Baiboly Katolika (MBC)

Antoka diso toerana

1 Anaka, raha niantoka ny sakaizanao ianao,

raha nametra-tenyhiantoka ny hafa,

2 raha voasingotry ny teny naloaky ny vavanao,

sy azon’ny teny naloaky ny vavanao,

3 dia izao no mba ataovy, ry havako: mitsoaha amin’izany!

Matoa latsaka eo an-tanan’ny namanao ianao,

dia mandehana mihohoka aminy ary mandodona azy mafy!

4 Aza avela hatory ny masonao,

na ho rendremana akory ny hodi-masonao;

5 mitsoaha, toy ny serfa vavy eo an-tanan’ny mpihaza;

toy ny vorona eo an-tanan’ny mpamandrika.

Ny kamo sy ny vitsika

6 Mandehanamankany amin’ny vitsika, ry ilay kamo;

diniho ny lalany ka mbà hendry.

7 Tsy mana-mpifehy izy,

na mpitandrina ny ataony, na mpanjaka,

8 nefa fahavaratra izy mamory hanina,

manangona ny fivelomany izy amin’ny fijinjana.

9 mandra-pahoviana no mbola handrianao, ry ilay kamo,

rahoviana ianao no vao hifoha amin’ny torimasonao?

10 Torimaso kely, faharendremana kely,

fanohonan-tanana kely eo am-pandriana.

11 Dia ho tonga toy ny mpivahiny ny fahantranao,

ary toy ny lehilahy mitam-piadiana ny tsy fahampian-kanina!

Ny tsy misaina

12 Ny olona ratsy fanahy, ny olona tsy marina,

dia mandroso, ka ao am-bavany ny faharatsiana;

13 Mipipy maso, mihehy amin’ny tongony,

manao famantaranaamin’ny rantsan-tanany.

14 Ao am-pony ny faharatsiana,

misaintsaina ny ratsy lalandava izy,

ary manangana ady.

15 Koa ho avy tampoka ny faharavàny;

ho torotoro tampoka tsy azo sitranina izy.

Ny zavatra fito fankahala

16 Misy zavatra enina halan’i Iaveh,

misy fito no ataony fahavetavetana:

17 ny maso miavonavona, ny lela mandainga,

ny tanana mandatsa-dra tsy manan-tsiny,

18 ny fo mamoron-tsain-dratsy,

ny tongotra faingam-piriotra hanao ratsy,

19 ny vavolombelona tsy marina mamoaka lainga,

ary ny mamafy ady amin’ny mpirahalahy.

Anatra tohizin’ny ray

20 Anaka, tandremo ny didin-drainao,

ary aza ariana ny fampianaran-dreninao.

21 Fehezo eo ambonin’ny fonao mandrakariva ireo,

ary afatory eo amin’ny vozonao.

22 Hitarika anao amin’izay halehanao,

hiambina anao amin’ny torimasonao,

ary hiresaka aminao amin’ny fifohazanao.

23 Fa jiro ny didy, fahazavana ny lalàna,

ary lalan’aina ny fananarana mahahendry.

24 Hiaro anao amin’ny vehivavy ratsy fanahy izy,

dia amin’ny lela mandrobon’ny vehivavy an’olon-kafa.

25 Aza maniry ny hatsaran-tarehiny, ao am-ponao,

ary aza mety hambosin’ny hodi-masony ianao.

26 Fa vehivavy janga no mila tsy hananan’ny olona sombi-mofo;

ary vehivavy manam-bady no tonga fandriky ny aina sarobidy.

27 Mety hisy ve ny olona toy izao:

hisy olona hanao afo amin’ny tratrany,

ka tsy ho may ny akanjony?

28 Na hoe hisy olona handeha ambony vain’afo mivaivay,

ka tsy ho may ny tongony?

29 Toy izany izay mankamin’ny vadin’ny namany:

rehefa mikasika azy izy tsy maintsy hitondra faisana.

30 Tsy misy manafòka ny mpangalatra mandroba

hialany hanoanana, raha tsy manan-kohanina izy;

31 raha azo, dia hanonitra avo fito heny izy,

ka hanome ny fananany rehetra ao an-tranony.

32 Fa tsy misy saina kosa izay manangy vehivavy,

manary tena izay olona manao izany;

33 fery amam-pahafaham-baraka no hany azony,

sady tsy hiala aminy intsony ny fanazimbana.

34 Fa entin’ny hasarotam-piaro ny lehilahy nalainy vady dia misafoaka:

ka tsy hamindra fo izy amin’ny andro hamaliany faty.

35 Tsy hasiany raharaha akory izay vola fanavotana;

tsy horaisiny na ataonao miavosa aza ny fanatitra.

1 Anaka, tano ny teniko,

tahirizo ao aminao ny didiko.

2 Tandremo ny didiko, dia ho velona ianao,

tandremo hoatra ny anakandriamasonao ny fampianarako.

3 Afehezo ho eo ambonin’ny rantsan-tananao izy.

soraty eo amin’ny latabatry ny fonao izy.

