray ny fitsarana ny tanako,

dia hasiako valim-bonoana ny fahavaloko,

ary hampandraisiko tody izay mandrafy Ahy.

42 Homamoiko ra ny zana-tsipìkako,

ary hihinana mofo ny sabatro;

dia ny ran’ny voavono sy ny babo,

ary ny loha lava volon’ny fahavalo.

43 Ry firenena, aoka hanao horakora-pifaliana ianareo,

ho voninahitry ny vahoakany.

Fa valian’i Iaveh ny ran’ny mpanompony

asiany valim-bonoana izay mandrafy Azy.

Dia manao fanonerana ho an’ny taniny,

ho an’ny vahoakany Izy.

44 Tonga i Môizy ka nilaza ny teny rehetra amin’izany tononkira izany mba ho ren’ny vahoaka, ary nomba azy i Jôsoe zanak’i Nona.

Ny lalàna, loharanon’aina

45 Nony tapitra voalazany tamin’i Israely rehetra izany teny rehetra izany,

46 dia hoy izy tamin’izy ireo: «Raiso amin’ny fo mazoto izao teny rehetra ambarako eto anatrehanareo anio izao, izay tsy maintsy andidianareo ny zanakareo koa, mba hanarahany tsara ny teny rehetra amin’ity lalàna ity.

47 Satria tsy zavatra tsy ahoan-tsy ahoana ho anareo izany, fa fiainanareo, ary izany teny izany no hahalava andro anareo, eo amin’ny tany efa ho azonareo amin’ny fitàna an’i Jordany.»

Fanambaràna ny hahafatesan’i Môizy

48 Androtr’izay ihany dia niteny tamin’i Môizy i Iaveh nanao hoe:

49 «Miakara any amin’io tendrombohitr’i Abarima io, amin’ny tendrombohitra Nebao, amin’i Moaba, tandrifin’i Jerikao, ka tazano ny tany Kanaana, izay omeko ny zanak’i Israely ho fananany.

50 Ho faty eo amin’ny tendrombohitra hiakaranao ianao, dia hangonina any amin’ny razanao, tahaka ny nahafatesan’i Aarôna rahalahinao tany an-tendrombohitra Hôra, sy nanangonana azy tany amin’ny razany;

51 satria nanota tamiko teo afovoan’ny zanak’i Israely ianareo, tao amin’ny ranon’i Meribà any Kadesy, amin’ny efitra Sina, ka tsy nankamasina Ahy, teo afovoan’ny zanak’i Israely.

52 Ho hitanao tandrifinao ny tany, nefa tsy hiditra eo amin’izany tany izany izay omeko ny zanak’i Israely ianao.»

Tso-dranon’i Môizy

1 Izao no tso-drano nataon’i Môizy, olon’Andriamanitra, tamin’ny zanak’i Israely, talohan’ny nahafatesany.

2 Hoy izy:

«Tonga avy tany Sinaia i Iaveh,

niposaka ho azy ireo avy any Seira Izy;

namirapiratra avy ao an-tendrombohitra Faràna Izy,

ary nivoaka teo afovoan’ny masina tsy omby alinalina;

ary nitselatra ho azy ireo avy eo ankavanany ny

tsirim-pahazavana.

3 Tiany koa ny vahoaka,

eo an-tananao avokoa ny masiny rehetra,

mipetraka ao an-tongotrao izy ireo,

ary samy mandray ny teninao avokoa.

4 Nanome didy antsika i Môizy;

lovan’ny fiangonan’i Jakôba.

5 Tonga mpanjaka ao amin’i Jesoròna izy,

nony nivory ny lohan’ny vahoaka

mbamin’ny fokon’i Israely rehetra.

6 Aoka ho velona fa tsy ho faty i Robena,

ary aoka tsy hihena ho vitsy ny lehilahy ao aminy.»