4 Ny fahendrena ilazao hoe: Anabaviko ianao.

Ary ny fahalalana antsoy hoe sakaizanao,

5 mba hiarovany anao amin’ny vadin’ny namana,

sy amin’ny vehivavy an’olon-kafamanao teny mandrobo.

6 Teo am-baravarankelin’ny tranoko,

nitazana teo amin’ny makarakaraaho.

7 Tsikaritro teo amin’ireo tsy ampy saina,

nahatsikaritra zazalahy iray kely saina,

tamin’ireo zatovo ireo, aho.

8 Nandao teo an-dalambe, anilan’ny fonenan’ny vehivavy an’olon-kafa izy,

dia nandroso ho eo amin’ny tranony.

9 Efa takariva izay, ilay efa somambisamby iny,

tao anatin’ny alina sy ny haizina.

10 Dia indro izy nohatonim-behivavy anankiray

manao fitafian’olon-janga, manafin-kevitra am-po.

11 Mihavatravatra tsy azo atao amin’ahoana,

tsy mahapetraka an-trano ny tongony;

12 mbetika erỳ an-dalam-be, mbetika erỳ amin’ny kianja,

ary eny an-joron-trano rehetra eny izy no mitsikilo.

13 Nosavihiny ity zazalahy, dia norohany,

ary sady nanao tarehin’ny tsy valahara izy no milaza aminy hoe:

14 «Tsy maintsy nanatitra sorom-pihavananaaho,

ary nefaiko androany ny voadiko.

15 Ka dia nivoaka hitsena anao aho,

mba hitady anao, ka indro, nahita tokoa.

16 Ny farafarako efa nasiako rako-pandriana,

dia lamba fandrakofana folin’i Ejipta;

17 Ny fandriako efa norarahako zava-manitra,

dia mira, aloesy, ary sinamôma.

18 Andeha isika hivoky fitia, mandra-paharain’ny andro,

andeha isika hiarana amin’ny fahafinaretan’ny nofo.

19 Fa tsy ao an-trano ny vadiko,

lasa nivahiny lavitra izy.

20 Nentiny any aminy any, ny kitapom-bola.»

21 Ambosiny amin’ny teny maro eo izy,

ary taominy amin’ny tenin’ny molony;

22 dia rafitra nanaraka azy miaraka amin’izay izy,

tahaka ny omby entina hovonoina,

tahaka ny adala mihazakazaka ho any amin’ny gadra anasaziana azy,

23 mandra-pilentiky ny zana-tsipìka amin’ny atiny;

tahaka ny vorona miantoraka amin’ny fandrika,

tsy mahalala fa mihatra amin’ny ainy izany.

24 Ka ankehitriny, anaka, henoy aho,

ary henoy tsara ny teny aloaky ny vavako.

25 Aoka ny fonao tsy hivily hankany amin’ny lalan’io,

aza maniasia any amin’ny sakeli-dalany.

26 Fa maro no efa noratrain’izy io,

ary betsaka no voan’izy io.

27 Ny tranony dia lalana mankany amin’ny Seoly,

izay midina ho any amin’ny fonenan’ny fahafatesana.

Teny anatry ny Fahendrena

1 Tsy miantso va ny fahendrena,

ary tsy manandra-peo ve ny fahalalana?

2 eo an-tampon’ny toerana avo, eo amin’ny lalana,

eo an-tsampanan-dalana izy no lasa mipetraka;

3 eo akaikin’ny varavarana sy amin’ny fidirana ho ao an-tanàna,

eo amin’ny fidirana amin’ny vavahady izy,

mampandre ny feony:

4 «Ianareo, ry olona, no hiantsoako,

ary ny zanak’olombelona no alehan’ny feoko.

5 Mianara fahendrena, ry kely saina;

mianara fahalalana, ry adala.

6 Mihainoa, fa manan-java-tsoa holazaina aho,

ary misokatra hampianatra ny mahitsy ny molotro.

7 Fa ny marina no ambaran’ny vavako,

ary ny tsy marina dia fahavetavetana ho an’ny molotro.

8 Marina avokoa ny teny aloaky ny vavako:

fa tsy mba misy diso na safelipeli-teny.

9 Marina avokoa izy, ho an’izay mazava saina;

ary mahitsy ho an’izay nahazo ny fahaizana.»

10 Raiso mihoatra noho ny volafotsy ny anatro;

ary mihoatra noho ny volamena madio ny fahaizana.

11 Fa ambony vidy noho ny voahangy ny fahendrena,

ary ny zavatra sarobidy indrindra aza tsy mitovy aminy.

Fahendren’ny mpanjaka Siràka (Ekleziastika) 24

12 «Izaho Fahendrena, dia miara-monina amin’ny fahamalinana,

ary manana ny fahaizana sy ny fandinihana.

13 (Ny fankahalana ny ratsy no fahatahorana an’i Iaveh);

ny rehareha aman’avonavona, ny lalan’ny haratsiana,

ary ny lela fandainga, dia izany no halako.

14 Ahy ny fisainana amam-pahombiazana;

Izaho no fahazavan-tsaina, ahy ny hery.

15 Izaho no anjakan’ny mpanjaka,

sy andidian’ny mpanapaka izay rariny.

16 Izaho no anapahan’ny mpifehy,

mbamin’ny lehibe, dia ny mpitsaran’ny tany rehetra.

17 Tiako izay tia ahy,

ary mahita ahy izay fatra-pikatsaka ahy.

18 Ato amiko ny harena amam-boninahitra,

ny soa mateza amam-pahamarinana.

19 Ny vokatro ambony vidy noho ny volamena, dia volamena madio indrindra;

ary ny avy amiko dia mihoatra noho ny volafotsy voafantina.

20 Mizotra eo amin’ny lalan’ny fahamarinana aho,

eo amin’ny sakeli-dalan’ny fitsarana,

21 mba hampahazo harena an’izay tia ahy,

sy hameno tsara ny firaketany.»

Ny fahendrena nahary ny zavatra rehetra

22 «Nanana ahyhatramin’ny fiandohan’ny lalany i Iaveh,

dia talohan’ny asany ela indrindra.

23 Efa niorina hatramin’ny mandrakizay aho,

hatramin’ny voalohany, talohan’ny niandohan’ny tany.

24 Tamin’ny namoronana ahy, tsy mbola nisy ny hantsana,

tsy mbola nisy ny loharano nitoeran-drano.

25 Talohan’ny nanorenana ny tendrombohitra;

efa teraka aho talohan’ny havoana;

26 fony tsy mbola nisy nataony na ny tany na ny tany lemaka,

na ny zavatra iforonan’ny vovok’izao tontolo izao,

27 Efa teo aho, fony Izy nandamina ny lanitra,

fony Izy nanoritra faribolana tambonin’ny hantsana,

28 fony Izy nampitoetra ny rahona eny ambony;

sy namolaka ny loharano avy amin’ny hantsana,

29 fony Izy nanisy faritra ho an’ny ranomasina,

mba tsy hihoaran’ny rano ny morony;

fony Izy nandatsaka ny fanorenan’ny tany.

30 Izaho dia niasa teo anilany,

niravoravo isan’andro isan’andro,

nilalao teo anatrehany mandrakariva,

31 nilalao teo amin’ny gilôbin’ny taniny,

ary nahita fahafinaretana teo amin’ny zanak’olombelona.»

Antso ambony dia ambony

32 «Ka izao, anaka, henoy aho;

Sambatra izay manaraka ny lalako!

33 Mba ho tonga hendry, henoy ny fampianarana,

fa aza ariana.

34 Sambatra ny olona mihaino ahy,

sy miari-tory isan’andro eo am-baravarako,

ary miandry eo amin’ny tolàm-baravarako!

35 Izay mahita ahy, nahita fiainana;

sady mahazo sitraka amin’i Iaveh.

36 Fa izay maneso ahy mandratra ny fanahiny

izay rehetra mankahala ahy, mila faty.»

Fanasana iantsoan’ny Fahendrena

1 Ny Fahendrena efa nanorina ny tranony,

efa nipaika ny andriny fito,

2 efa namono ny bibiny, nampifangaro ny divainy,

ary efa nanamboatra ny latabany.

3 Naniraka ny ankizy vavinyizy, dia miantso

eo an-tampon’ny havoan’ny tanàna:

4 Aoka hiditra atỳ izay kely saina!

Ary hoy izy amin’izay tsy manan-tsaina:

5 «Avia, hano ny mofoko,

ary sotroy ny divay nampifangaroiko.

6 Ilaozy ny tsy fahalalana, dia ho velona ianareo;

ary mizora amin’ny lalan’ny fahazavan-tsaina.»

Hanoherana ny mpanaraby

7 Araby no azon’izay mananatra ny mpananihany,

ary ala baraka no hitan’izay mandevilevy ny ratsy fanahy.

8 Aza mananatra ny mpananihany fandrao dia hàlany ianao;

fa ny hendry no anaro, dia ho tiany ianao.

9 Omeo hevitra ny hendry, hihahendry kokoa;

toroy saina ny marina, hitombo fahalalana.

10 Ny fahatahorana an’i Iaveh no fiandohan’ny fahendrena;

ary ny fahazavan-tsaina no fahalalana an’ilay Masina.

11 Fa izaho no hihamaroan’ny andronao,

sy hitomboan’ny taona iainanao.

12 Raha hendry ianao, dia soa ho anao ny hendry;

fa raha mpamazivazy kosa, ianao ihany no hivesatra ny sazin’izany.

13 Ny fahadalana dia vehivavy vavàna,

donto saina, ary tsy mahalala na inona na inona.

14 Mipetraka eo am-baravaran’ny tranony izy,

mitaingin-tseza eo an-tampon’ny havoan’ny tanàna,

15 mba hiantso ny mpandalo,

izay mizotra amin’ny lalan-kalehany.

16 Aoka hiditra atỳ, izay kely saina!

Ary hoy izy amin’izay tsy manan-tsaina:

17 Mamy ny rano angalarina,

ary fy ny mofo hanina am-piafenana!