7 Izao kosa ny amin’i Jodà; hoy izy:

«Henoy ny feon’i Jodà, ry Iaveh,

ary ento hiverina amin’ny vahoakany izy.

Ny tanany no hiady ho an’i Israely

ary hiaro hanampy azy hamely ny fahavalony.»

8 Ny amin’i Levì dia hoy izy:

«Ny Orimanao sy ny Tomimanaodia amin’ny olonao masina,

izay nozahanao toetra tao Masà

izay nifamalianao tao amin’ny ranon’i Meribà,

9 izay nilaza tamin-drainy aman-dreniny hoe:

Tsy nahita azy ireo aho,

izay tsy nahalala ny rahalahiny

na nahafantatra na inona na inona momba ny zanany,

fa nankatò ny teninao izy,

ary nitana ny fanekenao.

10 I Jakôba, ampianariny ny fitsipikao,

ary i Israely ny lalànao.

Manolotra ny emboka manitra eo amin’ny vavoronao izy,

sy ny sorona dorana eo ambonin’ny ôtelinao.

11 Tahio ny heriny, ry Iaveh ô!

ankasitraho ny asan’ny tanany;

folahy ny andilan’izay mandrafy azy

sy izay mankahala azy: aoka tsy hiarina intsony ireny.»

12 Ny amin’i Benjamina dia hoy izy:

«Malalan’i Iaveh izy, ka handry feizay monina eo akaikiny;

arovan’i Iaveh lalandava izy,

mipetraka eo anelanelan’ny sorony».

13 Ny amin’i Josefa dia hoy izy:

«Tahin’i Iaveh ny taniny;

azy ny ando fanomezan-tsoan’ny lanitra

ny rano amin’ny hantsana lehibe monina ao ambany;

14 ny vokatsoamasakyny masoandro;

ny voan-javatra soa indrindra isam-bolana;

15 Ny vokatsoa indrindra avy amin’ny tendrombohitra fahagola;

Ny fanomezana tsara indrindra avy amin’ny havoana mandrakizay,

16 Ny fanomezana tsara indrindra avy amin’ny tany sy ny fahavokarany.

Ny fankahasitrahan’ilay nitoetra teo amin’ny zava-maniry milobolobo anie

ho tonga eo an-dohan’i Josefa,

eo amin’ny tampon’ny lohan’ny andrian’ny rahalahiny!

17 An’ny ombalahiny voalohan-teraka, azy ny dera,

tandrok’ombimanga no tandrony;

amin’io no hanotoany ny vahoaka rehetra

hatrany amin’ny fara vazantany.

Toy izany ny alinalin’i Efraima,

Toy izany ny arivoarivon’i Manase».

18 Ny amin’i Zabolôna dia hoy izy

«Mifalia, ry Zabolôna, amin’ny fandehananao,

ary ianao, ry Isakara, ao an-dainao.

19 Miantso ny vahoaka ho ao an-tendrombohitra ireo;

ao izy hanatitra sorom-pahamarinana,

fa hitsentsitra ny habetsahan-javatra avy amin’ny ranomasina izy,

sy ny harena miafina ao amin’ny fasika».

20 Ny amin’i Gada dia hoy izy:

«Hisaorana anie Ilay manome fitoerana malalaka an’i Gada!

Mandry toy ny liom-bavy Izy;

ka mamiravira ny sandry na ny loha aza

21 Nifidy ny voalohan-tany ho azy izy;

fa anjara-mpifehy no voaafina ao,

ary nandroso nialoha lalana ny vahoaka,

nanatanteraka ny fahamarinan’i Iaveh izy

sy ny fitsaràny, niaraka tamin’i Israely».

22 Ny amin’i Dana hoy izy:

«I Dana dia liona vantony,

miantoraka avy ao Basàna».

23 Ny amin’i Neftalì dia hoy izy:

«Vokin’ny tombon-tsoa ianao, ry Neftalì,

ary feno ny fitiavan’i Iaveh;

ka raiso ho fanananao ny ranomasina sy ny any atsimo».