18 Tsy fantany fa misy ambiroa ao,

ary efa any amin’ny fanambanin’ny Seoly sahady ny nasainy.

Ny mpivavaka sy ny ratsy fanahy

1 Ohabolan’i Salômôna.

Ny zanaka hendry mahafaly ny rainy,

fa ny zanaka adala mampahory ny reniny.

2 Ny harena azo aman-keloka, tsy mahasoa akory,

fa ny fahamarinana mamonjy amin’ny fahafatesana.

3 Tsy avelan’i Iaveh ho mosarena ny marina,

fa toheriny kosa ny fanirian’ny ratsy fanahy.

4 Izay malaina amin’ny asany, ho tonga mahantra,

fa ny tanan’ny mazoto kosa, manangon-karena.

5 Zanaka hendry izay mamory amin’ny fararano;

fa zaza ahazoan-kenatra kosa, izay matory amin’ny taom-pijinjana.

6 Ny lohan’ny marina iaviam-pitahiana,

fa ny vavan’ny ratsy fanahy kosa tototra faharatsiana.

7 Ny fahatsiarovana ny marina, dia ankasitrahana azy,

fa ny anaran’ny ratsy fanahy kosa, lo no alehany.

8 Izay hendry am-po mandray ny didy;

fa ny adala amin’ny vavanykosa mamantana amin’ny fahaverezana.

9 Izay mandeha tsy manan-tsiny no mandeha matoky;

fa izay maniasia lalana, ho fantatra eny ihany.

10 Izay mihiringiri-maso, ho fototr’alahelo;

ary izay adala amin’ny vavany kosa mamantana amin’ny fahaverezana.

11 Ny vavan’ny marina dia loharanon’aina;

fa ny vavan’ny ratsy fanahy kosa, tototra faharatsiana.

12 Ny fankahalana, mihantsy ady;

fa ny fitiavana kosa, manarona ny hadisoana rehetra.

13 eo amin’ny molotry ny manan-tsaina, ny fahendrena,

fa tsora-kazo kosa no ho eo amin’ny lamosin’ny tsy ampy saina.

14 Tahiry raketin’ny hendry ny fahendrena;

fa loza mananontanona kosa ny vavan’ny adala.

15 Tanàna mimanda ho an’ny manana, ny hareny,

fa ny loza mahazo ny tsy manana kosa dia ny fahantrany.

16 Ny asan’ny marina dia ho an’ny fiainana;

fa ny fitomboan-karen’ny ratsy fanahy kosa dia ho an’ny fahotana.

17 Izay mihaino tsara ny fampianarana dia mandeha amin’ny lalan’aina,

fa izay manadino ny fananarana kosa maniasia.

18 Fandainga ny molotr’izay manafina ny fankahalana,

ary adala izay mitati-bolana.

19 Ny teny maro tsy ilaozan’ny ota,

fa ny mahatam-bava no olon-kendry.

20 Volafotsy voafantina ny lelan’ny marina,

fa tsy misy vidiny kosa, ny fon’ny ratsy fanahy.

21 Ny molotry ny marina, mamahana olona betsaka,

fa ny ratsy fanahy kosa, matin’ny tsy fananany fahalalana.

22 Ny fanambinan’ny Tompo no mampanan-karena;

ary ny fisasaran’ny olona tsy manampy izany akory.

23 Ny manao ratsy no ataon’ny adala ho lalao;

ary toy izany koa ny fahendrena amin’ny olona manan-tsaina.

24 Izay atahoran’ny ratsy fanahy, mihatra aminy;

ary izay irin’ny marina kosa omen’Andriamanitra azy.

25 Toy ny fihelenan’ny tafio-drivotra no anjavonan’ny ratsy fanahy;

fa fanorenana mandrakizay kosa no nampitoerana ny marina.

26 Tahaka ny vinaingitra amin’ny nify sy ny setroka amin’ny maso,

no ataon’ny malaina, amin’izay maniraka azy.

27 Ny fahatahorana an’i Iaveh, maha lava andro,

fa ny taonan’ny ratsy fanahy kosa hohafohezina.

28 Ny fanantenan’ny marina, dia fifaliana;

fa ny fanantenan’ny ratsy fanahy kosa ho foana.

29 Ny lalan’i Iaveh, manda fiarovana ho an’ny marina,

fa ny fandringanana kosa ho an’izay manao ratsy.

30 Ny marina tsy hangozohozo na oviana na oviana;

fa ny ratsy fanahy kosa tsy honina amin’ny tany.

31 Ny vavan’ny marina, itsimoham-pahendrena;

fa ny lela mandainga kosa hongotana.

32 Ny molotry ny marina mahalala izay mahafinaritra,

fa ny vavan’ny ratsy fanahy kosa, mahalala ny haratsiana.

Ny mahitsy fo sy ny ratsy fo

1 Ny mizàna mandainga, dia ankahalain’i Iaveh,

fa ny lanja marinano ankasitrahiny.

2 Raha tonga ny fiavonavonana, ho tonga koa ny fahafaham-baraka;

fa ny fahendrena kosa miaraka amin’ny manetry tena.

3 Ny fahatsoran’ny olo-mahitsy fo mitari-dalana azy,

fa ny fiolikoliky ny mpamadika kosa, mandringana azy.

4 Ny harena tsy mahasoa amin’ny andron’ny fahatezerana;

fa ny fahamarinana no manafaka amin’ny fahafatesana.

5 Ny fahamarinan’ny marina, manitsy ny lalany,

fa ny ratsy fanahy kosa lavo noho ny faharatsiany.

6 Ny fahamarinan’ny olo-mahitsy fo mamonjy azy;

fa ny olona mpivadika kosa, voafandriky ny haratsiany.

7 Rehefa maty ny ratsy, foana ny fanantenany;

ary levona ny fanantenan’ny mpanao ratsy.

8 Ny marina vonjena ho afa-pahoriana;

fa ny ratsy fanahy no hilatsaka hisolo azy ao.

9 Ny tsy mivavaka manomana ny fandringanana ny namany, amin’ny vavany;

fa ny marina dia hovonjena amin’ny fahaizana.

10 Mifaly ny tanàna, raha sambatra ny marina;

mihoby hafaliana ny olona, raha ringana ny ratsy fanahy.

11 Ny tso-dranon’ny olo-mahitsy fo no androsoan’ny tanàna,

fa ny vavan’ny ratsy fanahy mandrava aza.

12 Tsy ampy saina izay manamavo ny namany,

fa ny manan-tsaina mangina.

13 Ny mpifosa manambara ny zavatra afenina;

fa ny olona mahatoky kosa, mitana izany tsy hiseho.

14 Rava ny vahoaka tsy misy mpitondra;

fa ny hamaroan’ny mpanolo-tsaina foto-pamonjena.

15 Izay miantoka olon-tsy fantany, ho tratry ny nenina;

fa izay malain-kiantoka, dia handry feizay.

16 Ny vehivavy mahafinaritra, mahazo voninahitra;

ny lehilahy mahery fo, mahazo harena.

17 Ny olona antra namana, manao soa amin’ny fanahiny;

fa ny olona loza be, mampahory ny nofony.

18 Ny ratsy fanahy manao lahasa manodòka,

fa izay mamafy fahamarinana kosa dia efa azo antoka ny valiny.

19 Ny fahamarinana mahatonga amin’ny fiainana;

fa izay manenjika ny haratsiana iharam-pahafatesana.

20 Halan’i Iaveh ny olona ratsy fo,

fa izay tsy manan-tsiny amin’ny lalany dia ankasitrahiny.

21 Eny tokoa tsy ho afa-tsazy ny ratsy fanahy,

ary ny taranaky ny marina ho voavonjy.

22 Toy ny kavim-bolamena eo amin’ny oron-kisoa,

ny vehivavy tsara tarehy tsy ampy saina.

23 Ny soa ihany no hany irin’ny marina;

fa ny hotezerana kosa no andrasan’ny ratsy fanahy.

24 ity mahafoy an-kazavam-po moa, mitombo harena;

fa itsy fatra-pitsitsy, vao mainka mahantra.

25 Ny fanahymanao soa, hohatavezina;

ary izay manondraka dia hotondrahana koa.

26 Izay tsy mamoaka ny variny ozonin’ny vahoaka,

fa ny lohan’izay mivarotra azy no idinan’ny tso-drano.

27 Izay mikatsaka ny tsara mahazo fanambinana,

fa izay mitaky ny ratsy, ho tratry ny ratsy.

28 Ho lavo izay mitoky amin’ny harena,

fa hitsimoka toy ny ravina kosa ny marina.

29 Izay manakorontana ny tranony, handova rivotra,

ary izay adala, ho tonga mpanompon’ny olon-kendry.

30 Hazon’aina no vokatry ny marina;

ary hendry izay mahazo ny fanahin’olona.

31 Raha ny marina aza, valiana sazy atỳ an-tany;

mainka ny ratsy fanahy sy ny mpanota.

Ny olona marina sy ny ratsy fanahy

1 Izay tia fampianarana tia fahaizana;

fa izay mandà anatra, adala.

2 Ny ratsy fanahy mahazo sitraka amin’i Iaveh;

fa ny mpanao an-kasomparana, helohin’i Iaveh.

3 Tsy ny haratsiam-panahy no nampiorina mafy ny olona;

fa ny fakan’ny marina tsy ho voahetsiketsika.

4 Ny vehivavy tsara fanahy, satroboninahitry ny lahy;

fa ny vehivavy afa-baraka toy ny homamiadana ao amin’ny taolany.

5 Ny rariny no fihevitry ny marina;

fa ny fitaka no fieritry ny ratsy fanahy.

6 Fandrika mahafaty, ny tenin’ny ratsy fanahy;

fa vonjy ho azy kosa, ny vavan’ny olo-mahitsy fo.

7 Vao mihodina indray mandeha ny ratsy fanahy, dia tsy eo intsony;

fa mijoro hatrany kosa, ny ankohonan’ny marina.