24 Ny amin’i Asera dia hoy izy:

«Hotahina eo amin’ny zanak’i Jakôba anie i Asera,

aoka izy ho tian’ny rahalahiny indrindra

ka hanoboka ny tongony amin’ny diloilo.

25 Aoka ho vy amam-barahina ny karetsaka hidinao,

ary hifamàtra amin’ny andronao ny fiadananao.

26 Tsy misy tahaka an’Andriamanitra, ry Jesoròna ô!

izay mandia ny lanitra mba ho tonga hamonjy anao,

sy mandia ny rahona, amin’ny voninahiny.

27 Ny Andriamanitry ny taona fahagola dia fialofana,

ny sandriny mandrakizay no anohanany anao;

mandroaka ny fahavalo eo anoloanao Izy,

sady milaza hoe: Aringano.

28 Mandry feizay i Israely;

miboiboika miavaka ny loharanon’i Jakôba,

ao amin’ny tany be vary aman-divay,

ary ny lanitra ao aminy mampitsororoka ny ranonando.

29 Sambatra ianao, ry Israely! Zovy moa no toa anao!

Fa ianao dia vahoaka voavonjin’i Iaveh,

izay ampingan’ny famonjena anao,

sabatry ny voninahitrao.

Hihatsaravelatsihy eo anoloanao ny fahavalonao,

fa ianao kosa handia ny havoany».

Ny nahafatesan’i Môizy

1 Niakatra avy eo an-tany lemak’i Moaba i Môizy, nankany an-tendrombohitra Nebao, ao an-tampon’i Fasgà, tandrifin’i Jerikao.

2 Ary nasehon’i Iaveh azy avokoa ny tany rehetra dia i Galaada hatrany Dana; i Neftalì rehetra mbamin’ny tanin’i Efraima sy i Manase, ny tanin’i Jodà rehetra, hatramin’ny ranomasina andrefana;

3 Ny Negeba, ny faritanin’i Jordany, ny lohasahan’i Jerikao; dia ny tanànan’ny rofia, hatrany Segôra.

4 Dia hoy i Iaveh taminy: «Io no tany izay nianianako tamin’i Abrahama sy i Isaaka ary i Jakôba hoe: Homeko ny taranakao izany. Nataoko nahita maso azy ianao, nefa tsy hiditra eny ianao».

5 Teo no nahafatesan’i Môizy, mpanompon’i Iaveh, dia teo amin’ny tanin’i Moaba, araka ny didin’i Iaveh.

6 Ary nalevina teo an-dohasaha, amin’ny tanin’i Moaba, tandrifin’i Bety-Fogôra izy. Ary tsy misy olona mahalala ny fasany mandraka androany.

7 Efa roapolo amby zato taona i Môizy no maty, nefa ny fahiratany tsy nihena, ny tanjany tsy niala taminy.

8 Nisaona an’i Môizy telopolo andro tao amin’ny tany lemak’i Moaba ny zanak’i Israely ka tapitra ny andro fitomaniana tamin’ny fisaonana an’i Môizy.

9 Ary i Jôsoe, zanak’i Nona, dia feno ny fanahim-pahendrena, fa efa nametrahan’i Môizy tanana izy, ka nanoa azy ny zanak’i Israely sy nanao araka ny nandidian’i Iaveh an’i Môizy.

10 Tsy nisy mpaminany nitsangana teo amin’i Israely intsony sahala amin’i Môizy izay fantatr’i Iaveh mifanatrika,

11 na ny amin’ny famantarana amam-pahagagana nanirahan’i Iaveh azy tany Ejipta, hanaovany izany tamin’i Faraôna sy ny mpanompony mbamin’ny taniny rehetra,

12 na ny amin’ny tanany mahery rehetra aman-java-mahatahotra rehetra izay vitan’i Môizy teo imason’i Israely rehetra.