8 Araka ny haben’ny fahalalany, no anombanana ny olona;

nefa izay ratsy fo, dia atao tsinontsinona.

9 Aleo olona ambany toetra, ampy amin’izay ilainy;

toy izay be voninahitra tsy manan-kohanina.

10 Ny marina mitsimbina ny amin’ny bibiny;

fa ny kibon’ny ratsy fanahy kosa, masiaka.

11 Izay miasa ny taniny, ho voky hanina;

fa izay manenjika zava-poana, no adala foana.

12 Ny ratsy fanahy maniry ny rembin’ny ratsy fanahy,

fa ny fakan’ny marina kosa, mahavokatra.

13 Misy fandrika mandoza, amin’ny fahotan’ny molotra;

fa ny marina afa-miala amin’ny fahoriana.

14 Ny vokatry ny vavan’ny olona, no hamoky soa azy;

ary araka ny asan-tanany avy, no hatsingerina aminy.

15 Ny lalan’ny adala mahitsy eo imasony;

fa ny torohevitra kosa no henoin’ny hendry.

16 Ny adala miseho ho tezitra miaraka amin’izay;

fa ny olona malina kosa mahay mody tsy mahita ny fanesoana azy.

17 Izay milaza ny marina dia milaza ny mety,

fa ny vavolombelona mandainga kosa manambara fitaka.

18 Mandratra toy ny sabatra izay miteny antsapatsapaka

fa mampahazo fahasitranana kosa, ny lelan’ny hendry.

19 Ny lela mpilaza ny marina haharitra mandrakizay;

fa ny lela fandainga kosa, ho voakorokoro poa toy izay.

20 Fitaka no ao am-pon’izay mamoron-tsain-dratsy;

fa hafaliana kosa no ho an’izay manoro fihavanana.

21 Ny marina tsy mba iharan-doza;

fa ny ratsy fanahy tsindrian’ny loza.

22 Halan’i Iaveh ny molotra mandainga;

fa ny manaraka ny marina no ankasitrahiny.

23 Ny olo-marina manafina ny fahaizany;

fa ny fon’ny adala manely ny fahadalany.

24 Ny tanana velom-pitandremana, hanapaka;

fa ny tanana mipozipozy hampanompoana.

25 Ny alahelo ao am-pon’ny olona, mampilofika azy;

fa ny teny soa kosa, mahafaly azy.

26 Ny marina manoro lalana ny sakaizany;

ny lalan’ny ratsy fanahy kosa mampivilivily azy.

27 Ny kamo tsy manatona ny hazany akory;

fa ny faharisihana no rakitra soa ho an’ny olona.

28 Fiainana no eo amin’ny lalan’ny fahamarinana;

ary tsy fahafatesana no eo amin’ny lalana soritany.

Fahotana amin’ny vava

1 Ny zanaka hendry vavolombelon’ny fampianaran-drainy;

fa ny mpamazivazy tsy mihaino ny fananarana.

2 Ny vokatry ny vavan’ny olona, no itsentsefany ny soa;

fa ny irin’ny mpamadika dia ny hanaovana an-keriny.

3 Izay mahafehy ny vavany, miaro ny fanahiny;

fa izay fatra-piloa-bava kosa, mitady ny lozany.

4 Be faniriana ny kamo, fa tsy ho tanteraka,

fa ny fanirian’ny olo-mazoto kosa, ho tanteraka mahafa-po.

5 Ny marina mankahala ny teny mamitaka;

ny ratsy fanahy kosa mampahazo henatra sy fahafaham-baraka.

6 Ny fahamarinana miaro ny lalan’ny olo-marina;

ny faharatsiana kosa, mahatonga fandravana ny mpanota.

7 Misy mody manan-karena, nefa tsy manana inoninona;

misy mody mahantra, nefa manan-karem-be.

8 Ny harena dia avotra aina ho an’ny olona;

ny malahelo kosa tsy mandre akory izay fandrahonana.

9 Ny fahazavan’ny marina, mamiratra mahafinaritra;

fa ny jiron’ny ratsy fanahy kosa, mitsilopilopy ho faty.

10 Fifandirana no hany ateraky ny avonavona;

fa izay mety toroana no misy fahendrena.

11 Ny harena azo tsy an-drariny, mihalevona;

fa ny manangona azy tsikelikely no mampitombo azy.

12 Ny fanantenana ela fiavy, mankarary ny fo;

fa ny faniriana tanteraka kosa, dia hazon’aina.

13 Manary tena izay manamavo ny teny;

fa hahazo valisoa kosa, izay manaja ny didy.

14 Loharanon’aina ny fampianaran’ny hendry;

mba ho afaka amin’ny fandriky ny fahafatesana.

15 Vokatry ny saina mandroso fianarana, dia mahate-hotia;

fa ny lalan’ny mpamadika, dia sarotra.

16 Ny olo-marina rehetra miasa amim-piheverana;

fa ny adala kosa manampatra ny hadalany.

17 Ny iraka ratsy fanahy idiran-doza,

fa ny iraka mahatoky kosa, ahazoam-panasitranana.

18 Fahoriana aman-kenatra no an’izay mandà famaizana;

fa omem-boninahitra kosa, izay mandray fananarana.

19 Ny faniriana tanteraka, maharavoravo ny fo;

ary ny miala amin’ny ratsy mahatsiravina ny adala.

20 Ny tamà-miaraka amin’ny hendry, hihahendry;

fa ny mivarilena amin’ny adala, hiharatsy.

21 Ny mpanota enjehin-doza;

ny marina kosa valian-tsoa.

22 Ny mpanao soa mamela lova ho an’ny zanaky ny zanany;

fa ny haren’ny mpanota kosa, voatendry ho an’ny marina.

23 Ny tany voasan’ny mahantra, ahazoan-kanina be;

ny sasany kosa ringana, noho ny tsy fahamarinany.

24 Tsy tia anaka izay mitsitsy ny tsora-kazony;

fa ny tia azy, mamay azy malaky.

25 Ny marina mihinana sady afa-po tsara;

fa ny kibon’ny ratsy fanahy kosa zoin’ny tsy ampy lava.

Torohevitra soa

1 Ny vehivavy hendry, manorina ny tranony;

ny vehivavy adala kosa, mandrava azy amin’ny tanany.

2 Izay matahotra an’i Iaveh, mizotra araka ny fahitsiam-po;

izay maniratsira azy kosa mivaona fandeha.

3 Ny vavan’ny adala, misy tsora-kazom-piavonavonana;

ny molotry ny hendry kosa miaro ny tenany.

4 Izay tsy misy omby, foana fihinanam-bilona;

fa ny herin’ny omby ahazoan-tombony betsaka.

5 Ny vavolombelona mahatoky, tsy mba mandainga;

fa ny vavolombelona tsy marina kosa, milaza lainga.

6 Ny mpamazivazy mitady, fa tsy mahita ny fahendrena;

fa mora azon’ny manan-tsaina kosa ny fahaizana.

7 Mialà amin’ny adala,

satria fantatrao fa tsy misy fahendrena eo amin’ny molony.

8 Fahendren’ny olo-malina, ny nahafantatra ny lalany;

fahadalan’ny adala ny fitaka.

9 Ny adala mihomehy ny ota;

fa ao amin’ny olo-mahitsy fo no misy fanehoam-pitiavana.

10 Ny alahelon’ny fo, izy ihany no mahalala;

ny hafaliany koa, tsy hain’ny hafa iombonana.

11 Ny tranon’ny ratsy fanahy, horavana;

fa ny lain’ny mahitsy fo, ambinina.

12 Misy lalàna miseho ho mahitsy amin’ny olona;

kanjo lalana mankany amin’ny fahafatesana no iafarany.

13 Na dia eo amin’ny hehy aza mahatsiaro ory ny fo;

ary ny fifaliana miafara amin’ny fisaonana.

14 Ny tsy mivavaka, ho vokin’ny lalany,

ny tsara fanahy, ho vokin’ny soa nataony.

15 Ny kely saina mino izay teny rehetra ambara aminy;

ny olo-malina kosa, mitandrina ny diany.

16 Ny hendry matahotra, ka mivily tsy ho amin’ny ratsy;

ny adala kosa mitroatra sy matokitoky foana.

17 Ny olona mora tezitra, mahavita hadalana,

ary ny sompatra koa miantso fankahalana azy.

18 Hadalana no anjaran’ny kely saina.

Ary satroboninahitra no azon’ny malina amin’ny fahaizany.

19 Miondrika eo anatrehan’ny tsara fanahy ny ratsy fanahy;

ary eo am-baravaran’ny marina, ny tsy mpivavaka.

20 Ny mahantra, olon-kala na amin’ny sakaizany aza;

fa ny manan-karena, no maro sakaiza.

21 Manota izay manamavo ny namany;

fa sambatra izay miantra ny mahantra.

22 Tsy maniasia va ry zareo mamoron-tsain-dratsy?

ary moa tsy fanambinana amam-pahamarinana kosa va

no ho an’izay mihevitra ny soa?

23 Ny asa rehetra mitera-piadanana;

fa ny teniteny foana kosa, mamarina amin’ny tsy fahampiana.

24 Satroboninahitra ho an’ny hendry ny hareny;

fa ny fahadalan’ny adala dia hadalana lava.

25 Ny vavolombelona marina, mamonjy fanahy,

ny hafetsen-dratsy mamoaka lainga.

26 Izay matahotra an’i Iaveh, miankina amin’ny andry mafy,

ary ny zanany manam-pialofana mahatoky.

27 Ny fahatahorana an’i Iaveh no loharanon’aina,

mba ho afaka amin’ny fandriky ny fahafatesana.

28 Ny hamaroan’ny vahoaka no voninahitry ny mpanjaka;

ny fahavitsian’ny olony kosa dia fahafongoran’ny mpanapaka.

29 Ny mahatsindry fo, be saina,

ny malaky tezitra maneho ny hadalany.

30 Ny fo mionona, fiainana ho an’ny nofo;

ny fialonana kosa homamiadana amin’ny taolany.

31 Ny mampahory ny mahantra, maniratsira Ilay nanao azy;

fa ny miantra ny tsy manana no manome voninahitra Azy.

32 Ny ratsy fanahy azeran’ny faharatsiany;

ny marina kosa matoky hatrany am-pahafatesana aza.

33 Ny fon’ny olona manan-tsaina no itoeran’ny fahendrena,

ka eo afovoan’ny adala dia fantatra eo ihany izy.

34 Ny fahamarinana manandratra ny firenena;

ny fahotana kosa fahafaham-baraka amin’ny vahoaka.

35 Ny tombom-pitian’ny mpanjaka, ho an’ny mpanompo manan-tsaina,

ny hatezerany kosa ho an’izay mampahamenatra.

Ny hendry sy ny adala

1 Ny valin-teny mora, mampitony havinirana;

fa ny teny henjana, mampirehi-katezerana.

2 Ny lelan’ny hendry, mahatonga ny fahaizana ho mahatehotia,

ny vavan’ny adala miboiboika hadalana.

3 Ny mason’i Iaveh, dia amin’ny fitoerana rehetra;

mijery ny ratsy fanahy sy ny tsara fanahy.

4 Ny teny mora, dia hazon’aina;

fa ny vava ratsy, mamaky ny fo.

5 Ny adala maniratsira ny fampianaran-drainy;

fa izay manararaotra ny fananarana kosa mihahendry.

6 Harem-be no ao an-tranon’ny marina;

fikorontanana kosa no ao amin’ny fitomboan-karen’ny ratsy fanahy.

7 Ny molotry ny hendry mampiely ny fahaizana;

fa tsy mba ny fon’ny adala.

8 Ny soron’ny ratsy fanahy dia ankahalain’i Iaveh;

fa ny vavaky ny olo-mahitsy kosa, ankasitrahiny.

9 Ny lalan’ny ratsy fanahy, fahavetavetana eo imason’i Iaveh;

fa ny manaraka ny rariny, no tiany.

10 Famaizana mafy no mihatra amin’izay mivily lalana;

izay mankahala anatra dia ho faty.

11 Ny Seolysy ny hantsanamiharihary eo anatrehan’i Iaveh:

ka mainka ny fon’ny zanak’olombelona!

12 Tsy te hanarina ny mpamazivazy;

ka tsy manatona ny hendry izy.

13 Ny fo ravoravo, mahamiramirana endrika,

fa raha malahelo kosa ny fo dia reraka ny fanahy.

14 Ny fo manan-tsaina, mikatsaka ny fahaizana,

fa ny vavan’ny adala mifahana fahadalana.

15 Ratsy avokoa ny andron’ny mijaly,

fa fanasana lava ny fo ravoravo.

16 Aleo ny kelyombam-pahatahorana an’i Iaveh,

toy izay ny harem-be omban’ahiahy.

17 Aleo anana ombam-pitiavana;

toy izay omby mifahy, ombam-pankahalana.

18 Ny olo-masiaka manetsika ady,

ny mahatsindry fo kosa, mampitsahatra fifandirana.

19 Ny lalan’ny kamo, toa fefy tsilo;

ny lalan’ny olo-mahitsy dia voaarina tsara.

20 Ny zanaka hendry mahafaly ny rainy;

ny adala kosa maneso ny reniny.

21 Hafaliana ho an’ny olona tsy ampy saina, ny hadalana,

fa ny olona manan-tsaina, momba ny lala-mahitsy.

22 Foana ny fikasana raha tsy misy ny fisainana;

fa tanteraka kosa izy, raha maro no manolo-tsaina.

23 Fifaliana ho an’ny olona, raha nahavaly tsara ny vavany;

ary mahafinaritra aoka izany ny teny atao amin’izay antonona azy.

24 Ny hendry mizotra lalan’aina miakatraho any ambony;

mba hivily tsy hankany amin’ny Seoly izay any ambany.

25 Ny tranon’ny mpiavonavona, ravàn’i Iaveh;

fa ny baorina mamaritra ny an’ny mpitondra tena kosa aoriny mafy.

26 Halan’i Iaveh ny hevi-dratsy;

fa madio eo imasony, ny teny maneho fitiavana.

27 Izay fatra-pikatsaka loatra ny fitomboan-karena

manakorontana ny ankohonany;

fa izay mankahala kolikoly no ho velona.

28 Ny fon’ny marina, mihevitra izay tokony hovaliany,

fa ny vavan’ny adala mitsaontsaon-dratsy.

29 Lavitra ny ratsy fanahy i Iaveh,

fa ny vavaky ny marina henoiny.

30 Ny fijery maneho fitiavana maharavo ny fo;

ny vaovao mahafaly mankatavy ny taolana.

31 Ny sofina mihaino anatra mahavonjy,

manana anjara toerana eo amin’ny hendry.

32 Izay mandà anatra manamavo ny fanahiny;

fa izay mihaino fananarana mahazo ny fahendrena.

33 Ny fahatahorana an’i Iaveh, no fianarana ny fahendrena;

ary ny fanetren-tena no mialoha ny fisandratana.